Chapter 573

śrīnārāyaṇa uvāca |
ākarṇaya mahālakṣmi śaṃkaroditamuttamam |
suvarṇadvīpatīrthaṃ ca narmadājalamadhyataḥ || 1 ||
[Analyze grammar]

hārīto vai maharṣistu purā kṛtayuge'tapat |
tatra haritavarṇasya kṛṣṇanārāyaṇasya ha || 2 ||
[Analyze grammar]

darśanaṃ jāyate ramyaṃ tapatāṃ yogināṃ tathā |
atha revottare kūle paryaṃko nāma parvataḥ || 3 ||
[Analyze grammar]

tatra pāpaharo viṣṇuḥ svayaṃ tiṣṭhati mādhavaḥ |
krośamātrapramāṇaṃ tat harikṣetraṃ prakīrtitam || 4 ||
[Analyze grammar]

tatra snātā mṛtāścāpi prayānti paramāṃ gatim |
narmadāyāmyabhāge ca māṇḍavyāśramamuttam || 5 ||
[Analyze grammar]

vibhāṇḍakaḥ ṛṣyaśṛṃgastathā'nye nyavasanpurā |
viśokānarmadāsaṃgo'śokeśvaraśca śaṃkaraḥ || 6 ||
[Analyze grammar]

śobhane nimnage tatra narmadāvindhyasaṃgamaḥ |
nivasanti mokṣadāśca devyastatra samāgame || 7 ||
[Analyze grammar]

harṣasiddhā ca sāvitrī devamātā'ditistathā |
devayānī brahmatanvī rohiṇī kambharāyaṇī || 8 ||
[Analyze grammar]

lopāmudrā tathendrāṇī dākṣāyaṇī prabhā dhruvā |
ratnāvalī tathā saṃjñā tārā siddhiśca pārvatī || 9 ||
[Analyze grammar]

lakṣmīḥ rādhā maṇikī ca haṃsā ca maṃjulā'mṛtā |
maṃgalā saguṇā'śokā svasvasvāmiyutāstu tāḥ || 10 ||
[Analyze grammar]

dayā jayā ca lalitā mauktikī hemacampikā |
kastūrikā ca savitā vasanti vindhyanārmade || 11 ||
[Analyze grammar]

saṃbhede'śokavanikākṣetre gauryā varaḥ kṛtaḥ |
āśvine dhavale caturdaśyāṃ vratavatī ca yā || 12 ||
[Analyze grammar]

aputriṇī tathā vandhyā durbhagā bhartṛvarjitā |
pañcaratnaphalaiḥ snātā divyavastubhirarcayet || 13 ||
[Analyze grammar]

snāpayecca jalaiḥ saṃbhojayet kumārikāstathā |
akhaṇḍasaubhāgyayutā putriṇī mānitā bhavet || 14 ||
[Analyze grammar]

ādau kṛte raviścandraḥ kāñcīpurapatirnṛpaḥ |
somavaṃśasamudbhāvo narmadātīravāsinam || 15 ||
[Analyze grammar]

maitrāvaruṇikaṃ vipramagastyaṃ prati saṃyayau |
śāṇḍilyena samaṃ rājā purohitena tena vai |
nanāmā'gastikaṃ vipraṃ pādau jagrāha tasya ca || 16 ||
[Analyze grammar]

agastiḥ kuśalaṃ sarvaṃ papraccha cāsanaṃ dadau |
rājā prāha tapataste darśanāt kilbiṣaṃ gatam || 17 ||
[Analyze grammar]

adya me saphalaṃ janma rājyaṃ jīvanamityapi |
kasmin sthāne yaje yajñaṃ yathā saṃsiddhyate kratuḥ || 18 ||
[Analyze grammar]

surāṇāṃ cā'kṣayā tṛptiḥ pitṝṇāṃ mokṣaṇaṃ bhavet |
muniḥ prāha kratoryogyā narmadā saptakalpagā || 19 ||
[Analyze grammar]

aśokavanikā yajñabhūmiḥ khyātā surārcitā |
tatra yajñaṃ vaiṣṇavaṃ tvaṃ vidhehi pārameṣyasi || 20 ||
[Analyze grammar]

rājā'gastiṃ saha nītvā yayāvaśokikāṃ sthalīm |
revāyā dakṣiṇe kūle yajñayūpāṃśca maṇḍapam || 21 ||
[Analyze grammar]

daśakrośānābhivyāpya kārayāmāsa bhūpatiḥ |
saptarṣayastathā vālakhilyāścānye'pi bhūsurāḥ || 22 ||
[Analyze grammar]

brahmadṛśyo lomaśaśca kuṃkumavāpikāsthitaḥ |
surāśca brāhmaṇāścānye yayuryajñaḥ pravartitaḥ || 23 ||
[Analyze grammar]

tṛptāstu devatāḥ sarvā viprāḥ saṃlabdhadakṣiṇāḥ |
tatastatra samāyāto durvāsā munirāṭ krudhā || 24 ||
[Analyze grammar]

uvāca nātra me sthānaṃ vaivasvatasya nāsti ca |
nāradaḥ parvato nāsti kālo mṛtyurna vidyate || 25 ||
[Analyze grammar]

citraguptastathā nāsti kathaṃ yajñaḥ pravartitaḥ |
durvāsasaṃ raviścandro natvā prāha tadā vacaḥ || 26 ||
[Analyze grammar]

ko me samartho vighnāya surāsuragaṇeṣvapi |
aśokeśvaradevasya narmadāyāḥ prasādataḥ || 27 ||
[Analyze grammar]

mayā nirvartito yajño yajñe pūjyāḥ samāgatāḥ |
bhavanto'pi mama pūjāṃ gṛhṇantu dakṣiṇāstathā || 28 ||
[Analyze grammar]

dadāmi vo na sandeho durvāsā nāradādayaḥ |
yo yaṃ kāmayate kāmaṃ taṃ tasmai pradadāmyaham || 29 ||
[Analyze grammar]

āgatāḥ prastutāstatra nāradādyā maharṣayaḥ |
toṣitā bhūbhṛtā te ca yatheṣṭādipradānataḥ || 30 ||
[Analyze grammar]

durvāsasā tataḥ punastvarthitaṃ śṛṇu padmaje |
pūrvaṃ pārvatīśāpena pāṭalīputravāsinaḥ || 31 ||
[Analyze grammar]

śaptā vai brāhmaṇāḥ śvāno bhūtvā bhramanti vai kṣitau |
teṣāṃ muktiṃ ca rājaṃstvaṃ kuru puṇyapradānakaiḥ || 32 ||
[Analyze grammar]

rājā prāha kathaṃ te vai śāpaṃ prāptā vadasva me |
durvāsāḥ prāha te viprāḥ purā valkaladhāriṇaḥ || 33 ||
[Analyze grammar]

nepāle vai paśupatiṃ pūjayituṃ yayustadā |
pupūjuḥ śaṃkaraṃ bhaktyā gauryā virahitaṃ ca te || 34 ||
[Analyze grammar]

ardhanārīśvare nārībhāgaṃ hitvā puṃmātrakam |
candanādyaiḥ samānarcuḥ pārvatī krodhatastadā || 31 ||
[Analyze grammar]

śaśāpa brāhmaṇāṃstāṃśca nāryardhabhedakāriṇaḥ |
varṣasahasraṃ sarve vai śvayoniṃ tu gamiṣyatha || 36 ||
[Analyze grammar]

atha śāpena te sarve śvayoniṃ pragatāstadā |
vartante tānmocaya tvaṃ vanādāhūya cātra vai || 37 ||
[Analyze grammar]

atha rājñā preṣitāśca kiṃkarāstadvanaṃ prati |
śvāno jātismarāḥ śīghraṃ kiṃkaraiḥ saha cāyayuḥ || 38 ||
[Analyze grammar]

aśokavanikābhūmiṃ prāha tānnṛpatirmudā |
aśokeśvaradevasya narmadāyāḥ prabhāvataḥ || 39 ||
[Analyze grammar]

mama dānaprabhāveṇa maharṣīṇāṃ prasādataḥ |
tyaktvā śvayoniṃ munayo brahmalokaṃ prayāntu vai || 40 ||
[Analyze grammar]

yuṣmatpāpaṃ śāparūpaṃ mayi sarvaṃ viśāmyatu |
tatkṣaṇānmuktaśāpāste kāmikaṃ yānamāsthitāḥ || 41 ||
[Analyze grammar]

bhūtvā maharṣayo divyā raviścandraṃ pratuṣṭuvuḥ |
tvaṃ mātā tvaṃ pitā'smākaṃ tvaṃ gururmokṣadāyakaḥ || 42 ||
[Analyze grammar]

evamuktvā yayuḥ svargaṃ satyalokātmakaṃ śubham |
durvāsādyāḥ ṛṣayo'pi praśaśaṃsurnṛpaṃ tadā || 43 ||
[Analyze grammar]

sādhu sādhu mahābhāga tvaṃ tu yajñataponidhiḥ |
nānyastvayā samaḥ kaścit somavaṃśodbhavo nṛpaḥ || 44 ||
[Analyze grammar]

prāṇatyāgo hi sukaraḥ puṇyatyāgo'ti duṣkaraḥ |
puṇyaṃ pradāsyasi kṣmābhṛt phalaṃ tvasyā'sti śāśvatam || 45 ||
[Analyze grammar]

varaṃ vṛṇīṣva bhadraṃ te yatte manasi vartate |
rājā''ha mama puṇyena janā durbuddhayo'pi ca || 46 ||
[Analyze grammar]

prāpnuvantu paraṃ lokaṃ vara eṣa mama priyaḥ |
durvāsādyāḥ ṛṣayo'pi tathā'stvityabhidhāya vai || 47 ||
[Analyze grammar]

antardhānaṃ yayuḥ sarve tato dharmaḥ samāgataḥ |
prasannaḥ san dharmarājo varaṃ dadāmi cāha tam || 48 ||
[Analyze grammar]

yamaloko jito rājan devaloko jitastvayā |
yajñapuṇyapradānena śvāno muktāḥ kṛtāstvayā || 49 ||
[Analyze grammar]

pṛthivyāṃ duṣkaraṃ karma yajñapuṇyapradānakam |
varayogyo'si rājendra vṛṇuṣva ca yathepsitam || 50 ||
[Analyze grammar]

raviścandrastadā prāha yamalokagatāśca ye |
pāpino duḥkhabhoktāro nārakā yātanārditāḥ || 51 ||
[Analyze grammar]

mama yajñaśatenaiva dānena tapasā tathā |
prayāntu tvatprasādena svargaṃ satyaṃ sukhāvaham || 52 ||
[Analyze grammar]

yamaḥ prāha tathaivā'stu puṇyaṃ te vardhate bahu |
paroddhāre'rpitaṃ puṇyaṃ sahasraguṇitaṃ bhavet || 53 ||
[Analyze grammar]

tena puṇyena rājendra yāhi tvaṃ brahmapattanam |
śāśvataṃ dhāma yannityānandabhṛtaṃ parākṣaram || 54 ||
[Analyze grammar]

yatastvayā kaśmalādvai mocitāḥ pāpayonayaḥ |
kṣatriyāḥ śataśo rājan anye cāpi sahasraśaḥ || 55 ||
[Analyze grammar]

evamuktvā dharmarājo datvā rājñe japāya vai |
oṃ namaḥ śrīkṛṣṇanārāyaṇāya svāmine namaḥ || 56 ||
[Analyze grammar]

ṣoḍaśākṣaramantraṃ ca yayau svabhavanaṃ mudā |
rājā kālena divyo'bhūd yayāvakṣarataḥ param || 57 ||
[Analyze grammar]

brahmadhāmottaraṃ dhāma paraṃ pumuttamasya yat |
śravaṇāt kīrtanādasya gosahasraphalaṃ bhavet || 58 ||
[Analyze grammar]

atha tīrthaṃ vāgurevāsaṃgamākhyaṃ tataḥ param |
brahmadatto'bhavad rājā kośalānāṃ praśāsakaḥ || 59 ||
[Analyze grammar]

sūryavaṃśī kratuṃ revāvāguyoge cakāra ha |
daśayojanaparyantā yajñabhūmirabhūttadā || 60 ||
[Analyze grammar]

asya yajñe cātitṛptāḥ pretā muktiṃ parāṃ gatāḥ |
śṛṇu pretāḥ kathaṃ jātāḥ ke'bhavaṃste purā yathā || 61 ||
[Analyze grammar]

kārtikyāṃ puṣkare tīrthe purā maharṣayo yayuḥ |
ayogandhaḥ svayaṃbhūśca puṇḍarīkākṣa ityapi || 62 ||
[Analyze grammar]

brahmā kāvyastathā hotā sadano vedagarbhakaḥ |
kṛtadhvanaḥ svastikaśca sāvitro vāmadevakaḥ || 63 ||
[Analyze grammar]

aghamarṣo brahmatejāstathā'nye brāhmaṇā yayuḥ |
sarve gārhasthyadharmasthāstṛṣṇāhīnā hi vaiṣṇavāḥ || 64 ||
[Analyze grammar]

teṣāṃ bhāryāḥ patidharmā bhartṛśuśrūṣaṇe ratāḥ |
cīravalkaladhāriṇyaḥ śākaśyāmākabhakṣikāḥ || 65 ||
[Analyze grammar]

dāridryadoṣasantaptā viṣaṇṇāścaikadā tu tāḥ |
viprasthitiṃ yajanaṃ yājanaṃ cādhyāpanaṃ tathā || 66 ||
[Analyze grammar]

adhyayanaṃ tathā dānaṃ pratigrahaṃ vyagarhayan |
ṣaṭsveteṣu viprakarmasvatikaṣṭaṃ vilokyate || 67 ||
[Analyze grammar]

bhūṣaṇaṃ rājasaṃ kiñcinnāpyate brāhmaṇagṛhe |
evaṃ vyagarhayaṃstāsāṃ śrutvā viprā maharṣayaḥ || 68 ||
[Analyze grammar]

viṣaṇṇavadanāstāsāṃ pūrayituṃ manogatam |
sastrīputrā yayuḥ sūryagrahe kṣetre ca kaurave || 69 ||
[Analyze grammar]

yatra dānaṃ dadāti sma hariścandro ravergrahe |
pratigrahecchayā samāgatān dṛṣṭvā sa bhūpatiḥ || 70 ||
[Analyze grammar]

prasannavadano dānasāphalyaṃ praśaśaṃsa ha |
dhanyā me saphalā yātrā kurukṣetre'dya vartate || 71 ||
[Analyze grammar]

kṣudhārtā duḥkhitāścāpi bālā vṛddhāḥ kṛśā''turāḥ |
valkalājinavastrāśca durbalā me hyupāgatāḥ || 72 ||
[Analyze grammar]

evamuktvā namaskṛtyaikaikasya ca pṛthakpṛthak |
lakṣaṃ lakṣaṃ hiraṇyasya tathā gāvaḥ sahasraśaḥ || 73 ||
[Analyze grammar]

sahasraṃ turagāṇāṃ ca dantināṃ śatamityapi |
sāptabhaumān gṛhānramyān hemaprākāratoraṇān || 74 ||
[Analyze grammar]

yānavāhanadāsāṃśca dāsīstathā samārpayat |
rājapratigrahaṃ prāptāḥ pāpabhoktāra eva te || 75 ||
[Analyze grammar]

ṣaṭkarmāṇi parityajya vilāseṣvabhavan hṛtāḥ |
kālāntare mṛtā jātāḥ pretarūpā bhayāvahāḥ || 76 ||
[Analyze grammar]

pratigrahaprabhāvo'yaṃ viprasya patanaṃ yataḥ |
te ca jātismarāḥ sarve dānadagdhāḥ sabāndhavāḥ || 77 ||
[Analyze grammar]

duḥkhinastvāgatāstīrthaṃ puṣkaraṃ yatra nāradaḥ |
badarīṃ prati saṃyāsyannirgatastatpradeśataḥ || 78 ||
[Analyze grammar]

pretarūpān munīn dṛṣṭvā viṣādaṃ paramaṃ gataḥ |
papraccha ca kathaṃ pretā jātā iti tataśca te || 79 ||
[Analyze grammar]

ūcurvayaṃ hariścandranṛpatervai pratigraham |
kurukṣetre labdhavanto lobhena tatphalaṃ gatāḥ || 80 ||
[Analyze grammar]

pretabhāvaṃ samāpannā mokṣo'smākaṃ vidhīyatām |
śrutvā tānnāradaḥ prāha narmadāṃ yāta pāvanīm || 81 ||
[Analyze grammar]

vāgīśaṃ ca puraṃ tatra narmadātaṭamāśritam |
adhvare brahmadattasya mokṣaṇaṃ vo bhaviṣyati || 82 ||
[Analyze grammar]

ityuktvā nārado nārāyaṇāśramaṃ yayau tataḥ |
pretā yayustamuddeśaṃ vāgīśapuramuttamam || 83 ||
[Analyze grammar]

snātvā sūryaṃ hariṃ śaṃbhuṃ pūjayitvā yayurmakham |
makhaprāsādikaṃ prāśya pāpahīnāḥ surūpiṇaḥ || 84 ||
[Analyze grammar]

babhūvustān vilokyaitān vimalān sūryavarcasaḥ |
brahmadattādayo natvā papracchuryūyamatra ke || 85 ||
[Analyze grammar]

kathaṃ pretatvamāpannā babhūva muktatā katham |
atha tairnijavṛttāntastebhyastatra niveditaḥ || 86 ||
[Analyze grammar]

cakruścopari rājñaste puṣpavṛṣṭiṃ divaṃgatāḥ |
brahmayānaṃ samāruhya brahmalokaṃ yayustataḥ || 87 ||
[Analyze grammar]

rājānaṃ śaṃśamānā vai makhaṃ ca nārmadaṃ jalam |
devā viprā yayurnaijaṃ deśaṃ yajñe pratoṣitāḥ || 88 ||
[Analyze grammar]

śravaṇātkīrtanādasya gosahasraphalaṃ bhavet |
anyaccāpi sahasrāvartakaṃ tīrthaṃ pravidyate || 89 ||
[Analyze grammar]

tatra snātasya vidhivad vṛṣotsargaphalaṃ bhavet |
karāvanaṃ tathā tīrthaṃ saugandhikaṃ vanaṃ tathā || 90 ||
[Analyze grammar]

tatra sarasvatī cāste pitruddhārakarī śubhā |
triśūlākhyaṃ tathā'nyacca tīrtha gaṇeśatāpradam || 91 ||
[Analyze grammar]

brahmodaṃ cāparaṃ tīrthaṃ saptarṣisnānakāritam |
kapiñjalo muniśreṣṭho havyavāhaśca devatā || 92 ||
[Analyze grammar]

bhagavān devayānaśca viśvāvasurmahāmuniḥ |
asya tīrthasya māhātmyād brahmalokamupāgatāḥ || 93 ||
[Analyze grammar]

vasvāśramaṃ tathā ramyaṃ tīrthaṃ paramamasti ca |
saptasārasvataṃ tīrthaṃ yatra kṛṣṇanarāyaṇaḥ || 94 ||
[Analyze grammar]

sākṣād virājate brahmā stutiṃ tasya cakāra ha |
anādiśrīkṛṣṇanārāyaṇo bhavatu me gatiḥ || 95 ||
[Analyze grammar]

akṣarādhipatirmuktapatiḥ śrīpuruṣottamaḥ |
rādhāpatiśca lakṣmīśaḥ pārvatīśo'stu me gatiḥ || 96 ||
[Analyze grammar]

jayāpatirlaliteśo māṇikīśo'stu me gatiḥ |
vāsudevaḥ svayaṃ svāmī nārāyaṇo'stu me gatiḥ || 97 ||
[Analyze grammar]

bhūmā viṣṇurmahākṛṣṇo vairājeśo'stu me gatiḥ |
upendro haṃsanāthaśca bhūśrīśo'stu ca me gatiḥ || 98 ||
[Analyze grammar]

prabhāpatirmaṃjuleśo haṃseśaḥ saguṇāpatiḥ |
kāṃbhareyaśca bhagavān harikṛṣṇo'stu me gatiḥ || 99 ||
[Analyze grammar]

hṛṣīkeśo mādhavaśca devīnātho'stu me gatiḥ |
śaṃkhacakragadāpadmāyudhaḥ śrīgaruḍāsanaḥ || 100 ||
[Analyze grammar]

sarvāvirbhāvamūlaṃ ca janārdano'stu me gatiḥ |
paramātmā parabrahma gopālabālakaḥ prabhuḥ || 101 ||
[Analyze grammar]

viśvātmā cāntarātmā ca hṛdayastho'stu me gatiḥ |
bhaktasya bhagavān kṛṣṇaḥ prīyatāṃ savitāpatiḥ || 102 ||
[Analyze grammar]

sītāramāprapuṣpeśo bhaktapatiḥ prasīdatu |
janmaprabhṛti yatkiñcidarjitaṃ me tvadarpitam || 103 ||
[Analyze grammar]

nānyaḥ puṇyataro devo nāsti viṣṇuparaṃ tapaḥ |
nāsti svāmiparaṃ jñānaṃ sarvaṃ svāmimayaṃ jagat || 104 ||
[Analyze grammar]

etatstavaraveṇāpi janā yāsyanti mokṣaṇam |
śravaṇātkīrtanādasya hayamedhaphalaṃ labhet || 105 ||
[Analyze grammar]

brahmā stutvā jale snātvā kārtikyāṃ yānamāsthitaḥ |
anādiśrīkṛṣṇanārāyaṇaṃ raṭan yayau divam || 106 ||
[Analyze grammar]

etat tīrthaṃ kṛṣṇanārāyaṇodaṃ mokṣadaṃ smṛtam |
śaṃbhūditaṃ ca yatsatyai mayā lakṣmi tavoditam || 107 ||
[Analyze grammar]

iti śrīlakṣmīnārāyaṇīyasaṃhitāyā prathame kṛtayugasantāne suvarṇadvīpatīrthaṃ viśokānarmadāsaṃgamaḥ aśokeśvare raviścandrayajñe pretoddhāraḥ vāgurevāsaṃgamaḥ śrīkṛṣṇanārāyaṇatīrthādi cetinirūpaṇanāmā trisapta |
tyadhikapañcaśatatamo'dhyāyaḥ || 573 ||
[Analyze grammar]