Chapter 506

śrīnārāyaṇa uvāca |
śṛṇu lakṣmi sarasvatyā raktasalilavāhitā |
yathā jātā purā tāṃ te pravakṣyāmi ca pāvanīm || 1 ||
[Analyze grammar]

viśvāmitrasya ca vaśiṣṭhasyā''sīd vimanaskatā |
brahmaṇā brāhmaṇaiścokto viśvāmitraḥ punaḥ punaḥ || 2 ||
[Analyze grammar]

brāhmaṇo'yaṃ brāhmaṇo'yaṃ brahmarṣiḥ kṣatriyo'pi vai |
vaśiṣṭhena tu naivoktaḥ śṛṇu tatkāraṇaṃ priye || 3 ||
[Analyze grammar]

āsīt purā ṛcīkākhyo bhṛguputro mahāmuniḥ |
vratādhyayanasampannastapasvī caikadā tu saḥ || 4 ||
[Analyze grammar]

tīrthayātrāprasaṃgena yayau bhojakaṭaṃ puram |
kauśikī ca nadī yatra yatra gādhirmahīpatiḥ || 5 ||
[Analyze grammar]

tasyāṃ snātvā prasantarpya pitṛdevān jajāpa saḥ |
tāvat tīre tatra caikā snānārthaṃ rājakanyakā || 6 ||
[Analyze grammar]

yuvatī rūpasampannā sarvāvayavaśobhanā |
samāyātā ca tāṃ dṛṣṭvā munirmumoha kāmataḥ || 7 ||
[Analyze grammar]

kasyeyaṃ kanyakā ceti lokān papraccha te janāḥ |
prāhuḥ gādhisutā cāsti gaurīpūjanalālasā || 8 ||
[Analyze grammar]

īhamānā subhartāraṃ vrataṃ karoti kāntadam |
atra brahma japitvā ca pūjayitvā yathākramam || 9 ||
[Analyze grammar]

naivedyaṃ vividhaṃ gauryai datvā karoti gāyanam |
nṛtyaṃ ca vādanaṃ cāpi nityaṃ gaurīpratuṣṭaye || 10 ||
[Analyze grammar]

śrutvā sa munirāṭ gādhiṃ pratiyayau sulālasaḥ |
ṛcīkaṃ tvāgataṃ vīkṣya rājā satkāramācarat || 11 ||
[Analyze grammar]

kṛtvā'rhaṇāṃ ṛṣiṃ kṛtāñjaliḥ papraccha bhāvataḥ |
nispṛhasyāpi te vipra kimāgamanakāraṇam || 12 ||
[Analyze grammar]

yatheṣṭaṃ me samācakṣva prayacchāmi ca te'khilam |
ṛcīko mohabhāvena yayāce tāṃ sukanyakām || 13 ||
[Analyze grammar]

brāhmaṇena vivāhena tāṃ me dehīti cābravīt |
sā mayā vī kṣitā gaurīpūjāyāmiti cā'bravīt || 14 ||
[Analyze grammar]

tacchrutvā bhayasantrasto gādhirbuddhimatāṃ varaḥ |
daridraṃ jaraṭhaṃ matvā provāca nītisaṃbhṛtam || 15 ||
[Analyze grammar]

asmākaṃ kanyakādāne śulkamasti dvijottama |
tacced yacchasi kanyāṃ tāṃ tubhyaṃ dāsyāmyasaṃśayam || 16 ||
[Analyze grammar]

ṛcīkaḥ prāha rājaṃstvaṃ kanyāśulkaṃ vadātra me |
drutaṃ yacchāmi te sarvaṃ durlabhaṃ cāpi golake || 17 ||
[Analyze grammar]

gādhiḥ prāhaikataḥ śyāmakarṇānāṃ vājināṃ dvija |
śatāni sapta me dehi śvetānāṃ caiva sarvataḥ || 18 ||
[Analyze grammar]

sa tatheti pratijñāya ṛcīkastapasojjvalaḥ |
gaṃgātīraṃ yayau cāpovohleti ca jajāpa vai || 19 ||
[Analyze grammar]

catuḥṣaṣṭiṛcāsūktaṃ vāruṇaṃ niyuyoja ha |
tāvat pūrṇe jape devo varuṇastatra cāyayau || 20 ||
[Analyze grammar]

tena sārdhaṃ vājinaśca niṣkrāntāḥ salilāt tadā |
sarve śvetāḥ suvegāśca śyāmaikaśravaṇāḥ śubhāḥ || 21 ||
[Analyze grammar]

śatāni saptasaṃkhyāni tāvatsaṃkhyairnarairyutāḥ |
ṛcīko'pi samādāya natvā taṃ varuṇaṃ tadā || 22 ||
[Analyze grammar]

aśvān gṛhītvā puruṣairgādhiṃ jagāma vai drutam |
tasmai nivedayāmāsa kanyārthe tān hayottamān || 23 ||
[Analyze grammar]

gādhistu tān samāgṛhya sarvān vājimakhasya ca |
kanyāṃ tasmai dadau vipravahnisākṣye vidhānataḥ || 24 ||
[Analyze grammar]

ṛcīko dharmapatnyā ca niṣkāmaḥ samapadyata |
kālāntare satīṃ prāha sevamānāṃ pativratām || 25 ||
[Analyze grammar]

ahaṃ tapase yāsyāmi varaṃ vṛṇu dadāmi te |
sāpi svārthavihīnasya śrutvā vākyamṛṣestataḥ || 26 ||
[Analyze grammar]

svasyā jananīṃ provāca vṛttāntaṃ śokadharṣitā |
jananī tāṃ sutāṃ prāha putrārthaṃ vṛṇu putrike || 27 ||
[Analyze grammar]

brāhmaṇyena yutaṃ putraṃ tvadarthaṃ vṛṇu putrike |
kṣātreṇa tejasā yuktaṃ madarthaṃ ca sutaṃ vṛṇu || 28 ||
[Analyze grammar]

sā patiṃ sampraṇamyā''ha jananyuktaṃ savistaram |
ṛcīko yajñadevārthaṃ pracakāra carudvayam || 29 ||
[Analyze grammar]

putreṣṭiṃ vidhivat kṛtvā caruṃ dvedhā vibhajya ca |
ekasmin yojayāmāsa brāhmyatejo'khilaṃ yaśaḥ || 30 ||
[Analyze grammar]

anyasmin yojayāmāsa kṣātraṃ tejo'khilaṃ tataḥ |
bhāryāyai pradadau brāhmyatejoyuktaṃ caruṃ hi saḥ || 31 ||
[Analyze grammar]

abravīt prāśaya tvenamaśvatthā''liṅganaṃ kuru |
tataḥ prāpsyasi satputraṃ brahmatejaḥsamanvitam || 32 ||
[Analyze grammar]

dvitīyaṃ ca caruṃ patnyā mātre dadau sutārthakam |
kṣātratejomayaṃ datvā prāha prāśya caruṃ tvimam || 33 ||
[Analyze grammar]

nyagrodhāliṅganaṃ kṛtvā prāpsyasi kṣatriyaṃ sutam |
atha mātā sutāṃ prāha rahasye bhāvinoditā || 34 ||
[Analyze grammar]

sarvalokasya vai svārthe śraiṣṭhyaṃ kṣaudryaṃ parārthake |
maccarvapekṣayā putri tvaccarau śreṣṭhatā bhavet || 35 ||
[Analyze grammar]

śrutvā putrī mātṛvatsā bhrātṛśraiṣṭhyābhilāṣiṇī |
akarod vyatyayaṃ vṛkṣe carau cāpi hi padmaje || 36 ||
[Analyze grammar]

tataḥ puṃsavane snāne te śubhe premavihale |
dadhāte garbhamekā tu sutā kṣātreṇa tejasā || 37 ||
[Analyze grammar]

bhūtvā garbhavatī nityaṃ rājyabhoge mano dadhe |
yuddhavārtāstathā cakre hastyaśvārohaṇādijāḥ || 38 ||
[Analyze grammar]

raktavastrottamabhūṣāḥ kaisaraṃ ca vilepanam |
piturgṛhāt samānīya śṛṃgāraṃ ca karoti sā || 39 ||
[Analyze grammar]

dṛṣṭvaivaṃ ceṣṭitaṃ patnyāḥ ṛcīkaḥ prāha tāṃ tadā |
kiṃ priye vyatyayaścarvoḥ kṛto vā vṛkṣayostathā || 40 ||
[Analyze grammar]

ceṣṭayā te jñāyate'tra bhāvinaṃ ko vilaṃghayet |
dvijācāravihīnaste dhruvaṃ putro bhaviṣyati || 41 ||
[Analyze grammar]

tava mātā ceṣṭayā ca kṣātraṃ dharmaṃ vinā sadā |
dṛśyate nu śamasthā ca japahomaparāyaṇā || 42 ||
[Analyze grammar]

tīrthayātrā kathāśrāve saśraddhā ten te'nujaḥ |
bhaviṣyati brāhmaṇasya tejasā brahmaṇā samaḥ || 43 ||
[Analyze grammar]

yādṛśā daurhṛdāḥ santi sagarbhāṇāṃ tu yoṣitām |
tādṛśāni lakṣaṇāni putre vasanti yoṣitām || 44 ||
[Analyze grammar]

pitrorniṣekasamaye sagarbhāyāṃ striyāṃ tathā |
yādṛśī vartate ceṣṭā sā garbhe pratibimbate || 45 ||
[Analyze grammar]

atha patnī ṛṣiṃ prāha kṣamasva tāṃ kṣatiṃ mama |
vyatyāso yaḥ kṛto nātha punardayāṃ kuru prabho || 46 ||
[Analyze grammar]

brāhmaṇo me bhavet putro manmātuḥ kṣatriyaḥ sutaḥ |
ṛcīkaḥ prāha naivaṃ syād gataṃ jātaṃ tathaiva tat || 47 ||
[Analyze grammar]

kintu putragaṇāḥ kṣātrāḥ pautre yāsyanti madvarāt |
ityevaṃ vai dayāṃ kurve putraste brāhmaṇo'stu vai || 48 ||
[Analyze grammar]

ityevaṃ varadānena jamadagniḥ suto'bhavat |
jamadagneḥ sutaḥ parśurāmaḥ kṣātrakramo'bhavat || 49 ||
[Analyze grammar]

ekaviṃśatidhā bhūmau cakre raṇaṃ tu rājabhiḥ |
atha gādhergṛhapatnī dadhe garbhaṃ tataḥ param || 50 ||
[Analyze grammar]

brāhmaṇīvat samācārā suṣuve putramuttamam |
brāhmaṇaṃ karmaṇā yogasandhyādhyānaparāyaṇam || 51 ||
[Analyze grammar]

viśvāmitraitikhyātaṃ kṣātradharmavirāgiṇam |
yadā rājyakṣamo jāto gādhinā yojitaśca saḥ || 52 ||
[Analyze grammar]

pitṛpaitāmahaṃ rājyaṃ gṛhāṇa vedamārgagaḥ |
putre datvā so'pi rājyaṃ viśvāmitro vane sthitaḥ || 53 ||
[Analyze grammar]

sakalatro devaviprapūjāparāyaṇaḥ śuciḥ |
tāpasaśca kṛṣṇanārāyaṇadhyānaparaḥ sadā || 54 ||
[Analyze grammar]

ekadā vanamadhye'yaṃ mṛgayārthaṃ bhraman yayau |
vasiṣṭhasyā''śramaṃ ramyaṃ mṛgadruśiṣyaśobhitam || 55 ||
[Analyze grammar]

vaśiṣṭhastaṃ samāyāntaṃ pratyutthāyonmukhaṃ yayau |
datvā tasmai tadā'rghaṃ ca madhuparkaṃ yathocitam || 56 ||
[Analyze grammar]

abravīd rājayogyaṃ ca svāgataṃ te mahīpate |
vada kṛtyaṃ karomyadya satkāraṃ te yathocitam || 57 ||
[Analyze grammar]

viśvāmitrastadā prāha sainyaṃ me nikaṭe sthitam |
mṛgayārthaṃ samāyāto jalaṃ pītvā prayāmi ca || 58 ||
[Analyze grammar]

bubhukṣiteṣu bhṛtyeṣu yaḥ svāmī kurute'śanam |
sa yāti narakaṃ ghoraṃ tasmād yāsyāmi vai drutam || 59 ||
[Analyze grammar]

vaśiṣṭhaśca tadā prāha sarvānānaya tāniha |
asti me nandinī dhenurvāñcchitaṃ yā prayacchati || 60 ||
[Analyze grammar]

tasyā balena sarvān vai tṛptiṃ dāsyāmi cottamām |
bhūtvaivaṃ tvānayāmāsa sainyaṃ mahīpatistataḥ || 61 ||
[Analyze grammar]

vaśiṣṭhaḥ kāmadhenuṃ tāmuvāca svāgatāya vai |
viśvāmitrasya rājarṣeryāvadbhojanalabdhaye || 62 ||
[Analyze grammar]

kuruṣva tṛptiparyantaṃ khādyapeyādikaṃ śubham |
aśvānāṃ ca gajādīnāṃ yavasādikamityapi || 63 ||
[Analyze grammar]

tato viśrāmalabdhyarthaṃ gṛhopakaraṇādikam |
dhenurbāḍhaṃ samuvāca sasṛje tatkṣaṇaṃ bahu || 64 ||
[Analyze grammar]

bhakṣyaṃ bhojyaṃ lehyacośye peyaṃ lepyaṃ ca bhogyakam |
dāsāyutaṃ tathā dāsīdaśasāhasramityapi || 65 ||
[Analyze grammar]

te dāsā dāsikā viśvāmitrāya ca balāya ca |
daduḥ śīghraṃ subhojyāni śarkarāghṛtavanti ca || 66 ||
[Analyze grammar]

dadhi dugdhaṃ madhu miṣṭaṃ peyaṃ suśītalaṃ jalam |
evaṃ gavā nṛpaḥ sainyayutastṛptiṃ vidhāpitaḥ || 67 ||
[Analyze grammar]

viśvāmitraḥ kautukaṃ ca dṛṣṭvā''ścaryaṃ jagāma ha |
aho citraṃ gavā tṛptiṃ nītā vayaṃ sahasraśaḥ || 68 ||
[Analyze grammar]

tasmātsannīyatāmeṣā svagṛhaṃ dhenuruttamā |
tataḥ prāha vaśiṣṭhāya tava dāsyāmi cepsitam || 69 ||
[Analyze grammar]

varān rathāṃśca hastyaśvān gā anyāśca sahasraśaḥ |
dehi me nandinīṃ rājye yogyāṃ vaśiṣṭha sarvathā || 70 ||
[Analyze grammar]

vaśiṣṭhastu tadā prāha homadhenuriyaṃ nṛpa |
asmatkāmapradā daivī hyadeyā gaudvijanmanām || 71 ||
[Analyze grammar]

sarvakāmapradā ceyaṃ tāpasānāṃ kṛte sthitā |
adeyā sarvathā gauśca vikraye mātṛvikrayaḥ || 72 ||
[Analyze grammar]

na sāmnāṃ naiva bhedena na dānena prasahya na |
na vikrīya na vā cānyairupāyaistvāṃ samarpaye || 73 ||
[Analyze grammar]

tasmād gaccha mahārāja svasthānaṃ ca sukhī bhava |
viśvāmitrastataḥ prāha rājyasya sattayā munim || 74 ||
[Analyze grammar]

yatkiñcid vidyate ratnaṃ pārthivasya kṣitau hi tat |
sarvaṃ syād rājakīyaṃ vai nītiśceyaṃ mune sadā || 75 ||
[Analyze grammar]

tasmānnayāmi dhenuṃ vai nṛpaterdhanameva tat |
ityuktvā''jñāpayāmāsa bhṛtyavargaṃ tataśca te || 76 ||
[Analyze grammar]

bhṛtyā dhenuṃ nigṛhyaiva raśminā ninyurulbaṇāḥ |
atha gacchati sā naiva tvaśrupūrṇā babhūva ha || 77 ||
[Analyze grammar]

daṇḍaprahāraiste ninyuḥ prasahyā''kṛṣya bhṛtyakāḥ |
lokayantaṃ vaśiṣṭhaṃ sā papraccha duḥkhakarṣitā || 78 ||
[Analyze grammar]

kiṃ dattā'smi muniśreṣṭha tvayā'haṃ cā'sya bhūpateḥ |
vaśiṣṭhaḥ prāha dheno tvaṃ na dattā'si mayā śubhe || 79 ||
[Analyze grammar]

prāṇā yāntu mama mātarmā yāhi tvaṃ mayi sthite |
tadrakṣasva svayaṃ dheno hyātmānaṃ matprabhāvataḥ || 80 ||
[Analyze grammar]

ityuktā kopamāpannā cakre huṃkāragarjanāḥ |
huṃkārebhyaśca phenebhyo romebhyaḥ svedamaṇḍalāt || 81 ||
[Analyze grammar]

niṣkrāntāḥ sāyudhā mlecchāḥ pulindāḥ śabarāḥ khasāḥ |
yoddhāro vyomamārgasthā acchedyā apradhṛṣyakāḥ || 82 ||
[Analyze grammar]

asaṃkhyātā ahanaṃste viśvāmitrasya tān mahān |
tataḥ kopaparītātmā viśvāmitraḥ svayaṃ dhanuḥ || 83 ||
[Analyze grammar]

sajyaṃ kṛtvā ca maraṇe niścito'tiyuyodha ha |
tathāpi sainikā aśvā gajā bhaṭāḥ padātayaḥ || 84 ||
[Analyze grammar]

viśvāmitrasya vai sarve hatā dhenūdbhavairbhaṭaiḥ |
viśvāmitraṃ parityajya śeṣaṃ sarvaṃ nipātitam || 85 ||
[Analyze grammar]

kṛpāṃ kṛtvā vaśiṣṭhastu nandinīmidamabravīt |
rakṣa nandini bhūpālaṃ mlecchairetaiḥ samāvṛtam || 86 ||
[Analyze grammar]

rājā hi yatnato rakṣyo rājā nārāyaṇāṃśajaḥ |
sanmārge vartate sarvo rājadaṇḍabhayād yataḥ || 87 ||
[Analyze grammar]

iti śrutvā nandinī sā mlecchān vārayituṃ yayau |
tāvadrājā ruṣā tāṃ gāṃ prahartumupacakrame || 88 ||
[Analyze grammar]

vaśiṣṭhaste samālokya goprahāraṃ nṛpakṛtam |
taṃ bāhuṃ stambhayāmāsa saheti tasya bhūpateḥ || 89 ||
[Analyze grammar]

jaḍībhūto nṛpo lajjāyukto vaśiṣṭhamāha ca |
rakṣa vaśiṣṭha māṃ mlecchairvadhyamānaṃ jaḍīkṛtam || 90 ||
[Analyze grammar]

mamā'parādhānnaṣṭaṃ me sarvaṃ sainyamanantakam |
tasmād yāsyāmyahaṃ harmyaṃ na yuddhena prayojanam || 91 ||
[Analyze grammar]

evamukto vaśiṣṭhaśca stambhadoṣavivarjitam |
viśvāmitrasya tu karaṃ cakārā''ha sukhāvaham || 92 ||
[Analyze grammar]

gaccha rājan vimukto'si mā virodhaya bhūsuraiḥ |
rājā yayau svabhavanaṃ pralāpamakaronmuhuḥ || 93 ||
[Analyze grammar]

dhigbalaṃ kṣatriyāṇāṃ tu dhigvīryaṃ dhikprajīvitam |
ślāghyaṃ brahmabalaṃ caikaṃ brāhmyaṃ tejo hi kevalam || 94 ||
[Analyze grammar]

tacca karma mayā kāryaṃ yathā syād brāhmaṇaṃ balam |
tapasā''rādhanayā ca cariṣyāmi mahātapaḥ || 95 ||
[Analyze grammar]

atha viśvasahaṃ putraṃ rājye saṃsthāpya bhūpatiḥ |
himavantaṃ yayau tatra tapaścakre sudāruṇam || 96 ||
[Analyze grammar]

śatavarṣatrayaṃ phalāhāro babhūva kevalam |
varṣāsvākāśasaṃsthaśca grīṣme pañcāgnitāpanaḥ || 97 ||
[Analyze grammar]

śaitye śītajalāvāso babhūva ca tataḥ param |
śatavarṣatrayaṃ śuṣkaparṇāhāro babhūva saḥ || 98 ||
[Analyze grammar]

śatavarṣatrayaṃ tato jalāhāro'bhavannṛpaḥ |
atha varṣaśate vāyvāhāro babhūva tatparam || 99 ||
[Analyze grammar]

indro bhayena saṃgamyovāca taṃ tāpasaṃ nṛpam |
tuṣṭo'smi tava rājendra varaṃ vṛṇu yathepsitam || 100 ||
[Analyze grammar]

viśvāmitrastadā prāha dehi brāhmaṇyameva me |
tadarthaṃ vai tapaścaryāṃ karomi nānyakāmyayā || 101 ||
[Analyze grammar]

indraḥ prāha kṣatriyasyā'nena dehena vai kutaḥ |
saṃskārairjāyate cāṣṭācatvāriṃśadbhireva yat || 102 ||
[Analyze grammar]

brāhmaṇyaṃ tad bhaved rājannanyaṃ varaṃ tato vṛṇu |
rājā prāha na brāhmaṇyādanyat samprārthayāmyaham || 103 ||
[Analyze grammar]

parityakṣyāmyahaṃ dehaṃ prāpsye vā vipratāṃ vraja |
indro divaṃ yayau śrutvā rājā tepe'tiduṣkaram || 104 ||
[Analyze grammar]

punarvarṣasahasraṃ vai vyatikrāntaṃ tataḥ punaḥ |
ājagāma svayaṃ brahmā puṇyairdevarṣibhiḥ saha || 105 ||
[Analyze grammar]

brahmā prāha pratuṣṭo'smi varaṃ varaya cepsitam |
rājā prāha ca vipratvaṃ dehi me nānyadīpsitam || 106 ||
[Analyze grammar]

brahmā prāha dharāpṛṣṭhe vipratvaṃ kṣatriyasya na |
kṣatriyeṇa prajātasya vipratvaṃ jāyate katham || 107 ||
[Analyze grammar]

rājā prāhā'samarthaśced yāhi svaṃ bhavanaṃ pitaḥ |
dehaṃ tyakṣyāmi vā prāpsye vipratvaṃ tapasā bhuvi || 108 ||
[Analyze grammar]

athā'bravīdṛcīko'tra brāhmyairmantrairmayā pitaḥ |
yojitaśca carustatrā'mitaṃ brāhmaṇyamarpitam || 109 ||
[Analyze grammar]

kṣatriyāt kṣātradharmā'pi brāhmaṇo bhavituṃ hyayam |
arhatyeva niṣeke brāhmaṇatvaṃ tvasya miśritam || 110 ||
[Analyze grammar]

tataścainaṃ kīrtayasva brahmarṣiṃ tvaṃ pitāmaha |
brāhmyadharmasamācāro vartate'yaṃ sadā śuciḥ || 111 ||
[Analyze grammar]

śrutvā brahmā kṣaṇaṃ dhyātvā jñātvā yathārthakāraṇam |
brahmarṣistvamiti prāha sarve prāhustathaiva tam || 112 ||
[Analyze grammar]

vasiṣṭhastu ruṣā prāha nā'haṃ vakṣyāmi taṃ tathā |
kṣatriyasya sutaṃ kasmād vipraṃ vakṣyāmi bodhavān || 113 ||
[Analyze grammar]

ityuktvā prayayau śīghraṃ vasiṣṭho hāṭakeśvaram |
kṣetraṃ tepe tapastatra viśvāmitro'pi cāyayau || 114 ||
[Analyze grammar]

vaśiṣṭhasya vadhārthaṃ vai cintayāmāsa saṃvasan |
viśvāmitro devavatīnadyāḥ sthāne'bhicārakam || 115 ||
[Analyze grammar]

cakāra dāruṇairmantrairjuhvāno jātavedasam |
tato vahnestu niṣkrāntā śaktirvānaravāhanā || 116 ||
[Analyze grammar]

bhayānakā''yudhahastā viśvāmitreṇa sā tadā |
yojitā tu vasiṣṭhasya vadhārthaṃ sā yayau drutam || 117 ||
[Analyze grammar]

athā''śrame vaśiṣṭhasya tatkālaṃ durnimittakam |
adṛśyata papātolkā nihatya ravimaṇḍalam || 118 ||
[Analyze grammar]

raktavṛṣṭirasthimiśrā vyajāyata kṣaṇāntare |
śivā prācīṃ samuddiśya ruroda dīrghanādataḥ || 119 ||
[Analyze grammar]

evaṃ jāte mahāśaktirvahneḥ parvatasadṛśī |
adṛśyata samāyāntī kṛtyārūpā sacetanā || 120 ||
[Analyze grammar]

sāmavedoktamantraiḥ sā vaśiṣṭhena nirodhitā |
mahāmantraiḥ punastatra stambhitā''tharvaṇodbhavaiḥ || 121 ||
[Analyze grammar]

tato nārīsvarūpā sā provāca munipuṃgavam |
sāmavedaḥ supramāṇaṃ tavāpi jagatāmapi || 122 ||
[Analyze grammar]

tenā'haṃ vidhinā sṛṣṭā preritā muninā tathā |
mā kuruṣvā'pramāṇaṃ taṃ prahāraṃ saha me ṛṣe || 123 ||
[Analyze grammar]

rakṣayiṣyāmi te prāṇān svalpasparśena sārthikā |
vaśiṣṭhaḥ prāha yadyevaṃ kuru sparśaṃ dayāvati || 124 ||
[Analyze grammar]

mayā tvātharvaṇā mantrāḥ saṃhṛtā marma mā spṛśa |
ityuktā sā vaśiṣṭhaṃ vai spṛṣṭvā papāta bhūtale || 125 ||
[Analyze grammar]

sā ca śaktirdevadhārā nāmnā tatraiva tiṣṭhati |
pūjanācchravaṇāttvasyā bhaktiṃ muktiṃ ca saṃlabhet || 126 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne viśvāmitravasiṣṭhayoḥ kāmadhenunimittakakleśaḥ ṛcīkasya gādhisutayā śyāmakarṇāśvavinimayena vivāhaḥ mātṛputryorvyatyāsena putrārthacaruprāśanam pautrayorvyatyāsaguṇāḥ gādherviśvāmitraḥ ṛcīkasya jamadagniḥ viśvāmitrasya tapo brāhmaṇyaṃ ca viśvaṃsahaḥ sutaḥ viśvāmitrapreritaśaktisahaviśvāmitrastaṃbhanamityādinirūpaṇanāmā ṣaḍadhikapañcaśatatamo'dhyāyaḥ || 506 ||
[Analyze grammar]