Chapter 515

śrīlakṣmīruvāca |
kadā brahmā kulaṭayā śaptaḥ kimarthameva ca |
nāganadyāṃ tataḥ snātvā yena śuddho hi viśvasṛṭ || 1 ||
[Analyze grammar]

nārāyaṇahare kṛṣṇa me vadātra kathāṃ tu tām |
kṛṣṇanārāyaṇaḥ śrutvā lakṣmyai saṃprāha tāṃ kathām || 2 ||
[Analyze grammar]

śrīnārāyaṇa uvāca |
śṛṇu lakṣmi purā brahmā janayāmāsa kanyakām |
mohinīṃ mānasīṃ tāṃ cāpsarasaṃ kṛtavān svayam || 3 ||
[Analyze grammar]

sarvasādhāraṇī sā tu devapatnī tato'bhavat |
atha sā tvekadā dṛṣṭvā brahmāṇaṃ samumoha vai || 4 ||
[Analyze grammar]

vismṛtya pitaraṃ ceti kāmasaṃkalpamācarat |
manvantare raivatasya sucandro vaiṣṇavo nṛpaḥ || 5 ||
[Analyze grammar]

tapase malayadroṇīṃ yayau varṣasahasrakam |
valmīkācchāditaṃ dehaṃ dṛṣṭvā dhātā samāyayau || 6 ||
[Analyze grammar]

varaṃ vṛṇu pratuṣṭo'smītyuvāca taṃ jagatpitā |
vavre sa śrīkṛṣṇanārāyaṇabhaktiṃ ca dāsatām || 7 ||
[Analyze grammar]

brahmā kamaṇḍalorvāri cikṣepa ca siṣeca vai |
rājā samyaccharīraḥ san nanāma tu punaḥ punaḥ || 8 ||
[Analyze grammar]

tathāstviti varaṃ brahmā dadau tadā rathottamam |
golokādāgataṃ divyaṃ samāruroha bhūpatiḥ || 9 ||
[Analyze grammar]

pārṣadaḥ sa divyarūpo bhūtvā kṛṣṇapadaṃ yayau |
brahmā yāntaṃ satyalokaṃ dadarśa mohinīṃ pathi || 10 ||
[Analyze grammar]

tadā mumoha sadyaḥ sā nirjane rantumeva ca |
vilokya vakranayanā jugopa sasmitaṃ mukham || 11 ||
[Analyze grammar]

pulakāñcitasarvāṃgī kāmavegena pīḍitā |
niṣasāda śanairbhūmau purato brahmaṇaḥ pade || 12 ||
[Analyze grammar]

brahmā nirīkṣya tāṃ putrīṃ vikāraṃ nahi cāpa saḥ |
brahmalokaṃ yayau tāṃ ca samāśvāsya pitā yathā || 13 ||
[Analyze grammar]

sakāmā sā tadā jātā nirāśā hatacetanā |
divāniśaṃ sacintā sā svapne jñāne caturmukham || 14 ||
[Analyze grammar]

āsīnā saṃsthitā yadvā śayanaṃ kurvatī kṣaṇam |
taptapātre yathā sasyaṃ bhramatyeva tathā pathi || 15 ||
[Analyze grammar]

kāmaṃ sahāyamāsādya tena sārdhaṃ hi mohinī |
brahmalokaṃ yayau cājaṃ nirjane sā dadarśa tam || 16 ||
[Analyze grammar]

tameva mohitaṃ kartuṃ samārebhe puraḥ sthitā |
kṣaṇaṃ nanarta suciraṃ sugānena kṣaṇaṃ jagau || 17 ||
[Analyze grammar]

vidhātā susvaraṃ śrutvā mumoha sāśrulocanaḥ |
dṛṣṭvā mugdhaṃ kalāḥ sarvā darśayāmāsa nartane || 18 ||
[Analyze grammar]

datvā tathāpi vai pāritoṣikaṃ virato yayau |
hatodyamā tu sā prāha kāmaṃ deva namo'stu te || 19 ||
[Analyze grammar]

nikṣipa tvaṃ svakān bāṇān kāmadeva vidhau tataḥ |
antarīkṣe sthitaḥ kāmo mahāstraṃ prerayanmudā || 20 ||
[Analyze grammar]

babhūva cañcalo brahmā cakre nirīkṣaṇaṃ muhuḥ |
mohinyāśca samāgatya prāha vicārya mohinīm || 21 ||
[Analyze grammar]

cañcalā'si mohini tvaṃ nā'haṃ yogyo'sya karmaṇaḥ |
gaccha putri mamā'grāhyā tvanyatra viharasva yat || 22 ||
[Analyze grammar]

viśvaset kulaṭāṃ yaśca vipat tasya pade pade |
aye vatse gaccha dūraṃ vihāya pitaraṃ hi mām || 23 ||
[Analyze grammar]

tava yogyaṃ paraṃ devaṃ yuvānaṃ paśya mohinī |
mohinī prāha dhātāraṃ me mano na sthiraṃ yataḥ || 24 ||
[Analyze grammar]

bhūtaṃ tvayi viśeṣeṇa cañcalaṃ vīkṣite mayā |
aho gantumaśaktā'haṃ tvayā yadyapi bhartsitā || 25 ||
[Analyze grammar]

kṛpāṃ kuru kṛpāsindho na māṃ hantuṃ tvamarhasi |
santo garvaṃ na kurvanti paropakṛtiśālinaḥ || 26 ||
[Analyze grammar]

kācit satī patiṃ prāpya pātivratyaparāyaṇā |
kācittu karmaṇā bhuṃkte naraṃ kṛtvā'ṅgavikrayam || 27 ||
[Analyze grammar]

mama dharmastathā brahmanmano'bhilaṣitaṃ naram |
bhuktvā tṛptirbhavet tadvat kartavyaṃ narasevanam || 28 ||
[Analyze grammar]

tena tṛptiḥ karmaṇāṃ ca khaṇḍanaṃ dharma eva naḥ |
tat tvāṃ karmā'nyathākartuṃ samarthaṃ cāhamāgatā || 29 ||
[Analyze grammar]

mahatāṃ sevayā śaśvad yaśasā bhānti yoṣitaḥ |
gṛhī tapasvī kāmī vā tyajet striyamupasthitām || 30 ||
[Analyze grammar]

niḥśvāsahatapuṇyaḥ saḥ śāpapātraṃ bhavediha |
naṣṭaśrīrbhraṣṭarūpaśca bhraṣṭabuddhirbhavettathā || 31 ||
[Analyze grammar]

sadyaḥ sa klībatāṃ yāti brahman śāpena yoṣitaḥ |
vidhuraśca sadā śāpabalena jāyate'sukhaḥ || 32 ||
[Analyze grammar]

uttiṣṭha tajjagannātha pāraṃ kuru smarārṇave |
satataṃ tvanmanaskāṃ māṃ dāsīṃ krīṇīhi sādaram || 33 ||
[Analyze grammar]

ityuktvā vedhaso vastraṃ vicakarṣa hi mohinī |
brahmā dhairyaṃ samālambya sāramāha sutāṃ prati || 34 ||
[Analyze grammar]

tyaja māmambike vṛddhaṃ niṣkāmaṃ paśya cāparam |
tvayā saha nibandho me kāmalekho na vidyate || 35 ||
[Analyze grammar]

pūrvakarmakṛtā rekhā patiṃ dadāti yoṣite |
muñca vastraṃ mama putri dhairyamālambaya kṣaṇam || 36 ||
[Analyze grammar]

etasminnantare vighnarūpā ājagmurīśvarāḥ |
atriḥ pulastyaḥ pulaho vasiṣṭhaḥ kraturaṃgirāḥ || 37 ||
[Analyze grammar]

bhṛgurmarīciḥ kapilo voḍhuḥ pañcaśikho ruciḥ |
āsuriśca pracetāśca patnīvrato bṛhaspatiḥ || 38 ||
[Analyze grammar]

śukra utathyaḥ karakaḥ kaṇvo gautamakaśyapau |
sanakaśca sanandaśca kardamaśca sanātanaḥ || 39 ||
[Analyze grammar]

sanatkumāraḥ pippalaḥ śaṃku śukraḥ parāśaraḥ |
śātātapo lomaśaśca mārkaṇḍeyo vibhāṇḍakaḥ || 40 ||
[Analyze grammar]

mṛkaṇḍuścavano jaratkārurāstikakauśikau |
bhāradvājaḥ ṛṣyaśṛṃgo bharadvājaśca nāradaḥ || 41 ||
[Analyze grammar]

vāmadevaśca durvāsāḥ svayaṃprakāśa ityamī |
tatyāja mohinī dṛṣṭvā vrīḍayā vedhasaṃ tadā || 42 ||
[Analyze grammar]

brahmā cāsanamārūḍho mohinī pārśvataḥ sthitā |
praṇemurmunayastaṃ ca brahmā dadau śubhāśiṣam || 43 ||
[Analyze grammar]

papracchurmunayo devaṃ kathameṣā tavā'ntike |
brahmā prāha ciraṃ nṛtyaṃ gītaṃ cāpūrvamityapi || 44 ||
[Analyze grammar]

darśayituṃ tvāgateyaṃ kṛtvā śrāntā sthitā yataḥ |
munayo jahasustatra kulaṭāṃ prati sarvathā || 45 ||
[Analyze grammar]

sadyaścukopa tūtthāya sā''ha viśvasṛjaṃ tadā |
ete tvanigrahāḥ sarve vṛddhā hasanti māṃ vidhe || 46 ||
[Analyze grammar]

te'pi hāsyaṃ prayāsyanti lokānāṃ svasvakarmabhiḥ |
tvaṃ ca māṃ bhajamānāṃ vai yato gṛhṇāsi naiva ca || 47 ||
[Analyze grammar]

naitān vārayasi brahman hāsyapātraṃ tato bhava |
apūjyo bhava sarvatra nārīṇāṃ mānavarjitaḥ || 48 ||
[Analyze grammar]

tava patnī tava kārye bhartsanā vai kariṣyati |
kṛtvā'jaṃ pūjanahīnaṃ yayau svargaṃ tu mohinī || 49 ||
[Analyze grammar]

kṣaṇaṃ brahmā ca munayaḥ śuśucuḥ śāpamokṣaṇam |
brahmā vicārya ca tataścamatkārapurāntike || 50 ||
[Analyze grammar]

nāgavatyāṃ samāyātaḥ śuddhyarthaṃ śāpahānaye |
o namaḥ śrīkṛṣṇanārāyaṇāya svāmine namaḥ || 51 ||
[Analyze grammar]

japan mantraṃ kṛṣṇadattaṃ sasnau tīrthe'ghanāśane |
jahau dehaṃ tu taṃ brahmā śaptaṃ nāganadītaṭe || 52 ||
[Analyze grammar]

tasmāt sahasraśastatra cotpannā vṛndalāstataḥ |
nagaraṃ tatra saṃśritya sthitā brahmā divaṃ yayau || 53 ||
[Analyze grammar]

divyarūpadharaścaiva śāpaḥ pūrvatanusthitaḥ |
vṛndalāste sadā loke hyapūjyāstvabhavaṃstataḥ || 54 ||
[Analyze grammar]

nārībhirbhartsitāḥ śaśvannārīrūpaviḍambakāḥ |
mohakā mohinītulyā ratihīnā avīryakāḥ || 55 ||
[Analyze grammar]

na narā na ca nāryaste yoniliṃgavivarjitāḥ |
svalpamūtrachidramātrayutāste tu tataḥ param || 56 ||
[Analyze grammar]

brahmāṇaṃ ca samuddiśya cakrurvai tarpaṇaṃ jale |
brahmā tatra samāyātaścakruste prārthanāṃ vidheḥ || 57 ||
[Analyze grammar]

napuṃsakatvanāśāya brahmā prāha ca tāṃstadā |
tapaḥ kuruta satataṃ samuddiśya tu mohinīm || 58 ||
[Analyze grammar]

sā nistāra hi bhavatāṃ kariṣyati hitāvahā |
tataste vai taṭe nadyāstapaścakrurnirantaram || 59 ||
[Analyze grammar]

mohinīṃ te namo mātarvṛndalatvanivāriṇīm |
svāhā kāmapriye tubhyamuddhāraṃ kuru nastviha || 60 ||
[Analyze grammar]

iti samprārthayantaste vṛndalānāṃ gaṇāstadā |
dadṛśurnāganadyāstu taṭe saubhāgyasundarīm || 61 ||
[Analyze grammar]

bahucarāsvarūpāṃ tāṃ raktakañcukikānvitām |
raktaśāṭikayā yuktāṃ vahnivarṇāṃ sabhūṣaṇām || 62 ||
[Analyze grammar]

puṣṭāṃ puṣṭastanīṃ puṣṭajaghanāṃ tanumadhyamām |
surūpāṃ padmapatrākṣīṃ keśadhammilaśobhitām || 63 ||
[Analyze grammar]

kabarīsṛtisampannāṃ bhālapatrānvitāṃ satīm |
valayena karayośca kaṃkaṇairūrmikādibhiḥ || 64 ||
[Analyze grammar]

śobhitāṃ raśanāyuktāṃ mañjīravaraśobhitām |
karṇanāsābhujākaṇṭhabhālabhūṣaṇabhūṣitām || 65 ||
[Analyze grammar]

aṃkuritastanāṃ pṛthuśroṇīṃ vṛttakapolakām |
kundottamakalīdantāṃ raktabimbādharāṃ śubhām || 66 ||
[Analyze grammar]

śaraccandrānanāṃ miṣṭasvarāṃ smerānanānvitām |
puṣṭāṃ premabharāṃ kanyāṃ bhaktānugrahakātarām || 67 ||
[Analyze grammar]

kāmadharmavihīnāṃ ca rājasvalyavivarjitām |
kāmarūpadharāṃ vyomni dṛṣṭvā sarve napuṃsakāḥ || 68 ||
[Analyze grammar]

tasyāstu tejasā channanetrāḥ kṣaṇaṃ tadā'bhavan |
sā tvājagāma pṛthivītalaṃ nāgavatītaṭe || 69 ||
[Analyze grammar]

sarvaiḥ saṃvanditā cāpi pūjitā toṣitā'rthitā |
marditā ca tathā sarvāṃgeṣu saṃvāhitā satī || 70 ||
[Analyze grammar]

uvāca tān prasannā'smi varairyuṣmān madāśritān |
yojayāmi vṛṇudhvaṃ vai yatheṣṭaṃ mā ciraṃ tadā || 71 ||
[Analyze grammar]

vṛndalā hi tadā prāhuruddhārāya kṛpāṃ kuru |
ṣaṇḍhatvasya vināśāya tuṣṭuvuste muhurmuhuḥ || 72 ||
[Analyze grammar]

tadā devī tu tānprāha mohinyahaṃ purābhavā |
prakṛteśca tiraskārād yūyaṃ brahmatanūdbhavāḥ || 73 ||
[Analyze grammar]

ṣaṇḍhā sarve hi sañjātā nārībhartsanapāpataḥ |
nārīṇāṃ kāmaśāntyarthaṃ narāḥ kṛṣṇena nirmitāḥ || 74 ||
[Analyze grammar]

nārīṇāṃ māsike dharme kāmanalo vivardhate |
tacchāntiṃ tvicchati bhāryā patinā sārdhameva tu || 75 ||
[Analyze grammar]

yasyā nāsti patiḥ sā tu sveṣṭaṃ gacchanti śāntaye |
śāntikarma tu nārīṇāṃ dharmaḥ śāntiprado nṛṇām || 76 ||
[Analyze grammar]

bhajamānāṃ bhajante ye te tvāśīrvādabhūmayaḥ |
āgatāṃ kāmasantaptāṃ tiraskurvanti ye narāḥ || 77 ||
[Analyze grammar]

ātmahanaśca te bodhyāḥ sevikāghātakāśca te |
tena pāpena ṣaṇḍhatvaṃ prayānti pratijanmani || 78 ||
[Analyze grammar]

kāmakriyāsthayorvighnakartāro'pi napuṃsakāḥ |
kāmānandahanaḥ sarve ṣaṇḍhā bhavanti śāpataḥ || 79 ||
[Analyze grammar]

prasahya bhogakartāraścāpi daṇḍā bhavanti vai |
patiśūnyā tu yā nārī kāmataptā bhaved yadi || 80 ||
[Analyze grammar]

agṛhṇannaparādhī syāt phalaṃ ṣaṇḍhatvameva yat |
tasmānnaraiḥ sadā nāryaḥ pūjyāḥ sevyāstadicchayā || 81 ||
[Analyze grammar]

bhavantaḥ ṣaṇḍhatānivṛttyarthaṃ bhavantu dīkṣitāḥ |
śmaśrūhīnā nārīvastradharā nārīvibhūṣaṇāḥ || 82 ||
[Analyze grammar]

mama bhaktā mama pūjākartāro mama jāpakāḥ |
mama vaṃśadharā muktāḥ ṣaṇḍhatāto bhaviṣyatha || 83 ||
[Analyze grammar]

bahucaretyabhidhāya dadau mantraṃ nijaṃ tu sā |
oṃ namo bahucarāyai mohinyai kāmayoṣite || 84 ||
[Analyze grammar]

ṣaṃḍhatvaṃ hara mātastvaṃ śreyaḥ kuru paraṃ mama |
itimantraṃ nāganadyāṃ snāpayitvā dadau śubham || 85 ||
[Analyze grammar]

oṃ śrīṃ hrīṃ klīṃ kāmadātryai svāhā daśā'kṣaram |
mantraṃ dadau dvitīyaṃ ca kāmanāsiddhihetave || 86 ||
[Analyze grammar]

yasyāsīccaṇakāmātraṃ yonicchidraṃ tu tatsthale |
devī sā citrayāmāsa yoniṃ pūrṇāṃ tu dīkṣaṇe || 87 ||
[Analyze grammar]

yasmāsīcca lavaṃgābhaṃ liṃgacihnaṃ tu tatsthale |
pūrṇaṃ liṃgaṃ sāṇḍayugmaṃ citrayāmāsa rekhayā || 88 ||
[Analyze grammar]

hiṃgulārasadānena pūrṇakāmatvalabdhaye |
janmāntare bhavennārī naro vā tadvirekhitaḥ || 89 ||
[Analyze grammar]

śāṭikāṃ kañcukīṃ śreṣṭhāṃ ghargharīṃ dorakaṃ tathā |
dantikāṃ sindūracūrṇaṃ hiṃgulaṃ mantramityapi || 90 ||
[Analyze grammar]

jalaṃ ca mantritaṃ snigdhaṃ cumbanaṃ ca dadau tadā |
sarvānnapuṃsakān devī pasparśa stanayostadā || 91 ||
[Analyze grammar]

gṇḍayorbhālayoḥ kapolayoḥ keśeṣu netrayoḥ |
pṛṣṭhe nitambayoścāgre jaghanayostathodare || 92 ||
[Analyze grammar]

nābhyāṃ sakthnoḥ pādayośca siṣeca mastake ca tān |
ṣaṇḍhatvapāpanāśovābhavatviti jagāda tān || 93 ||
[Analyze grammar]

evaṃ dīkṣāṃ gṛhītvā te pupūjurdevikāṃ tadā |
sā ca pūjāṃ samagṛhya yayau vai cottarāṃ diśam || 94 ||
[Analyze grammar]

evaṃ ṣaṇḍhatvanivṛttiṃ kartuṃ dīkṣāṃ dadau satī |
bahucarā hiṃgulājā bhuvi tiṣṭhati śāśvatī || 95 ||
[Analyze grammar]

brahmā tāṃ bhajamānāṃ ca yato jagrāha naiva tu |
kāraṇaṃ tatra te vacmi śṛṇu lakṣmi purābhavam || 96 ||
[Analyze grammar]

brahmā svakamale taptvā śrutvā vyomagirāṃ purā |
sṛṣṭiṃ sarvāṃ samārebhe sasmāra śrīhariṃ punaḥ || 97 ||
[Analyze grammar]

nārāyaṇaṃ dadarśāgre yayāce varadānakam |
tava māyā yathā me na bādheta strīsvarūpiṇī || 98 ||
[Analyze grammar]

tathā cāśīrvaco dehi tataḥ sṛṣṭiṃ karomi vai |
nārāyaṇastathā'stvityevā''ha tatra hi vedhasam || 99 ||
[Analyze grammar]

sṛṣṭiṃ caturyugānāṃ ca yogyāṃ nārīnarātmikām |
kāle yathā yathā yogyāṃ racaya tvaṃ tathā tathā || 100 ||
[Analyze grammar]

kāmaṃ krodhaṃ tathā lobhaṃ mohaṃ ca kapaṭaṃ kvacit |
gṛhṇantaṃ tvāṃ ca nirlepaṃ rakṣayiṣye sṛjiṃ kuru || 101 ||
[Analyze grammar]

dharmabhānaṃ sadā te'stu sadā te rāgahīnatā |
mama smṛtiḥ sadā cā'stu sadā jīvanpramuktatā || 102 ||
[Analyze grammar]

dharmādharmau tavecchaiva tava dehodbhavau sadā |
karmaṇāṃ phaladātā ca bhava tvaṃ mama vāñchayā || 103 ||
[Analyze grammar]

akartā kriyamāṇe'pi hyabhoktā bhogasāgare |
nirlepo lepavāṃścāpi sadā bhavasi padmaja || 104 ||
[Analyze grammar]

itihetorhareranugrahād brahmā prajāpatiḥ |
icchayā naiva jagrāha mohinīṃ mohavarjitaḥ || 105 ||
[Analyze grammar]

bhaktā bhagavato naiva gṛhṇanti viṣayān kvacit |
harerbhaktiṃ vihāyaiva pāvanīṃ bandhanāśinīm || 106 ||
[Analyze grammar]

iti te kathitaṃ lakṣmi mohinīkṛtamulbaṇam |
śāpasya kāraṇaṃ muktiḥ ṣaṇḍhatvaṃ dīkṣaṇaṃ tathā || 107 ||
[Analyze grammar]

ya idaṃ śṛṇuyād bhaktyā paṭhedvā tasya dūṣaṇam |
kāmabhāvakṛtaṃ sarvaṃ naśyatyeva na saṃśayaḥ || 108 ||
[Analyze grammar]

nāgavatyāṃ pratāpo'yaṃ nāgalīlāsakhīkṛtaḥ |
pāpānāṃ nāśakaḥ sarvajīvānāṃ tārakastathā || 109 ||
[Analyze grammar]

yasyāḥ sasevanāt pānāt snānāttathābhiṣecanāt |
bhuktirmuktirbhavet pūrṇaṃ puruṣārthacatuṣṭayam || 110 ||
[Analyze grammar]

iti śrīlakṣmīnārāyaṇīyasaṃhitāyā prathame kṛtayugasantāne mohinyapsaro brahmāṇaṃ vīkṣya mohitā brahmaṇā tu na gṛhītā tataḥ taṃ śaśāpa brahmā nāgavatīnadyāṃ śuddhaḥ tyaktadehānnapuṃsakānāmutpattiḥ bahucarāhiṃgulājādīkṣayā napuṃsakānāṃ mokṣaścetyādinirūpaṇanāmā pañcadaśādhikapañcaśatatamo'dhyāyaḥ || 515 ||
[Analyze grammar]