Chapter 555

śrīnārāyaṇa uvāca |
śṛṇu lakṣmi tataḥ śaṃbhuḥ pārvatīṃ prāha cārbude |
tīrthānyanyāni te vacmi pāpanāśakarāṇi hi || 1 ||
[Analyze grammar]

tatrā''ste caṇḍikātīrthaṃ vipraiścaṇḍī samarcitā |
sthāpitā vedamantraiśca mahiṣāsuranāśinī || 2 ||
[Analyze grammar]

arbude jāhnavīkuṇḍaṃ śikhare vidyate śubham |
yatra gaṃgā śaṃkareṇa labhate vatsarāntare || 3 ||
[Analyze grammar]

sahayogaṃ tu sevāyāṃ varadānena cārbude |
athā'caleśvaraṃ tīrthaṃ śaivaṃ tatra ca vidyate || 4 ||
[Analyze grammar]

yatra pūrve pāpacāraḥ kuṣṭhakṣāmatanurnaraḥ |
bhikṣārthamāgatastatra saktūbhikṣāmavāpa saḥ || 5 ||
[Analyze grammar]

kuḍave nyasya rātrau sa suptastatra kṣaṇaṃ yadā |
tāvat śvā prasamāgatya bhakṣayāmāsa saktukam || 6 ||
[Analyze grammar]

anye śvānaḥ samāgatya śunā kurvanti vigraham |
unnidraḥ so'bhavacchrutvā saktūnāśaṃ dadarśa ca || 7 ||
[Analyze grammar]

tato vai kevalaṃ vāri pītvā snātvā drumāntike |
suṣvāpa ca tataḥ prātaśconnidraḥ sa babhūva ha || 8 ||
[Analyze grammar]

yāvat paśyati cātmānaṃ devagandharvasannibham |
jalasnānaprapānādeḥ pratāpaṃ jñātavāṃśca saḥ || 9 ||
[Analyze grammar]

atha kālāntare daivavaśāt sa nidhanaṃ gataḥ |
tato jātismaro jāto vidarbhādhipatergṛhe || 10 ||
[Analyze grammar]

bhīmo nāma nṛpaśreṣṭho damayantīpitā hi saḥ |
śune saktūpradānasya phalaṃ rājyamavāpa saḥ || 11 ||
[Analyze grammar]

gatvā tatra dadātyeva saktūn vai prativāsaram |
papracchurgālavādyāstaṃ kathaṃ saktūn dadāsi vai || 12 ||
[Analyze grammar]

hastyaśvarathadānāni dīyante na kathaṃ tvayā |
sa tadā kathayāmāsa prāgbhavasyā'dbhutaṃ phalam || 13 ||
[Analyze grammar]

saktūdānaprabhāveṇa rājyaṃ prāptaṃ yato mayā |
saktavo mama vai tīrthe śvabhistatra hi bhakṣitāḥ || 14 ||
[Analyze grammar]

mayā snānaṃ tathā pītaṃ jalaṃ puṇyapradaṃ tataḥ |
kṣīṇapāpo'bhavaṃ rājā karomi saktudānakam || 15 ||
[Analyze grammar]

jñātvā dānena saktūnāṃ phalaṃ me śāśvataṃ bhavet |
tīrthe'tra muktisaṃyukte bhaktyā saktūn dadāmi hi || 16 ||
[Analyze grammar]

śrutvā te munayaḥ sarve vismayaṃ paramaṃ gatāḥ |
sādhu sādhu paraṃ rājannityabruvan punaḥ punaḥ || 17 ||
[Analyze grammar]

etasya paṭhanādvāpi śravaṇādapi bhūpatiḥ |
bhavedatra paratrāpi śāśvataṃ sukhamāpnuyāt || 18 ||
[Analyze grammar]

kulasantāraṇaṃ tīrthaṃ vartate cārbudācale |
purā tvāsīt pāpakarmarataścā'prastutābhidhaḥ || 19 ||
[Analyze grammar]

nṛpaḥ satkāraśūnyaśca jñānadānavivarjitaḥ |
nyāyato'nyāyato vāpi karoti dhanasaṃgraham || 20 ||
[Analyze grammar]

tato vārdhakyamāpanno vṛddhairanyaiśca bodhitaḥ |
kuru rājan dharmakāryaṃ maraṇādau śubhaṃ bhavet || 21 ||
[Analyze grammar]

rājā prāha balaṃ dharmo balena ca kṛtaṃ mayā |
dhanaṃ rājyaṃ dāragṛhaṃ tathā'nyattvarjitaṃ bahu || 22 ||
[Analyze grammar]

nā'smāccā'sti paro dharma indriyatṛptidāt paraḥ |
ityuktā maunamādāya yayuḥ svaṃ svaṃ niketanam || 23 ||
[Analyze grammar]

athā'nte tasya pitaro duḥkhitā ūcureva tam |
vayaṃ śuddhasamācārā dānadharmaparāḥ purā || 24 ||
[Analyze grammar]

puṇyaiḥ svargaṃ gatāścādya kuputreṇa nipātitāḥ |
tvaṃ tu kuputraḥ sañjāto dharmakāryavivarjitaḥ || 25 ||
[Analyze grammar]

tataścoddhara naḥ sarvān kṛtvā kiñcicchubhārjanam |
karmabhistava pāpātman vayaṃ narakamāśritāḥ || 26 ||
[Analyze grammar]

narakaṃ daśa yāsyanti bhaviṣyāśca tvayā yutāḥ |
śrutvā rājā paraṃ duḥkhamavāpa prāha yoṣitam || 27 ||
[Analyze grammar]

patnī prāha tathā śrutvā pitṝnuddhara śobhanaiḥ |
rājā viprān samāhūya pitṛmedhaṃ cakāra ha || 28 ||
[Analyze grammar]

tīrthayātrāṃ tathā cakre cārbude'pi samāgataḥ |
kulasantāraṇaṃ prāpya snānaṃ tatra cakāra saḥ || 29 ||
[Analyze grammar]

jalāñjalīn dadau smṛtvā pitṝn pitāmahādikān |
vimuktāḥ pitaro raudrānnarakātsupraharṣitāḥ || 30 ||
[Analyze grammar]

tato divyavimānasthā divyamālāmbarānvitāḥ |
tamūcustāritāḥ sarve vayaṃ putra tvayā'dhunā || 31 ||
[Analyze grammar]

yasmāt kulaṃ tvayā putra tīrthe'smiṃstāritaṃ tataḥ |
kulasantāraṇaṃ nāma tīrthametad bhaviṣyati || 32 ||
[Analyze grammar]

āgaccha tvaṃ svaputrāya vasave'rpayya bhūdhuram |
divaṃ pratīti saṃśrutvā'prastutaṃ svadhuraṃ sute || 33 ||
[Analyze grammar]

datvā pitṛvimānaṃ ca samāruhya gato divam |
eṣaḥ prabhāvastīrthasya mayā te kathitaḥ priye || 34 ||
[Analyze grammar]

tato gacchet paraṃ tīrthaṃ parśurāmāśramātmakam |
tapastaptaṃ yatra tena prāptānyastrāṇi śaṃkarāt || 35 ||
[Analyze grammar]

rāmatīrthamiti khyātaṃ pāpatāpapraṇāśanam |
tatra vārihrade snātvā bhuktiṃ muktimavāpnuyāt || 36 ||
[Analyze grammar]

tato gacched brahmapadaṃ tīrthaṃ paramaśobhanam |
purā brahmā'rthito viprairmokṣadaṃ dehi vastu naḥ || 37 ||
[Analyze grammar]

brahmā prāha dadāmyeva padaṃ me tasya pūjanāt |
janānāṃ mokṣaṇaṃ syāccaraṇāravindasevanāt || 38 ||
[Analyze grammar]

spṛśantu ṛṣayaḥ sarve devāścāpi padaṃ mama |
pūjayiṣyanti saṃprāpte kārtike pūrṇimādine || 39 ||
[Analyze grammar]

toyaiḥ phalaiśca kusumairgandhabhojyānulepanaiḥ |
te yāsyanti na sandeho mama lokaṃ sudurlabham || 40 ||
[Analyze grammar]

pitāmahapadaṃ cārcya bhuktimuktipradaṃ hi tat |
tatra vai vartate mukhyaṃ puṣkaraṃ trividhaṃ priye || 41 ||
[Analyze grammar]

padmajasya sadā'bhīṣṭaṃ brahmaṇā ca purā kṛtam |
vaśiṣṭhādyā ṛṣayo vai purā satraṃ samācaran || 42 ||
[Analyze grammar]

brahmā tu satyalokādvai yajñe tatra samāgataḥ |
trisandhyārthaṃ pragantavyaṃ satyaloke punaḥ punaḥ || 43 ||
[Analyze grammar]

brahmaṇā munibhiścāpi vicāryaiva ca lāghavam |
satyalokāt samānītaṃ puṣkaraṃ cārbudācale || 44 ||
[Analyze grammar]

yāvat satraṃ cārbude vai sandhyā teṣāṃ babhūva ha |
tatrā'nyāni puṣkarāṇi samājagmustadā bhuvi || 45 ||
[Analyze grammar]

uttamaṃ puṣkaraṃ vyomni madhyamaṃ śikharopari |
tṛtīyaṃ tu pṛthivyāṃ vai sarovaramabhūttathā || 46 ||
[Analyze grammar]

kārtike pūrṇimāyāṃ ye snānaṃ kurvanti bhāvataḥ |
teṣāṃ lokāḥ śāśvatāśca svargādyā api bhogadāḥ || 47 ||
[Analyze grammar]

tatrottare ca sāvitrīkuṇḍaṃ vai pāpanāśanam |
brahmaṇaḥ pratimā ramyā darśanānmokṣadāyinī || 48 ||
[Analyze grammar]

dhundhumāro'bhavat pūrvaṃ bhaktaḥ śrīśaṃkarasya ha |
umāmaheśvarastena sthāpito bhavanāśanaḥ || 49 ||
[Analyze grammar]

taṃ devaṃ paripūjyaiva nimitīrthaṃ samācaret |
yatra vai niminā rājñā vārdhakye cārbudācale || 50 ||
[Analyze grammar]

lomaśo'pi tadā tatra bahvarṣibhiḥ samāgataḥ |
brahmayajñaḥ kṛtastatra viṣṇuyāgaśca vartitaḥ || 51 ||
[Analyze grammar]

rudrayāgaḥ kṛtaścāpi saṃhitāyāḥ kathā kṛtā |
mahotsave samastāni jambūdvīpagatānyapi || 52 ||
[Analyze grammar]

tīrthāni tvāyayustatrā'vabhṛthārthaṃ jalāśaye |
jambūtīrthaṃ tu tajjātaṃ pratyayārthaṃ drumastathā || 53 ||
[Analyze grammar]

jambūvṛkṣo'bhavattatra divyo drāk saṃvyajāyata |
tatra snānaṃ nimiścakre sarvatīrthamaye tataḥ || 54 ||
[Analyze grammar]

sadehaḥ sa gataḥ svargaṃ divyo bhūtvā suropamaḥ |
etat sarvaṃ tvarbudasya māhātmyaṃ pārvati tava || 55 ||
[Analyze grammar]

samākhyātaṃ mama sthānamayaṃ puṇyapradaṃ priye |
arbudastu svayaṃ tīrthaṃ tatra tīrthāni koṭiśaḥ || 56 ||
[Analyze grammar]

vasanti ca nivatsyanti guṇakarmādibhiḥ satām |
pārvati te prasaṃgena śraddhayā ca mayā'pi vai || 57 ||
[Analyze grammar]

kṛtāni bahutīrthāni dhanyo'haṃ vai tvayā priye |
yasya patnī devaparā bhaktimatī pareśvare || 58 ||
[Analyze grammar]

dharmakārye samutsāhā saśraddhā puṇyakarmaṇi |
ātithye'tiprasannā ca satsevāyāṃ śubhādarā || 59 ||
[Analyze grammar]

ātmakārye'tivegā ca jñāne premavatī sadā |
yaśasyevā'nusandhānavatī japaparāyaṇā || 60 ||
[Analyze grammar]

tapaḥśaucādisaṃyuktā homayajñaparāyaṇā |
bhartṛdevā pitṛdevā bhṛtyarakṣākarī tathā || 61 ||
[Analyze grammar]

gobhūbrāhmaṇasādhūnāṃ sādhvīnāṃ mānakāriṇo |
sarvabhūtātmabhūtasya nārāyaṇasya kiṃkarī || 62 ||
[Analyze grammar]

kṣamayā pṛthivītulyā vairāgye vṛkṣasadṛśī |
sauśīlye brahmatulyā ca sevane snehapātrikā || 63 ||
[Analyze grammar]

sahāye stambhavannityaṃ dāne cātmasamarpiṇī |
paraloke sahāyā ca dhanyastasya gṛhāśramaḥ || 64 ||
[Analyze grammar]

sa eva sādhuratrokto yasya patnī pativratā |
yasya nāsti tathā patnī na sa sādhuḥ sa pāpavān || 65 ||
[Analyze grammar]

yasya patnī kaṭu vakti krūraṃ cakṣuḥ karoti ca |
karoti roṣavad vaktraṃ mānasaṃ na dadātyapi || 66 ||
[Analyze grammar]

dhik tasya jīvanaṃ loke nirayaścātra tasya vai |
yasya gṛhe na vai puṇyaṃ nāsti sevā tu śārṅgiṇaḥ || 67 ||
[Analyze grammar]

nāsti bhojyasamutsāho nāsti vastrādi śobhanam |
nāsti premamayī vāṇī nāsti snehāvalokanam || 68 ||
[Analyze grammar]

nare nāryāṃ ca vā'patye tasya janma nirarthakam |
dhanyo'haṃ kṛtakṛtyo'haṃ yasyedṛśī satī priyā || 69 ||
[Analyze grammar]

tvayā'smi sarvadā dhanyo virakto raktayā saha |
udvegaṃ strīkṛtaṃ labdhvā yānti tvanye vanāntaram || 70 ||
[Analyze grammar]

na teṣāṃ vanavāsena siddhirbhavati tādṛśī |
yādṛśī strīprasādena gṛhasthasyā'pi saṃbhavet || 71 ||
[Analyze grammar]

abalānāmanāthānāṃ bālānāṃ rogiṇāṃ tathā |
daridrāṇāṃ kṣudhitānāṃ tṛṣitānāṃ vivastriṇām || 72 ||
[Analyze grammar]

nirāśrayāṇāṃ lokānāṃ satāṃ satīnāṃ yoginām |
āśīrvādāḥ phalantyatra drutaṃ siddhipradā hi te || 73 ||
[Analyze grammar]

yatra devyo ramaṇyaśca modante gṛhamedhinām |
tatra lakṣmīḥ sampadaśca svargaṃ mokṣo'sti dharmiṇām || 74 ||
[Analyze grammar]

yatra sarvavidhā śāntirnirvṛttirvidyate'niśam |
tatra mokṣo bhavatyeva dhanyo'haṃ tādṛśo gṛhī || 75 ||
[Analyze grammar]

yo gṛhastho divārātraṃ dhanaṃ tvarjayati dhruvam |
bhāravāhī na jānāti rakṣaṇaṃ strīkuṭumbinām || 76 ||
[Analyze grammar]

bhojanaṃ cāsanaṃ vastuyojanaṃ tūtsavādikam |
dhanaṃ tasya nirarthaṃ vai niḥśvāsadagdhameva tat || 77 ||
[Analyze grammar]

yaddhanaṃ naiva devānāṃ gṛhasthānāṃ kuṭumbinām |
vaṃśyānāṃ ca nijānāṃ ca bhogyaṃ tanmṛttikāsamam || 78 ||
[Analyze grammar]

yaḥ patirna prasanno'sti hāsyānano na dṛśyate |
prasannaśabdaḥ premāḍhyaḥ snehanetro na dṛśyate || 79 ||
[Analyze grammar]

samānahṛdayo nāsti nāsti bhāvayutastathā |
nā'nugrahaṃ vidhatte ca na cā''vaśyakatāṃ caret || 80 ||
[Analyze grammar]

na rameta ramayedvā na ca dhyānaṃ karoti ca |
na cāhvayati miṣṭena nā''kārayati vai hṛdā || 81 ||
[Analyze grammar]

na vā miṣṭaṃ bhojayedvā pāyayenmadhuraṃ na ca |
madhu sammelayennaiva milatyeva na nirjane || 82 ||
[Analyze grammar]

na ca spṛśati saukhyārthaṃ smarennaiva śubhasthale |
na pṛcched gṛhiṇībhāvaṃ mānasaṃ na ca rañjayet || 83 ||
[Analyze grammar]

kiṃ tena patinā loke vṛthā tasyā janurbhuvi |
tasmād devi tvayā rakṣyo vairāgye saṃsthito'pyaham || 84 ||
[Analyze grammar]

tvayaiva mama gārhasthyaṃ prakāśameti sarvathā |
tvayā pūrvaṃ tapaḥ kṛtvā mama mūlyaṃ pravardhitam || 85 ||
[Analyze grammar]

tvayā dagdhvā satīdehaṃ devatvaṃ mama vardhitam |
tvayā daityāṃstathā hatvā svāmiśraiṣṭhyaṃ prakāśitam || 86 ||
[Analyze grammar]

tvayā putrau gaṇaskandau dattvā me pūjyatā kṛtā |
tvayaiva devi gārhasthyaṃ svarge mokṣo vane'pi me || 87 ||
[Analyze grammar]

tvayaiva devi tīrthāni kṛtānyadya mayā bhuvi |
gamiṣyāmo'dhunā naijaṃ kailāsaṃ vada kiṃ param || 88 ||
[Analyze grammar]

yadyat te rocate haimi vada sampādayepsitam |
ityuktvā virarāmā'sau śaṃkaro lokaśaṃkaraḥ || 89 ||
[Analyze grammar]

ityevaṃ kathitaṃ lakṣmi tubhyaṃ cārbudatīrthakam |
pāpatāpaharaṃ mokṣakaraṃ śāntikaraṃ param || 90 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne'rbudācale caṇḍikātīrthajāhnavīkuṇḍā'caleśvarabhīmatīrthakulasantāraṇatīrthaparśurāmatīrthabrahmapadatīrthatripu |
ṣkarasāvitrīkuṇḍanimitīrthānāṃ sopākhyānaṃ varṇanaṃ śivakṛtā satīpraśaṃsā cetinirūpaṇanāmā pañcapañcāśadadhikapañcaśatatamo'dhyāyaḥ || 555 ||
[Analyze grammar]