Chapter 4

śrīkṛṣṇa uvāca |
śṛṇu rādhe kambharāyā gṛhe tatra mahotsavaḥ |
sañjātaḥ sumahān saurāṣṭrasthānāṃ ca gṛheṣu ca || 1 ||
[Analyze grammar]

jñātvā brahmāṇḍapālāśca dikpālā īśvarādayaḥ |
mānavāśca surā devyo vimānairvyomamārgataḥ || 2 ||
[Analyze grammar]

darśanārthaṃ samāyātāḥ sarve vyomapracāriṇaḥ |
ākāśaṃ cābhavacchannaṃ vimānairdivyabhāsvaraiḥ || 3 ||
[Analyze grammar]

kambharāyā gṛhe puṣpavṛṣṭiścandanavarṣaṇam |
divyadhāmagatānāṃ cā'kṣatānāṃ varṣaṇaṃ hyabhūt || 4 ||
[Analyze grammar]

nipetuśca tadā vyomno divyakuṃkumabindavaḥ |
jayaśabdā vādyaśabdā gītayaścā'bhavaṃśca khe || 5 ||
[Analyze grammar]

yathā'paraṃ ca golokaṃ vaikuṇṭhaṃ cā'paraṃ ca vā |
avyākṛtaṃ dvitīyaṃ vā'kṣaraṃ dhāmā'paraṃ yathā || 6 ||
[Analyze grammar]

tathā kuṃkumavāpyākhyaṃ kṣetraṃ kāmasamaṃ hyabhūt |
avatārā īśvarāśca surāḥ stavanamādadhuḥ || 7 ||
[Analyze grammar]

upadāśca nyadhurnatvā kṛtvā darśanamuttamam |
vayaṃ yasmātsamutpannā yadaiśvaryaprabhoginaḥ || 8 ||
[Analyze grammar]

yanniyamyāḥ sarvadā smo namāmastaṃ pareśvaram |
satsvarūpaṃ pararūpaṃ sarvadhāmasu vāsinam || 9 ||
[Analyze grammar]

kṛpayā lokarakṣāyā dharmavantaṃ parātparam |
bālaṃ ca kambharālakṣmīnandanaṃ ca numaḥ prabhum || 10 ||
[Analyze grammar]

yasyaiśvaryavibhūtīnāṃ naiva pāro hi vidyate |
satvaṃ saṃkṣipya sañjātaḥ kṛpayā tvāṃ numaḥ prabhum || 11 ||
[Analyze grammar]

mokṣadaḥ sarvalokānāṃ dhāmadaḥ puṇyaśālinām |
svargado rāgayuktānāṃ yastaṃ numaḥ pumuttamam || 12 ||
[Analyze grammar]

daitye deve rākṣase ca mānave ca piśācake |
nāge nage munau nāryāṃ tiryakṣu ca drume tṛṇe || 13 ||
[Analyze grammar]

samadṛṣṭyā ca cāṇḍāle vartase tvaṃ kṛpāvaśaḥ |
samānapitaraṃ taṃ tvāṃ vandāmahe narottamam || 14 ||
[Analyze grammar]

bhāviyugeṣu cānyāni kṣetratīrthāni vai bhuvi |
bhaviṣyanti tathāpyetatsadṛśāni na tāni vai || 15 ||
[Analyze grammar]

matsyādyā avatārāśca bhaviṣyanti hyataḥ param |
etatkṣetraṃ samāsādya nivatsyanti tavā'ntike || 16 ||
[Analyze grammar]

yatrā''sse tvavatārāṇāṃ kāraṇaṃ parameśvaraḥ |
tatkṣetraṃ sarvadhāmnāṃ ca vandyaṃ sadā bhaviṣyati || 17 ||
[Analyze grammar]

anyā'ṇḍebhyaścā'dhikaṃ vai svastimaccā'ṇḍaka nvidam |
yadatra khaṇḍake'khaṇḍapūrṇaprabhurvirājase || 18 ||
[Analyze grammar]

tavā'nugrahahīno'pi samrāṭ dīnataro mataḥ |
tavā'nugrahayuktastu hīno'pi bhūbhṛtāyate || 19 ||
[Analyze grammar]

tava patkajahīnā tu divyā bhūrapi kalmaṣā |
tava patkajayuktā tu kṛṣṇā bhūrapi bhāsvarā || 20 ||
[Analyze grammar]

dhanyeyaṃ kambharālakṣmīrdhanyo gopālakṛṣṇakaḥ |
dhanyaḥ surāṣṭrako deśo dhanyā kuṃkumavāpikā || 21 ||
[Analyze grammar]

aśvapaṭṭasaro dhanyaṃ dhanyāstā vṛkṣavallikāḥ |
dhanyā narāḥ striyaścātra hyapi kīṭapataṃgikāḥ || 22 ||
[Analyze grammar]

yāsāṃ yeṣāṃ nityayogo'nādikṛṣṇanarāyaṇe |
jaya svāmin jaya cā''dya jaya deva namo'stu te || 23 ||
[Analyze grammar]

iti stutvā prabhuṃ sarve rādhike maunamāsthitāḥ |
hasan śrībhagavāṃstāṃśca devān devīstathā'parān || 24 ||
[Analyze grammar]

varaṃ vṛṇutetyuvāca bhagavān karuṇālayaḥ |
vakraḥ sarve namaskṛtya janma kuṃkumavāpike || 25 ||
[Analyze grammar]

kṣetre deśe surāṣṭre ca yatra tatpādapaṅkajau |
dhāmadhāmanivāsinyo devyo vavrustathā varam || 26 ||
[Analyze grammar]

tava pārśve nivasāmo gṛhītvā janma kanyakāḥ |
koṭyo'rbudāni tāsāṃ ca saurāṣṭrādau pralebhire || 27 ||
[Analyze grammar]

prākaṭyaṃ ca tathā devāḥ kumārāhyabhavaṃstadā |
saṃkalpamātrajanmāno gṛhe gṛhe ca devatāḥ || 28 ||
[Analyze grammar]

vṛkṣā vallyaśca tāḥ sarvā anantā devya eva tāḥ |
gāvo vṛṣāstathā cānye kariṇo vājinastathā || 29 ||
[Analyze grammar]

mṛgāśca medhyapaśavo divyadehāstadā'bhavan |
kalpadrumāḥ kalpalatāḥ kalpastambāstadā'bhavan || 30 ||
[Analyze grammar]

cintāmaṇayaḥ satataṃ kāmadughāśca koṭiśaḥ |
haṃsasārasamenākokilakīramayūrakāḥ || 31 ||
[Analyze grammar]

devatāstatsvarūpāścā'bhavan kuṃkumavāpike |
yatayo munayaścānye ṛtavaḥ sādhavo'pare || 32 ||
[Analyze grammar]

babhūvustatra vṛkṣādau śakunāni samantataḥ |
nadā nadyaśca tīrthāni vāsaṃ cakrustadantike || 33 ||
[Analyze grammar]

mūrtā'mūrtāni tattvāni kīṭapataṃgarūpiṇaḥ |
aśvapaṭṭasarastīre bhūtvā cakrurnivāsanam || 34 ||
[Analyze grammar]

gāndharvā gāyikāścānyā devyaśca nāgakanyakāḥ |
tatra jale nivāsaṃ ca divyadehā vyadhurmudā || 35 ||
[Analyze grammar]

svarṇasthalaṃ ratnapūrṇaṃ divyatāṃ prāpa tatsthalam |
yāni ratnāni cābdhau vai yāni svargādike sthale || 36 ||
[Analyze grammar]

yāni mervādiśaileṣu devānāṃ tvāśrameṣvapi |
siddhānāṃ sampado yāśca bhūmipānāṃ vibhūtayaḥ || 37 ||
[Analyze grammar]

tāḥ sarvāḥ kuṃkumavāpyāmāgatā haripādayoḥ |
raivatācalataḥ pūrvaṃ śatruṃjitāyāḥ paścimam || 38 ||
[Analyze grammar]

bhadrānadyā dakṣiṇaṃ ca pañcāśatkrośavartulam |
kuṃkumavāpikākṣetraṃ paraṃdhāma virājate || 39 ||
[Analyze grammar]

haristatra bālabhāvaiḥ rājate parameśvaraḥ |
brahmā tatra samāyātastasmai śrīhariṇā'rpitam || 40 ||
[Analyze grammar]

parameṣṭhipadaṃ cādye janmano divase svake |
viṣṇave lokarakṣārthaṃ vaikuṇṭhaṃ ca jalopari || 41 ||
[Analyze grammar]

arpitaśca tathā śvetadvīpo nārāyaṇāya ca |
kṣīrodaścārpitastena śeṣanārāyaṇāya ca || 42 ||
[Analyze grammar]

aryamṇe cārpitaṃ pitṛrājyaṃ śrīhariṇā tadā |
tena sanatkumārāyā'rpitaṃ cārṣaṃ padottamam || 43 ||
[Analyze grammar]

nāradāya tadā dattaṃ devarṣitvaṃ ca mānasam |
māhendraṃ ca padaṃ dattamindrāya divi rājasam || 44 ||
[Analyze grammar]

dharmarājāya ca yāmyaṃ padaṃ tena samarpitam |
kuberāya dhanāḍhyatvaṃ vāruṇaṃ varuṇāya ca || 45 ||
[Analyze grammar]

vāyave cāgnaye īśānāya nirṛtaye tathā |
dikpālatvaṃ pradattaṃ ca sūryāya taijasaṃ sthalam || 46 ||
[Analyze grammar]

somāyauṣadhināthatvaṃ tathā nakṣatrarājatā |
merave parvatarājyaṃ saridrājyaṃ ca sāgare || 47 ||
[Analyze grammar]

tattvānāṃ paramaṃ rājyaṃ tattattattveṣu cāhitam |
evaṃ tena kṛtā loke vyavasthā paramātmanā || 48 ||
[Analyze grammar]

ratnasiṃhāsane sthitvā mukuṭānyārpayat prabhuḥ |
te ca sattāśāsanāni gṛhītvā harimārcayan || 49 ||
[Analyze grammar]

janmamadhyāhnapūrvaṃ vai vyavasthā lokadhāriṇī |
anādiśrīkṛṣṇanārāyaṇena racitā purā || 50 ||
[Analyze grammar]

tadā janmanimittāni rājyanimittakāni ca |
pitā devāḥ pradaduśca dānānyasaṃkhyakāni ca || 51 ||
[Analyze grammar]

rudraḥ sahārakṛddhiṣṇya labdhvā dānāni sandadau |
gopālakṛṣṇo dānāni gavāṃ lakṣāyutāni ca || 52 ||
[Analyze grammar]

ratnāni svarṇapātrāṇi maṇīn gṛhāṇi sandadau |
ramyāṇi bhavanāni śrīmanti dāne dadau hi saḥ || 53 ||
[Analyze grammar]

yānāni svarṇavarṇāni savitānāni sandadau |
vyomayānāni divyāni gajāśverethavanti ca || 54 ||
[Analyze grammar]

kanyādānāni viprebhyo dadau dravyāṇi vai mudā |
bhojanāni vicitrāṇi sumṛṣṭāni ghṛtāni ca || 55 ||
[Analyze grammar]

śarkarā divyavastrāṇi vibhūṣā hīrakāñcitāḥ |
śārīrasādhanalepān viṣṇutailādikān dadau || 56 ||
[Analyze grammar]

ūrmikāḥ kaṃkaṇān divyān śayyāparyaṅkavalkalān |
kalaśān sthālikā kamaṇḍalūnāstaraṇāni ca || 57 ||
[Analyze grammar]

pūjāpātrāṇi divyāni pātrāṇyakṣayakāni ca |
vāhanāni vṛṣān yogyānannānāṃ sañcayān dadau || 58 ||
[Analyze grammar]

kalpavṛkṣān kalpakalmān kalpavallīrdadau mudā |
cintāmaṇīn dāsadāsīḥ sevakān kiṃkarān dadau || 59 ||
[Analyze grammar]

svarṇapadmāni cāndrāṇi pāṣāṇāni jvalanti ca |
prakāśakapradīpāṃśca svarṇapeṭīścaṭīrdadau || 60 ||
[Analyze grammar]

āsanāni svarṇarūpyatantujanyāni sadbṛsīḥ |
kaṭāni dhotrakañcukādīnyasaṃkhyāni vai dadau || 61 ||
[Analyze grammar]

bhakṣyabhojyāni peyāni cā'mṛtānyakṣayāṇi ca |
maṇḍapān savitānāṃśca suvarṇaśakaṭīrdadau || 62 ||
[Analyze grammar]

uṣṭrānajānāvikāśca ghoṭakān gavayān dadau |
jalayānāni sāmudrāntaḥsañcārīṇi sandadau || 63 ||
[Analyze grammar]

gaumukhīrjapamālāśca mṛgacarmāṇi vai dadau |
āsanāni vicitrāṇi kambalāni ghaṭīrdadau || 64 ||
[Analyze grammar]

kālavedhakayantrāṇi viṣahāramaṇīnapi |
kāyākalpakararasān daṃśāvaraṇakāni ca || 65 ||
[Analyze grammar]

dhruvavīkṣakayantrāṇi vahnikāntamaṇīn dadau |
mahiṣīścāmarīgāśca tadā kṛṣṇāmṛgān dadau || 66 ||
[Analyze grammar]

upaskarāṇi sarvāṇi gṛhayogyāni vai dadau |
yajñapātrāṇi sarvāṇi viprebhyo brahma vai dadau || 67 ||
[Analyze grammar]

mokṣapātrāṇi divyāni devamūrtīrdadau mudā |
tathā cā'bhayadānāni santoṣāṃśca dadau tadā || 68 ||
[Analyze grammar]

ramyayajñopavītāni dūradarśakayantrakān |
dūraśravaṇayantrāṇi śītahāramaṇīn dadau || 69 ||
[Analyze grammar]

sūryakāntānayaskāntānasaṃkhyān vai dadau tadā |
cintāmaṇīn bhogyamaṇīn saṃhārakṛnmaṇīn dadau || 70 ||
[Analyze grammar]

pauṣpabāṇān vilāsāṃśca phalapatrāṇi gandhakān |
vṛṣṭivāhān bhūgadaṇḍān camatkāradravān dadau || 71 ||
[Analyze grammar]

divyamantrān siddhabhāvān kāmarūpadharān dadau |
kalpajālacamatkārān brāhmasaṃkalpakān dadau || 72 ||
[Analyze grammar]

ujjvalāśca śubhā vidyā śāradāḥ kanyakā dadau |
viprebhyo viprayogyāni ṛṣiyogyāni yāni ca || 73 ||
[Analyze grammar]

kṣatriyebhyaḥ kṣātradharmapuṣṭidāni dadau tadā |
dhvānayantrāṇi ca vāyuyantrāṇi gūṭikāstathā || 74 ||
[Analyze grammar]

vaiśyayogyāni ca sarvakaraṇāni tadā dadau |
sevakānāṃ ca yogyāni vargāṇāṃ niyatāni ca || 75 ||
[Analyze grammar]

yāni yāni yadiṣṭāni tāni tāni tadā dadau |
adeyaṃ na tadā tasya kiñcidāsīnmahotsave || 76 ||
[Analyze grammar]

siddhijaṃ yogajaṃ divyaṃ mānasotthaṃ ca tattvajam |
bhautikaṃ mātrikaṃ bauddhaṃ mantrajaṃ cātmajaṃ ca vā || 77 ||
[Analyze grammar]

yat kiñcid yena yacceṣṭaṃ vāñchitaṃ vai tadā tadau |
mayā dattaṃ cā'kṣayaṃ vai yasmādakṣayameva tat || 78 ||
[Analyze grammar]

sarveṣāṃ lokavāsānāṃ tantuścā'kṣayatāṃ vrajet |
iti matvā sampadāṃ vardhakaṃ sampatpradaṃ dadau || 79 ||
[Analyze grammar]

kalpaputtalikā ramyāḥ sarvakāmadughā dadau |
kalpāṅgulīyakānyapi maṇiyuktāni vai dadau || 80 ||
[Analyze grammar]

evaṃ hyanādiśrīkṛṣṇanārāyaṇajanerdine |
dānānyārātriṃ pradadau śrīmadgopālakṛṣṇakaḥ || 81 ||
[Analyze grammar]

kambharā ca mahālakṣmīrdadau dānāni vai hṛdā |
śāṭikāḥ kaṃkatīścāpi darpaṇāni ca kañcukīḥ || 82 ||
[Analyze grammar]

ghargharīścolikāścāpi kuṃkumā'laktakāni ca |
tailāni ca sugandhīni kaṃkaṇāni ca śṛṃkhalāḥ || 83 ||
[Analyze grammar]

yoṣidbhyaḥ kanyakābhyaśca bālikābhyaśca baṃgiḍīḥ |
balayānaireyakāṃśca natthīścibūkabindvikāḥ || 84 ||
[Analyze grammar]

candrakāraśanā hārānūrmikā nūpurāṇi ca |
kauśeyakāni vastrāṇi saubhāgyasya dravāṇi ca || 85 ||
[Analyze grammar]

bhojanāni vicitrāṇi bālakrīḍanakāni ca |
bālāsanāni dolāśca preṅkhā hindolikāstathā || 86 ||
[Analyze grammar]

ghoṭikāḥ khaṭvikāḥ paryaṅkikāśca camacāni ca |
mṛdūni bālavastrāṇi kanyāvastrāṇi sandadau || 87 ||
[Analyze grammar]

kalaśān gargarīścāpi droṇān hāṇḍāni bhāṇḍakān |
pātrān darvīn sruvān sthālīḥ pātrāṇi vividhāni ca || 88 ||
[Analyze grammar]

kiṃkiṇījālasannaddhaprakoṣṭhabhūṣaṇāni ca |
hastidantajaramyābhūṣaṇāni sandadau satī || 89 ||
[Analyze grammar]

kṣetrāṇi vāṭikā grāmānudyānāni vanāni ca |
sasyānyuttamadhānyāni mṛṣṭānnāni dadau tadā || 90 ||
[Analyze grammar]

sindūrān patrikāḥ sūtrāṇyapi kānakacīpiṭān |
svarṇahārān maṇinaddhān hīrakāñcitamālikāḥ || 91 ||
[Analyze grammar]

keyūrakāṃśca mukuṭān cūllikā vrellaṇāni ca |
tāmrapeṭāstālikāśca cāmaravyajanāni ca || 92 ||
[Analyze grammar]

kaśipugendukaguptadorakādīni sandadau |
dugdhaṃ dadhi ghṛtamājyaṃ miṣṭaṃ miśraṃ dadau tadā || 93 ||
[Analyze grammar]

peyaṃ svādyaṃ ca sammṛdya sugandhadravyamādadau |
piṣṭaṃ śālīnakṣatāṃśca jārikā barjarān dadau || 94 ||
[Analyze grammar]

godhūmān mudgamāṣāṃśca rājamāṣādikān dadau |
yavān vrīhīṃścaṇakāṃśca kaṇān kulatthikān dadau || 95 ||
[Analyze grammar]

guḍān madhūni ca tilān madhuparkāṃstadā dadau |
sarpihaiyaṃgavīnaṃ ca pāyasāni tadā dadau || 96 ||
[Analyze grammar]

yad yadāsīt smṛtau tatra tattat dānaṃ tadā dadau |
devā daityā ṛṣayaśca mānavā vismayaṃ yayuḥ || 97 ||
[Analyze grammar]

īśvarā lokapālāśca dṛṣṭvā jagmuśca vismayam |
suvarṇarasavallīścasandhinyādyauṣadhīrdadau || 98 ||
[Analyze grammar]

gṛhītvā divyavallīśca divyabījādigūṭikāḥ |
kāmarūpapradāḥ sarvā gṛṭikāḥ prāpya yoṣitaḥ || 99 ||
[Analyze grammar]

mumuduścāpyatīvāti dadurāśiṣa īśikāḥ |
mahotsavo mahān jāto bhojyadānā'bhinandanaiḥ || 100 ||
[Analyze grammar]

caturdaśānāṃ lokānāṃ śrīhariṃ vīkṣya vāsinaḥ |
upadāḥ sampradāyaiva gṛhītvā ca pratigrahān || 101 ||
[Analyze grammar]

bhuktvā pītvā ca saṃbhūya tṛptimāsādya śāśvatīm |
nītvā prāptaṃ dānamānaṃ sāyaṃ lokān yayuḥ svakān || 102 ||
[Analyze grammar]

janmottaraṃ darśitaṃ ca nālacchedādikaṃ tadā |
mahāmāyā mahāpuṃsaḥ patnī svayaṃ cakāra ha || 103 ||
[Analyze grammar]

snānasaṃskārakān śuddhiṃ vahnisevanamityapi |
devavallokavat sarvaṃ sūtikāgṛhamāntaram || 104 ||
[Analyze grammar]

snānādi yogyamevāpi cakāra janako'pi ca |
bhagavān bālavajjātaḥ suṣvāpa yoganidrayā || 105 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne parameśvarasya janmadine'vatārā īśvarā lokapālāḥ prajāḥ samāgatāḥ vividhadānāni ceti |
nirūpaṇanāmā caturtho'dhyāyaḥ || 4 ||
[Analyze grammar]