Chapter 18

śrīkṛṣṇa uvāca |
śṛṇu rādhe bhādrapade pitṛpakṣe harergṛham |
aryamādikapitṝṇāṃ haraye'rpayituṃ sutāḥ || 1 ||
[Analyze grammar]

kanyāḥ samāgatā miṣṭapāyasānnatilānvitāḥ |
phalapuṣpā'gurukastūrikākuṃkumataṇḍulaiḥ || 2 ||
[Analyze grammar]

karpūrādyairyuktasauvarṇādipātrasamanvitāḥ |
purāṇadevapūjārthaṃ sarvaśṛṃgāraśobhitāḥ || 3 ||
[Analyze grammar]

vimānairdivyasāmagrīsaṃbhṛtaiḥ premasaṃplutāḥ |
amāvāsyādine sarvāścāyayurlomaśāśramam || 4 ||
[Analyze grammar]

lomaśaṃ prathamaṃ natvā guruṃ ca pitaraṃ param |
sasmaruśca hariṃ tatra kṛṣṇanārāyaṇaṃ hi tāḥ || 5 ||
[Analyze grammar]

tāvattatra bālakṛṣṇaścāyayau lomaśāśramam |
kanyāpradattapūjādigrahaṇārthaṃ dayāvaśaḥ || 6 ||
[Analyze grammar]

pitṛkanyāḥ kṛṣṇanārāyaṇamāyāntamujjvalam |
manoharaṃ kiśoraṃ ca vilokyotthāya satvaram || 7 ||
[Analyze grammar]

abhijagmuḥ pramodena nemurlājā'kṣatādibhiḥ |
vardhayāmāsuratyarthaṃ nipetuḥ pādayorhareḥ || 8 ||
[Analyze grammar]

abhibhāṣya ca kuśalaṃ parasparamanāmayam |
puṣpahārān dadustasya gale sahasrakanyakāḥ || 9 ||
[Analyze grammar]

padrajo mastake dhṛtvā mūrtiṃ nyadhuśca mānase |
nyadhū rūpaṃ netrayośca snehaṃ nyadhustadantare || 10 ||
[Analyze grammar]

svayaṃ nyadhuścārpaṇe'tha militvā''śramamāyayuḥ |
brahmasarobhiḥ kanyābhiḥ satyalokīyamuttamam || 11 ||
[Analyze grammar]

divyamarpitamevādau haṃsāsanaṃ vimānavat |
śatacandrābhinaddhaṃ ca svarṇavarūthaśobhitam || 12 ||
[Analyze grammar]

amṛtasrāvi paritaḥ sugandhanirjharānvitam |
svayaṃ dolāyamānaṃ ca gītisvaramanoharam || 13 ||
[Analyze grammar]

yathākāmaṃ ca gatimaccaitanyastambabhūṣitam |
maṇisopānasaṃrājat sphāṭikapārśvaghaṭṭitam || 14 ||
[Analyze grammar]

mṛduvibhūtigaddīkātulikāpaṭṭarājitam |
adhyāruroha bhagavān kṛṣṇanārāyaṇaśca tat || 15 ||
[Analyze grammar]

siṃhāsanācchataguṇā śobhā harestadā'bhavat |
athā'psarobhiḥ kanyābhirupānahau sukomale || 16 ||
[Analyze grammar]

makhamallakṛte mṛdvyau vidyuccandrikatārakaiḥ |
svarṇarājatasantānairbharatena virājite || 17 ||
[Analyze grammar]

indragosannibhe ramye cārpite pādayorhareḥ |
niryātaste yathākāmaṃ yathākāmaṃ dhṛtikriye || 18 ||
[Analyze grammar]

kṛṣṇena ca pramodena dhṛte tūpānahau yadā |
ākṣaraṃ divyamevā''bhyāṃ tejaḥ prakaṭitaṃ bahu || 19 ||
[Analyze grammar]

yadavyāpnod digantāṃśca koṭicandranibhaṃ tadā |
athā'ryamādisūryāṇāṃ kanyābhiśchatramarpitam || 20 ||
[Analyze grammar]

suvarṇakaṭavastrāḍhyaṃ rājatīkiṃkiṇīyutam |
suvarṇakalaśaṃ ratnadaṇḍaṃ bhāsuramujjvalam || 21 ||
[Analyze grammar]

kauśeyamañjarīyuk ca ādityacitrarājitam |
atha kuberakanyābhiḥ pādapīṭhaḥ samarpitaḥ || 22 ||
[Analyze grammar]

mṛdusuvarṇakhacitaścandanadrumanirmitaḥ |
siṃhapādasuśobhāḍhyaścāṣṭakoṇasamanvitaḥ || 23 ||
[Analyze grammar]

padmapatramiva svacchaḥ śītalastejasānvitaḥ |
ādarśakhacitaḥ pārśve madhye candravirājitaḥ || 24 ||
[Analyze grammar]

tatra nyadhāccaraṇau śrīpatiḥ svāmipumuttamaḥ |
atha śailasya kanyābhiścāmarau śvetagobhavau || 25 ||
[Analyze grammar]

ratnasuvarṇadaṇḍau cārpitau kṛṣṇāya tuṣṭaye |
athendrakanyakābhiścārpitaṃ vetraṃ tu kānakam || 26 ||
[Analyze grammar]

vedhomastakasaṃśobhaṃ kambukaṇṭhaṃ ca vakṣasi |
valayairvividhairyuktaṃ tato vallyudaraṃ śubham || 27 ||
[Analyze grammar]

pītapaṭakabaddhaṃ ca prānte śeṣaphaṇāyutam |
madhye mauktikahīrakamaṇinaddhaṃ samantataḥ || 28 ||
[Analyze grammar]

atha ca dharmarājasya kanyābhiryaṣṭirarpitā |
kānakī saṃhṛtiśaktimastakā jīvanīpadā || 29 ||
[Analyze grammar]

samādhiśaktimadhyā ca dharmamūrtimukhānvitā |
madhye yāmyasabhāyuktā prānte dūtagaṇānvitā || 30 ||
[Analyze grammar]

atha vāyośca kanyābhirvyajane ratnayaṣṭike |
sauvarṇakaṭakairnaddhe kauśeyaprāntajhallare || 31 ||
[Analyze grammar]

sauvarṇapaṭavākṣepe sūryacandrobhayānvite |
vartule taijasamaṇinaddhe rautyanisargaje || 32 ||
[Analyze grammar]

athartukanyakāḥ kṛṣṇe daduḥ śekharagucchakau |
puṣpāṇāṃ kandukaṃ hārān torān sugandhisaṃbhṛtān || 33 ||
[Analyze grammar]

amlānān divyarūpāṃśca miṣṭasveṣṭasugandhikān |
atha viśvakarmakanyā dadurmukuṭamujjvalam || 34 ||
[Analyze grammar]

ābhūṣaṇāni ca svarṇanirmitāni ca mālikāḥ |
ūrmikā raśanāścāṅgulīyakāni ca mekhalām || 35 ||
[Analyze grammar]

kaṭakānaṃgadān śṛṃkhalāśca nupūrakiṃkiṇīḥ |
kaṇṭhabhūṣā vicitrāśca dadurnārāyaṇāya tāḥ || 36 ||
[Analyze grammar]

atha drukanyakāstasmai dadurvastrāṇi bhāvataḥ |
aṃgarakṣakaṃ dhautraṃ cottarīyakaṃ śiraḥpaṭam || 37 ||
[Analyze grammar]

skandhavastraṃ kaṭipaṭaṃ sauvarṇatārasaṃhitam |
naktakaṃ karavastraṃ ca paṭṭakaṃ satpaṭīṃ daduḥ || 38 ||
[Analyze grammar]

atha śravaṇapitṝṇāṃ kanyāḥ śrāvaṇya ityapi |
daduḥ śrīharaye vāribhṛtān svarṇaghaṭān śubhān || 39 ||
[Analyze grammar]

atha saṃvatsarapitṛkanyāḥ pakvānnapūrikāḥ |
pāyasāni ca śākāni bhojyāni haraye daduḥ || 40 ||
[Analyze grammar]

kālakanyā dadurdivyaṃ kare tvabhayacakrakam |
vahnipitṛkanyakāśca daduḥ pātrāṇi bhūriśaḥ || 41 ||
[Analyze grammar]

sthālīśca vaṭakīścāpi kalaśān tāpalīnikāḥ |
camacān jalapāṃścāpi sauvarṇān rājatādikān || 42 ||
[Analyze grammar]

atha pretapitṛputryo dadustāmbūlakāni ca |
khanijanmapitṛkanyā dadurmāṃgalyavastukam || 43 ||
[Analyze grammar]

dravāṃśca vividhān dhātuvikārotthān suraṃgiṇaḥ |
evamanyāśca pitryaśca nyadhuryogyaṃ hareḥ puraḥ || 44 ||
[Analyze grammar]

vārkṣyo daduścaṭanyādi tiktāmblakaṭumiśritam |
evaṃ bhādre hyamāyāṃ tu pitryaḥ sarvā hariṃ prabhum || 45 ||
[Analyze grammar]

arcayāmāsuratyarthaṃ naijā'sāmānyavastubhiḥ |
tarpayāmāsuratyarthaṃ bhojayitvā punaḥ punaḥ || 46 ||
[Analyze grammar]

pāyasādīni cānnāni phalāni vividhāni ca |
miṣṭapānāni śītāni svādyāni rasavanti ca || 47 ||
[Analyze grammar]

viśvaṃbharo hi bhagavān bubhuje bahurūpadhṛk |
sarveṣāṃ pitṝṇāṃ lakṣakanyānāṃ bhāvanānugaḥ || 48 ||
[Analyze grammar]

lakṣarūpo harirbhūtvā śrāddhaṃ jagrāha tatkṛtam |
atha śrībhagavān tatra sasmāra pitṛdevatāḥ || 49 ||
[Analyze grammar]

brahmādi mukhyadevāṃśca brahmordhvaretaso'pi ca |
munīnṛṣīn surāṃścāpi lokapālān digīśvarān || 50 ||
[Analyze grammar]

śrāvaṇān yāmyapitaṃśca pretapitṝṃśca kālikān |
sāmvatsarikapitṝṃśca khāneyāṃścāpi sarvaśaḥ || 51 ||
[Analyze grammar]

ājyapān somapāṃścāpi barhiṣadāṃstathā pitṝn |
agniṣvāttān karmavaśān sarvānatarpayaddhariḥ || 52 ||
[Analyze grammar]

jalaistilaiḥ phalairājyaiḥ pāyasairmiṣṭabhojanaiḥ |
śākairmadhubhirdadhyannairvividhairbhojyavastubhiḥ || 53 ||
[Analyze grammar]

annavastravāripānairmukhacūrṇādibhistathā |
āgatān sarvapitṝṃśca tarpayāmāsa mādhavaḥ || 54 ||
[Analyze grammar]

koṭiśaḥ pitṛdevān sa tarpayāmāsa keśavaḥ |
prāsādikaṃ mahāpuṇyaṃ bhojayāmāsa bhāvataḥ || 55 ||
[Analyze grammar]

tato dānāni ca dadau koṭiratnāni vai tadā |
kanyābhyaḥ koṭyarbudebhyaḥ sarvābhyo bhagavān svayam || 56 ||
[Analyze grammar]

bhojayāmāsa vidhinā pāyasādīni sarvathā |
miṣṭānnāni ca bahūni peyāni vividhāni ca || 57 ||
[Analyze grammar]

svaprāsādikatāmbūlādīnyapi pradadau prabhuḥ |
tṛptāstāḥ kanyakāḥ sarvāḥ prācyo'vācyaśca pitṛjāḥ || 58 ||
[Analyze grammar]

atha sāyaṃ kṛṣṇanārāyaṇaṃ pupūjurādarāt |
ārārtrikaṃ tataścakrurvandanaṃ ca yathepsitam || 59 ||
[Analyze grammar]

arthayāmāsuretā yāḥ pitṛkanyāḥ samāyayuḥ |
kṛṣṇasevanalābhaṃ vai dātuṃ yāvacca jīvanam || 60 ||
[Analyze grammar]

anādiśrīkṛṣṇanārāyaṇaḥ prāha tathā'stviti |
sarvāstāstasthurautsukyāllomaśasyā''śrame sadā || 61 ||
[Analyze grammar]

bālakṛṣṇājñayā kṛṣṇasevāparāḥ sadā'bhavan |
pitaro ye ca tṛptāśca gatā naijaṃ svarādikam || 62 ||
[Analyze grammar]

bhagavān bālarūpaśca lomaśaṃ susamarcya ca |
bhojayitvā pūjayitvā tvekarūpo hariryayau || 63 ||
[Analyze grammar]

naijaṃ saudhaṃ kaṃbharāśrīnivāsaṃ sampadāśrayam |
atha sandhyāsamaye śrīhariḥ sasmāra sūryajam || 64 ||
[Analyze grammar]

nārakiṇāṃ tu jīvānāṃ vimokṣārthaṃ hi pāpinām |
tathā pramuktaśeṣāṇāṃ bhujyamānaśarīriṇām || 65 ||
[Analyze grammar]

dharmarājyasya yāmyānāṃ tvabhayaṃ kartumeva ca |
dharmarājaḥ samāyātastatkālaṃ harisannidhau || 66 ||
[Analyze grammar]

jarayā vyādhibhiścāpi mahākālena mṛtyunā |
citraguptena sahito dvitīyarūpadhṛk nayaḥ || 67 ||
[Analyze grammar]

etānāha prabhuścā''dya pitṝṇāṃ divaso mahān |
tṛptipradastataścā'haṃ tvājñāpayāmi sarvathā || 68 ||
[Analyze grammar]

yamalokagatāḥ sarve bhojanīyāstu pāyasaiḥ |
mama prasādaśākādyaiḥ pāvanīyā madicchayā || 69 ||
[Analyze grammar]

sarve śuddhā bhavantvadya yāta svargaṃ ca mokṣaṇam |
ityuktvā pradadau kṛṣṇastebhyaḥ prasādapāyasam || 70 ||
[Analyze grammar]

yamādyā jagṛhustatra bhakṣayāmāsurādarāt |
jalapānādikaṃ kṛtvā kṛtakṛtyān hi menire || 71 ||
[Analyze grammar]

atha kṛṣṇo dadau tebhyaḥ pāyasānnaṃ supuṣkalam |
yāmyebhyaśca pradānārthaṃ yamādyā jagṛhuśca tat || 72 ||
[Analyze grammar]

śrīharerājñayā dharmarājādyāḥ paripūjya tam |
natvā stutvā pādayośca patitvā ca yamakṣayam || 73 ||
[Analyze grammar]

yayuḥ samyak prasannāśca yāmyānāhūya nāṭakān |
yathājñāṃ bhojayāmāsuḥ prasādaṃ pāyasaṃ hareḥ || 74 ||
[Analyze grammar]

bhuktvā pāpāni tūrṇaṃ te kṣālayitvā''ntarāṇyapi |
nirmalāste ca sañjātā dharmarājājñayā tataḥ || 75 ||
[Analyze grammar]

svargaṃ satyaṃ paraṃ lokaṃ mokṣaṃ cāpi yayustadā |
hareḥ pratāpādevaṃ vai pretādyāḥ pitaro gaṇāḥ || 76 ||
[Analyze grammar]

tāritā hariṇā lokapitaraḥ karmavartinaḥ |
avagatiṃ gatāścāpi tāritāste dayālunā || 77 ||
[Analyze grammar]

anugrahārthaṃ jīveṣu yato janmā'sti bhūtale |
evaṃ vai rādhike kṛṣṇanārāyaṇaḥ parātparaḥ || 78 ||
[Analyze grammar]

paraṃ dhāma janān jīvānnayatyeva kṛpāvaśaḥ |
nijayogaṃ dadātyeṣa bhaktasaṃkalpatatparaḥ || 79 ||
[Analyze grammar]

paṭhanāchravaṇāccāsya pitṛmokṣo bhaveddhruvam |
tathaiva yoṣitaḥ pitryo muktiṃ prayānti vai śruteḥ || 80 ||
[Analyze grammar]

śrīrādhikovāca |
pitarastu śrutā devapitaraḥ śrāvaṇāstathā |
pretā yāmyāḥ sāmvatsarāḥ kālā khāneyakāstathā || 81 ||
[Analyze grammar]

agniṣvāttā bārhiṣadā ājyapāḥ somapāstathā |
aryamādyā ṛṣirūpā ūrdhvaretasa aiśvarāḥ || 82 ||
[Analyze grammar]

brahmaviṣṇumaheśāśca mānavā rākṣasāḥ khagāḥ |
yakṣā dūtāḥ piśācāśca bhūtāḥ kūṣmāṇḍakāstathā || 83 ||
[Analyze grammar]

vaināyakāśca vetālā adhogatiṃ gatāśca ye |
ta ete pitaraḥ sarve śrutāstvattaḥ prasaṃgataḥ || 84 ||
[Analyze grammar]

kintu putryastvayocyante yāstu kṛṣṇena tarpitāḥ |
kāstāḥ pitryo bhavantyatra śrāddhabhojanavāsanāḥ || 85 ||
[Analyze grammar]

rāseśvara kṛpāsindho tanme kṛṣṇa pradarśaya |
yāstā nāryo pitryībhūtāḥ kva kathaṃ nivasanti tāḥ || 86 ||
[Analyze grammar]

śrīkṛṣṇa uvāca |
samyak pṛṣṭaṃ tvayā rādhe lokānugrahakāmyayā |
tvaṃ tu jānāsi vai sarvaṃ nibodha kathayāmyapi || 87 ||
[Analyze grammar]

nārīvargo mayā sṛṣṭo goloke mama vāmataḥ |
rādhā lakṣmīḥ satī gaṃgā sarasvatī tathā'parāḥ || 88 ||
[Analyze grammar]

virajā śrīryamī durgā sāvitrī ca tathetarāḥ |
tāḥ pitryaḥ pūrvajāḥ śrāddhe bhuñjate tarpitāḥ priyāḥ || 89 ||
[Analyze grammar]

pitāmahī tu sāvitrī śrīśca vai prapitāmahī |
praprapitāmahī durgā śrāddhe cāyānti tāstadā || 90 ||
[Analyze grammar]

mātā lakṣmīśca vai mātāmahī sarasvatī tathā |
satī pramātāmahī ca śrāddhe cāyānti sarvathā || 91 ||
[Analyze grammar]

yāśca vadhvaḥ snuṣā bālā vidhavā vā kumārikāḥ |
adhavā'pyadatī cā'kṣatā jaraṭhāḥ savāsanāḥ || 92 ||
[Analyze grammar]

vicittāḥ kṛtavāgdānā vivāsitāḥ svatantrikāḥ |
nirvaṃśā niṣkuṭumbāśca nirādhārā nirāśrayāḥ || 93 ||
[Analyze grammar]

akṛtodakaśrāddhāśca tathā'pradattavahnikāḥ |
atīrthavāhikā yāśca'sambandhispṛṣṭayacchavāḥ || 94 ||
[Analyze grammar]

akālamṛtyumāpannā ākasmikamṛtiṃ gatāḥ |
garbhaprasūtidoṣeṇa mṛtā yāścābhicārikāḥ || 95 ||
[Analyze grammar]

abhicāramṛtāścāpi prasahyā'pi ca yā mṛtāḥ |
prasahya maithune mṛtā yakṣarākṣasasaṃhṛtāḥ || 96 ||
[Analyze grammar]

yoniduṣṭā mṛtā yāśca vaidhavyadharmavarjitāḥ |
bahuyogaṃ gatā yāśca parādhīnamṛtiṃ gatāḥ || 97 ||
[Analyze grammar]

bhūtapretapiśācādicchāyāvaśamṛtiṃ gatāḥ |
paścātpuṇyavihīnāścā'kṛtapuṇyavratotsavāḥ || 98 ||
[Analyze grammar]

etā nirvaṃśajāḥ sarvāḥ pitryo bhavanti rādhike |
yāmye vasanti nirvaṃśāḥ kumāryaḥ satyalokake || 99 ||
[Analyze grammar]

maharjanatapassveva tadanyāścāpamṛtyujāḥ |
svarge puṇyakṛtāścāpi nirvaṃśā apsarogaṇāḥ || 100 ||
[Analyze grammar]

bhūvarloke nivasanti bhūtī pretī piśācinī |
ḍākinī śākinī kūṣmāṇḍinī vaināyakī tathā || 101 ||
[Analyze grammar]

vaitālī bhairavī raṇḍā kṛtyā ṣaṇḍhā ca sūtakī |
śavī citā nanāmnī ca śmaśānī ceti rādhike || 102 ||
[Analyze grammar]

etāḥ pitryo bhavantyeva bhuvarbhūlokasaṃsthitāḥ |
nāginī bhikṣukī pipīlikā matsyī ca rākṣasī || 103 ||
[Analyze grammar]

kākī gṛdhrī ca makarī pātāle ca jale sthitāḥ |
etā nirvaṃśamṛtijāḥ pitryo bhavanti rādhike || 104 ||
[Analyze grammar]

mātaro devatā yāśca sāttvikyastā api striyaḥ |
krūradṛśo'thavā vaṃśayutā api mṛteḥ param || 105 ||
[Analyze grammar]

bhavanti pitryaḥ pāpena yathākarmanivāsikāḥ |
tābhyaḥ śrāddhaṃ pradātavyaṃ jānatā viduṣā sadā || 106 ||
[Analyze grammar]

anādiśrīkṛṣṇanārāyaṇena tābhya eva ca |
jalānnādi tadā dattaṃ viśvaṃbhareṇa tṛptaye || 107 ||
[Analyze grammar]

tāḥ sarvā api saṃgṛhya prasādamadhigamya ca |
yayuḥ svargādikaṃ saukhyānandasthalaṃ vṛṣānvitāḥ || 108 ||
[Analyze grammar]

śṛṇu tvaṃ rādhike tatra camatkāro mahānabhūt |
niśithe rākṣasā gurormandiraṃ samupāyayuḥ || 109 ||
[Analyze grammar]

śirohīnasteṣu caiko'paro netravihīnakaḥ |
tṛtīyo nāsikāhīnaścaturthaḥ karṇaśūnyakaḥ || 110 ||
[Analyze grammar]

pañcamaḥ pādahīnaśca ṣaṣṭhaḥ kaṭitṛṇopamaḥ |
saptamaḥ pādapṛṣṭhaścā'ṣṭamaḥ pṛṣṭhānanastathā || 111 ||
[Analyze grammar]

navamo'ndho badhiraśca paṃgurmūkaśca kuṣṭhavān |
caturdaśo vātarogī jalodarī napuṃsakaḥ || 112 ||
[Analyze grammar]

saptadaśo malinaśca parito lagnamakṣikaḥ |
aṣṭādaśo galapāśaḥ saśūlaśca tathetaraḥ || 113 ||
[Analyze grammar]

viṃśaḥ śvaphāṭitaḥ kroḍatroṭitaśca tathā'pare |
evamādyā gaṇāścā'śvapaṭṭasaraḥ samāyayuḥ || 114 ||
[Analyze grammar]

krośanto bahudhā''krośān nivedayanto duṣkṛtān |
annahīnā jalahīnāḥ śuṣkakaṇṭhauṣṭhatālukāḥ || 115 ||
[Analyze grammar]

channodarāśca vai pretāścāyayurbahudhā tadā |
rurudurlomaśasyā'gre svoddhārārthaṃ bhṛśaṃ tataḥ || 116 ||
[Analyze grammar]

lomaśaḥ paripapraccha kathaṃ vai pretatāṃ gatāḥ |
tatraikaḥ prāha ca mayā chinnaṃ dvijaśiraḥ purā || 117 ||
[Analyze grammar]

tena pāpina vai jātaḥ śirohīno'tra rākṣasaḥ |
aparaḥ prāha ca mayā cauryakārye gṛheśituḥ || 118 ||
[Analyze grammar]

netre prasphoṭite tena netrahīno'bhavam ṛṣe |
tṛtīyaḥ prāha ca mayā patnyāśchinnā tu nāsikā || 119 ||
[Analyze grammar]

tenā'haṃ nāsikāhīnaḥ preto bhavāmi duḥkhavān |
caturthaḥ prāha ca mayā karṇau chinnau dvijasya vai || 120 ||
[Analyze grammar]

bhūṣāyuktau bhūṣaṇānāṃ mayā'paharaṇaṃ kṛtam |
tena jātaḥ karṇahīnaḥ preto bhavāmi duḥkhavān || 121 ||
[Analyze grammar]

pañcamastu tadā prāha mayā pravāsinaḥ purā |
hatau pādau vane dravyaharaṇārthaṃ tato'pyaham || 122 ||
[Analyze grammar]

pādahīnaḥ samabhavaṃ gacchāmyadhomukhaḥ sadā |
ṣaṣṭhaḥ prāha mayā yaṣṭyā māreṇa ghātitā kaṭiḥ || 123 ||
[Analyze grammar]

goḥ pūrvaṃ tena pāpena bhagnakaṭirbhavāmyaham |
saptamaḥ prāha ca mayā pādau badhvā mama striyāḥ || 124 ||
[Analyze grammar]

kleśitā sā vinā doṣaṃ tena doṣeṇa rākṣasaḥ |
pṛṣṭhapādo bhavāmyatra gatiśaktivihīnakaḥ || 125 ||
[Analyze grammar]

aṣṭamaḥ prāha ca mayā tvajābālāsya kaṇṭhataḥ |
mastakaṃ mroḍitaṃ paścānmāritaṃ cājabālakam || 126 ||
[Analyze grammar]

tena doṣeṇa jāto'smi pṛṣṭhānanaḥ suduḥkhitaḥ |
navamaḥ prāha ca mayā mṛgayākaraṇe purā || 127 ||
[Analyze grammar]

cakṣuḥ prasphoṭitaṃ caikamṛgasya jīvatastataḥ |
jāto'smi tena doṣeṇa jātyandho duḥkhaduḥkhitaḥ || 128 ||
[Analyze grammar]

daśamaḥ prāha ca mayā nindā viṣṇoḥ purā śrutā |
tenā'haṃ janmabadhiraścaikādaśo'pyuvāca tam || 129 ||
[Analyze grammar]

mayā pāde hataḥ śvā ca tenā'haṃ paṃgutāṃ gataḥ |
dvādaśaḥ prāha sādhūnāṃ nindayā mūkatāṃ gataḥ || 130 ||
[Analyze grammar]

agamyāgamanāt kuṣṭhī trayodaśo'vadattadā |
caturdaśo vātarogī viśvāsaghātako'bhavam || 131 ||
[Analyze grammar]

matsyādo'yaṃ jalodarī nāto'stīti jagāda ca |
ṣoḍaśo'yaṃ vyavāyī ca napuṃsako'ṇḍanāśakaḥ || 132 ||
[Analyze grammar]

vṛṣabhāṇāṃ tato jātastathā caṇḍālakarmakṛt |
makṣikāsamabhivyāptaḥ saṃjāto'yaṃ tathā'vadat || 133 ||
[Analyze grammar]

galapāśapradaścāyaṃ galapāśo'bhavattathā |
śūlapradaśca jīvānāṃ śūlarogī tato hyayam || 134 ||
[Analyze grammar]

viṃśaḥ prāha mayā pūrvaṃ śaśādyāḥ śvāpadādibhiḥ |
vidāritā bahupāpo bhavāmyadya vidāritaḥ || 135 ||
[Analyze grammar]

atikaṣṭaṃ ca bhuñjāmo bhojanaṃ nopalabhyate |
tṛṣitā duḥkhitāḥ smo'dya kṛpālurbhagavān yadi || 136 ||
[Analyze grammar]

anādiśrīkṛṣṇanārāyaṇa uddhārayettu naḥ |
muktiṃ gatā bhaviṣyāmo vipra muktiṃ pradāpaya || 137 ||
[Analyze grammar]

ityukto lomaśastebhyo dadau mantraṃ jalānvitam |
oṃ namaḥ śrīkṛṣṇanārāyaṇāya svāmine svāhā || 138 ||
[Analyze grammar]

sasmāra bālakṛṣṇaṃ ca kṛṣṇo drāk tatra cāyayau |
nijapādajalaṃ tebhyo pāyayitvā hariśca tān || 139 ||
[Analyze grammar]

vidhāya divyadehāṃśca caturbhujasvarūpiṇaḥ |
vimānaiḥ preṣayāmāsa vaikuṇṭhaṃ dhāma śāśvatam || 140 ||
[Analyze grammar]

evaṃ muktiṃ pradatvaiva harirnaijālayaṃ yayau |
pāpināṃ muktidātā'yaṃ jayate parameśvaraḥ || 141 ||
[Analyze grammar]

paṭhanācchravaṇāccāsya pitruddhāro bhaveddhruvam |
yaśaḥ kīrtirdhanaṃ dhānyaṃ gāvaścārogyamityapi || 142 ||
[Analyze grammar]

putraḥ pautrāḥ sutāḥ svarṇaṃ mokṣo lakṣmīrvibhūtayaḥ |
bhaveyuḥ sampadaḥ sarvāḥ śroturvakturna saṃśayaḥ || 143 ||
[Analyze grammar]

namastasmai bhagavate sarvoddhāradayālave |
karmāṇi pāpināṃ cā'vigaṇayya mokṣadāyine || 144 ||
[Analyze grammar]

daityadānavapāpānāṃ rakṣasāṃ pāvanāya ca |
bhūtapretapiśācānāṃ mokṣakartre namonamaḥ || 145 ||
[Analyze grammar]

dayāloḥ śrīharernāsti dayāyāḥ pāra ityapi |
pāpināṃ tu kvacinnāsti doṣāṇāmanta ityapi || 146 ||
[Analyze grammar]

ityevaṃ rādhike kṛṣṇanārāyaṇaṃ pareśvaram |
jñātvā bhajanti satataṃ te mokṣasthā na saṃśayaḥ || 147 ||
[Analyze grammar]

citte kṛṣṇo hṛdi kṛṣṇaścakṣuṣoḥ kṛṣṇa ātmani |
brahmarandhre yasya kṛṣṇaḥ sa bhavenmokṣago dhruvam || 148 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne pitṛpakṣe pitṛkanyākṛtaharipūjanaṃ harikṛtapitṛtarpaṇādi nārakāṇāṃ mokṣaṇaṃ pitṛstrījātiparicayaḥ pretānāṃ muktiścetyādinirūpaṇanāmā'ṣṭādaśo'dhyāyaḥ || 18 ||
[Analyze grammar]