Chapter 507

śrīnārāyaṇa uvāca |
śṛṇu lakṣmi sā ca śaktirdhārānāmnī kumārikā |
brāhmaṇasyā'bhavatputrī devaśarmaṇa īśvarī || 1 ||
[Analyze grammar]

kanyārūpā tapastepe'rundhatīmitratāṃ gatā |
arundhatyāśrame vāsaṃ tataścakāra śobhanā || 2 ||
[Analyze grammar]

ekadā'rundhatī prāha sarasvatyāstaṭe śubham |
mamāśramapadaṃ ramyaṃ tatra tiṣṭha mayā saha || 3 ||
[Analyze grammar]

tataḥ sā kanyakā dhārā tayā sārdhaṃ yayau tataḥ |
śaktirūpā sthitā devī sarasvatyāstaṭe śubhā || 4 ||
[Analyze grammar]

divyā brahmasvarūpā ca vasiṣṭho'pi mahāmuniḥ |
hāṭakeśvarajaṃ kṣetraṃ tyaktvā sarasvatītaṭe || 5 ||
[Analyze grammar]

svāśramaṃ prayayau tatra tapastepe sukhāvaham |
viśvāmitreṇa vijñātaṃ śaktirme tatra saṃgatā || 6 ||
[Analyze grammar]

vaśiṣṭhasya gṛhe cāste tāpasī brahmaputrikā |
vasiṣṭho'pi sarasvatyāstaṭe cāste nijāśrame || 7 ||
[Analyze grammar]

jñātvā cukopa cātyarthaṃ śaśāpa ca sarasvatīm |
bhava raktajalā yatra vasiṣṭho na vaset kvacit || 8 ||
[Analyze grammar]

ātharvaṇena mantreṇa viśvāmitrābhicārataḥ |
sarasvatī tadā tūrṇaṃ jātā raktajalā yataḥ || 9 ||
[Analyze grammar]

apeyaṃ tajjalaṃ jātaṃ daivānāṃ karmavarjitam |
bhūtapretapiśācānāṃ peyaṃ jñātvā vihāya tat || 10 ||
[Analyze grammar]

tattīrasthā yayurdūraṃ vasiṣṭhaḥ puṣkaraṃ yayau |
dhārā śaktirdevatā ca vāsaṃ cakāra sarvadā || 11 ||
[Analyze grammar]

sarasvatyā vasiṣṭhaścā''vedito jalaśuddhaye |
raktatāyā layārthaṃ ca puṣkare'rbudaparvate || 12 ||
[Analyze grammar]

vasiṣṭhaḥ prāha raktasya śuddhyarthaṃ tava sarvathā |
yatiṣye gaccha deveśi sarvaṃ te sukhadaṃ yathā || 13 ||
[Analyze grammar]

vasiṣṭho yogamāsthāya cāvatīrya dharātale |
plakṣavṛkṣasya mūle vai sarasvatyā jalānvite || 14 ||
[Analyze grammar]

kṛtvā samādhiṃ netrābhyāṃ lokayāmāsa cāntare |
tāvatpṛthvītalācchuddhaṃ jalaṃ paramapāvanam || 15 ||
[Analyze grammar]

pravāharūpaṃ sambhūtaṃ sarasvatyāṃ yuyoja tat |
tajjalaṃ sarvathā pūrṇaṃ sarasvatyāṃ babhūva ha || 16 ||
[Analyze grammar]

niṣkāsya salilaṃ raktaṃ vegena ca bahirbahiḥ |
śuddhaṃ jalaṃ sarasvatyāstanmūlātsarvadā'sti hi || 17 ||
[Analyze grammar]

śuddhavāryoghabalato raktaṃ niḥsāritaṃ jalam |
pravāhaṃ ca dvitīyaṃ tat kṛtvā yātaṃ sthalāntaram || 18 ||
[Analyze grammar]

udvelaṃ sambhramadgacchadyātaṃ nimnasthalīṃ prati |
sā tu sābhramatīnāmnī nadī jātā tadutthitā || 19 ||
[Analyze grammar]

athaikadā ṛṣiryājñavalkyaḥ sābhramatītaṭe |
tīrthayātrāprasaṃgena niryayau bhaginīyutaḥ || 20 ||
[Analyze grammar]

kaṃsārikā'bhidhā sā ca bālyādvai brahmacāriṇī |
tāpasī saṃyamaprāptā jñānānandamayī satī || 21 ||
[Analyze grammar]

yājñavalkyasya bhāginī vaiṣṇavī cārtavavṛṣā |
ṛtudharmaṃ samāpannā yātrāyāṃ tena hetunā || 22 ||
[Analyze grammar]

yājñavalkyaḥ sthitiṃ cakre saptāhaṃ saritastaṭe |
vṛkṣo'dhaḥparṇaśālāyāṃ bhaginī tvaparoṭaje || 23 ||
[Analyze grammar]

yājñavalkyasya daivāddhi svapnadoṣo babhūva ha |
retoyuktaṃ paridhānaṃ samuttārya bahiḥsthale || 24 ||
[Analyze grammar]

sthāpayitvā punā rātrau supto nidrāṃ jagāma ha |
atha kaṃsārikā mūtraśaucārthaṃ tu kṣaṇāntare || 29 ||
[Analyze grammar]

ūṭajādbahirāyātā dadarśa patitā'mbaram |
mūtraśaucaṃ vidhāyaivā'mbaraṃ saṃgṛhya coṭaje || 26 ||
[Analyze grammar]

suṣvāpa śayane sādhvī cottānā ca tataḥ punaḥ |
klinnayonyantaraṃ bhāgaṃ praveśitā'mbareṇa sā || 27 ||
[Analyze grammar]

savīryakā'jñānavatī mārjayāmāsa vai muhuḥ |
vastraretaso yogena yoniḥ klinnā viśeṣataḥ || 28 ||
[Analyze grammar]

punastenaiva vastreṇa mārjayāmāsa vai muhuḥ |
svayonestu malaṃ matvā mārjayāmāsa cāntaram || 29 ||
[Analyze grammar]

evaṃ tvamogharetastad bhagamadhye'nvasaṃcarat |
rajasā miśritaṃ garbharūpaṃ babhūva tattadā || 30 ||
[Analyze grammar]

atha prātaḥ samutthāya yājñavalkyo'mbaraṃ nijam |
anveṣayāmāsa bahiḥ prāptaṃ naivā'mbaraṃ yataḥ || 31 ||
[Analyze grammar]

papraccha bhaginīṃ dhautraṃ jñātaṃ prāptaṃ nu vā tvayā |
sā prāhā'tra mayā bhrātaḥ rakṣitaṃ śayane mama || 32 ||
[Analyze grammar]

bhrātā prāha mayā tena snātavyaṃ dehi me svasaḥ |
svasā prāha nayiṣye'haṃ kṣālanārthaṃ nadītaṭam || 33 ||
[Analyze grammar]

yāhi tvaṃ cāmbaraṃ nītvā cāyāmyeva kṣaṇāntare |
ityuktaḥ sa yayau nadyāṃ sāpi śaṃkitamānasā || 34 ||
[Analyze grammar]

dadarśa dhautraṃ vistārya śeṣaṃ dhātuṃ tadantare |
śuṣkāyamānaṃ saṃvīkṣya jātaśaṃkā babhūva ha || 35 ||
[Analyze grammar]

cintayāmāsa satataṃ mayā yonyantare muhuḥ |
klinnabhāvasya nāśārthaṃ vastraṃ praveśitaṃ tadā || 36 ||
[Analyze grammar]

yonirviśeṣataḥ klinnā saṃbabhūva punaḥ punaḥ |
rajo me niḥsṛtaṃ cāpi dhātuyogena vai dhruvam || 37 ||
[Analyze grammar]

idānīṃ jñātamevaitatkāraṇaṃ gopyameva tat |
yadi garbho bhavenme'tra daivaṃ hi balavattaram || 38 ||
[Analyze grammar]

itijñātvā saṃvicārya śokaṃ cakāra bhāminī |
gopayāmāsa māsāntaṃ tataḥ prāha sahodaram || 39 ||
[Analyze grammar]

mayā kāryaṃ vrataṃ bhrātargantavyaṃ ca nijāśramam |
mithilāviṣaye yatra vrataṃ vai pūrṇatāṃ vrajet || 40 ||
[Analyze grammar]

ityuktvā prayayau nijaṃ cāśramaṃ tadvane śubhe |
gaurīṃ sampūjayāmāsa vratenā'naśanena vai || 41 ||
[Analyze grammar]

saptāhe saṃvyatīte tu gaurī sākṣāt samāyayau |
kaṃsāriktā jagādedaṃ garbho me bhrātṛretasaḥ || 42 ||
[Analyze grammar]

manye tiṣṭhati hyudare daiva tadbalavattaram |
tasya vṛddhiṃ mānasīṃ ca kuru saubhāgyasundari || 43 ||
[Analyze grammar]

yathā nānye ca jānīyustathā janma samarpaya |
gaurī tathā'stviti prāha pasparśa pāṇinodaram || 44 ||
[Analyze grammar]

garbhaḥ pakvaḥ kṣaṇājjāto bālaḥ sampūrṇa eva ca |
suṣuve bālakaṃ gaurīsannidhau tatkṣaṇāt satī || 45 ||
[Analyze grammar]

nālacchedaṃ svayaṃ gaurī cakāra śuddhiprabhṛti |
kaṃsārikā vratavyājānna niḥsasāra vai bahiḥ || 46 ||
[Analyze grammar]

gauryuktarītimāśritya rātrau śānte vane ca sā |
veṣṭitaṃ sūkṣmavastreṇa bālaṃ nītvā ravidyutim || 47 ||
[Analyze grammar]

nātidūraṃ yayau śreṣṭhamaśvatthaṃ vijanasthale |
tasyā'dhastādvimucyātha vākyametaduvāca ha || 48 ||
[Analyze grammar]

aśvattha viṣṇurūpo'si tvaṃ deveṣu pratiṣṭhitaḥ |
tasmād rakṣasva me putraṃ sarvatastvaṃ vanaspate || 49 ||
[Analyze grammar]

eṣa te śaraṇaṃ prāpto mama putrastu bālakaḥ |
salajjāyā nirdayāyāstasmād vṛkṣa prapoṣaya || 50 ||
[Analyze grammar]

evamuktvā sutasnehād ruroda cā'prakāśitam |
tāvattatrā''gatā ṣaṣṭhīdevī yā manasā'bhidhā || 51 ||
[Analyze grammar]

bālānāṃ rakṣikā yā sampreṣitā śivayoṣitā |
prāhaināṃ mā rurodā'tra kariṣye tvasya rakṣaṇam || 52 ||
[Analyze grammar]

gaccha maunaṃ svāśramaṃ tvaṃ dāsye bālaṃ prapoṣitam |
tubhyaṃ mā khida sādhvi tvaṃ sukhaṃ sarvaṃ bhaviṣyati || 53 ||
[Analyze grammar]

tathāpi śaṃkamānā tāṃ rākṣasīṃ praruroda sā |
tāvadākāśajā vāṇī sañjātā meghaniḥsvanā || 54 ||
[Analyze grammar]

mā tvaṃ śokaṃ kuruṣvāsya bālakasya kṛte śubhe |
eṣa śāpādutathyasya jyeṣṭhabhrāturbṛhaspateḥ || 55 ||
[Analyze grammar]

avatīrṇo tava kukṣau bṛhaspatiḥ svayaṃ guruḥ |
eṣa cātharvaṇaṃ vedaṃ śatakalpaṃ savistaram || 56 ||
[Analyze grammar]

saptabhedaṃ ca navadhā pañca kalpaṃ kariṣyati |
janmayogī pippalasya rasaṃ saṃbhakṣayiṣyati || 57 ||
[Analyze grammar]

ayaṃ vai pippalādeti nāmnā khyāto bhaviṣyati |
eṣā ṣaṣṭhī mahādevī rakṣāṃ tvasya kariṣyati || 18 ||
[Analyze grammar]

ityuktā prayayau tatra yatra svasyā''śramaḥ śubhaḥ |
atha sā cintayā nityaṃ putrapragatamānasā || 59 ||
[Analyze grammar]

samayaṃ nirjanaṃ labdhvā muhuryāti sutaṃ prati |
rakṣitaṃ hasamānaṃ ca puṣṭaṃ dṛṣṭvā mumoda ha || 60 ||
[Analyze grammar]

cumbanaṃ stanyapānādi kṛtvā datvā prayāti vai |
atha vanyajanaiḥ putraścāvalokita eva saḥ || 61 ||
[Analyze grammar]

ṛṣyāśrameṣu sā vārtā prasasāra bahusthale |
daivaputraḥ pippalādaḥ plakṣavṛkṣe hi vartate || 62 ||
[Analyze grammar]

ṛṣisaṃghāstu taṃ draṣṭuṃ prayānti pippalasthitam |
kaścicced grahītuṃ yāti bālaḥ prayātyadarśanam || 63 ||
[Analyze grammar]

ṣaṣṭhīdevī karotyevā'ntardhānaṃ bālakasya vai |
śrutvā''ścaryaṃ yājñavalkyo yayau taddarśanāya vai || 64 ||
[Analyze grammar]

ekākyeva ca taṃ dṛṣṭvā svānurūpaguṇāśrayam |
kathaṃ cāyaṃ mama rūpaṃ prāptavānityacintayat || 65 ||
[Analyze grammar]

bālaḥ prāha pitaste'stu namaskāro mama prabho |
jātismaro'sti tvadvīryādutpanno'haṃ bṛhaspatiḥ || 66 ||
[Analyze grammar]

kaṃsārikā ca mātā me svāpnavastrasya yogataḥ |
suṣuve māṃ pārvatīvākyācca pippalavṛkṣake || 67 ||
[Analyze grammar]

poṣaṇārthaṃ dhṛtavatī ṣaṣṭhī rakṣati māṃ sadā |
tāvatkātyāyanī prāptā maitreyī jñānaśevadhiḥ || 68 ||
[Analyze grammar]

sakhyastvanyā vananāryaścāgatāstatra saṃbhramāḥ |
kaṃsārikā'pi cāyātā bālaṃ draṣṭuṃ suharṣitā || 69 ||
[Analyze grammar]

sarveṣāṃ śṛṇvatāṃ bālaḥ pippalādo hi yogirāṭ |
jajāpa paramaṃ mantraṃ pippalaskandhamāśritaḥ || 70 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
śrutvā kaṃsārikā putraṃ prārthayāmāsa mānase || 71 ||
[Analyze grammar]

mama muktiṃ kuru putra kṛtakṛtyā bhavāmi ca |
vṛthā vai lokanindāyāḥ śravaṇaṃ me na yad bhavet || 72 ||
[Analyze grammar]

putraḥ sasmāra ca jñātvā kṛṣṇanārāyaṇaṃ harim |
āyayau śrīkṛṣṇanārāyaṇo vimānaśobhitaḥ || 73 ||
[Analyze grammar]

kaṃsārikā sutaṃ kṛtvā vakṣasyatha cucumba ca |
stanyaṃ dadau tatastena varṣmaṇā divyatāṃ gatā || 74 ||
[Analyze grammar]

tenaiva divyadehena vimānavaramāsthitā |
kṛṣṇanārāyaṇamantraṃ gṛhītvā vaiṣṇavī tataḥ || 75 ||
[Analyze grammar]

sarveṣāṃ paśyatāṃ vyomnā golokaṃ prajagāma ha |
āścaryaṃ paramaṃ dṛṣṭvā yājñavalkyo mahāmuniḥ || 76 ||
[Analyze grammar]

ṣaṣṭhīdevyā mukhāt sarvaṃ viditvā vṛttameva tat |
niścikāya sutaṃ svasya gopayāmāsa tadvṛttam || 77 ||
[Analyze grammar]

yayau naijāśramaṃ putraṃ dattvā''śīrvādamuttamam |
kasyacittvatha kālasya nārado munisattamaḥ || 78 ||
[Analyze grammar]

nirgatastena mārgeṇa dṛṣṭvā sūryābhabālakam |
papraccha vismayā''viṣṭa ekākī ko bhavāniha || 79 ||
[Analyze grammar]

kva te mātā pitā cāpi kimarthaṃ tviha tiṣṭhasi |
nivatsyasi kathaṃ cātra sarvaṃ me vistarād vada || 80 ||
[Analyze grammar]

pippalāda uvācainaṃ kā mātā kaḥ pitā mataḥ |
nāradaḥ prāha garbhasya dhāriṇī janmadāyinī || 81 ||
[Analyze grammar]

kṣetraṃ mātā matā bījādhāyakastu pitā mataḥ |
bālaḥ prāhā'jñabālasya bhānaṃ kṣetrasya vai katham || 82 ||
[Analyze grammar]

bījasyāpi kathaṃ bhānaṃ pitrorbhānaṃ tu bāndhavaiḥ |
na ca me bāndhavāḥ santi vṛkṣo'yaṃ me samāśrayaḥ || 83 ||
[Analyze grammar]

pippalo'yaṃ pitā me'sti ṣaṣṭhī manasā mātṛkā |
ityevamātraṃ saṃvedmi vada māṃ ko bhavāniha || 84 ||
[Analyze grammar]

nāradastu tadā prāha yājñavalkyasya retasā |
kaṃsārikāyāṃ jāto'si pitarau te tato matau || 85 ||
[Analyze grammar]

bālaḥ prāha kathaṃ cātra tiṣṭhāmīti vadā'tra me |
nāradaścāha devānāṃ gurustvaṃ vai bṛhaspatiḥ || 86 ||
[Analyze grammar]

utathyabhāryāsaṃhartā utathyaśāpadoṣataḥ |
jāto'syatra bālarūpaḥ pippalādo mahāmuniḥ || 87 ||
[Analyze grammar]

atharvavedo yaścaiṣaḥ śataśākho'sti mānave |
śatakalpaśca gūḍhārtho rājñāmadhyayanāya vai || 88 ||
[Analyze grammar]

navaśākhaḥ pañcakalpaḥ prasannārthasukhāgamaḥ |
tvayā samyak pariṣkṛto vyākhyātaḥ saṃbhaviṣyati || 89 ||
[Analyze grammar]

tadarthaṃ te'tra janmā'sti mātā te mokṣaṇaṃ gatā |
pitā te yājñavalkyo'sti tatpārśvaṃ tvamito vraja || 90 ||
[Analyze grammar]

ahaṃ vai nāradaścā'smi brahmaputraḥ suvaiṣṇavaḥ |
gṛhāṇa vaiṣṇavaṃ mantraṃ mālāṃ ca tulasīkṛtām || 91 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
ityuktvā pradadau mantraṃ mālāṃ cāpi dadau ca tam || 92 ||
[Analyze grammar]

bālaḥ prāha vane vāsaḥ kathaṃ me duḥkhahetukaḥ |
kathaṃ mātṛviyogo me vadā'tra kāraṇaṃ mune || 93 ||
[Analyze grammar]

nāradaḥ prāha janmasthaḥ śaniste tena cedṛśīm |
avasthāṃ tvaṃ gato'sīti nānyat tatra hi kāraṇam || 94 ||
[Analyze grammar]

bālaḥ śrutvā ruṣā cordhvaṃ taṃ dadarśa śanaiścaram |
tasya dṛṣṭinipātena nyapatat tatkṣaṇācchaniḥ || 95 ||
[Analyze grammar]

nāradaśca śaniṃ prāha mā tvaṃ vīkṣaya bālakam |
hāniṃ viśeṣataste'yaṃ kariṣyati na saṃśayaḥ || 96 ||
[Analyze grammar]

bālaṃ prāha prakopaṃ tvaṃ saṃharā'tra śanaiścare |
grahā gāvo narendrāśca santaśca brāhmaṇāstathā || 97 ||
[Analyze grammar]

pūjitāḥ pratipūjyante nirdahantyavamānitāḥ |
śaninā vīkṣitau svasya pādau janmakṣaṇe tadā || 98 ||
[Analyze grammar]

dagdhāvubhau tataścā'nyaṃ bhasmarāśiṃ karotyayam |
yadi paśyati netrābhyāṃ tādṛśo raudranetrakaḥ || 99 ||
[Analyze grammar]

pūjanīyo na ca bāla hyavamānyaḥ kadācana |
śrutvaivaṃ pippalādaḥ saḥ stutiṃ cakre śubhāvahām || 100 ||
[Analyze grammar]

namaste krūranetrāya piṃgalāya namo'stu te |
namaste kṛṣṇavarṇāya bhasmakartre namo'stu te || 101 ||
[Analyze grammar]

namaste raudradehāya sauraye te namonamaḥ |
namaste mandavārāya śanaiścara namo'stu te || 102 ||
[Analyze grammar]

śrutvā stutiṃ śaniḥ prāha parituṣṭo'smi sarvathā |
varaṃ varaya bhadraṃ te mamāpi bhadramastu ca || 103 ||
[Analyze grammar]

pippalādo varaṃ vavre bālānāṃ pīḍanaṃ tvayā |
adyaprabhṛti vai kvāpi na kāryaṃ dehi me varam || 104 ||
[Analyze grammar]

yāvadaṣṭatamaṃ varṣaṃ bāle te pīḍanaṃ nahi |
stotuḥ pīḍā na te'pyastu vāre pūjayituśca te || 105 ||
[Analyze grammar]

tathā te na ca pīḍā'stu tailābhyaṃgavidhāyinaḥ |
yastvāṃ lohamayaṃ kṛtvā tailamadhye tvadhomukham || 106 ||
[Analyze grammar]

dhārayet tena tailena tataḥ snānaṃ samācaret |
tasya pīḍā na kartavyā deyo lābho mahībhuje || 107 ||
[Analyze grammar]

sārdhasaptī tava yasya sa tilān lohasaṃyutān |
dadāti tava vāre yastasya kāryaṃ na pīḍanam || 108 ||
[Analyze grammar]

kṛṣṇagodānakartuśca kāryaṃ na pīḍanaṃ tvayā |
śamīsamidbhirhomasya kartuste mā'stu pīḍanam || 109 ||
[Analyze grammar]

kṛṣṇapuṣpānulepaiśca kṛṣṇatilaiśca guggulaiḥ |
kṛṣṇavastraiśca te pūjākarturmā'stu prapīḍanam || 110 ||
[Analyze grammar]

evamuktaḥ śanistena bāḍhamuktvā tataḥ param |
bālaṃ hyuvāca gatyarthaṃ punarna patanaṃ yathā || 111 ||
[Analyze grammar]

bālaḥ prāha yatheṣṭaṃ tvaṃ gaccha saurya nijālayam |
ityuktaḥ sa yayau svargaṃ nārado bālakena ca || 112 ||
[Analyze grammar]

pūjitaśca yayau satyalokaṃ tataḥ sa bālakaḥ |
ṣaṣṭhīdevyā samānīto yājñavalkyasya sannidhau || 113 ||
[Analyze grammar]

arpitaścopanītaśca yājñavalkyena bālakaḥ |
pippalādaścamatkārī yogīndro vedavidṛṣiḥ || 114 ||
[Analyze grammar]

samabhavanmahāvīryo lokakalyāṇakārakaḥ |
iti te kathitaṃ lakṣmi vṛttaṃ pāpavināśanam || 115 ||
[Analyze grammar]

yaścaitatpuṇyamākhyānaṃ paṭhedvā śṛṇuyācca vā |
agamyāgamanaṃ pāpaṃ śamaṃ yāti na saṃśayaḥ || 116 ||
[Analyze grammar]

upasargabhaye jāte tasya caughaḥ praśāmyati |
śanaiḥ śanairasandigdhaṃ pippalādavacobalāt || 117 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne sābhramatyā utpattiḥ yājñavalkyasya bhaginyāṃ pippalādotpattiḥ bṛhaspatiḥ pippalādo jātaḥ śanaiścarapūjādicetyādinirūpaṇanāmā saptādhikapañcaśatatamo'dhyāyaḥ || 507 ||
[Analyze grammar]