Chapter 492

śrīnārāyaṇa uvāca |
śṛṇu lakṣmi camatkārapure pakṣau nipetatuḥ |
garuḍasya pativratānindayā tad vadāmi te || 1 ||
[Analyze grammar]

punastasyāḥ prasādena saṃlagnau ca vadāmi te |
purā''sīd brāhmaṇo mitraṃ garuḍasya bhṛgūdvahaḥ || 2 ||
[Analyze grammar]

tasya kanyā mādhavīti nāmnā'bhūd guṇamaṇḍitā |
atha tasyā varārthāya provāca garuḍaṃ dvijaḥ || 3 ||
[Analyze grammar]

mama kanyāsuyogyaṃ ca vaiṣṇavaṃ sāttvataṃ śubham |
sadṛśaṃ varamanvīkṣa yena tasmai dadāmyaham || 4 ||
[Analyze grammar]

garuḍastu tadā prāha samastakṣitimaṇḍale |
mama pṛṣṭhe sutā tvāṃ ca kṛtvā saṃbhramayāmyaham || 5 ||
[Analyze grammar]

tatastasyāḥ kumāryā vai sadṛśaṃ ca guṇānvitam |
svayaṃ dṛṣṭvā varaṃ tasmai dehi bhavāmi sādhanam || 6 ||
[Analyze grammar]

evamukto'tha vipraḥ sa tatkṣaṇāt kanyayā saha |
ārūḍho gāruḍaṃ pṛṣṭhaṃ yayau draṣṭuṃ varaṃ śubham || 7 ||
[Analyze grammar]

yaṃ yaṃ vipraṃ kumāraṃ sā kanyā paśyati vai hṛdā |
tadā na tasyāścitte sa vartate sma kathaṃcana || 8 ||
[Analyze grammar]

kulavān yo virūpaḥ sa rūpāḍhyo na kulottamaḥ |
rūpakulānvitaḥ kaścid guṇahīno vilokitaḥ || 9 ||
[Analyze grammar]

guṇayukto na dhanavān sadhano na guṇādimān |
sarvoktyukto'pi kaścid dṛṣṭo vyaṃgo vicittakaḥ || 10 ||
[Analyze grammar]

avyaṃgaścoktaguṇavān dṛṣṭo vyavāyamārgagaḥ |
evaṃ kāle gate dīrghe bhramatāṃ bhūtale'nvaham || 11 ||
[Analyze grammar]

teṣāmāsīnmanovāñcchā draṣṭuṃ nārāyaṇaṃ prabhum |
yayuḥ śvetaṃ dvīpadhāma yayuśca badarīvanam || 12 ||
[Analyze grammar]

kṣīrābdhiṃ tu yayuḥ paścād vaikuṇṭhaṃ te yayurmudā |
baligṛhaṃ yayuścāpi yayuḥ kuṃkumavāpikām || 13 ||
[Analyze grammar]

bhṛgukṣetraṃ yayurvṛndāvanaṃ śrīraṃgaparvatam |
mahendraṃ gandhamādaṃ ca meruṃ svargaṃ yayustathā || 14 ||
[Analyze grammar]

satyalokaṃ yayustaistu dṛṣṭo vai nārado muniḥ |
sāntvapūrvaṃ sa ca pṛṣṭo viṣṇuṃ brahmasanātanam || 15 ||
[Analyze grammar]

kva devaḥ puṇḍarīkākṣaḥ sāmprataṃ vartate mune |
viṣṇoḥ sthānāni sarvāṇi vīkṣitāni samantataḥ || 16 ||
[Analyze grammar]

asmābhiḥ saṃprahṛṣṭābhirna dṛṣṭastatra keśavaḥ |
nāradaḥ prāha sarvatra vartate bhagavān sadā || 17 ||
[Analyze grammar]

aśuddhaiśca bhavadbhistu na dṛṣṭastatra keśavaḥ |
yanmano vāsanāhīnaṃ nirguṇaṃ divyatāṃ gatam || 18 ||
[Analyze grammar]

taireva dṛśyate viṣṇuḥ sakāmairnahi vīkṣyate |
tato mānasaśuddhyarthaṃ saṃvāsaṃ kuruta kṣitau || 19 ||
[Analyze grammar]

camatkārapure divye hāṭakeśvaratīrthake |
tatraiva śrīkṛṣṇanārāyaṇo vaḥ sammiliṣyati || 20 ||
[Analyze grammar]

tatprāptyarthaṃ camatkāranagaraṃ yāta mā ciram |
mahāsarovare tatra cāturmāsye janārdanaḥ || 21 ||
[Analyze grammar]

nāganadyāṃ jalaśāyī vartate sma narāyaṇaḥ |
athā''yātāstrayastatra jalaśāyisarovare || 22 ||
[Analyze grammar]

brāhmaṇaṃ ca sutāṃ kṣetre'vatārayitvā śobhane |
garuḍaḥ prāha tapasā prāpsyate bhagavān svayam || 23 ||
[Analyze grammar]

kurutāṃ tapasā śuddhiṃ japena pūjayā vratāt |
oṃ namaḥ śrīkṛṣṇanārāyaṇāya svāmine namaḥ || 24 ||
[Analyze grammar]

ityevaṃ satataṃ jāpācchuddhiḥ syād vāsanākṣaye |
ityuktvā garuḍastatra yayau nārāyaṇāntikam || 25 ||
[Analyze grammar]

oṃ namaḥ śrīkṛṣṇanārāyaṇāya pataye namaḥ |
japannāste jalamadhye nirāhārastathā ca tau || 26 ||
[Analyze grammar]

putrī pitā nirāhāro tepāte tapa uttamam |
garuḍo bahuvarṣānte dadarśa pādasevikām || 27 ||
[Analyze grammar]

pādasaṃvāhanāsaktāṃ lakṣmīṃ tvāṃ tanmukhekṣaṇām |
aparāṃ ca tathā vṛddhāṃ lakṣmīpārśve niveśitām || 28 ||
[Analyze grammar]

dhyānasthāṃ ca kṛśāṃgīṃ ca śāṇḍilīṃ brahmacāriṇīm |
anyāṃ suyauvanāṃ tasyāḥ pārśve dadarśa pakṣirāṭ || 29 ||
[Analyze grammar]

anekajanmapāpānāṃ hāriṇīṃ narmadāṃ satīm |
aparaṃ puruṣaṃ vṛddhaṃ śāntaṃ kṛśaṃ ca tāpasam || 30 ||
[Analyze grammar]

dadarśa garuḍastatra mārkaṇḍeyaṃ mahāmunim |
tāśca taṃ ca praṇamaṃstaiḥ satkṛto garuḍaḥ śanaiḥ || 31 ||
[Analyze grammar]

dadarśa viṣṇumunnidraṃ smerāsyaṃ bhaktavatsalam |
pṛcchantaṃ kuta āyātaḥ kuśalaṃ prāha pakṣirāṭ || 32 ||
[Analyze grammar]

mamāsti dayitaṃ mitraṃ brāhmaṇo bhṛguvaṃśajaḥ |
tasyāsti mādhavī nāma kanyā vai brahmacāriṇī || 33 ||
[Analyze grammar]

na tasyāḥ sadṛśaḥ kāntaḥ prāptastrailokyamaṇḍale |
tasyāstu puṇḍarīkākṣaḥ patiḥ sarvaguṇairyutaḥ || 34 ||
[Analyze grammar]

sadṛśaḥ puṇḍarīkākṣyā mama citte vyavasthitaḥ |
tasmāt pāṇigrahaṃ tasyāḥ svīkuruṣva narāyaṇa || 35 ||
[Analyze grammar]

śrutvā nārāyaṇaḥ prāha lakṣmyaṃśā sā'sti kanyakā |
śṛṇu vaikuṇṭhajaṃ pūrvākhyānaṃ vadāmi te'nagha || 36 ||
[Analyze grammar]

ekadā sā mahālakṣmīrgarvaṃ kṛtavatī satī |
na mayā sadṛśī tvanyā nārāyaṇo'pi naiva ca || 37 ||
[Analyze grammar]

mayā kṛtvā samṛddhyā ca sṛṣṭiḥ sarvā suśobhate |
māṃ vinā ca bhavedrūkṣaṃ tasmācchreṣṭhā'smi sarvathā || 38 ||
[Analyze grammar]

adya mayā na gantavyaṃ nārāyaṇasya sannidhau |
āvaśyake svayaṃ nārāyaṇaścātra mama gṛhe || 39 ||
[Analyze grammar]

āgamiṣyati paśyāmi snehamīkṣāmi kīdṛśam |
iti matvā na ca lakṣmīryayau nārāyaṇagṛham || 40 ||
[Analyze grammar]

jayaṃ ca pārṣadaṃ nārāyaṇo jñātvā hyuvāca ha |
lakṣmīrgarvayutā tvadya vidyate māninī yathā || 41 ||
[Analyze grammar]

yadyāgacchenmama dvāre deyaḥ praveśa eva na |
atha nārāyaṇaṃ jñātvā divyadṛṣṭyā parāṅmukham || 42 ||
[Analyze grammar]

cirakāle gate lakṣmirmānaṃ hitvā samāyayau |
jayastu pārṣadaḥ prāha mātarnā''jñā'sti vai hareḥ || 43 ||
[Analyze grammar]

harerdāsastava dāsaḥ sadā'smi kintu śārṅgiṇaḥ |
ājñā pālyā mayā tvatra tasya dvāre pratiṣṭhatā || 44 ||
[Analyze grammar]

yasya dvāre niyukto'smi tadājñā mukhyato matā |
yathaṣṭaṃ kuru mātastvaṃ nirodhaḥ svāminā kṛtaḥ || 45 ||
[Analyze grammar]

ityuktvā patitastasyāḥ pādayoḥ praṇayānvitaḥ |
nivāritā sā dvārācca tena dauvārikeṇa vai || 46 ||
[Analyze grammar]

tadā''tmanastiraskāraṃ matvā satī ca māninī |
smṛtvā hareḥ pādapadmaṃ dehaṃ tyaktuṃ samudyatā || 47 ||
[Analyze grammar]

tadā ruṣṭā trilokyāṃ vai gṛhalakṣmīḥ sthale sthale |
jñātvā brahmā maheśaśca viṣṇurdharmaśca bhāskaraḥ || 48 ||
[Analyze grammar]

candraḥ kāmaḥ kuberaśca vahnirvighneśvaro'nilaḥ |
ṛṣayo munayaścāpi manavaśca maheśvaraḥ || 49 ||
[Analyze grammar]

samāyayū rudantaste padmāyā puratastadā |
tuṣṭuvuśca mahālakṣmīṃ satīṃ dīnāṃ harīśvarīm || 50 ||
[Analyze grammar]

kṣamasva bhagavatyamba kṣamāśīle parātpare |
śuddhasattvasvarūpe ca kopādiparivarjite || 51 ||
[Analyze grammar]

upame sarvasādhvīnāṃ devīnāṃ devapūjite |
tvayā vinā jagat sarvaṃ mṛtatulyaṃ ca niṣphalam || 52 ||
[Analyze grammar]

sarvasampatsvarūpā tvaṃ sarveṣāṃ sarvarūpiṇī |
rāseśvaryadhidevī tvaṃ tvatkalāḥ sarvayoṣitaḥ || 53 ||
[Analyze grammar]

kailāse pārvatī tvaṃ tu kṣīrode sindhukanyakā |
svarge ca svargalakṣmīstvaṃ martyalakṣmīśca bhūtale || 54 ||
[Analyze grammar]

vaikuṇṭhe tu mahālakṣmīḥ sarvānane sarasvatī |
gaṃgā tvaṃ tulasī tvaṃ ca prabhā tvaṃ tvaṃ ca pārvatī || 55 ||
[Analyze grammar]

sāvitrī māṇikī tvaṃ ca padmā tvaṃ padminī satī |
mañjulā tvaṃ bhārgavī ca kambharā manasā satī || 56 ||
[Analyze grammar]

vṛndā haṃsā ca rādhā ca mūlaprakṛtirīśvarī |
kṛṣṇapriyā tvaṃ bhāṇḍīre candrā candanakānane || 57 ||
[Analyze grammar]

virajā campakavane śataśṛṃge tu sundarī |
padmāvatī padmavane mālatī mālatīvane || 58 ||
[Analyze grammar]

kundadantī kundavane suśīlā ketakīvane |
kadambamālā durgā tvaṃ kadambānāṃ tu kānane || 59 ||
[Analyze grammar]

rājalakṣmī rājasaudhe gṛhalakṣmīrgṛhe gṛhe |
prasīda jagatāṃ mātarmā mṛtiṃ gaccha padmaje || 60 ||
[Analyze grammar]

iti devastutiṃ śrutvā tyaktvā tu rodanaṃ satī |
uvāca suprasannāstāṃste'pi śuśruvurādarāt || 61 ||
[Analyze grammar]

tyajāmi dehaṃ na krodhānna vairāgyeṇa sāmpratam |
kintu nvidaṃ samālocya yadasti maraṇottaram || 62 ||
[Analyze grammar]

yasmin sadīśe mahati sarvasāmye ca nirguṇe |
sarvātmani sadānande samatā tṛṇaśailayoḥ || 63 ||
[Analyze grammar]

bhrūbhaṃgalīlayā lakṣmīlakṣaṃ sraṣṭumalaṃ tu yaḥ |
bhṛtye striyāṃ yatsamatā kiṃ kāryaṃ tasya sevayā || 64 ||
[Analyze grammar]

tatpatnīnāṃ pradhānā'haṃ nirastā dvāriṇā'dhunā |
tadbhṛtyabhṛtyabhṛtyena paripūrṇena nepsitā || 65 ||
[Analyze grammar]

tyakṣyāmi jīvanamahamasaubhāgyā ca svāmini |
vahnau tu kāmanāṃ kṛtvā yathā bhadraṃ bhavettathā || 66 ||
[Analyze grammar]

yā strī bharturasaubhāgyā sā'saubhāgyā hi sarvataḥ |
śayane bhojane tasyā na sukhaṃ jīvanaṃ vṛthā || 67 ||
[Analyze grammar]

yasyā nāsti priyaprema tasyā janma nirarthakam |
tatkiṃ putre dhane rūpe sampattau yauvane'thavā || 68 ||
[Analyze grammar]

yadbhaktirnāsti kānte ca sarvapriyatame pare |
sā śucirdharmahīnā ca sarvakarmavivarjitā || 69 ||
[Analyze grammar]

patirbandhurgatirbhartā daivataṃ gurureva saḥ |
sarvasmācca paraḥ svāmī na guruḥ svāminaḥ paraḥ || 70 ||
[Analyze grammar]

pitā mātā suto bhrātā kliṣṭā dātumidaṃ dhanam |
sarvasvadātā svāmī vai mūḍhānāṃ yoṣitāṃ surāḥ || 71 ||
[Analyze grammar]

kācideva tu jānāti mahāsādhvī patiṃ prabhum |
atisadvaṃśajātā hi suśīlā kulapālikā || 72 ||
[Analyze grammar]

vrataṃ cārādhanaṃ dānaṃ satyaṃ puṇyaṃ tapaściram |
patibhaktivihīnāyā bhasmībhūtaṃ nirarthakam || 73 ||
[Analyze grammar]

ataḥ kiñcinna vakṣyāmi niṣṭhuraṃ patimīśvaram |
bhṛtyā'parādhairdevasya prāṇāṃstyakṣyāmi niścitam || 74 ||
[Analyze grammar]

patidoṣe mahāsādhvī patiṃ cā'niṣṭhuraṃ vadet |
yadi soḍhumaśaktā ca prāṇāṃstyajati dharmataḥ || 75 ||
[Analyze grammar]

patisevā vrataṃ strīṇāṃ patisevā paraṃ tapaḥ |
patisevā paro dharmaḥ patisevā surārcanam || 76 ||
[Analyze grammar]

patisevā paraṃ satyaṃ dānatīrthā'nukīrtanam |
sarvadevamayaḥ svāmī sarvadevamayaḥ śuciḥ || 77 ||
[Analyze grammar]

sarvapuṇyasvarūpaśca patirūpī janārdanaḥ |
yā satī bharturucchiṣṭaṃ bhuṃkte pādodakaṃ sadā || 78 ||
[Analyze grammar]

tasyā darśamupasparśaṃ nityaṃ vāñcchanti devatāḥ |
tataḥ sarvāṇi tīrthāni punanti pāpino hyaghāt || 79 ||
[Analyze grammar]

ityuktvā sā mahāsādhvī ruroda vai muhurmuhuḥ |
uvāca brahmā bhītaśca bhaktinamrātmakandharaḥ || 80 ||
[Analyze grammar]

bhaviṣyati na bhadraṃ ca jayasya dvārarakṣituḥ |
vijayo'pi sahayogī tavā'parādhakarmaṇi || 81 ||
[Analyze grammar]

tvayā na śaptau tau mūḍhau priyā'parādhabhītayā |
bhaviṣyato rākṣasau tau sanakādivinindayā || 82 ||
[Analyze grammar]

sāparādhaṃ tu dharmiṣṭhaḥ kṣamayā na śaped yadi |
sarvanāśo bhavettasya niścitaṃ mā ciraṃ sati || 83 ||
[Analyze grammar]

yadi śaptuṃ na śaktaśca na daṇḍaṃ kartumīśvaraḥ |
sāparādhe'pi puruṣe dharmo daṇḍaṃ karoti hi || 84 ||
[Analyze grammar]

sarvaṃ kṣamasva he mātargaccha gaccha priyāntakam |
māṃ ca tvatsvāmino bhaktaṃ niyojyaṃ sṛṣṭikarmaṇi || 85 ||
[Analyze grammar]

ityuktvā tāṃ puraskṛtya sārdhaṃ devairmunīndrakaiḥ |
śīghraṃ jagāma saṃstotuṃ nārāyaṇāntikaṃ hyataḥ || 86 ||
[Analyze grammar]

bhagavan devadevānāṃ tathā'nyeṣāṃ sukhāvaha |
bhogasampatpradātastvaṃ gṛhāṇa kamalāṃ satīm || 87 ||
[Analyze grammar]

yayā sarve vayaṃ smṛddhā yāṃ vinā prastarā yathā |
kimvadhikaṃ hi stotavyaṃ gṛhāṇa lokahetave || 88 ||
[Analyze grammar]

brahmaṇaḥ stavanaṃ śrutvā dṛṣṭvā lakṣmīṃ puraḥsthitām |
rudatīṃ namravadanāṃ provāca kamalodbhavam || 89 ||
[Analyze grammar]

sarvaṃ jānāmi sarvajñaḥ sarvātmā sarvapālakaḥ |
sarvaśāstā sarvakarmaphaladātā'smi padmaja || 90 ||
[Analyze grammar]

bhakte kalatre bandhau ca sarvatra samatā mama |
viśeṣato'timadbhaktaḥ kalatrātpara eva saḥ || 91 ||
[Analyze grammar]

madbhaktau tava putrau ca dvārapālau durantakau |
kṣama māmaparādhaṃ ca tayośca bhaktipūrṇayoḥ || 92 ||
[Analyze grammar]

madbhaktipūrṇo balavān daityebhyo na bibheti ca |
rakṣito mama cakreṇa bhaktimādhvīkadurmadaḥ || 93 ||
[Analyze grammar]

kintu mayā tava sraṣṭāvāgantavyaṃ tava stavāt |
mayā saha prabalayormama pradāsayorapi || 94 ||
[Analyze grammar]

jīvānāṃ guṇagānārthaṃ jayasya vijayasya ca |
prajanmā''vaśyakaṃ tasmānnimittaṃ hi mayā kṛtam || 95 ||
[Analyze grammar]

atha kālāntare sanakādiroṣād bhaviṣyati |
śṛṇu tvanyat pṛthivyāmānartadeśe'bdhisannidhau || 96 ||
[Analyze grammar]

camatkārapure vipro nāmnā śāṇḍilyasaṃjñakaḥ |
mamāśaḥ sa tapastepe putryarthaṃ bhāryayā yutaḥ || 97 ||
[Analyze grammar]

sahasravatsarānte'hamabhavaṃ sannidhau sthitaḥ |
prasannavadanastaṃ ca varadānāya prāha ca || 98 ||
[Analyze grammar]

tasya bhāryā sutāṃ vavre lakṣmītulyāṃ guṇānvitām |
tathāstviti mayā proktaṃ tato'hamagamaṃ layam || 99 ||
[Analyze grammar]

śāṇḍilyaḥ sa sutāprāptiṃ pratīkṣate priyāyutaḥ |
nimittaṃ tvetadevā'tra lakṣmīdvārā mayā kṛtam || 100 ||
[Analyze grammar]

seyaṃ lakṣmīmānayuktā chāyārūpā prayātu tām |
pātivratye manāk doṣaṃ lakṣmyāṃ necchāmi sarvadā || 101 ||
[Analyze grammar]

sadoṣaṃ ca śarīraṃ vai lakṣmyāḥ chāyāsvarūpakam |
yātu śāṇḍilyabhāryāyāṃ putryarthaṃ varadānakam || 102 ||
[Analyze grammar]

ityuktāśca surāḥ sarve lakṣmīrāścaryamāpnuyuḥ |
nārāyaṇasya hārdaṃ vai naiva jānanti kecana || 103 ||
[Analyze grammar]

atha śāntāśca tacchrutvā lakṣmīstuṣṭā babhūva ha |
patyājñayā yayau śīghraṃ chāyārūpeṇa mādhavī || 104 ||
[Analyze grammar]

seyaṃ śāṇḍilyaputrī ca mādhavīti pravartate |
lakṣmīṃ divyena rūpeṇa jagrāha tatra śrīhariḥ || 105 ||
[Analyze grammar]

mādhavī ca brahmacaryaparā svasadṛśaṃ patim |
māmevecchati lakṣmīśaṃ nānyaṃ patiṃ samicchati || 106 ||
[Analyze grammar]

garuḍa tvaṃ kathāṃ cemāṃ naiva jānāsi māyayā |
ānaya tvaṃ tāṃ samīpe mādhavīṃ me pativratām || 107 ||
[Analyze grammar]

lakṣmyaṃśāṃ mānadehāṃ ca ṛṣeḥ putrīṃ mama priyām |
yāṃ ca dṛṣṭvā svayaṃ paścāt prakaromi yathocitam || 108 ||
[Analyze grammar]

evamukto garuḍastāmānayāmāsa sannidhau |
viprastūvāca natvā taṃ bhagavantaṃ sanātanam || 109 ||
[Analyze grammar]

gṛhāṇa kanyāṃ bhagavaṃstvāmevecchati sā sadā |
bhagavāṃstvaṃ samāyāhītyuvāca tāṃ suśṛṇvatām || 110 ||
[Analyze grammar]

lakṣmīvannyaviśatpārśve kanyā prasannamānasā |
śayyaikānte samāviṣṭā dakṣiṇe muravidviṣaḥ || 111 ||
[Analyze grammar]

atha kopaparītāṃgī mahiṣīdharmamāśritā |
lakṣmīruvāca tāṃ kanyāṃ sapatnīti vicintya ca || 112 ||
[Analyze grammar]

yasmānme purataḥ pāpe kāntasya mama harṣitā |
śayyāyāṃ tvaṃ samāviṣṭā lajjāṃ tyaktvā sudūrataḥ || 113 ||
[Analyze grammar]

tasmād vṛddhamukhī nūnaṃ vikṛtā tvaṃ bhaviṣyasi |
śrūtvā śokaṃ tadā kanyā tatpitā'pi pracakratuḥ || 114 ||
[Analyze grammar]

svayaṃ viṣṇurhariḥ prāha maivaṃ lakṣmīrbhaviṣyasi |
jñāne vṛddhā vṛddhamukhī matā me jñānavardhinī || 115 ||
[Analyze grammar]

brahmajñānaparā madhuvidyā sā mādhavī tathā |
śaṇḍilyavidyā'dhiṣṭhātrī jñānavṛddhā bhaviṣyati || 116 ||
[Analyze grammar]

ityuktā śāṇḍilī bhūtvā mādhavī sā haripriyā |
kṣīrode vartate nityaṃ lakṣmīrūpā subhāginī || 117 ||
[Analyze grammar]

brahmacaryaparā nārāyaṇasevāparāyaṇā |
śāṇḍilyaśca sutāṃ datvā kṛtakṛtyo babhūva ha || 118 ||
[Analyze grammar]

garuḍaḥ śrīhariṃ tatra papraccha saṃśayānvitaḥ |
nārīṇāṃ brahmacaryaṃ vai saṃśayāspadameva tu || 119 ||
[Analyze grammar]

viśeṣād yauvanāvasthāprāptāyāṃ śraddadhāmi na |
avaśyaṃ yauvanasthena tiryagyonigatena ca || 120 ||
[Analyze grammar]

vikāraḥ khalu kartavyo nā'vikārāya yauvanam |
evaṃ tasya vacaḥ śrutvā śāṇḍilī brahmacāriṇī || 121 ||
[Analyze grammar]

maunavratadharā kiñcinnovāca vaiṣṇavī satī |
sādhvyā nāryā nindayā ca pakṣināthasya tatkṣaṇāt || 122 ||
[Analyze grammar]

ubhau pakṣau gatau nāśaṃ ruṇḍhākāro'tha so'bhavat |
aśaktaśca tathā gantuṃ padamātramapi kvacit || 123 ||
[Analyze grammar]

hariḥ prāha garuḍa tvatpakṣau naṣṭau hi nindayā |
dūṣitaṃ brahmacaryaṃ yat śāṇḍilyāṃ saṃśayena vai || 124 ||
[Analyze grammar]

tasmāt tvaṃ śāṇḍilīṃ natvā prasādaya sukhī bhava |
garuḍastāṃ pratuṣṭāva nanāma ca punaḥ punaḥ || 125 ||
[Analyze grammar]

tuṣṭā satī śāṇḍilī ca dvijaṃ pasparśa pāṇinā |
tato'sya pakṣa sañjātau tatkṣaṇādeva yojitau || 126 ||
[Analyze grammar]

garuḍaḥ śrīkṛṣṇanārāyaṇaṃ lakṣmīṃ ca śāṇḍilīm |
tatratyośca praṇipatya śāṇḍilyaṃ brāhmaṇaṃ tathā || 127 ||
[Analyze grammar]

pṛṣṭhe kṛtvā yayau kṣetraṃ camatkārapuraṃ śubham |
vinyasya taṃ brāhmaṇaṃ ca garuḍaḥ prayayau divam || 128 ||
[Analyze grammar]

iti te kathitaṃ lakṣmi pātivratyaparāyaṇam |
lakṣmyāste pūrvavṛttāntaṃ pāpatāpapraṇāśanam || 129 ||
[Analyze grammar]

ya idaṃ śṛṇuyād yadvā vācayecchrāvayettathā |
bhuktiṃ muktiṃ labheddhāmni dāsyabhaktiṃ sudurlabhām || 130 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne camatkārapurīyaviprakanyāyā mādhavyā bhagavato bhāryātvaṃ lakṣmyā avatārarūpāyāstasyāḥ śāṇḍilītvaṃ nārīṇāṃ brahmacaryavrate śaṃkitasya garuḍasya pakṣayoḥ patanaṃ śāṇḍilīprasādena pakṣasahitatvaṃ lakṣmyāḥ avataraṇārthaṃ bhagavatkṛtā'vamānanam |
evamādinirūpaṇanāmā dvinavatyadhikacatuśśatatamo'dhyāyaḥ || 492 ||
[Analyze grammar]