Chapter 554

śrīnārāyaṇa uvāca |
śṛṇu lakṣmi haraḥ prāha pārvatīṃ tīrthamaṇḍalam |
viśvāvasustapastepe siddhaḥ śivaparāyaṇaḥ || 1 ||
[Analyze grammar]

tutoṣa nṛpatestasya śaṃbhurdarśanamāyayau |
varaṃ vṛṇu samuvāca siddhiṃ vavre harācca saḥ || 2 ||
[Analyze grammar]

siddheśvaraṃ ca talliṃgaṃ tīrtharūpaṃ vyajāyata |
śukreśvaraṃ ca śukreṇa sthāpitaṃ tīrthamucyate || 3 ||
[Analyze grammar]

śukraḥ śrīśaṃkarāt prāptastapastaptvā'tra duṣkaram |
vidyāṃ sañjīvanīṃ mṛtyuñjayāṃ sandhāyinīṃ tathā || 4 ||
[Analyze grammar]

tatrā'sti nirjharaṇaṃ ca jalasya pāvanaṃ śubham |
tatra kuṇḍe janaḥ snātvā'lpamṛtyubhayamutsṛjet || 5 ||
[Analyze grammar]

tato gacched vālakhilyatapaḥsthānaṃ supāvanam |
tatra kuṇḍe janaḥ snātvā divyarūpadharo bhavet || 6 ||
[Analyze grammar]

kirātavanitā tatra kurūpā'pi tṛṣānvitā |
jalaṃ pātuṃ yayau dṛṣṭvā snānārhaṃ jalamuttamam || 7 ||
[Analyze grammar]

snātvā yāvadbahiryāti divyā devī tadā'bhavat |
tasyāḥ patistu tāṃ dṛṣṭvā papraccha kā'si sundari || 8 ||
[Analyze grammar]

mama patnī samāyātā kuṇḍe'tra jalavāñcchayā |
tvayā dṛṣṭā kṛṣṇavarṇā ced yadi vada devike || 9 ||
[Analyze grammar]

sā covāca nijaṃ kāntaṃ tavaiva dayitā'smyaham |
kuṇḍasnānaprabhāveṇa jātā'smi devakanyakā || 10 ||
[Analyze grammar]

svāmistvaṃ snāhi kuṇḍe'tra devatulyo bhaviṣyasi |
ityuktaḥ snānamakarot tāvannaṣṭānyaghāni vai || 11 ||
[Analyze grammar]

dehaṃ tyaktvā mṛtiṃ yāto vanitāpi pativratā |
punaḥ snātvā tanuṃ tyaktvā vimānena suvarcasā || 12 ||
[Analyze grammar]

devakanyābhirājuṣṭā svāminā saha sundarī |
namaskṛtvā śubhaṃ tīrthaṃ prayayau tridivaṃ prati || 13 ||
[Analyze grammar]

maṇikarṇā'bhidhā yatra kirātī mokṣaṇaṃ gatā |
māṇikarṇeśvaraḥ kuṇḍaṃ liṃgaṃ tīrthaṃ hi tanmatam || 14 ||
[Analyze grammar]

vālakhilyāstatra nityaṃ tiṣṭhanti kutupe śubhe |
tatra sūryagrahe snānaṃ kurukṣetrasya puṇyadam || 15 ||
[Analyze grammar]

snāne yatsmaraṇaṃ syāt tatprāpyate nātra saṃśayaḥ |
athā'paraṃ paṅgutīrthaṃ paṅguvipreṇa saṃsthitam || 16 ||
[Analyze grammar]

cyavanasyā'nvaye paṅgunāmā vipraḥ kadācana |
śanaiḥ śanaiḥ samāyāto'rbude sārthasya yogataḥ || 17 ||
[Analyze grammar]

ekaṃ nirjharamāsādya tapastepe sudāruṇam |
śivabhaktiparo vāyubhakṣo homajapakriyaḥ || 18 ||
[Analyze grammar]

tasya tuṣṭo mahādevaḥ sākṣāttatra samāyayau |
caitraśuklacaturdaśyāṃ varadānaṃ dadau haraḥ || 19 ||
[Analyze grammar]

yāhi mokṣaṃ paṅgubhāvaṃ vihāya divyadehavān |
sa ca mokṣaṃ gato natvā paṅgutīrthaṃ hi tanmatam || 20 ||
[Analyze grammar]

yatromāsahitaḥ śaṃbhū rājate nirjharāntike |
snātvā pītvā jalaṃ yāti mokṣaṃ śaṃbhoḥ prasādataḥ || 21 ||
[Analyze grammar]

atha citrāṃgado rājā purā pāpaparo'bhavat |
mṛgayārthaṃ vanaṃ yāto'rbude hradasamīpataḥ || 22 ||
[Analyze grammar]

jalapānāya ca yātaḥ snātastatra hrade tathā |
akasmātsa dhṛto rājā grāheṇa bhakṣito'pi ca || 23 ||
[Analyze grammar]

cchraṣṭapucchra yamarājaśca tān prāhā'rbude mattīrthake sthale || 24 ||
[Analyze grammar]

mṛto'yaṃ vai hrade puṇye nā'yaṃ daṇḍārha eva yat |
yātu svargaṃ sahasrāṇi yugānāṃ tvekaviṃśatiḥ || 25 ||
[Analyze grammar]

yatra pūrvaṃ mayā taptaṃ tapastatra mṛto hyasau |
tatra tīrthe janaḥ snātā svargaṃ prāpsyati niścitam || 26 ||
[Analyze grammar]

yamatīrthaṃ hi tatproktaṃ citrāṃgadavimuktidam |
puṇḍrodaṃ ca tatastīrthaṃ gacchet pāpapraṇāśakam || 27 ||
[Analyze grammar]

purā puṇḍrodako nāma vipro vairāgyamāsthitaḥ |
arbude nirjhare ramye martukāmaḥ samāyayau || 28 ||
[Analyze grammar]

ekasminneva kāle tu tatraiva ca sarasvatī |
vīṇāvinodasaṃyuktā vivikte pathi saṃsthitā || 29 ||
[Analyze grammar]

uvāca brāhmaṇaṃ devī vada kiṃ te'sti vāñchitam |
sa prāha nāsti me buddhirūpādhyāyaistiraskṛtaḥ || 30 ||
[Analyze grammar]

na me sarasvatī mātā jihvā'gre vartate yataḥ |
martumicchāmi cātraiva yena śreyo bhaviṣyati || 31 ||
[Analyze grammar]

mātā prāha prasādānme vāṇī te'stu sadottamā |
vidyā vedādijanyāste trāsantāṃ tarkaśobhanāḥ || 32 ||
[Analyze grammar]

adyaprabhṛti vāgmī tvamatra loke bhaviṣyasi |
sārasvataṃ śubhaṃ tīrthaṃ puṇḍrodākhyaṃ bhaviṣyati || 33 ||
[Analyze grammar]

trayodaśyāṃ snānakartā vidvān samyag bhaviṣyati |
evamuktvā tu sā devī tatraivāntaradhīyata || 34 ||
[Analyze grammar]

puṇḍrodako hi sarvajño bhūtvā tvante divaṃ yayau |
tato gacchennalatīrthaṃ śrīmātā yatra rājate || 25 ||
[Analyze grammar]

nalākhye śikhare tatra bāṣkalirnāma dānavaḥ |
purā'bhavanmahāghorastadvināśāya pārvatī || 36 ||
[Analyze grammar]

śrīmātā rūpiṇī jātā hitāya jagatāṃ satī |
bāṣkaliṃ ca jīvagrāhaṃ gṛhītvā mṛtyuvarjitam || 37 ||
[Analyze grammar]

parvatasya mahacchṛṃgaṃ natvā tasyopari svayam |
niviṣṭā sā jaganmātā vasatyālokarakṣiṇī || 38 ||
[Analyze grammar]

tatraiva pāduke divye tayā nyaste śubhe tataḥ |
karoti taddarśanaṃ yaḥ saṃsāraṃ sa na paśyati || 39 ||
[Analyze grammar]

matpādukābharākrānto bāṣkalirdaityapuṃgavaḥ |
nā'smāt sthānād bahiḥ kvāpi nirgatyordhvaṃ gamiṣyati || 40 ||
[Analyze grammar]

caitre caturdaśīrātrau pādukāpūjanaṃ mama |
kartavyaṃ gahvare tatra nivatsyāmyaṇurūpiṇī || 41 ||
[Analyze grammar]

atra tīrthaṃ kariṣyanti yai te kailāsavāsinaḥ |
bhaviṣyanti na sandehaścetyuktvā'dṛśyatāṃ gatā || 42 ||
[Analyze grammar]

tato gacchecchuṃbhanāśakarīṃ vindhyācalīṃ satīm |
arbude divyarūpeṇa rājate sā śivājñayā || 43 ||
[Analyze grammar]

guhāmadhyaṃ samāsādya vivikte durgame sthale |
yastāṃ paśyati bhāvena sarvamīpsitamāpnuyāt || 44 ||
[Analyze grammar]

atha pūrve tapastaptaṃ maṃkinā brāhmaṇena vai |
pūrvaṃ vipro mahāmūrkhaḥ parvate mahiṣīṃ śubhām || 45 ||
[Analyze grammar]

dugdhadāṃ rakṣayāmāsa tathā'nyā mahiṣīḥ punaḥ |
tāśca vikrīya bhūkṣetraṃ vṛṣadvayaṃ ca jagṛhe || 46 ||
[Analyze grammar]

vṛṣau kvacid dhuri nyastau tāvaduṣṭraḥ samāgataḥ |
āghrāya tau dhurākāṣṭhe grīvāṃ protāṃ cakāra saḥ || 47 ||
[Analyze grammar]

athoṣṭraḥ sa bhayayukto gale prālagnagodhuraḥ |
goyugena hi grīvāyāṃ lambamānena vai tadā || 48 ||
[Analyze grammar]

dudrāva tena tu vṛṣau viprāṇo vai mṛtau tataḥ |
maṃkirvairāgyamāpanno nirjhare cārbudācale || 49 ||
[Analyze grammar]

samāśritya tapo ghoraṃ cakāra prajapan harim |
maṃkiḥ piṇḍārakaḥ so'yaṃ ddarśa śaṃkaraṃ puraḥ || 50 ||
[Analyze grammar]

tuṣṭāva taṃ tathā muktiṃ jagāma śaṃkarecchayā |
maṃkeḥ piṇḍārakasyaitat sthalaṃ piṇḍārakaṃ tataḥ || 51 ||
[Analyze grammar]

khyātaṃ piṇḍārakaṃ tīrthe snātavyaṃ tvaṣṭamītithau |
deyaṃ gomahiṣīdānaṃ bhuktiṃ muktiṃ labhet tataḥ || 52 ||
[Analyze grammar]

raktābandhaṃ śubhaṃ tīrthaṃ gacchet tato'rbudācale |
purā''sīt pārthivo nāmnā indraseno mahābalaḥ || 53 ||
[Analyze grammar]

tasya patnī sunandā''sīt pātivratyaparāyaṇā |
rājā yayau raṇe yoddha jītvā śatrūn samāgataḥ || 54 ||
[Analyze grammar]

dūtaṃ sa preṣayāmāsa rājñīṃ prati parīkṣayā |
sunandāṃ brūhi gatvā tvam indraseno hato raṇe || 55 ||
[Analyze grammar]

śrutvā karoti kāṃ ceṣṭāṃ viditvākārameva tu |
maraṇāya yadi yatnaṃ kuryād rakṣyā prayatnataḥ || 56 ||
[Analyze grammar]

ityuktaḥ sa gato dūtaścovācāpi yathoditam |
sunandā''karṇya śīghraṃ svaprāṇān jahau niruddhya vai || 57 ||
[Analyze grammar]

hatyāpāpaṃ nṛpe lagnaṃ hāsyaparīkṣayotthitam |
rājño gurutaraṃ kāyaṃ sālasyaṃ samapadyata || 58 ||
[Analyze grammar]

tejohīnaṃ vivarṇaṃ ca prasannatā vivarjitam |
gṛhamāgatya rājā sa jñātvā tat paryadevayat || 59 ||
[Analyze grammar]

strīhatyāyā vināśārthaṃ tatastīrthāya niryayau |
prāptau raktānubandhākhyaṃ tīrthaṃ cārbudaparvate || 60 ||
[Analyze grammar]

tatra snātvā viniṣkrānto yāvannijaṃ prapaśyati |
tāvanna dṛśyate chāyā yā lagnā strīvadhodbhavā || 61 ||
[Analyze grammar]

surūpo vīryavān jātastejovṛddhiḥ parā'bhavat |
tatra tīrthe tapastaptvā visṛjya varṣma yogataḥ || 62 ||
[Analyze grammar]

āruhya divyayānaṃ ca kailāsaṃ prayayau drutam |
prāṇināmanuraktānāṃ tāraṇaṃ prakaroti tat || 63 ||
[Analyze grammar]

tīrthaṃ raktoddhārakaṃ tannāmnā khyātaṃ tataḥ sadā |
vināyakaṃ śubhaṃ tīrthaṃ kuryād vighnapraśāntaye || 64 ||
[Analyze grammar]

tataḥ pārśveśvaraṃ tīrthaṃ gacchet pāpapraṇāśanam |
devalasyā'bhavatpatnī pārthā'bhidhā pativratā || 65 ||
[Analyze grammar]

tayā taptaṃ tapastatra vandhyātvanāśahetave |
sā'tra dadarśa śaṃbhuṃ vai putravaraṃ lalābha ca || 66 ||
[Analyze grammar]

putraśataṃ tataḥ prāptaṃ śaṃkarasya varāt tayā |
yatrā'sti nirmalaṃ toyaṃ girigahvaraniḥsṛtam || 67 ||
[Analyze grammar]

tīrthasyā'sya vidhānena dāraputrādikaṃ labhet |
māṃmuñcahradatīrthaṃ ca kartavyaṃ mokṣakāṅkṣiṇā || 68 ||
[Analyze grammar]

mudgalarṣiḥ purā tatra tapastepe'tidāruṇam |
oṃ namaḥ śrīkṛṣṇanārāyaṇeti japan sadā || 69 ||
[Analyze grammar]

arbude triṣavaṇaśca babhūva kṣīṇakalmaṣaḥ |
taṃ tu netuṃ mahāsvargaṃ devadūtaḥ samāgataḥ || 70 ||
[Analyze grammar]

vimānastho muniṃ prāhā''ruhaitad gamyatāṃ diviṃ |
indreṇa preṣitaścā'smi śīghramāgaccha mā ciram || 71 ||
[Analyze grammar]

papraccha mudgalastaṃ vai guṇān doṣān divastathā |
śrutvā yāsyāmi cenmanye kṣamaṃ svargaṃ śubhaṃ mama || 72 ||
[Analyze grammar]

dūtaḥ prāha svakaiḥ puṇyaiḥ prāpyate svarjanai mune |
muniḥ prāha yarthārthaṃ tatphalaṃ śrāvaya me'nuga || 73 ||
[Analyze grammar]

aśrutaistairna gaccheyamiti me hṛdi niścitam |
cariṣye ca tapo bhūri pūjayiṣye narāyaṇam || 74 ||
[Analyze grammar]

dūtaḥ prāha guṇān sarvān yauvanaṃ sarvathā samam |
nandanādīni ramyāṇi divyadevavanāni ca || 75 ||
[Analyze grammar]

ananyasadṛśā bhogāḥ sadā tṛptipradāḥ sukhāḥ |
bubhukṣā naiva na tṛṣṇā nā''lasyaṃ nā'pi nidrikā || 76 ||
[Analyze grammar]

devyo ramyāścaikarūpā bhogayogyāḥ punaḥ punaḥ |
gāndharvā gāyanaṃ nityaṃ śrāvayanti ca vādyajam || 77 ||
[Analyze grammar]

ramayanti gṛhe rāmā gītanṛtyaprahāsanaiḥ |
na ca rogāḥ śarīreṣu puṣṭistvamṛtasaṃbhavā || 78 ||
[Analyze grammar]

vīryaṃ dehe pūrṇatattvaṃ hrāso yasya na vidyate |
bhojyaṃ cāmṛtamevā'sti bahudhā svecchayā kṛtam || 179 ||
[Analyze grammar]

vātapittakaphādīnāṃ saṃsargo devatāsu na |
durgandhādi na vidyeta rūpaṃ tvekapramāṇakam || 80 ||
[Analyze grammar]

vṛddhihrāsau tvacāṃ nāsti malaṃ cāpi na vidyate |
divyadṛṣṭirdivyabhogā divyāmbarāṇi santi ca || 81 ||
[Analyze grammar]

vyomamārge gatimantaḥ surādyā viharanti hi |
vimānānyapyasaṃkhyāni maṇiratnāni hīrakāḥ || 82 ||
[Analyze grammar]

divyāstejomayāḥ sarve saudhe dīpā nisargajāḥ |
candrakāntisamā''vyāptaṃ bhavanaṃ pratidaivatam || 83 ||
[Analyze grammar]

dāsā dāsyaḥ sahasrāṇi peyarasāśca kāmadāḥ |
kāmacārāḥ kāmabhogā mānasāḥ sṛjirūpiṇaḥ || 84 ||
[Analyze grammar]

sahasrayugaparyantaṃ parā''yuśca tato'dhikam |
puṇyānurūpaṃ svargaṃ saṃbhujyate bhogadehinā || 85 ||
[Analyze grammar]

yāvatpuṇyakṣayastāvat paścāt pātamavāpnuyāt |
evaṃ guṇāḥ pravartante nodarārthaṃ hi bhṛtyatā || 86 ||
[Analyze grammar]

nūtanaṃ puṇyakaṃ svarge jāyate na kathaṃcana |
tena pāto bhavet tasmāt puṇyakṣaye divaukasām || 87 ||
[Analyze grammar]

ayameva mahān doṣaḥ patanaṃ vai bhayaṃkaram |
karmabhūmiriyaṃ brahman bhogabhūmirdivaṃ matam || 88 ||
[Analyze grammar]

yadatra kriyate śreṣṭhaṃ puṇyaṃ tatropabhujyate |
dānavānāṃ bale jāte kvaciddharanti dānavāḥ || 89 ||
[Analyze grammar]

gṛhaṃ dārāścopavastūnyapi sarvāṇi vai balāt |
tadidaṃ dūṣaṇaṃ cāpi parabhuktāḥ striyo'pi ca || 90 ||
[Analyze grammar]

tathā koṭiguṇitān vai dṛṣṭvā puṇyaprabhāviṇaḥ |
bahusmṛddhānalpapuṇyaḥ paścāttāpaṃ karotyapi || 91 ||
[Analyze grammar]

na ca yaiḥ sukṛtaṃ bhūri kṛtaṃ te'lpāḥ suduḥkhinaḥ |
yanna martye pradattaṃ tatsvarge na prāpyate kvacit || 92 ||
[Analyze grammar]

tad duḥkhaṃ tu mahat proktaṃ mānave pūrvakarmavat |
etatte sarvamākhyātaṃ guṇadoṣātmakaṃ divam || 93 ||
[Analyze grammar]

āgaccha sumune śīghraṃ yadvepsitaṃ vadā'tra me |
śrutvā vicārya tatsarvaṃ martyavat prāha mudgalaḥ || 94 ||
[Analyze grammar]

yathā cātra tathā tatra dhanadāragṛhādikam |
kleśasya bhājanaṃ cāsti patanasya bhayaṃ tathā || 95 ||
[Analyze grammar]

puṇyahāniḥ sadā tvāste vardhanaṃ na hi jāyate |
tena svargeṇa me dūta naiva kāryaṃ kathañcana || 96 ||
[Analyze grammar]

vācyastvayā mamā''deśād devarājaḥ sphuṭaṃ vacaḥ |
kṣamyatāmaparādho me na svargīyā spṛhā mama || 97 ||
[Analyze grammar]

tatkarmā'haṃ kariṣyāmi yena syāt patanaṃ na vai |
sādhayiṣyāmi tān lokān ye sadā bhayavarjitāḥ || 98 ||
[Analyze grammar]

evaṃ śrutvā mudgalaṃ taṃ sa dūtaḥ svarganispṛham |
yayau śīghraṃ mahendraṃ samprāha vistārapūrvakam || 99 ||
[Analyze grammar]

śakraḥ śrutvā'tha taṃ prāha balādānaya taṃ munim |
svargabhogārthakaṃ puṇyaṃ nā'bhuktvā kṣayameṣyati || 100 ||
[Analyze grammar]

dūtaḥ śrutvā yayau tatra yatra tiṣṭhati mudgalaḥ |
vilokya mudgalaḥ śīlaṃ jalaṃ viveśa yogataḥ || 101 ||
[Analyze grammar]

dūtaḥ sa jaḍavajjāto munerdṛṣṭyā viceṣṭakaḥ |
indraḥ smṛto'tha dūtena samāyātaḥ sureśvaraḥ || 102 ||
[Analyze grammar]

vajrahastaḥ sthito vyomni muniṃ netuṃ samīhate |
stambhayāmāsa cendraṃ taṃ dṛṣṭipātena mudgalaḥ || 103 ||
[Analyze grammar]

tadā śakraḥ stutiṃ cakre bhagnotsāhaśca muñca mām |
svarge vā yadi vā martye tiṣṭha tvaṃ muñca māṃ mune || 104 ||
[Analyze grammar]

mudgalaḥ prāha devendra durlabhaṃ darśanaṃ tava |
yāhi svargaṃ sadūtastvaṃ sthāsyāmyatraiva cā'nagha || 105 ||
[Analyze grammar]

bhajiṣye śrīkṛṣṇanārāyaṇaṃ yāsye'kṣaraṃ padam |
māṃ muñceti tvayā proktaṃ tīrthaṃ māṃmuñcanāmakam || 106 ||
[Analyze grammar]

bhavatvidaṃ sadā prakhyaṃ tava śabdena vajrabhṛt |
phālgune pūrṇamāsyāṃ ye snāsyantyatra hrade janāḥ || 107 ||
[Analyze grammar]

tarpayiṣyanti pitṝṃśca yāsyanti mokṣaṇaṃ hi te |
śrutvaivaṃ prayayau svargaṃ dūtamādāya vajrabhṛt || 108 ||
[Analyze grammar]

mudgalo'pi paraṃbrahma cintayaṃstatra saṃsthitaḥ |
anādiśrīkṛṣṇanārāyaṇaṃ dhvātvā'kṣaraṃ yayau || 109 ||
[Analyze grammar]

ityāha śaṃkaro lakṣmi pārvatīṃ tvarbudācale |
mayā te kathitaṃ tadvai mokṣadaṃ lokapāvanam || 110 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne siddhatīrthaśukratīrthamaṇikarṇatīrthapaṃgutīrthayamatīrthapuṇḍrodatīrthaśrīmātṛvindhyācalīmaṃkipiṇḍārakaraktoddhārapārthāmudgalamāṃmuñcatīrthānāṃ sopākhyānānāṃ varṇanaṃ svargasya guṇadoṣanirūpaṇaṃ cetyādināmā catuḥpañcāśadadhikapañcaśatatamo'dhyāyaḥ || 554 ||
[Analyze grammar]