Chapter 562

śrīnārāyaṇa uvāca |
śṛṇu lakṣmi śaṃbhunā kīrtitāṃ kathāmaghāpahām |
pārvatyai ṛkṣakādrau tāṃ kathayāmi prapāvanīm || 1 ||
[Analyze grammar]

vasudāno'bhavad rājā'vadhyāyāḥ sārvabhaumakaḥ |
īje yāgasahasreṇa hayamedhena mādhavam || 2 ||
[Analyze grammar]

sapādalakṣamadhikaṃ sarvā jīvanti tatprajāḥ |
tadā daityāśca revāyāstaṭe vai dakṣiṇe śaṭhāḥ || 3 ||
[Analyze grammar]

ketumālī suketuśca sumukho dundubhistathā |
dharmavighnaprakartāro'bhavan yajñavibhaṃjakāḥ || 4 ||
[Analyze grammar]

amarakaṇṭake yajñān kartuṃ vāñcchati ko'pi na |
tadā rājā yayau revāṃ yajñaṃ kartuṃ mahābalaḥ || 5 ||
[Analyze grammar]

brāhmaṇaiḥ sahito vidvān ṛtvigbhirvedapāragaiḥ |
gavāṃ ca pañcalakṣāṇi savatsānāṃ payomucām || 6 ||
[Analyze grammar]

sapādalakṣamaśvānāṃ dantināmayutaṃ tathā |
maṇimāṇikyaratnāni hemarūpyavasūni ca || 7 ||
[Analyze grammar]

vividhaṃ bhakṣyabhojyaṃ ca ājyaṃ vrīhitilāṃstathā |
maṇḍapān yajñayūpāṃśca samādāya sa bhūpatiḥ || 8 ||
[Analyze grammar]

gatvā saṃśodhayāmāsa bhūmiṃ cakāra maṇḍapān |
vedikā yajñakuṇḍāṃśca sthāpayāmāsa cānalam || 9 ||
[Analyze grammar]

juhāvā''jyāni havyāni toṣayāmāsa mādhavam |
devān pitṝnṛṣīn viprāṃstarpayāmāsa bhojanaiḥ || 10 ||
[Analyze grammar]

dakṣiṇādipradānaiśca jīvān kaṇatṛṇādibhiḥ |
asurāṇāṃ samavāyo vighnārthaṃ cāyayau tadā || 11 ||
[Analyze grammar]

rājñā divyāstrasandhānairhato vidrāvitaśca saḥ |
evaṃ pravartito yajño nirvighno vāsudānakaḥ || 12 ||
[Analyze grammar]

āvabhṛthyodakaiḥ klinnā vasudhā hemanirmitā |
babhūvurlulitā ye tu kardame mṛgapakṣiṇaḥ || 13 ||
[Analyze grammar]

te hemavarṇakāstatra babhūvuḥ puṇyayogataḥ |
yugapajjaladhārābhirbrahmaviṣṇumaheśvarāḥ || 14 ||
[Analyze grammar]

pūjitāstajjalaṃ caikībhūya prasravaṇātmakam |
tathā snānodakaṃ sarvadevānāmṛṣibhiḥ kṛtam || 15 ||
[Analyze grammar]

tatpravāho'pi militastatra prasravaṇe tadā |
gavāṃ mutrapravāhāśca lakṣāṇāṃ tatra saṃgatāḥ || 16 ||
[Analyze grammar]

bhakṣyabhojyādiśiṣṭānāṃ kṣīrājyānāṃ ca nirjharāḥ |
homaprasādabhūtānāṃ dugdhānāṃ ca pravāhakāḥ || 17 ||
[Analyze grammar]

militā yajñanimne te pravāhā āpagātmakāḥ |
kapilā nāma vai citrajalā saritprapāvanī || 18 ||
[Analyze grammar]

narmadāṃ saṃgatā so'yaṃ rudrāvartaḥ pradeśakaḥ |
devarṣimunibhiścitrajalānyālokya sā nadī || 19 ||
[Analyze grammar]

kapileti kṛtā nāmnā dakṣiṇātoṣaṇottaram |
varaṃ daduste rājñe vai kapilāsaṃgame ca ye || 20 ||
[Analyze grammar]

narmadāyāṃ prasnāsyanti drakṣyanti ca maheśvaram |
viṣṇuṃ nārāyaṇa te'tra divyānaiḥ paraṃ padam || 21 ||
[Analyze grammar]

yāsyanti cāpi kīṭādyā ye mariṣyanti cātra vai |
evaṃ varaṃ paraṃ datvā sarve yayurnijālayān || 22 ||
[Analyze grammar]

vasudānaḥ kratuṃ kṛtvā'vadhyāyāṃ samupāgataḥ |
śravaṇāt kīrtanādasya mucyate bhavabandhanāt || 23 ||
[Analyze grammar]

athā'bhūd viśravā rājā mathurāyā mahābalī |
arundhatīprasūtāyā dākṣāyaṇyāḥ suto hi saḥ || 24 ||
[Analyze grammar]

tīrthayātrāprasaṃgena yayāvamarakaṇṭakam |
snātvā dhyāne sthito rājā narmadāyāstaṭe yadā || 25 ||
[Analyze grammar]

tāvat paśyati madhyāhne pratīcyādityamaṇḍalāt |
dvau sūryau pūrvadigbhāge gatau dvau dakṣiṇāṃ diśam || 26 ||
[Analyze grammar]

dvau pātālaṃ tathā cordhvaṃ dvau sūryau caṇḍarūpiṇau |
kālaḥ saṃvartako vahniḥ prajajvālā'mbare tadā || 27 ||
[Analyze grammar]

raudrāśca dāruṇā vātā vavurvikṣobhakāriṇaḥ |
digdāho bhūmikampaśca ulkāpātāśca dāruṇāḥ || 28 ||
[Analyze grammar]

samabhavan tadā pṛthvyāṃ rājā dhyānādajāgarīt |
tṛṣārto dāhasantapto jalaṃ pātuṃ tu narmadām || 29 ||
[Analyze grammar]

yayau yāvattu tāvadvai jalaṃ kiñcinna vidyate |
pravāho vilayaṃ yāto jalaṃ lebhe na kutracit || 30 ||
[Analyze grammar]

jalaṃ vinā'dya maraṇaṃ dhruvaṃ me cetyacintayat |
anādiśrīkṛṣṇanārāyaṇaṃ sasmāra vai tadā || 31 ||
[Analyze grammar]

oṃkāranāthaṃ sasmāra tāvad dadarśa puṣpitam |
phalitaṃ patraśobhāḍhyaṃ kalpavṛkṣaṃ suśākhinam || 32 ||
[Analyze grammar]

taddṛṣṭvā śītalāṃ chāyāṃ prāpya rājā sthiro'bhavat |
śarīramamṛtaṃ jātaṃ tṛṣātāpo nyavartata || 33 ||
[Analyze grammar]

jīvitāśā'bhavat tasya tato rājā dadarśa ha |
śayānaṃ puruṣaṃ divyaṃ chāyāyāṃ dīptatejasam || 34 ||
[Analyze grammar]

kubhāḥ pārśve ca catvārastasya tiṣṭhanti sodakāḥ |
taṃ praṇamya sthito rājā viṣṇurūpaṃ dadarśa tam || 35 ||
[Analyze grammar]

suptaṃ dadarśa puruṣaṃ dvitīyaṃ tryambakaṃ śivam |
tāvad dadarśa rājā'nyān surān devān munīṃstathā || 36 ||
[Analyze grammar]

tato dadarśa nārīṃ codvignāṃ rudhirasaṃplutām |
vikīrṇamūrdhajāṃ kaṭyāṃ kanyāṃ bālaṃ nidhāya ca || 37 ||
[Analyze grammar]

sā covāca nṛpaṃ rājan stanyaṃ piba tṛṣāṃ tyaja |
asmyahaṃ pṛthivī devī bālo me viśvasṛṭ hyajaḥ || 38 ||
[Analyze grammar]

kanyeyaṃ narmadā cāste ghaṭāste santi sāgarāḥ |
kalpavṛkṣo vaṭaścāste vayaṃ sarve ciraṃsthirāḥ || 39 ||
[Analyze grammar]

akṣayāḥ pratikalpasthāḥ piba pānīyamādarāt |
ityuktvā vilayaṃ yātā rājā dadarśa narmadām || 40 ||
[Analyze grammar]

sajalāṃ ca papau vāri viśravāstṛptimāgataḥ |
kṛtvā tīrthaṃ yayau naijāṃ nagarīṃ mathurāṃ punaḥ || 41 ||
[Analyze grammar]

evaṃvidhaṃ nityatīrthaṃ vidyate nārmadaṃ jalam |
śravaṇāt kīrtanāccāsya mucyate bhavabandhanāt || 42 ||
[Analyze grammar]

narmadādakṣiṇe tīre kapilāyāśca paścime |
viṣṇostatra purī ramyā tīrthaṃ mokṣakaraṃ śubham || 43 ||
[Analyze grammar]

daityā vināśitāḥ pūrve viṣṇunā ca tataḥ param |
tatrāgatya purī ramyā nirmitā viṣṇunā śubhā || 44 ||
[Analyze grammar]

kapilā paścimāyāṃ tu nīlagaṃgā pravidyate |
tadantarā cakratīrthaṃ vāmanaṃ ca yugandharam || 45 ||
[Analyze grammar]

sudarśanaṃ nāma tīrthaṃ daityasūdanamityapi |
viṣṇvāvartaṃ śivāvartaṃ lakṣmyāvartaṃ tathaiva ca || 46 ||
[Analyze grammar]

tatra snānena dānena hyanantaphalamaśnute |
krośamātrapramāṇaṃ tad viṣṇukṣetraṃ prakīrtitam || 47 ||
[Analyze grammar]

tatra śrāddhena pitarastṛpyanti yānti mokṣaṇam |
tatra japtaṃ tapastaptaṃ sarvaṃ bhavati cākṣayam || 48 ||
[Analyze grammar]

śravaṇe dvādaśī puṇyā rohiṇyāmaṣṭamī śubhā |
tatropoṣya jano bhakto viṣṇuloke mahīyate || 49 ||
[Analyze grammar]

kārtike vā'tha vaiśākhe hyupavāsaṃ karoti yaḥ |
daśakoṭyupavāsānāṃ phalaṃ tatra labhejjanaḥ || 50 ||
[Analyze grammar]

pativratā tu yā nārī bhaktā nārāyaṇasya vai |
anādiśrīkṛṣṇanārāyaṇaṃ tatra prapūjayet || 51 ||
[Analyze grammar]

tasyāḥ śrībhagavān kṛṣṇaḥ saubhāgyaṃ śāśvataṃ divi |
dhāmni dadāti lakṣmyāśca samaṃ tvānandapūritam || 52 ||
[Analyze grammar]

atra tīrthe dharmarājastairthikānāṃ samādare |
arghadānāya cāyāti dharmatejovapurdharaḥ || 53 ||
[Analyze grammar]

pativratānāṃ caivāgre sthitvā pādau pravandate |
pradṛśya vaiṣṇavaṃ lokaṃ tataḥ paścānnivartate || 54 ||
[Analyze grammar]

dharmarājaṃ tadā pratyāgataṃ satye ca tāpasāḥ |
brahmaṇo mānasāḥ putrā apṛcchannṛṣayaḥ khalu || 55 ||
[Analyze grammar]

kasmācca kāraṇāddharmapādacārī gataḥ svayam |
prahasya dharmarājaśca prāha tān paramādbhutam || 56 ||
[Analyze grammar]

pativratānāṃ dīptiṃ ca dīptiṃ māsopavāsinām |
vartate devatābhyaśca viśeṣā tena vai svayam || 57 ||
[Analyze grammar]

darśanārthaṃ gataścāsam aśaktāḥ kiṃkarā mama |
sthātuṃ ca sannidhau teṣāṃ tataścāsaṃ gato'pyaham || 58 ||
[Analyze grammar]

evaṃ nārāyaṇasthalaṃ pāvanaṃ mokṣadaṃ sadā |
vartate tatra deveśi śravaṇādapi mokṣadam || 59 ||
[Analyze grammar]

śākalyasyā''śramaṃ yajñaparvatānnārmadaṃ taṭam |
abhivyāpya vartate ca niḥsṛtā carukā nadī || 60 ||
[Analyze grammar]

tatrākhyātaṃ dāruvanaṃ gīyate sarvadaivataiḥ |
śakreṇeṣṭaṃ purā tatra bṛhaspatipurodhasā || 61 ||
[Analyze grammar]

liṃgaṃ vyāghreśvaraṃ tatra vartate pāpanāśanam |
babhrurnāma purā cāsīd rājā paramadhārmikaḥ || 62 ||
[Analyze grammar]

puṇḍravardhanavāsī ca cintayāmāsa vaiṣṇavaḥ |
pituḥ kṣayāhe samprāpte śrāddhakāle tu vaiṣṇavam || 63 ||
[Analyze grammar]

śrāddhānnabhojinaṃ vipraṃ nā'vāpa sa ca bhūpatiḥ |
saṃcintya viprabhojyārthaṃ pākamapsu vyanikṣipat || 64 ||
[Analyze grammar]

ṛgvedo mūrtimān vākyaṃ tadā prāha ca bhūpatim |
gaccha rājan bharadvājaṃ yācasva brāhmaṇaṃ śubham || 65 ||
[Analyze grammar]

rājā yayau ca tacchrutvā bhāradvājāśramaṃ param |
so'bhivādya namaskṛtya muniṃ prāha manogatam || 66 ||
[Analyze grammar]

maharṣe śrāddhakālo'yaṃ pitṝṇāṃ mama vartate |
bhojaye'haṃ yathā vipraṃ tathā tvaṃ kartumarhasi || 67 ||
[Analyze grammar]

tasya tadvacanaṃ śrutvā bhāradvājo'bravīd vacaḥ |
maharṣīṇāṃ sahasrāṇi tuṣṭānāmūrdhvaretasām || 68 ||
[Analyze grammar]

haṃsalomaśamukhyānāṃ yadi bhojayituṃ kṣamaḥ |
kuru śrāddhaṃ yatheṣṭaṃ vai bhojayiṣyāma eva ca || 69 ||
[Analyze grammar]

dadyā hemamayaṃ pīṭhaṃ dadyā dhānyaṃ tathā vasu |
madhudhenuṃ tathā divyāṃ payodhenuṃ tathaiva ca || 70 ||
[Analyze grammar]

dadhidhenuṃ ghṛtadhenuṃ śarkarādhenumityapi |
guḍadhenuṃ vastradhenuṃ dhānadhenuṃ tathāpi vai || 71 ||
[Analyze grammar]

jaladhenuṃ svarṇadhenuṃ dvidalādhenumityapi |
kārpāsadhenuṃ ca kapilāṃ savatsāṃ dhenumityapi || 72 ||
[Analyze grammar]

kaupīnaṃ cāgniśaucasya vastrasyāpi pradehi ca |
bhāradvājavacaḥ śrutvā svīcakāra ca bhūpatiḥ || 73 ||
[Analyze grammar]

patnyai sarvaṃ gṛhe gatvā nyavedayacca bhāvataḥ |
āmiṣaṃ kalpayitvā tu pitṛkāryaṃ pravartaye || 74 ||
[Analyze grammar]

śuddhena cāmiṣeṇaiva tarpayāmāsa tān pitṝn |
āmiṣam ṛṣayo dṛṣṭvā kupitāścābruvaṃstadā || 75 ||
[Analyze grammar]

abhakṣyabhakṣaṇaṃ kṛtvā karīṣāgnau viśed dvijaḥ |
āmiṣasya prasaṃgena mūlanāśastvayā kṛtaḥ || 76 ||
[Analyze grammar]

babhruruvāca vedoktaṃ mayā kṛtaṃ na cānyathā |
gomedho hayamedhaśca naramedhastathā'paraḥ || 77 ||
[Analyze grammar]

kṣatriyāṇāṃ bhaved yajño mayā dharmeṇa vai kṛtam |
rājñastadvacanaṃ śrutvā bhāradvājo'bravīdidam || 78 ||
[Analyze grammar]

pitṝṇāṃ bhojane rājaṃstvayā viprā nimantritāḥ |
viprāśca vaiṣṇavāḥ santyāmiṣaṃ draṣṭuṃ ca notsukāḥ || 79 ||
[Analyze grammar]

tasmāt tvayā'tra vai śrāddhe yogyaṃ naiva kṛtaṃ yataḥ |
māṃsādo bhava pāpena vyāghro vyāghrī ca te priyā || 80 ||
[Analyze grammar]

vane varṣasahasraṃ tu vasudhāṃ vicariṣyathaḥ |
evaṃ śrutvā rājapatnī sudharmākhyā'bravīd vacaḥ || 81 ||
[Analyze grammar]

kṣatradharmānugantā me yataḥ śaptaḥ patistvayā |
pativratā ca nirdoṣā dharmiṣṭhā'haṃ tathaiva ca || 82 ||
[Analyze grammar]

tato mayā'pi viprebhyo dīyate śāpa ulbaṇaḥ |
bhaviṣyatha mahāghorā yūyaṃ vai brahmarākṣasāḥ || 83 ||
[Analyze grammar]

nirjale marudeśe ca tṛṣākṣudhātiduḥkhitāḥ |
bhāradvājastadā śīghraṃ yayau brahmāṇameva ca || 84 ||
[Analyze grammar]

sarvaṃ nyavedayat tatra śāpakāraṇamityapi |
brahmā prāha ca vedoktaṃ jātyuktaṃ cāpi karma yat || 85 ||
[Analyze grammar]

na syāccellokasammānyaṃ naiva kuryāt kadācana |
vedoktaṃ lokasammānyaṃ hṛdgamyaṃ cāpi yadbhavet || 86 ||
[Analyze grammar]

tatkāryaṃ sukhadaṃ syādvai na tvekānugataṃ sukham |
astu jātaṃ tu tajjātaṃ nistāraṃ vacmi putraka || 87 ||
[Analyze grammar]

vyāghrarūpo'pi rājarṣiḥ rājñī viprāśca rākṣasāḥ |
prayāntu narmadātīraṃ mārkaṇḍeyaṃ muniṃ prati || 88 ||
[Analyze grammar]

ityukto munirāḍ bhāradvājo nītvā ca bhūsurān |
vyāghraṃ vyāghrīṃ rākṣasāṃstān yayau mārkaṇḍakaṃ munim || 89 ||
[Analyze grammar]

tuṣṭuvuḥ parayā prītyā jagaduḥ śāpakāraṇam |
muktyarthaṃ prārthayāmāsustaṃ muniṃ pitaraṃ yathā || 90 ||
[Analyze grammar]

tvaṃ pitā no guruścāpi harirdhātā svayaṃ śivaḥ |
pāpāduddhara ghorācca janmato ghorayonitaḥ || 91 ||
[Analyze grammar]

mārkaṇḍeyastadovāca śākalyasyā''śramo'sti vai |
vaidūryātpaścime bhāge yatra yajñāstvanekaśaḥ || 92 ||
[Analyze grammar]

jātāstatra ca pāvanyāṃ bhūmau yāntu maheśvaram |
kṛṣṇanārāyaṇaṃ cāpi pūjayantu vratasthitāḥ || 93 ||
[Analyze grammar]

japadhyānaparā nityaṃ tapaścograṃ tapantvapi |
kandamūlaphalāhārāḥ santiṣṭhantu tathā sati || 94 ||
[Analyze grammar]

narmadāsnānaniratā devapūjāparāyaṇāḥ |
śīghraṃ śāpavinirmuktā bhavantaḥ saṃbhavantviti || 95 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
japantu cākṣaraṃ mantraṃ śīghraṃ bhavantviti || 96 ||
[Analyze grammar]

ityuktāste yayustatra jāpaṃ cakrurmuhurmuhuḥ |
sasnuste narmadātoye papustepuḥ paraṃ tapaḥ || 97 ||
[Analyze grammar]

māsāntare ca tatraiva divyayānasthito hariḥ |
āyayau śāpanāśārthaṃ divyalakṣmīyutaḥ prabhuḥ || 98 ||
[Analyze grammar]

vyāghrarevāsaṃgame ca viprān vimucya śāpataḥ |
vyāghraṃ vyāghrīṃ tathā śāpād vimucya bhagavān svayam || 99 ||
[Analyze grammar]

yayau naijaṃ paraṃ dhāma rājā rājñī ca bhūsurāḥ |
yayurnaijān gṛhān paścāt kālāntare ca te yayuḥ || 100 ||
[Analyze grammar]

vaiṣṇavaṃ paramaṃ dhāma muktā mantraprabhāvataḥ |
śravaṇātkīrtanādasyā'pyaśvamedhaphalaṃ labhet || 101 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne kapilārevāsaṃgamaviśravātīrthaviṣṇupurīcakratīrthadāruvanavyāghreśatīrthānāṃ setihāsaṃnirūpaṇanāmā dvāṣaṣṭyadhikapañcaśatatamo'dhyāyaḥ || 5162 ||
[Analyze grammar]