Chapter 563

śrīlakṣmīruvāca |
bhagavan madhudhenvādi kathaṃ deyaṃ ca me vada |
kiṃ puṇyaṃ ko vidhistatra godānaṃ ca kiyad bhavet || 1 ||
[Analyze grammar]

śrīnārāyaṇa uvāca |
śṛṇu lakṣmi kathayāmi purā rājā'bhavanmahān |
vinītāśveti vikhyāto bahuyāgakaraḥ prabhuḥ || 2 ||
[Analyze grammar]

sa sarvamedhamārebhe tena gāvo dvipā vasu |
svarṇaṃ sarvaṃ ca viprebhyo dattāni bhavanāni ca || 3 ||
[Analyze grammar]

nā'nnaṃ tena tadā dattaṃ svalpaṃ matvā jalaṃ tathā |
atha gaṃgātaṭe mṛtvā sa kālena yayau divam || 4 ||
[Analyze grammar]

tasya deho mṛttikāyāṃ nikṣipto gahvare dvijaiḥ |
puṇyāṃ gaṃgāmṛdaṃ jñātvā pṛthvyāṃ nihita eva ha || 5 ||
[Analyze grammar]

athā'yaṃ bhūpatiḥ svarge kṣudhitastṛṣitastathā |
divyavimānavāso'pi pṛthvyāṃ bhojyārthamāyayau || 6 ||
[Analyze grammar]

yatra kalevaraṃ naijaṃ tat khanitvā cakhāda saḥ |
hotānāmnā tadā rājñaḥ purohito dadarśa tam || 7 ||
[Analyze grammar]

khādantaṃ nijadehaṃ ca papraccha kiṃ karoṣi vai |
rājā prāha na me svarge bhojanaṃ copatiṣṭhati || 8 ||
[Analyze grammar]

vadā'tra kāraṇa me kiṃ śrutvā hotā hyuvāca tam |
hotā prāha tvayā pūrvaṃ jalānnānāṃ pradānakam || 9 ||
[Analyze grammar]

svalpaṃ matvā kṛtaṃ naiva tenā'mṛtaṃ na cāpyate |
atra karmakṣitau yadyat kṛtaṃ dattamavāpyate || 10 ||
[Analyze grammar]

na dattaṃ nopatiṣṭheta tasmād dehi jalānnakam |
tiladhenuṃ śubhāṃ dehi jaladhenuṃ ca satama || 11 ||
[Analyze grammar]

ghṛtadhenuṃ rasadhenuṃ dadhidhenuṃ pradehi ca |
dugdhadhenuṃ madhudhenuṃ śarkarādhenumityapi || 12 ||
[Analyze grammar]

annadhenuṃ vrīhidhenuṃ svarṇagāṃ ca pradehi vai |
vastradhenuṃ kapilāṃ ca savatsāṃ saṃpradehi ca || 13 ||
[Analyze grammar]

evamanyāni dānāni dehi tatphalamāpnuhi |
annadānena ca svarge kṣudhayā varjito bhaveḥ || 14 ||
[Analyze grammar]

vidhānaṃ tiladhenośca tvaṃ śṛṇuṣva narādhipa |
caturbhiḥ kuḍavaiścātra prastha ekaḥ prakīrtitaḥ || 15 ||
[Analyze grammar]

dhenuḥ ṣoḍaśabhiḥ kāryā caturbhirvatsikā bhavet |
nāsā gandhamayī tasyā jihvā guḍamayī śubhā || 16 ||
[Analyze grammar]

pucchaṃ sūtramayaṃ tasyā vastrayugmaṃ tu śullarī |
netre muktāmaye dantā phalātmakāśca kambalam || 17 ||
[Analyze grammar]

galakambalarūpaṃ ca navanītamayāḥ stanāḥ |
svarṇaśṛgīṃ raupyakhurāṃ ghaṇṭā''bharaṇabhūṣitām || 18 ||
[Analyze grammar]

kāṃsyadohāṃ caturthāṃśavatsikāsahitāṃ śubhām |
kṛṣṇājīnayutāṃ sarvaratnayuktā ca nanditām || 19 ||
[Analyze grammar]

sarvauṣadhisamāyuktāṃ mantrapūjāṃ tu dāpayet |
annaṃ me jāyatāmanyatpānaṃ sarvarasāstathā || 20 ||
[Analyze grammar]

sarvaṃ sampādayā'smākaṃ tiladheno namo'stu te |
śarkarāsahitāṃ tvāṃ pradadāmi vipramūrtaye || 21 ||
[Analyze grammar]

evaṃ dattāṃ vidhānena gṛhṇīyād brāhmaṇottamaḥ |
haste pucchaṃ jalaṃ cāpi puṣpaṃ tandulamityapi || 22 ||
[Analyze grammar]

gandhaṃ gṛhītvā netre ca saṃspṛśya gā samarpayet |
gomayaṃ maṇḍalaṃ kṛtvā dātā dadyād vidhānataḥ || 23 ||
[Analyze grammar]

pradakṣiṇaṃ namaskāraṃ kṛtvā dadyād dvijātaye |
dvijo'haṃ tvāṃ pragṛhṇāmi kuṭumbārthaṃ subhaktimān || 24 ||
[Analyze grammar]

bhajasva kāmān māṃ devi tiladheno namo'stu te |
dātre sarvaṃ bhakṣyabhojyaṃ pānādi dehi yatra saḥ || 25 ||
[Analyze grammar]

evaṃ dhenuḥ pradātavyā tena bhuktiśca mokṣaṇam |
hotā prāha tathā dehi jaladhenuṃ vidhānataḥ || 26 ||
[Analyze grammar]

gocarmamātraṃ bhūbhāgaṃ gomayenopalepayet |
tatra vāripūritaṃ taṃ ghaṭaṃ pūjyā'kṣatādibhiḥ || 27 ||
[Analyze grammar]

taṃ dhenuṃ kalpayitvaiva durvāsragbhirvibhūṣitam |
pañcaratnayutaṃ kṛtvā saptadhānyayutaṃ tathā || 28 ||
[Analyze grammar]

godhūmāstaṇḍulāścāpi yavāśca caṇakāstathā |
māṣā mudgāśca kaṃgvaśca saptadhānyamiti nyaset || 29 ||
[Analyze grammar]

ghṛtapātraṃ dadhipātraṃ madhupātraṃ ca śarkarām |
sthāpayedvai caturdikṣu tathā cāsye suvarṇakam || 30 ||
[Analyze grammar]

muktāphale cakṣuṣī ca śṛṃge candanakāṣṭhaje |
tāmrapṛṣṭhaṃ kāṃsyadohaṃ darbhān romāṇi kalpayet || 31 ||
[Analyze grammar]

tāmrapatraśravaṇe ca pucchaṃ sutramayaṃ tathā |
kambale puṣpamālāṃ ca guḍāsyāṃ śuktidantikām || 32 ||
[Analyze grammar]

jihvāṃ śarkarayā kṛtvā navanītena ca stanān |
ikṣupādāṃstathā kṛtvā gandhapuṣpopaśobhitām || 33 ||
[Analyze grammar]

kṛṣṇājinopari nyasya vastreṇā''cchāditāṃ tu tām |
gandhapuṣpaiḥ samabhyarcya pūrvamukhāṃ samarpayet || 34 ||
[Analyze grammar]

sādhuviprāya rājendra śrotriyāyā''hitāgnaye |
tapovṛddhāya pātrāya dātavyā ca kuṭumbine || 35 ||
[Analyze grammar]

yo dadāti naro rājan yaḥ paśyati śṛṇoti ca |
pratigṛhṇāti yo vipro mucyate sarvapātakāt || 36 ||
[Analyze grammar]

brahmahā pitṛhā goghnaḥ surāpo gurutalpagaḥ |
vimuktaḥ sarvapāpaistu viṣṇulokaṃ sa gacchati || 37 ||
[Analyze grammar]

jaladhenvā vatsikāṃ ca kalaśe kalpayecchubhām |
jalāhārastvekadinaṃ tiṣṭhedvai jaladhenudaḥ || 38 ||
[Analyze grammar]

grāhako'pi trirātraṃ ca tiṣṭhejjalena dharmavān |
yatra kṣīravahā nadyo madhupāyasakardamāḥ || 39 ||
[Analyze grammar]

yatra tvapsarasāṃ gītaṃ tatra yānti jalapradāḥ |
yadvā pāpavinirmuktā viṣṇusāyujyamāpnuyuḥ || 40 ||
[Analyze grammar]

atha dadyād rasadhenumaikṣavasya rasasya vai |
ghaṭaṃ prapūrya saṃpūjya pūrvavad vatsikāṃ tathā || 41 ||
[Analyze grammar]

caturthāṃśā kalpayitvā saptavrīhisamanvitām |
sarvopaskarasaṃyuktāṃ tilapātrādisayutām || 42 ||
[Analyze grammar]

dātā ca grāhakaścāpi tvekakālayabhojanaḥ |
somapānaphalaṃ tasya paśyato'pi tathā phalam || 43 ||
[Analyze grammar]

daśa pūrvān parāṃścāpi svātmānaṃ caikaviṃśakam |
prāpayetparamaṃ sthānaṃ svargānnāvartate punaḥ || 44 ||
[Analyze grammar]

dadasva ca mahārāja paraṃ sthānamavāpnuhi |
guḍadhenuṃ tathā kṛtvā savatsāṃ kāṃsyadohinīm || 45 ||
[Analyze grammar]

sauvarṇaṃ mukhaśṛṃge ca dantāśca maṇimauktikaiḥ |
grīvā ratnamayī tvasyā ghrāṇaṃ gandhamayaṃ tathā || 46 ||
[Analyze grammar]

śṛṃge tvagurukāṣṭhena pṛṣṭhaṃ tāmramayaṃ tathā |
pucchaṃ kṣaumamayaṃ tasyāḥ sarvābharaṇabhūṣitām || 47 ||
[Analyze grammar]

ikṣupādāṃ raupyakhurāṃ kambalaṃ paṭṭasūtrakam |
ācchādya paṭṭasūtreṇa ghaṇṭācāmaraśobhitām || 48 ||
[Analyze grammar]

praśastapatraśravaṇāṃ navanītastanīṃ vratī |
phalaiḥ saṃśobhayitvā ca dadyād viprāya bhāvataḥ || 49 ||
[Analyze grammar]

gandhapūṣpaiḥ pūjayitvā dattvā chatraṃ ca pāduke |
guḍadheno pradattā tvaṃ sarvasampatpradā bhava || 50 ||
[Analyze grammar]

dānādasmācca me mātarbhakṣyabhojyaṃ prayaccha vai |
vācā kṛtaṃ karmakṛtaṃ manasā yad vicintitam || 51 ||
[Analyze grammar]

mānakūṭaṃ tulākūṭaṃ kanyāgo'rthe hyudāhṛtam |
anṛtaṃ nāśamāyātu guḍadheno dvijārpitā || 52 ||
[Analyze grammar]

guḍadhenoḥ pradānāttu saubhāgyamakhilaṃ labhet |
daśa dvādaśasāhasrā daśa cāṣṭau ca janmasu || 53 ||
[Analyze grammar]

na śokaduḥkhadaurgatyaṃ tasya saṃjāyate kvacit |
tadvaśca śarkarādhenuṃ dehi bhāracatuṣṭayam || 54 ||
[Analyze grammar]

savatsikāṃ vibhūṣāḍhyāṃ prapūjya pūrvavad vratī |
gāṃ pūrvābhimukhīṃ kṛtvā vatsāmuttarato nyaset || 55 ||
[Analyze grammar]

haste tu dakṣiṇāṃ datvā gandhapuṣpāḍhyacandanām |
dhenuṃ samarpayet tasya mukhaṃ ca na vilokayet || 56 ||
[Analyze grammar]

ekāhaṃ śarkarāhāro brāhmaṇastridinaṃ vaset |
sarvakāmasamṛddhastu jāyate nātra saṃśayaḥ || 57 ||
[Analyze grammar]

madhudhenuṃ pravakṣyāmi sapātakanāśinam |
dhenuṃ madhumayīṃ kṛtvā sampūrṇaghaṭaṣoḍaśām || 58 ||
[Analyze grammar]

caturthena tathāṃśena vatsikā parikalpayet |
pūrvoktāṃgaiḥ samāyuktāṃ saptadhānyānvitāṃ tathā || 59 ||
[Analyze grammar]

tilapātracatuṣṭyenānvitāṃ puṣpapūjitām |
dravyabrāhmaṇasampattiṃ dṛṣṭvā tāṃ pratipādayet || 60 ||
[Analyze grammar]

prīyantāṃ pitaro devā madhudheno namo'stu taiे |
ahaṃ gṛhṇāmi tvāṃ devi kuṭumbārthe namo'stu te || 61 ||
[Analyze grammar]

datvā dānaṃ pāyasena madhunā ca dinaṃ nayet |
yatra nadyo madhuvahāstatra gacchanti dhenudā || 62 ||
[Analyze grammar]

daśapūrvān daśa parānātmānaṃ caikaviṃśakam |
nayate viṣṇusāyujyaṃ madhudhenupradānataḥ || 63 ||
[Analyze grammar]

kṣīradhenuṃ ca te vacmi tāṃ nibodha pradehi ca |
gomayairliptabhūbhāge kuśeṣu mṛgacarmaṇi || 64 ||
[Analyze grammar]

gorekhāṃ paritaḥ kṛtvā kṣīrakuṃbhaṃ nyasecchubham |
vatsākhyaṃ kalaśaṃ cāpi pūrvoktāṃgāni sarvathā || 65 ||
[Analyze grammar]

vastūni nyasya dhānyāni tilapātrāṇi dikṣu ca |
vinyasya pūjitāṃ dadyāt kṣīradhenuṃ dvijāya vai || 66 ||
[Analyze grammar]

dīyamānāṃ prapaśyanti te'pi yānti parāṃ gatim |
ṣaṣṭivarṣasahasraṃ tu cendraloke mahīyate || 67 ||
[Analyze grammar]

pitrādibhistu sahito brahmaṇo bhavanaṃ vrajet |
tato yāti paraṃdhāma viṣṇurūpadharo bhavan || 68 ||
[Analyze grammar]

dadhidhenuḥ pradātavyā dadhikuṃbhātmikāṃ śubhām |
saptadhānyānvitāṃ vatsāyutāṃ śṛṃgāritāṃ tathā || 69 ||
[Analyze grammar]

pūjitāṃ maṇḍitāṃ kṛtvā brāhmaṇāya daded vratī |
ekāhārī vratī syāt tridinaṃ tiṣṭhettu vai dvijaḥ || 70 ||
[Analyze grammar]

dadhnā tena paraṃ lokaṃ yāti dātā'rthitā'pi ca |
navanītamayīṃ dhenuṃ dadyād vatsāyutāṃ śubhām || 71 ||
[Analyze grammar]

pūrvavatsarvaśobhāḍhyāṃ sarvāṃgaparikalpitām |
pūjitāṃ dhānyayuktāṃ ca brāhmaṇāya samarpayet || 72 ||
[Analyze grammar]

purā devāsuraiḥ sarvaiḥ sāgarasya tu manthane |
utpannaṃ divyamamṛtaṃ navanītamidaṃ śubham || 73 ||
[Analyze grammar]

āpyāyanaṃ tu bhūtānāṃ navanīta namostu te |
lavaṇadhenuṃ vakṣyāmi dātavyā śubhamicchatā || 74 ||
[Analyze grammar]

ṣoḍaśaprasthamānāṃ gāṃ vatsāṃ caturthapādikām |
sarvaśṛṃgārasaṃyuktāṃ pūrvoktāṃgaprapūritām || 75 ||
[Analyze grammar]

grahanakṣatrapīḍāyāṃ brāhmaṇāya pradāpayet |
imāṃ gṛhāṇa bho vipra rudrarūpāṃ namo'stu te || 76 ||
[Analyze grammar]

kāmaṃ pūraya me devi rūdrarūpe namo'stu te |
dinaṃ vratī lavaṇāśī trirātraṃ brāhmaṇo bhavet || 77 ||
[Analyze grammar]

atha kārpāsakīṃ dhenuṃ dadyāt sukhapraśāntidām |
grahapīḍāsu cogrāsu duḥsvapne'riṣṭadarśane || 78 ||
[Analyze grammar]

puṇyeṣvāyataneṣveva dadyāt prāgvat subṛṃhitām |
caturbhāramitenaiva kalpitāṃ vatsikāyutām || 79 ||
[Analyze grammar]

pūjitāṃ sopakaraṇāṃ sarvāṃgāṃ vai samarpayet |
rakṣāṃ kuru mahādevi paratrā'tra namostu te || 80 ||
[Analyze grammar]

dhānyadhenuḥ pradātavyā vrīhidhenustathā śubhā |
aṃgāni pūrvavat kṛtvā pūjāyitvā ca tāṃ tataḥ || 81 ||
[Analyze grammar]

dīpaṃ pradakṣiṇaṃ kṛtvā prīyatāṃ madhusūdanaḥ |
sarvalakṣmīmayīdheno dhānyarūpe namo'stu te || 82 ||
[Analyze grammar]

evamuccārya tāṃ dhenuṃ brāhmaṇāya nivedayet |
yāvacca pṛthivī sarvā vasuratnāni bhūpate || 83 ||
[Analyze grammar]

tāvatpuṇyaṃ samadhikaṃ vrīhidhenośca tatphalam |
iha loke ca saubhāgyamāyurārogyavardhanam || 84 ||
[Analyze grammar]

vimānenā'rkavarṇena cānte yāti harergṛham |
athātaḥ saṃpravakṣyāmi kapilāṃ dhenumuttamām || 85 ||
[Analyze grammar]

yatpradānājjano yāti brahmalokaṃ sanātanam |
pūrvoktena vidhānena dadyād dhenuṃ savatsikām || 86 ||
[Analyze grammar]

sarvālaṃkārasaṃyuktāṃ sarvaratnādimaṇḍitām |
kapilāyāḥ śiro grīvā sarvatīrthāni bhūpate || 87 ||
[Analyze grammar]

kapilā śiraso vāri prātaryo vandati sa ca |
dagdhatriṃśajjanmapāpo bhavatyeva supuṇyavān || 88 ||
[Analyze grammar]

kalya pradakṣiṇaṃ kuryād bhūpradakṣiṇapuṇyadam |
pradakṣiṇaikyaṃ nirdahed daśajanmotthapāpakam || 89 ||
[Analyze grammar]

kapilāmūtrasaṃsnāto yāvattīrthāpluto bhavet |
gosahasreṇa tulyaṃ vai kapilādānamucyate || 90 ||
[Analyze grammar]

mṛtabhasma ca jighrāti kapilā yāvadeva ha |
tāvatpreto mahāpuṇyaiḥ pūryate divivāsakṛt || 91 ||
[Analyze grammar]

gavāṃ kaṇḍūyanaṃ rakṣā gośatārpaṇasadṛśam |
tṛṇodakādikaṃ dattaṃ gomedhaphaladaṃ matam || 12 ||
[Analyze grammar]

suvarṇakapilā caikā dvitīyā gaurapiṃgalā |
tṛtīyā cāpi raktākṣī caturthī guḍapiṃgalā || 93 ||
[Analyze grammar]

pañcamī bahuvarṇā syāt ṣaṣṭhī ca śvetapiṃgalā |
saptamī śvetapiṅgākṣī tvaṣṭamī kṛṣṇapiṃgalā || 94 ||
[Analyze grammar]

navamī pāṭalā bodhyā daśamī pucchapiṃgalā |
ekādaśī kṣuraśvetā tvetāsāṃ cottamā matā || 95 ||
[Analyze grammar]

kapilā hyagnihotrārthe yajñārthe ca surakṛte |
uddhṛtya sarvatejobhirbrahmaṇā nirmitā purā || 96 ||
[Analyze grammar]

dānānāmuttamaṃ dānaṃ nidhīnāṃ hyetadakṣayam |
hotavyānyagnihotrāṇi sāyaṃ prātardvijātibhiḥ || 7 ||
[Analyze grammar]

kapilāyā ghṛteneha dadhnā kṣīreṇa sarpiṣā |
nirvṛtyante'tithipūjādīni hūyanta iṣṭakāḥ || 98 ||
[Analyze grammar]

agnihotrāṇi mantraiśca vividhairbrahmavedibhiḥ |
kapilā yā piṃgalākṣī sarvasaukhyapradāyinī || 99 ||
[Analyze grammar]

siddhibuddhipradā dhenuḥ sarvalakṣaṇalakṣitā |
sarvāstāstārayantyeva dattā nadyoḥ samāgame || 100 ||
[Analyze grammar]

agnipucchā cāgnimukhī cāgnilomā'nalaprabhā |
tathā''gnāyī śvetakhurā suvarṇā nāma sā matā || 101 ||
[Analyze grammar]

āsannaprasavāṃ dhenuṃ dānārthaṃ pratipālayet |
jāyamānasya vatsasya mukhaṃ yonyāṃ pradṛśyate || 102 ||
[Analyze grammar]

tāvat sā pṛthivī jñeyā yāvadgarbhaṃ na muñcati |
kapilā'rdhaprasūtā sā dātavyā vaiṣṇavāya vai || 103 ||
[Analyze grammar]

dhenvā yāvanti romāṇi savatsāyā bhavanti ca |
tāvatyo varṣakoṭyastu brahmaloke vasanti te || 104 ||
[Analyze grammar]

brāhmaṇasya kare datvā suvarṇaṃ pucchamityapi |
udakaṃ ca kare datvā vācayet pradadet tathā || 105 ||
[Analyze grammar]

samudravasanā tena saśailagrāmaśobhanā |
ratnapūrṇā kṣitirdattā bhavatyeva na saṃśayaḥ || 106 ||
[Analyze grammar]

dātā prayāti pitṛbhirviṣṇvākhyaṃ ca paraṃ padam |
yaścobhayamukhīṃ dadyāt sarvapāpanivṛttaye || 107 ||
[Analyze grammar]

taddine pāyasāhāro jalāhāro'thavā vaset |
dadyādvai sudhanaṃ cāpi vittaśāṭhyaṃ vivarjayet || 108 ||
[Analyze grammar]

imāṃ gṛhṇobhayamukhīmubhayatra śamastu vai |
dade vaṃśavivṛddhyarthaṃ sadā svastikarī bhava || 109 ||
[Analyze grammar]

pratigṛhṇāmi tvāṃ dheno kuṭumbārthe viśeṣataḥ |
śubhaṃ bhavatu me nityaṃ devadhātri namo'stu te || 110 ||
[Analyze grammar]

me nityaṃ svasti bhavatu viṣṇurūpe namo'stu te |
oṃ dyaustvāṃ dadātu bhūmiṃ svayaṃ pratigṛhṇātvapi || 111 ||
[Analyze grammar]

oṃ ka idṃ kasmai adāt brahma idaṃ brahmaṇe'dāt |
ityuktvā vidhinā vipraṃ goyuktaṃ vai samarcayet || 112 ||
[Analyze grammar]

praṇamedanuyāyācca tāṃ dhenuṃ tadgṛhaṃ nayet |
evaṃ dānena pṛthivīdānaṃ bhavenna saṃśayaḥ || 113 ||
[Analyze grammar]

śrāddhakāle paṭhettasya pitaro'śnanti bhāvataḥ |
amāyāṃ paṭhane varṣaśataṃ tṛpyanti pūrvajāḥ || 114 ||
[Analyze grammar]

śrotuścāpi varṣakṛtaṃ pāpaṃ naśyati dūrataḥ |
māghaśukladvādaśyāṃ ca dvādaśyāṃ śrāvaṇe site || 115 ||
[Analyze grammar]

kātikyāṃ pañcadaśyāṃ vā dvādaśyāṃ vā viśeṣataḥ |
sarvadā vā yathāyogyaṃ dānaṃ śrīgurave'rpayet || 116 ||
[Analyze grammar]

brahmāṇḍodarabhūtāni tāni dattāni tena vai |
athavā pīḍyase'tyantaṃ kṣudhayā tṛṣayā nṛpa || 117 ||
[Analyze grammar]

vada te vaṃśajaṃ yaśca dānaṃ dadyāt tathāvidham |
annānāṃ ca jalānāṃ ca rasānāṃ ca viśeṣataḥ || 118 ||
[Analyze grammar]

dhenūrdadyācca teneva svargaṃ te bhojanaṃ bhavet |
hotā caivaṃ tamuktvā ca badaryāśramamāyayau || 119 ||
[Analyze grammar]

rājā nāmnā vinītāśvaḥ svavaṃśaṃ vaktumudyataḥ |
yayau tataśca dānādi vaṃśajena kṛtāni vai || 120 ||
[Analyze grammar]

tena muktiṃ gato rājā śāśvate brahmaṇaḥ pade |
śaṃkareṇa tathā lakṣmi pārvatyai kathitā kathā || 121 ||
[Analyze grammar]

mayā te'troditā samyag bhuktimuktipradā yataḥ |
paṭhanāchravaṇāccāsyā gopradānakṛtaṃ phalam || 122 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne dvādaśarasādidhenukapilādhenudānādividhiśravaṇaṃ vinītāśvenarājā kṛtamityādinirūpaṇanāmā triṣaṣṭyadhikapañcaśatatamo'dhyāyaḥ || 563 ||
[Analyze grammar]