Chapter 1

śrīrādhikā uvāca |
oṃ namaḥ śrīparabrahmapareśaparamātmane |
anādiśrīkṛṣṇanārāyaṇāyā'kṣaraśāsine || 1 ||
[Analyze grammar]

tretāsantānasatpitre rādhākāntāya yogine |
lakṣmīnārāyaṇāya śrīmāṇikyāvāhine namaḥ || 2 ||
[Analyze grammar]

svaprabhāsvāmine mañjulālakāyātmavāsine |
īśāpāravatīśāya namaḥ saguṇamūrtaye || 3 ||
[Analyze grammar]

haṃsajyotisvarūpāya śaktyaiśvaryādisaṃbhṛte |
kuṃkumavāpikākṣetraprakaṭāya namo namaḥ || 4 ||
[Analyze grammar]

sarvadhāmā'dhipeśāya namo'ntaryāmiṇe muhuḥ |
svargamokṣādidātre te namaḥ śrīharaye namaḥ || 5 ||
[Analyze grammar]

niravadhisamaiśvaryaguṇavaibhavaśāline |
asaṃkhyamuktasevyāyā'kṣarādhipataye namaḥ || 6 ||
[Analyze grammar]

eko'pi bahudhā dṛṣṭaḥ kṛṣṇanārāyaṇādimān |
īśeśānyādirūpaśca tasmai śrīsvāmine namaḥ || 7 ||
[Analyze grammar]

paravidyādhidevāya brahmapriyā'dhiśāyine |
gītopaniṣatpataye jayantīpataye namaḥ || 8 ||
[Analyze grammar]

ekādaśīpriyāyā''rādhanākāntāya śārṅgiṇe |
mahālakṣmīśvarāyāpi bhaktīśāya namo namaḥ || 9 ||
[Analyze grammar]

mukteśāya rameśāya gaṃgeśāya namo namaḥ |
pativratādhipataye rukmiṇīśāya te namaḥ || 10 ||
[Analyze grammar]

kāmadughādhināthastvaṃ pṛthvīśastvaṃ ratīśvaraḥ |
vibhūtīśo'si saṃjñeśaḥ śaṃ karotu prasevinām || 11 ||
[Analyze grammar]

kamalākānta devīśa mohinīdhava siddhipa |
urvaśīśvara buddhīśa pārvatīśa vidhehi śam || 12 ||
[Analyze grammar]

dīkṣādhīśa ca līleśa nārāyaṇīpate prabho |
virajākānta bhagavan vṛndānātha vidhehi śam || 13 ||
[Analyze grammar]

sarasvatīpriya svarṇarekhāpriya sitāpate |
devikeśvara tulasīvihāra pravidhehi śam || 14 ||
[Analyze grammar]

vibhāvaryadhināthastvaṃ mūrtīśvaro jayeśvaraḥ |
gomatīśo mauktikeśo bhavān bhavatu rukmadaḥ || 15 ||
[Analyze grammar]

premasakhīpate godāvarīśa kapileśvara |
dhātrīpate svarṇagaurīpate sarvaprado bhava || 16 ||
[Analyze grammar]

laliteśvara raṃbheśa kumudvatīpate prabho |
śītalādhipate umākānta vidhehi śaṃ sadā || 17 ||
[Analyze grammar]

hemanteśvara nandeśa śāntisvāmin kalāpate |
nandinīnātha durgeśa vijayeśa vidhehi śam || 18 ||
[Analyze grammar]

sandhyādhinātha kastūrīpriya dhanyā'dhināyaka |
sāvitrīvara dolādhiroha puṣpāsugandhabhāk || 19 ||
[Analyze grammar]

savitādhipate citralekheśvara namo'stu te |
pūrṇimādhipate brahman śāradākānta mādhava || 20 ||
[Analyze grammar]

mañjarīśvara yoginīcakrakānta vidhehi śam |
preyasīśa śreyasīśa vikuṇṭheśā'ruṇāpate || 21 ||
[Analyze grammar]

joṣṭrīśvara śabarīśa pampeśa gālavīpate |
yājñasenīpate vasumatīśa vijayo'stu te || 22 ||
[Analyze grammar]

sudughānātha ca padmāvatīpālaka keśava |
bhārgavīpāṇisaṃgrāha padminīvara cā'cyuta || 23 ||
[Analyze grammar]

śrīmatīśa jaratkārvīpate līlāvatīśvara |
kalāvatīprāṇanātha kadalīśa jayo'stu te || 24 ||
[Analyze grammar]

kāntimatīpate kālindīśa revāpate prabho |
vardhinīśa sumitreśa puṇyanaidheyikāpate || 25 ||
[Analyze grammar]

banduleśa suśīleśa mānaseśa janārdana |
śarmavatīśvara kṛṣṇa mādhavīśa namo'stu te || 26 ||
[Analyze grammar]

karṇotpaleśa dīrghikāpate'kṣamālikāpate |
udumbarīpate ṛtambharādhīśa jayo'stu te || 27 ||
[Analyze grammar]

badarīśa ca kubjeśa haimīśa maṃgalāpate |
mahāvedīpate kṛṣṇāpate tvāṃ cintaye hṛdi || 28 ||
[Analyze grammar]

śrīkṛṣṇa uvāca |
yaścā'sti divye'kṣaradhāmni divyo hyanantamuktā'bhisusevyamānaḥ |
pare'kṣarāddhāmni virājamānaḥ so'yaṃ pṛthivyāṃ samavātatāra || 29 ||
[Analyze grammar]

śrīkṛṣṇanārāyaṇanāmadheyo |
hyanādikṛṣṇaḥ parameśvaraśca |
golokavaikuṇṭhanivāsibhiśca |
prage'rcane vai hṛdi cintyamānaḥ || 30 ||
[Analyze grammar]

so'yaṃ kṛpābhiḥ pṛthivītale |
kuṃkumākhyavāpyāṃ hi surāṣṭradeśe |
śrīkambharālakṣmisatīgṛhe'tra |
gopālakṛṣṇātmajatāmavāpa || 31 ||
[Analyze grammar]

yasmādahaṃ pūrṇatamo'pi kṛṣṇo |
rādhāpatiścāpyabhavaṃ purāṇaḥ |
lakṣmīpatiścāpyabhavad yato vai |
vaikuṇṭhadhāmādhipatirmahātmā || 32 ||
[Analyze grammar]

kailāsavāso'pi yato'bhavaccā |
mṛtādhivāso'pi yato'bhavacca |
avyākṛteśo'pi yato'bhavaccā |
hiraṇyagarbho'pi yato'bhavacca || 33 ||
[Analyze grammar]

śrībadrikeśo'pi yato'bhijātaḥ |
kṣīrodavāsī ca yato'sti jātaḥ |
śvetākhyadhāmeśa narāyaṇo'pi |
yato'sti jātaḥ kamalāpatirvai || 34 ||
[Analyze grammar]

asaṃkhyadhāmādhipareśvarāśca |
yato bhavantyeva harestu rādhe |
tasyā''tmadevasya guṇānukīrtiṃ |
vadāmi rādhe parameśvarasya || 36 ||
[Analyze grammar]

tvayā stutaḥ śrīpuruṣottamo yaḥ |
parātparaḥ kāraṇakāraṇaṃ ca |
sarvāvatārādhipatiḥ purāṇaḥ |
smarāmi taṃ śrīpuruṣottameśam || 36 ||
[Analyze grammar]

dviṣaṭkayuktaṃ kathitaṃ ca yat śataṃ |
tvayā pareśasya tu mukhyayoṣitām |
divyāṃganānāṃ caraṇānyahaṃ sadā |
namāmi tāsāṃ pataye namo namaḥ || 37 ||
[Analyze grammar]

ahaṃ purodbhāvya vilokitastvayā |
sākaṃ pareśena nivāsanāya vai |
golokasaṃjñaṃ mama dhāma cārpitaṃ |
rādhe vihārārthamanena te namaḥ || 38 ||
[Analyze grammar]

tataḥ paraṃ yena narāyaṇaḥ kṛto |
lakṣmyā suyuktaśca vilokitaśca saḥ |
vaikuṇṭhasaṃjñaṃ pradadau ca dhāma yat |
tasmai pradātre paramātmane namaḥ || 39 ||
[Analyze grammar]

athāpi rūpaṃ ca vidhāya śāṃbhavaṃ |
satyā samaṃ yatpravilokitaṃ punaḥ |
kailāsasaṃjñaṃ pradadau ca dhāma yat |
nivāsadātre guṇadhāriṇe namaḥ || 40 ||
[Analyze grammar]

śrīrādhikovāca |
kṛṣṇa kānta dayāsindho parameśvara śāśvata |
parameśvarasaṃjño yaḥ paramātmā parātparaḥ || 41 ||
[Analyze grammar]

guṇaiśvaryavibhūtyādikāntāpārṣadabhūṣaṇaiḥ |
sevito yatra mahyāṃ vai hyavātatāra dharmadhṛk || 42 ||
[Analyze grammar]

tanmūrtiṃ tadguṇāṃstasya rūpamaiśvaryamityapi |
līlā mokṣapradāḥ sarvā vada lokahitapradāḥ || 43 ||
[Analyze grammar]

ahaṃ golokasaṃsthaiva śrotumicchāmi taṃ prabhum |
yatrā''vayośca jananaṃ bhaviṣyati bhuvastale || 44 ||
[Analyze grammar]

tad brahmāṇḍaṃ ca tallokaṃ tatsthalaṃ pāvanaṃ param |
sarvābhiḥ svasṛbhiḥ sārdhaṃ śrotumicchāmi tadvada || 45 ||
[Analyze grammar]

śrīharestasya patnīnāṃ tanmūrtīnāṃ prasevinām |
āvirbhāvasvarūpāṇāṃ kathā mokṣāya dehinām || 46 ||
[Analyze grammar]

svaṃ rūpaṃ yo vijānāti mūlaṃ jānāti naiva ca |
na sa kiñcid vijānāti tasmāttaṃ vada kānta me || 47 ||
[Analyze grammar]

ahaṃ māyāsvarūpā'smi tava dehā'rdhadhāriṇī |
tvayyadhiśāyinaṃ kṛṣṇa vad me puruṣottamam || 48 ||
[Analyze grammar]

tava mūrtau sadā prātastaṃ paśyāmi pareśvaram |
hṛdye te nivasantaṃ hasantaṃ te'tiśāyinam || 49 ||
[Analyze grammar]

mānasaṃ me vikarṣantaṃ rūpasaundaryavāridhim |
tvayi kṛṣṇe śvetavarṇaṃ vada me puruṣottamam || 50 ||
[Analyze grammar]

śrīkṛṣṇa uvāca |
śṛṇu rādhe pravakṣyāmi śrīhariṃ puruṣottamam |
koṭikṛṣṇā mādṛśā yatsvarūpe'ntarbhavanti hi || 51 ||
[Analyze grammar]

koṭinārāyaṇā yasya mūrtau līnā bhavanti ca |
tādṛśaḥ śrīmahārājādhirājaparameśvaraḥ || 52 ||
[Analyze grammar]

abjarādhāramādyāśca yadromāt prabhavanti hi |
asaṃkhyā avatārāśca yanmūrteḥ saṃbhavanti ca || 53 ||
[Analyze grammar]

anantā vyūhasaṃjñāśca līnāstiṣṭhanti yaddharau |
bhūmānaścāpyanantāśca yadaiśvarye vasanti ca || 54 ||
[Analyze grammar]

yasya tejasi dhāmāni golokādīni rādhike |
vasanti ca samānābhihāra kṛtāni sarvadā || 55 ||
[Analyze grammar]

yasyaikakiraṇātsarve prāvirbhāvā bhavanti ca |
tadrūpaṃ kimahaṃ rādhe varṇaye'kṣiprasākṣikam || 56 ||
[Analyze grammar]

yasyaikamukto'pi ca me dhāmni cāyād yadṛcchayā |
mayā sākaṃ ca golokaṃ sarvaṃ tejohataṃ bhavet || 57 ||
[Analyze grammar]

tasyaikā lalitā patnī jayā vā muktamāṇikī |
prabhā lakṣmīḥ pārvatī vā samāyāttava sannidhau || 58 ||
[Analyze grammar]

tasyāstejasi me patnyo yūyaṃ syustejasā hatāḥ |
tādṛśaṃ rūparūpāṇāṃ rūpātirūparūpiṇam || 59 ||
[Analyze grammar]

kiṃ varṇaye rādhike'tra cakṣuścaraṃ na vākcaram |
maṇiryasya mukuṭasya svenaivodbhāvitastanoḥ || 60 ||
[Analyze grammar]

eka eva samartho'sti tejo dātuṃ hi dhāminām |
tamahaṃ cintaye nityamanādikṛṣṇamacyutam || 61 ||
[Analyze grammar]

anye dhāmanivāsāśca cintayanti hi taṃ prabhum |
anādiśrīkṛṣṇanārāyaṇasvāmipumuttamam || 62 ||
[Analyze grammar]

rādhe'haṃ taṃ cintayāmi mahānandapayodadhim |
pitaraṃ kāraṇaṃ sarvāvatārāṇāṃ parātparam || 63 ||
[Analyze grammar]

yasyaikanetrakoṇe tu kaṭākṣe vauṣṭhamadhyame |
sarve rasāḥ sarvakāmāḥ sarvānandā vasanti ca || 64 ||
[Analyze grammar]

yasya kukṣau tu dhāmāni parameśā maheśvarāḥ |
vyūhā vibhavā āveśā nivasanti sukhāśrayāḥ || 65 ||
[Analyze grammar]

guṇā niravadhayaśca niratiśayaśāyinaḥ |
samūrtā yasya vai mūrtau vartante hṛdayādiṣu || 66 ||
[Analyze grammar]

sṛṣṭistu pannakhe yasya mahāmāyā nakhāntare |
īśvarāḥ karagā yasya cintayāmi hariṃ ca tam || 67 ||
[Analyze grammar]

cintaya tvaṃ sadā rādhe kāntādhikāntameva tam |
mama kāntastava kāntaḥ sa eva bhagavān patiḥ || 68 ||
[Analyze grammar]

dhyātvā'nādikṛṣṇanārāyaṇaṃ saubhāgyadā bhava |
saṃsevya taṃ pareśaṃ cā'khaṇḍasaubhāgyadhā bhava || 69 ||
[Analyze grammar]

prapūjya taṃ ca saṃsevya nijarūpabudhā bhava |
tvaṃ tasyā'syakṣaraṃdhāma paradhāmātmako'smyaham || 70 ||
[Analyze grammar]

mayi vāsaḥ sadā tasya tena dṛṣṭastvayā mayi |
sa eva hṛdye me'sti te hṛdi nivasāmyaham || 71 ||
[Analyze grammar]

tvaṃ cecchā śāśvatī rādhe sarveṣāṃ hṛdayeṣvasi |
tasmātsarvamayī tvaṃ vai procyase tvanmayo'pyaham || 72 ||
[Analyze grammar]

manmayaḥ śrīkṛṣṇanārāyaṇo'nādiśca varṇyate |
ekaṃ tattvaṃ parabrahma dvaidhā caivaṃ pratiṣṭhitam || 73 ||
[Analyze grammar]

tredhā cāpi caturdhā vā'nantadhā'pi pratiṣṭhitam |
tantunā tena devena grathitaṃ nātiricyate || 74 ||
[Analyze grammar]

nāsti tasya pṛthagbhāvaścāntarātmā yato hi saḥ |
vyatireke pare dhāmni pṛthagbhāvastu sarvarāṭ || 75 ||
[Analyze grammar]

evaṃ jñātvā bhajed dhyāyet prāpnuyāttaṃ pareśvaram |
bhagavatāṃ bhagavantaṃ devānāṃ cāpi daivatam || 76 ||
[Analyze grammar]

īśvarāṇāṃ mahaiśvaryamavatārā'vatāriṇam |
bhuktimuktipradaṃ rakṣākaramātmānamātmanām || 77 ||
[Analyze grammar]

sraṣṭṝṇāṃ sargiṇaṃ rakṣakāṇāṃ paramarakṣakam |
saṃhartṝṇāṃ hārakaṃ ca dhyātṝṇāṃ dhyeyameva tam || 78 ||
[Analyze grammar]

prāpyāṇāṃ paramaṃ prāpyaṃ sarvajñānāṃ ca saṃvidam |
prabhūṇāṃ prabhavaṃ nāthaṃ dayālūnāṃ kṛpā''layam || 79 ||
[Analyze grammar]

prasannānāṃ prasannaṃ ca nirmalānāṃ ca nirmalam |
viśadānāṃ ca viśadaṃ divyānāṃ divyamīśvaram || 80 ||
[Analyze grammar]

tīrthānāṃ paramaṃ tīrthaṃ dharmāṇāṃ dharmamuttamam |
śāntānāṃ paramaṃ śāntaṃ modānāṃ ca pramodanam || 81 ||
[Analyze grammar]

utsavānāmutsavāgryaṃ priyāṇāṃ paramaṃ priyam |
kāntānāṃ paramaṃ kāntaṃ premāḍhyānāṃ śubhāspadam || 82 ||
[Analyze grammar]

dhāryāṇāṃ paramaṃ dhāryaṃ sādhūnāṃ sādhusattamam |
vibhūṣāṇāṃ bhūṣaṇāgryaṃ siddhīnāṃ siddhamuttamam || 82 ||
[Analyze grammar]

śīlānāṃ paramaṃ śīlaṃ vratināṃ vratamuttamam |
arthānāṃ paramārthaṃ ca samiṣṭānāṃ pareṣṭakam || 84 ||
[Analyze grammar]

satyānāṃ paramaṃ satyaṃ satāṃ santaṃ vicintayet |
akṣayāṇāmakṣayāgryaṃ satīnāṃ sattvamagragam || 86 ||
[Analyze grammar]

vedānāṃ paramānnaṃ ca japānāṃ japamuttamam |
dānānāṃ paramaṃ pātraṃ homānāṃ havanaṃ param || 86 ||
[Analyze grammar]

tapaḥ śreṣṭhaṃ tapatāṃ ca yajñānāṃ yāgamuttamam |
pitṝṇāṃ praprapitaramṛṣīṇāmārṣamujjvalam || 87 ||
[Analyze grammar]

svacchānāmacchatattvaṃ śrīpuruṣottamamarcayet |
rādhānāṃ paramaṃ rādhaṃ smṛddhānāṃ sampadaṃ parām || 88 ||
[Analyze grammar]

dhanānāṃ cā'vyayaṃ dravyaṃ gṛhāṇāṃ śāśvatālayam |
staṃbhānāṃ śāśvatādhāraṃ bījabījaṃ tamarcayet || 89 ||
[Analyze grammar]

nāvāmakṣayyanāvaṃ taṃ khanīnāmakṣayāṃ khanim |
balānāṃ balamugraṃ ca netrāṇāṃ cakṣuruttamam || 90 ||
[Analyze grammar]

bhāvanānāṃ paraṃ bhāvaṃ vyāpakānāṃ samāpakam |
sarvajñaṃ svāminaṃ brahmacāriṇaṃ saṃsmaret sadā || 91 ||
[Analyze grammar]

vīryāṇāṃ paramaṃ vīryaṃ prabhāvāṇāṃ ca bhāvanam |
ākarṣaṇānāṃ sarveṣāmākarṣaṇaṃ pareśvaram || 92 ||
[Analyze grammar]

śaraṇyānāṃ śaraṇadaṃ kṣantāraṃ ca kṣamāvatām |
dhairya śauryaṃ cāpradhṛṣyaṃ dhīraśūrā'dhṛṣāṃ tathā || 93 ||
[Analyze grammar]

mātrāṇāṃ paramaṃ mātraṃ jananīṃ janmadāyinām |
mātaraṃ poṣakāṇāṃ ca śrīhariṃ prabhajet sadā || 94 ||
[Analyze grammar]

pralayānāṃ pralayaṃ taṃ kośānāṃ kośamuttamam |
saṃyamināṃ saṃyamaṃ ca bhaje'haṃ rādhike sadā || 95 ||
[Analyze grammar]

yasmājjāto mahākālaḥ paricchedavidhāyakaḥ |
prakṛtipūruṣo yasmātsamutpanno hi līlayā || 96 ||
[Analyze grammar]

mahāpūruṣanāmā'pi purā yasmātpravartate |
vāsudevaḥ sa vasanād yataḥ samupajāyate || 97 ||
[Analyze grammar]

aniruddho janayitā pradyumnaḥ puṣṭido yataḥ |
saṃkarṣaṇaḥ karṣayitā yatastaṃ naumi matpatim || 98 ||
[Analyze grammar]

pādo'sya viśvā bhūtāni saṃkarṣaṇavaśāni vai |
sarvasṛṣṭiḥ kare yasya saṃkarṣaṇasya puṣpavat || 99 ||
[Analyze grammar]

sṛṣṭyadhikaṃ dehamānaṃ yasyā''ste yatkṛpāvaśāt |
gadāgrakośavat sṛṣṭiḥ sarvā yasya vibhāti hi || 100 ||
[Analyze grammar]

tādṛggadādharo yasya dāsadāsapradāsakaḥ |
taṃ pareśaṃ ca sarveśaṃ bhajāmi rādhike patim || 101 ||
[Analyze grammar]

paṭhanācchravaṇāccā'sya smaraṇātkathanādapi |
paradhāmanivāsī syāttaṃ sadā bhaja rādhike || 102 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne śrīpuruṣottamanārāyaṇasvāminaḥ sārvabhaumamahimavarṇananāmā prathamo'dhyāyaḥ || 1 ||
[Analyze grammar]