Chapter 589

śrīnārāyaṇa uvāca |
śṛṇu lakṣmi mahāvedīmahotsavaṃ vadāmi te |
vaiśākhaśuklatṛtīyātithau tu varayed dvijam || 1 ||
[Analyze grammar]

takṣāṇaṃ vṛṇuyāccāpi vanayāgāya vai vanam |
gatvā vṛkṣamadhyabhuvi vahnāvaṣṭottaraṃ śatam || 2 ||
[Analyze grammar]

hutvā''jyaṃ vṛkṣamūle'pi baliṃ datvā ca kṣetrape |
vṛkṣamūle dvijaḥ kiñcicchindyāt tatastu vardhakiḥ || 3 ||
[Analyze grammar]

kāṣṭhānyādāya ca rathaṃ kuryād gaṇeśamarcayet |
dvāviṃśatikarocchrāyaṃ caturdvāraṃ rathaṃ hareḥ || 4 ||
[Analyze grammar]

ṣoḍaśacakrasaṃyuktaṃ garuḍadhvajaśobhitam |
caturdaśāraṃ śeṣasya bhadrāyā dvādaśārakam || 5 ||
[Analyze grammar]

evaṃ sāṃgān kārayitvā cākacakyāyecca tān |
bṛṃhayet satpaṭaiḥ śṛṃgārayet sadratnakaiśca tān || 6 ||
[Analyze grammar]

āṣāḍhaśukladvitīyoruṇodaye'rcayeddharim |
tato yātrāṃ kārayecca guṇḍikāmaṇḍapaṃ prati || 7 ||
[Analyze grammar]

rājyopacāraiḥ racayedutsavaṃ lakṣamānavaiḥ |
nātaḥ parataraṃ viṣṇoryāntrātaramavekṣyate || 8 ||
[Analyze grammar]

cāturmāsye sthāpayecca kārtike'nnāni cārpayet |
viṣṇoḥ prasādaṃ bhuñjīta tatpāvitryaṃ śriyā kṛtam || 9 ||
[Analyze grammar]

naivedyānnaṃ jagadbharturgāṃgaṃ vāri samaṃ dvayam |
api kukkuracāṇḍālaspṛṣṭaṃ divyaṃ jalānnakam || 10 ||
[Analyze grammar]

yātrā dvādaśa vai kāryā mokṣadā jagadīśituḥ |
vaiśākhaśuklatṛtīye rathanirmāṇayātrikā || 11 ||
[Analyze grammar]

jyeṣṭhe yātrāṃ pañcatīrthī padbhyāṃ gatvā samācaret |
jyeṣṭhe kāryā guṇḍikābhigatirvai rathayātrikā || 12 ||
[Analyze grammar]

jyeṣṭhe prāsādābhigatisturyā dakṣiṇayātrikā |
āṣāḍhe śayanīyātrā kartavyā māścatuṣṭayī || 13 ||
[Analyze grammar]

bhādra pārśvaparivṛttiryātrā pūjanarūpiṇī |
kumude bodhinīyātrā mahotsavasvarūpiṇī || 14 ||
[Analyze grammar]

mārge prāvaraṇayātrā aurṇavastrādidhāraṇam |
pauṣe puṣyasnānayātrā tapaḥsnānātmikā śubhā || 15 ||
[Analyze grammar]

pauṣe sūryottarayānayātrā puṇyātmikā matā |
māghe vasantayātrā ca pūjotsavātmikā matā || 16 ||
[Analyze grammar]

phālgune puṣpadolāyā dolāyāḥ śrāvaṇe'thavā |
evaṃ mahotsavāḥ kāryā mokṣadā jagadīśituḥ || 17 ||
[Analyze grammar]

jagannāthapure divye jātibhedo na vidyate |
naranārīprabhedo'pi tatra kāryo na sarvathā || 18 ||
[Analyze grammar]

sarve caturbhujā divyā dṛśyante tu dvihastakāḥ |
vasanti sarve muktā me puṇyapuñjapradāyakāḥ || 19 ||
[Analyze grammar]

sarvaṃ prāsādikaṃ me'sti divyaṃ doṣavihīnakam |
golokaṃ cāpi vaikuṇṭhaṃ mayā pṛthvyāṃ samāhitam || 20 ||
[Analyze grammar]

nāryo lakṣmyo narā nārāyaṇā me jagadīśituḥ |
kṛpayā ca pratāpenā'nugraheṇa matā mama || 21 ||
[Analyze grammar]

bhojyā'nnapānavastrādi nā'śuddhaṃ tatra vidyate |
ekādaśīmayā tatrā'nnāśane tu vaśīkṛtā || 22 ||
[Analyze grammar]

matprasādānnabhojyairna dūṣaṇaṃ kintu bhūṣaṇam |
sādhusevā gurusevā mama sevā'tra muktidā || 23 ||
[Analyze grammar]

mayā gopīvihārairdīyate śaśvaddhi darśanam |
divyā krīḍā kāmarūpā saṃśayātmavināśinī || 24 ||
[Analyze grammar]

divyabhāvātmanāṃ mokṣānandasandohadāyinī |
evaṃ svātmani vijñāya divyatāṃ yānti dehinaḥ || 25 ||
[Analyze grammar]

ahaṃ gopīpatirvṛndāvane kuṃkumavāpike |
puruṣottamabhūmau ca durgabhūmau prasiddhimān || 26 ||
[Analyze grammar]

yasmai yasmai prasannaḥ syāṃ nānyattasyā'vaśiṣyate |
ānandadātā vai cāsmi yathā yairmatta iṣyate || 27 ||
[Analyze grammar]

lakṣmi kṣetre mokṣade me sthāpanaṃ jagadīśvare |
darśanaṃ sparśanaṃ dūrasmaraṇaṃ cāpi mokṣadam || 28 ||
[Analyze grammar]

tubhyaṃ mayā kathito'yaṃ kṛtasantānakhaṇḍakaḥ |
lakṣmīnārāyaṇasaṃhitāyāḥ prathamakottamaḥ || 29 ||
[Analyze grammar]

atrā''rambhe nāradasya vaikuṇṭhe dravatā harau |
muktādīnāṃ dravamuktiḥ sākāratvaṃ pare'kṣare || 30 ||
[Analyze grammar]

golokasya pranirmāṇaṃ rādhārthaṃ kṛṣṇarūpataḥ |
vaikuṇṭhasya ca nirmāṇaṃ lakṣmyarthaṃ cākṣareśituḥ || 31 ||
[Analyze grammar]

vāsudevātsamārabhya parameṣṭhyantasarjanam |
brahmaviṣṇumaheśānāmanekatvaṃ tataḥ param || 32 ||
[Analyze grammar]

avyākṛtasya ca badrikāśramasya ca divyatā |
brahmaṇā vīkṣitā sṛṣṭirnārāyaṇatanau dhiyai || 33 ||
[Analyze grammar]

brahmaviṣṇvormahattve ca vivādaḥ kavacādikam |
brahmatejomayaśaṃbhuliṃgāvirbhāvakīrtanam || 34 ||
[Analyze grammar]

liṅgāntavīkṣaṇe mṛṣāvādī brahmā ca ketakī |
apūjyatāṃ sadā prāptau viṣṇośca pūjyateti ca || 35 ||
[Analyze grammar]

aṇvaṇḍānāṃ samutpattirāvaraṇeṣu vāsinaḥ |
kṣaṇādikamahākālagaṇanā ca tataḥ param || 36 ||
[Analyze grammar]

brahmaṇā ca guṇā'jñānā'dharmādyā mānasāḥ kṛtāḥ |
dharmarudrakṛtāntānāṃ sṛṣṭiḥ rudralayastathā || 37 ||
[Analyze grammar]

sāttvikarudrarudrāṇīdāsadāsīprasarjanam |
sanakādiśāntasṛṣṭirvedaprākaṭyamityapi || 38 ||
[Analyze grammar]

māhātmyaṃ ca satāṃ divyagītādisṛṣṭirityapi |
upaniṣatkanyakānāṃ sṛṣṭirvidyāprasarjanam || 39 ||
[Analyze grammar]

brahmapriyādigāyatrīsarasvatīprasarjanam |
ekādaśījayantyādibhaktyārādhanasarjanam || 40 ||
[Analyze grammar]

mahālakṣmīramārādhāsatīgaṃgādisarjanam |
sādhvīnāṃ divyanārīṇāṃ divyacihnaguṇādikam || 41 ||
[Analyze grammar]

nārāyaṇāvatārātmanaranārīpracihnakam |
pativratāyā utpattiḥ sāmarthyaṃ ca tataḥ param || 42 ||
[Analyze grammar]

kuṃkumā'kṣatatāmbūlanārikelarasādikam |
raktagairikadhātvādi yathotpannaṃ tathoditam || 43 ||
[Analyze grammar]

kāmadhenusamutpattiḥ kāmadevādisarjanam |
patnīvratadvijotpattiḥ pitṛsevāmahattvakam || 44 ||
[Analyze grammar]

patnīvratasya māhātmyam ṛṇānubandhiputratā |
garbhe niṣeke prābalyaṃ kāladeśādijaṃ tathā || 45 ||
[Analyze grammar]

niṣekasamayo rajodoṣāpaharaṇaṃ vratam |
ādye dine brahmaṇastu brāhmaṇānāṃ prasarjanam || 46 ||
[Analyze grammar]

satyaloke mānasī carṣīṇāṃ sṛṣṭiḥ prakāśitā |
maharjanatapaḥsveva pitṝṇāṃ sarjanaṃ tathā || 47 ||
[Analyze grammar]

pitṛbhyo deyamannādi havyavṛkṣādikaṃ tathā |
sūryotpattirhiraṇyādi dhāma candrodbhavastathā || 48 ||
[Analyze grammar]

rohiṇyāṃ pakṣapātena candrasya kṣayarugṇatā |
saurāṣṭre somanāthasya sthāpanāt kṣayahīnatā || 49 ||
[Analyze grammar]

devamānuṣabhūtādidaityadānavajaṃgamāḥ |
yathā sṛṣṭā uditāste yugavarṣādisiddhayaḥ || 50 ||
[Analyze grammar]

siddhihrāso nagarādyauṣadhivarṇāśramādikam |
viśvarūpasya hatyāyāścaturdhādānamityapi || 51 ||
[Analyze grammar]

dadhyañcāsthikṛtavajraṃ vṛtranāśo'śvamedhakaḥ |
varāhasyā'vatāraśca pṛthoścā'vatarastathā || 52 ||
[Analyze grammar]

mithunīsṛṣṭisañcāraḥ svapnaṃ mṛtyupradaṃ tathā |
cakravartipracihnāni hiṃsāpakṣiprapātanam || 53 ||
[Analyze grammar]

dvāparasya svabhāvāśca raivataṃ nāradāgamaḥ |
tattvoddeśo vivaraśca bhuvo vivarapūraṇam || 54 ||
[Analyze grammar]

raivatasya candrabhāvo maṇyaṃśo raivataḥ svayam |
khadvāṃgasya tapaścā'śvapaṭṭasarasi varṇitam || 55 ||
[Analyze grammar]

kuṃkumavāpikātīrthaṃ gopālakṛṣṇakodbhavaḥ |
kambharāyā mahālakṣmyāḥ prādurbhāvaḥ samīritaḥ || 56 ||
[Analyze grammar]

lakṣmīnārāyaṇajanma barhiṣāṃgadakodbhavaḥ |
pannīvratarṣeśca gale mṛtasarpaprasañjanam || 57 ||
[Analyze grammar]

ṛṣeḥ putrasya śāpena kuhakadaṃśa ityapi |
prāyopaveśanaṃ rājñaḥ kathāyāḥ sthāpanaṃ tathā || 58 ||
[Analyze grammar]

mūrtidhyānaṃ vratadāyāstaṭe dhanvantarergamaḥ |
sarpasatre rakṣaṇaṃ ca sūryasyāpi vivāhanam || 59 ||
[Analyze grammar]

sūryapatnyāstu saṃjñāyā rūpadvayasya dhāraṇam |
śrāddhadevayamayamījananaṃ ca tataḥ param || 60 ||
[Analyze grammar]

chāyāyāmaśvinīvaidyādyutpattiśca tataḥ param |
yāmyamārgapurāṇāṃ varṇanaṃ nārakavarṇanam || 61 ||
[Analyze grammar]

nārakāṇāṃ phalaṃ karma janmacihnādikaṃ tathā |
śārīradaivacihnāni śriyāścihnāni yoṣitām || 62 ||
[Analyze grammar]

śavaurdhvadaihikaṃ pretapīḍā tasyā nivāraṇam |
pretatā pretabhojyādi sūtakaṃ piṇḍakārpaṇam || 63 ||
[Analyze grammar]

dānaphalaṃ piṇḍabrahmāṇḍaikyaṃ niṣekanirmitiḥ |
mṛtānāṃ dānakāryādyairgatayo muktisādhanam || 64 ||
[Analyze grammar]

nārāyaṇabaliścāpi dhanvantareḥ kathā tathā |
somajanma gurupatnyā apahṛtirbudhodbhavaḥ || 65 ||
[Analyze grammar]

dhanvantaritrayajanma divodāsakathānakam |
śaṃbhorvārāṇasītyāgo divodāse savighnatā || 66 ||
[Analyze grammar]

yoginyarkavidhātṛśrīgaṇeśasvapnavartanam |
viṣṇornāstikyakaraṇaṃ rājñaḥ pratāpanāśanam || 67 ||
[Analyze grammar]

lakṣmīnārāyaṇasaṃhitāyāḥ saptāhavācanam |
viśveśvarapratiṣṭhā ca rājño bhaktivivardhanam || 68 ||
[Analyze grammar]

indrasadasi ca guroravamānaṃ durvāsasaḥ |
mālāyā avamānaṃ ca śrīhrāso'bdhipramanthanam || 69 ||
[Analyze grammar]

ratnotpattiramṛtārthe daityānāṃ vañcanaṃ tathā |
surāsuraraṇaḥ paścāt pārvatyai mantrayojanam || 70 ||
[Analyze grammar]

puṇyavrataṃ ca putrārthaṃ kṛṣṇadarśanamityapi |
kārtikeyasamutpattirdevasenāpatitvakam || 71 ||
[Analyze grammar]

tārakāsuranāśaśca tārakākhyānamityapi |
bhikṣārthaṃ śrīkṛṣṇagatirgaṇeśotpattirityapi || 72 ||
[Analyze grammar]

śironāśo gajamastakasya sandhānamarcanam |
śanerdṛṣṭeḥ phalaṃ ceti gaṇeśakārtikeyayoḥ || 73 ||
[Analyze grammar]

pṛthvīpradakṣiṇaṃ cāpi vivāho mallikārjunam |
naranārāyaṇaprādurbhāvaḥ pitroḥ prasevanam || 74 ||
[Analyze grammar]

śaṃbhovaiṣṇavadīkṣāyā grahaḥ satyā api grahaḥ |
taptacakrāṃkanapuṇyaṃ mantrārthāstilākāni ca || 75 ||
[Analyze grammar]

dhāmnāṃ nāmāni ca parabrahmadhāmnaḥ pravarṇanam |
akṣaravarṇanaṃ cāpi golokavarṇanaṃ tathā || 76 ||
[Analyze grammar]

sthānānāṃ gopurādīnāṃ paṭṭāṃganānāṃ varṇanam |
mahāvaikuṇṭhakathanaṃ saptavyūhādivarṇanam || 77 ||
[Analyze grammar]

dāsadāsībhavanānāṃ pārṣadānāṃ ca varṇanam |
dvitīyavaikuṇṭhakasya varṇanaṃ ca jalopari || 78 ||
[Analyze grammar]

tṛtīyaśvetadvīpasya varṇanaṃ sopabhūtikam |
caturthakṣīravārdhisthavaikuṇṭhavarṇanaṃ tathā || 79 ||
[Analyze grammar]

śaṃbhorbhasmā'vaguṇṭhādiśaṃkāyā vāraṇaṃ tathā |
hayagrīvā'surotpattirmatsyāvataraṇaṃ tathā || 80 ||
[Analyze grammar]

naukāyā dhāraṇaṃ hiraṇyākṣanāśo varāhataḥ |
jayasya vijayasyā'pi vaikuṇṭhāttu vivāsanam || 81 ||
[Analyze grammar]

vārāheṇa yathāsthānaṃ pṛthivyāḥ sthāpanaṃ tataḥ |
tapo hiraṇyakaśipoḥ rudrācca varadānakam || 82 ||
[Analyze grammar]

prahlādasya tato dveṣo nṛharerudbhavastataḥ |
hiraṇyakaśipornāśaḥ prahlādasya prarakṣaṇam || 83 ||
[Analyze grammar]

raivatādrau vāmanasya pratāpaśca pradakṣiṇam |
mayarājasya yajñaśca tīrthāni vividhāni ca || 84 ||
[Analyze grammar]

aditeśca tapaścaryā vāmanotpattirityapi |
baleryajñe yācanā cendrāya trilokadānakam || 85 ||
[Analyze grammar]

payovrataṃ mṛgīkuṇḍakathā śakunakāni ca |
tīrthavidhirvratādīni cendreśvarakathānakam || 86 ||
[Analyze grammar]

śivarātrimahimādi mandarādyāgamastathā |
anekatīrthāgamanaṃ mahālakṣmīprapūjanam || 87 ||
[Analyze grammar]

alakṣmyāśca samutpattirvāsasthānāni yānyapi |
dvādaśyāṃ harivāsatvaṃ sthānaṃ lakṣmyāḥ samarcanam || 88 ||
[Analyze grammar]

revatījanma ca durdamena saha vivāhanam |
revatasya tathā janma kṛtavāco gṛhe punaḥ || 89 ||
[Analyze grammar]

revatījanma ca vivāhanaṃ balena pa punaḥ |
tīrthe dāmodarakuṇḍe śrāddhādikaphalaṃ tathā || 90 ||
[Analyze grammar]

patnīvratadvijasyā'tra sarvadhāmapradarśanam |
dvayornārāyaṇayośca śrāddhakarmapravartanam || 91 ||
[Analyze grammar]

vastrāpathasya tīrthāni rādhālakṣmyādisaṃbhavaḥ |
maghukaiṭabhanāśārthaṃ mohinībhavanaṃ hareḥ || 92 ||
[Analyze grammar]

mahiṣāsuranāśārthaṃ kātyāyanīprakāśyatā |
brahmaṇo vīryato janma maharṣīṇāṃ puroditam || 93 ||
[Analyze grammar]

satījanma dakṣajanma punarnāradajanma ca |
śuṃbhaniśuṃbhayorjanma kālīcāmuṇḍikājanuḥ || 94 ||
[Analyze grammar]

raktabījādināśaśca devīsainyodbhavastathā |
śuṃbhādīnāṃ vināśaśca satīprākaṭyakotsavaḥ || 95 ||
[Analyze grammar]

gopagopīgaṇotpādo devyutpattiśca naikadhā |
śaṃbhorvairājabhālotthā satyāstapasi vartanam || 96 ||
[Analyze grammar]

vivāhaśca vālakhilyādyutpattirvedhaso'pi ca |
kailāsapuranirmāṇaṃ śivasyā''tmaniveditā || 97 ||
[Analyze grammar]

dakṣayajñe dvijānāṃ ca śāpāḥ satyā vināśanam |
vīrabhadrakṛtayajñabhaṃgo dakṣasya vai tapaḥ || 98 ||
[Analyze grammar]

śaṃbhorbhasmā'sthidhāritvaṃ pārvatījanma ityapi |
pitṛkanyāstisra etā menā dhanyā kalāvatī || 99 ||
[Analyze grammar]

tāsāṃ putryaḥ śivā cāpi sitā rādhā haripriyāḥ |
kālīmantrotsavaścāpi pārvatīguṇavarṇanam || 100 ||
[Analyze grammar]

pārvatītapa evā'tha maṃgalotpattireva ca |
śaṃbhorgolokadhenvāṃ vai vṛṣarūpodbhavastathā || 101 ||
[Analyze grammar]

brahmavīryādbrahmaparyo brahmasarasa ityapi |
śaṃbhorvīryācca hanumān vāyudvārā samudgataḥ || 102 ||
[Analyze grammar]

śanaiścaraḥ pannatiśca kāmadāho varastataḥ |
gaurītapaḥ śaṃkarasya darśanaṃ ca gṛhaṃ gatiḥ || 103 ||
[Analyze grammar]

śaṃbhośca nartanaṃ śivanindā lagnavinirṇayaḥ |
maṃgalaṃ maṇḍapaśobhā patrikā varayātrikā || 104 ||
[Analyze grammar]

menāśokanivṛttiśca varasyāpi prapūjanam |
kuladevīpūjanaṃ ca śivasya maṇḍapāgamaḥ || 105 ||
[Analyze grammar]

vivāhaḥ kālikāyāśca gaurī jātā tataḥ param |
liṃgapāto dvādaśajyotirliṃgānāṃ samudbhavaḥ || 106 ||
[Analyze grammar]

gurupūjāmahimādi sandhyāpitrādikodbhavaḥ |
svarṇotpattirnāradasya tathā gandharvaputratā || 107 ||
[Analyze grammar]

maraṇaṃ jīvadānaṃ ca vaiṣṇavatvaṃ mṛtistathā |
punarnāradajanmāpi kailāsagamanam ṛṣeḥ || 108 ||
[Analyze grammar]

śaṃkarād brahmajñānaṃ ca badaryāgamanam ṛṣeḥ |
tīrthāni mārkaṃḍakasya cirajīvitvakāraṇam || 109 ||
[Analyze grammar]

pañcaśilāditīrthāni somakuṇḍādayastathā |
urvaśyāśca samutpattitīrthādīni śubhāni ca || 110 ||
[Analyze grammar]

nāradasya vivāhaśca tathā'gnivaṃśavarṇanam |
kāśyapīyaprajoddeśaḥ kalpādīnāṃ ca varṇanam || 111 ||
[Analyze grammar]

kalerdharmā athā''nartā''nītasaurāṣṭrdeśatā |
dvārikāvarṇanaṃ cāpi gomatyādikavarṇanam || 112 ||
[Analyze grammar]

nṛgarājasamākhyānaṃ durvāsaso rathe sthitiḥ |
gopītaṭākamāhātmyaṃ brahmakuṇḍāditīrthakam || 113 ||
[Analyze grammar]

kuśādidaityanāśaśca paṭṭarājñīsthalāni ca |
kṛṣṇārcanaṃ somaśarmapitṛpramokṣaṇaṃ tathā || 114 ||
[Analyze grammar]

śaṃkhapiṇḍārakatīrthaṃ godāvaryāstathā''gamaḥ |
vajralepā'ghanāśitvaṃ māyānandakathānakam || 115 ||
[Analyze grammar]

trispṛśaikādaśī daityamuranāśādikaṃ tathā |
unmīlanī pakṣavardhā tathānyāsāṃ vratāni ca || 116 ||
[Analyze grammar]

svarṇāṃgadasya ca vaiśvānarasya luṃbhakasya ca |
ketumataḥ kapilāyā gāndharvayoḥ kathāstathā || 117 ||
[Analyze grammar]

parśurāmajayo dhātrīkathā medhāvinaḥ kathā |
lalitayoḥ kathā varūthoddhārādiprakīrtanam || 118 ||
[Analyze grammar]

dhṛṣṭabuddhervimuktiśca śalabhāmokṣaṇaṃ tathā |
kratvākhyānaṃ hemamālyākhyānaṃ vāmanakṛcchrakam || 119 ||
[Analyze grammar]

śrāvaṇānāṃ mahāsiddhiḥ rateḥ kāmābhiprāpaṇam |
pururavopākhyānaṃ ca hariścandrakathā tataḥ || 120 ||
[Analyze grammar]

māndhātṛkathanaṃ śūdratapo dharmasya nāśanam |
candrasenakathā vedaśiraḥkathānakaṃ tathā || 121 ||
[Analyze grammar]

indrasenacandrabhāgākathā cāṇḍālamokṣaṇam |
kṛcchravratāni ca śākaṭāyanasyarddhivardhanam || 122 ||
[Analyze grammar]

puṇḍarīkakumudvatyorakṣarākhyapade gatiḥ |
udyāpanaṃ ca pratipadvratāni ca bahūnyapi || 123 ||
[Analyze grammar]

dvitīyāyāstṛtīyāyāścaturthyāśca vratānyapi |
pañcamyāḥ ṣaṣṭhikāyāḥ saptamyā vratāni yānyapi || 124 ||
[Analyze grammar]

aṣṭamyā navamyāśca daśamyāśca vratānyapi |
ekādaśyā dvādaśyāśca trayodaśyā vratāni ca || 125 ||
[Analyze grammar]

caturdaśyāḥ pūrṇimāyā amāyāśca vratāni ca |
dolāvrataṃ rathayātrā dhanurmāso vasantakaḥ || 126 ||
[Analyze grammar]

saṃkrāntiholikāpuṣpadolāśca śāradotsavaḥ |
lakṣmīnārāyaṇavrataṃ sumateśca kathānakam || 127 ||
[Analyze grammar]

haripañcakasaṃjñaṃ ca vrataṃ vāravratāni ca |
rukmāṃgadasamākhyānaṃ viddhā''khyamohinīkṛtam || 128 ||
[Analyze grammar]

yamasya śocanaṃ mohinyāśca janma tataḥ param |
rukmāṃgadasya patnītvaṃ vratabhaṃgakaraṃ vacaḥ || 129 ||
[Analyze grammar]

dharmāṃgadākhyaputrasya śiro'rpaṇādikaṃ tataḥ |
mohinyā dāhanaṃ paścād viddhātithitvamityapi || 130 ||
[Analyze grammar]

puruṣottamamāsasya vratadānamahattvakam |
badaryāṃ malamāsasya tiraskāre tataḥ param || 131 ||
[Analyze grammar]

akṣaraṃ dhāma gamanaṃ puruṣottamanāmitā |
tṛtīyārcāphalaṃ ramākṛtaṃ caturthikāvratam || 132 ||
[Analyze grammar]

śāradā śrīhareḥ patnī jātā vai pañcamīvratāt |
menādhanyākalānāṃ tu ṣaṣṭhīvratena īśvarāḥ || 123 ||
[Analyze grammar]

jāmātaro'bhavan śaṃbhurāmakṛṣṇāḥ pareśvarāḥ |
patayaḥ pārvatīsītārādhānāṃ parameśvarāḥ || 134 ||
[Analyze grammar]

saptamīvratataḥ siddhibuddhibhyāṃ śrīgaṇeśvaraḥ |
patiḥ prāptaśca golokeśvaraḥ śrīkṛṣṇa eva yaḥ || 135 ||
[Analyze grammar]

aṣṭamīvratato ghaṇṭākambudundubhiprabhṛteḥ |
vādyagaṇasya devānāṃ sannidhau vasatiḥ sadā || 136 ||
[Analyze grammar]

navamīvratato vahnisuvarṇayoḥ prapūjyatā |
daśamīvratataḥ pṛthvyāmavatāro hareḥ sadā || 137 ||
[Analyze grammar]

ekādaśīvratānmūrtyā naranārāyaṇodbhavaḥ |
dvādaśīvratataḥ sāvitrī brahmāṇamavāpa ha || 138 ||
[Analyze grammar]

trayodaśīvratājjayālalitāpārvatīprabhāḥ |
anādiśrīkṛṣṇanārāyaṇaṃ prāpuḥ patiṃ mudā || 139 ||
[Analyze grammar]

caturdaśīvratāllakṣmīrmāṇikī cāpatuḥ patim |
anādiśrīkṛṣṇanārāyaṇasvāminamīśvaram || 140 ||
[Analyze grammar]

pūrṇāvratātpreyasīśreyasyoḥ patirnarāyaṇaḥ |
anyapakṣe pratipadi vratāt sahasranetrakaḥ || 141 ||
[Analyze grammar]

rājā hyavāpa ca padaṃ vairājaṃ caiśvaraṃ śubham |
dvitīyāyā vratāt sarvahuto nṛpaḥ ṛtambharā || 142 ||
[Analyze grammar]

patnī jātau parameṣṭhī gāyatrī ceti daivatau |
tṛtīyāyā vratād brahmasavitā nṛpatistathā || 143 ||
[Analyze grammar]

bhūriśṛṃgā ca tatpatnī sūryasaṃjñe babhūvatuḥ |
caturthīvratakaraṇāt samitpīyūṣabhūpatiḥ || 144 ||
[Analyze grammar]

saptaviṃśatipatnībhiḥ saha candro babhūva ha |
pañcamīvratakaraṇād vasudānanṛpastathā || 145 ||
[Analyze grammar]

rādhyāsā tasya patnī ca hiraṇmayau babhūvatuḥ |
ṣaṣṭhīvratena ca devayavagirikṣitau purā || 146 ||
[Analyze grammar]

patnībhyāṃ saha māhendrapadamavāpaturdivi |
saptamīvratakaraṇātsandhyā jātā hyarundhatī || 147 ||
[Analyze grammar]

sandhyā dvedhā samutpannā kāmasya yauvane gatiḥ |
aṣṭamīvratakaraṇād gopālakṛṣṇasadgṛhe || 148 ||
[Analyze grammar]

kambharālakṣmīsuto'bhūt śrīkṛṣṇapuruṣottamaḥ |
navamīvratakaraṇāt śatamakhanṛpagṛhe || 149 ||
[Analyze grammar]

dyuvarṇāyāṃ rāmādityanarādityau babhūvatuḥ |
daśamīvratakaraṇād vikuṇṭhāyāḥ svarūpataḥ || 150 ||
[Analyze grammar]

ṣaṭśrīrūpāṇi catvāri vaikuṇṭhānyabhavanpurā |
ekādaśīvratenāpi vamrī daśapracetasām || 151 ||
[Analyze grammar]

patnī jātā vṛkṣaputrī brahmatanuvirājitā |
dvādaśīvratakaraṇāj jyoṣṭrī tredhā hareḥ priyā || 152 ||
[Analyze grammar]

trayodaśīvratena sudughā pañcapatipriyā |
caturdaśīvratād dṛḍhadhanvā mokṣamavāpa ha || 153 ||
[Analyze grammar]

amāyā vratakaraṇāt kadaryamokṣaṇādikam |
dharmapatnyaśca tatputrāḥ brahmādyā brahmadarśakāḥ || 154 ||
[Analyze grammar]

vratārādhanayā jātā harerdarśanakāriṇaḥ |
jālaṃdharasamākhyāne vṛndāyā rādhikāśapāt || 155 ||
[Analyze grammar]

kālanemisutā tvaṃ ca jālandharodbhavastathā |
devaparājayo jālaṃdharagṛhe'vasaddhariḥ || 156 ||
[Analyze grammar]

jālaṃdharo yayau netuṃ pārvatīṃ kailakāsanam |
vṛndāpātivratyabhaṃgo jālandharavināśanam || 157 ||
[Analyze grammar]

vṛndādatto dharmadeve śāpo vṛndā tu tūlasī |
lakṣmyāstulasīrūpatvaṃ gaṃgādyāḥ saritastathā || 158 ||
[Analyze grammar]

padmāvatyāstūlasītvaṃ sītā kuśadhvajodbhavā |
sudāmā śaṃkhacūḍo'bhūt yuddhaṃ tasya ca śaṃbhunā || 159 ||
[Analyze grammar]

tulasīśilabhaṃgaśca viṣṇuḥ śālaśilātmakaḥ |
pūjāmāhātmyaṃ tulasīviṣṇvorvivāhanaṃ tathā || 160 ||
[Analyze grammar]

gaṇḍakīviṣṇusālaṃkāyanākhyānāni cakrakam |
śālagrāmāt hariharakṣetre tīrthāni vai tataḥ || 161 ||
[Analyze grammar]

ruruṛṣīkeśatīrthaṃ lohārgalādikaṃ tathā |
māthurakṣetramāhātmyaṃ kṛṣṇāvataraṇaṃ purā || 162 ||
[Analyze grammar]

niṣādasya rājajanma rākṣasasya ca mokṣaṇam |
bhāṇḍīrādikatīrthāni prakramaṇaṃ vanāni ca || 163 ||
[Analyze grammar]

viprasya brahmahatyādināśanaṃ kapilāttataḥ |
vārāhamūrtidivyatvaṃ pratiṣṭhānādikaṃ tataḥ || 164 ||
[Analyze grammar]

viśrāmaghāṭasnānena rākṣasatvanivāraṇam |
ḍākinyādimokṣaṇaṃ ca kṛṣṇanārāyaṇakṛtam || 165 ||
[Analyze grammar]

subhadrasya sutaprāptirgaukarṇaṃ tīrthamityapi |
kuṃkumavāpikodyāne vṛkṣavallyādidivyatā || 166 ||
[Analyze grammar]

śukamokṣaśca gokarṇadvārā pretapramokṣaṇam |
pāñcāladvijamuktiśca bhaginīratināśikā || 167 ||
[Analyze grammar]

sāmbe kṣobhajapāpānāṃ kṣālanaṃ kṛṣṇayoṣitām |
dhruvatīrthe koṭipitruddhāro dāsīkṛtaḥ purā || 168 ||
[Analyze grammar]

niminā putratṛptyarthaṃ śrāddhaṃ kṛtaṃ vidhānataḥ |
medhātitheḥ kathā śrāddhe pitaraśca pradarśitāḥ || 169 ||
[Analyze grammar]

nāciketaḥkathā yāmyapurīprākāravarṇanam |
nārakāṇāṃ darśanaṃ ca phalodayasamīraṇam || 170 ||
[Analyze grammar]

pativratāyā māhātmye janakastrī vane purā |
sampadvatī ca sañjātā pātivratyakathā tathā || 171 ||
[Analyze grammar]

dhenusevā sādhusevā sāvitryāṃ vedadarśanam |
saramā gorakṣayitrī daityān dadāha śāpataḥ || 172 ||
[Analyze grammar]

aśvapatigṛhe putrī sāvitrī tapasā'bhavat |
karmaphalānāṃ kathanaṃ satyavataśca jīvanam || 173 ||
[Analyze grammar]

padmāyāḥ pippalādena vivāho dharmaśāpanam |
mahālakṣmyāḥ kathā divyā nahuṣasya ca sarpatā || 174 ||
[Analyze grammar]

ahalyayā kāśirakṣendrasya bhagāṃgatā tathā |
sītārāmavanāvāso rāvaṇādivināśanam || 175 ||
[Analyze grammar]

pātivratye rādhikāyā upadeśapraśaṃsanam |
gṛhagodhākathā cāpi kāṣṭhilāyāḥ kathānakam || 176 ||
[Analyze grammar]

strīdharmāṇāṃ varṇanaṃ ca hariṇyā vanarakṣaṇam |
reṇukāyāḥ kathā divyā bhārgavyāśca kathā tathā || 177 ||
[Analyze grammar]

bhārgavyāḥ śrīkṛṣṇanārāyaṇena ca vivāhanam |
cyavanarṣikathā tena sukanyāyā vivāhanam || 178 ||
[Analyze grammar]

māṇḍavyasya kauśikasya kathā sūryodayādikam |
madālasāvivāhaśca putrāṇāmupadeśanam || 179 ||
[Analyze grammar]

alarkasyā''tmavijñānaṃ dattātreyasya śiṣyatā |
padminyā janma ca tathā nārāyaṇavivāhanam || 180 ||
[Analyze grammar]

veṃkaṭādrau toṇḍamānakṛtavārāhamandiram |
ṛkṣaviśvāsasya hantuḥ dharmaguptādikasya ca || 181 ||
[Analyze grammar]

muktiśca sumatibhadrarāmānujapramokṣaṇam |
jābālitumburutīrthaṃ vyāsasya pūjanādikam || 182 ||
[Analyze grammar]

brahmahatyānivāraśca suvarṇamukharyāgamaḥ |
vārāhodbhava āñjanyāstapaḥ pakṣajaḍībhavaḥ || 183 ||
[Analyze grammar]

mahendrādijaḍībhāvaḥ khyāterujjīvanaṃ tathā |
jayantī devayānī ca śukrakathā tathoditā || 184 ||
[Analyze grammar]

nāradasya punarujjīvanaṃ mālāvatīkṛtam |
vīrāyāśca prabhāvatyāścamatkārau tathoditau || 185 ||
[Analyze grammar]

śaktipatnyā śilārūpā jātāḥ śaptā yamādayaḥ |
ambarīṣasamutpattiḥ śrīmatyāścāpi mokṣaṇam || 186 ||
[Analyze grammar]

daridratābubhukṣākalahādīnāṃ nivāsanam |
dāsīkiṃkarīpaṇyastrīdānadharmanirūpaṇam || 187 ||
[Analyze grammar]

pātivratyaṃ harau kṛṣṇe bāle nāginīsaṃdhṛtam |
lakṣmyādisatyudbhavaścā'saṃkhyapatnīsamudbhavaḥ || 188 ||
[Analyze grammar]

anādiśrīkṛṣṇanārāyaṇasya darśanaṃ purā |
śrīmacchrīkambharālakṣmīgopālakṛṣṇayostapaḥ || 189 ||
[Analyze grammar]

caturyugānāṃ dharmāśca tato vai sannirūpitāḥ |
triveṇyā nūtanaṃ svargaṃ bharadvājagṛhe kṛtam || 190 ||
[Analyze grammar]

śabarīpampayoḥ rāmayogena mokṣaṇaṃ tathā |
citralekhācamatkārā mahīsāgarasaṃgame || 191 ||
[Analyze grammar]

kalahāyā rākṣasītvaṃ tataśca mokṣaṇaṃ param |
colarājaviṣṇudāsakathā kaikayījanma ca || 192 ||
[Analyze grammar]

gokulakanyakāmokṣo gopīnāṃ kṛṣṇamelanam |
vīrabāhoḥ kāntimatyāḥ muktirjanmatrayottaram || 193 ||
[Analyze grammar]

kālindyā uddhavasyāpi cānyāsāṃ pativartanam |
dānakanṛpateryātrā nārakāṇāṃ ca mokṣaṇam || 194 ||
[Analyze grammar]

saṃhitāyāḥ kathāśrāvāt piśācatvavimokṣaṇam |
hemantasya pātivratyād rājyaprāptiḥ pramokṣaṇam || 195 ||
[Analyze grammar]

patidveṣṭryāḥ śunītvaṃ corvaśītvaṃ ca tataḥ param |
vidhūmasyā'lambuṣāyā mokṣaṇaṃ parikīrtitam || 196 ||
[Analyze grammar]

vidyādharasudarśasya vetālatvanivāraṇam |
jaratkārvīcamatkāraḥ sumitrāyāḥ prabhāvanam || 197 ||
[Analyze grammar]

puṇyanidheḥ sutā lakṣmīḥ nārāyaṇakṛpādikam |
tapato dharmadevasya vardhinī sevikā'bhavat || 198 ||
[Analyze grammar]

gāndharvīṇāṃ kuladevītvādikaṃ vipragotrakam |
strīṇāṃ mokṣaḥ tulasyādivṛkṣāṇāṃ devatātmatā || 199 ||
[Analyze grammar]

suyajñarājasūye ca kṛtaghnānāṃ vivecanam |
suyajñasya tatpatnyāśca golokagamanaṃ tathā || 200 ||
[Analyze grammar]

tārāyā haraṇaṃ candrarakṣaṇaṃ dharmabodhanam |
dāśārhanṛpateḥ kṛṣṇamantragrahaṇe yogyatā || 201 ||
[Analyze grammar]

sīmantīnyā jale magnaḥ svapatiścopajīvitaḥ |
kanyāveṣasya putrasya putrītvaṃ samajāyata || 202 ||
[Analyze grammar]

puṇyakena vratenāpi gaṇeśaputralābhanam |
śabaradampatībhasma punastayośca jīvanam || 203 ||
[Analyze grammar]

śāradāyāḥ kṛṣṇabhaktyā kṛṣṇapatipramelanam |
śivā'cyutau cakraturvāravanitāpramokṣaṇam || 204 ||
[Analyze grammar]

bandulāyāḥ samuddhāro vindhyādrervardhanaṃ tathā |
lopāmudrāpātivratyaṃ kāśīyātrādikaṃ tataḥ || 205 ||
[Analyze grammar]

jamadagnervināśaśca reṇukāyāḥ satīvratam |
manoramāsatītvaṃ ca sahasrārjunanāśanam || 206 ||
[Analyze grammar]

gaṇeśasyaikadantatvaṃ gṛhapatyasya rakṣaṇam |
suśilāyā rājyalābho mokṣaṇaṃ patibhaktitaḥ || 207 ||
[Analyze grammar]

strīṇāṃ pavitratā śreṣṭhacihnānyapi bahūnyapi |
draupadyā kṛtadurvāsobhojanābhyāgamādikam || 208 ||
[Analyze grammar]

kadrūvinatāsamvādaḥ sūryāśvaviṣayastathā |
vinatāyāśca dāsītvaṃ garuḍena vināśitam || 209 ||
[Analyze grammar]

līlāvatyāstathā mokṣo dhūtapāpā pativratā |
dharmadevaṃ patiṃ prāptā kalāvatyāścamatkṛtiḥ || 210 ||
[Analyze grammar]

gāndharvī kṛṣṇayogena golokadhāmagā'bhavat |
saptarṣipramadāḥ kṛṣṇayogena divyatāṃ gatāḥ || 211 ||
[Analyze grammar]

surasā nāminī kṛṣṇabhaktyā saubhāgyamāgatā |
maṇḍukī śivabhaktyā ca gandharvī samajāyata || 212 ||
[Analyze grammar]

pārāvatadvayaṃ bhaktyā muktimavāpa śāśvatīm |
yamasya dharmarājatvaṃ paulomyā indrabhāryatā || 213 ||
[Analyze grammar]

abhijinnṛpateḥ putraprāptirgolokamokṣaṇam |
durvāsasaḥ kadalyāśca vivāhaḥ kadalīdrumaḥ || 214 ||
[Analyze grammar]

ambarīṣādbhayaṃ tasya vāraṇaṃ bhaktasevanam |
tvāṣṭrasya tu catuḥṣaṣṭikalāpatnīpralābhanam || 215 ||
[Analyze grammar]

kāśyāṃ vyāsacamatkāraḥ pārvatīmahimā tathā |
agniśarmā vālmikī cā'bhavanmuktiṃ tato gataḥ || 216 ||
[Analyze grammar]

avantyāṃ lakṣmaṇasyā'pi manomālinyamityapi |
vahnispṛṣṭāḥ ṛṣipatnyaḥ śuddhā vai pañcamīvratāt || 217 ||
[Analyze grammar]

vyāsajanma narmadāyāḥ pātivratyādikaṃ śubham |
anasūyātapaḥsiddhyā tridevāḥ putratāṃ gatāḥ || 218 ||
[Analyze grammar]

puruhūtāmokṣaṇaṃ ca ṛṣyaśṛṃgavighātanam |
lomaśena kṛtaṃ cendragarvasyāpi vināśanam || 219 ||
[Analyze grammar]

dhanvantarergarvabhaṃgaścāṣṭāvakrasya mokṣaṇam |
kalaśasya tu vyāghratvaṃ dhenuyogācca mokṣaṇam || 220 ||
[Analyze grammar]

śarmavatyā mokṣaṇaṃ ca kuṣṭhiviprasya mokṣaṇam |
mādhavyāḥ kṛṣṇapatnītvaṃ śāṇḍilyāśca camatkṛtiḥ || 221 ||
[Analyze grammar]

ambāvṛddhākanyayoḥ pādukāpūjanamityapi |
jyeṣṭhe rājyābhiṣikte ca vṛṣṭyabhāvena cānale || 222 ||
[Analyze grammar]

viśvāmitrakṛtaścāmiṣahomo'gnistiro'bhavat |
gajamatsyādiśāpāśca ajāpālacamatkṛtiḥ || 23 ||
[Analyze grammar]

daśarathasya ca śaneḥ rohiṇīvedharodhanam |
aṣṭaṣaṣṭipratīrthāni damayantyā samarpitam || 224 ||
[Analyze grammar]

dānaṃ jagṛhurviprāśca vyomno nipetureva te |
bhadrikāyāścamatkāraḥ karṇotpalākathānakam || 225 ||
[Analyze grammar]

yājñavalkyacamatkāro vāstupuṃsaḥ kathānakam |
pūrṇakalācamatkāro dīrghikāyāścamatkṛtiḥ || 226 ||
[Analyze grammar]

phalavatyā yoginītvaṃ vyāsaputrasya yogitā |
tilottamānimittena śaṃbhoḥ pañcā''syatoditā || 227 ||
[Analyze grammar]

viśvāmitrasya tapasā brahmarṣitvamathā'bhavat |
sābhramatyāḥ samutpattiḥ pippalādodbhavastathā || 228 ||
[Analyze grammar]

pañcapiṇḍikātmagaurīvrataṃ saubhāgyadaṃ śubham |
hāṭakeśvaraje yajñe gāyatryā vipratā tathā || 229 ||
[Analyze grammar]

śrīkṛṣṇasyā''gamastatra viśvāvasuśca rākṣasaḥ |
aṣṭaṣaṣṭimātṛgaṇāgamaśca kuladevatāḥ || 230 ||
[Analyze grammar]

rājaputrīvipraputryormokṣaṇaṃ kṛṣṇayogataḥ |
devalīlā nāganadī vipraputryāśca mokṣaṇam || 231 ||
[Analyze grammar]

brahmā śaptaśca mohinyā śuddho nāganadījale |
ṣaṇḍhotpattirhiṃgulājādīkṣayā mokṣaṇaṃ tathā || 232 ||
[Analyze grammar]

śaṃbhorgarvavināśaścā'ndhakanāśo hareṇa ca |
indradyumnasya ca kathā lomaśāśrama ityapi || 233 ||
[Analyze grammar]

kuṃkumavāpikākṣetraṃ nārade vedaveditā |
brāhmīvidyā janmadivyaṃ lomaśasya purābhavaḥ || 234 ||
[Analyze grammar]

kapilasya ca vijñānaṃ naikā'vatārarūpatā |
vasośca dharmavyādhatvaṃ vaiśālaraibhyamokṣaṇam || 235 ||
[Analyze grammar]

āvaṭyasya camatkāraḥ svapnādiphalavarṇanam |
sūryacandrā'darśanaṃ sahetukaṃ vyādhatodbhavaḥ || 236 ||
[Analyze grammar]

jayantyāṃ mahimā proktaḥ sanatkumārakeṇa ca |
yuddhaṃ maṇikṛte durjayasya gauramukhasya ca || 237 ||
[Analyze grammar]

mahātapābhihitaṃ ca vedāntajñānamityapi |
kuṃkumavāpikāśraiṣṭhyaṃ pārvatyai śaṃbhunoditam || 238 ||
[Analyze grammar]

ūrjakṛṣṇajayantyāṃ kailāsavāsisamāgatiḥ |
raivate somanāthe ca talaśyāme prabhāsake || 239 ||
[Analyze grammar]

uṣṇagrāme ca tīrthāni siṃhamuktistathoditā |
nyaṃkumatyāṃ devikāyāṃ sūryatīrthāni rāṣṭrake || 240 ||
[Analyze grammar]

cyavanā'gastivaiśālabhadrāśvatīrthakāni ca |
guptaprayāgonnatādibhīmanāthādayastathā || 241 ||
[Analyze grammar]

dvārikā ca camatkārapuraṃ cārbudamityapi |
agastyadivyatā maṃkaṇakatīrthādi cārbude || 242 ||
[Analyze grammar]

narmadā ṛkṣakaḥ śailaḥ kanyābhedāditīrthakam |
matsyātāpīsaṃgamaśca tathā'nye saṃgamā api || 243 ||
[Analyze grammar]

bilvāmrakāditīrthāni satyatapaso mokṣaṇam |
amarakaṇṭakajāleśvarauṃkārādayastathā || 244 ||
[Analyze grammar]

dhenudānaṃ candrasenamuktirgālavamokṣaṇam |
eraṇḍīsaṃgamo dhundhumāramuktyādivarṇanam || 245 ||
[Analyze grammar]

sukhaduḥkhādibhāvāśca kārtikādipraśaṃsanam |
mucukundādidṛṣṭāntairnarmadāyāḥ praśaṃsanam || 246 ||
[Analyze grammar]

somaśarmākhyaviprasya māyāniṣādinījanuḥ |
raibhyasyāpi camatkāro nakulasya suvarṇatā || 247 ||
[Analyze grammar]

yajñatīrthaśuklatīrthabhṛgukṣetrādikāni ca |
dīkṣā bhāgavatī guḍākeśāsurasya tāmratā || 248 ||
[Analyze grammar]

pūjāparādhāḥ śamanaṃ śṛgālagṛdhrayoḥ kathā |
khañjarīṭasya muktiśca sevayituḥ phalāni ca || 249 ||
[Analyze grammar]

nalameghavināśaśca samudrasaṃgamādayaḥ |
śrīpuruṣottamakṣetre nīlaparvatasatkathā || 250 ||
[Analyze grammar]

vaṭasya divyatā viprakṣatriyayoḥ pramokṣaṇam |
indradyumnasya ca sākṣāddarśana gamanaṃ purīm || 251 ||
[Analyze grammar]

bilveśādikathā yajñāvabhṛthādinirvartanam |
pūrṇatā pratimānāṃ ca prāsādasya ca nirmitiḥ || 252 ||
[Analyze grammar]

brahmaṇaścāgamastatra pratiṣṭhā rathanirmitiḥ |
avatārādikabhāvastathā yātrotsavādayaḥ || 253 ||
[Analyze grammar]

granthavaktuḥ prapūjādi kṛtasantānagāḥ kathāḥ |
saṃkṣepātkathitāścānyā gauṇyaścā'vāntarāśca yāḥ || 254 ||
[Analyze grammar]

ākhyānāni copavyākhyānāni santi hyanekaśaḥ |
dharmārthakāmanāsvāpamokṣadāni nisargataḥ || 255 ||
[Analyze grammar]

pūrvakalpopakalpādisaṃvṛtāni ca santi vai |
tapatāmṛṣimānyānāṃ munīnāṃ bhūbhṛtāṃ tathā || 256 ||
[Analyze grammar]

kanyakānāṃ ca bālānāṃ nārīṇāṃ bhaktayoṣitām |
sādhūnāṃ vṛkṣavallīnāṃ tīrthānāṃ saritāṃ tathā || 257 ||
[Analyze grammar]

devādīnāṃ paśūnāṃ ca pakṣiṇāṃ rakṣasāṃ tathā |
ākhyānāni prakīrṇāni prasaṃge kathitāni vai || 258 ||
[Analyze grammar]

asurāṇāṃ vināśārthaṃ devodyogāśca varṇitāḥ |
pāpyuddhārakathā divyā devānugrahataśca yāḥ || 259 ||
[Analyze grammar]

bahvyastāḥ kathitāścātra vaidikyaśca tathāvidhāḥ |
adhyāyānāṃ vācanena viditāḥ syuḥ samantataḥ || 260 ||
[Analyze grammar]

tīrthākhyānacamatkārā avāntaropadeśanāḥ |
tattatprakaraṇālokād viditāḥ syuḥ samantataḥ || 261 ||
[Analyze grammar]

samudrasya taraṃgāṇāṃ saṃkhyāḥ kartuṃ na śakyate |
saṃhitāyā viṣayāṇāṃ gaṇanā śaktivarjitā || 262 ||
[Analyze grammar]

ityevaṃ kramaṇādhyāyaḥ kṛtasantānakasya vai |
kathitaḥ sugamārthāya tattatkathāsumārgaṇe || 263 ||
[Analyze grammar]

kathārthānāṃ vācanena smaraṇena śraveṇa ca |
saṃhitāphalabhāk syācca kramaṇādhyāyaśīlanāt || 264 ||
[Analyze grammar]

sarvatīrthaphalaṃ sarvayajñaphalaṃ prajāyate |
sarvadānaphalaṃ mokṣaphalaṃ tasya prajāyate || 265 ||
[Analyze grammar]

āsya khaṇḍasya yaḥ pārāyaṇaṃ māsena kārayet |
tasyā'śvamedhasahasrayajñajaṃ jāyate phalam || 266 ||
[Analyze grammar]

sarvatīrthaphalaṃ syācca sarvadānaphalaṃ bhavet |
patre patre kṛṣṇanārāyaṇayogo'tra varṇitaḥ || 267 ||
[Analyze grammar]

yogināṃ yogajaṃ puṇyametasya śravaṇādbhavet |
ātmā brahmadaśāpannaḥ śrotṝṇāṃ jāyate'nayā || 268 ||
[Analyze grammar]

vaktustatra kathā kā vai vaktā nārāyaṇaḥ svayam |
śrotrī yatra svayaṃ lakṣmīrvedo'yaṃ sāmasaṃbhavaḥ || 269 ||
[Analyze grammar]

divyasāmāni santyatra pratyadhyāyaṃ padāni vai |
yaduccārayitāraṃ vai prama dhāma nayāmyaham || 270 ||
[Analyze grammar]

yathā tvaṃ me priyā lakṣmi tatheyaṃ saṃhitā priyā |
lekhayitvā gṛhe rakṣyā sampanmokṣapradāyinī || 271 ||
[Analyze grammar]

divyo'haṃ divyarūpā tvaṃ divyeyaṃ saṃhitā mama |
nā'nyaśāstreṇa tulyatvaṃ sthitā sarvocchrayā yataḥ || 272 ||
[Analyze grammar]

tvaṃ dvitīyasvarūpeṇa saṃhitātmatayā'si me |
śrotavyā sāvadhānena maṇḍape toraṇānvite || 273 ||
[Analyze grammar]

svarṇasiṃhāsane sthāpyā svarṇavastrādiśobhitā |
nityaṃ candanapuṣpādyaiḥ phaladhānyadhanādibhiḥ || 274 ||
[Analyze grammar]

ārārtrivādyaghoṣādyairdhūpadīpā'kṣatādibhiḥ |
kuṃkumā'gurugandhādyaiḥ pūjanīyā jayāravaiḥ || 275 ||
[Analyze grammar]

tataḥ saṃpūjayed vyāsaṃ svāmiśrīkṛṣṇavallabham |
lakṣmīnārāyaṇarūpaṃ dhanā'nnāmbarabhūṣaṇaiḥ || 276 ||
[Analyze grammar]

dugdhaghṛtaśarkarādyaistoṣayed bahusevanaiḥ |
matto nyūno nā'sya vaktā praveśastatra me tadā || 277 ||
[Analyze grammar]

tadāśīrvādavacanaṃ saphalaṃ vyāsapīṭhajam |
tatpādajalapānena dhvaṃsante pāparāśayaḥ || 278 ||
[Analyze grammar]

tatpuṣpahāralābhena mahendrasmṛddhimāpnuyāt |
tasya darśanamātreṇa kṛṣṇadarśanajaṃ phalam || 279 ||
[Analyze grammar]

tasya sparśanamātreṇa kṛṣṇasparśanajaṃ phalam |
tasya sevanalābhena kṛṣṇasevāphalaṃ labhet || 280 ||
[Analyze grammar]

divyayogād bhaved divyo naro vā pramadā'pi vā |
enāṃ kṛtvā pramūlaṃ ca vadiṣyanti kathā janāḥ || 281 ||
[Analyze grammar]

vyāsā granthān kariṣyanti hyetadādhāravistṛtān |
purātanāni bhāvānāṃ hṛdayānyatra santi hi || 282 ||
[Analyze grammar]

tatprakāśaprakartre vai vyāsapīṭhādhivāsine |
ācāryaśrīkṛṣṇasvāmisvarūpāya mahātmane || 283 ||
[Analyze grammar]

rājñā deyāni govājigajagrāmadhanāni ca |
anyaiścāpi yathāsmṛddhiṃ deyaṃ santoṣakāri yat || 284 ||
[Analyze grammar]

brahmāṇḍadānajaṃ puṇyaṃ bhaved vācakapūjanāt |
yānodyānabhavanāni dāsadāsīkulāni ca |
rājyopacārayogyāni deyāni vācakāya vai || 285 ||
[Analyze grammar]

yadyadiṣṭatamaṃ svasya deyaṃ vyāsāya śārṅgiṇe |
kṛtasantānakaścā'yaṃ satyakālīnaceṣṭikaḥ || 286 ||
[Analyze grammar]

satyadharmaiḥ pūritaśca sarvadharmairviśiṣyate |
śṛṃgārayitvā bahudhā gaje yāne ca mastake || 287 ||
[Analyze grammar]

dhṛtvā cāmarachatrādyairvardhayitvā mahotsavaiḥ |
gītakīrtananṛtyaiśca vādyavaidikasaṃstavaiḥ || 288 ||
[Analyze grammar]

sahasraśo janairgrāme pattane nagare gṛhe |
rājadhānyāṃ rājagṛhe śreṣṭhibhiśca nijālaye || 289 ||
[Analyze grammar]

nidhanairbhāvayuktaiśca pūjanīyo viśeṣataḥ |
kumārikābhiḥ kalaśairjalapatraphalānvitaiḥ || 290 ||
[Analyze grammar]

svāgatena vardhayitvā kuṃkumādyaiśca bhāvanaiḥ |
vandanīyo maṃgalātmā saubhāgyavaralabdhaye || 291 ||
[Analyze grammar]

sapatikābhiranyābhiḥ sveṣṭasaukhyādilabdhaye |
janairdārasutādyarthaṃ strībhiḥ saubhāgyavṛddhaye || 292 ||
[Analyze grammar]

vidyādhanasamṛddhyarthaṃ cārogyarddhyādilabdhaye |
kṛtasantānakaḥ khaṇḍaḥ pūjanīyo'tidānakaiḥ || 293 ||
[Analyze grammar]

pūgīphalaṃ dhanaṃ svarṇaṃ sparśayitvā svakaṃ tadā |
svakośe rakṣaṇīyaṃ yad dhanavṛddhikaraṃ bhavet || 294 ||
[Analyze grammar]

sādhanāni ca sarvāṇi nā'nena tulanāni vai |
atulyaṃ pūjayitvainaṃ bhrāmayitvā supattanam || 295 ||
[Analyze grammar]

aśeṣaṃ niyatasthāne sthāpanīyo'tibhāvukaiḥ |
paraṃdhāmā'kṣaraṃdhāmā'mṛtaṃ golokamuttamam || 296 ||
[Analyze grammar]

vaikuṇṭhaṃ śvetadvīpaṃ ca śrīdhāmecchettadāpnuyāt |
svargaṃ māhendrarājyaṃ vā pārameṣṭhyaṃ padṃ ca vā || 297 ||
[Analyze grammar]

vairājaṃ vā nāgarājyaṃ yadicchettallabheta ca |
ahaṃ divyasvarūpo'smi kṛtasantānamūrtikaḥ || 298 ||
[Analyze grammar]

adhyāyairnavatiyuktapañcaśatamitairayam |
ślokaistu pañcapañcāśatsāhasraiḥ keśarūpibhiḥ || 299 ||
[Analyze grammar]

mastakaṃ me hi boddhavyaḥ kaṇṭhordhvaṃ cāyameva hi |
brahmarandhraṃ mama lakṣmi vidyate tvayi cātra te || 300 ||
[Analyze grammar]

saubhāgyapuṇyamūrdhā'sti sarvathā sarvamaṃgalaḥ |
tvāṃ māṃ kṛtaṃ bhajeta yaḥ sarvārthānāpnuyāddhruvam || 301 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mahāvedī mahotsavaḥ dvādaśayātrāḥ kṛtasantānoktakathānirdeśāḥ granthavaktṛpūjādimahimetinirūpaṇanāmaikonanavatyadhikapañcaśatatamo'dhyāyaḥ || 589 ||
[Analyze grammar]