Chapter 509

śrīnārāyaṇa uvāca |
śṛṇu lakṣmyaikadā satye brahmāṇaṃ prati nāradaḥ |
darśanārthaṃ yayau bhrāntvā lokatrayaṃ nanāma tam || 1 ||
[Analyze grammar]

brahmā papraccha ca kutaḥ putra āgamyate vada |
nāradaḥ prāha martyānāṃ maṇḍalāni vilokya ca || 2 ||
[Analyze grammar]

tava pūjāvidhānāya vijñāpayituṃ hṛdgatam |
samāgato'smi ca pitaḥ śrutvā kuru yathocitam || 3 ||
[Analyze grammar]

daityānāṃ hi balaṃ loke sarvatrā'sti pravartitam |
yajñāśca satyadharmāśca satkarmāṇi ca sarvathā || 4 ||
[Analyze grammar]

prasahya tairvināśyante devā bhaktāśca duḥkhinaḥ |
tasmād yatheṣṭaṃ bhagavan kalyāṇaṃ kartumarhasi || 5 ||
[Analyze grammar]

ityevaṃ vinivedyaiva natvā sampūjya saṃyayau |
brahmā vai cintayāmāsa yajñārthaṃ śubhabhūtalam || 6 ||
[Analyze grammar]

nirvighnaṃ tatsthalaṃ kvāstītyājñātuṃ padmapuṣpakam |
karasthaṃ sa samuvāca pata sthale tu pāvane || 7 ||
[Analyze grammar]

tataścikṣepa puṣpaṃ tad bhrāntvā lokān samantataḥ |
hāṭakeśvaraje kṣetre sampapāta supāvane || 8 ||
[Analyze grammar]

etasminnantare prāptaḥ paścāt tasya pitāmahaḥ |
kṣetraṃ dṛṣṭvā prasanno'bhūd yajñārthaṃ prapitāmahaḥ || 9 ||
[Analyze grammar]

ādideśa tato vāyuṃ samānaya purandaram |
ādityairvasubhiḥ sārdhaṃ rudraiścaiva marudgaṇaiḥ || 10 ||
[Analyze grammar]

gandharvairlokapālaiśca siddhairvidyādharaistathā |
ye ca me syuḥ sahāyāstaiḥ samaste yajñakarmaṇi || 11 ||
[Analyze grammar]

vāyuścendraṃ devagaṇairyutaṃ samānināya ca |
brahmā prāha mahendraṃ ca vaiśākhyāmagniṣṭomakam || 12 ||
[Analyze grammar]

yajñaṃ kartuṃ samīhe'tra sambhārānāharasva vai |
brāhmaṇāṃśca tadarhān vai yogyopaskārakāṃstathā || 13 ||
[Analyze grammar]

indrastānānayāmāsa saṃbhārāṃśca dvijottamān |
ārebhe ca tato yajñaṃ vidhivat prapitāmahaḥ || 14 ||
[Analyze grammar]

śaṃbhurdevagaṇaiḥ sārdha tatra yajñe samāgataḥ |
devān brahmā samuvāca svasvasthāneṣu tiṣṭhata || 15 ||
[Analyze grammar]

viśvakarman kuru yajñamaṇḍapaṃ yajñavedikāḥ |
patnīśālāḥ sadaścāpi kuṇḍānyāvaśyakāni ca || 66 ||
[Analyze grammar]

yajñapātrāṇi ca gṛhān camasāṃśca caṣālakān |
yūpān śayanagartāṃśca sthaṇḍilāni prakāraya || 17 ||
[Analyze grammar]

hiraṇmayaṃ supuruṣaṃ kāraya tvaṃ surūpiṇām |
bṛhaspate tvamānīhi yajñārhānṛtvijo'khilān || 18 ||
[Analyze grammar]

yāvat ṣoḍaśasaṃkhyākān śuśrūṣāṃ kuru devarāḍ |
kubera ca tvayā deyā dakṣiṇā kālasaṃbhavā || 19 ||
[Analyze grammar]

tvayā vidhe vidhau kāryaṃ kṛtyā'kṛtyaparīkṣaṇam |
lokapālāḥ prarakṣantu tvaindryādikā diśastathā || 20 ||
[Analyze grammar]

bhūtapretapiśācānāṃ praveśo daityarakṣasām |
mā bhūdityatha yajñena dīyatāṃ dānamuttamam || 21 ||
[Analyze grammar]

ādityā vasavo rudrā viśvedevā marudgaṇāḥ |
bhavantu pariveṣṭāro bhoktukāmajanasya tu || 22 ||
[Analyze grammar]

yajñārhā brāhmaṇā vṛttāstiṣṭhantu yajñamaṇḍape |
maitrāvaruṇaścyavano'tharvāko gālavastathā || 23 ||
[Analyze grammar]

marīcirmārkavaścaite sarvakarmaviśāradāḥ |
prasthānakartā cādhvaryuḥ pulastyastatra tiṣṭhatu || 24 ||
[Analyze grammar]

raibhyo munistathonnetā tiṣṭhatu yajñamaṇḍape |
brahmā bhavatu nārado gargo'stu satravīkṣakaḥ || 25 ||
[Analyze grammar]

hotāro'gnīdhrabharadvājaparāśarāstrayaḥ |
bṛhaspatistathā''cārya udgātā gobhilo muniḥ || 26 ||
[Analyze grammar]

śāṇḍilyaḥ pratihartā ca subrahmaṇyastathā'ṅgirāḥ |
asya yajñasya siddhyarthaṃ santvṛtvijastu ṣoḍaśa || 27 ||
[Analyze grammar]

brahmā tān pūjayāmāsa dīkṣitastaistu viśvasṛṭ |
yajamāno'bhavad yajñakāryaṃ tataḥ pravartitam || 28 ||
[Analyze grammar]

brahmā ca nāradaṃ prāha sāvitrīṃ kṣipramānaya |
vādyamāneṣu vādyeṣu siddhakinnaraguhyakaiḥ || 29 ||
[Analyze grammar]

gandharvairvādyasaṃyuktairuccāraṇaparairdvijaiḥ |
araṇiṃ samupādāya pulastyo vākyamabravīt || 30 ||
[Analyze grammar]

patnīpatnītiviprendrāḥ proccaistatra vyavasthitaḥ |
brahmā punarnāradaṃ saṃjñayā karasya vai drutam || 31 ||
[Analyze grammar]

gṛhaṃ sampreṣayāmāsa patnī cānīyatāmiti |
so'pi gatvā''ha sāvitrīṃ pitrā sampreṣito'smyaham || 32 ||
[Analyze grammar]

āgaccha maṇḍapaṃ devi yajñakāryaṃ pravartate |
paramekākinī kīdṛgrūpā sadasi dṛśyase || 33 ||
[Analyze grammar]

ānīyantāṃ tato devyastābhirvṛttā prayāsyasi |
ityuktvā prayayau yajñe nārado'jamuvāca ha || 34 ||
[Analyze grammar]

devībhiḥ saha sāvitrī samāyāsyati sukṣaṇam |
punastaṃ preṣayāmāsa brahmā'tha nārado yayau || 35 ||
[Analyze grammar]

mātaḥ śīghraṃ samāyāhi devībhiḥ parivāritā |
sāvitryapi tadā prāha yāmi keśān prasādhya vai || 36 ||
[Analyze grammar]

nārado'jaṃ prāha keśān prasādhyā''yāti vai tataḥ |
somapānamuhūrtasyā'vaśeṣe satvaraṃ tadā || 37 ||
[Analyze grammar]

pulastyaśca yayau tatra sāvitrī tvekalā'sti hi |
kiṃ devi sālasā bhāsi gaccha śīghraṃ kratoḥ sthalam || 38 ||
[Analyze grammar]

sāvitryuvāca taṃ brūhi muhūrtaṃ paripālyatām |
yāvadabhyeti śakrāṇī gaurī lakṣmīstathā'parāḥ || 39 ||
[Analyze grammar]

devakanyāḥ samāje'tra tābhireṣyāmi saṃhitā |
so'pi gatvā drutaṃ prāha somabhārā'rditaṃ vidhim || 40 ||
[Analyze grammar]

sā māṃ prāha ca devībhiḥ sahitā''yāmi vai makhe |
ahaṃ yāsyāmi sahitā na tvekalā kathaṃcana || 41 ||
[Analyze grammar]

evaṃ jñātvā suraśreṣṭha kuru yatte surocate |
atikrāmati kālaśca yajñapānakṣaṇātmakaḥ || 42 ||
[Analyze grammar]

śrutvā brahmā mahendraṃ ca prāha sā śithilātmikā |
nā''yātyevā'nyayā patnyā yajñaḥ kāryo bhavatviti || 43 ||
[Analyze grammar]

brahmājñayā bhramamāṇāṃ kanyāṃ kāṃcit sureśvaraḥ |
candrāsyāṃ gopajāṃ tanvīṃ kalaśavyagramastakām || 44 ||
[Analyze grammar]

yuvatīṃ sukumārīṃ ca papraccha kā'si kanyake |
gopakanyeti sā prāha takraṃ vikretumāgatā || 45 ||
[Analyze grammar]

parigṛhṇāsi cet takraṃ dehi mūlyaṃ drutaṃ mama |
indro jagrāha tāṃ takrasahitāṃ gopakanyakām || 46 ||
[Analyze grammar]

gorvaktreṇā''veśayitvā mūtreṇā''karṣayat tataḥ |
evaṃ medhyatamāṃ kṛtvā saṃsnāpya salilaiḥ śubhaiḥ || 47 ||
[Analyze grammar]

suvāsasī dhārayitvā nītvā dhṛtvā'jasannidhau |
ānīteyaṃ tvadarthaṃ vai brahman sarvaguṇānvitā || 48 ||
[Analyze grammar]

gavāṃ ca brāhmaṇānāṃ ca kulamekaṃ dvidhā kṛtam |
ekatra mantrastiṣṭhanti havirekatra tiṣṭhati || 49 ||
[Analyze grammar]

gorudarād viniṣkrāntā prāpiteyaṃ dvijanmatām |
pāṇigrahaṃ kuruṣvāsyā yajñapānaṃ samācara || 50 ||
[Analyze grammar]

rudraḥ prāha ca goyantraniṣkrānteyaṃ tataḥ khalu |
gāyatrīnāmapatnī te bhavatvatra makhe sadā || 51 ||
[Analyze grammar]

brāhmaṇāstu tadā prāhureṣā'stu brāhmaṇīvarā |
gopajātivarjitāyāstvaṃ pāṇigrahaṇaṃ kuru || 52 ||
[Analyze grammar]

brahmā pāṇigrahaṃ cakre samārebhe śubhakriyām |
gāyatryapi samādāya mūrdhni tāmaraṇiṃ mudā || 53 ||
[Analyze grammar]

vādyamāneṣu vādyeṣu samprāptā yajñamaṇḍapam |
vidhiścakre svakeśānāṃ kṣaurakarma tataḥ param || 54 ||
[Analyze grammar]

viśvakarmā tu gāyatrīnakhacchedaṃ cakāra ha |
audumbaraṃ tato daṇḍaṃ paulastyo brahmaṇe dadau || 55 ||
[Analyze grammar]

eṇaśṛṃgānvitaṃ carma samantraṃ pradadau tathā |
patnīṃ śālāṃ gṛhītvā ca gāyatrīṃ maunadhāriṇīm || 56 ||
[Analyze grammar]

mekhalāṃ nidadhe tvanyāṃ kaṭyāṃ mauñjīmayīṃ śubhām |
tato brahmā ca ṛtvigbhiḥ saha cakre kratukriyām || 57 ||
[Analyze grammar]

karmaṇi jāyamāne ca tatrā''ścaryamabhūnmahat |
jālmarūpadharaḥ kaścid digvāsā vikṛtānanaḥ || 58 ||
[Analyze grammar]

kapālapāṇirāyāto bhojanaṃ dīyatāmiti |
niṣidhyamāno'pi vipraiḥ praviṣṭo yajñamaṇḍapam || 59 ||
[Analyze grammar]

sadasyāstu tiraścakruḥ kastvaṃ pāpaḥ samāgataḥ |
kapālī nagnarūpaścā'pavitrakharparānvitaḥ || 60 ||
[Analyze grammar]

yajñabhūmiraśuddhā syād gaccha śīghramito bahiḥ |
jālmaḥ prāha kathaṃ cāsmi hyaśuddho bhikṣuko vratī || 61 ||
[Analyze grammar]

brahmayajñamimaṃ jñātvā śuddhaḥ snātvā samāgataḥ |
gopālakanyā nityaṃ yā śūdrī tvaśuddhajātikā || 62 ||
[Analyze grammar]

sthāpitā'tra nu sā śuddhā vipro'haṃ pāvano na kim |
tāvat tatra samāyāto brāhmaṇo vṛddharūpavān || 63 ||
[Analyze grammar]

śrīkṛṣṇo vai tamuvāca pratyuttaraṃ śṛṇu priye |
jālma naiṣā'sti śūdrāṇī brāhmaṇī jātito'sti vai || 64 ||
[Analyze grammar]

śṛṇu jānāmi tadvṛttaṃ nānye jānantyatadvidaḥ |
purā sṛṣṭe samārambhe śrīkṛṣṇena parātmanā || 65 ||
[Analyze grammar]

svāṃśarūpā hi sāvitrī svamūrteḥ prakaṭīkṛtā |
atha dvitīyā kanyā ca pativratā'bhidhā kṛtā || 66 ||
[Analyze grammar]

kumāraśca kṛtaḥ patnīvratākhyo brāhmaṇastataḥ |
brahmā vairājadehācca kṛtastasmai samarpitā || 67 ||
[Analyze grammar]

sāvitrī śrīhariṇaiva goloke eva sannidhau |
atha yajñapravāhārthaṃ brahmā yajñaṃ kariṣyati || 68 ||
[Analyze grammar]

pṛthivyāṃ martyarūpeṇa tatra mānuṣavigrahā |
patnī yajñasya kāryārthamapekṣitā bhaviṣyati || 69 ||
[Analyze grammar]

hetunā'nena kṛṣṇena sāvitryājñāpitā tadā |
dvitīyena svarūpeṇa tvayā gantavyameva ha || 70 ||
[Analyze grammar]

prāgeva bhūtale kanyārūpeṇa brahmaṇaḥ kṛte |
sāvitrī śrīkṛṣṇamāha kau tatra pitarau mama || 71 ||
[Analyze grammar]

śrīkṛṣṇastāṃ tadā sandarśayāmāsa śubhau tu tau |
imau patnīvrato vipro viprāṇī ca pativratā || 72 ||
[Analyze grammar]

madaṃśau matsvarūpau cā'yonijau divyavigrahau |
pṛthvyāṃ kuṃkumavāpyāṃ vai kṣetre'śvapaṭṭasārase || 73 ||
[Analyze grammar]

sṛṣṭyāraṃbhe viprarūpau vartiṣyete'tipāvanau |
vaiśvadevādiyajñādihavyādyarthaṃ gavānvitau || 74 ||
[Analyze grammar]

saurāṣṭre ca yadā brahmā yajñārthaṃ saṃgamiṣyati |
tatpūrvaṃ tau gobhilaśca gobhilā ceti saṃjñitā || 72 ||
[Analyze grammar]

gavā prapālakau bhūtvā''nartadeśe gamiṣyataḥ |
yatrā''bhīrā nivasanti tatsamau veṣakarmabhiḥ || 76 ||
[Analyze grammar]

daityakṛtārdanaṃ tena pracchannayorna vai bhavet |
itiḥhetoryajñapūrvaṃ daityakleśabhiyā tu tau || 77 ||
[Analyze grammar]

śrīharerājñayā''narte jātāvābhīrarūpiṇau |
gavāṃ vai pālakau viprau pitarau ca tvayā hi tau || 78 ||
[Analyze grammar]

kartavyau gopaveṣau vai vastuto brāhmaṇāvubhau |
madaṃśau tatra sāvitri tvayā dvitīyarūpataḥ || 79 ||
[Analyze grammar]

ayonijatayā putryā bhāvyaṃ vai divyayoṣitā |
dadhidugdhādivikretryā gantavyaṃ tatsthale tadā || 80 ||
[Analyze grammar]

yadā yajño bhavet tatra tadā smṛtvā suyogataḥ |
mānuṣyā tu tvayā nūtnavadhvā kratuṃ kariṣyati || 81 ||
[Analyze grammar]

sahabhāvaṃ gato brahmā gāyatrī tvaṃ bhaviṣyasi |
brāhmaṇayoḥ sutā gūḍhā gopamadhyanivāsinoḥ || 82 ||
[Analyze grammar]

brahmāṇī ca tato bhūtvā satyalokaṃ gamiṣyasi |
brāhmaṇāstvāṃ japiṣyanti martyalokagatāstataḥ || 83 ||
[Analyze grammar]

ityevaṃ jāyamānaiṣā gāyatrī brāhmaṇī sutā |
vartate gopaveṣīyā nā'śuddhā jātito hi sā || 84 ||
[Analyze grammar]

evaṃ pratyuttaritaḥ sa jālmaḥ kṛṣṇena vai tadā |
tāvat tatra samāyātau gobhilāgobhilau mudā || 85 ||
[Analyze grammar]

asmatputryā mahadbhāgyaṃ brahmaṇā yā vivāhitā |
āvayostu mahadbhāgyaṃ daityakaṣṭaṃ nivāryate || 86 ||
[Analyze grammar]

yajñadvāreṇa devānāṃ brāhmaṇānāṃ satāṃ tathā |
ityuktvā tau gopaveṣau tyaktvā brāhmaṇarūpiṇau || 87 ||
[Analyze grammar]

pitāmahau hi viprāṇāṃ paricitau mahātmanām |
sarveṣāṃ pūrvajau tatra jātau divyau ca bhūsurau || 88 ||
[Analyze grammar]

brahmādyāśca tadā nemuścakruḥ satkāramādarāt |
yajñe ca sthāpayāmāsuḥ sarvaṃ hṛṣṭāḥ surādayaḥ || 89 ||
[Analyze grammar]

brahmāṇaṃ mālayā kuṃkumākṣataiḥ kusumādibhiḥ |
vardhayitvā sutāṃ tatra dadaturyajñamaṇḍape || 90 ||
[Analyze grammar]

vṛddho vai brāhmaṇastatra kṛṣṇarūpaṃ dadhāra ha |
sarvaiśca vanditaḥ sādhu sādhvityāhuḥ surādayaḥ || 91 ||
[Analyze grammar]

jālmaḥ kṛṣṇaṃ hariṃ dṛṣṭvā gāyatrīpitarau tathā |
dṛṣṭvā nanāma bhāvena prāha bhikṣāṃ pradehi me || 92 ||
[Analyze grammar]

bubhukṣito'smi viprendrā garhayantu na māṃ dvijāḥ |
dīnāndhaiḥ kṛpaṇaiḥ sarvaistarpitairiṣṭirucyate || 93 ||
[Analyze grammar]

anyathā syādvināśāya kraturyuṣmatkṛto'pyayam |
annahīno dahed rāṣṭraṃ mantrahīnastu ṛtvijaḥ || 94 ||
[Analyze grammar]

yājñikaṃ dakṣiṇāhīno nāsti yajñasamo ripuḥ |
śrīkṛṣṇaśca tadā prāha jālme dadatu bhojanam || 95 ||
[Analyze grammar]

viprāḥ prāhuḥ khapparaṃ te tvaśuddhaṃ vidyate tataḥ |
bahirniḥsara dāsyāmo bhikṣāṃ pārśvamahānase || 96 ||
[Analyze grammar]

etasyāmannaśālāyāṃ bhuñjanti yatra tāpasāḥ |
dīnāndhāḥ kṛpaṇāścaiva tathā kṣutkṣāmakā dvijāḥ || 97 ||
[Analyze grammar]

aśuddhaṃ te kapālaṃ vai yajñabhūmerbahirnaya |
gṛhāṇā'nyacchuddhapātraṃ dūraṃ prakṣipya khapparam || 98 ||
[Analyze grammar]

evamuktaśca jālmaḥ sa roṣāccikṣepa khapparam |
yajñamaṇḍapamadhye ca svayaṃ tvadṛśyatāṃ gataḥ || 99 ||
[Analyze grammar]

sarvepyāścaryamāpannā viprā daṇḍena khapparam |
cikṣipustadbahistāvad dvitīyaṃ samapadyata || 100 ||
[Analyze grammar]

tasminnapi parikṣipte tṛtīyaṃ samapadyata |
evaṃ śatasahasrāṇi samapadyanta vai tadā || 101 ||
[Analyze grammar]

pariśrāntā brāhmaṇāśca yajñavāṭaḥ sakhapparaḥ |
samantatastadā jāto hāhākaro hi sarvataḥ || 102 ||
[Analyze grammar]

brahmā vai prārthayāmāsa sannatvā tāṃ diśaṃ muhuḥ |
kimidaṃ yujyate deva yajñe'smin karmaṇaḥ kṣatiḥ || 103 ||
[Analyze grammar]

tasmāt saṃhara sarvāṇi kapālāni maheśvara |
yajñakarmavilopo'yaṃ mā bhūt tvayi samāgate || 104 ||
[Analyze grammar]

tataḥ śabdo'bhavad vyomnaḥ pātraṃ me medhyamasti vai |
bhuktipātraṃ mama tvete kathaṃ nindanti bhūsurāḥ || 1085 ||
[Analyze grammar]

tathā na māṃ samuddiśya juhuvurjātavedasi |
yathā'nyā devatāstadvanmantrapūtaṃ havirvidhe || 106 ||
[Analyze grammar]

ato'tra māṃ samuddiśya viśeṣājjātavedasi |
hotavyaṃ havirevātra samāptiṃ yāsyati kratuḥ || 107 ||
[Analyze grammar]

brahmā prāha tadā pratyuttaraṃ vyomni ca taṃ prati |
tava rūpāṇi vai yoginnasaṃkhyāni bhavanti hi || 108 ||
[Analyze grammar]

kapālaṃ maṇḍape yāvad vartate tāvadeva ca |
nātra camasakarma syāt khapparaṃ pātrameva na || 109 ||
[Analyze grammar]

yajñapātraṃ na tatproktaṃ yato'śuddhaṃ sadā hi tat |
yadrūpaṃ yādṛśaṃ pātraṃ yādṛśaṃ karmaṇaḥ sthalam || 110 ||
[Analyze grammar]

tādṛśaṃ tatra yoktavyaṃ naitatpātrasya yojanam |
mṛnmayeṣu kapāleṣu haviḥ pācyaṃ kratau matam || 111 ||
[Analyze grammar]

tasmāt kapālaṃ dūraṃ vai nīyatāṃ yat kraturbhavet |
tvayā rūpaṃ kapālin vai yādṛśaṃ cātra darśitam || 112 ||
[Analyze grammar]

tasya rūpasya yajñe'smin puroḍāśe'dhikāritā |
bhavatveva ca bhikṣāṃ saṃgṛhāṇa tṛptimāpnuhi || 113 ||
[Analyze grammar]

adyaprabhṛti yajñeṣu puroḍāśātmakaṃ dvijaiḥ |
tavoddeśena deveśa hotavyaṃ śatarudrikam || 114 ||
[Analyze grammar]

viśeṣāt sarvayajñeṣu japyaṃ caiva viśeṣataḥ |
atra yajñaṃ samārabhya yastvā prāk pūjayiṣyati || 115 ||
[Analyze grammar]

avighnena kratustasya samāptiṃ pravrajiṣyati |
evamukte tadāścaryaṃ jātaṃ śṛṇu tu padmaje || 116 ||
[Analyze grammar]

yānyāsaṃśca kapālāni tāni sarvāṇi tatkṣaṇam |
rudrāṇyaścānnapūrṇā vai devyo jātāḥ sahasraśaḥ || 117 ||
[Analyze grammar]

sarvāstāḥ pārvatīrūpā annapūrṇātmikāḥ striyaḥ |
bhikṣādātryo vinā yābhirbhikṣā naivopapadyate || 118 ||
[Analyze grammar]

tāvacchrīśaṃkaraścāpi prahṛṣṭaḥ pañcamastakaḥ |
yajñamaṇḍapamāsādya saṃsthito vedisannidhau || 119 ||
[Analyze grammar]

brāhmaṇā munayo devā namaścakrurharaṃ tathā |
rudrāṇīḥ pūjayāmāsurārebhire kratukriyām || 120 ||
[Analyze grammar]

sahasraśaḥ kratau devyo niṣeduḥ śivayoṣitaḥ |
śivena sahitāścānyāḥ koṭiśo devayoṣitaḥ || 121 ||
[Analyze grammar]

evaṃ śaṃbhuḥ kratau bhāgaṃ sthāpayāmāsa sarvadā |
paṭhanācchravaṇāccāsya yajñasya phalamāpnuyāt || 122 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne brahmaṇā yajñārthaṃ hāṭakeśvarakṣetre nāgavatyāstīre devādidvārā sasāmagrīmaṇḍapādiracanā kāritā jālmarūpeṇa śaṃkarāgamanam gāyatryā brāhmaṇījātīyatāvṛttāntaḥ kapālānāṃ annapūrṇādevyātmakatvaṃ śaṃkarasya yajñe sthānaṃ cetyādinirūpaṇanāmā navā'dhikapañcaśatatamo'dhyāyaḥ || 509 ||
[Analyze grammar]