Chapter 575

śrīlakṣmīruvāca |
kanyādānaṃ kīdṛśaṃ dātavyaṃ mama pituḥ sthale |
vada me śrīkṛṣṇanārāyaṇasvāmin kṛpāṃ kuru || 1 ||
[Analyze grammar]

śrīnārāyaṇa uvāca |
svavittenā'nukartavyaṃ kanyodvāhanamuttamam |
yasyāgre naiva vittaṃ syāttena kanyā suśobhitā || 2 ||
[Analyze grammar]

vastrādyaistulasīpatraṃ saṃspṛṣṭvā vahnisannidhau |
kanyā deyā jalasākṣye viprasākṣye ca maṇḍape || 3 ||
[Analyze grammar]

varamālāṃ gṛhītvā ca kanyā taṃ varayed varam |
bhojanādyaṃ yathāśakti protsāhaśced dadecchubham || 4 ||
[Analyze grammar]

yogyaṃ hṛdyaṃ varaṃ labdhvā pradadyād vikrayaṃ vinā |
vikrayo dhanamāhṛtya dīyate pātakaṃ mahat || 5 ||
[Analyze grammar]

abhigamya pradātavyā cottamaṃ tārakaṃ tu tat |
āhūya tu pradātavyā madhyamaṃ tārakaṃ tu tat || 6 ||
[Analyze grammar]

prasahya ca pradātavyā tvadhamaṃ dānameva tat |
kiṃkarīvatpradātavyā niṣphalaṃ dāsikāsamam || 7 ||
[Analyze grammar]

kanyādāne jāyamāne kuryuḥ śrīharikīrtanam |
nāryaḥ kuṭumbināṃ tatra maṇḍape vādyaghoṣite || 8 ||
[Analyze grammar]

nirvartite ca taddāne pūjanaṃ darśanaṃ hareḥ |
kuryātāṃ dampatī paścād viśetāṃ nijamandiram || 9 ||
[Analyze grammar]

pūjanādi prakuryātāṃ nityaṃ prātaḥ suvastubhiḥ |
upacāraiḥ śreṣṭhatamaiḥ kuryātāṃ nā'parāddhakam || 10 ||
[Analyze grammar]

pūjāparādhakartṝṇāṃ pāpamevopajāyate |
śṛṇu lakṣmi vacmi doṣān prāyaścittayutān yathā || 11 ||
[Analyze grammar]

mama bhakto mama karmaparāyaṇaḥ sadā bhavet |
gṛhe devagṛhaṃ svalpaṃ pṛthak kṛtvā'rcayennu mām || 12 ||
[Analyze grammar]

mūrtiṃ yathepsitāṃ nyasya snānāmbarasucandanaiḥ |
patrapuṣpajalairbhojyairdhūpadīpanivedanaiḥ || 13 ||
[Analyze grammar]

pradakṣiṇā''rtikaraṇaiḥ stutikṣamāvisarjanaiḥ |
nityaṃ prapūjayed datvā dhyānaṃ vai matparāyaṇaḥ || 14 ||
[Analyze grammar]

kathāyāḥ śravaṇaṃ kuryāt kīrtanaṃ copadeśanam |
nartanaṃ vādanaṃ kuryādutsavaṃ sumanoharam || 15 ||
[Analyze grammar]

śṛṇu tattvena me lakṣmi mama dharmaṃ sanātanam |
devā etanna jānanti yogajñāḥ sāṃkhyavedinaḥ || 16 ||
[Analyze grammar]

vinā bhāgavatīṃ dīkṣāṃ pūjanaṃ me nirarthakam |
lakṣeṣu labhate kaścid dīkṣāṃ mama sukhāvahām || 17 ||
[Analyze grammar]

mayi śāntaṃ manaḥ kṛtvā tvabhigacched guruṃ prati |
tadājñāṃ tu puraskṛtya prārthayet śādhi māṃ guro || 18 ||
[Analyze grammar]

guruṇā darśitān dīkṣādravyādīn samupāharet |
lājā madhu kuśāṃścāpi ghṛtaṃ cāmṛtamityapi || 19 ||
[Analyze grammar]

dugdhaṃ dadhi gavāṃ mūtraṃ śakṛccāpi suśarkarām |
yajñopavītaṃ gandhaṃ ca kuṃkumaṃ cākṣatāṃstathā || 20 ||
[Analyze grammar]

puṣpāṇi tulasīṃ dhūpaṃ dīpaṃ naivedyakaṃ phalam |
jalaṃ mālāṃ ca kaṇṭhīṃ ca kṛṣṇājinaṃ ca dhotrakam || 21 ||
[Analyze grammar]

daṇḍaṃ kamaṇḍaluṃ vāsaṃ uttarīyaṃ ghaṭaṃ tilān |
pāduke'rghapātraṃ carusthālīṃ vrīhīṃśca darvikām || 22 ||
[Analyze grammar]

yavāṃśca guḍadhānāṃśca phalāni bhojanāni ca |
bhakṣyabhojyā'nnapānāni karmaṇyāni ca sarvaśaḥ || 23 ||
[Analyze grammar]

yāni kāni ca bījāni ratnāni vividhāni ca |
kācapātrāṇi kalaśaṃ cāmrapātrāṇi dorakam || 24 ||
[Analyze grammar]

aśokasya supatrāṇi paṭṭikāsanamityapi |
tribhāṇaṃ cācamanīyaṃ homapātraṃ sruvādikam || 25 ||
[Analyze grammar]

homakāṣṭhāni sarvāṇi pippalodumbarāṇi ca |
khādiraṃ bilvakāṣṭhaṃ cāpāmārgaṃ cārkamityapi || 26 ||
[Analyze grammar]

āmalakaṃ ca tulasīṃ candanaṃ ca vaṭaṃ tathā |
śālaṃ ca madhukaṃ ceti kāṣṭhāni samupāharet || 27 ||
[Analyze grammar]

snātvā maṃgalasaṃyukto vediṃ kuryāt suśobhanām |
brāhmaṇaścaturasrāṃ ṣoḍaśahastāṃ samantataḥ || 28 ||
[Analyze grammar]

tatra dhānyairmaṇḍalaṃ sarvatobhadraṃ prakārayet |
navaṃ jalaghaṭaṃ madhye puṣpapallavaśobhitam || 29 ||
[Analyze grammar]

sauvarṇaṃ rājataṃ tāmraṃ sthāpayed ratnagarbhagam |
tasyopari tilaiḥ pūrṇāṃ sthālīṃ nyasya vidhānataḥ || 30 ||
[Analyze grammar]

pūjayenmāṃ parabrahma guruṃ cāpi suvastubhiḥ |
vedimadhye sudravyāṇi sthāpayet saṃskṛtāni vai || 31 ||
[Analyze grammar]

caturaḥ kalaśān dadyāccatuḥpārśveṣu sundari |
vāripūrṇānnūtnapatrayuktān phalairvibhūṣitān || 32 ||
[Analyze grammar]

sarvataḥ śuklavastraiśca veṣṭitānāmraśobhitān |
upaspṛśyā'vasathe ca maṇḍape gurusannidhau || 33 ||
[Analyze grammar]

pūrvamukhād gurormantraṃ śiṣyaścottarasanmukhaḥ |
vāmakarṇena gṛhṇīyānmantraṃ bhāgavataṃ param || 34 ||
[Analyze grammar]

anādiśrīkṛṣṇanārāyaṇo'stu śaraṇaṃ mama |
oṃ namaḥ śrīkṛṣṇanārāyaṇāya pataye svāhā || 35 ||
[Analyze grammar]

etau mantrau guruḥ sarvān śrāvayet strīrnarānapi |
dīkṣāṃgo mantra evā'sti jñānātmako harirhi saḥ || 36 ||
[Analyze grammar]

eṣa bhāgavato jātaḥ śiṣyo mantraprabhāvataḥ |
etān bhāgavatān dṛṣṭvā cābhyutthānaṃ prakārayet || 37 ||
[Analyze grammar]

mānanīyā yathā'haṃ vai tathā bhāgavatā janāḥ |
yastu bhāgavatān dṛṣṭvā svayaṃ bhāgavataḥ śuciḥ || 38 ||
[Analyze grammar]

abhyutthānaṃ na kurvīta tenā'haṃ tu prahiṃsitaḥ |
kanyāṃ datvā tu bhaktāya punastāṃ preṣayenna yaḥ || 39 ||
[Analyze grammar]

aṣṭau pitṛgaṇāstena hiṃsitā nātra saṃśayaḥ |
bhāryāṃ priyasakhīṃ yastu sādhvīṃ hinasti nirghṛṇaḥ || 40 ||
[Analyze grammar]

satīṃ ca vaiṣṇavīṃ lakṣmīrūpāṃ gṛhasya devatām |
punastenaiva pāpena nāpnoti sa striyaṃ kvacit || 41 ||
[Analyze grammar]

strīṇāṃ duḥkhaprakartāro bhavanti duḥkhinaḥ sadā |
bilvavṛkṣodumbarau tūlasī cchakṣastathā'mrakaḥ || 42 ||
[Analyze grammar]

aśoko bakulaścāpyāmalakī karṇikā tathā |
daivataravaḥ karmaṇyā na chettavyā hi mūlataḥ || 43 ||
[Analyze grammar]

dīkṣitena tathā lakṣmi tvabhakṣyaṃ varjyameva ha |
apeyaṃ ca tathā varjyaṃ nindā varjyā ca hiṃsanam || 44 ||
[Analyze grammar]

paiśunyaṃ stainyamāvarjyaṃ kāryaṃ cātithyapūjanam |
vyavāyaḥ sarvathā tyājyo brahmacaryaṃ ca nigrahaḥ || 45 ||
[Analyze grammar]

rakṣaṇīyaṃ prayatnena guroḥ sevanamityapi |
dṛṣṭvā parasya bhāgyāni dravyāṇi sampadādikam || 46 ||
[Analyze grammar]

dāridryaṃ cātmano dṛṣṭvā kāryaṃ nodvejanaṃ kvacit |
evaṃ vai niyamān dadyānmātāpitrośca sevanam || 47 ||
[Analyze grammar]

niyamena pradadyācca śrīharerbhajanaṃ sadā |
atha vedyāṃ sthāpayedaudumbarasya daladvayam || 48 ||
[Analyze grammar]

jalapātraṃ kṣuraṃ cāpi tata āvāhayecca mām |
āgaccha bhagavaṃścātra mūrtau vedyāṃ ca sannidhau || 49 ||
[Analyze grammar]

arghyaṃ pādyaṃ gṛhāṇaitat tataḥ svavapanaṃ śubham |
kārayenmaṇḍapapārśve romapāpāni yānti yat || 50 ||
[Analyze grammar]

nīromaṃ ca śikhāyuktaṃ śoṇitena vivarjitam |
kṣauraṃ prakārayitvā ca snātvā vastraṃ ca dhautrakam || 51 ||
[Analyze grammar]

uttarīyaṃ tathā dhṛtvā namaskuryād guruṃ harim |
prajvālya vahnidevaṃ ca homapātreṇa cānale || 52 ||
[Analyze grammar]

ghṛtena madhumiśreṇa lājākṛṣṇatilādibhiḥ |
datvā homaṃ saptavārān viṃśatiṃ ca tilodanam || 53 ||
[Analyze grammar]

tataḥ satyasvarūpaṃ tvāṃ vahniṃ namāmi saṃvadet |
tisraḥ pradakṣiṇāḥ kṛtvā devaṃ bhāgavataṃ gurum || 54 ||
[Analyze grammar]

gurupādau prasaṃgṛhya prārthayet sadguruṃ tadā |
gurudevaprasāden labdhā dīkṣā yadṛcchayā || 55 ||
[Analyze grammar]

yaccaivā'pakṛtaṃ kiñcid gururmarṣayatāṃ mama |
ityuktavate śiṣyāya dadyād yajñopavītakam || 56 ||
[Analyze grammar]

kamaṇḍaluṃ tathā dadyājjalapātraṃ tu śuddhaye |
candanaṃ viṣṇave cāpi gandhaṃ tailaṃ ca vaiṣṇavam || 57 ||
[Analyze grammar]

madhuparkaṃ tathā dadyācchiṣyaḥ pūjākramāgatam |
vastraṃ bhūṣāṃ puṣpamālāṃ nārāyaṇāya cārpayet || 58 ||
[Analyze grammar]

tataḥ kaṇṭhīṃ taulasīṃ ca śiṣyakaṇṭhe gururdadet |
tilakaṃ candrakayutaṃ lalāṭe'sya dadettathā || 59 ||
[Analyze grammar]

nāma nārāyaṇanāmnā kuryādācāryatānvitam |
dāsyānvitaṃ ca vā kuryāttathā veṣaṃ yathocitam || 60 ||
[Analyze grammar]

yathāvyakti pradadyācca dānaṃ cāpi yathābalam |
homavahniṃ tathā devaṃ guruṃ natvā ca vaiṣṇavān || 61 ||
[Analyze grammar]

dakṣiṇāṃ bhojanaṃ vastraṃ tebhyo datvā gṛhaṃ saret |
kṛṣṇasārasya carmā'trāsanaṃ vipraḥ samarthayet || 62 ||
[Analyze grammar]

pālāśaṃ daṇḍamevā'yaṃ brāhmaṇo rakṣayet sadā |
kṣatriyastvāyudhaṃ tyaktvā dīkṣāṃ proktavidhānataḥ || 63 ||
[Analyze grammar]

gṛhṇīyācchāgacarmā'pi plakṣadaṇḍaṃ viśeṣataḥ |
vedikāṃ dvādaśahastāṃ kārayitvā ca pūrvavat || 64 ||
[Analyze grammar]

sarvamanyat pragṛhṇīyād dīkṣāyāṃ gurutaḥ śubham |
niyamān dhārayennāhaṃ śastraṃ spṛśāmi hiṃsakam || 65 ||
[Analyze grammar]

dīkṣāṃ pūrvoktavidhinā prāpya bhāgavatīṃ tataḥ |
śuddhān bhāgavatān sarvān bhojayed dānamarpayet || 66 ||
[Analyze grammar]

atha vaiśyaḥ sarvavastūnyāhṛtya vedikāṃ śubhām |
daśahastāṃ kārayecca lepayed gomayena tām || 67 ||
[Analyze grammar]

chāgacarma dhārayecca daṇḍamaudumbaraṃ tathā |
anyat sarvaṃ pūrvavacca kārayed dīkṣito bhavet || 68 ||
[Analyze grammar]

devābhivādanaṃ kṛtvā puro bhāgavateṣu ca |
sādhūbhyo bhojanaṃ dadyādaparādhān kṣamāpayet || 69 ||
[Analyze grammar]

śūdro'pi gṛhṇīyād dīkṣāṃ bhāgavatīṃ śubhāvahām |
sarvasaṃskāradravyāṇi mayā pūrvoditāni vai || 70 ||
[Analyze grammar]

tāni prakalpayed vedyāṃ vedī cāṣṭakarānvitā |
kartavyā tatra vidhinā pūrvavat pūjayeddharim || 71 ||
[Analyze grammar]

carma nīlasya chāgasya daṇḍaśca vaiṣṇavo'sya vai |
evaṃ dīkṣāṃ ca gṛhṇīyācchūdro bhāgavato bhavet || 72 ||
[Analyze grammar]

bhojayed vaiṣṇavān sādhūn sādhvīścāpi yathā ghanam |
caturṇāmapi varṇānāṃ chatramācāryavedakam || 73 ||
[Analyze grammar]

brāhmaṇe pāṇḍuraṃ chatraṃ kṣatriye raktameva ca |
vaiśye pītaṃ tathā śūdre nīlaṃ guruḥ pradāpayet || 74 ||
[Analyze grammar]

dīkṣitānāṃ prakartavyaṃ lakṣmi vadāmi te'tra vai |
sarvathā cintanīyo'haṃ gomukhyāṃ mālayā priye || 75 ||
[Analyze grammar]

gaṇanā kārikā mālā taulasī sā gaṇāntikā |
eṣā gaṇāntikā nāma dīkṣāṃgabījarūpiṇī || 76 ||
[Analyze grammar]

tayā me bhajanaṃ kāryaṃ dīkṣāyāḥ syānmahāphalam |
guptāṃ guṇāntikāṃ kṛtvā cintayenmāṃ budhottamaḥ || 77 ||
[Analyze grammar]

kārtike mārgaśīrṣe ca vaiśākhe śuklapakṣake |
ekādaśyāṃ nirāhāro dvādaśyāṃ prātareva ha || 78 ||
[Analyze grammar]

dīkṣāṃ pragṛhṇīyāccedvai mucyate bhavabandhanāt |
keśaprasādhanārthaṃ me dadyādvai kaṅkatīṃ śubhām || 79 ||
[Analyze grammar]

aṃjanaṃ darpaṇaṃ dadyāt tathā dadyācca mālikām |
nocchiṣṭaḥ saṃspṛśenmālāmākāśe sthāpayeddhi tām || 80 ||
[Analyze grammar]

sandhyāṃ kuryānmama bhaktaḥ samyag dhyānātmikā tu sā |
muhūrtaṃ dhyānamābadhya mama mantraṃ japenmuhuḥ || 81 ||
[Analyze grammar]

mamāgre dīpakaṃ kuryāttejorāśivivardhanam |
mallalāṭe tilakaṃ sacandraṃ vai kārayettathā || 82 ||
[Analyze grammar]

dhūpaṃ sugandhaṃ me dadyādimaṃ ślokamudīrayet |
sugandhāni tavā'ṅgāni svabhāvenaiva keśava || 83 ||
[Analyze grammar]

amunā śubhadhūpena dhūpitāni gṛhāṇa tam |
dīpaṃ dadyād ghṛtajanyaṃ pitṝṇāṃ tārakaṃ śubham || 84 ||
[Analyze grammar]

sauvarṇaṃ rājataṃ kāṃsyaṃ pātraṃ mama praśasyate |
tāni tyaktveha sarvāṇi tāmraṃ hi mama rocate || 85 ||
[Analyze grammar]

śṛṇu tattvena me lakṣmi yena tāmraṃ mama priyam |
pūrvaṃ kamalapatrākṣi guḍākeśo mahāsuraḥ || 86 ||
[Analyze grammar]

tāmrarūpaṃ samādāya mamaivārādhane rataḥ |
varṣāṇāṃ tu sahasrāṇi caturdaśa suniścalaḥ || 87 ||
[Analyze grammar]

tasya tāmrāśramaṃ cāhaṃ yayau prasannatāyutaḥ |
caturbāhuṃ sa māṃ dṛṣṭvā praṇanāma sa vai muhuḥ || 88 ||
[Analyze grammar]

mayoktaṃ te prasanno'smi varaṃ brūhi hṛdīpsitam |
guḍākeśastadā prāha viśuddhenāntarātmanā || 89 ||
[Analyze grammar]

janmanāṃ tu sahasrāṇi tvayi bhaktirdṛḍhā'stu me |
cakreṇa vadhamicchāmi tvayā muktena mādhava || 90 ||
[Analyze grammar]

mama cakrahatasyaitadvasāmāṃsādikaṃ ca yat |
tāmraṃ nāma bhaved deva pavitrīkaraṇaṃ śubham || 91 ||
[Analyze grammar]

tāmrapātre'rpite te'stu prītiḥ sarvādhikā prabho |
bāḍhamiti mayoktaḥ sa yāvallokasya saṃsthitiḥ || 92 ||
[Analyze grammar]

tāvattāmrasvarūpastvaṃ mama pātraṃ bhaviṣyasi |
tattāmrabhājane mahyaṃ dīyate yat supuṣkalam || 93 ||
[Analyze grammar]

maṅgalyaṃ ca pavitraṃ ca mayā tāmraṃ kṛtaṃ tadā |
vaiśākhaśuklapakṣasya dvādaśyāṃ madhyage ravau || 94 ||
[Analyze grammar]

cakrādvadhamabhīpsan vai śubhaṃ kurvan madarthakam |
viṣṇusaṃstho bhaviṣyāmi kadā'hamiti cintayan || 95 ||
[Analyze grammar]

mama pūjāṃ tadā kṛtvā prārthayāmāsa māṃ prati |
muñca muñca prabho cakramapi vahnisamaprabham || 96 ||
[Analyze grammar]

ātmā me nīyatāṃ śīghraṃ nikṛttyā'ṅgāni sarvaśaḥ |
mayā cakreṇa ca hataḥ prāpto māṃ parameśvaram || 97 ||
[Analyze grammar]

tāmraṃ tanmāṃsamasrakva kataṃ mayā yathoditam |
tāmre prāpaṇakaṃ dadyāt pūjābhojanaprabhṛti || 98 ||
[Analyze grammar]

sikthe sikthe phalaṃ tasya śatāśvamedhajaṃ bhavet |
tāvadvarṣasahasrāṇi divyāni mama dhāmani || 99 ||
[Analyze grammar]

modate sa tato dhāma paraṃ yāti paraṃ padam |
evaṃ māṃ bhojayitvaiva tāmrapātre ca kānake || 100 ||
[Analyze grammar]

rājate'pi ca tāmbūlaṃ datvā visarjanaṃ caret |
ityevaṃ mama bhakto vai dīkṣito'rcanamācaret || 101 ||
[Analyze grammar]

nityaṃ nityaṃ priye lakṣmi satyaitacchaṃbhunoditam |
śravaṇātpaṭhanāccāpi mama dhāmagato bhavet || 102 ||
[Analyze grammar]

naro nārī tathā'nyaśca dīkṣāṃ labdhvā vidhānataḥ |
māṃ bhajedātmano mokṣaṃ labhejjanmaphalaṃ hi tat || 103 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛyugasantāne kanyādānaṃ bhāgavatīdīkṣāvidhānaṃ guḍākeśākhyāsurasya cakreṇa nāśottaraṃ tadvasā'sṛkprabhṛtīnāṃ tāmradhātutvaṃ cetyādinirūpaṇanāmā pañcasaptatyadhikapañcaśatatamo'dhyāyaḥ || 575 ||
[Analyze grammar]