Chapter 533

śrīnārāyaṇa uvāca |
śṛṇu lakṣmi ca devānāṃ vivāde'dhyātmasaṃjñitam |
jñānaṃ pūrve varāhaḥ śrībhagavānāha yad bhuve || 1 ||
[Analyze grammar]

cintāmaṇisamutpannaḥ suprabho nāma bhūpatiḥ |
prajāpālo'sya nāmāpi dvitīyaṃ sārthakaṃ tvabhūt || 2 ||
[Analyze grammar]

sa tvekadā yayau ṛṣyāśramān draṣṭuṃ mudā ṛṣīn |
yatra mahātapā nāma ṛṣiḥ kalpāyurasti ca || 3 ||
[Analyze grammar]

tapastapatyanāhāro japan brahmasanātanam |
yatra vṛkṣāstathā vallyaḥstambāstṛṇāni pakṣiṇaḥ || 4 ||
[Analyze grammar]

paśavaśca mṛgāḥ sarīsṛpāḥ santi mumukṣavaḥ |
rāgadveṣavihīnāśca ṛṣivattapaāsthitāḥ || 5 ||
[Analyze grammar]

tānpaśyan sa prajāpālo mahātapasa āśramam |
praviveśa mudā taṃ ca ṛṣiṃ dṛṣṭvā mumoda ca || 6 ||
[Analyze grammar]

nanāma parayā bhaktyā cakāra daṇḍavanmudā |
kuśāsanasthitasyāsya ṛṣervai darśanāttadā || 7 ||
[Analyze grammar]

matiṃ māyāmayīṃ tūrṇaṃ visasmāra jaganmayīm |
muneḥ sānnidhyato rājā cakāra dharmamānasam || 8 ||
[Analyze grammar]

ātmajñānasya jijñāsāṃ mokṣopāyāgamaṃ tathā |
munistaṃ ca nṛpaṃ dṛṣṭvā cakārā'bhyāgatakriyām || 9 ||
[Analyze grammar]

āsanaṃ svāgataṃ pānaṃ bhojanaṃ kuśalaṃ vacaḥ |
tataḥ papraccha taṃ śāntaṃ muniṃ vinayavān nṛpaḥ || 10 ||
[Analyze grammar]

bhagavan duḥkhasaṃsāramagnaiḥ puṃbhirjigīṣubhiḥ |
yatkāryaṃ tanmamāśaṃsa praṇatasya sukhāvaham || 11 ||
[Analyze grammar]

mahātapāstu tacchrutvā prāha rājannibodha me |
saṃsārārṇavamagnaiśca potaḥ sthiro dhruvo dṛḍhaḥ || 12 ||
[Analyze grammar]

kāryaḥ śrīmatkṛṣṇanārāyaṇaḥ śrīpuruṣottamaḥ |
pūjā dānāni yajñāśca dhyānaṃ sarvārpaṇaṃ tathā || 13 ||
[Analyze grammar]

dāsyaṃ cemāni divyāni sopānāni matāni vai |
teṣāṃ niḥśreṇikāṃ bhaktiṃ gṛhītvā''rohaṇaṃ kuru || 14 ||
[Analyze grammar]

pārāvārasyāpi pāraṃ gamiṣyasi na saṃśayaḥ |
nṛpaḥ prāha kathaṃ pūjā kartavyā tasya vai hareḥ || 15 ||
[Analyze grammar]

ṛṣiḥ prāha hareḥ pūjā kāryā yathā vadāmi te |
dhātvādīnā pratimāyāṃ śālagrāme śive'thavā || 16 ||
[Analyze grammar]

sādhujaneṣu sādhvīṣu gauḥṣu gurau janārdanam |
bhāvayet svāmini pitrāḥ pativratāyāṃ bhāskare || 17 ||
[Analyze grammar]

vahnau vipre kanyakāyāṃ bāle'nāthe nirāśrite |
caityavṛkṣe tulasyā ca bhāvayet puruṣottamam || 18 ||
[Analyze grammar]

mānasaṃ hṛdaye dhyāyedindriyādau ca varṣmaṇi |
devaṣu cātmāna dhyāyet pūjayecchrīpatiṃ tathā || 19 ||
[Analyze grammar]

puruṣāṇāṃ tathā strīṇāṃ tathā kṛṣṇaḥ prasīdati |
ime sarve samutpannā harereva harastanuḥ || 20 ||
[Analyze grammar]

agnistathā'śvinau gaurī gaṇeśaśca bhujaṃgamaḥ |
kārtikeyastathā''dityā mātaraścāpi durgikāḥ || 21 ||
[Analyze grammar]

diśaḥ kubero viṣṇuśca yamo rudraḥ śaśā tathā |
pitaraśceti saṃbhūtā nārāyaṇasya mūrtitaḥ || 22 ||
[Analyze grammar]

ta ete pūjanīyā vai nārāyaṇasamanvitāḥ |
mūrtayaste bhavantyeva nārāyaṇasamudbhavāḥ || 23 ||
[Analyze grammar]

rājā prāha mayā kutra prāptavyāstāḥ sumūrtayaḥ |
yenā'haṃ pūjayāmyeva sūpacāraiśca gocarān || 24 ||
[Analyze grammar]

ṛṣiḥ prāha śṛṇu rājan teṣāṃ dvedhā hi mūrtayaḥ |
divyā devasvarūpāśca pratyakṣā na bhavanti tāḥ || 25 ||
[Analyze grammar]

ādityāste śarīre'tra vasantyeva ca gocarāḥ |
ta ete ca bhavantyeva sadā tattvāṃśarūpiṇaḥ || 26 ||
[Analyze grammar]

ekadā te pṛthakpṛthak prāptā garvaṃ samantataḥ |
ahaṃ yogyo'smyahaṃ śreṣṭhaścā'haṃ yājyaḥ sadā tanau || 27 ||
[Analyze grammar]

nānyo matsadṛśaścātra dehe bhavati kaścana |
evaṃ teṣāṃ hi tattvānāṃ vivādaḥ samajāyata || 28 ||
[Analyze grammar]

teṣāṃ vivadamānānāṃ nirṇayārthaṃ tu yuktitaḥ |
hiraṇyagarbho bhagavān provāca tānprati prabhuḥ || 29 ||
[Analyze grammar]

yuṣmākaṃ yadvinā cedaṃ na syāttadvai mahattamam |
evamukte prathamaṃ tu vahnirutthāya pārthiva || 30 ||
[Analyze grammar]

uvācā'haṃ mahānasmi māṃ yajadhvaṃ mamāśraye |
vināśamupagacchedvai śarīraṃ madvinā kṛtam || 31 ||
[Analyze grammar]

evamuktvā jāṭharo'gnirvaiśvānaro viniryayau |
tyaktvā dehaṃ varṣamātramuvāsā'nyatra vai tataḥ || 32 ||
[Analyze grammar]

nirgate'pi tu tasmiṃstaccharīraṃ nahi śīryate |
tadā jñātaṃ vahninā vai nāhaṃ śreṣṭhatamaḥ punaḥ || 33 ||
[Analyze grammar]

tato'śvinau mūrtimantau prāṇāpānasvarūpiṇau |
āvāṃ pradhānāvityevamūcaturdevamaṇḍale || 34 ||
[Analyze grammar]

evamuktvā śarīraṃ saṃvihāya kvacidāsthitau |
varṣamātraṃ śarīraṃ tu tadvināpi sthitaṃ yathā || 35 ||
[Analyze grammar]

vāyuvyāpārahīnaṃ ca susthiraṃ kuṃbhakena vai |
tayorjñānaṃ tadā jātaṃ nā''vāṃ śreṣṭhatamau yataḥ || 36 ||
[Analyze grammar]

tato vāgabravīd gaurī prādhānyaṃ mama vartate |
sā'pyevamuktvā kṣetrāttu niścakrāma bahiḥ śubhā || 37 ||
[Analyze grammar]

tayā vināpi tatkṣetraṃ vāgūnaṃ vyavatiṣṭhata |
maunaṃ tena tayā jñātaṃ nāhaṃ śreṣṭhatamā yataḥ || 38 ||
[Analyze grammar]

tato gaṇapatirvākyamākāśākhyo'bravīttadā |
na mayā rahitaṃ kiñciccharīraṃ sthāyi vatsaram || 39 ||
[Analyze grammar]

mahānahaṃ samuccārya so'pi niṣkramya dehataḥ |
pṛthagbhūtastathāpyetaccharīraṃ nāpyanīnaśat || 40 ||
[Analyze grammar]

vināśākhyamapi tena vinā naiva viśīryate |
suṣiraistu vihīnaṃ tad yathāpūrvaṃ vyavasthitam || 41 ||
[Analyze grammar]

tena vyomno'bhavad bodho nāhaṃ śreṣṭhatamo yataḥ |
atha vai dhātavaḥ sarve sthūlabhūtādayopi ca || 42 ||
[Analyze grammar]

prāhurasmadvihīnasya śarīrasya na dhāraṇam |
vayaṃ śreṣṭhā iti coktvā jahurdehaṃ śarīrajāḥ || 43 ||
[Analyze grammar]

tairvyapetamapi kṣetraṃ puruṣeṇa prapālyate |
na ca naṣṭaṃ kintu śuṣkaṃ jātaṃ sacetanaṃ hyapi || 44 ||
[Analyze grammar]

tena jātaṃ hi dhātūnāṃ jñānaṃ śreṣṭhā vayaṃ nahi |
taṃ dṛṣṭvā cā'bravīt skandaḥ so'haṃkārasvarūpavān || 45 ||
[Analyze grammar]

mayā vinā śarīrasya saṃbhūtirapi neṣyate |
tasmācchreṣṭhatamaścāhaṃ nānyo'sti sadṛśo mayā || 46 ||
[Analyze grammar]

evamuktvā śarīrāttu sa vyapetaḥ pṛthaksthitaḥ |
vatsaraṃ ca vinā tena dehaṃ muktavadāsthitam || 47 ||
[Analyze grammar]

na śīrṇaṃ na mṛtaṃ cāpi śāntaṃ tiṣṭhati pūrvavat |
tena tasyā'bhavajjñānaṃ nāhaṃ śreṣṭhatamo yataḥ || 48 ||
[Analyze grammar]

atha cakṣurbhānurūpaṃ kupitaṃ tvarayā'bravīt |
mayā vinā na vai kṣetraṃ kṣaṇaṃ cāpi pravartate || 49 ||
[Analyze grammar]

evamuktvā'tha yātaṃ tat śarīraṃ tu na śīryate |
āgatya ca yathāpūrvaṃ sthitaṃ dadarśa varṣma tat || 50 ||
[Analyze grammar]

tena tasyā'bhavajjñānaṃ nāhaṃ śreṣṭhatamaṃ yataḥ |
tataḥ kāmādidoṣāṇāṃ tanmātrāṇi ca mātaraḥ || 51 ||
[Analyze grammar]

śabdādyāśca samūcurvai vayaṃ śreṣṭhatamā iti |
nā'smābhirvyatiriktasya śarīrasya vyavasthitiḥ || 52 ||
[Analyze grammar]

uktvā mātrāgaṇo varṣaṃ bahiryayau tataḥ punaḥ |
śarīraṃ śīryate naiva pūrvavadeva saṃsthitam || 53 ||
[Analyze grammar]

mātrāṇāmabhavajjñānaṃ na naḥ śreṣṭhyaṃ tataḥ khalu |
mūlamāyā triguṇātmā durgā'bravīd ruṣā satī || 54 ||
[Analyze grammar]

na mayā'sya vinā bhūtistasmācchreṣṭhā'smi sarvataḥ |
ityuktvā'ntardadhe varṣaṃ punareva samāgatā || 55 ||
[Analyze grammar]

dṛṣṭvā dehaṃ yogabhāvamāpannaṃ cetanena vai |
yathāpūrvamabhūnnaiva śīrṇaṃ naṣṭaṃ mṛtaṃ na vā || 56 ||
[Analyze grammar]

cetanasya pratāpena tattathaiva vyavasthitam |
tatastasyāḥ samabhavajjñānaṃ śreṣṭhā na cāpyaham || 57 ||
[Analyze grammar]

tato diśaḥ samuttasthurūcuścedaṃ vaco mahat |
nāsmābhī rahitaṃ kāryaṃ bhavatīti vicārya tāḥ || 58 ||
[Analyze grammar]

śrotrayuktā gatā varṣaṃ śarīraṃ na hi śīryate |
yathāpūrvamabhūttattu kārṇaśravaṇavarjitam || 59 ||
[Analyze grammar]

tena tāsāmabhūjjñāna vayaṃ śreṣṭhatamā na vai |
atha dhanañjayo vāyurdhaneśaḥ prāha sarvathā || 60 ||
[Analyze grammar]

prāṇe yāte'pyahaṃ sthātā tryahaṃ śaveṣu cāntataḥ |
māṃ vinā na śarīraṃ syād durgandhaṃ nāśamāpnuyāt || 61 ||
[Analyze grammar]

tataḥ śreṣṭhatamaścāsmītyuktvā dūragato'bhavat |
tathāpi cetanayuktaṃ yathāvadvai sutiṣṭhati || 62 ||
[Analyze grammar]

tena tasyā'bhavajjñānaṃ nāhaṃ śreṣṭhatamaḥ khalu |
tato viṣṇurmanaḥ prāha nā'yaṃ deho mayā vinā || 63 ||
[Analyze grammar]

tasmācchreṣṭhatamaṃ cāhamityuktvā'ntardadhe'pi ca |
amananaṃ śarīraṃ tu pūrvavadeva saṃsthitam || 64 ||
[Analyze grammar]

dṛṣṭvā tasmā'bhavajjñānaṃ nāhaṃ śreṣṭhatamaṃ yataḥ |
tato dharmaḥ kṛtaṃ karmābravīccāhaṃ mahattamam || 65 ||
[Analyze grammar]

ahaṃ pālitavān dehaṃ tasmācchreṣṭho'smi sarvathā |
idānīṃ mayyapagate kathametad bhaviṣyati || 66 ||
[Analyze grammar]

evamuktvā gatau dharmādharmau karmātmakāvubhau |
tathāpi cātmanā yuktaṃ śarīraṃ nahi śīryate || 67 ||
[Analyze grammar]

āgatya dvau niścayaṃ hi cakraturna mahattamau |
athā'bravīnmahādevo mahattattvaṃ mahattamam || 68 ||
[Analyze grammar]

ahameva mahānasmi mayā hīnaṃ na tiṣṭhati |
evamuktvā gataḥ śaṃbhurmahattattvaṃ śarīrataḥ || 69 ||
[Analyze grammar]

varṣamātraṃ tathāpyetaccharīraṃ śīryate na vai |
tatastasyā'bhavajjñānaṃ nāmamātraṃ mahān mama || 70 ||
[Analyze grammar]

vastuto na mahānasmi mṛṣā me śreṣṭhatā khalu |
athātra pitaraścocurindriyārthāḥ mahattamāḥ || 71 ||
[Analyze grammar]

śabdādyāśca vayaṃ sthūlā asmābhirdehajīvanam |
tato vayaṃ tu sarvebhyo baliṣṭhāśca mahattamāḥ || 72 ||
[Analyze grammar]

vinā'smākaṃ ca vai śīghraṃ śarīraṃ sampraśīryate |
evamuktvā tu taddehaṃ tyaktvā'ntardhānamāgatāḥ || 73 ||
[Analyze grammar]

tathāpi na śarīraṃ tad viśīrṇaṃ vai manāgapi |
tatasteṣāmabhūjjñānaṃ vayaṃ śreṣṭhatamā na vai || 74 ||
[Analyze grammar]

atha bhujaṃgikā yā tu vāsanā samuvāca sā |
ahaṃ śreṣṭhatamā māṃ tu vinā dehaṃ na tiṣṭhati || 75 ||
[Analyze grammar]

sāpi varṣaṃ gatā dūraṃ punareva samāgatā |
dṛṣṭvā pūrvaṃ yathā varṣma viveda nottamā'pyaham || 76 ||
[Analyze grammar]

atha sarve'pi sambhūya dehaṃ tyaktvā bahiryayuḥ |
agniḥ prāṇastathā'pāno vyoma sarve ca dhātavaḥ || 77 ||
[Analyze grammar]

ahaṃkāro mano bhānuḥ kāmādyāśca gaṇāstathā |
kāṣṭhā vāyurviṣṇudharmau śaṃbhuścāpīndriyārthakāḥ || 78 ||
[Analyze grammar]

etairmuktamapi kṣetraṃ muktāviva susaṃsthitam |
somena cātmanā yogaiśvaryeṇarakṣitaṃ yataḥ || 79 ||
[Analyze grammar]

pālyamānaṃ na viśīrṇaṃ tena teṣāṃ gaṇasya ca |
garvo naṣṭo na vai śreṣṭhaḥ samudāyo'pi naḥ khalu || 80 ||
[Analyze grammar]

atha somasya jīvasya garvo'bhavanmahattamaḥ |
mayā vai pālyate dehastato'haṃ sarvathottamaḥ || 81 ||
[Analyze grammar]

evaṃ vai niścite some ṣoḍaśātmanyathā'kṣare |
tvaṃ mahāniti jānīmaḥ kintu tatsaṃśayāspadam || 82 ||
[Analyze grammar]

yadvinā na śarīraṃ vai santiṣṭheta hi tanmahat |
tvaṃ cāpyatra parīkṣāṃ saṃkuru cātman nijasya hi || 83 ||
[Analyze grammar]

vijñāsyāmastatastetra śraiṣṭhyaṃ divyaṃ hi nānyathā |
evamukto hi jīvātmā niryayau dehatastadā || 84 ||
[Analyze grammar]

babhrāma ca bahirvarṣaṃ sarvānādāya cāmbare |
nityaṃ tyaktaṃ śarīraṃ ca paśyatyeva bahiḥ sthitaḥ || 85 ||
[Analyze grammar]

kintu nārāyaṇastatra tasthau śrīpuruṣottamaḥ |
jīvātmano garvanāśaṃ kartuṃ kṛṣṇanarāyaṇaḥ || 86 ||
[Analyze grammar]

śarīraṃ cetayāmāsa rakṣayāmāsa sādaram |
svaiśvaryeṇa guṇaiḥ svīyairvinā'pyātmānamāntaram || 87 ||
[Analyze grammar]

prāgavasthaṃ śarīraṃ tu dṛṣṭvā sarvajñapālitam |
tābhiśca devatattvaiśca jīvātmā punarāyayau || 88 ||
[Analyze grammar]

tena sa jñātavānnā'haṃ śreṣṭho'tra saṃbhavāmi vai |
atha tā devatāḥ prāhurvayaṃ sthāsyāma eva hi || 89 ||
[Analyze grammar]

gaccha tvamekalaścātman jīvāmo vā na vai vayam |
ityukto jīvavarmā'sau tāṃstyaktvā niryayau bahiḥ || 90 ||
[Analyze grammar]

jaḍatulyo'bhavattatra bahirnārāyaṇaṃ vinā |
acetana iva jātaḥ suṣupta iva sarvathā || 91 ||
[Analyze grammar]

atejaska iva jāto'prakāśa iva dhūmrakaḥ |
mṛta ivā'bhavattatra kṛṣṇanārāyaṇaṃ vinā || 92 ||
[Analyze grammar]

śarīre tu sthitā vahnyādayo hi jīvamantarā |
api śrīmatkṛṣṇanārāyaṇasyā'nvayataḥ khalu || 93 ||
[Analyze grammar]

divyayogād divyabhāvaṃ brahmabhāvaṃ samāsthitāḥ |
parabrahmaṇo yogena brahmabhāvaṃ prapedire || 94 ||
[Analyze grammar]

jaḍā api ca te jātāścetanā muktasadṛśāḥ |
śrīhareranyathākartuṃ samarthasya prasaṃgataḥ || 95 ||
[Analyze grammar]

tāḥ kṣetradevatāḥ sarvā vailakṣyabhāvamāsthitāḥ |
sthūlaṃ sūkṣmaṃ kāraṇaṃ ca śarīratrayamityapi || 96 ||
[Analyze grammar]

nārāyaṇasya yogena nārāyaṇātmakaṃ tadā |
prāptaṃ nārāyaṇarūpaṃ divyaṃ brahmātmakaṃ yataḥ || 97 ||
[Analyze grammar]

tadā jīvātmano garvo naṣṭaḥ sarvastadā'bhavat |
tasyāpi cā'bhavajjñānaṃ nā'haṃ śreṣṭhatamo yataḥ || 98 ||
[Analyze grammar]

śreṣṭhaḥ pūjyaḥ sadā dhyeyaḥ smartavyaḥ śrīhariṃ sadā |
yena jātāni jīvanti vahnyādyāḥ sarvadevatāḥ || 99 ||
[Analyze grammar]

yenā''śrito'pyahaṃ jīvo jīvāmi nānyathā kvacit |
tadyogena pathā divyaścātmā bhavāmi sarvathā || 100 ||
[Analyze grammar]

tadyogena tathaitāni tattvānyapi ca sarvathā |
divyānyeva hi jātāni yāni pūrvaṃ jaḍānyapi || 101 ||
[Analyze grammar]

māṃ vinā'pi ca divyā vai muktāḥ syuste ca dhāmasu |
yadīcchenmāṃ vihāyaiva jaḍā divyā bhavantviti || 102 ||
[Analyze grammar]

sarvaṃ kartuṃ samarthasya vivṛtiṃ ko nivārayet |
tasmānnārāyaṇaḥ kṛṣṇaḥ sarvaśreṣṭhatayā mataḥ || 103 ||
[Analyze grammar]

tato devāstuṣṭuvustaṃ sarvasthaṃ parameśvaram |
svasvasthāne sthitāḥ prāhuḥ kṛṣṇanārāyaṇaṃ muhuḥ || 104 ||
[Analyze grammar]

tvamagnistvaṃ tathā prāṇastvamapāno bhavasyapi |
tvaṃ vāṇī cāmbaraṃ tvaṃ ca dhātavastvaṃ śarīragāḥ || 105 ||
[Analyze grammar]

ahaṃbhāvastvamevā'si tvamevāsi ca netrakam |
tvaṃ śabdādīni mātrāṇi tvaṃ māyā triguṇātmikā || 106 ||
[Analyze grammar]

tvaṃ śrotraṃ vartase dhanaṃjayo'pi tvaṃ manastathā |
tvaṃ dharmastvaṃ mahattattvamindriyārthāstvameva ca || 107 ||
[Analyze grammar]

tvaṃ ca sadvāsanātmā ca jīvātmā tvaṃ narāyaṇaḥ |
sarvātmā tvaṃ vinā tvāṃ vai naite sattāmayaḥ kvacit || 108 ||
[Analyze grammar]

satā tvayā vayaṃ santaḥ sarveśastvaṃ pareśvaraḥ |
svāmī patiḥ poṣakaśca jīvātuḥ rakṣakastathā || 109 ||
[Analyze grammar]

asmābhirapayātaistu kathametad bhaviṣyati |
evamatra śarīraṃ tu tyaktamasmābhireva tu || 110 ||
[Analyze grammar]

tvayā vai rakṣitaṃ divyaṃ tatsthānnastvaṃ prapālayeḥ |
sthānabhaṅgo na naḥ kāryastavādhīnā vayaṃ sadā || 111 ||
[Analyze grammar]

evaṃ stutastato devasteṣāṃ toṣaṃ paraṃ yayau |
uvāca caitān krīḍārthaṃ bhavantaśca kṛtā mayā || 112 ||
[Analyze grammar]

bhavaddvārā prakrīḍāmi nānyadasti prayojanam |
varaṃ vṛṇuta devā vai tuṣṭo'smi ca dadāmi ca || 113 ||
[Analyze grammar]

tadā devā vavrire vai dvedhā svarakṣaṇaṃ sadā |
śarīreṣu yathāvasthaṃ divyabhāvena cāparam || 114 ||
[Analyze grammar]

śrīharistāṃ tadā prāha dve dve pratyekaśo'dhunā |
rūpe dhṛtvā kṛpayā me tiṣṭhantu kathayāmi ca || 115 ||
[Analyze grammar]

bhūtakāryeṣvamūrtena tattvarūpeṇa sarvathā |
devaloke tu mūrtena tiṣṭhadhvaṃ mama sevakāḥ || 116 ||
[Analyze grammar]

pralaye ca layaṃ mayi tvāviśata drutaṃ surāḥ |
abhidhānāni devānāṃ yuṣmākaṃ ca karomyaham || 117 ||
[Analyze grammar]

agnirvaiśvānaro devaḥ prāṇāpānau tathā'śvinau |
vāṇī gaurī himaputrī vyoma padmāvatīpitā || 118 ||
[Analyze grammar]

śarīradhātavaśceme nānābhūtāni caiva ha |
ahaṃkāraḥ svayaṃ skandaḥ kārtikeyo bhaviṣyati || 119 ||
[Analyze grammar]

netre sūryaśaśirūpe svargadevau bhaviṣyataḥ |
śabdādīni ca mātrāṇi gajavaktro bhaviṣyati || 120 ||
[Analyze grammar]

śarīramāyā durgā ca kāraṇānte bhaviṣyati |
śrotraṃ digbhāvamāpannaṃ devarūpaṃ bhaviṣyati || 121 ||
[Analyze grammar]

dhanaṃjayo dhaneśo vai kuberaḥ saṃbhaviṣyati |
idaṃ mano viṣṇunāmā bhaviṣyati na saṃśayaḥ || 122 ||
[Analyze grammar]

dharmo'pi yamanāmā ca yāmyadevo bhaviṣyati |
mahattattvaṃ ca bhagavān mahādevo bhaviṣyati || 123 ||
[Analyze grammar]

indriyārthāśca pitaro bhaviṣyanti na saṃśayaḥ |
vāsanā ca ratirūpā bhaviṣyati tu kāminī || 124 ||
[Analyze grammar]

jīvātmā me nararūpaḥ pārśvasthaḥ saṃbhaviṣyati |
kvacicca candramā bhūtvā'mṛtādhāro bhaviṣyati || 125 ||
[Analyze grammar]

evaṃ varapradānena jātāste sṛṣṭidevatāḥ |
hiraṇyagarbhatattvasthā dehe'pi tāni cāpi hi || 126 ||
[Analyze grammar]

parabrahma tu yaḥ proktaḥ kṛṣṇanārāyaṇaḥ prabhuḥ |
sa eva devatārūpaḥ sṛṣṭau vai vartate prabhuḥ || 127 ||
[Analyze grammar]

sa eva tattvarūpaśca śarīre'tra vasatyapi |
tasmād rājan bhaja devāṃstathā tattvāni varṣmaṇi || 128 ||
[Analyze grammar]

śarīre tvaṃ pūjayaitānabhedena harau sadā |
sa eva tu tvayā svasmin labdho'styanyatra mā vraja || 129 ||
[Analyze grammar]

evaṃ vedāntapuruṣaḥ prokto nārāyaṇātmakaḥ |
evaṃprabhāvo devo'sau vedavedyo janārdanaḥ || 130 ||
[Analyze grammar]

śrīpatiḥ śrīkṛṣṇanārāyaṇo'nādyanta eva saḥ |
kathito nṛpate tubhyaṃ prajāpāla hi taṃ bhaja || 131 ||
[Analyze grammar]

ityuktvā virarāmā'sau mahātapā munistadā |
vārāhaḥ prāha pṛthivīṃ tvayyapi santi te surāḥ || 132 ||
[Analyze grammar]

tān devān bhaja deveśi yena mokṣo bhaved dhruvam |
iti te kathitaṃ lakṣmi pratyakṣākhyānamaiśvaram || 133 ||
[Analyze grammar]

paṭhanācchravaṇāccāsya tathoktānāṃ prapūjanāt |
tattvānāṃ brahmavijñānānyukto bhavati mānavaḥ || 134 ||
[Analyze grammar]

dharmārthakāmamokṣāṇāṃ parā siddhiḥ prajāyate |
evamekātmatāṃ jñātvopāsate ṛṣayo harim || 135 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne prajāpālarājño mahātapānāmakaṛṣipradattaśārīratattvātmakavedāntapuruṣajñānopāsanādinirūpaṇanāmā trayastriṃśadadhikapañcaśatatamo'dhyāyaḥ || 533 ||
[Analyze grammar]