Chapter 531

śrīnārāyaṇa uvāca |
śṛṇu lakṣmyekadā ramye tvaśvapaṭṭasarovare |
kuṃkumavāpikākṣetre ṛṣayaścāyayurmudā || 1 ||
[Analyze grammar]

ūrjakṛṣṇāṣṭamīṃ kartuṃ kṛṣṇanārāyaṇasya vai |
jayantyā utsave tvanye raivatācalavāsinaḥ || 2 ||
[Analyze grammar]

vyomamārgeṇa saśiṣyā jvalanto brahmatejasā |
pulahaśca pulastyaśca kratuśca bhṛguraṅgirāḥ || 3 ||
[Analyze grammar]

pracetāśca vaśiṣṭhaśca durvāsāḥ kaṇva ityapi |
kātyāyanaḥ pāṇiniśca kaṇādo gautamastathā || 4 ||
[Analyze grammar]

sanakaśca sanandaśca tathā ṛṣiḥ sanātanaḥ |
kapilaścāsuriścāpi vāyuḥ pañcaśikhastathā || 5 ||
[Analyze grammar]

viśvāmitro vālmīkiśca kaśyapaśca parāśaraḥ |
vibhāṇḍako marīciśca śukro'triśca bṛhaspatiḥ || 6 ||
[Analyze grammar]

gārgyo vātsyo vātsyāyano vyāsaśca jaiministathā |
mitavāgṛṣyasaṃgaśca yājñavalkyaśca maṃkaṇaḥ || 7 ||
[Analyze grammar]

saubhariḥ śuddhajaṭilo bharadvājaḥ subhadrakaḥ |
mārvaṇḍeyo bagadāda āsuriśca viṭaṃkaṇaḥ || 8 ||
[Analyze grammar]

aṣṭāvakraḥ śatānando vāmadevaśca bhāguriḥ |
saṃvartaścāpyutathyaśca naraśca nāradastathā || 9 ||
[Analyze grammar]

jābāliḥ parśurāmaścāpyagastyaḥ paila ityapi |
śālāyano gauramukho'pyupamanyuḥ śrutaśravāḥ || 10 ||
[Analyze grammar]

maitreyaścyavanaścāpi vararuciḥ suparṇakaḥ |
svayaṃprakāśo viśvātmā sāyaṇaḥ pippalāyanaḥ || 11 ||
[Analyze grammar]

ete cānye pramūrdhanyāḥ samājagmurmahotsave |
tān dṛṣṭvā sahasotthāya namaskṛtya puṭāṃjaliḥ || 12 ||
[Analyze grammar]

kuśāsaneṣu ramyeṣu vāsayāmāsa lomaśaḥ |
pūjayāmāsa vidhivat kuśalapraśnapūrvakam || 13 ||
[Analyze grammar]

etasminnantare vyomni tejorāśiḥ prakāśayan |
diśaḥ sarvāḥ paritaścāvatatāra sanātanaḥ || 14 ||
[Analyze grammar]

tejaso'myantare ramyaḥ kumāraḥ kanakaprabhaḥ |
yathaiva pañcavarṣīyaḥ sabhāmadhye samāgataḥ || 15 ||
[Analyze grammar]

praṇemurmunayaḥ sarve lomaśo nāradādayaḥ |
cakruśca svāgataṃ bhrātuḥ sarvajyeṣṭhasya yoginaḥ || 16 ||
[Analyze grammar]

bhagavān śrīkṛṣṇanārāyaṇaḥ svāgatamācarat |
sanatkumāro bhagavānuvāca tānṛṣīṃstadā || 17 ||
[Analyze grammar]

bhadraṃ vo munayaḥ śaśvattapasāṃ phalamīpsitam |
niṣphalaḥ śrīkṛṣṇanārāyaṇe kuśalapraśnakaḥ || 18 ||
[Analyze grammar]

sāmprataṃ kuśalaṃ vaśca darśanaṃ paramātmanaḥ |
bhārāvataraṇāyaiva cāvirbhūtasya sāmpratam || 19 ||
[Analyze grammar]

uvāca śrīkṛṣṇanārāyaṇastaṃ yoginaṃ munim |
dehinaḥ śrīhareścāpi kuśalapraśnamīpsitam || 20 ||
[Analyze grammar]

sanatkumāro bhagavān prāha kṛṣṇanarāyaṇam |
śarīre prākṛte nāthā'kuśalasya hi saṃbhavaḥ || 21 ||
[Analyze grammar]

tatra vai kuśalapraśnaṃ yujyate dehināṃ sadā |
nityadehe kṣemamūrtau sukhapraśnamanarthakam || 22 ||
[Analyze grammar]

raktabindūdbhavā dehā jīvānāṃ kṛtakarmaṇām |
na tu vai śrīkṛṣṇanārāyaṇasyā'kṛtakarmaṇaḥ || 23 ||
[Analyze grammar]

prakṛtīśasyā'kṣarādhipaternityasvarūpiṇaḥ |
sarveṣāmavatārāṇāṃ kāraṇasya hareḥ katham || 24 ||
[Analyze grammar]

nityānandaravanestasya kuśalapraśnamucyate |
raktavīryāśrito dehastava nāsti kadāpi vai || 25 ||
[Analyze grammar]

bhaktānugrahamātreṇa dṛśyase divyavigrahaḥ |
yasyāśrayeṇa jīvānāṃ kuśalaṃ sarvadā bhavet || 26 ||
[Analyze grammar]

yatsparśena ca bhaktānāṃ divyatvaṃ tvādṛśaṃ bhavet |
satvaṃ dhanyo'si bhagavan mānyo'si jagatāmapi || 27 ||
[Analyze grammar]

sarveśvareśvaro'si tvaṃ tvatparo nāsti viśvataḥ |
iti kṛtvā punarnatvā cārcayāmāsa bhāvataḥ || 28 ||
[Analyze grammar]

śrīpatiṃ śrīkṛṣṇanārāyaṇaṃ cākṣaradhārakam |
etasminnantare brahmā sāvitryā saha cāyayau || 29 ||
[Analyze grammar]

pārvatyā saha śaṃbhuśca dharmo mūrtyā sahā''yayau |
ananto nāginīyuktaḥ sūryaḥ saṃjñāsamanvitaḥ || 30 ||
[Analyze grammar]

śaśī ca rohiṇīyuktaḥ śacyā yuktaḥ sureśvaraḥ |
ādityā vasavo rudrā dikpālādyāśca devatāḥ || 31 ||
[Analyze grammar]

sahasā śrīkṛṣṇanārāyaṇaścotthāya bhaktitaḥ |
madhuparkādikaṃ datvā satkāraṃ susamācarat || 32 ||
[Analyze grammar]

praṇemuḥ ṛṣayaḥ sarve devānṛṣīṃstataḥ surāḥ |
ānarcuḥ śrīkṛṣṇanārāyaṇaṃ śrīpuruṣottamam || 33 ||
[Analyze grammar]

athā''sane sthitaḥ sanatkumāraḥ prāha saṃsadi |
mayā dṛṣṭaṃ paraṃdhāma na dṛṣṭaḥ puruṣottamaḥ || 34 ||
[Analyze grammar]

dhāmā'kṣaraṃ lokitaṃ ca na dṛṣṭaścākṣarādhipaḥ |
mayā dṛṣṭastu goloko na dṛṣṭo rādhikāpatiḥ || 35 ||
[Analyze grammar]

tato dṛṣṭaṃ ca vaikuṇṭhaṃ na dṛṣṭaḥ śrīramāpatiḥ |
tato dṛṣṭaśca dugdhābdhirnāsti tatra hariḥ svayam || 36 ||
[Analyze grammar]

pariśrāntaviṣaṇṇena snātaṃ kṣīrodadhestaṭe |
vistīrṇe tatra kamaṭho dṛṣṭo vai naikayojanaḥ || 37 ||
[Analyze grammar]

dhanyo'sīti mayoktaḥ sa nāhaṃ dhanya uvāca mām |
kṣīrodaḥ sāgaro dhanyo jantavo yatra madvidhāḥ || 38 ||
[Analyze grammar]

tato mayā sāgarāya dhanyavādaḥ praśrāvitaḥ |
samudraḥ prāha māṃ nāhaṃ dhanyavādasya pātrakam || 39 ||
[Analyze grammar]

dhanyavādasya pātraṃ tu pṛthivī lokadhāriṇī |
yatra saptābdhayo nityaṃ vasanti ca vitastike || 40 ||
[Analyze grammar]

tato mayā pṛthivyai ca dhanyavādaḥ pravarṇitaḥ |
pṛthivyāha ca māṃ nāhaṃ dhanyavādasya pātrikā || 41 ||
[Analyze grammar]

dhanyavādasya pātraṃ tu śeṣo'nanto mamā''sanam |
yatrā'nantāni cāṇḍāni phaṇāyāṃ santyaṇuryathā || 42 ||
[Analyze grammar]

tato mayā hyanantāya dhanyavādaḥ samarpitāḥ |
anantaḥ prāha māṃ nā'haṃ dhanyavādasya pātrakam || 43 ||
[Analyze grammar]

dhanyavādasya pātraṃ tu kūrmo mamāśrayo mahān |
yasya pīṭhe mādṛśā vai śeṣā vasantyasaṃkhyakāḥ || 44 ||
[Analyze grammar]

tato mayā kacchapāya dhanyavādaḥ samīritaḥ |
kacchapaḥ prāha māṃ nā'haṃ dhanyavādasya bhūmikā || 45 ||
[Analyze grammar]

dhanyavādasya vai bhūmirāpo yatra vasāmyaham |
apsu santi mādṛśā vai kacchapāḥ koṭiśo mune || 46 ||
[Analyze grammar]

tato mayā mahādbhyaśca dhanyavādaḥ pravartitaḥ |
āpaḥ prāhustu māṃ dhanyavādārhā na vayaṃ mune || 47 ||
[Analyze grammar]

dhanyavādasya pātraṃ tu mahātejo jalāśrayam |
tato mayā mahātejomūrtaye dhanyatā'rpitā || 48 ||
[Analyze grammar]

mahātejaśca māṃ prāha mahāvāyorhi dhanyatā |
yogyā'sti ca mayā vāyurdhanyavādena yojitaḥ || 49 ||
[Analyze grammar]

yatrā'nantāni vai sṛṣṭimaṇḍalāni taranti hi |
vāyuḥ prāha ca māṃ nā'haṃ dhanyavādārha īśvaraḥ || 50 ||
[Analyze grammar]

dhanyavādasya pātraṃ tu vyomākāśo hi vartate |
mayā vyomne'rpito dhanyapravādo vyoma cāha mām || 51 ||
[Analyze grammar]

nā'haṃ dhanyo jaḍākāśaścotpattināśavānaham |
dhanyavādasya pātraṃ tu cidākāśo yato mama || 52 ||
[Analyze grammar]

samutpattirvināśaśca sṛṣṭau sṛṣṭau prajāyate |
ahaṃ yasyaikadeśe'smi mayi brahmā haro hariḥ || 53 ||
[Analyze grammar]

vairājaromabhūmisthā vartante śatavārṣikāḥ |
ahaṃ tato dadau cidākāśāya dhanyatāṃ muhuḥ || 54 ||
[Analyze grammar]

cidākāśaśca māṃ prāha nā'haṃ dhanyasya pātrakam |
dhanyasya pātratā śrīmatkṛṣṇanārāyaṇe prabhau || 55 ||
[Analyze grammar]

akṣareśe'nādikṛṣṇanārāyaṇe pumuttame |
yujyate parameśāne'vatārāṇāṃ vidhāyake || 56 ||
[Analyze grammar]

anantapāre sarveśe yasmātsarve pravartate |
yasyaikaromakiraṇāccidākāśā anantakāḥ || 57 ||
[Analyze grammar]

yatra golokadhāmādyāḥ prakāśante sthale sthale |
tādṛkcaitanyagaganavrātā yatkiraṇāt khalu || 58 ||
[Analyze grammar]

tamrā'nādiśrīmatkṛṣṇanārāyaṇe hi dhanyatām |
dehi sanatkumāra tvaṃ sarvadhanyatamāśraye || 59 ||
[Analyze grammar]

yatra muktā nivasanti yato'vatārakoṭayaḥ |
yato vyūhā vāsudevaprabhṛtayo bhavanti ca || 60 ||
[Analyze grammar]

yato dharmo yato vedā yatrā'ntaryāmitā sthitā |
vyāpakaścānvayī yaśca sarvajñaḥ sarvaśaktimān || 61 ||
[Analyze grammar]

yato yajñāḥ karmakāṇḍāḥ pravṛttiścātmanāṃ yataḥ |
yatra cānte nivṛttiśca karmaphalaṃ yato bhavet || 62 ||
[Analyze grammar]

phaladātā karmahetuḥ sarvādiḥ sarvakārakaḥ |
dhanyavādena yoktavyo nānyo dhanyāśrayo mune || 63 ||
[Analyze grammar]

ityukto'haṃ pare loke'kṣaralokātpare sthite |
yogaśaktyā gato draṣṭuṃ dātuṃ ca dhanyavādakān || 64 ||
[Analyze grammar]

kāraṇaṃ kāraṇānāṃ taṃ pravīkṣituṃ svadhāmani |
so'haṃ tatratyamuktānāṃ divyatejobhirāvṛtaḥ || 65 ||
[Analyze grammar]

draṣṭuṃ śakto'bhavaṃ naiva santaṃ ca divyavigraham |
gantuṃ tu śakyate yogād draṣṭuṃ śaktaṃ tvanugrahāt || 66 ||
[Analyze grammar]

adṛṣṭvā taṃ muktavṛndaṃ pṛṣṭvā kva bhagavāniti |
jñātvā virājate tvaśvapaṭṭasaro'ntike śubhe || 67 ||
[Analyze grammar]

kṣetre kuṃkumavāpyāṃ vai lomaśāśramaśobhite |
gehe ca kambharālakṣmyā gopālakṛṣṇamandire || 68 ||
[Analyze grammar]

divyā'divyākṣibhiḥ sarvairdṛśyo'nādinarāyaṇaḥ |
gaccha tvaṃ śrīkṛṣṇanārāyaṇaṃ paśya kṣitau mune || 69 ||
[Analyze grammar]

ityājñāya samāyāto'smyahaṃ darśanahetave |
dhanyavādān pradātuṃ ca tasmai yo'tra virājate || 70 ||
[Analyze grammar]

bālaḥ śrīkambharālakṣmyā gopālakṛṣṇanandanaḥ |
vasanti yatra vedāśca parāvidyā'tra vartate || 71 ||
[Analyze grammar]

sarvānandā muktayaśca yasyā'kṣikoṇake sthitāḥ |
sarve devāśca ṛṣaya īśvarā yanmanobhavāḥ || 72 ||
[Analyze grammar]

tasmāyanādiśrīkṛṣṇanārāyaṇāya vai namaḥ |
svāmine bālarūpāya vallabhāya ca te namaḥ || 73 ||
[Analyze grammar]

muktānāṃ pataye dhāmnāṃ pataye te namonamaḥ |
avatāravṛndadhartre īśvareśāya te namaḥ || 74 ||
[Analyze grammar]

rādhālakṣmīsvāmine te jayāyāḥ pataye namaḥ |
lalitāmāṇikīpadmāpārvatīśāya te namaḥ || 75 ||
[Analyze grammar]

prabhāvṛndātulasīśrīpadmāvatīśa te namaḥ |
mañjulākānta haṃseśa yogīśeśa ca te namaḥ || 76 ||
[Analyze grammar]

kamalākānta siddhīśa te pratyakṣa namonamaḥ |
namohṛdayavāsātha sarvāntaryāmiṇe namaḥ || 77 ||
[Analyze grammar]

namaḥ mayūrapicchāḍhyamukuṭadhāriṇe namaḥ |
namaḥ kaustubhasaṃśobhadvakṣaḥsthalāya te namaḥ || 78 ||
[Analyze grammar]

namaḥ kuṇḍalakarṇāya svarṇahārāya te namaḥ |
sarvaśaktisvarūpāya kāmakāmāya te namaḥ || 79 ||
[Analyze grammar]

naikāsuravināśāya bhaktatrāṇāya te namaḥ |
bhaktavāñcchitadātre te śrīkṛṣṇāya namo namaḥ || 80 ||
[Analyze grammar]

dhanyeyaṃ kuṃkumavāpī dhanyo'yaṃ lomaśo muniḥ |
aśvapaṭṭasaro dhanyaṃ dhanyaṃ vyāghravanaṃ śubham || 81 ||
[Analyze grammar]

dhanyā ime ca ṛṣayo dhanyā drutṛṇabhūruhāḥ |
dhanyāḥ pakṣagamā jīvā dhanyā bhūvāsakāriṇaḥ || 82 ||
[Analyze grammar]

dhanyā narāstathā nāryo dhanyaṃ carācaraṃ tvidam |
yatra vai bālarūpastvaṃ vartase puruṣottamaḥ || 83 ||
[Analyze grammar]

dṛśyase sarvaviṣayo gamyase jñānibhiḥ khalu |
adya naḥ saphalaṃ janma puṇyaṃ naḥ pāravarjitam || 84 ||
[Analyze grammar]

sṛṣṭisañcālakairyo na prāpyate dṛśyase'tra naḥ |
anekajanmaśuddhānāṃ darśanaṃ te'tra yujyate || 85 ||
[Analyze grammar]

asmākaṃ cātra sañjātaṃ puruṣārthacatuṣṭayam |
śaraṇyaṃ yatpadaṃ labdhaṃ pratyakṣaṃ sevanocitam || 86 ||
[Analyze grammar]

ityevaṃ stavanaṃ kṛtvā bālaveṣaṃ pumuttamam |
pupūjuḥ parayā bhaktyā śṛṃgāritaṃ jagatprabhum || 87 ||
[Analyze grammar]

upadāḥ pradaduḥ sarve cakruśca tilakaṃ śubham |
ārārtrikaṃ pracakruśca nemustuṣṭuvurādarāt || 88 ||
[Analyze grammar]

pradakṣiṇaṃ pracakruśca naivedyaṃ vividhaṃ daduḥ |
devā devyaḥ puṣpavṛṣṭiṃ cakruḥ kṛṣṇasya mūrdhani || 89 ||
[Analyze grammar]

mahotsave koṭiśo vai bhuvanānāṃ nivāsinaḥ |
samāyātā jayantyāṃ śrīkṛṣṇanārāyaṇasya te || 90 ||
[Analyze grammar]

darśanaṃ ca prasādaṃ ca caraṇāmṛtamityapi |
śubhāśiṣaśca saṃgṛhya yayurnijālayaṃ mudā || 91 ||
[Analyze grammar]

anādiśrīkṛṣṇanārāyaṇasyaitat stavaṃ śubham |
paramaiśvaryajanakaṃ sukhadaṃ sampadāpradam || 92 ||
[Analyze grammar]

nirvāṇamokṣadaṃ lakṣmi haribhaktipradaṃ param |
akṣareśapadadātṛ sarvasiddhipradaṃ varam || 93 ||
[Analyze grammar]

lobhamohakāmakrodhakarmamūlanikṛntanam |
balabuddhipradaṃ caiva janmamṛtyuvināśanam || 94 ||
[Analyze grammar]

dhanaputrapriyābhūmipatisampatpradaṃ nṛṇām |
śokaduḥkhaharaṃ yaśca paṭhedvā śṛṇuyācca vā || 95 ||
[Analyze grammar]

bandhanānmucyate duḥkhī bhīto mucyeta vai bhayāt |
rogādvimucyate rogī daridraśca dhanī bhavet || 96 ||
[Analyze grammar]

dasyugrasto ripugrasto hiṃsrajantusamāvṛtaḥ |
stotreṇā'nena vai lakṣmi kalyāṇaṃ labhate janaḥ || 97 ||
[Analyze grammar]

sanatkumāro bhagavān dadau śrīlomaśāya yat |
lomaśaśca dadāvanyaṛṣibhyo mokṣahetukam || 98 ||
[Analyze grammar]

anādiśrīkṛṣṇanārāyaṇabhaktāya sarvathā |
dāsabhaktāya dātavyaṃ viduṣe ca mumukṣave || 99 ||
[Analyze grammar]

aśvamedhasahasrācca pṛthivyāśca pradakṣiṇāt |
snānācca sarvatīrthānāṃ stotrametattu puṇyadam || 100 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne kuṃkumavāpikākṣetre lomaśāśrame'nādiśrīkṛṣṇanārāyaṇasya jayantyāṃtithau dhanyavādā''śīrvādapradānārthamāgatena sanatkumāreṇa kramaśo dhanyavādārhaparākāṣṭhāśrayā'nādiśrīkṛṣṇanārāyaṇasya ṛṣivrātāya kathita |
mahimādinirūpaṇanāmaikatriṃśadadhikapañcaśatatamo'dhyāyaḥ || 531 ||
[Analyze grammar]