Chapter 519

śrīnārāyaṇa uvāca |
śṛṇu lakṣmi ca rājāno devā daityastathā'pare |
māyāmohaṃ samālabhya ramante prāṇadevane || 1 ||
[Analyze grammar]

gantavyaṃ tvasti sarveṣāṃ pañcatve pañcavarjitaḥ |
svayaṃ tvanyatra pañcatve pañcaikatvaṃ prayāti ca || 2 ||
[Analyze grammar]

nahi māyā gatā kaiścidātmabhiḥ saha naśvarī |
arbudā'rbudavarṣāyurjīvibhirapi karhicit || 3 ||
[Analyze grammar]

śṛṇu rājā purā tvāsīdindradyumna iti śrutaḥ |
brahmaṇyaśca śaraṇyaśca sādhulokaprapālakaḥ || 4 ||
[Analyze grammar]

yajvā dānapatirdakṣaḥ sarvabhūtahite rataḥ |
na durbhikṣaṃ na ca vyādhirna ca caurakṛtaṃ bhayam || 5 ||
[Analyze grammar]

na nyūnatā prajāyāṃ vai bhogyadravyasya kasyacit |
asaṃkhyātāḥ kratavaśca kṛtāḥ sampūrṇadakṣiṇāḥ || 6 ||
[Analyze grammar]

agniṣṭomo'tirātraśca ukthaḥ ṣoḍaśikastathā |
sautrāmaṇyatha paśujaścāturmāsyaṃ vratakratuḥ || 7 ||
[Analyze grammar]

vājapeyo'śvamedhaśca rājasūyaśca somapaḥ |
puṇḍarīkaśca putreṣṭiḥ sasyeṣṭiḥ rudravaiṣṇavau || 8 ||
[Analyze grammar]

kārīrirvaiśvadevaścetyādyān yajñāṃścakāra saḥ |
na tadasti dharāpṛṣṭhe nagaraṃ pattanaṃ ca vā || 9 ||
[Analyze grammar]

tīrthaṃ śālā vanaṃ vāpī yatra satraṃ na tasya vai |
sarvatraivendradyumnasyānnāni bhujyanta īśvaraiḥ || 10 ||
[Analyze grammar]

devāḥ ṛṣayo bhṛtyāśca vidyārthinaśca bhūsurāḥ |
yatayaḥ sādhavaḥ sādhvyaḥ sāṃkhyayoginya ityapi || 11 ||
[Analyze grammar]

brahmacārī vānaprasthaḥ sannyāsī tyāgavānapi |
anātho dīna ityādyā bhuṃjate tasya satrake || 12 ||
[Analyze grammar]

tīrthaṃ na vidyate tādṛg yatra tasya na devalam |
tena kanyā'rbudā'yutānāṃ dānamuttamam || 13 ||
[Analyze grammar]

kṛtaṃ prakāritaṃ cāpi sadā santaḥ supūjitāḥ |
daśamīdivase tasya rājye vai gajapṛṣṭhagaḥ || 14 ||
[Analyze grammar]

dundubhistāḍyamānastu babhrāma sakalaṃ puram |
ujjayinyāṃ ca vai prātarbhāvī śrīharivāsaraḥ || 15 ||
[Analyze grammar]

tenaiva svaśarīreṇa brahmalokaṃ svayaṃ gataḥ |
tataḥ kalpasahasrānte sa prokto brahmaṇā svayam || 16 ||
[Analyze grammar]

indradyumna dharāṃ yāhi na sthātavyaṃ tvayā'tra vai |
tava kīrtisamucchedaḥ saṃjāto'dya dharātale || 17 ||
[Analyze grammar]

yāvatkīrtirdharāpṛṣṭhe tāvatsvarge vasennaraḥ |
etasmātkāraṇāllokāḥ kurvanti nāmalekhanam || 18 ||
[Analyze grammar]

vāpīkūpataḍāgādau devatāyatanādiṣu |
gaccha śīghraṃ dharāpṛṣṭhaṃ svāṃ kīrtiṃ nūtanīkuru || 19 ||
[Analyze grammar]

kīrtau satyāṃ mama satye draṣṭā tvaṃ bhavitā'si vai |
tataḥ saḥ prayayau pṛthvīṃ kāmpilyanagaraṃ prati || 20 ||
[Analyze grammar]

atha papraccha deśaḥ ko nagaraṃ kiṃ janān tadā |
ūcuste'yaṃ pradeśo'sti tvānarto nagaraṃ tu vai || 21 ||
[Analyze grammar]

kāmpilyaṃ ko bhavānatrā'parijñātā pravartate |
rājā prāha purā cā'hamindradyumno mahīpatiḥ || 22 ||
[Analyze grammar]

deśe vejahake rocakākhye vai nagare'dhipaḥ |
sa deśaḥ kva puraṃ kvā''ste mayā stheyaṃ ca tatra vai || 23 ||
[Analyze grammar]

janāḥ prāhurna vidmastaṃ nṛpaṃ deśaṃ ca pattanam |
rājā prāha cirāyuṣkaṃ pradarśayata māṃ janāḥ || 24 ||
[Analyze grammar]

yadi kaścidbhavedatra yastaṃ vetti mahīpatim |
janāḥ prāhurdaśakalpajīvī saṃśrayūte muniḥ || 25 ||
[Analyze grammar]

naimiṣāraṇyake pṛccha mārkaṃḍeyo vadiṣyati |
rājā gatvā vyomapathā papraccha taṃ munīśvaram || 26 ||
[Analyze grammar]

indradyumneti bhūpo'tra tvayā dṛṣṭaḥ śruto'thavā |
muniḥ prāha mayā naiva dṛṣṭo vāpi śruto'pi vā || 27 ||
[Analyze grammar]

tasya tadvacanaṃ śrutvā rājā nairāśyamāptavān |
muniḥ prāha mayā sākaṃ samāgaccha himācalam || 28 ||
[Analyze grammar]

tatrāste ca bako nāma ṛṣirmattaḥ purātanaḥ |
iti tau vyomamārgeṇa gatvā papracchaturnatau || 29 ||
[Analyze grammar]

indradyumnamahīpālastvayā dṛṣṭaḥ śruto'pi kim |
bakaḥ prāha mama kālo viṃśatikalpako gataḥ || 30 ||
[Analyze grammar]

samaye tatra tatpūrvaṃ naiva vedmi hi taṃ nṛpam |
indradyumno bakaṃ prāha cirāyuṣṭvaṃ kathaṃ tava || 31 ||
[Analyze grammar]

bakaḥ prāha purā viśvarūpo'hamabhavaṃ dvijaḥ |
kasyacittvatha kālasya saṃkrāntau makarasya vai || 32 ||
[Analyze grammar]

kṛṣṇanārāyaṇaḥ pañcāmṛtena snāpito mayā |
śaṃkaraḥ snāpitastatra hareḥ prasādavāriṇā || 33 ||
[Analyze grammar]

tato'haṃ rājaputratvaṃ prāptaḥ paścimabhūtale |
jātismaraḥ sadā pañcāmṛtaiḥ kṛṣṇanarāyaṇam || 34 ||
[Analyze grammar]

śivaṃ ca pūjayāmyevaṃ prātarvarṣasahasrakam |
tena puṇyaprabhāveṇa jāto'haṃ vai cirasthiraḥ || 35 ||
[Analyze grammar]

kailāse śaṃbhudāsyaṃ cā'karavaṃ vai tataḥ param |
gālavasyā''śrame gatvā vidyādhyayanamācaram || 36 ||
[Analyze grammar]

tasya patnī ṛtusnātā mayā spṛṣṭā vikārataḥ |
sā tu śaśāpa māṃ dhūrta bako'raṇyagato bhava || 37 ||
[Analyze grammar]

tenā'haṃ bakarūpo'smi ṛṣiḥ kāmasvarūpadhṛk |
vartāmyatra mahāraṇye bakākāraḥ sadā śuciḥ || 38 ||
[Analyze grammar]

jātismaraḥ sadā tvatra bhajāmi śrīhariṃ bakaḥ |
mārkaṃḍeyastu taṃ prāha vetsi tvatto'pi pūrvajam || 39 ||
[Analyze grammar]

yadi kaṃcid darśayasva yena pṛcchāmi taṃ ca tat |
bakaḥ prāha samāyāhi mattaścāpi purātanaḥ || 40 ||
[Analyze grammar]

yatrāsti dayito me'ti hyulūkarṣiścirasthiraḥ |
trayaste ca gatāstatra kailāse śikhare hi me || 41 ||
[Analyze grammar]

sopi dṛṣṭvā bakaṃ mitraṃ svāgatenā'bhyanandayat |
bakaḥ papraccha colūkam indradyumnanṛpaṃ prati || 42 ||
[Analyze grammar]

vada jānāsi cenmitra kadā jātaḥ sa bhūpatiḥ |
ulūkaḥ prāha me kalpāścatvāriṃśatprasaṃkhyakāḥ || 43 ||
[Analyze grammar]

vyatītā na śruto dṛṣṭastvindradyumno mahīpatiḥ |
indradyumnastu taṃ prāholūkatā vai kathaṃ tava || 44 ||
[Analyze grammar]

ulūkaḥ svakathāmāha purā''saṃ brāhmaṇo bhuvi |
brahmacārī harabhakto bilvapatraiḥ prapūjakaḥ || 45 ||
[Analyze grammar]

tato varṣasahasrānte dadau svadarśanaṃ haraḥ |
dadau me vaiṣṇavaṃ mantraṃ kṛṣṇanārāyaṇeti ca || 46 ||
[Analyze grammar]

śaṃbhuradṛśyatāṃ prāptaścā'haṃ bhārgavasannidhau |
āśramaṃ tasya saṃprāpto virūpo'pi śubhāśrayam || 47 ||
[Analyze grammar]

bhārgavasyā'bhavatpatnī nāmnā sudarśanā satī |
gālavakanyakā sā ca pātivratyaparāyaṇā || 48 ||
[Analyze grammar]

tasyāṃ tvāsīd bhārgavasya kanyaikā yuvatī śubhā |
sā mayā yācitā cātha vivāhitāpi vai tataḥ || 49 ||
[Analyze grammar]

virūpaṃ māṃ sadā matvā kanyakā prāha mātaram |
virūpāya pradattā'smi nā'haṃ jīvitumutsahe || 50 ||
[Analyze grammar]

viṣaṃ vā bhakṣayiṣyāmi pravekṣyāmi hutāśanam |
atha tāṃ bhārgavaḥ prāha yasmai dattā sthirā bhava || 51 ||
[Analyze grammar]

vedadharmaḥ sa evā'sti patiṃ nārāyaṇaṃ smaret |
saṃsevya svapatiṃ tvaṃ vai bhaviṣyasi divaṃgatā || 52 ||
[Analyze grammar]

ataḥ sevasva taṃ nāthaṃ kuru janma phalānvitam |
ityevaṃ śikṣitā sā'pi naiva mene hitaṃ tataḥ || 53 ||
[Analyze grammar]

na māṃ vai sevate rātrau tato mayā prasahya sā |
ardharātre hṛtā tasyāḥ piturgṛhānmamāśramam || 54 ||
[Analyze grammar]

prātarvipro jajāgāra pitā tasyāstathā prasūḥ |
kvā'sau sā duhitetyevaṃ babhramaturmamāśramam || 55 ||
[Analyze grammar]

āgatyaināṃ dadṛśatuḥ sāpi ruroda vīkṣya tau |
tataḥ kopaparītātmā māṃ provāca sa bhārgavaḥ || 56 ||
[Analyze grammar]

niśāyāṃ tu tvayā patnī mama putrī hṛtā yataḥ |
niśācaro bhavānastu ulūkaśceti śāpataḥ || 57 ||
[Analyze grammar]

ulūko'smi hi sañjāto jātismaraśca sarvadā |
kāmarūpadharaścāsmi vartāmi cā'tra parvate || 58 ||
[Analyze grammar]

patnī me svapiturharmye sthitā nārāyaṇāśritā |
yayau śrīmatkṛṣṇanārāyaṇadāsyapradaṃ padam || 59 ||
[Analyze grammar]

evaṃ me kauśikatvaṃ vai sañjātaṃ cātra parvate |
akhaṇḍabilvapatraistu pūjanasya phalaṃ param || 60 ||
[Analyze grammar]

cirāyuṣṭvaṃ tu me divyarūpadhāritvamityapi |
bakaḥ prāhetaraṃ kaṃcic cejjānāsi cirāyuṣam || 61 ||
[Analyze grammar]

vada tatra pragacchāmaḥ pṛcchāmastaṃ nṛpaṃ prati |
ulūkaḥ prāha tu mayā sārdhamāgacchatā'tra vai || 62 ||
[Analyze grammar]

gandhamādanaśikhare gṛdhrarṣirvartate mahān |
cirantano yadi taṃ ca nṛpaṃ jñāsyati pūrvajam || 63 ||
[Analyze grammar]

ityuktvā tān samādāyolūko gṛdhraṃ samāyayau |
gṛdhrarṣistāṃstathā dṛṣṭvā prahṛṣṭaḥ sammukhaṃ yayau || 64 ||
[Analyze grammar]

svāgataṃ kṛtavāṃścāpi pṛṣṭhavāṃścāśrame ṛtam |
ulūkaḥ prāha me mitraṃ nāḍījaṃgho bako hyayam || 65 ||
[Analyze grammar]

yasya mitraṃ tu mārkaṇḍastasyā'yaṃ nṛpatiḥ suhṛt |
ayaṃ cātrā''gataḥ praṣṭuṃ purendradyumnabhūpatiḥ || 66 ||
[Analyze grammar]

āsītkaścinnavetyevaṃ vettuṃ cāsti samāgataḥ |
gṛdhraḥ prāha tu me kalpā aśītiḥ prayayuḥ khalu || 67 ||
[Analyze grammar]

na dṛṣṭo na śrutaḥ ko'pi kvā'pīndradyumnabhūpatiḥ |
tasya tadvacanaṃ śrutvā so'pi rājā sudurmanāḥ || 68 ||
[Analyze grammar]

manasā cintayāmāsa maraṇe kṛtaniścayaḥ |
papraccha gṛdhraṃ jāto'si cirāyustvaṃ kathaṃ vada || 69 ||
[Analyze grammar]

gṛdhraḥ prāha purā caityavṛkṣe'haṃ nyavasaṃ sukham |
vasante ca janāstaṃ cā'pūjayan phalitaṃ drumam || 70 ||
[Analyze grammar]

kāminyastatra vṛkṣe ca dolāṃ babandhuruttamām |
tatra saṃsthāpya ca kṛṣṇanārāyaṇaṃ muhurmuhuḥ || 71 ||
[Analyze grammar]

sarvā āndolayāmāsuḥ kumāryaḥ sadhavāstathā |
ahaṃ tu kautukāviṣṭo rātrau tatra svayaṃ sthitaḥ || 72 ||
[Analyze grammar]

karomyāndolanaṃ tābhiḥ ramāmi viramāmi ca |
janairdṛṣṭastāḍitaśca pañcatvaṃ prāptavāṃstataḥ || 73 ||
[Analyze grammar]

jātismaro'bhavaṃ rājā nāmnā khyātaḥ kuśadhvajaḥ |
kṛṣṇanārāyaṇaṃ nityaṃ cāndolayāmi pūrvavat || 74 ||
[Analyze grammar]

śaṃbhuṃ cāndolayāmyeva śivarātrau punaḥ punaḥ |
janmāṣṭamyāṃ tathānādiśrīkṛṣṇaṃ nyasya tatra ca || 75 ||
[Analyze grammar]

āndolayāmi satataṃ naranārāyaṇaṃ tathā |
evaṃ prakurvato me śrīśaṃbhuḥ pratyakṣatāṃ gataḥ || 76 ||
[Analyze grammar]

bhavate varadaścāsmi vaiṣṇavāya varaṃ vṛṇu |
ityuvāca haro mahyaṃ mayā'pi ca tadā'rthinam || 77 ||
[Analyze grammar]

kailāse me dehi vāsaṃ vaiṣṇavānāṃ samāgame |
vaiṣṇavasya ca te nityaṃ kariṣyāmi susevanam || 78 ||
[Analyze grammar]

evamukto mahādevo māṃ kailāsaṃ nināya saḥ |
kadācittvatha kālasya vimānena nijecchayā || 79 ||
[Analyze grammar]

mayā ca bhramamāṇena dṛṣṭā'gniveśyaputrikā |
jale praviṣṭā snānārthaṃ tvālibhirbahvībhiryutā || 80 ||
[Analyze grammar]

mayā'vatīrya sā bālā patnyarthaṃ yācitā tadā |
kāmabhāvena sā naiva vyalokayattu māṃ prati || 81 ||
[Analyze grammar]

mayoddhṛtya jalāt sā ca balānnītā vimānake |
tadā tadrodanaṃ śrutvā tatpitā māṃ śaśāpa ha || 82 ||
[Analyze grammar]

gṛdhravad bālikāṃ vaṃ cā'spṛśaḥ sadvrataśālinīm |
tasmādgṛdhro bhava cātra vimānaṃ te praṇaśyatu || 83 ||
[Analyze grammar]

ahaṃ gṛdhrastadā jāto vimānaṃ naṣṭameva me |
bālā cā'kṛtabhogā sā yayau svaṃ pitaraṃ prati || 84 ||
[Analyze grammar]

etadvai sarvamākhyātaṃ sakhe gṛdhratvakāraṇam |
kṛṣṇanārāyaṇaprītyā cirāyuścāsmi bhūtale || 85 ||
[Analyze grammar]

indradyumnaṃ na jānāmi vada kiṃ karavāṇi te |
itiśrutvā nṛpatiḥ sa nirāśaśca hutāśane || 83 ||
[Analyze grammar]

praveśaṃ cecchati tatra maraṇaṃ kartumicchati |
tāvad gṛdhrastu taṃ prāha vahniṃ mā viśa bhūpate || 87 ||
[Analyze grammar]

ahaṃ te kīrtayiṣyāmi mamā'pyasti cirantanaḥ |
sa jñāsyati mama mitraṃ hīndradyumnaṃ purātanam || 88 ||
[Analyze grammar]

yāmastatra tu kamaṭho māntharako'sti yatra ca |
mānase sarasi khyātastatraiva kṛtaketanaḥ || 89 ||
[Analyze grammar]

sarve yayustatkamaṭhaṃ sevamānaṃ śubhātapam |
tīrasthaṃ sarasastatra te'vatīrṇāstato'mbarāt || 90 ||
[Analyze grammar]

tāvat sa kacchapaḥ śīghraṃ salile'ntarjagāma ha |
gṛdhrastaṃ nijamitraṃ ca prāha kasmāt prayāsi bhoḥ || 91 ||
[Analyze grammar]

mitraṃ dṛṣṭvā kathaṃ yāsi bhīta iva vilokyase |
sunīco'pi gṛhaṃ prāpto bhavetpūjyatamaḥ satām || 92 ||
[Analyze grammar]

atha kūrmo jalamadhye śiromātrabahirmukhaḥ |
pratyuvāca paraṃ mitraṃ karomi svāgataṃ tava || 93 ||
[Analyze grammar]

tava mitrasya ca tathā mitramitrādimānanam |
paraṃ tvayaṃ nṛpaḥ kaścit pañcamo yaḥ pradṛśyate || 94 ||
[Analyze grammar]

tasyendradyumnasaṃjñasya bhayād yāmi jalāntaram |
anena tu purā dagdhā pṛṣṭhirme tu makhāgnibhiḥ || 95 ||
[Analyze grammar]

nā'dyā'pi sā kṣatiḥ saṃpūryate pṛṣṭhagatā mama |
enaṃ dṛṣṭvā yajñakīrtiṃ smṛtvā pṛṣṭhakṣatiṃ tathā || 96 ||
[Analyze grammar]

vidravāmi jale mitra karomi svāgataṃ tu vaḥ |
indradyumnasya rājarṣeḥ kīrtisaṃśravaṇaṃ mahat || 97 ||
[Analyze grammar]

sahasrasaṃkhyayā rājñā sarve vai kratavaḥ kṛtāḥ |
nā'dyāpi kīrtipuṇye ca naśyete'sya tu bhūpateḥ || 98 ||
[Analyze grammar]

pañcāśacca śataṃ kalpā mama tvatra jale gatāḥ |
tatpūrvaṃ rocake nāmnā pattane cā'bhavaṃ tadā || 99 ||
[Analyze grammar]

asya bhayena tat tyaktvā vasāmyatra sarovare |
ityuktvā sa bahirgatvā'karot sanmānanaṃ bahu || 100 ||
[Analyze grammar]

saṃbhāṣāṃ vividhāṃ kalpāntarīyāṃ cakrire mithaḥ |
kūrmo jātismaraḥ kāmarūpadhṛg devarūpavān || 101 ||
[Analyze grammar]

satkāraṃ bhojanādyaṃ ca kalpayāyāsa tatkṣaṇam |
indradyumnaḥ prahṛṣṭo'bhūt papracchata kacchapaṃ tataḥ || 102 ||
[Analyze grammar]

cirāyuṣṭvaṃ kathaṃ te'sti rocakāt pūrvameva kim |
kutra vāsaśca te tvāsīt kutra janma vrataṃ tava || 103 ||
[Analyze grammar]

vada me jāyate cātyānando mitrasya darśanāt |
śrutvaivaṃ kacchapaḥ prāha śṛṇu rājan purābhavam || 104 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne indradyumnarājñaḥ pṛthivyāṃ mārkaṇḍeyabakarṣighūkarṣigṛdhrarṣikamaṭharṣikṛtakīrtinavīnatvaṃ prāgaparāddhajanyabakādijanmāni puṇyakṛtacirajīvitvādi cetyādinirūpaṇanāmā ekonaviṃśadadhikapañcaśatatamo'dhyāyaḥ || 519 ||
[Analyze grammar]