Chapter 583

śrīnārāyaṇa uvāca |
atha te'tra camatkāraṃ kathayāmi śṛṇu priye |
mūrtirūpo'smyahaṃ divyo mokṣadaḥ sukhadaḥ śubhaḥ || 1 ||
[Analyze grammar]

yathā pṛthvyāditattvāni jīvātmano hi mūrtayaḥ |
amūrtasya gṛhaṃ mūrtaṃ tathā me pratimā gṛham || 2 ||
[Analyze grammar]

ekatattvātmakaṃ cātmasvarūpaṃ carmacakṣuṣā |
vīkṣyate na tataścā'haṃ mūrtyātmā dṛśyatāṃ gataḥ || 3 ||
[Analyze grammar]

pṛthvīśarīrakaścā'haṃ vāriśarīrakastathā |
tejaśarīrakaścāpi vāyuśarīrakastathā || 4 ||
[Analyze grammar]

ākāśamūrtikaścāhaṃ tanmātrāmūrtikastathā |
manobuddhyādiśarīraścātmeśvaraśarīrakaḥ || 5 ||
[Analyze grammar]

brahmaśarīrakaścā'haṃ muktaśarīrakastathā |
sarvaśarīrakaścāhaṃ sarvaṃ divyaṃ madāśrayāt || 6 ||
[Analyze grammar]

divyatve vedamantrādikarmakāṇḍaḥ prayojakaḥ |
pratiṣṭhā kāraṇaṃ tatra mukhyaṃ mama praveśane || 7 ||
[Analyze grammar]

tato'haṃ taccharīreṇa sarvaṃ karomi dehivat |
yadyevaṃ māṃ vijānīyānmukto bhavati macchritaḥ || 8 ||
[Analyze grammar]

niśceṣṭo dāruvarṣmā'pi divyalīlāvilāsakṛt |
kṣame'haṃ svalpabhaktyā'pi bhaktā'parādhakoṭikam || 9 ||
[Analyze grammar]

kurukṣetre purā tvāstāṃ brāhmaṇakṣatriyāvubhau |
sakhāyau dharmahīnau ca vṛttacyutau vimohitau || 10 ||
[Analyze grammar]

paṇyayoṣitsahavāsau svadhāsvāhāvivarjitau |
pāralaukikacintā tu tayoḥ svapne'pi nāgatā || 11 ||
[Analyze grammar]

ekadā tu kurukṣetre viṣṇuyāgo vyavartata |
agacchatāṃ yajñavāṭamapaśyatāṃ kriyāvidhim || 12 ||
[Analyze grammar]

śṛṇvānau vaidikān mantrān pāpaṃ tayornyavartata |
dharme matistayorjātā puṇḍarīkā'mbarīṣayoḥ || 13 ||
[Analyze grammar]

viveko'pi samudbhūtastarituṃ vai bhavārṇavam |
kṛtapāpaprapuñjānāṃ kṣālanārthaṃ ca bhūsurān || 14 ||
[Analyze grammar]

apṛcchatāmabhivādya vijñāpya kalmaṣaṃ nijam |
surāmiṣavyavāyādi cauryaṃ nāryādihiṃsanam || 15 ||
[Analyze grammar]

tacchrutvā vaiṣṇavaśreṣṭho mahābhāgavato dvijaḥ |
divyakriyāparaścaitāvuvāca bhaktisaṃbhṛtam || 16 ||
[Analyze grammar]

bho dvija kṣatradāyāda pāparāśeḥ sudāruṇāt |
muktiṃ ced vāñcchatastūrṇaṃ gacchataṃ puruṣottamam || 17 ||
[Analyze grammar]

kṣetrottamaṃ dārumayo yatrāste puruṣottamaḥ |
tamārādhya jagannāthaṃ lakṣmīrādhāprabhāpatim || 18 ||
[Analyze grammar]

pāpakṣayaṃ tathā muktiṃ prayasyathā'kṣare pade |
tanmā vilambaṃ kuruta prayātaṃ tatra satvaram || 19 ||
[Analyze grammar]

utkale nīlaśaile ca vāridheḥ sannidhau taṭe |
ityuktau tau ṛṣīnnatvā yayatuḥ puruṣottamam || 20 ||
[Analyze grammar]

dhyāyantau manasā viṣṇuṃ śuddhāhāravratāvubhau |
gatvā snātvā sarvatīrthāśrayābdhau mandiraṃ prati || 21 ||
[Analyze grammar]

dvāri kṛtvā daṇḍavacca tiṣṭhantau darśanecchayā |
bhagavantaṃ nirīkṣantau nā'paśyatāṃ yadā hi tau || 22 ||
[Analyze grammar]

nirāśau tu tadā bhūtvā''rabhete'naśanaṃ vratam |
kīrtayantau harernāmā'bhavatāṃ līnamānasau || 23 ||
[Analyze grammar]

atha tṛtīyarātrau tau jyotirekamapaśyatām |
punarlayaṃ gataṃ jyotistau copavasatāṃ sthirau || 24 ||
[Analyze grammar]

madhye saptamarātreśca tau śrīharimapaśyatām |
anādiśrīkṛṣṇanārāyaṇaṃ śrīpuruṣottamam || 25 ||
[Analyze grammar]

caturbhujaṃ sāyudhaṃ ca ratnāḍhyapādukāsthitam |
kamalākṣaṃ hāsyamukhaṃ vāme lakṣmīṃ svabāhunā || 296 ||
[Analyze grammar]

pārśve cākarṣayantaṃ ca gṛhṇantaṃ śrīkarācchubham |
tāmbūlakaṃ mukhe cākṣṇoḥ premapravāhapūritam || 27 ||
[Analyze grammar]

tejaḥparidhisaṃvyāptaṃ sakhībhiḥ parivāritam |
ratnavetrakarābhiśca tathā cāmarapāṇibhiḥ || 28 ||
[Analyze grammar]

dhṛtagandhapradīpābhirbhūṣitābhirvibhūṣaṇaiḥ |
ratnachatraṃ dhṛtavatyā śobhitaṃ puruṣottamam || 29 ||
[Analyze grammar]

dhūpapātraṃ dhṛtavatyā dhūpitaṃ puruṣottamam |
kāṃcit sahāsāṃ paśyantaṃ hasantaṃ sumanoharam || 30 ||
[Analyze grammar]

tathā stuvato devāṃśca siddhāṃśca sanakādikān |
nāradādyāṃśca gandharvān prahlādādīṃśca vaiṣṇavān || 31 ||
[Analyze grammar]

nṛtyantaṃ ca prasādārthamagrato'psaraso gaṇam |
evaṃ sarvaṃ ca tau dṛṣṭvā divyajñānau babhūvatuḥ || 32 ||
[Analyze grammar]

triḥ parikramya taṃ kṛṣṇanārāyaṇaṃ kṛtāñjalī |
tuṣṭuvāte muhustau ca hṛdayasthaṃ dṛśoścaram || 33 ||
[Analyze grammar]

āvāṃ kāmārthalubdhau ca pāpamātrābhicāriṇau |
ṛṣīṇāṃ kṛpayā cātra śaraṇaṃ te hyupāgatau || 34 ||
[Analyze grammar]

anukampaya nau nātha sudīnau śaraṇāgatau |
mūḍhau duṣkṛtakarmāṇau patitau bhavasāgare || 35 ||
[Analyze grammar]

ko'nyastvatsadṛśo bandhurmahābhayanivārakaḥ |
svārthaśūnyaḥ parāthaikadhyeyo'nāthapatiḥ prabhuḥ || 36 ||
[Analyze grammar]

nārāyaṇeti tvannāma caturvargaikasādhanam |
oṃ namaḥ śrīkṛṣṇanārāyaṇāya svāmine svāhā || 37 ||
[Analyze grammar]

mantraste mokṣadaścātipāpināṃ pāvako'sti hi |
japto bhavān paraṃ pāraṃ prāpayatyeva tena hi || 38 ||
[Analyze grammar]

tannau prasīda deveśa dṛḍhāṃ bhaktiṃ pradehi nau |
ghorād dustarakhātācca samuttāraya keśava || 39 ||
[Analyze grammar]

indriyāṇi mano buddhistava mūrtau vasantu naḥ |
ātmā saṃskārasahitaścārpitastava pādayoḥ || 40 ||
[Analyze grammar]

prasīda deva sarvātmannasaṃkhyeyaśirobhuja |
asaṃkhyaghrāṇanayanapāṇipāda namo'stu te || 41 ||
[Analyze grammar]

ṣaṅviṃśastvaṃ cāntarātman niṣprapaṃcaḥ pravartase |
catuṣpumarthamūrtistvaṃ jagannātha namo'stu te || 42 ||
[Analyze grammar]

tvadārādhanayā kṛṣṇa bhavanti sarvasiddhayaḥ |
yogābhyāsaṃ vinā cāsmai kṛṣṇāya te namonamaḥ || 43 ||
[Analyze grammar]

bhaktiṃ dṛḍhāṃ pradehyāvāṃ nāstyanyatprārthanīyakam |
yāvatprāṇāndhārayāvastāvadbhaktirdṛḍhā tvayi || 44 ||
[Analyze grammar]

tataḥ pāre'pi te bhaktiṃ dehi nārāyaṇaprabho |
agādhabhavapaṃke'tra nimagnayoḥ parāyaṇam || 45 ||
[Analyze grammar]

dāsyaṃ nātha sadā dehi cānukampaya nau vibho |
itistuvantau tau bhaktau petaturdaṇḍavat kṣitau || 46 ||
[Analyze grammar]

prasīdeti vadantau ca muhuścakraturdarśanam |
divyadṛṣṭyā vilokyaivaṃ nematuśca muhurmuhuḥ || 47 ||
[Analyze grammar]

tāvadadṛśyatāṃ yāto lakṣmīnārāyaṇaḥ patiḥ |
tāvubhau carmanetrābhyāṃ puṇḍarīkāmbarīṣakau || 48 ||
[Analyze grammar]

māyayā darśanaṃ divyaṃ svapnadṛṣṭamabudhyatām |
tataḥ siṃhāsanasthaṃ śrīpatiṃ dadṛśatuḥ punaḥ || 49 ||
[Analyze grammar]

kāṣṭharūpaṃ divyakalgiśobhāḍhyamukuṭānvitam |
lalāṭaphalake svarṇavarṇabindūrdhvapuṇḍrakam || 50 ||
[Analyze grammar]

navajīmūtasaṃkāśaṃ phullapadmāyatekṣaṇam |
sadratnasārajaḍitasauvarṇakuṇḍalojjvalam || 51 ||
[Analyze grammar]

raktādharaṃ tilapuṣpanāsikaṃ vanamālinam |
śaṃkhacakragadāpadmāyudha cāyatavakṣasam || 52 ||
[Analyze grammar]

mandahāsyānanaṃ divyasvarṇakaṭakabāhukam |
śrīvatsakaustubhamauktikādihārāḍhyavakṣasam || 53 ||
[Analyze grammar]

ājānuyugalaṃ svarṇaśṛṃkhalāḍhyaprakoṣṭhakam |
sadratnakhacitormikāśobhitāṅgulikākaram || 54 ||
[Analyze grammar]

abhayaṃ darśayantaṃ ca kareṇa mālikānvitam |
kṣaumapiśaṃgadhautraṃ ca divyacandanacarcitam || 55 ||
[Analyze grammar]

puṣpahārālisaṃśobhadvakṣaḥsthalasthitaśriyam |
puṣpagucchānvitakaraṃ suvartulakapolakam |
dhanuḥkammānikākārā'dharadvayamanoharam || 56 ||
[Analyze grammar]

īṣadgocaraśmaśrusatsūkṣmarekhā'dharānvitam |
kāmakoṭipralāvaṇyapremā'bdhikaṃjalocanam || 57 ||
[Analyze grammar]

āhvayantaṃ kaṭākṣeṇa jñāpayantaṃ ca hṛcchrayam |
saptaviṃśatihārālisauvarṇaraśanākaṭim || 58 ||
[Analyze grammar]

mañjīrakiṃkiṇījālaśabditacaraṇadvayam |
alaktakādisaṃlagnaśoṇarūpāḍhyapattalam || 59 ||
[Analyze grammar]

sūkṣmacandrakṛtāvāsonnatavartulasannakham |
dhanurdhvajatriśūlasvastikamatsyādihastakam || 60 ||
[Analyze grammar]

ūrdhvarekhā'rdhacandrādivajrāॆkuśādipattalam |
navayauvanapūrasthaṃ cittacauraṃ patiṃ prabhum || 61 ||
[Analyze grammar]

adrāṣṭāṃ ca tau subhaktau śrīsvāmipuruṣottamam |
tau śrīharerdakṣabhāge dadṛśāte halāyudham || 62 ||
[Analyze grammar]

saṃkarṣaṇaṃ prabhuṃ śeṣaṃ naikabrahmāṇḍasatphaṇam |
taṃ balaṃ yatsahasrādiphaṇāmaṇḍalabhūṣitam || 63 ||
[Analyze grammar]

dhavalaṃ samukuṭaṃ ca sauvarṇakuṇḍalāñcitam |
divyamālādharaṃ nīlāmbaraṃ paṃkajanetrakam || 64 ||
[Analyze grammar]

pronnatapīnavakṣaḥsthamaṇihārālirājitam |
śaṃkhacakragadāpadmamūśalahaladhāriṇam || 65 ||
[Analyze grammar]

atha madhye tayoḥ saumyāṃ bhadrāṃ campakasūjjvalām |
dadṛśāte ca tau ramyāṃ samārabdhasuyauvanām || 66 ||
[Analyze grammar]

kuṃkumāruṇabindvāḍhyalalāṭaphalakojjvalām |
sauvarṇatantikārājadbhāvakesaracandanām || 67 ||
[Analyze grammar]

kabarībhāraśobhāḍhyāṃ dhammilākarṣaṇānvitām |
karṇanāsāgalabāhuprakoṣṭhakaṭibhūṣaṇām || 68 ||
[Analyze grammar]

vidyutprabhojjvalaśāṭīkañcukīghargharīyutām |
sarvalāvaṇyasahitāṃ lakṣmīṃ kṛṣṇapriyāṃ dhruvām || 69 ||
[Analyze grammar]

tāmbūlakamalādyaiśca śobhitāṃ vyajanānvitām |
divyanepathyasaundaryasauratānandavāsinīm || 70 ||
[Analyze grammar]

adrāṣṭāṃ ca śatasūryasamaikārasudarśanam |
sahasrāra ca bhaktānāṃ rakṣākaraṃ pramuktidam || 71 ||
[Analyze grammar]

dārvagranirmitaṃ cakraṃ hariṃ bhadrāṃ balaṃ tathā |
caturdhā'vasthitaṃ kṛṣṇaṃ dṛṣṭvā tau viprabāhujau || 72 ||
[Analyze grammar]

vismayaṃ jagmatuḥ prātaḥ śraddadhatuśca divyatām |
na dārupratimā ceyaṃ sākṣād brahma prakāśate || 73 ||
[Analyze grammar]

dārumiśreṇa bhagavān tīrtharājataṭe sthitaḥ |
vaṭamūle divyarūpo yaṃ dṛṣṭvā mucyate janaḥ || 74 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
kṣitau yadāvatarati catūrūpaḥ prakāśate || 75 ||
[Analyze grammar]

jagannāthasya nikaṭe cāvāṃ sthāsyāva eva tu |
iti niścitya bhaktau dvau kṛṣṇe bhaktiparāyaṇau || 76 ||
[Analyze grammar]

tatra sthitau ciraṃ saṃprajayantau kṛṣṇamānasau |
divyau bhūtvā yayau śrīmatkṛṣṇanārāyaṇākṣaram || 77 ||
[Analyze grammar]

muktipadaṃ paraṃ dhāmā'punarāvṛttilakṣaṇam |
evaṃ ye bhajamānāstamanādiśrīnarāyaṇam || 78 ||
[Analyze grammar]

vāsaṃ yāsyanti puruṣottamapuryāṃ narāḥ striyaḥ |
divyāścaturbhujā bhūtvā prayāsyanti mamā'kṣaram || 79 ||
[Analyze grammar]

api kīṭapataṃgādyā viyujyante'subhiśca ye |
te'pi kṛṣṇasya sāmarthyāt prayāsyanti paraṃ padam || 80 ||
[Analyze grammar]

sakāmāḥ svargameṣyanti lokān vairājasaṃjñakān |
aiśvarāṃsteṣu vai divyān bhogān bhuktvā tataḥ param || 81 ||
[Analyze grammar]

prayāsyanti mama lokaṃ cākṣarādapi tūttamam |
ityāha bhagavān lakṣmīṃ cotkale puruṣottame || 82 ||
[Analyze grammar]

dakṣiṇasyodadhestīre vasanti vaiṣṇavā mama |
narā nāryo dharmayuktā mama bhaktiparāyaṇāḥ || 83 ||
[Analyze grammar]

ṛṣikulyāṃ samāsādya dakṣiṇodadhigāminīm |
svarṇarekhāmahānadyormadhye deśaḥ sa utkalaḥ || 84 ||
[Analyze grammar]

bhūsvarga eṣa evā'sti deśaḥ śrīpuruṣottamaḥ |
dharmārthakāmamokṣāṇāṃ prado nārāyaṇāśrayāt || 85 ||
[Analyze grammar]

nāryaḥ pativratā yatra narā patnīvratasthitāḥ |
sadā kṛtayugo yatra madbhakteṣu pravartate || 86 ||
[Analyze grammar]

teṣāṃ tu darśanāllakṣmi muktirbhavati śāśvatī |
paṭhanācchravaṇāccāsya bhuktiṃ muktiṃ labhejjanaḥ || 87 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne śrījagannāthapuryāṃ viprakṣatriyayorbhagavatsākṣātkāreṇa muktirityādinirūpaṇanāmā tryaśītyadhikapañcaśatatamo'dhyāyaḥ || 583 ||
[Analyze grammar]