Chapter 587

śrīnārāyaṇa uvāca |
tato lakṣmi yathājātaṃ śṛṇu mūrtipraghaṭṭanam |
evaṃ dine dine yāte divyagandho'nubhūyate || 1 ||
[Analyze grammar]

pārijātaprasūnānāṃ vṛṣṭiryā martyadurlabhā |
divyasaṃgītanādāśca gītikā rucirāstathā || 2 ||
[Analyze grammar]

śvetavāribindavaśca candanānāṃ ca bindavaḥ |
airāvatādivāraṇendrāṇāṃ madā babhūvire || 3 ||
[Analyze grammar]

adṛśyadevatāsaṃghaiḥ pūjyate vyomamārgataḥ |
upāsāṃcakrire devā divyacihnāni jajñire || 4 ||
[Analyze grammar]

prāpte pañcadaśāhe ca svayaṃ pūrṇo babhūva ha |
divyasiṃhāsanasaṃstho vedikāyāṃ vyadṛśyata || 5 ||
[Analyze grammar]

caturmūtirjagannātho balo bhadrā sudarśanam |
sarvābharaṇaśobhādisampūrṇaṃ vai catuṣṭayam || 6 ||
[Analyze grammar]

bhadrā ceyaṃ svayaṃ lakṣmīḥ sarvacaitanyarūpiṇī |
tvamāsīḥ me priye bhedastava kvacinna yujyate || 7 ||
[Analyze grammar]

kṣaṇaṃ na sahase tvaṃ māṃ moktuṃ līlāvatāriṇam |
evaṃ tu mūrtayastena catasro vai prakāśitāḥ || 8 ||
[Analyze grammar]

vyomavāṇyabhavattatra rājan raṃge prakāraya |
nīlaṃ viṣṇuṃ balaṃ śvetaṃ raktaṃ cakraṃ pracitraya || 9 ||
[Analyze grammar]

bhadrāmaruṇāṃ ca nānālaṃkāraśobhitāṃ tathā |
vinā vai citrakāraṃ tu nānyaḥ kaścid vilokayet || 10 ||
[Analyze grammar]

gopanīyā prayatnena paṭaniryāsavalkalaiḥ |
varṣe varṣe'pi saṃskāryāḥ pūrvasaṃskāramocanāt || 11 ||
[Analyze grammar]

valkalalepasahitā mūrtirdivyā cirantanī |
valkalalepanāśe tu durbhikṣaṃ maraṇaṃ tathā || 12 ||
[Analyze grammar]

santateśca kṣayaḥ syādvai nekṣyāstā apavāraṇāḥ |
pramādānmānavaiścāpi dṛṣṭāḥ syurbhayahetavaḥ || 13 ||
[Analyze grammar]

tasmāt sacitrā draṣṭavyā bahuśṛṃgāracitritāḥ |
nīlādrau kalpavṛkṣasya vāyavyāṃ śatahastataḥ || 14 ||
[Analyze grammar]

uttare ca nṛsiṃhasya sahasrakaramucchrayam |
prāsādaṃ śikharāḍhyaṃ ca sudivyaṃ sudṛḍhāyatam || 15 ||
[Analyze grammar]

kārayitvā pratiṣṭhāpya tatraitā viniveśaya |
nīlamādhavasevākṛcchabaro vaiṣṇavottamaḥ || 16 ||
[Analyze grammar]

viśvāvasuḥ purā mitraṃ purohitasya te'bhavat |
śabarasya tathā tvapurohitasya ca santatiḥ || 17 ||
[Analyze grammar]

niyujyatāṃ ca pūjāyāṃ sadā sarvotsavādiṣu |
itiśrutvā vyomavācaṃ bhūpastvāvṛtivastrakam || 18 ||
[Analyze grammar]

kṣaṇaṃ cottārya mūrtīstāḥ pūrṇā dadarśa śobhanāḥ |
ratnasiṃhāsasthāśca tejovyāptāḥ suvartulāḥ || 19 ||
[Analyze grammar]

kṛṣṇaṃ padmasthitaṃ nīlaṃ pārśve ca dhavalaṃ balam |
phaṇāmaṇḍalavistīrṇaṃ madhye bhadrāṃ tayoḥ śubhām || 20 ||
[Analyze grammar]

viṣṇorvāmasthitāṃ kṛṣṇahaste sudarśanaṃ tathā |
kṣaṇaṃ dṛṣṭāstathā sarvaiḥ punarvastreṇa cāvṛtāḥ || 21 ||
[Analyze grammar]

sarve nemustataścitraśilpī raṃgādi cākarot |
tataśca vedavidhinā pūjāṃ sūktairakārayat || 22 ||
[Analyze grammar]

pauruṣeṇa tu sūktena kṛṣṇaṃ rājā hyapūjayat |
lakṣmīsūktena ca bhadrāṃ dvādaśārṇena vai balam || 23 ||
[Analyze grammar]

sudarśanaṃ saudarśanyāṃ tato dānānyadāpayat |
aśvamedhā'ṅgabhūtāśca koṭiśo gā dadau dhanam || 24 ||
[Analyze grammar]

tāsāṃ khuroddhṛteryogād garto'bhūtpāvanaḥ paraḥ |
dānā'mbunāpi saṃsṛṣṭastīrthaṃ cendrasaro hi tat || 25 ||
[Analyze grammar]

babhūva tārakaṃ pitruddhārakaṃ jaladānataḥ |
snānātsvargapradaṃ pānādvaikuṇṭhadhāmadaṃ tathā || 26 ||
[Analyze grammar]

dānātsmṛddhipradaṃ vāsānmokṣadaṃ maraṇādapi |
tīrthānāṃ paramaṃ khyātaṃ sara indradyutikṛtam || 27 ||
[Analyze grammar]

tataḥ prāsādaghaṭanāmupacakrāma bhūpatiḥ |
pūrṇe tu mandire jāte sauvarṇakalaśānvite || 28 ||
[Analyze grammar]

śubhe kāle muhūrte ca viprān prapūjya devatāḥ |
svastivācaṃ ca karmarddhiṃ vācayitvā nṛpastataḥ || 29 ||
[Analyze grammar]

arghyaṃ dadau jagannātha saudhasthityai ciraṃ kṣitim |
samprārthya śilpino'bhyarcya vāstuyāgaṃ vidhāya ca || 30 ||
[Analyze grammar]

kṛtvā mahotsavaṃ pūjāṃ dadau dānāni bhojanam |
rājā sabhāyāmagadad yanmayopārjitaṃ dhanam || 31 ||
[Analyze grammar]

jagannāthālayārthaṃ tatsarvaṃ dadāmi muktaye |
kalevaramidaṃ kṣetraṃ yatrā'haṃbhāvavān vibhuḥ || 32 ||
[Analyze grammar]

tatsevayā ca rājyarddhiḥ saphalā me'stu tatpade |
eṣa dāruvapurviṣṇuḥ sukhado dhāmabāndhavaḥ || 33 ||
[Analyze grammar]

atha mūrteḥ pṛṣṭhadeśādāgatyā'cyutanāmakaḥ |
vipro jagāda rahasi tejomaṇḍalaśobhitaḥ || 34 ||
[Analyze grammar]

paradhāmā'kṣaradhāmā'mṛtadhāmā'vyākṛtam |
goloṃka cāpi vaikuṇṭhaṃ kṣīrodaṃ śvetadvīpakam || 35 ||
[Analyze grammar]

badarīṃ cānyadhāmāni yadi gantuṃ samiṣyate |
atra stheyaṃ tadā kṣetre divye śrīpuruṣottame || 36 ||
[Analyze grammar]

parabrahmā'kṣarabrahmamuktabrahmā'vatārakān |
vyūhān divyān vibhavāṃśca tadaṃśān draṣṭumiṣyate || 37 ||
[Analyze grammar]

puruṣottamamūrteśca kartavyaṃ darśanaṃ tu taiḥ |
īśalokān satyalokān vairājān svargasaṃjñakān || 38 ||
[Analyze grammar]

mānuṣān divyapātālān yadi bhoktuṃ samiṣyate |
dānaṃ snānaṃ pūjanaṃ ca kartavyaṃ tvasya tairiha || 39 ||
[Analyze grammar]

aiśvaryāṇi samagrāṇi vidyāśca sakalāḥ kalāḥ |
gugān sāmarthyasattādi yadi prāptuṃ samiṣyate || 40 ||
[Analyze grammar]

tadā'yaṃ śrījagannāthaḥ sevyatāṃ yāvadarpaṇaiḥ |
idaṃ dārumayaṃ brahma bhuktimuktipradāyakam || 41 ||
[Analyze grammar]

saccidānandakaivalyamuktidaṃ darśanādapi |
nāṇvapyatra prabhedo'sti dhāmni śrīpuruṣottame || 42 ||
[Analyze grammar]

tasmād rājannatra vāsaṃ kuru mokṣaṃ prasādhaya |
vidvattamo'si bhaktaśca sāṃgopāṃgamamuṃ bhaja || 43 ||
[Analyze grammar]

patrapuṣpajalakandakaṇavastrasucandanam |
jalamaṇvapyarpitaṃ syādabjaguṇa jagatprabhau || 44 ||
[Analyze grammar]

lakṣmīrmātā ṛddhidā sā bhogān dāsyati bhaktake |
dātre dāsyāmi sarvaṃ me nātra kāryā vicāraṇā || 45 ||
[Analyze grammar]

ityuktvā'dṛśyatāṃ yāto vipro mūrtau harestataḥ |
sarveṣāṃ samabhūd divyamāścaryaṃ gocaro hariḥ || 46 ||
[Analyze grammar]

ātmanā vartate mūrtau premṇā'śrūṇi hyavāsṛjan |
nāradaḥ sthiratāṃ yāto dhyānamudrāmanaimiṣīm || 47 ||
[Analyze grammar]

kurvan samādhiprajaḍaḥ premamagno'bhavat kṣaṇam |
ānandaḥ prāsarattatra goloke iva tatkṣaṇam || 48 ||
[Analyze grammar]

kāryaṃ pūrṇaṃ tvadya jātaṃ proktvā nārada āha tam |
enamārādhya tiṣṭhā'tra bhūpa yāmi pitāmaham || 49 ||
[Analyze grammar]

prāsādaṃ kuru bhūpāla dhanena mahatā tataḥ |
nṛsiṃhaṃ ca pratiṣṭhāpya vimucyase sukhī bhava || 50 ||
[Analyze grammar]

kṛtaṃ nivedayiṣyāmi brahmāṇaṃ tava dāsatām |
indradyumnaśca taṃ prāha nivasā'tra mayā saha || 51 ||
[Analyze grammar]

mandiraṃ kārayitvā ca yāsyāvo nau pitāmaham |
āvāṃ vijñapayiṣyāvaḥ saḥ samāgatya vai svayam || 52 ||
[Analyze grammar]

mahotsavaṃ bhagavataḥ prāsāde'tra kariṣyati |
omityaṅgīcakāraiva nāradaścā'tha bhūpatiḥ || 53 ||
[Analyze grammar]

yiyāsustvaritaṃ karma mandirasyā'nvacālayat |
sahasraśastataḥ śilpivaryāṃstatra nyayojayat |
vittavyayastu koṭīnāṃ na saṃkhyātuṃ praśakyate || 54 ||
[Analyze grammar]

nṛpateḥ śraddhayā bhaktyā sattvabhāvena śrīrapi |
prasannā mandiraṃ kartuṃ tadā sāhāyyamācarat || 55 ||
[Analyze grammar]

garbhapratiṣṭhāṃ vidhivat kṛtvā dhṛtvā ca tāmrajām |
vajrapātādivighnaghnāṃ nyasya pārśve supaṭṭikām || 56 ||
[Analyze grammar]

śikharasya ghaṭṭanārthaṃ cājñāpyā'mātyakottamān |
giriśṛṃgopamaṃ kartuṃ śikharaṃ gaganaṃgamam || 57 ||
[Analyze grammar]

rājā śṛṇvan devagāthāṃ prāsādaviṣayāṃ śubhām |
bhūpaterdurlabhaṃ kiṃ syātsahāyo yasya nāradaḥ || 58 ||
[Analyze grammar]

brahmā viṣṇustathā lakṣmīḥ kā cātra nimnatā bhavet |
prāsādaḥ kāryate tādṛṅ na bhūto na bhaviṣyati || 59 ||
[Analyze grammar]

nedṛg vai vartate cordhvaṃgamaḥ pṛthvyāṃ sthalāntare |
iti śṛṇvannanāmā'sau nāradaṃ cāha nāradaḥ || 60 ||
[Analyze grammar]

tīrthairmantrairjapairdānaiḥ kratubhirbhūridakṣiṇaiḥ |
vratairadhyayanairbhūpa tapobhiśca yadarjitam || 61 ||
[Analyze grammar]

na śakyaṃ tava rājendra bhaktyā tatkaramāgatam |
ataḥ paraṃ na śocasva bhaktiyoge'tirekiṇi || 62 ||
[Analyze grammar]

pitāmahaṃ draṣṭukāmo gantā cedantikaṃ vibhoḥ |
upadekṣyati so'pyasya yātrāstāstā mahotsavāḥ || 63 ||
[Analyze grammar]

svayaṃ ca bhagavāneva tubhyaṃ varaṃ pradāsyati |
pratiṣṭhāpite prāsāde tasmin kāle svayaṃbhuvā || 64 ||
[Analyze grammar]

ahamapyāgamiṣyāmi tadā saptarṣibhiḥ saha |
tadāvāṃ tatra gacchāvo brahmalokamakalmaṣam || 65 ||
[Analyze grammar]

ityuktvā nārado bhūpo natvā kṛṣṇaṃ balaṃ satīm |
anujñāṃ prārthayāmāsa brahmalokagatiṃ prati || 66 ||
[Analyze grammar]

ubhau divyavimānena brahmāṇaṃ prati jagmatuḥ |
nārado bhaktiyogena cendradyumno'pi vaiṣṇavaḥ || 67 ||
[Analyze grammar]

caturdaśabhuvanāni jigyatuḥ kṛpayā hareḥ |
rājā'pyacintayad yāne brahmaloke kṣaṇaṃ ca yat || 68 ||
[Analyze grammar]

pṛthvyāṃ yugaśataṃ yāti prāsādasya tu kiṃ bhavet |
punarāgamane me tu layaṃ yāsyati matkṛtam || 69 ||
[Analyze grammar]

kathaṃ pratiṣṭhāṃ saṃvīkṣya gamiṣyāmi kṛtārthatām |
iticintāparaṃ bhūpaṃ nāradaḥ prāha mā śucaḥ || 70 ||
[Analyze grammar]

kṛṣṇanārāyaṇaḥ svāmī kālasya dairghyakārakaḥ |
hrasvatādhāyakaḥ so'pi kṣaṇaṃ sūkṣmaṃ kariṣyati || 71 ||
[Analyze grammar]

satyabhūlokayoḥ kāle tvadarthaṃ samatāṃ prabhuḥ |
svecchayā saṃvidhāyaiva nijakāryaṃ kariṣyati || 72 ||
[Analyze grammar]

yasya kāryeṣu bhagavān sahāyo'sti caturmukhaḥ |
tatra kālakṛtaṃ dravyakṛtaṃ vighnaṃ na jāyate || 73 ||
[Analyze grammar]

paśyā'grataścandrakoṭyāhlādakaṃ tejasāṃ cayam |
vijānīhi brahmaṇaśca sadmanastaṃ samāgatam || 74 ||
[Analyze grammar]

paśya brahmapuraṃ tvetat sabhāṃ paśya suśobhanām |
tataḥ paraṃ ca vaikuṇṭhaṃ jalopari hi vartate || 75 ||
[Analyze grammar]

tataḥ paraṃ ca vairājaṃ dhāma tasmātpare'mṛtam |
paravaikuṇṭhakaṃ cāpi golokaṃ cāpi tatparam || 76 ||
[Analyze grammar]

tatparaṃ cākṣaraṃ dhāma tatparaṃ paramaṃ padam |
puruṣottamadhāmā'sti yatparaṃ nānyadasti vai || 77 ||
[Analyze grammar]

indradyumnaṃ vadannitthaṃ nāradasya vimānakam |
brahmasabhottaradvāraṃ samāsādya sthiraṃ hyabhūt || 78 ||
[Analyze grammar]

nṛpaṃ ca nāradaṃ dṛṣṭvā nanāma dvārapālakaḥ |
brahmājñāṃ ca samāgṛhya prāveśayacca tau sabhām || 79 ||
[Analyze grammar]

brahmāṇaṃ praṇaman dūre sāvitrīśāradānvitam |
rājā tasthau kṣaṇaṃ tāvad brahmā bhūpaṃ samāhvayat || 80 ||
[Analyze grammar]

ehi rājan svāgataṃ te sākṣāt tvaṃ bhagavatpriyaḥ |
nāradasya tu yogena samāyāto'si durgame || 81 ||
[Analyze grammar]

gṛhāṇa cāmṛtaṃ bhojyaṃ piba svādvāmṛtaṃ rasam |
vada kiṃ cāgamane te kāraṇaṃ hṛdayaṃgamam || 82 ||
[Analyze grammar]

ityukto nṛpatiḥ prāha prāsādaḥ kṛpayā tava |
jāto'sti tatra cāgatya pratiṣṭhāpaya mādhavam || 83 ||
[Analyze grammar]

āgatya śrījagannāthaṃ sthāpayiṣyasi cet pitaḥ |
tvadanugrahaḥ saphalo bhavenmayi pitāmaha || 84 ||
[Analyze grammar]

prasīda māṃ kuruṣvedaṃ jagannāthastvameva yat |
itistutastadā brahmā prāha bhūpaṃ tu sādaram || 85 ||
[Analyze grammar]

rājan kṛtastvayā satyaṃ prāsādo bhagavatsthitau |
nāsmin kāle tava rājyaṃ na vā tvatsantatirnṛpa || 86 ||
[Analyze grammar]

atrā''gatasya te kālaḥ pṛthvyāṃ bhūyān gato nṛpa |
manvantarādhikaḥ kālo yugānāṃ śatakaṃ gatam || 87 ||
[Analyze grammar]

tava vaṃśo'pi vicchinnaḥ koṭiśaḥ kṣitipā gatāḥ |
kintu rājan divyakṣetre nāmnā śrīpuruṣottame || 88 ||
[Analyze grammar]

kālasya hrāsaśaktiryā kālaśca saṃhṛtau mayā |
śrīkṛṣṇasya nideśena yāvanmandirapūrṇatā || 89 ||
[Analyze grammar]

satyalokasamāstatra kṣaṇā deśāśca tatprajāḥ |
kṛtā mayā''jñayā harestatra santi ta eva vai || 90 ||
[Analyze grammar]

śrīsvāminā mukuṭasya maṇirvyomni raviḥ kṛtaḥ |
satyalokasamaṃ cāharnirmāti divyatāṃ nayan || 91 ||
[Analyze grammar]

tasmād gaccha mahārāja tavā'nupadameva ha |
āyāmyeva pratiṣṭhārthaṃ saṃbhārān kuru cocitān || 92 ||
[Analyze grammar]

pūrve parārdhe bho rājan kṣetraṃ śrīpuruṣottamam |
nīlā'śmavapurāsthāya na tatyāja janārdanaḥ || 93 ||
[Analyze grammar]

sāmprataṃ me dvitīyaṃ tu parārdhaṃ samupasthitam |
dārumūrtirayaṃ devo madāyuḥ sthāsyate punaḥ || 94 ||
[Analyze grammar]

śvetadvīpasthakṛṣṇasya romāṇi kalpapādapāḥ |
tanmadhyād vaṭavṛkṣastu dārumūrtyarthamāhṛtaḥ || 95 ||
[Analyze grammar]

svayamutpatitaḥ sindhoḥ salile satyapūruṣaḥ |
ghorasaṃsāranāśārthaṃ mayā pūrvaṃ prayācitaḥ || 96 ||
[Analyze grammar]

anekabhaktabhaktyā ca dāruvarṣmā janārdanaḥ |
śrutvaivaṃ brahmavacanaṃ praṇipatya pitāmaham || 97 ||
[Analyze grammar]

vimānena nāradenā''jagāmendradyutirbhuvam |
mandiraṃ subhagaṃ divyaṃ pūrṇaṃ vīkṣya jaharṣa saḥ || 98 ||
[Analyze grammar]

nanāma daṇḍavadbhūmau śrīnṛsiṃhaṃ nanāma ca |
śilpyādīn prāha bhūpaśca svayaṃ brahmā pitāmahaḥ || 99 ||
[Analyze grammar]

etatpratiṣṭhānavidhau suraiḥ sahā''gamiṣyati |
tāvat padmanidhistatra brahmaprerita āgataḥ || 100 ||
[Analyze grammar]

rājā satkārapūjādi cakre svāgatamācarat || 5 ||
[Analyze grammar]

nāradaḥ sarvavastūnyālikhya sañcayapatrake || 101 ||
[Analyze grammar]

pratiṣṭhārthaṃ dadau padmanidhaye so'pi satvaram |
sampādanaṃ suvastūnāmakārayattathā śubhām || 102 ||
[Analyze grammar]

śālāṃ svarṇamayīṃ tadvannagaraṃ naikayojanam |
maṇḍapaṃ ca tathā kuṇḍaṃ kārayāmāsa satvaram || 103 ||
[Analyze grammar]

kārayāmāsa ca rathatrayaṃ sauvarṇamuttamam |
rathaṃ ṣoḍaśacakraṃ ca viṣṇorvai garuḍadhvajam || 104 ||
[Analyze grammar]

padmadhvaje subhadrāyā varaṃ dvādaśacakrakam |
balasya ca caturdaśacakrakaṃ darpaṇadhvajam || 105 ||
[Analyze grammar]

athavā sīriṇaḥ kāryaḥ sīradhvajaḥ samuttamaḥ |
sthito hastatale nityaṃ nirmalastasya darpaṇaḥ || 106 ||
[Analyze grammar]

talasthatvādasau tālastena tālāṅkito balaḥ |
hastaṣoḍaśavistāro rathaścakradharasya vai || 107 ||
[Analyze grammar]

caturdaśa balasyāpi subhadrāyāstu dvādaśa |
na vāsitavyo devo'sāvapratiṣṭhe rathe yataḥ || 108 ||
[Analyze grammar]

prāsāde maṇḍape vāpi pure tanniṣphalaṃ bhavet |
rājā rathapratiṣṭhāṃ ca kārayāmāsa satvaram || 109 ||
[Analyze grammar]

rathasyeśānadigbhāge śālāṃ kṛtvā suśobhanām |
tanmadhye maṇḍapaṃ kṛtvā vedīṃ tatra ca nirmalām || 110 ||
[Analyze grammar]

caturasrāṃ caturhastamitāṃ hastocchritā tathā |
prakārayet pūrvarātrāvuttarataḥ śubhe kṣaṇe || 111 ||
[Analyze grammar]

svasti pravācya cāṃkurārpaṇaṃ prakārayettataḥ |
dvātriṃśaddevatābhyaśca baliṃ dadyād yathāvidhi || 112 ||
[Analyze grammar]

prātarvedyāṃ maṇḍale svastike kuṃbhaṃ nidhāpayet |
pañcapādapakvāthena puṇyatoyaiśca pallavaiḥ || 113 ||
[Analyze grammar]

ratnagandhauṣadhigaṇaiḥ pañcagavyaiḥ prapūrayet |
pūjayed veṣṭayed vastrāmāvāhayecca taṃ harim || 114 ||
[Analyze grammar]

taṃ pūjayecca vidhinā vāyavyāṃ samidhastathā |
ājyaṃ caruṃ mantrayitvā'ṣṭasāhasraṃ hunet tataḥ || 115 ||
[Analyze grammar]

sampātānprāpayet kuṃbhe rathaṃ śaṃgārayettataḥ |
sugandhayed dhūpayecca dhvaje nyasya samīraṇam || 116 ||
[Analyze grammar]

prapūjya garuḍaṃ prārthya rathamūrdhni niveśayet |
taṃ kuṃbhaṃ secayet plāvayedrathaṃ garuḍopari || 117 ||
[Analyze grammar]

tataḥ pūrṇāhutiṃ datvā dakṣiṇāṃ bhūyasīṃ dadet |
bhojayecca janān balarathaṃ prapūjayettataḥ || 118 ||
[Analyze grammar]

dvādaśākṣaramantreṇa lakṣmīsūktena śrīratham |
prārthayet kamalaṃ kṛṣṇanābhestvaṃ cāsanātmakam || 119 ||
[Analyze grammar]

jātaṃ cā'si ca devānāmābodhārthaṃ sthiraṃ bhava |
iti padmadhvaje cordhvaṃ samucchrayennamettataḥ || 120 ||
[Analyze grammar]

rathe pratiṣṭhite caivaṃ devānāropya sarvaśaḥ |
manuṣyaiśca naraiḥ strībhirgajāśvavṛvabhādibhiḥ || 121 ||
[Analyze grammar]

netavyāste rathā grāme bhrāmayitvā surālayam |
rathe sthitvā vipravaryairbalirdātavya uttamaḥ || 122 ||
[Analyze grammar]

baliṃ gṛhṇantu bho devā ādityā vasavo grahāḥ |
marutaścāśvinau rudrāḥ suparṇāḥ pannagādayaḥ || 123 ||
[Analyze grammar]

asurā yātudhānāśca rathadevā vināyakāḥ |
dikpālā lokapālāścarṣayaḥ kurvantu svasti ca || 124 ||
[Analyze grammar]

avighnamācarantvete mā santu paripanthinaḥ |
saumyā bhavantu tṛptāśca daityā bhūtagaṇādayaḥ || 125 ||
[Analyze grammar]

tato vaidikasūktaiśca cālayet tān rathān śanaiḥ |
tatrotpātān śṛṇu lakṣmi hānidā ye bhavanti 3 || 116 ||
[Analyze grammar]

īṣābhaṃge dvijabhayaṃ bhagne'kṣe kṣatriyakṣayaḥ |
tulābhaṃge vaiśyanāśaḥ śamyā śūdrakṣayastathā || 117 ||
[Analyze grammar]

dhurābhaṃge tvanāvṛṣṭiḥ pīṭhabhaṃge prajābhayam |
cakrabhaṃge pararājyaṃ dhvajapāte'nyabhūpatiḥ || 128 ||
[Analyze grammar]

mūrtibhaṃge maraṇaṃ ca paryaste deśaviplavaḥ |
adhomukhe rathe jāte sarvajānapadakṣayaḥ || 129 ||
[Analyze grammar]

evaṃ jāte balikarma śāntihomaṃ prakārayet |
pūrvottare ca digbhāge rathasyā'gniṃ prakalpayet || 130 ||
[Analyze grammar]

samidbhirghṛtamadhvājyamūlāgrābhiśca homayet |
śāntivācaṃ svastivācaṃ bhagnāṃge havanaṃ caret || 131 ||
[Analyze grammar]

svasti bhavatu bhaktebhyaḥ svasti puṃstrībhya ityapi |
gopaśubhyaḥ svasti cāstu jagataḥ svasti cāstu vai || 132 ||
[Analyze grammar]

śāntirastu śivaṃ cāstu sarvataḥ svasti cāstu naḥ |
svāminātha jagannātha rakṣāṃ śāntiṃ karotu naḥ || 133 ||
[Analyze grammar]

iti lakṣmi kārayettu śāntigrahārcanādikam |
rājñā tatkāritaṃ sarvaṃ nāradenarṣiṇā tadā || 134 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne catuḥpratimānāṃ sampūrṇatā pūjanaṃ mūrtyarthaṃ prāsādanirmāṇam indradyumnanāradayorbrahmāṇaṃ prati gamanam pratiṣṭhārthaṃ padmanidherāgamanam rathānāṃ nirmāṇaṃ pūjā dhvajādiḥ rathe vighnaphalam śāntikarmādi ceti nirūpaṇanāmā saptāśītyadhikapañca |
śatatamo'dhyāyaḥ || 587 ||
[Analyze grammar]