Chapter 561

śrīnārāyaṇa uvāca |
śṛṇu lakṣmi śaṃkaraśca pārvatyai prāha tīrthakam |
jvāleśvaraṃ suvikhyātaṃ kathayāmīha te'naghe || 1 ||
[Analyze grammar]

baleḥ putraṃ tripuraṃ vai bāṇaṃ bāṇena śaṃkaraḥ |
nijaghāna tataścāstraṃ jvālāmālāsamanvitam || 2 ||
[Analyze grammar]

patitaṃ kalpagāvārṣuṃ jvālā śāntā tadā'bhavat |
jvāleśvaraṃ hi tatproktaṃ pāparākṣasanāśanam || 3 ||
[Analyze grammar]

atha revācarusaṃgaṃ tīrthaṃ vai rājate param |
naimiṣāraṇyake kṣetre purā''sīnnagarī śubhā || 4 ||
[Analyze grammar]

hiraṇyānāmataḥ svarṇasāptabhaumairgṛhairyutā |
hiraṇyavegānāmnī ca nadī cāste purīyutā || 5 ||
[Analyze grammar]

hiraṇyabāhusaṃjñaśca rājā ceyeṣa vai kratum |
naimiṣe sa ṛṣīn sarvān papraccha yajñabhūmikām || 6 ||
[Analyze grammar]

te tu prāhurmahākṣetraṃ puṣkaraṃ makhayogyakam |
tasminniṣṭaṃ hutaṃ sarvaṃ puṇyaṃ koṭiguṇaṃ bhavet || 7 ||
[Analyze grammar]

rājā prāha kraturme puṣkare niṣpādyatāṃ śubhaḥ |
tato jagāma rājarṣiḥ puṣkaraṃ sarvasaṃbhṛtaḥ || 8 ||
[Analyze grammar]

gavāṃ ca daśalakṣāṇi sārdhaṃ lakṣaṃ tu vājinām |
dvipañcāśatsahasrāṇi gajendrāṇāṃ rathā'yutam || 9 ||
[Analyze grammar]

maṇimāṇikyaratnāni vastrāṇyābharaṇāni ca |
teṣāṃ saṃkhyā tvasaṃkhyaiva kuberasya dhanaṃ yathā || 10 ||
[Analyze grammar]

bhakṣyabhojyāni pānāni pravartante divāniśam |
pravartitastato yajñaścāhūto yatra viśvasṛṭ || 11 ||
[Analyze grammar]

śukraścāpi tadāhūto nānye devā hi bhūsuraiḥ |
anyadevaiśca kiṃ kāryaṃ dvābhyāṃ sarvaṃ prapūjitam || 12 ||
[Analyze grammar]

na viṣṇuśca na cādityā na candro varuṇo na ca |
na rudro na marutaśca nā'nye diśyā na pālakāḥ || 13 ||
[Analyze grammar]

yajñe pravartite yajñacchidrānveṣaṇatatparāḥ |
vighnaṃ kartuṃ samāyātā hyasurā devakaṇṭakāḥ || 14 ||
[Analyze grammar]

sarvaśo dānavā daityā bhūtavetālarākṣasāḥ |
pibanti somaṃ yajñāṃgaṃ bhakṣayanti sma bhūsurān || 15 ||
[Analyze grammar]

agnirvināśito yajñayūpaśca maṇḍapo hataḥ |
brahmā śakro devatāśca vīkṣyā''kasmikanaṣṭatām || 16 ||
[Analyze grammar]

adṛśyatāṃ gatāstasmāt sthānād vighnamayāttataḥ |
hiraṇyabāhuḥ kupito brāhmaṇān prati vai tadā || 17 ||
[Analyze grammar]

yajñe jyeṣṭhānanāhūya devān viprā hi bhikṣukāḥ |
apalāyanta me yajñaṃ tyaktvā svārthaparā yataḥ || 18 ||
[Analyze grammar]

atha daityāḥ prasaṃgṛhya saṃbhārān prayayurgṛhān |
rājā'vicārayannā'yaṃ pauruṣasya kṣaṇo mama || 19 ||
[Analyze grammar]

na kopasya na yuddhasya ruṣṭe devādimaṇḍale |
ekākī hayamāruhya sahapatnyā vrajāmyaham || 20 ||
[Analyze grammar]

yatrā''dityā na na viṣṇurna rudro na ca candramāḥ |
tathā'nye na diśāpālāḥ kathaṃ yajñaḥ susiddhyati || 21 ||
[Analyze grammar]

lolupā brāhmaṇāḥ sarvajihirṣavo na rakṣakāḥ |
kintu te dhvaṃsakā jātā lobhamūlā aśaktakāḥ || 22 ||
[Analyze grammar]

yadi me vidyate satyaṃ bhavantu brahmarākṣasāḥ |
sakaṇṭake nirudake pradeśe naṣṭacetanāḥ || 23 ||
[Analyze grammar]

śāpaṃ śrutvā ca vai vipraiḥ śapto rājā'pi dūrataḥ |
arakṣitā tvaṃ yajñasya kṣatriyādhama eva ca || 24 ||
[Analyze grammar]

anaghānāṃ brāhmaṇānāṃ śāpado bhava vai kharaḥ |
vane dvādaśavarṣāṇi babhūvuḥ khararākṣasāḥ || 25 ||
[Analyze grammar]

atha kāle gate'raṇye devarṣirnārado muniḥ |
ājagāma dadarśaitān kharaṃ ca rākṣasāṃstathā || 26 ||
[Analyze grammar]

kharo nanāma devarṣiṃ papraccha mokṣakāraṇam |
nāradastu tadā prāha nārmadaṃ jalamuttamam || 27 ||
[Analyze grammar]

revācarukasambhede snātvā muktiṃ prayāsyasi |
brāhmaṇā rākṣasāścāpi snātvā yāsyanti mokṣaṇam || 28 ||
[Analyze grammar]

ityuktāste yayū revāṃ revācarukasaṃgame |
snātvā muktiṃ gatāḥ sarve narmadājalasaṃgamāt || 29 ||
[Analyze grammar]

brahmayānasamārūḍhāḥ stūyamānāśca bandibhiḥ |
yayurdivyaṃ brahmalokaṃ narmadāvārisaṃgamāt || 30 ||
[Analyze grammar]

yatra viṣṇustathā rudro sūryo nārāyaṇastathā |
tatra śrīrvijayaścaiva bhuktirmuktiśca śāśvatī || 31 ||
[Analyze grammar]

yatra bhaktirgurau cāste yathā deve tathā gurau |
tasya kāmāḥ prasiddhyanti gurvātmakaharerbalāt || 32 ||
[Analyze grammar]

śravaṇāt kīrtanādasya smaraṇāt sevanādapi |
vandanāddhāraṇādvāpi mucyate bhavabandhanāt || 33 ||
[Analyze grammar]

athā'tiśreṣṭhatīrthaṃ cā'marakaṇṭakamucyate |
tadārabhya giriśreṣṭhaṃ sarvaṃ puṇyatamaṃ smṛtam || 34 ||
[Analyze grammar]

yāvadvai saṃgatā revāṃ caturnāmnī mahānadī |
uttare vartate yajñaparvataḥ pāvano mahān || 35 ||
[Analyze grammar]

svayaṃbhuvā purā tasminnaṣṭaḥ sautrāmaṇirmakhaḥ |
tatraiveṣṭaṃ maghavatā hayamedhena vai purā || 36 ||
[Analyze grammar]

dadhīcinā'tha devaiśca tatraiveṣṭaṃ mahāmakhaiḥ |
sa yāvat sagamo nadyāḥ sa yāvadyajñaparvataḥ || 37 ||
[Analyze grammar]

rajaḥ sarvaṃ pavitraṃ vai vartate mokṣadāyakam |
brahmaputraḥ suparṇaśca ṛṣiryatrā'bhavatpurā || 38 ||
[Analyze grammar]

saṃgame vāsakṛd vidvān sarvaśāstravicakṣaṇaḥ |
puruhūtā tasya bhāryā dharmapatnī pativratā || 39 ||
[Analyze grammar]

ekadā tvabravīd vākyaṃ saṃprasādya nijaṃ patim |
ṛtukāle yathāyogye māṃ bhajasva mahāmune || 40 ||
[Analyze grammar]

jāyate me yathāputraḥ sarvasantānapāvanaḥ |
putreṇa lokān jayati tṛpyanti pitṛdevatāḥ || 41 ||
[Analyze grammar]

aputrasya gatirnāsti tasmātputramajījanaḥ |
brāhmaṇastu tadā prāhā'māvāsyā varjitā priye || 42 ||
[Analyze grammar]

nā'tra saṃgaḥ prakartavyaḥ pitṝṇāmapi bādhakaḥ |
divyaṃ varṣasahasraṃ tu taptaṃ me duṣkaraṃ tapaḥ || 43 ||
[Analyze grammar]

tadvināśo yathā syānna tathā'nyatra dine tava |
garbhalābhāya ca priye yatiṣye mā śucaṃ vraja || 44 ||
[Analyze grammar]

ityuktā sā tadovāca patnī ṛṣiṃ suparṇakam |
paśyātra nārmade tīrthe snānamātreṇa pāpataḥ || 45 ||
[Analyze grammar]

mukto bhūtvā hi cāṇḍālo vimānena divaṃ yayau |
na taptaṃ na hutaṃ tena na japtaṃ na yamāḥ kṛtāḥ || 46 ||
[Analyze grammar]

niyamān sa na jānāti tathāpyasau divaṃ gataḥ |
vrataṃ naiva kṛtaṃ tena rājasvalyaṃ na pālitam || 47 ||
[Analyze grammar]

na kṛtāni vratāhāni tathāpi sa divaṃ gataḥ |
tīrthasyā'sya tu māhātmyaṃ paramaṃ tādṛśaṃ mune || 48 ||
[Analyze grammar]

snānamātreṇa pāpānāṃ nāśo bhavati sarvathā |
tasmād bhogaṃ bhajasvā'tra māṃ gṛhāṇa kṛpānidhe || 49 ||
[Analyze grammar]

bhāryāvākyaṃ kvacit pālyaṃ tadā dharmo na lupyate |
ṛtusnātā yadā bhāryā'patyecchā prabalā yadā || 50 ||
[Analyze grammar]

bhāryāyā jāyate tatrā'vaśyaṃ pālyaṃ striyā vacaḥ |
putro'vaśyaṃ prajāyeta ṛtudānena vai tadā || 51 ||
[Analyze grammar]

tatra vrataṃ vihātavyaṃ parvā'pi cotsavo'pi ca |
anutsāhahate kāle na garbho'patyadāyakaḥ || 52 ||
[Analyze grammar]

vatsarāṇāṃ sahasre ca vinā saṃgena vai gate |
etādṛśe sthale dharmaḥ priyāvākyaṃ na cetaraḥ || 53 ||
[Analyze grammar]

nā'pavādo na vā bādho na vā doṣo'tra vidyate |
dāvānale mahāraṇye kiyanmātraṃ tṛṇādikam || 54 ||
[Analyze grammar]

amṛtānāṃ samudreṣu kiyanmātraṃ viṣatṛṇam |
madhyāhnasūryavelāyāṃ kiyanmātraṃ gṛhe tamaḥ || 55 ||
[Analyze grammar]

puṇyaparvatasaṃsthāne kiyanmātraṃ hyamādinam |
tasmādadyaiva māṃ nātha bhajā'tipremabhāvataḥ || 56 ||
[Analyze grammar]

agrahe yadbhavetpāpaṃ nā'māpuṇyaṃ hi tatsamam |
ityuktaśca patistatra bhāryā jagrāha kāmataḥ || 57 ||
[Analyze grammar]

dadau putrasya garbhaṃ saḥ putro'bhūd bhāskaropamaḥ |
amāśrāddhe ca pitaro bhuktvā ye tṛptimāgatāḥ || 58 ||
[Analyze grammar]

tairāgatya niśāyāṃ ca prahasya kathitaṃ tadā |
adya garbhapradānasya prāyaścittaṃ drutaṃ kuru || 59 ||
[Analyze grammar]

narmadāyāṃ punaḥ snātvā homaṃ japaṃ punaḥ kuru |
vayaṃ tṛptāḥ prasannāḥ sma santānasandhihetave || 60 ||
[Analyze grammar]

bhāryayā cārthitastvaṃ tāṃ putrārthaṃ yad gṛhītavān |
nārmadaṃ salilaṃ cātra pāvanaṃ pāpanāśanam || 61 ||
[Analyze grammar]

brahmahatyābālahatyāgurustrīhananodbhavam |
vratanāśādijaṃ pāpaṃ vyavāyādisamudbhavam || 62 ||
[Analyze grammar]

snānamātreṇa revāyāṃ naśyatyeva na saṃśayaḥ |
ityuktvā pitarastasya yayuḥ prasannamānasāḥ || 63 ||
[Analyze grammar]

anapatyaviniśvāsahatā garbheṇa jīvitāḥ |
atha kālāntare tatra suparṇauो bhāryayā saha || 64 ||
[Analyze grammar]

vimāne cojjvale sthitvā yayau brahmapuraṃ param |
bhuktiṃ muktiṃ gatastatra suparṇaḥ saṃgamottame || 65 ||
[Analyze grammar]

atha vai paścime nīlagaṃgāyā narmadottare |
vyatīpāteśvaraṃ nāma tīrthaṃ paramaśobhanam || 66 ||
[Analyze grammar]

sāvitryāśca tapastaptaṃ sāvitrīkuṇḍamasti ca |
indradyumno'bhavad rājā yajñaṃ kartuṃ samīhate || 67 ||
[Analyze grammar]

papraccha ca maharṣīn sa dharmāraṇyasthitāṃstadā |
mārkaṇḍādyāśca taṃ prāhurnārmadaṃ kṣetramuttamam || 68 ||
[Analyze grammar]

rājā tūdghoṣayāṃcakre gantuṃ revāṃ prajājanam |
gavāṃ ca trīṇi lakṣāṇi savatsānāṃ payomucām || 69 ||
[Analyze grammar]

aśvānāṃ śyāmakarṇānāṃ sapādaṃ lakṣameva ca |
dantināmayutaṃ cāpi ghaṇṭābharaṇabhūṣitam || 70 ||
[Analyze grammar]

sahasrāṇi ca catvāri yānānāṃ kāmacāriṇām |
lakṣaṃ tu karabhāṇāṃ vai maṇimāṇikyalakṣakam || 71 ||
[Analyze grammar]

agniśaucāni vastrāṇi pātrāṇi kānakāni ca |
nānābhakṣyāṇi bhojyāni pānāni vividhāni ca || 72 ||
[Analyze grammar]

lakṣaṃ karmakarāṇāṃ ca tiladarbhādikaṃ tathā |
saṃgṛhya brāhmaṇaiḥ sārdhaṃ rājā vimānamāśritaḥ || 73 ||
[Analyze grammar]

mudā paramayā yuktaḥ sāntaḥpuraparicchadaḥ |
dharmāraṇyaṃ yayau rājā yatra sā narmadā nadī || 74 ||
[Analyze grammar]

yātrā'drirvartate ramyo vaidūryamaṇiśobhitaḥ |
oṃkāreśastathāśaṃbhurvirājate mahāprabhaḥ || 79 ||
[Analyze grammar]

oṃkārasannidhau revākoṭitīrthaṃ virājate |
atra dattaṃ hutaṃ ceṣṭaṃ tapastaptaṃ hyanantakam || 76 ||
[Analyze grammar]

sarvadā sarvakāryeṣu narmadā koṭipuṇyadā |
triṃśadyojanaparyantaṃ yajñayūpāṃśca maṇḍapān || 77 ||
[Analyze grammar]

kārayāmāsa rājā'sau kuṇḍāni vividhāni ca |
vedadhvanitanirghoṣā divaṃ bhūmiṃ samaspṛśan || 78 ||
[Analyze grammar]

nirdhūmaścā'bhavad vahnirjagrāha ghṛtahavyakam |
brahmāṇaṃ ca tathā viṣṇuṃ śaṃkaraṃ ca samāhvayat || 79 ||
[Analyze grammar]

rudrā ekādaśa tatra tathā''dityāśca dvādaśa |
viśvedevā stathā sādhyā maruto vasavastathā || 80 ||
[Analyze grammar]

lokapālāḥ samudrāśca nadyaḥ śailāḥ supādapāḥ |
dikpālā bhūtapālāśca tīrthāni pitarastathā || 81 ||
[Analyze grammar]

siddhakinnaragandharvā nāgarākṣasaguhyakāḥ |
vidyādhrāścāraṇāścāpyāyayustatra kratūtsave || 82 ||
[Analyze grammar]

ghṛtakṣīravahā nadyo dadhipāyasakardamāḥ |
babhūvurjalapānāni rasapānāni sarvaśaḥ || 83 ||
[Analyze grammar]

bhakṣyabhojyaiśca vividhaiḥ kāmyayānādibhistathā |
tṛptā devāśca munayo bhūtagrāmaṃ caturvidham || 84 ||
[Analyze grammar]

evaṃ nirvartito yajño'vabhṛthaṃ narmadājale |
babhūva dakṣiṇātṛptiḥ sarveṣāṃ yajñabhāginām || 85 ||
[Analyze grammar]

oṃkāreśaṃ svayaṃ rājā pupūja hemaratnakaiḥ |
maṇimāṇikyahīrādyaiḥ karpūrāgurucandanaiḥ || 86 ||
[Analyze grammar]

gandhapuṣpaiśca vividhairdhvajacchatravimānakaiḥ |
cāmarairvyajanaiścāpi pūjayitvā haraṃ harim || 87 ||
[Analyze grammar]

tuṣṭāva mokṣadātre te oṃkārāya namonamaḥ |
sākṣād rudro babhūvā'tha mūrtimān tasya sannidhau || 88 ||
[Analyze grammar]

prāha varaṃ vṛṣṇīṣveti cendradyumna uvāca tam |
āvāsaṃ kuru droṇyāṃ vai sarvadā yajñaparvate || 89 ||
[Analyze grammar]

mṛtānāṃ mokṣaṇaṃ syācca pāpināmapi cātra vai |
parvataṃ veṣṭayed yastu sūtreṇaikena parvaṇi || 90 ||
[Analyze grammar]

pṛthivī veṣṭitā tena saśailavanakānanā |
tena puṇyena tasyātra mokṣo brahmapadaṃ bhavet || 91 ||
[Analyze grammar]

tathā'stviti haraḥ prāha tatraivā'ntaradhīyata |
brahmā prāha ca rājānaṃ varadānārthameva ca || 92 ||
[Analyze grammar]

rājā prāhā'tra vai brahman liṃgamūrtidharo bhava |
tathāstviti procya tatra brahmā cāntaradhīyata || 93 ||
[Analyze grammar]

rājā viṣṇuṃ pratuṣṭāva sāṣṭāṃgaṃ praṇipatya ca |
keśavaṃ mādhavaṃ viṣṇuṃ govindaṃ madhusūdanam || 94 ||
[Analyze grammar]

padmanābhaṃ hṛṣīkeśaṃ śrīdharaṃ ca trivikramam |
dāmodaraṃ vāsudevaṃ śrīhariṃ kambharāsutam || 95 ||
[Analyze grammar]

gopālabālaṃ rādheśaṃ śrīśaṃ rameśvaraṃ prabhum |
anādiśrīkṛṣṇanārāyaṇaṃ śrīpuruṣottamam || 96 ||
[Analyze grammar]

maṃjuleśaṃ pārvatīśaṃ prabheśaṃ māṇikīpatim |
lakṣmīnārāyaṇaṃ haṃsājayānāthaṃ namāmyaham || 97 ||
[Analyze grammar]

śakhacakragadāśārṅgavanamālāvibhūṣaṇam |
lokanāthaṃ jagannāthaṃ śrīnātha praṇamāmyaham || 98 ||
[Analyze grammar]

akṣareśa ca mukteśa laliteśa namo'stu te |
avatāreśa deveśa vyūheśa ca namo'stu te || 99 ||
[Analyze grammar]

īśvareśa ca māyeśa durgeśa jāhnavīpate |
jīveśā'nantayajñeśa yajñādhipa namo'stu te || 100 ||
[Analyze grammar]

vedātmakāya kāntāya dharmaputrāya te namaḥ |
brahmavratadharāyā'triguṇāya ca namo'stu te || 101 ||
[Analyze grammar]

prakṛtīśāya śāntāya vaikuṇṭhasthāya te namaḥ |
nṛsiṃhamatsyavārāhakūrmarūpāya te namaḥ || 102 ||
[Analyze grammar]

sādhuveṣadharāyādikāraṇāya ca te namaḥ |
sahasraśirase vedyapuruṣāya ca te namaḥ || 103 ||
[Analyze grammar]

asurāṇāṃ damanārthaṃ dhṛtarūpāya te namaḥ |
hiraṇyagarbharūpāyā'mṛtadhāmne ca te namaḥ || 104 ||
[Analyze grammar]

sarvagarbhāya kṛṣṇāyā'ntarātmane ca te namaḥ |
sraṣṭre'vitre ca saṃhartre kāryarūpāya te namaḥ || 105 ||
[Analyze grammar]

sarvadikpālarūpāya lokapālātmane namaḥ |
ardhanārīsvarūpāya tridevāya ca te namaḥ || 106 ||
[Analyze grammar]

anantā''nandanidhaye brahmadhāmne ca te namaḥ |
karmaphalapradātre te cā'ntaḥsthāya namo namaḥ || 107 ||
[Analyze grammar]

saurāṣṭrakṛtavāsāya śrīkṛṣṇāya parātmane |
koṭigopīkānta tubhyaṃ sukhadāya namo namaḥ || 108 ||
[Analyze grammar]

brāhmatejase kṣatrāṇāṃ vīryarūpāya te namaḥ |
viśāṃ sampatsvarūpāya śaraṇyāya ca te namaḥ || 109 ||
[Analyze grammar]

pātivratyasvarūpāya patnīvṛṣāya te namaḥ |
sadordhvaretase kṛṣṇa mokṣadāya ca te namaḥ || 110 ||
[Analyze grammar]

sādhuṣu sarvadā sthātre bālarūpāya te namaḥ |
namo bhaktamanaḥkāmapūrakāya namo namaḥ || 111 ||
[Analyze grammar]

jñānadāya tathecchāsaṃpradāya yatnadāya ca |
kriyādātre phaladātre bhoktre bhogyāya te namaḥ || 112 ||
[Analyze grammar]

prakāśāya pareśāya jīvasthāya ca te namaḥ |
sarvadehinivāsāya śaktiyogyāya te namaḥ || 113 ||
[Analyze grammar]

acintyaguṇadhāmne te divyadehāya te namaḥ |
apāraiśvaryadhātre te dṛśyarūpāya te namaḥ || 114 ||
[Analyze grammar]

adṛśyarūparūpāya nityajñāya ca te namaḥ |
sarvatattvasvarūpāya maṇḍapāya ca te namaḥ || 115 ||
[Analyze grammar]

pañcāgnikṛtarūpāya vratasthāya ca te namaḥ |
puṇyadāya maheśāya sarveśāya ca te namaḥ || 116 ||
[Analyze grammar]

sarvaduḥkhavināśitre vahnirūpāya te namaḥ |
namo'stu sruksruvādyātmayajñapātrāya te namaḥ || 117 ||
[Analyze grammar]

dakṣiṇāpataye tubhyaṃ cāśīrvādāya te namaḥ |
tṛptaye śāntirūpāya rasarūpāya te namaḥ || 118 ||
[Analyze grammar]

sarvendriyanivāsāya satyakāmāya te namaḥ |
ādityādisvarūpāya vṛṣarūpāya te namaḥ || 119 ||
[Analyze grammar]

namaskārasya pātrāyā'rpaṇapātrāya te namaḥ |
tvatprasādāt kṛpāsindho yajñasiddhirmamā'bhavat || 120 ||
[Analyze grammar]

karaṃ gṛhāṇa me viṣṇo yathā patnīkaraṃ varaḥ |
dehi me caraṇe vāsaṃ nānyaṃ vṛṇomi keśava || 121 ||
[Analyze grammar]

viṣṇuḥ śrutvā paraṃ stotraṃ prasannaḥ prāha bhūpatim |
varaṃ vṛṇu varaṃ rājan yatte manasi vartate || 122 ||
[Analyze grammar]

dadāmi te na sandeho yajñasiddhirbhaviṣyati |
indradyumnastadovāca oṃkāranāthasannidhau || 123 ||
[Analyze grammar]

vaidūryaparvate kṛṣṇa nivāsaṃ kuru sarvadā |
yena mokṣo bhavettatra cāgatānāṃ tavā'rcanāt || 124 ||
[Analyze grammar]

darśanād vandanāccāpi sevanādavagāhanāt |
prāṇatyāge dehināṃ ca gamanaṃ te pade bhavet || 125 ||
[Analyze grammar]

pitṝṇāmannadānena yāntu te vaiṣṇavaṃ padam |
api kīṭapataṃgādyā yāntvatra paramāṃ gatim || 126 ||
[Analyze grammar]

tathāstviti hariḥ prāha cāvātatāra tatra ca |
tīrthānyapi sthitānyatra nārāyaṇapadāmbuje || 127 ||
[Analyze grammar]

avateruśca tīrthāni narmadāyāṃ kratukṣitau |
nīlagaṃgāsaṃgame ca vartante mokṣadāni vai || 128 ||
[Analyze grammar]

rājā revāṃ pratuṣṭāva saptadhārāmayī bhava |
ityevamarthayāmāsa sāpi saptapravāhiṇī || 129 ||
[Analyze grammar]

sañjātā mokṣadā revā sarvatīrthamayī satī |
dānaṃ hutaṃ japastaptaṃ sarvamatrā'kṣayaṃ bhavet || 130 ||
[Analyze grammar]

ityevaṃ vai kratuṃ kṛtvā cendradyumno hi narmadām |
viṣṇuṃ devān tathauṃkāraṃ namaskṛtya yayau gṛham || 131 ||
[Analyze grammar]

devādyā mānavādyāśca yajñe tṛptā yayurgṛham |
śravaṇātkīrtanādasya gosahasraphalaṃ labhet || 132 ||
[Analyze grammar]

śaṃkaraḥ pārvatīṃ prāha mokṣaścātra bhavet priye |
lakṣmi tīrthaṃ mayoktaṃ te bhuktimuktipradaṃ param || 133 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne jāleśvaratīrthaṃ hiraṇyabāhurājño gardabhatāmuktiḥ revācarukasaṃbhedatīrtham amarakaṇṭakatīrthaṃ yajñaparvataḥ suparṇakathā oṃkāratīrthamityādinirūpaṇanāmaikaṣaṣṭyadhikapañcaśatatamo'dhyāyaḥ || 561 ||
[Analyze grammar]