Chapter 574

śrīnārāyaṇa uvāca |
śṛṇu lakṣmi tato gacchettīrthaṃ devamayaṃ śubham |
satīṃ śaṃbhurjagādaivaṃ nārmade codbhave sthitaḥ || 1 ||
[Analyze grammar]

sahasrayajñaṃ tīrthaṃ ca janārdanādhivāsitam |
kṛtvā yāmyāṃ ca nagarīṃ naiva paśyet kadācana || 2 ||
[Analyze grammar]

śuklatīrthaṃ tato gacchet sarvatīrthamayaṃ param |
tena śuklīkṛtā devā brahmaviṣṇumaheśvarāḥ || 3 ||
[Analyze grammar]

tīrthānāṃ koṭayastatra śuklatīrthe vasanti vai |
indraḥ śaṃbhuṃ snāpayitvā bilvapatraiḥ samārcayat || 4 ||
[Analyze grammar]

dikpālaiḥ śrīkṛṣṇanārāyaṇastatraiva pūjitaḥ |
kaśyapasyā''śramaṃ puṇyaṃ yatrāyutarṣimaṇḍalam || 5 ||
[Analyze grammar]

munīnāṃ koṭayaścāpi śukleśvaramupāsate |
sarvatīrthamayaṃ tīrthaṃ sarvadevamayaṃ hi tat || 6 ||
[Analyze grammar]

pitāmahena yatreṣṭo yajñe yajñeśvaraḥ purā |
sarvapāpāni naśyanti tasyā bhūmerniṣevaṇāt || 7 ||
[Analyze grammar]

agatyā tu mṛtānāṃ tanmuktidaṃ śuklatīrthakam |
yayātirnāma dharmātmā cakravartyabhavannṛpaḥ || 8 ||
[Analyze grammar]

iyāja sa mahāyajñaiḥ revāmadhumatīyujau |
yatra madhyeśvaraṃ liṃgaṃ mādhavo'haṃ narāyaṇaḥ || 9 ||
[Analyze grammar]

tatra snātā divaṃ mokṣaṃ yānti te na punarbhavāḥ |
yayātinā brāhmaṇaiścaikadā yajñaḥ pravartitaḥ || 10 ||
[Analyze grammar]

yatra nāsti hareḥ sthānaṃ śaṃbhoḥ sthānaṃ na vai tathā |
jaṭāsurastadā daityaśchidraṃ dṛṣṭvā hyupāyayau || 11 ||
[Analyze grammar]

asurairdhvaṃsito yajño yūpāśca vinipātitāḥ |
bhukto hutapuroḍāśaḥ somapānaṃ ca taiḥ kṛtam || 12 ||
[Analyze grammar]

aṣṭottaraśataṃ devā mṛgarūpeṇa nirgatāḥ |
rājā'straṃ pratijagrāha smṛtvā hariṃ haraṃ tadā || 13 ||
[Analyze grammar]

jaghāna dānavān yuddhe āhūtāśca punaḥ surāḥ |
punaḥ pravartito yajño haraviṣṇuprasādataḥ || 14 ||
[Analyze grammar]

hariṇā śaṃbhunā tatra pratyakṣeṇa svatejasā |
śuklīkṛtaṃ jagatsarvaṃ yathā golokamakṣaram || 15 ||
[Analyze grammar]

yayātinā vareṇāpi chanditau tu haro hariḥ |
tiṣṭhataṃ nityamatraiva divyarūpeṇa ceśvarau || 16 ||
[Analyze grammar]

tāvadārabhya tau śvetau dīpyamānau haro hariḥ |
vartete bhaktakalyāṇakarau tīrthe hi śuklake || 17 ||
[Analyze grammar]

yajñadānādikaṃ sarvamakṣayaṃ tatra jāyate |
ye ke'pi dehinastatra jalaṃ pāsyanti vā kvacit || 18 ||
[Analyze grammar]

te sarve dhāma yāsyanti śuklatīrthaprabhāvataḥ |
kāmayante tu yān kāmān tāṃstān prāpsyanti mānavāḥ || 19 ||
[Analyze grammar]

yayātistu gṛhaṃ tatra kārayitvā sumandiram |
tatra devau pratiṣṭhāpya nijarājyamupāgataḥ || 20 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
japan dhāma yayau cānte śrotā vaktā'pi mokṣagaḥ || 21 ||
[Analyze grammar]

dvīpeśvaraṃ tathā tīrthaṃ narmadāyāstaṭe sthitam |
tato gacchettu kārtikyāṃ vaiṣṇavaṃ tīrthamuttamam || 22 ||
[Analyze grammar]

nābhāgena stuto viṣṇuryatra pratyakṣatāṃ gataḥ |
tato gacchenmeghanādābhidhaṃ śrīśaṃkaraṃ priye || 23 ||
[Analyze grammar]

purā vai rāvaṇo rakṣaḥ paryaṭan pṛthivīmimām |
yayau devagirau yatra mayo nāmā'sti dānavaḥ || 24 ||
[Analyze grammar]

paulastyastaṃ mayaṃ prāha keyaṃ kanyā'sti kasya ca |
kinnāmadheyā tapati tapa ugraṃ tavā''śrame || 25 ||
[Analyze grammar]

mayaḥ prāha mama patnyāṃ tejovatyāṃ suputrikā |
janma prāpa ca patyarthaṃ tapate dāruṇaṃ tapaḥ || 26 ||
[Analyze grammar]

nāmnā mandodarīṃ viddhi gṛhāṇa svāgataṃ śubham |
rāvaṇastu tadā prāha rājā'haṃ dehi me'tra tām || 27 ||
[Analyze grammar]

mayo dadau sutāṃ tasmai vidhinā rāvaṇastataḥ |
yayau svaṃ siṃhalaṃ dvīpaṃ yatra sā suṣuve sutam || 28 ||
[Analyze grammar]

jātamātreṇa bālena ravaḥ kaṇṭhāt prakāśitaḥ |
meghavat tena nāmnā'sau meghanāda itikṛtaḥ || 29 ||
[Analyze grammar]

meghanādaḥ śaṃkarasya bhakto'bhavad yathā pitā |
bhāvayāmāsa deveśaṃ pārvatyā saha śaṃkaram || 30 ||
[Analyze grammar]

tapobhiścopavāsādyaiḥ kliśyate tatkalevaram |
meghanādastvekadā vai yayau kailāsaparvatam || 31 ||
[Analyze grammar]

liṃgaṃ pāṣāṇakaṃ nītvā prayayau nārmadaṃ taṭam |
meghanādena salile sthāpitaṃ pūjitaṃ tathā || 32 ||
[Analyze grammar]

meghāravākhyo grāmaśca garjanākhyastathā'paraḥ |
meghanādasamākhyātaṃ kṣetraṃ taccā'bhavattataḥ || 33 ||
[Analyze grammar]

śaṃkarastapasā tasya tatra pratyakṣatāṃ gataḥ |
tato muktiṃ gataḥ kālāntareṇa viṣṇughātitaḥ || 34 ||
[Analyze grammar]

atha dāruvanaṃ tīrthaṃ vartate puṇyadāyakam |
mātaliśca mahendrasya dārukākhyaḥ purā'bhavat || 35 ||
[Analyze grammar]

sa cāgatya jale tatra revāyāṃ sutapo'tapat |
abhajatparayā bhaktyā śaṃkaraṃ dārukeśvaram || 36 ||
[Analyze grammar]

śaṃbhustutoṣa pradadau varaṃ mantraṃ ca vaiṣṇavam |
oṃ namaḥ śrīkṛṣṇanārāyaṇāya svāmine svāhā || 37 ||
[Analyze grammar]

aṃśā'vataraṇe viṣṇoḥ sārathistvaṃ bhaviṣyasi |
toṣayitvā jagannāthaṃ tato yāsyasi sadgatim || 38 ||
[Analyze grammar]

tataḥ śaṃbhustirodhānaṃ yayau divaṃ ca mātaliḥ |
vāsudevasutaḥ kālāntare'bhavatsa mātaliḥ || 29 ||
[Analyze grammar]

kṛṣṇayogena vai muktiṃ gato golokadhāmani |
athā'nyad vartate tīrthaṃ karañjeśvaramuttamam || 40 ||
[Analyze grammar]

kaśyapāttu danoḥ putraḥ karañjastvabhavatpurā |
tapaścacāra yatrā'yaṃ karañjeśvarameva tat || 41 ||
[Analyze grammar]

mahādevaḥ prasanno'bhūd dadau tasmai varaṃ śubham |
atra karañjaśaṃbhurvai nivatsyāmi sutīrthake || 42 ||
[Analyze grammar]

tato yayau divaṃ so'pi karañjaḥ śaṃbhvanugrahāt |
atha vai pippaleśasya tīrthaṃ muktipradaṃ śubham || 43 ||
[Analyze grammar]

pippalādakṛtaṃ cāste gantavyaṃ tatra vai tataḥ |
guhyatīrthaṃ tato gacched bālahatyāvināśanam || 44 ||
[Analyze grammar]

govindākhyo'bhavadviprastasya bhāryā pativratā |
tasyāṃ sa janayāmāsa putramekaṃ susundaram || 45 ||
[Analyze grammar]

kadācid brāhmaṇaḥ so'pi kāṣṭhānyānetumutsukaḥ |
vanaṃ yātastato nītvā kāṣṭhabhāraṃ gṛhāgataḥ || 46 ||
[Analyze grammar]

gṛhe tamasi bālastu supto'bhūd yatra pārśvake |
kāṣṭhabhāraṃ nicikṣepa vipraścā'jñāta eva saḥ || 47 ||
[Analyze grammar]

bālo mamāra bhāreṇa dvijo jānāti naiva tat |
brāhmaṇyapi kṣaṇādūrdhvaṃ jñātavatī tathāpi tam || 48 ||
[Analyze grammar]

na śaśaṃsa bhayāttasya so'pi punarvanaṃ gataḥ |
tataḥ sā vilalāpā'tha govinde tvāgate punaḥ || 49 ||
[Analyze grammar]

maunamāsthāya ca dadau bhojanaṃ śayanaṃ dadau |
rātrau svapantaṃ kāntaṃ sā kṛmivyāptaṃ dadarśa ha || 50 ||
[Analyze grammar]

bālahatyātmakāḥ sarve kṛmayastaṃ vavalgire |
brāhmaṇī svapatiṃ rātrau pāpakṛmisamāvṛtam || 51 ||
[Analyze grammar]

śuśoca vīkṣya manasā bahirnaivā'prakāśayat |
atha prātarbrāhmaṇo'pi śīghramutthāya narmadām || 52 ||
[Analyze grammar]

pratyaraṇyaṃ yayau kāṣṭhānyānetuṃ tṛṣito'bhavat |
jalaṃ pītvā vanadāruṇyādāya niśithe gṛham || 53 ||
[Analyze grammar]

āyayau bhojanaṃ jagdhvā śayane nidrito'bhavat |
punarviprā kṛmiśūnyaṃ dṛṣṭvā dehaṃ svasvāminaḥ || 54 ||
[Analyze grammar]

kathanīyaṃ svāmine me sutasya maraṇaṃ prage |
vicāryetthaṃ ca suṣvāpa prātaścāha patiṃ tataḥ || 55 ||
[Analyze grammar]

putro'yaṃ ghātitaḥ kāṣṭhabhārairnātha tvayā tu tat |
gatehni pātakaṃ ghoraṃ kṛmirūpaṃ tanau tava || 56 ||
[Analyze grammar]

lokitaṃ pūrvaniśithe nātra rātrau kva tadgatam |
vada puṇyaṃ kṛtaṃ kiñcit kiṃ vā jātaṃ śubhaṃ prabho || 57 ||
[Analyze grammar]

vipraḥ prāha mayā pītaṃ jalaṃ nārmadamatra yat |
tadā mayā'pi te dṛṣṭāḥ kīṭā dehādviniḥsṛtāḥ || 58 ||
[Analyze grammar]

kimidaṃ kimidaṃ caitanmatvā cāhaṃ mumoha ca |
kintu nātyavadhāryaṃ tanmatvā tubhyaṃ na voditam || 59 ||
[Analyze grammar]

īśvarecchā sukhaduḥkhapravāhe kāraṇaṃ priye |
ehi putraṃ nidhāyaiva gacchāvo narmadātaṭam || 60 ||
[Analyze grammar]

snāpayitvā kariṣyāvaḥ saṃskāraṃ jalavāhanam |
iti nirṇīya tau putraśavamādāya maunataḥ || 61 ||
[Analyze grammar]

yayaturnarmadātīraṃ snāpayāmāsatuḥ śavam |
sasnatuśca tadā tau dvau tāvatputraḥ sacetanaḥ || 62 ||
[Analyze grammar]

saprāṇastvabhavacchīghraṃ brahmahatyā'pi bhūsurān |
vinirgatya drutaṃ naṣṭā jajvāla vahninā tadā || 63 ||
[Analyze grammar]

ityāścaryaṃ paraṃ dṛṣṭvā tutuṣaturdvijau sutam |
gṛhītvā svagṛhaṃ tuṣṭau yayaturnārmadād balāt || 64 ||
[Analyze grammar]

jīvanākhyaṃ paraṃ tīrthaṃ bālahatyāpraṇāśanam |
tatra snātvā parāṃ siddhiṃ labhennātra vicāraṇā || 65 ||
[Analyze grammar]

atha tīrthaṃ viśvarūpānarmadāsaṃgamātmakam |
tatra pūrvaṃ mahendrasya śāpādapsarasāṃ varā || 66 ||
[Analyze grammar]

viśvarūpā sārikā cā'bhavaccūtanivāsinī |
śaṃkaraṃ sā samupāsya pratyakṣaṃ prākaroddharam || 67 ||
[Analyze grammar]

yatra prādurbhūta īśastatra sā mokṣaṇaṃ gatā |
sārikārūpamutsṛjyā'psaro rūpavatī śubhā || 68 ||
[Analyze grammar]

jātā tatra nadī cāpi viśvarūpā'bhidhānikā |
śaṃkarasya prasādena saṃjātā narmadāṃgatā || 69 ||
[Analyze grammar]

tattīrthe śāpanāśārthaṃ snātavyamṛddhimicchatā |
śāpasya kāraṇaṃ citrāṃgadaṃ gandharvamuttamam || 70 ||
[Analyze grammar]

nartane devasadasi kāmayāmāsa vai hṛdā |
nṛtyaṃ kṣatiṃ tadā prāpat tena doṣeṇa śāpitā || 71 ||
[Analyze grammar]

sā ca svargaṃ punargatvā yayau kailāsamityapi |
atha rājā dharmasenaḥ sārikātīrthamāyayau || 72 ||
[Analyze grammar]

kailāsādhipatirbhakto vaiṣṇavo vājirājitaḥ |
narmadāyāṃ jale svāśvaṃ samāplāvya jalaṃ papau || 73 ||
[Analyze grammar]

tāvadaśvo'bhavattatra caturbhujo manoharaḥ |
divyayānasamārūḍho yayau vaikuṇṭhameva saḥ || 74 ||
[Analyze grammar]

viṣṇudūto nṛpaṃ prāha rājaṃste pṛṣṭhamāgatā |
śunī ceyaṃ jalaṃ pītvā snātvā cāyāti paśya tām || 75 ||
[Analyze grammar]

ityukto nṛpatiryāvacchunīṃ paśyati tāvatā |
śvadehaṃ sā parityajyā'psarovarā babhūva ha || 76 ||
[Analyze grammar]

vimāne tatra saṃruhya yayau vaikuṇṭhameva sā |
vyomavāṇī ca rājānaṃ tadovāca dhṛtiṃ vaha || 77 ||
[Analyze grammar]

śarīrajena kaṣṭena tapaḥsādhyā vibhūtayaḥ |
pādacārī hi gaccha tvaṃ parapādaiḥ samāgataḥ || 78 ||
[Analyze grammar]

pādacārī samāyād yastasya muktirdhruvā'tra bho |
bhūyo yātrāṃ prakuruṣe padbhyāṃ svanagarānnṛpa || 79 ||
[Analyze grammar]

tadā muktistu te syādvai puṇyamādāya yāhi bho |
śrutvā rājā dharmaseno yayau tataḥ punargṛham || 80 ||
[Analyze grammar]

trayodaśyāṃ pādacārī narmadāyāmupāgamat |
caturdaśyāṃ prage snātvā sārikeśaṃ dadarśa ha || 81 ||
[Analyze grammar]

viṣṇuṃ nārāyaṇaṃ kṛṣṇaṃ sākṣāt kṛtvā smaran harim |
yayau vimānamāruhya vaikuṇṭhaṃ pārameśvaram || 82 ||
[Analyze grammar]

atha tīrthaṃ candramatyā narmadāyāṃ samāgamam |
candreśvaraḥ sadāśaṃbhurvirājate'tra sarvadā || 83 ||
[Analyze grammar]

atha tīrthaṃ hāriṇaṃ ca lubdhakena mṛgaḥ purā |
hato madhyandine śreṣṭhaḥ kuraṃgo narmadātaṭe || 84 ||
[Analyze grammar]

patito gatajīvaśca divyadehadharo'bhavat |
vimānena tu divyena brahmalokaṃ jagāma saḥ || 85 ||
[Analyze grammar]

dṛṣṭvā vairāgyamāpanno lubdhako maraṇāya ha |
nirṇayaṃ kṛtavāṃstatra salile nimamajja ha || 86 ||
[Analyze grammar]

tatkṣaṇād divyadeho'sau gandharvapuramāyayau |
hariṇeśvaramevaitalliṃgaṃ lubdheśvaraṃ tathā || 87 ||
[Analyze grammar]

tīrthaṃ bāṇeśvaraṃ cāpi dhanurīśvaramityapi |
rameśvaraṃ pañcamaṃ ca tīrthaṃ muktipradaṃ hi tat || 88 ||
[Analyze grammar]

tatra devāya bhāvena pradadyādaṣṭapuṣpakam |
vārijaṃ saumyamāgneyaṃ vāyavyaṃ pārthivaṃ tathā || 89 ||
[Analyze grammar]

vānaspatyaṃ prājāpatyaṃ śivapuṣpaṃ tathā'ṣṭamam |
vārijaṃ salilaṃ jñeyaṃ saumyaṃ madhuyutaṃ payaḥ || 90 ||
[Analyze grammar]

āgneyaṃ dhūpadīpādi vāyavyaṃ candanādikam |
pārthivaṃ kandamūlādi vānaspatyaṃ phalādikam || 91 ||
[Analyze grammar]

prājāpatyaṃ śubhā'nnādi śivapuṣpamupāsanam |
ahiṃsā prathamaṃ puṣpaṃ dvitīyamindriyagrahaḥ || 92 ||
[Analyze grammar]

tṛtīyaṃ tu dayāpuṣpaṃ caturthaṃ smaraṇaṃ hareḥ |
pañcamaṃ sadguroḥ sevā ṣaṣṭhaṃ vai pitṛpūjanam || 93 ||
[Analyze grammar]

saptamaṃ svāminaḥ sevā'ṣṭamaṃ nārāyaṇāśrayaḥ |
ebhirvai prāpyate'nādikṛṣṇanārāyaṇaḥ prabhuḥ || 94 ||
[Analyze grammar]

rādhā vai prathamaṃ puṣpaṃ lakṣmīḥ puṣpaṃ dvitīyakam |
tṛtīyaṃ pārvatī puṣpaṃ prabhā puṣpaṃ caturthakam || 95 ||
[Analyze grammar]

pañcamaṃ māṇikī puṣpaṃ jayā puṣpaṃ ca ṣaṣṭhakam |
lalitā saptamaṃ puṣpaṃ maṃjulā puṣpamaṣṭamam || 96 ||
[Analyze grammar]

etā me puṣparūpā vai santi puṣpeṣu saṃsthitāḥ |
vinā tā naiva gṛhṇāmi puṣpāṇi padmaje kvacit || 97 ||
[Analyze grammar]

haṃsā puṣpaṃ ca saguṇā puṣpaṃ campā supuṣpakam |
dayā puṣpaṃ devikā saṃpuṣpaṃ muktā supuṣpakam || 98 ||
[Analyze grammar]

ṣoḍaśeṣūpacāreṣu sahasrāṇyapi ṣoḍaśa |
kalā me saṃpraviṣṭā hi santi gṛhṇāmi tāṃstadā || 99 ||
[Analyze grammar]

vastunā matsvarūpeṇa pūjāṃ gṛhṇāmi nityadā |
evaṃ viṣṇumayo bhūtvā pūjayet sa gatiṃ labhet || 100 ||
[Analyze grammar]

kṛtvā vai hariṇaṃ tīrthaṃ tato yāyāttu bhārgavam |
tīrthottamaṃ paraṃ tīrthaṃ yatra kailāsavāsinaḥ || 101 ||
[Analyze grammar]

andhakāsuramāhatya śaṃkareṇa samaṃ surāḥ |
narmadāyāṃ yadā snātuṃ tīrthārthaṃ samupāyayuḥ || 102 ||
[Analyze grammar]

uttaraṃ dakṣiṇaṃ kūlamavagāhya prayatnataḥ |
gatvā tu dakṣiṇe kūle parvataṃ bhṛgusaṃjñitam || 103 ||
[Analyze grammar]

haro bibheda śūlena tena bhinnaṃ rasātalam |
pātālānniḥsṛtā gaṃgā nāmnā bhogavatī hi sā || 104 ||
[Analyze grammar]

tatra tīrthaṃ samutpannaṃ śūlabhedābhidhaṃ tathā |
tatra brahmā svayaṃ viṣṇuḥ śivastiṣṭhanti sarvadā || 105 ||
[Analyze grammar]

yatra gaṃgā ca yamunā narmadā ca sarasvatī |
saṃgatā divyarūpeṇa śūlabhede vyavasthitāḥ || 106 ||
[Analyze grammar]

cakratīrthaṃ paraṃ tīrthaṃ tatra vai vartate sadā |
sarvatīrthamayaṃ tīrthaṃ sarvatīrthādhikaṃ param || 107 ||
[Analyze grammar]

sarvapuṇyādhikaṃ puṇyaṃ sarvaduḥkhaghnamuttamam |
bhṛgutīrthaṃ paraṃ śreṣṭhaṃ yatra lakṣmīrhi bhārgavī || 108 ||
[Analyze grammar]

viṣṇave bhṛguṇā dattā vivāhavidhinā purā |
vaikuṇṭhasadṛśaṃ tīrthaṃ bhṛgutīrthaṃ taducyate || 109 ||
[Analyze grammar]

kanyādānaṃ pūjanaṃ śrīhareḥ kāryaṃ hi tatsthale |
śravaṇātpaṭhanāccāsya dānapūjāphalaṃ labhet || 110 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne sahasrayajñatīrthaśuklatīrthadvīpeśvaratīrthameghanādatīrthadāruvanatīrthakaraṃjeśvaratīrthajīvanatīrthaviśvarūpārevāsaṃgamacandrāvatīnarmadāsaṃgamahariṇeśvarādiśūlabhedabhṛgu |
kṣetrāditīrthanirūpaṇa nāmā catuḥsaptatyadhikapañcaśatatamo'dhyāyaḥ || 574 ||
[Analyze grammar]