Chapter 558

śrīnārāyaṇa uvāca |
śrūyatāṃ ca tvayā lakṣmi mahādevena bhāṣitam |
pārvatyai nārmadaṃ cānyat tīrthaṃ tat kathayāmi te || 1 ||
[Analyze grammar]

matsyāyāśca tathā tāpyāḥ saṃgamo mokṣadāyakaḥ |
kalahaṃsābhidhaḥ pūrvaṃ devarṣirdhyānatatparaḥ || 2 ||
[Analyze grammar]

tatra kṛtvā''śramaṃ ramyaṃ tapastepe sudāruṇam |
śākamūlaphalāhāro hyatiṣṭhattvekapādataḥ || 3 ||
[Analyze grammar]

śivadhyānaparasyā'sya tapasā devarāṭ svayam |
bhīto brāhmaṇarūpeṇa vañcayituṃ samāyayau || 4 ||
[Analyze grammar]

uvāca kalahaṃsa tvaṃ kimarthaṃ kuruṣe tapaḥ |
ṛṣiḥ prāha kathaṃ cendra māṃ viḍambayase dvijam || 5 ||
[Analyze grammar]

jānāmi tvāṃ turāṣāḍhaṃ nendrarājyaṃ prakāmaye |
ārādhayāmyahaṃ śaṃbhuṃ kuru rājyaṃ yathepsitam || 6 ||
[Analyze grammar]

indraḥ prāha varaṃ vipra vṛṇu drakṣyasi śaṃkaram |
kalahaṃsastadovāca nānyaṃ varaṃ vṛṇomyaham || 7 ||
[Analyze grammar]

śaṃbhau bhaktiḥ sadā me syāditi śakto'si dehi cet |
tathā'stviti sureśaśca yayāvuktvā triviṣṭapam || 8 ||
[Analyze grammar]

śaṃkarastu drutaṃ tatra sākṣāt hasan samāyayau |
kalahaṃso namaścakre stotuṃ samupacakrame || 9 ||
[Analyze grammar]

namo bhaktakṛpāyukta mahādeva namo'stu te |
namaḥ śivāya bhaktānāmiṣṭapradāya te namaḥ || 10 ||
[Analyze grammar]

bhavasāgaramagnānāmuddhārakāya te namaḥ |
parabrahmasvarūpāya vaiṣṇavāgryāya te namaḥ || 11 ||
[Analyze grammar]

oṃ namaḥ śrīkṛṣṇanārāyaṇātmakāya te namaḥ |
pārvatīpataye prabhāsvāmidevāya te namaḥ || 12 ||
[Analyze grammar]

nārāyaṇīśarūpāya jayādhyakṣāya te namaḥ |
sarvabījasvarūpāya kāraṇāya namo namaḥ || 13 ||
[Analyze grammar]

śaṃbhuḥ stotraṃ śubhaṃ śrūtvā varaṃ vṛṇu jagāda tam |
kalahaṃseśvaraṃ tīrthaṃ vavre ca ṛṣisattamaḥ || 14 ||
[Analyze grammar]

tatra prāṇairviyuktānāṃ mokṣaṃ vavre śubhaṃ varam |
śaṃbhuḥ prāha tathaivā'stu cānte muktistavā'stu ca || 15 ||
[Analyze grammar]

antardhānaṃ yayāvuktvā kalahaṃso'pi sarvathā |
bhajitvā nārmadaṃ tīrthaṃ cānte brahmapadaṃ yayau || 16 ||
[Analyze grammar]

matsyātāpīsaṃgame tatkalahaṃsaṃ sutīrthakam |
pāpaghnaṃ svargadaṃ mokṣapradaṃ vartata aiśvaram || 17 ||
[Analyze grammar]

anyat tīrtha bṛhatyāśca narmadāyāśca saṃgamaḥ |
vindhyaparvataśobhāḍhyaṃ vidyate tāpasāśritam || 18 ||
[Analyze grammar]

raktadharmābhidhaḥ kaścinniṣādastatra cāyayau |
bharaṇāyātmavargasya vanyakandaphalādibhiḥ || 19 ||
[Analyze grammar]

prātaḥ sa revāsalilaṃ śivāya vai samāharat |
ajñānabhaktigarbhastu snāpayitvā phalaṃ dadau || 20 ||
[Analyze grammar]

athottarāyaṇe prāpte pupūja kusumaiḥ sadā |
bilvādi cārpayāmāsa śaṃkarāya sa bhāvataḥ || 21 ||
[Analyze grammar]

niṣādaḥ sa dadarśaikasmin dine śaṃkaraṃ gṛhe |
tṛtīyamīkṣaṇaṃ tatra mūrternaiva sa paśyati || 22 ||
[Analyze grammar]

tadā tu cintayāmāsa kenā'pyapahṛtaṃ hi tat |
vicārya vāmanetraṃ svaṃ tīkṣṇabāṇena tatkṣaṇam || 23 ||
[Analyze grammar]

lalāṭe devadevasya samutkṛtya nyavedayat |
na kampo na ca kārpaṇyaṃ na viṣādo na devanam || 24 ||
[Analyze grammar]

tena tuṣṭo mahādevo niṣādaṃ prāha saṃhasan |
varaṃ vṛṇu mahābhakta yadiṣṭaṃ manasepsitam || 25 ||
[Analyze grammar]

niṣādo vacanaṃ śrutvā sāṣṭāṃgaṃ praṇipatya ca |
varaṃ vavre niṣādāstu sarve pakṣigaṇaiḥ saha || 26 ||
[Analyze grammar]

saputradārapaśavo ye cānye pāpadehinaḥ |
tvatprasādādvaradānānmuktilokaṃ prayāntu te || 27 ||
[Analyze grammar]

evaṃ varaṃ vṛṇe yogyaṃ bhūtānāṃ mokṣakāmyayā |
śaṃbhuḥ śrutvā prasannaḥ sannuvācā'stu tathā varaḥ || 28 ||
[Analyze grammar]

sarvasaṃkalpakāmāptiṃ matprasādāt tvamāpsyasi |
sarve muktiṃ prayāsyanti yathā saṃkalpitaṃ tvayā || 29 ||
[Analyze grammar]

ityuktvā sa mahādevastatraivā'ntaradhīyata |
tataḥ kāle vimānastho niṣādo'nucarādibhiḥ || 30 ||
[Analyze grammar]

dhṛtasvarṇātapatrastu vījyamāno'psarogaṇaiḥ |
divyābharaṇavastrāḍhyo divyacandanapūjitaḥ || 31 ||
[Analyze grammar]

paśupakṣigaṇaiḥ sākaṃ yayau muktipadaṃ yataḥ |
tadidaṃ kathitaṃ haimi śivanetrahradātmakam || 32 ||
[Analyze grammar]

tīrthaṃ vai pāvanaṃ sarvasmṛddhidaṃ muktidaṃ tathā |
athā'nyatparamaṃ tīrthaṃ nārmade cottare taṭe || 33 ||
[Analyze grammar]

vidyate kratavo yatra tīrthayātrāgatena ca |
janakena kṛtāstatra dakṣiṇātoṣitā dvijāḥ || 34 ||
[Analyze grammar]

dharmarājastathā cā'nye diśāṃ pālāḥ samāyayuḥ |
dharmarājo janakaṃ saṃprāhārghādi dadan nṛpam || 35 ||
[Analyze grammar]

tapasā dhyānayogena dānadevārcanairapi |
śivarevāprasādena jitā lokāstvayā'khilāḥ || 36 ||
[Analyze grammar]

janako dharmarājaṃ ca papraccha vinayena vai |
ke deśāḥ parvatāḥ puṇyāḥ kā nadyaścāśramāśca ke || 37 ||
[Analyze grammar]

kāni tīrthāni loke'smin yatra dattaṃ hutaṃ tapaḥ |
na kṣīyate manuṣyāṇāṃ tanme kathaya tattvataḥ || 38 ||
[Analyze grammar]

dharmaḥ prāha śṛṇu rājan śaṃkarasya mukhācchrutam |
kalmāṣapādo rājā''sīnmāthure maṇḍale purā || 39 ||
[Analyze grammar]

nābhāgākhyaśca rājā''sīt sāketamaṇḍale purā |
nābhāgasya vimānaṃ tu vyomni copari gacchati || 40 ||
[Analyze grammar]

kalmāṣapādayānaṃ tu bhūtale yāti nā'mbare |
iti hetoḥ śivaṃ natvā kalmāṣapādabhūpatiḥ || 41 ||
[Analyze grammar]

papraccha śṛṇvatāṃ sarvagaṇānāṃ saṃśayaṃ svakam |
puṣkare daśayajñāśca vidhattāśca mayā hara || 42 ||
[Analyze grammar]

gaṃgāyāṃ naimiṣāraṇye prabhāse śaśibhūṣaṇe |
prayāgarāje kāśyāṃ ca pratyeke śatakaṃ tathā || 43 ||
[Analyze grammar]

iṣṭaṃ sāgraṃ kratūnāṃ tu mayā tatra maheśvara |
adho yāti vimānaṃ me nābhāgasyā'mbaropari || 44 ||
[Analyze grammar]

kathamevaṃ nyūnatā me puṇye'haṃ yena nimnagaḥ |
śaṃbhuḥ prāha tadā taṃ vai kalmāṣapādabhūpatim || 45 ||
[Analyze grammar]

lakṣamedhaṃ nāmatīrthaṃ revāyā uttare taṭe |
śaṃkaro lakṣamedheśo rājate tatra nityaśaḥ || 46 ||
[Analyze grammar]

cakāra tatra nābhāgo yajñamekaṃ suvaiṣṇavam |
tena puṇyena yānaṃ vai nābhāgasyā'mbare sthitam || 47 ||
[Analyze grammar]

tvayā revātaṭe naiva yajñaḥ kṛto mahāphalaḥ |
tena nimnapradeśe te vimānaṃ yāti nā'mbare || 48 ||
[Analyze grammar]

narmadāyāḥ paraṃ tīrthaṃ tato naiva hi vidyate |
iti śrutvā ca kalmāṣacaraṇo nṛpatistataḥ || 49 ||
[Analyze grammar]

prayayau narmadātīraṃ daśayajñān cakāra ha |
vaiṣṇavaṃ cātha raudraṃ ca vājimedhaṃ ca vai kratum || 50 ||
[Analyze grammar]

kārīriṃ vājapeyaṃ ca viśvajitaṃ mahākratum |
puṇḍarīkaṃ naramedhaṃ gomedhaṃ vaiśvadaivatam || 51 ||
[Analyze grammar]

evaṃ yajñāṃścakārā'yaṃ jñānayajñaṃ tathā punaḥ |
lakṣmīnārāyaṇasaṃhitāyajñaṃ pracakāra saḥ || 52 ||
[Analyze grammar]

tato yānaṃ svayaṃ vyomni samutthāya samūrdhvagam |
yathākāmaṃ satyalokaṃ vaikuṇṭhaṃ ca yayau tataḥ || 53 ||
[Analyze grammar]

nābhāgasya vimānādvai hyuparyupari yāti tat |
evaṃ kalmāṣapādo vai kṛtvā brahmasamarpaṇam || 54 ||
[Analyze grammar]

jīvaddehena vaikuṇṭhaṃ gantuṃ yogyo'bhavattataḥ |
yasya kratau svayaṃ viṣṇurlakṣmyā sākamupasthitaḥ || 55 ||
[Analyze grammar]

viṣṇunā cārpitā mālā divyā kaṇṭhe'sya bhūbhṛtaḥ |
tena yogena vaikuṇṭhaṃ yātyāyāti kvacit kvacit || 56 ||
[Analyze grammar]

evaṃ rājā samartho'bhūt śrīviṣṇoḥ samprasādataḥ |
tattīrthaṃ jānakaṃ cānyat kālmāṣapādikaṃ tathā || 57 ||
[Analyze grammar]

vidyate narmadākūle pāvanaṃ mokṣadaṃ param |
athā'nyad vidyate ramyaṃ saptasārasvataṃ śubham || 58 ||
[Analyze grammar]

saptasārasvato nāma gandharvaḥ śivakiṃkaraḥ |
kailāse gāyanaṃ kṛtvā prayayau raivatācalam || 59 ||
[Analyze grammar]

vinā''jñāṃ śaṃkarasyā'tha tvāyayau sucireṇa saḥ |
nandī śaśāpa taṃ kopād vraja cāṇḍālatāṃ kṣitau || 60 ||
[Analyze grammar]

narmadāyāṃ vyatipāte snātvā yāsyasi mokṣatām |
ityevaṃ sa tu gāndharvaścāṇḍālayonitāṃ gataḥ || 61 ||
[Analyze grammar]

jātismaro'bhavat pṛthvyāṃ babhrāma nārmade taṭe |
snātvā revājale śaṃbhuṃ pūjayitvā vidhānataḥ || 62 ||
[Analyze grammar]

cāṇḍālayonisammukto gāndharvatāṃ yayau punaḥ |
saptasārasvataṃ tīrthaṃ mokṣadaṃ tatprakīrtitam || 63 ||
[Analyze grammar]

narmadādakṣiṇe tīre tvaśokavanikāsu ca |
aśokajananākhyaṃ sattīrthaṃ tvaparamuttamam || 64 ||
[Analyze grammar]

aghamarṣaṛṣestatrāśramo brāhmaṇaśobhitaḥ |
ṛṣayo yatra brahmiṣṭhā vicinvanti pramokṣaṇam || 65 ||
[Analyze grammar]

aghamarṣāśramaṃ dharmo vaiśyarūpeṇa cā''gamat |
jijñāsārthaṃ kīdṛśā vai ṛṣayo'tra vasanti nu || 66 ||
[Analyze grammar]

sa vaiśyo'tra tapaścakre brāhmaṇātiśayaṃ tataḥ |
brāhmaṇebhyaḥ sa pradadau mṛgacarmāṇi sarvaśaḥ || 67 ||
[Analyze grammar]

kaupīnāni tathā bhikṣāṃ tato nāśikamāyayau |
varṣamekaṃ vyatītaṃ ca vaiśyasya tāpasaiḥ saha || 68 ||
[Analyze grammar]

na bhogo na ca kārpaṇyaṃ na māno na ca matsaraḥ |
na doṣā dveṣarāgādyā jitaṃ sarvaṃ viśā tataḥ || 69 ||
[Analyze grammar]

saptasārasvataṃ tīrthaṃ nārmadaṃ tvāgamaddhi saḥ |
snātvā pupūja viṣṇuṃ śrīkṛṣṇanārāyaṇaṃ harim || 70 ||
[Analyze grammar]

tathā śaṃbhuṃ bāṇarūpaṃ pūjayāmāsa sādaram |
hariḥ pratyakṣatāṃ prāpya prāha tvaṃ vṛṣa eva yaḥ || 71 ||
[Analyze grammar]

tathāpi siddhatāṃ prāptastapasā ca viśeṣataḥ |
idaṃ vimānamāruhya divyabhogasukhaṃ kuru || 72 ||
[Analyze grammar]

putradārasnuṣopeto viṣṇulokamito vraja |
dharmaḥ prāha tadā viṣṇo ṛṣayo narmadātaṭe || 73 ||
[Analyze grammar]

atra daśasahasrāṇi vidyante ye tapodhanāḥ |
te sarve mama tapasā viṣṇulokaṃ prayāntu vai || 74 ||
[Analyze grammar]

imaṃ varamahaṃ manye śrīharereva nānyataḥ |
śrutvaivaṃ ṛṣayaḥ sarve sā'bhimānā'hamānvitāḥ || 75 ||
[Analyze grammar]

tiraścakrurhi taṃ vaiśyaṃ procuścāpi parasparam |
mahatāṃ bhūsurāṇāṃ vai vaiśyaḥ karoti lāghavam || 76 ||
[Analyze grammar]

vaiśyasya tapasā viprā yātā vaikuṇṭhamityapi |
loke darśayituṃ so'yaṃ varaṃ vṛṇoti śāṭhyataḥ || 77 ||
[Analyze grammar]

vaiśyasya śreṣṭhatāṃ loke jñāpayan sa vṛṇoti hi |
na vayaṃ tapasā tasya gacchāmo vai divaṃ prati || 78 ||
[Analyze grammar]

brāhmaṇasyā'vamānena vaiśyo'yaṃ va tariṣyati |
ityuktvā ṛṣayastaṃ ca vaiśyaṃ prāha prayāhi bhoḥ || 79 ||
[Analyze grammar]

vaiśyadharmaṃ gṛhāṇāpi kṛṣiṃ kuru gṛhe sthitaḥ |
na yogyastvaṃ tapaḥ kartuṃ jātyabhimānavānasi || 80 ||
[Analyze grammar]

gaccha gaccha gṛhaṃ mā cā''yāhi tvaṃ vai dvijāntikam |
ityuktaḥ sa dvijān dṛṣṭvā sābhimānakrudhānvitān || 81 ||
[Analyze grammar]

vimuktanāmakaṃ vipraṃ prajagāda sa karṣukaḥ |
brāhmaṇānāṃ paro dharmaḥ krodhābhāvaḥ praśāntatā || 82 ||
[Analyze grammar]

ahaṃmamatārāhityaṃ tadvān yaḥ sa ca bhūsuraḥ |
krodhāhaṃmamatāyukto brāhmaṇo naiva vidyate || 83 ||
[Analyze grammar]

tādṛśasya tapaḥ sarvaṃ śrāddhaṃ vā'pi ca niṣphalam |
daivatairapi durjñeyo gahano jātinirṇayaḥ || 84 ||
[Analyze grammar]

brahmakarmasamācāraṃ vaiśyaṃ brāhmaṇamucyate |
vrahmakarmavihīnaṃ ca vipraṃ vaiśyaṃ samucyate || 85 ||
[Analyze grammar]

niṣṭhuraṃ nirghṛṇaṃ krūraṃ kṛtaghnaṃ dīrghakopinam |
dvijaṃ vivādaśūraṃ ca dūrataḥ parivarjayet || 86 ||
[Analyze grammar]

ityuktvā vaiśyavaryaḥ sa virarāma kṣaṇaṃ tataḥ |
viprāḥ papracchurenaṃ tvaṃ ko'si vaiśyasvarūpadhṛk || 87 ||
[Analyze grammar]

vaiśyaḥ prāha ca dharmo'smi parīkṣārthaṃ samāgataḥ |
kīdṛśā brāhmaṇā yūyaṃ narmadātaṭavāsinaḥ || 88 ||
[Analyze grammar]

ahaṃmamate visṛjya tapaḥ kuruta cottamam |
roṣaṃ tu sarvathā tyaktvā bhajadhvaṃ parameśvaram || 89 ||
[Analyze grammar]

evaṃ vrahmavratenā'tra yūyaṃ muktiṃ gamiṣyatha |
atha te śamayāmāsurdharmād doṣānnijāṃstataḥ || 90 ||
[Analyze grammar]

dharmaṃ prapūjayāmāsurnirdoṣāḥ ṛṣayo'bhavan |
atha divyavimānāni tvāgatāni vṛṣāntike || 91 ||
[Analyze grammar]

vṛṣājñayā hi te sarve samāruhyā'ghamarṣaṇaḥ |
api dharmeṇa sārdhaṃ ca viṣṇunā ramayā saha || 92 ||
[Analyze grammar]

saptasārasvataṃ natvā yayurvaikuṇṭhameva ca |
śravaṇātpaṭhanāccāpi bhuktimuktipradaṃ hi tat || 93 ||
[Analyze grammar]

ityuktvā śaṃkaro devyai virarāma ca padmaje |
mayā tubhyaṃ paraṃ tīrthaṃ saptasārasvatātmakam || 94 ||
[Analyze grammar]

kathitaṃ muktidaṃ mokṣapradaṃ snāturviśeṣataḥ |
anekayajñaphaladaṃ putradāradhanapradam || 95 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne matsyātāpī saṃgamakalahaṃseśa bṛhatīnarmadāsaṃgamaśivanetrahṛdalakṣamedhaḥsaptasārasvatāditīrthāni setihāsacamatkārabhūtāni nirūpitānītināmā'ṣṭapañcāśadadhikapañcaśatatamo'dhyāyaḥ || 558 ||
[Analyze grammar]