Chapter 576

śrīlakṣmīrubāca |
ahaṃ dīkṣāṃ śubhāṃ śrutvā nārāyaṇa mukhāttava |
tava māhātmyabodhā ca jātā'smi vimalā prabho || 1 ||
[Analyze grammar]

aho devasya māhātmyaṃ cāturvarṇyasukhāvaham |
dīkṣādānena vai jñātaṃ tathā'nyad bhaktakāraṇāt || 2 ||
[Analyze grammar]

pṛcchāmi cāparādheṣu kiṃ phalaṃ kiṃ nivāraṇam |
tava pūjāparāṇāṃ tvaṃ śuddhiṃ vada janārdana || 3 ||
[Analyze grammar]

śrīnārāyaṇa uvāca |
śṛṇu lakṣmi pravakṣyāmi cāparādhaviśodhanam |
śuddho bhāgavato bhūtvā mama pūjāparāyaṇaḥ || 4 ||
[Analyze grammar]

āpadgato'pi rājānnaṃ bhuṃkte yaḥ pāpasaṃbhṛtam |
niraye tena pāpena vāsastasya prajāpate || 5 ||
[Analyze grammar]

rājā pravartate kurvan karma tāmasarājasam |
dāruṇaṃ garhitaṃ tasya cānnaṃ pāpabharaṃ mahat || 6 ||
[Analyze grammar]

dhārmikena na bhoktavyaṃ rājānnaṃ narakapradam |
yadvā rājñāṃ tu bhoktavyaṃ bhojyaṃ bhāgavatairnaraiḥ || 7 ||
[Analyze grammar]

sthāpayitvā tu māṃ lakṣmi nivedya māṃ ca sarvaśaḥ |
dhanyadhānyasamṛddhāni datvā māṃ svīkaroti cet || 8 ||
[Analyze grammar]

siddhaṃ bhāgavatairbhaktairmama śeṣaprasādikam |
bhuñjānasya na vai pāpalepastatra prajāyate || 9 ||
[Analyze grammar]

aprasādaṃ ca rājānnaṃ bhuṃkte tasya tu padmaje |
cāndrāyaṇena śuddhiḥ syānmama bhaktasya vai tathā || 10 ||
[Analyze grammar]

dantakāṣṭhamacarvitvā cā'kṛtvā mukhaśodhanam |
snātvā spṛśati māṃ cet sa durgandhimukhavān yataḥ || 11 ||
[Analyze grammar]

puṇyahīno bhaved bhakto mamā'parādhatastataḥ |
manuṣyaḥ kilbiṣī lakṣmi kaphapittamalānvitaḥ || 12 ||
[Analyze grammar]

pūyaśoṇitadurgandhi mukhamasya yataḥ sadā |
śuddha vāyuṃ samācamya durgandhaṃ ca vimuñcati || 13 ||
[Analyze grammar]

tena me mūrtisāmīpye'parādhastasya jāyate |
dantakāṣṭhena śuddhiḥ syātsugandhyadhadravyayojanāt || 14 ||
[Analyze grammar]

aparādhe tathā jāte vyomaśāyī dinadvayam |
bhavet mamā'tibhajanaṃ kuryāt kṛṣṇaparāyaṇaḥ || 15 ||
[Analyze grammar]

śatamālājapaṃ kuryādaparādho na vidyate |
atha kṛtvā maithunaṃ cā'snātaḥ śavātmako hi saḥ || 16 ||
[Analyze grammar]

tadaparādhapākaśca lālākhye niraye patet |
manuṣyasya paro dharmaḥ snānaṃ dhyānaṃ ca pūjanam || 17 ||
[Analyze grammar]

asnāto malamūtrāḍhyo malākhye niraye patet |
prāyaścittaṃ tasya kāryaṃ bhaktiyuktena cetasā || 18 ||
[Analyze grammar]

yāvakaṃ vā ca piṇyākaṃ bhakṣayedvai dinatrayam |
turyaṃ copavaset tena śuddhirbhaktasya jāyate || 19 ||
[Analyze grammar]

atha spṛṣṭvā śavaṃ gatvā śmaśānaṃ snāti naiva yaḥ |
tasyā'śuddhasya pitaraḥ patanti so'pi vai patet || 20 ||
[Analyze grammar]

śmaśāne jambukā bhūtvā bhavanti śavabhakṣakāḥ |
prāyaścittaṃ tasya kāryaṃ mama bhaktena cāṃjasā || 21 ||
[Analyze grammar]

ekāhāro dinaikyaṃ ca dinaikyaṃ cāpyupoṣitaḥ |
pañcagavyaṃ tataḥ pītvā śuddhyatyeva na saṃśayaḥ || 22 ||
[Analyze grammar]

nārīṃ rajasvalāṃ spṛṣṭvā yo māṃ spṛśati nirghṛṇaḥ |
tena pāpena bhakto'pi yāmye yāti rajomaye || 23 ||
[Analyze grammar]

andhastataḥ prajāyeta daridro buddhivarjitaḥ |
śuddhistasyāparādhasyopoṣaṇaṃ tvekameva ha || 24 ||
[Analyze grammar]

ākāśaśayanaṃ snānaṃ savastraṃ gavyaprāśanam |
kṛtvā mucyedaśuddheḥ sa mama karmaparāyaṇaḥ || 25 ||
[Analyze grammar]

spṛṣṭvā tu mṛtakaṃ lakṣmi yo matkṣetreṣu tiṣṭhati |
na snāti māṃ spṛśatyeṣaścāṇḍālajanma cāpnuyāt || 26 ||
[Analyze grammar]

andhaḥ sa jāyate paścānmaṇḍuko makṣikā bhavet |
ṭiṭṭibho vā maśakaśca kṛkalāsaḥ kharo'thavā || 27 ||
[Analyze grammar]

mārjāro vānaro vāpi jāyate tvaparādhavān |
śudyarthaṃ tādṛśo bhakto mama karmaparāyaṇaḥ || 28 ||
[Analyze grammar]

ekāhāraṃ pañcadaśadināni vartayettataḥ |
pañcagavyaṃ prāśayecca śuddhyatyevā'parādhataḥ || 29 ||
[Analyze grammar]

spṛśamānena māṃ laśmi muñcatyapānavāyukam |
tena doṣeṇa jāyeta makṣikā mūṣakastathā || 30 ||
[Analyze grammar]

śvā vā kūrmaḥ prajāyeta tataḥ sa mānavo bhavet |
ato naktaṃ trīṇyahāni vartayet tena śuddhyati || 31 ||
[Analyze grammar]

śatamālājapaṃ kuryāt snāyād bhaktiparāyaṇaḥ |
purīṣaṃ mucyate yastu vātena saha doṣataḥ || 32 ||
[Analyze grammar]

mama pūjāsthito vāpi mamānyakarmatatparaḥ |
purīṣanarake yāmye patet tena tataḥ param || 33 ||
[Analyze grammar]

manuṣyo jāyate lakṣmi mama karmaparāyaṇaḥ |
prāyaścittaṃ tataḥ kāryaṃ jale śayanamityapi || 34 ||
[Analyze grammar]

ākāśaśayanaṃ cāpi dinaikyaṃ prasamācaret |
śatamālājapaṃ kuryādaparādhātpramucyate || 35 ||
[Analyze grammar]

snātvā'pi yadi mārgeṣu malineṣu pragacchati |
aprakṣālitapādādyo yo hi māmupasarpati || 36 ||
[Analyze grammar]

so'pyaśuddhaḥ pāpavān syānmama vipriyakārakaḥ |
tena dattaṃ gandhamālyaṃ na vai gṛhṇāmi bhāvataḥ || 37 ||
[Analyze grammar]

tena prakṣālanaṃ kṛtvā pādayoḥ karayostathā |
ācamya ca yathānyāyaṃ śuddhaḥ san māmupaspṛśet || 38 ||
[Analyze grammar]

malatyāgaṃ tathā kṛtvā saptavāraṃ tu mṛttikām |
prakṣālanendriye datvā karayośca tathā dadet || 39 ||
[Analyze grammar]

pādayoḥ pañcavāraṃ ca tataḥ pātraṃ parimṛjet |
gaṇḍūṣān sapta kṛtvā ca tataḥ snānaṃ samācaret || 40 ||
[Analyze grammar]

madbhakto vai bhavecchuddhaḥ pūjako nānyathā priye |
gandhāṃśahastayuktaścetspṛśenmāṃ doṣabhāgbhabet || 41 ||
[Analyze grammar]

prāṇāyāmaṃ cācamanaṃ kṛtvā prakṣālayet karau |
evaṃ śuddhirbhavellakṣmi nā'parādhastadā bhavet || 42 ||
[Analyze grammar]

yastu krodhasamāyukto mama bhakto'pi mānavaḥ |
praspṛśenmama gātrāṇi sa tadā doṣabhāgbhavet || 43 ||
[Analyze grammar]

tena pāpena cillī syāt tataḥ śyeno bhavet sa ca |
mṛtkaṭiko bhavet kīṭaḥ krodhena kṛṣṇavarṇavān || 44 ||
[Analyze grammar]

kruddhena na ca kartavyaṃ lobhena tvarayā na ca |
matpūjanaṃ vidhānena kartavyaṃ mokṣadaṃ hiṃ tat || 45 ||
[Analyze grammar]

snātvā mālāśataṃ kuryāt krodhaśuddhistato matā |
akarmaṇyena puṣpeṇa yo māmarcayate bhuvi || 46 ||
[Analyze grammar]

mūrkho bhāgavataścāpi vānaro jāyate tataḥ |
mārjāro vā balīvardaḥ chāgo bā grāmakukkuṭaḥ || 47 ||
[Analyze grammar]

mahiṣo vā bhavet puṣpadātā yanme na rocate |
tacchuddhyarthaṃ caikabhojī bhavedvai dinasaptakam || 48 ||
[Analyze grammar]

sarvapāpapramuktaḥ syānmama loke gatirbhavet |
rudhirāktāmbarayukto yadi māmupasarpati || 49 ||
[Analyze grammar]

rajasvalārajoyuktavastrāḍhyo māṃ ca sarpati |
tena doṣeṇa jāyeta śvapaco nātra saṃśayaḥ || 50 ||
[Analyze grammar]

māsamekānnabhojī syānmālāsahasrakaṃ japet |
antime tu dine kuryādupavāsaṃ sa śuddhyati || 51 ||
[Analyze grammar]

andhakāre vinā dīpaṃ spṛśate māṃ sa doṣabhāk |
andhajanma bhavet tasya prāyaścittaṃ vadāmi ca || 52 ||
[Analyze grammar]

ekāhāraṃ pañcadinaṃ netrācchādanapūrvakam |
kuryānmālāśataṃ cāpi japecchuddho bhavettadā || 53 ||
[Analyze grammar]

kṛṣṇavastraṃ na vai dhāryaṃ pūjāyāṃ mama sarvathā |
tena doṣeṇa nakulaḥ kacchapo vā bhavettataḥ || 54 ||
[Analyze grammar]

pārāvato bhavedvāpi prāyaścittaṃ vadāmi te |
saptāhaṃ caikabhojī syānmālāśataṃ prakārayet || 55 ||
[Analyze grammar]

tataḥ śuddhirbhavettasya mama lokagato bhavet |
vāsasā cā'pyadhautena yo me karmāṇi cācaret || 56 ||
[Analyze grammar]

sa ca hastī tathoṣṭro vā hayo vā jambuko'thavā |
sāraṃgo vā bhavettasmācchuddhiḥ kāryā prayatnataḥ || 57 ||
[Analyze grammar]

upavāsaṃ caredekaṃ japecca śatamālikāḥ |
athocchiṣṭaṃ śunau yattad dadyāccenme ca karmaṇi || 58 ||
[Analyze grammar]

sārameyo bhavetso'pi gomāyurghūka eva vā |
śuddhiḥ kāryā śākamūlaphalāśinā dinatrayam || 59 ||
[Analyze grammar]

pañcagavyaṃ caturthe ca pibedupavasettathā |
aparādho vinaśyedvai mama lokagato bhavet || 60 ||
[Analyze grammar]

dīpaprakāśane kṛṣṇakajjalā cāṅgulirbhavet |
dagdhavartigandhayuktā kṣālanīyā prayatnataḥ || 61 ||
[Analyze grammar]

karasyā'kṣālane sparśe mama syādaparādhanam |
kuṣṭhī tena bhavedrogī tasmāddhastaṃ viśodhayet || 62 ||
[Analyze grammar]

aparādhe saṃjāte śatamālājapaṃ caret |
sopavāsaṃ tena śuddhirbhavet karmaṇyako bhavet || 63 ||
[Analyze grammar]

śmaśānaṃ yo jano gatvā tvasnātvaiva tu māṃ spṛśet |
jambuko gṛdhrako vā sa jāyate vā piśācakaḥ || 64 ||
[Analyze grammar]

tataścopavaseccaikadinaṃ mālāsahasrakam |
japettena bhavecchuddhirnānyathā snānamātrataḥ || 65 ||
[Analyze grammar]

śrīlakṣmīruvāca |
śmaśānaṃ tvapavitraṃ cecchaṃbhurbhāgavatottamaḥ |
tava bhaktaḥ kathaṃ cāste śmaśāne doṣabhāgyathā || 66 ||
[Analyze grammar]

śrīnārāyaṇa uvāca |
śṛṇu lakṣmi purāvṛttaṃ śaṃbhoste kathayāmyaham |
śmaśānaṃ nāsti śuddhaṃ vai yadaśuddhaṃ sadā matam || 67 ||
[Analyze grammar]

kenacittu nimittena śaṃbhurvāsamarocayat |
prāyaścittasvarūpaṃ taṃ vāsaṃ na manute sadā || 68 ||
[Analyze grammar]

yadyapi śaṃkaro bhaktottamo me vartate mahān |
śmaśāne vasatastasya gṛhṇāmi nā'rcanādikam || 69 ||
[Analyze grammar]

prāyaścittottaraṃ sarvaṃ gṛhṇāmi nānyathā kvacit |
śaṃkaro nāśayāmāsa tripurāṇi tathā'suram || 70 ||
[Analyze grammar]

bālān vṛddhāṃstathā strīśca tripure vāsinastataḥ |
tena pāpena saṃlipto naṣṭaiśvaryaśca śaṃkaraḥ || 71 ||
[Analyze grammar]

naṣṭayogabalo naṣṭamāyābalo babhūva ha |
vivarṇavadano bhūtvā na śaknoti viceṣṭitum || 72 ||
[Analyze grammar]

mṛtaprāyo'bhavacchāpairāsurastrīsamarpitaiḥ |
naṣṭasaṃjño hatajñāno naṣṭānando yathā'balaḥ || 73 ||
[Analyze grammar]

tato'haṃ taṃ samāpanno vilokya śaṃkaraṃ tataḥ |
avocaṃ mā śucaḥ śreyaḥ kariṣye tava vai drutam || 74 ||
[Analyze grammar]

mayā dṛṣṭaḥ śaṃkaraśca tadā divyena cakṣuṣā |
tāvadrudrasya sāmarthyaṃ prakāśamagamatpunaḥ || 75 ||
[Analyze grammar]

mayoktaṃ tava pāpasya nāśārthamahamāgataḥ |
śrutvovāca haro māṃ ca pāpasantaptalocanaḥ || 76 ||
[Analyze grammar]

he viṣṇo tvatprasādena hatastripurakā'suraḥ |
nihatā dānavāstatra garbhiṇyaśca nipātitāḥ || 77 ||
[Analyze grammar]

bālavṛddhā hatāścāpi dagdhāni tripurāṇi ca |
tatpāpasya prabhāveṇa na śaknomi viceṣṭitum || 78 ||
[Analyze grammar]

praṇaṣṭaiśvaryamāyaśca naṣṭajñānātmasadbalaḥ |
kiṃ kartavyaṃ mayā viṣṇo pāpāvasthena sāmpratam || 79 ||
[Analyze grammar]

viṣṇo tattvena māṃ brūhi pāpasyā'sya viśodhanam |
evaṃ prārthayamānasya mayā rudrasya bhāṣitam || 80 ||
[Analyze grammar]

kapālamālāṃ sandhārya samalo vihara kṣitau |
śaṃbhuḥ papraccha māṃ kīdṛk samalatvaṃ prakīrtyate || 81 ||
[Analyze grammar]

mayoktaṃ vai śmaśānaṃ ca malaṃ pūtikamucyate |
śmaśāne vāsa evā'tra samalatvaṃ prakīrtyate || 82 ||
[Analyze grammar]

tatrā''dāya kapālāni rama tatraiva śaṃkara |
bhūtapretādibhṛtyaiśca sārdhaṃ vasa samāśatam || 83 ||
[Analyze grammar]

tāvatpūjā mama naiva kartavyā bāhyataḥ kvacit |
mānasaṃ pūjanaṃ kāryaṃ nāparādho bhaviṣyati || 84 ||
[Analyze grammar]

pūrṇe varṣaśate yāte gautamasyāśramaṃ vraja |
prasādād gautamamunerbhavitā gatakilbiṣaḥ || 85 ||
[Analyze grammar]

tataḥ pāpavināśena śarīraśuddhimācara |
varṣamātraṃ vrataṃ payovrataṃ gṛhāṇa śuddhikṛt || 86 ||
[Analyze grammar]

brahmakūrcaṃ ca vā śreṣṭhaṃ vrataṃ māsikamityapi |
kariṣyasi tathā śuddhaḥ pūjanārho bhaviṣyasi || 87 ||
[Analyze grammar]

paścāt tvayā śmaśāne na vastavyaṃ karhicicchava |
yadīcchasi mama pūjāyogyatvaṃ vaiṣṇavaṃ vṛṣam || 88 ||
[Analyze grammar]

rudrāyaivaṃ varaṃ datvā tatraivā'ntarhito'bhavam |
rudropi bhramate varṣaśataṃ śmaśānake sthale || 89 ||
[Analyze grammar]

vinā tu kṛtasaṃskāro mamādeśaparāyaṇaḥ |
varṣaśate gate rudro yayau vai gautamāśramam || 90 ||
[Analyze grammar]

gautamena tadā tasyopadeśaḥ samprakīrtitaḥ |
rūpadvayaṃ sadā rudra pradhāraya kriyāvaśāt || 91 ||
[Analyze grammar]

pāpaṃ sarvaṃ gataṃ te'tra śuddho'si vaiṣṇavo mahān |
mahābhāgavataṃ rūpaṃ sadā gṛhāṇa sāttvikam || 92 ||
[Analyze grammar]

kailāse sarvadā tiṣṭha bhakteṣvapi ca sāttvikaḥ |
chāyātmakaṃ dvitīyaṃ ca rūpaṃ dhāraya bhairavam || 13 ||
[Analyze grammar]

bhūtapretapiśācānāmupāsyaṃ samalaṃ ca tat |
śmaśānavāsayogyaṃ ca tāmasānāṃ sadāśrayam || 94 ||
[Analyze grammar]

ityuktaḥ śaṃkaro dhṛtvā rūpadvayaṃ tataḥ punaḥ |
śmaśānastho na me bhakto na vā vaiṣṇava ityapi || 95 ||
[Analyze grammar]

kailāsastho hi me bhaktaḥ pūjārho vaiṣṇavottamaḥ |
ityetat kathitaṃ lakṣmi śmaśānaṃ samalaṃ sadā || 96 ||
[Analyze grammar]

śmaśānasthāḥ samalā vai na vai śuddhāḥ śavasthale |
paścād rudrasya bhūtādyaistāmasaistādṛśairjanaiḥ || 97 ||
[Analyze grammar]

śaṃkarasya tu kailāsaṃ śmaśānaṃ ceti varṇyate |
vastuto naivamevā'sti śmaśānaṃ śaṃkarapriyam || 98 ||
[Analyze grammar]

śmaśānaṃ naiva kasyāpi lakṣmi vai bhavati priyam |
devānāṃ tu kathaṃ tat syāt priyaṃ sattvakriyāvatām || 99 ||
[Analyze grammar]

iti te kathitaṃ tattvaṃ prāyaścittaṃ vadāmi te |
pañcagavyaṃ prāśanīyaṃ sopavāsaṃ dinaikake || 100 ||
[Analyze grammar]

savastraṃ snānamāptavyaṃ tulasīpatrabhojanam |
vimuktastena pāpena mama karmārhaṇo bhavet || 101 ||
[Analyze grammar]

madyapānaprakartā tu bhraṣṭo bhavati dehataḥ |
brahmakūrcavratenā'sya śuddhirbhavati sarvathā || 102 ||
[Analyze grammar]

ulūkaḥ syādanyathā saḥ kīṭo bhavati vai punaḥ |
brahmakūrcavrataṃ vacmi śṛṇu lakṣmi praśodhakam || 103 ||
[Analyze grammar]

māsaṃ vā pakṣakaṃ vā tat kartavyaṃ dehadhāriṇā |
payasyāmalakaṃ śuṇṭhīṃ palāśapatramityapi || 104 ||
[Analyze grammar]

śarkarāṃ tulasīpatraṃ kvāthayecca pibed dine |
yathāpacyaṃ bhavet tadvad vikṛtaṃ na yathā bhavet || 105 ||
[Analyze grammar]

anyat kiñcid bhakṣayenna jalaṃ pibettu śāntaye |
brahmakūrcavrataṃ tvetat pākṣikaṃ māsikaṃ ca vā || 106 ||
[Analyze grammar]

yāni kāni ca patrāṇi pāvanāni hi śākhinām |
kvāthayecca pibennityaṃ pālāśaṃ tatra niścitam || 107 ||
[Analyze grammar]

pañcagavyaṃ pibedvāpi pākṣikaṃ māsikaṃ ca vā |
brahmakūrcasamaṃ tacca sarvapāpapraśodhakam || 108 ||
[Analyze grammar]

kāyākalpakaraṃ tvetanmokṣadaṃ maraṇe sati |
śarīradhātuśuddhyarthaṃ recanaṃ kvāthanaṃ tu tat || 109 ||
[Analyze grammar]

brahmabhaktyā kṛtaṃ tadvai mokṣaṇārthaṃ prakalpyate |
prāyaścittīkṛtaṃ tadvai pāpakṣālanakaṃ bhavet || 110 ||
[Analyze grammar]

roganāśakṛte cettaddhātuśuddhikaraṃ bhavet |
apacyaṃ cet kvacittadvai maraṇāya prakalpyate || 111 ||
[Analyze grammar]

palāṇḍuśākapatrādibhakṣakaḥ syāddhi sūkaraḥ |
śvā bhavejambuko vāpi mamāparādhakṛnnaraḥ || 112 ||
[Analyze grammar]

brahmakūrcavrataṃ kṛtvā śatamālājapāṃścaret |
tena śuddhirbhavettasya mama karmārhaṇo bhavet || 113 ||
[Analyze grammar]

yaḥ pārakyena vastreṇa na dhautenāpi māṃ spṛśet |
mṛgajanma hyavāpnoti hīnapādaikako bhavet || 114 ||
[Analyze grammar]

māghamāse jale tiṣṭhetpraharadvayameva ha |
tena śuddhiḥ śatamālā japed bhavati nirmalaḥ || 115 ||
[Analyze grammar]

navānnaṃ yo nā'rpayenme svayaṃ bhuṃkte rasāhṛtaḥ |
pāpabhoktā bhavettena kartavyaṃ samupoṣaṇam || 116 ||
[Analyze grammar]

śatamālājapaścāpi tena śuddhyati mānavaḥ |
adattvā gandhamālyāni yo me dhūpaṃ prayacchati || 117 ||
[Analyze grammar]

yātudhāno bhavettena kartavyaṃ samupoṣaṇam |
śatamālājapaścāpi tena śuddhyati vaiṣṇavaḥ || 118 ||
[Analyze grammar]

vahannupānahau padbhyāṃ yastu māmupasaṃkramet |
carmakāraḥ sa jāyeta tataḥ śvā sūkaro bhavet || 119 ||
[Analyze grammar]

pākṣikaṃ caikabhuktaṃ ca śatamālāḥ samācaret |
tena śuddhirbhavet tasya mama bhaktasya padmaje || 120 ||
[Analyze grammar]

vinā ghaṇṭādiśabdaṃ tu yo vai māṃ pratibodhayet |
badhiro jāyate tena kartavyaṃ samupoṣaṇam || 121 ||
[Analyze grammar]

śatamālājapaścāpi mama bhaktaḥ sa śuddhyati |
annaṃ bhuktvā bahutaramajīrṇena pariplutaḥ || 122 ||
[Analyze grammar]

udgāreṇa samāvṛtto'snātaścāpyupasarpati |
vānaro vā śṛgālaḥ śvā chāgo vā jāyate hi saḥ || 123 ||
[Analyze grammar]

tridinaṃ copavāsī syānmālāśataṃ ca vartayet |
ya etena vidhānena prāyaścittaṃ samācaret || 124 ||
[Analyze grammar]

na sa lipyeta pāpena mama lokaṃ sa gacchati |
yastu bhāgavato nityaṃ kalyamutthāya vācayet || 125 ||
[Analyze grammar]

paṭhedvā śṛṇuyāccāpi mama lokaṃ sa gacchati |
śaṃbhunoktaṃ hi yat satyai mayoktaṃ tava padmaje || 126 ||
[Analyze grammar]

ārogyāṇāṃ mahārogyaṃ mokṣāṇāṃ mokṣaṇaṃ param |
śodhanānāṃ parā śuddhiḥ prasannānāṃ ca pātratā || 127 ||
[Analyze grammar]

tapaḥ paramaṃ tapasāṃ bhaktyātmakaṃ mayoditam |
mama bhaktena kartavyaṃ rakṣasāṃ na vicāraṇā || 128 ||
[Analyze grammar]

mumukṣūṇāṃ yogināṃ ca sādhvīnāṃ ca satāmapi |
mama bhaktiyutānāṃ ca kṛte mayātra kīrtitam || 129 ||
[Analyze grammar]

garbhaviṣaprasaktānāṃ vāsanāsaṃhṛtahṛdām |
nāstikānāṃ kṛte naitanmayoktaṃ lakṣmi śodhanam || 130 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne bhagavatpūjane'parādhā ye te teṣāṃ śuddhiḥ śarīrāntarayonyantarāptirvā cetyādi śaṃkarasya śmaśānapriyatvākhyānamaśmaśānavāsitā cetyādinirūpaṇanāmā ṣaṭasaptatyadhikapañcaśatatamo'dhyāyaḥ || 576 ||
[Analyze grammar]