Chapter 547

śrīnārāyaṇa uvāca |
śṛṇu lakṣmi tato'gastyo bhadrāśvaṃ nṛpatiṃ śubham |
ātmajñānaṃ yathā prāha vacmi te lokamokṣadamam || 1 ||
[Analyze grammar]

śaṃkareṇa prabhāse vai proktaṃ satyai purā hi tat |
bhadrāśvaḥ samapapracchā'gastyaṃ mokṣapradaṃ varam || 2 ||
[Analyze grammar]

jñānaṃ vada mahāprājña yena mokṣaṃ prayāmi vai |
agastyaḥ prāha rājānaṃ guruṃ vinā gatirna vai || 3 ||
[Analyze grammar]

gururbrahmā svayaṃ viṣṇuḥ śaṃbhurnārāyaṇo guruḥ |
gurureva parabrahma pratyakṣo bhagavān hariḥ || 4 ||
[Analyze grammar]

taṃ prasādya bhavenmokṣayogyatā dehinaḥ purā |
ātmaprasādastasyaivāśībhirjāyata eva hi || 2 ||
[Analyze grammar]

vrataṃ kuryādarcanaṃ ca prasādanaṃ punaḥ punaḥ |
jñānamantrapradātā ca tārayed bhavasāgarāt || 6 ||
[Analyze grammar]

gurave bhojanaṃ dadyād vaiṣṇavo yajña ucyate |
kuryāttu vaiṣṇavaṃ yajñaṃ yajed yogīśvaraṃ harim || 7 ||
[Analyze grammar]

yo hareḥ sarahasyaṃ tu sumantraṃ copapādayet |
tasmai dadyāttu sarvasvaṃ priyaṃ cātmārpaṇādikam || 8 ||
[Analyze grammar]

phalaṃ tasmai pradattasya koṭikoṭiguṇottaram |
sukhaṃ rājyaṃ mahānandaḥ svargaṃ mokṣaśca śāśvataḥ || 9 ||
[Analyze grammar]

gurau sati tu yaścānyamāśrayet pūjayet kudhīḥ |
sa na phalamavāpnoti dattamasya tu niṣphalam || 10 ||
[Analyze grammar]

prayatnena gurau pūrvaṃ paścādanyasya dāpayet |
avidyo vā savidyo vā gurureva janārdanaḥ || 11 ||
[Analyze grammar]

mārgastho vā'pyamārgastho gurureva parā gatiḥ |
pratipadya guruṃ yastu paścād vipratipadyate || 12 ||
[Analyze grammar]

gurvaparādhapātraṃ sa duḥkhī syāt puruṣādhamaḥ |
gurau nārāyaṇaścāste taṃ prasādya sukhī bhavet || 13 ||
[Analyze grammar]

mūrtirnārāyaṇasyaiva cetanā gurureva ha |
jāgarti snāti vastrāṇi dhārayatyeva candanam || 14 ||
[Analyze grammar]

kuṃkumādi sugandhādi gṛhṇāti sa janārpitam |
puṣpaṃ patraṃ phalaṃ toyaṃ bhojyaṃ tāmbūlakaṃ tathā || 15 ||
[Analyze grammar]

jalaṃ bhūṣāṃ kajjalādi gṛhṇāti sa janārpitam |
āsanaṃ vāhanaṃ yānaṃ paryaṃkaṃ pādukādikam || 16 ||
[Analyze grammar]

jalaṃ saubhāgyadravyādi gṛhṇāti sa janārpitam |
mano bhāvaṃ prema bhaktiṃ sevāṃ vastu tathārpitam || 17 ||
[Analyze grammar]

pādasaṃvāhanaṃ peyaṃ maitrīṃ hāsyaṃ prasannatām |
namaskāraṃ dehasevāṃ gṛhṇāti sa janārpitam || 18 ||
[Analyze grammar]

śiṣyaduḥkhaṃ dayālurvai gṛhṇāti vārayatyapi |
sāhāyyaṃ kurute śaśvajjñānaṃ dadāti śāntidam || 19 ||
[Analyze grammar]

pāpaṃ prajvālayatyeva puṇyaṃ dadāti puṣkalam |
naijaṃ sarvaṃ dadātyeva gurureva janārdanaḥ || 20 ||
[Analyze grammar]

gurureva patiḥ putraḥ satī sādhvī pativratā |
pitā mātā tathā bhāryā sarvasvaṃ gurureva ha || 21 ||
[Analyze grammar]

rakṣakaḥ poṣakaścāpi tārakaścāvabodhakaḥ |
harerdhāmnaḥ prāpakaśca gurureva hariḥ svayam || 22 ||
[Analyze grammar]

bhrātā caikaguṇo mānyaḥ pitā daśaguṇastataḥ |
mātā śataguṇā mānyā sahasraguṇako guruḥ || 23 ||
[Analyze grammar]

apāraguṇakaḥ kṛṣṇanārāyaṇaḥ pumuttamaḥ |
akṣarā'dhipatiḥ śrīmān bhagavān puruṣottamaḥ || 24 ||
[Analyze grammar]

evaṃ pratyakṣamūrtiṃ vai guruṃ sampūjayet sadā |
divyamūrtirguruḥ sākṣāddharerdivyasya yogataḥ || 25 ||
[Analyze grammar]

śiṣyasya divyatāsampādako divyahariḥ sa vai |
evaṃ matvā sadā rājan guruṃ dhyāyīta cārcayet || 26 ||
[Analyze grammar]

paraṃ kalyāṇadaṃ pātraṃ śiṣyaḥ samarjayed gurum |
bhadrāśvaḥ svagurorvākyaṃ śrutvā mumoda cātmani || 27 ||
[Analyze grammar]

sarvaṃ prāptaṃ guruḥ prāptaḥ pūrṇatāṃ manyate'pi ca |
lokānāṃ bodhalābhāya natvā prapaccha vai punaḥ || 28 ||
[Analyze grammar]

guro prāptaṃ mayā sarvaṃ prāptavyaṃ nāvaśiṣyate |
tathāpi vada me mokṣadharmān lokahitāvahān || 29 ||
[Analyze grammar]

bhagavan karmaṇā kena chidyate bhavasaṃsṛtiḥ |
kiṃvā kṛtvā na śocanti mūrtā'mūrtopapattiṣu || 30 ||
[Analyze grammar]

kiṃ kṛtvā ca parabrahmamayo bhavati mānavaḥ |
iti rājño vacaḥ śrutvā'gastyaḥ prāha pramodavān || 31 ||
[Analyze grammar]

śṛṇu rājan kathāṃ divyāṃ dūrāsannavyavasthitām |
dṛśyādṛśyavibhāgotthāṃ samāhitamanā bhava || 32 ||
[Analyze grammar]

āsīd rājyaṃ purā cāpi vartamāne bhaviṣyati |
apāraṃ ca tathā'sīmaṃ yatra sūryo na candramāḥ || 33 ||
[Analyze grammar]

na rātrirna ca divaso diśo naiva na bhūstathā |
na dyaurdevā na vā cāsan divyaṃ rājyaṃ tathā hi tat || 34 ||
[Analyze grammar]

tatra samrāṭ muktapālo rājā śāśvatajīvanaḥ |
pālayāmāsa divyān vai muktān saṃkhyāvivarjitān || 39 ||
[Analyze grammar]

prajāstaṃ mānayāmāsa sarvātmabhāvanārpaṇāḥ |
prajānāṃ bhojanaṃ miṣṭaṃ rājā sarvaṃ dadāti vai || 36 ||
[Analyze grammar]

na ca śaityaṃ nātapaśca siddhiyuktāśca tāḥ prajāḥ |
vinindrāḥ śāśvatānandā nityatṛptā nirāśayāḥ || 37 ||
[Analyze grammar]

sarve saṃkalpasatyāśca rājā''nandapariplutāḥ |
vartante ca prajāḥ sarvāstasyaiva cakravartinaḥ || 38 ||
[Analyze grammar]

yatra nānyat khaṇḍarājyaṃ sāmyavādaścaturvidhaḥ |
sālokyaṃ sarvamuktānāṃ sārṣṭitā sarvadehinām || 39 ||
[Analyze grammar]

sārūpyaṃ sarvatattvānāṃ sāyujyaṃ sarvayoginām |
bhojane ramaṇe yāne vāhane kalpane ratau || 40 ||
[Analyze grammar]

jñāne bhaktau vedane copakārye'pi samānatā |
evaṃ rājyaṃ mahad yatra satyameva na cānṛtam || 41 ||
[Analyze grammar]

yatra nyāyālayo nāsti nāsti doṣādhikāritā |
yatra cauryaṃ vaimanasyaṃ śātravaṃ vartanaṃ na vai || 42 ||
[Analyze grammar]

yatrā'śuddhistathā nāsti kṣayo yatra na vidyate |
yatra cātiśayo nāsti kuto dveṣaśca rāgakaḥ || 43 ||
[Analyze grammar]

tādṛśaṃ rājyasarvasvaṃ pratyakṣaṃ karapātravat |
dūradṛśyaṃ dūraśrāvo dūracintanamityapi || 44 ||
[Analyze grammar]

sarvaṃ sākṣāccātmatantraṃ sādhanaṃ cātmajaṃ hi tat |
tadrājyaṃ pāvanānāṃ tu prajānāmadhivāsanam || 45 ||
[Analyze grammar]

apāvanānāṃ yātrāpi tatra naiva hi jāyate |
sīmā yā cā'pāvanānāṃ tadūrdhvaṃ tadagrāhyakam || 46 ||
[Analyze grammar]

apāvanānyaraṇyāni vartante paritastataḥ |
sa cātmapālako rājā''raṇyaṃ vihartumāyayau || 47 ||
[Analyze grammar]

araṇyāni samudrāṃśca parvatān kṣetrabhūmikāḥ |
yāni divyamahārājyādadhastaṭe bhavanti ca || 48 ||
[Analyze grammar]

dāsyai dattaṃ ca tadrājyaṃ bhṛtyāya pūrvameva ha |
didṛkṣuḥ kṛpayā rājā paścimaṃ taṭamāyayau || 49 ||
[Analyze grammar]

ūrdhvaṃ tīraṃ samudrasyā'nantapārasya śāśvatam |
bhavābdhau yatra vai dvīpe dvīpe vasanti dhīvarāḥ || 50 ||
[Analyze grammar]

kāmaḥ krodhaśca lobhaśca moho madaśca pañca te |
aṣṭau drumāstathā yatra vartante kāmavarṣiṇaḥ || 51 ||
[Analyze grammar]

dharmo'dharmastathā jñānamajñānaṃ ca caturthakam |
aiśvaryaṃ cāpyanaiśvaryaṃ rāgo vairāgyamityamī || 52 ||
[Analyze grammar]

nadī tīryag yatra yāti manovahābhidhā'niśam |
adhaścordhvaṃ babhramuśca pañca mukhyāśca nāyakāḥ || 53 ||
[Analyze grammar]

śabdaḥ sparśastathā rūpaṃ raso gandhaśca nāmataḥ |
eko mukhyapradhānaśca prāṇākhyo vartate sadā || 54 ||
[Analyze grammar]

ekā strī vartate dāsī yathā rājñī balādhikā |
triguṇā sā buddhināmnī rājendra sevate sadā || 55 ||
[Analyze grammar]

sā strī sve vakṣasi nityaṃ mahendraṃ rakṣati dhruvam |
sahasrasūryapratimaṃ lakṣacandrasamā ca sā || 56 ||
[Analyze grammar]

tasyā'dharastrivikāro hāsyamāścaryamugratā |
tasyā varṇastrirūpaśca śveto raktastamomayaḥ || 57 ||
[Analyze grammar]

yuvatī sarvadā ramyā nūtaneva vrajasthitā |
vinā ca puruṣaṃ mlānā tūṣṇībhūtā mṛtā yathā || 58 ||
[Analyze grammar]

divyaṃ taṃ puruṣaṃ dṛṣṭvā samāyāntaṃ taṭā'ntigam |
sāśā sajīvanā yadvajjātā jaḍā'pi cetanā || 59 ||
[Analyze grammar]

nṛpo'pi tāṃ kṛpayaiva vilokya ca muhurmuhuḥ |
samudraṃ ca vanaṃ tasyāḥ kṣetrāṇi saṃviveśa ha || 60 ||
[Analyze grammar]

tasmin praviṣṭe nṛpatau strīrājyasthāḥ prajāstadā |
pradhānādyāśca sambhūya tatsvāgatārthamāyayuḥ || 61 ||
[Analyze grammar]

kecinnamrā jalaṃ pātramāninyurāsanādikam |
bhayādaikyaṃ gatavantaḥ kṣaṇena copadānvitāḥ || 62 ||
[Analyze grammar]

taistadādhīvarairnyāyavarjitairveṣṭito nṛpaḥ |
kāmādibhistathāpyeṣastebhyo na hṛdayaṃ dadau || 63 ||
[Analyze grammar]

athā'yaṃ nṛpatistāṃścoddhatān jñātvā vaśecchayā |
ekaṃ vai mānasaṃ putraṃ cintayāmāsa nāyakam || 64 ||
[Analyze grammar]

yadadhīnā ime sarve bhaveyurna ca syuryathā |
tāvat sā strī nirapatyā sāpatyecchāvatī hyabhūt || 65 ||
[Analyze grammar]

prārthayāmāsa rājānaṃ kuru sāpatyakāṃ ca mām |
tathā'stviti nṛpaḥ prāha suṣuve strī svakaṃ sutam || 66 ||
[Analyze grammar]

trivarṇaṃ puruṣaṃ śvetaṃ raktaṃ kṛṣṇaṃ ca sadṛśam |
jātamātraḥ so'pyuvāca mama nāma pradehi vai || 67 ||
[Analyze grammar]

mahāniti tataścakre mukhyaṃ nāma sutasya saḥ |
rājā tena prasanno'bhūt putro'pi taṃ nṛpaṃ tadā || 68 ||
[Analyze grammar]

dharṣayāmāsa vegena kintu nṛpo mahābalaḥ |
dharṣaṇaṃ tasya nāpede tato'sau putrakāmyayā || 69 ||
[Analyze grammar]

tuṣṭāva taṃ nṛpaṃ tena dattastatsadṛśaḥ sutaḥ |
so'pi tredhā'bhavattasya mahān prāhā'hameva ha || 70 ||
[Analyze grammar]

asmītināmataḥ khyāto'haṃkāraḥ pitṛsadṛśaḥ |
evaṃ putraṃ praputraṃ ca labdhvā strī cātiharṣitā || 71 ||
[Analyze grammar]

tadbalena tataḥ sā strī taṃ rājānaṃ rurodha ha |
tathāpi na niruddhaḥ sa yadā vai balavattamaḥ || 72 ||
[Analyze grammar]

tadā naijaṃ balaṃ matvā nyūnaṃ sainyaṃ ca sā punaḥ |
vavre putrān pañca cānyān ahaṃkārasya bālakān || 73 ||
[Analyze grammar]

rājā dadau ca tān pañca tanmātrātmakabālakān |
te'pi cāgatya ca sarve saṃbhūya rurudhurnṛpam || 74 ||
[Analyze grammar]

tathāpi bhūpatiḥ siddho ruddho naiva ca naiva ca |
tadā vavre tu sā nārī daśa pañca ca bālakān || 75 ||
[Analyze grammar]

tathāstviti nṛpaḥ prāha dadau daśendriyāṇi ca |
pañcaprāṇān dadau te ca sambhūya rurudhurnṛpam || 76 ||
[Analyze grammar]

tathāpyayaṃ na ruddho'bhūt tataste'nyāśrayaṃ yayuḥ |
svarājyasthaṃ mahendraṃ te saṃveṣṭya saṃsthitāstadā || 77 ||
[Analyze grammar]

indraścātmā mahendraḥ sa ruddho dasyubhireva ha |
indreṇa saha te sarve hyekībhūya hi dasyavaḥ || 78 ||
[Analyze grammar]

rājānaṃ ca tato hantuṃ baddhuṃ vā manthituṃ ca vā |
udyatāḥ sahasā tatra tathāpi baddha eva na || 79 ||
[Analyze grammar]

atha sarvān vihāyaiva rājā gantuṃ samīhate |
tāvat sendrāstadā sarve babhūvuśca mṛtā yathā || 80 ||
[Analyze grammar]

punaḥ sarvaiḥ prārthitaśca jīvānārthaṃ ca taiḥ punaḥ |
melayituṃ maṇḍale sve vartayituṃ sadā saha || 81 ||
[Analyze grammar]

tadā dayālurbhagavān divyarājyakaraḥ prabhuḥ |
svasthāne kāryakartāraṃ baddhamivā'nugāminam || 82 ||
[Analyze grammar]

puruṣaṃ janayāmāsa yathā karmānurūpiṇam |
hiraṇyavarṇaṃ nirliptaṃ nṛpājñālepamāsthitam || 83 ||
[Analyze grammar]

striyā mahatā'haṃkṛtyā kāmādyairabhivāñcchitam |
śabdādyaiḥ śravaṇādyaiśca prāṇādyairabhisatkṛtam || 84 ||
[Analyze grammar]

janayitvā dadau tebhyo ruddhaḥ saṃveṣṭitaśca saḥ |
jaḍacetanagranthiśca hiraṇmayo naraśca saḥ || 85 ||
[Analyze grammar]

sadṛśān janayāmāsa romasaṃkhyākabālakān |
suśobhamānān vairājāṃste'pi tṛṣṇākulāstataḥ || 86 ||
[Analyze grammar]

asaṃkhyabālakān svalpān sasṛjurnābhideśataḥ |
tebhyo dattā mahātṛṣṇā pratyekaṃ ca pravartikā || 87 ||
[Analyze grammar]

kāryakāṇḍaprayoktrī ca vāsanā cā'parā'rpitā |
ubhābhyāṃ ramate brahmā janayatyaparāḥ prajāḥ || 88 ||
[Analyze grammar]

etat sarvaṃ paraṃ kāryakaraṃ kuṭumbameva saḥ |
striyai dattvā yayau naijaṃ deśaṃ divyaṃ nṛpaśca saḥ || 89 ||
[Analyze grammar]

tāvallīnāni sarvāṇi kuṭumbāni śubhāni vai |
tairlīnairnṛpateścendro nirāśrayo babhūva ha || 90 ||
[Analyze grammar]

ruroda pāparuddhaḥ sa vāsanākramavāsitaḥ |
punaḥ kṛpālurbhūpālastadarthaṃ sukhamāśrayam || 91 ||
[Analyze grammar]

dadau vyoma tato vāyuṃ tejo jalaṃ bhuvaṃ tathā |
līnebhyo vyaktarūpāṇi dattavān bhūpatiḥ sa vai || 92 ||
[Analyze grammar]

sāvakāśāni pañcaikyabhāvāpannāni kāryataḥ |
saṃyuktāni mahendrasyā''śrayāṇyālambanāni ca || 93 ||
[Analyze grammar]

tāvattāni ca līnāni samudbhūtāni vai punaḥ |
jīvitāni svakāryeṣu samāgatya sthitāni ca || 94 ||
[Analyze grammar]

mahendro dasyubhirvyāpto navadvāre pure śubhe |
rājyaṃ ca kārayāmāsa pracakāra svayaṃ tathā || 95 ||
[Analyze grammar]

mahendrādyā babhramuśca digbhrame cāti pīḍitāḥ |
tadā taṃ nṛpatiṃ prāhurdehi mārgapradarśakam || 96 ||
[Analyze grammar]

prārthanāṃ paramāṃ śrutvā rājā kanyāṃ subodhinīm |
dadau mahendrasaṃjñāya yathā divyanṛpālayaḥ || 97 ||
[Analyze grammar]

pradṛśyate tayā sākaṃ mahendraḥ sukhavānabhūt |
amūrtā iva te sarve nyūṣurāyatane śubhe || 98 ||
[Analyze grammar]

navadvāre pure tvekastambhe sarvakakubpathe |
nadīsahasrasaṃkīrṇe sarvakāryasamāśrite || 99 ||
[Analyze grammar]

mahendraṃ tvekalaṃ dṛṣṭvā sakhāyaṃ nṛpatiśca saḥ |
āvartamānaṃ mugdhaṃ ca naṣṭamiva sthitaṃ ca tam || 100 ||
[Analyze grammar]

saṃsūcya vācakān śabdān vedānaśikṣayacchubhān |
niyamāṃśca yamāṃścāpi śikṣayamāsa vai tadā || 101 ||
[Analyze grammar]

tena moho vinaṣṭo vai sasmāra bhūpatiṃ punaḥ |
kintu bandhairveṣṭitaḥ sa na nirgantuṃ śaśāka ha || 102 ||
[Analyze grammar]

śastraṃ tvaicchattadā devānnṛpateḥ śīghrameva tu |
bhūpaḥ śastramasaṃgaṃ ca dadāvasmai suvajrakam || 103 ||
[Analyze grammar]

chitvā tadā mahendraśca bandhanāni nṛpālayam |
yayau nityasukhānandānvito'bhūt kṣaṇamātrataḥ || 104 ||
[Analyze grammar]

mahendrāḥ sarva evaite pūrvakarmānusārataḥ |
kāyānagararājāno bhavanti bhavasāgare || 105 ||
[Analyze grammar]

caturviṃśaticauraiśca baddhyante madhyasaṃsthitāḥ |
upāsanayā buddhyā ca bhaktyā dāsyena yogataḥ || 106 ||
[Analyze grammar]

anyatamena śastreṇa bhittvā bandhanameva ca |
yāti divyanṛparājyaṃ punaryatra na bandhanam || 107 ||
[Analyze grammar]

āgateyaṃ kathā rājan sarvasya viṣaye sthitā |
tvaddehe mama dehe ca sarvajantuṣu sadṛśī || 108 ||
[Analyze grammar]

māyārājyaṃ vihāyaiva divyabhūpāśrayaṃ caret |
tenamuktasthitiṃ prāpya śāśvataṃ sukhamaśnute || 109 ||
[Analyze grammar]

pravṛttaṃ maṇḍalaṃ hitvā nivṛttaṃ padamāpnuyāt |
pārvatyai śaṃkaraścaiva prāha lakṣmi mayoditam || 110 ||
[Analyze grammar]

agastyaśca samuvāca bhadrāśvāya nṛpāya ca |
so'yaṃ rājā ca saurāṣṭre prāpya jñānamanuttamam || 111 ||
[Analyze grammar]

yayau rājyaṃ svakaṃ tatra samārādhya narāyaṇam |
māhendramaṇḍalaṃ hitvā bhaktyā nārāyaṇasya saḥ || 112 ||
[Analyze grammar]

yayau mokṣapadaṃ divyanṛpatervāsarūpakam |
paṭhed yaḥ śṛṇuyāccāpi labhetātmavisarjanam || 113 ||
[Analyze grammar]

bhavapāraṃ paraṃ pāraṃ māyābdhervāsanākṣayam |
purātanaṃ mahāmitraṃ prāpnuyānnātra saṃśayaḥ || 114 ||
[Analyze grammar]

sakāmasya dhanaṃ putro'patyāni sampadastathā |
bhaveyuśca sadārogyaṃ tattvajñānaśravāt priye || 115 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne bhadrāśvarājñe'gastyapradattātmajñānagurumahimādinirūpaṇanāmā saptacatvāriṃśadadhikapañcaśatatamo'dhyāyaḥ || 547 ||
[Analyze grammar]