Chapter 489

śrīnārāyaṇa uvāca |
śṛṇu lakṣmi kathāṃ ramyāṃ camatkārapurodbhavām |
satyadharmaparāṃ tiryagyonimokṣakarīṃ śubhām || 1 ||
[Analyze grammar]

nāganadyāstaṭe tatra dakṣiṇe yojanadvaye |
āste sarovaraṃ dīrghaṃ pañcayojanavistṛtam || 2 ||
[Analyze grammar]

kasyacittvatha kālasya snātvā tatra sarovare |
durvāsā munirāḍ rājñaḥ kalaśasya gṛhaṃ yayau || 3 ||
[Analyze grammar]

camatkārapureśaṃ taṃ kalaśaṃ prāha satvaraḥ |
cāturmāsyavratastho'haṃ pāraṇaṃ kartumutsahe || 4 ||
[Analyze grammar]

tasmād yatkiṃcidannaṃ te siddhamasti gṛhe nṛpa |
tad dehi bhojanārthaṃ me bubhukṣā'tīva vardhate || 5 ||
[Analyze grammar]

kalaśākhyo mahārājaḥ siddhānnaṃ yadupasthitam |
miṣṭānnaṃ vyañjanaṃ coṣyaṃ peyaṃ khādyaṃ tathā''miṣam || 6 ||
[Analyze grammar]

sarvaṃ bhojyakṛte tasmai pradadau svayameva vai |
athā'sau bubhuje vipraḥ sūpaṃ māṃsarasānvitam || 7 ||
[Analyze grammar]

ajñātabhojano vipro jñātvā'nnaṃ māṃsamiśritam |
vratabhaṃgasya doṣeṇa cukopa taṃ śaśāpa ca || 8 ||
[Analyze grammar]

yato māṃsānvitaṃ datvā vratabhaṃgaḥ kṛto mama |
tasmāttvaṃ cāmiṣāhāro bhava vyāghro vanādiṣu || 9 ||
[Analyze grammar]

rājā pradīnavacanaḥ provācā'nugrahaṃ kuru |
ājñāṃkitasya dāsasya bhaktasya vinatasya ca || 10 ||
[Analyze grammar]

durvāsāstaṃ tataḥ prāha yadā dhenustu nandinī |
śaṃbhorbāṇaṃ bhūtalasthaṃ darśayiṣyati te nṛpa || 11 ||
[Analyze grammar]

bhaviṣyasi tadā muktaścetyuktvā prayayau muniḥ |
babhūva rājā bhayakṛd vyāghrākṛtirvanecaraḥ || 12 ||
[Analyze grammar]

atha kālena ca gavāṃ kulaṃ tṛṇārthamāgatam |
yatrāsīnnandinī dhenurhaṃsavarṇā ghaṭasravā || 13 ||
[Analyze grammar]

sā tṛṇārthaṃ nikuṃjānte gatā liṃgaṃ tu śūlinaḥ |
dadarśa tṛṇadhānyādicchannaṃ gulmādimadhyagam || 14 ||
[Analyze grammar]

tatastasyopari sthitvā susrāva sumahatpayaḥ |
tatra daivāt sa vai vyāghro bhramaṃstvarita āyayau || 15 ||
[Analyze grammar]

dṛṣṭvā tāṃ nandinīṃ vyāghraḥ prajagrāha tatastu sā |
goṣṭhe baddhaṃ svakaṃ vatsamatṛṇādaṃ payaḥparam || 16 ||
[Analyze grammar]

saṃsmṛtya duḥkhitā dīnā karuṇaṃ paryadevayat |
aho'haṃ kena pāpena tyaktvā vālaṃ tu goṣṭhagam || 17 ||
[Analyze grammar]

maraṇārtha vyāghramukhe patitā śaṃkaro'vatu |
yena satyena bhaktyā tai snapanāya tṛṇāya ca || 18 ||
[Analyze grammar]

āgatā tena satyena bhūyānme sutasaṃgamaḥ |
vyāghraḥ śrutvā tāmuvāca tyaja vṛthā pralāpakān || 19 ||
[Analyze grammar]

iṣṭadevaṃ svargadaṃ tvaṃ smara saukhyaṃ tato bhavet |
avaśyaṃ maraṇaṃ te'sti yato'sti vaśagā mama || 20 ||
[Analyze grammar]

dhenuḥ prāha śṛṇu vyāghra nātmānaṃ vilapāmyaham |
śaṃbhupūjāṃ vidhāyaiva mṛtyurme mokṣado yataḥ || 21 ||
[Analyze grammar]

vatso me gokule baddhaḥ smaramāṇo madāgamam |
santiṣṭhate payovṛttiḥ kathaṃ syāt sa mayā vinā || 22 ||
[Analyze grammar]

tasmānmuñca mahāvyāghra māmadya sutavatsalām |
sakhījanasya taṃ datvā samāgacchāmi te'ntikam || 23 ||
[Analyze grammar]

vyāghra uvāca yā mṛtyormukhānniṣkramya yāti sā |
punarnaiva samāgacchet tasmāt tvāṃ bhakṣayāmi || 24 ||
[Analyze grammar]

nandinyuvāca śapathairāgamiṣyāmi te'ntikam |
yatpāpaṃ brahmahatyāyāṃ mātāpitrośca vañcane || 25 ||
[Analyze grammar]

guroḥ sādhorvañcane ca patyuḥ sādhvyāśca vañcane |
tena pāpena lipyāmi nā''gacchāmi punaryadi || 26 ||
[Analyze grammar]

viśvāsaghātināṃ pāpaṃ kṛtaghnānāṃ ca yadbhavet |
vratabhaṃgaprakartṝṇāṃ devakhaṇḍanakāriṇām || 27 ||
[Analyze grammar]

nindakānāṃ jīvikāhāriṇāṃ pāpaṃ ca yadbhavet |
tena pāpena lipyāmi nā''gacchāmi punaryadi || 28 ||
[Analyze grammar]

evaṃ śapathān vyāghraḥ sa śrutvā vismayato'bravīt |
yadyevaṃ tadgṛhaṃ gaccha vīkṣayasva nijātmajam || 29 ||
[Analyze grammar]

sakhīnāmarpayitvā'tha bhūya āgamanaṃ kuru |
ityuktā raṃbhamāṇā sā yayau vatsaṃ tvarānvitā || 30 ||
[Analyze grammar]

athā'kālā''gatāṃ dṛṣṭvā raṃbhamāṇāṃ svamātaram |
vatsaḥ prapaccha kasmāt tvamadyā'kāle samāgatā || 31 ||
[Analyze grammar]

udbhrāntamānasāḥ kasmād bāṣpaklinnānanā kutaḥ |
mātā prāha payaḥpānaṃ kuru paścād vadāmi te || 32 ||
[Analyze grammar]

vatsaḥ papau payaḥ pūrṇaṃ mūrdhnyāghrātastayā muhuḥ |
ālīḍhaśca śanairukto vyāghravṛttānta eva ca || 33 ||
[Analyze grammar]

ahaṃ gatā vane tvadya vyāghreṇāsāditā balāt |
sa mayā prārthito vyāghro bhakṣamāṇo nakhāyudhaḥ || 34 ||
[Analyze grammar]

śapathairāgamiṣyāmi goṣṭhe saṃvīkṣya bālakam |
sā'haṃ tena vinirmuktā tavārthaṃ śapathaiḥ suta || 35 ||
[Analyze grammar]

atha tatra gamiṣyāmi datvā tvāmanyadhenave |
sukhī jīva priya vatsa bhojito dṛṣṭabhāṣitaḥ || 36 ||
[Analyze grammar]

vatsā''hāhaṃ ca tatraiva yāsyāmi yatra gacchasi |
ślāghyaṃ hi maraṇaṃ samyaṅ māturagre mamā'dhunā || 37 ||
[Analyze grammar]

ekākinā'pi martavyaṃ tvayā hīnena vai mayā |
tvadagrato hi martavyaṃ svargadaṃ me bhaviṣyati || 38 ||
[Analyze grammar]

yadi mātastvayā sārdhaṃ vyāghro māṃ sūdayiṣyayi |
yā gatirmātṛbhaktānāṃ sā me nūnaṃ bhaviṣyati || 39 ||
[Analyze grammar]

athavā śapathaiścāhaṃ yāmi tvamatra tiṣṭha vai |
nāsti mātṛsamo bandhurbālānāṃ kṣīrajīvinām || 40 ||
[Analyze grammar]

nāsti mātṛsamo nātho nāsti mātṛsamā gatiḥ |
nāsti mātṛsamaḥ pūjyo nāsti mātṛsamaḥ sakhā || 41 ||
[Analyze grammar]

nāsti mātṛsamo devastviha loke paratra ca |
evaṃ sevā sadā mātuḥ kartavyā bhaktiruttamā || 42 ||
[Analyze grammar]

mātṛsevāṃ paraṃ dharmamanutiṣṭhanti ye sutāḥ |
gatiṃ te paramāṃ yānti mātrāśīrvādalakṣitāḥ || 43 ||
[Analyze grammar]

tasmādahaṃ gamiṣyāmi tvaṃ tu tiṣṭhā'tra goṣṭhake |
ātmaprāṇaistava prāṇān rakṣayiṣyāmyasaṃśayam || 44 ||
[Analyze grammar]

putravākyaṃ dharmayuktaṃ śrutvovāca tu nandinī |
mamaiva vihito mṛtyurna te putrā'dya vāsare || 45 ||
[Analyze grammar]

tatkathaṃ mama jīvaṃ tvaṃ rakṣasyasubhirātmanaḥ |
māturvākyamanuṣṭhāya pramādaṃ mā samācara || 46 ||
[Analyze grammar]

lobhāt saṃjāyate nāśastviha loke paratra ca |
lobhātpramādādviśvāsājano vai badhyate tribhiḥ || 47 ||
[Analyze grammar]

tasmāllobhastvayā putra mā kāryo gamanāya vai |
ātmā putra tvayā rakṣyaḥ sarvadaiva prayatnataḥ || 48 ||
[Analyze grammar]

naikākinā pragantavyaṃ yūthaṃ tyaktvā nijaṃ kvacit |
evaṃ saṃbhāṣya taṃ lakṣmi muhustamavalihya vai || 49 ||
[Analyze grammar]

śokabāṣpasamāyuktā sakhīmadhye'bhavat kṣaṇam |
uvāca bahule campe vasudhāre ghaṭasrave || 50 ||
[Analyze grammar]

haṃsanāde śriyānande śubhakṣīre mahodaye |
tathā'nyā dhenavaḥ sarvāḥ śrutvā kurvantu madvacaḥ || 51 ||
[Analyze grammar]

adya vyāghreṇa nikaṭe bhakṣyārthaṃ gṛhītā'smyaham |
prāptā yuṣmaddarśanārthaṃ sutasya darśanāya ca || 52 ||
[Analyze grammar]

śapathaiḥ kṛcchrāccāyātā duṣṭaḥ putraḥ subhāṣitaḥ |
śāsito bhavatīnāṃ ca pradattaḥ putrako mayā || 53 ||
[Analyze grammar]

jñānā'jñānakṛtaṃ yadvai bhavatīnāṃ tu duṣkṛtam |
kṣāntvā'nāthodugdhapo me bālo rakṣyaḥ sadā priyāḥ || 54 ||
[Analyze grammar]

mātṛśokābhisantaptaḥ pālyaḥ sarvābhireva saḥ |
ahaṃ tatra gamiṣyāmi sa vyāghro yatra vartate || 55 ||
[Analyze grammar]

apaścimaḥ praṇāmo'yaṃ sarvāsāṃ vihito mayā |
śrutvā tad dhenavaḥ prāhurna gantavyaṃ hi nandini || 56 ||
[Analyze grammar]

āpaddharme śapathastu mṛṣā kartavya eva yat |
pāpaṃ nāsti mṛṣāvaktaḥ prāṇanāśe hyupasthite || 57 ||
[Analyze grammar]

vivāhe narmaṇi nāryāṃ prāṇāpadi dhanāpadi |
anṛtaṃ nahi pāpāya dharmaḥ proktaḥ sa rakṣakaḥ || 58 ||
[Analyze grammar]

pālayasva nijaṃ putraṃ vrajā'smābhirnijaṃ gṛham |
śrutvā tā nandinī prāha paraprāṇasya rakṣaṇe || 59 ||
[Analyze grammar]

pañcā'nṛtaṃ śubho dharmo na svaprāṇasya rakṣaṇe |
sādhūnāṃ satyamevā'sti dharmastāraṇakārakaḥ || 60 ||
[Analyze grammar]

satye pratiṣṭhito loko dharmaḥ satye pratiṣṭhitaḥ |
viṣṇave pṛthivīṃ datvā baliḥ satye vyavasthitaḥ || 61 ||
[Analyze grammar]

pratijñāya vihanyāccet sarvaghātī bhaveddhi saḥ |
dhenavo'tha tadā prāhurnamaskāryā'si sarvathā || 62 ||
[Analyze grammar]

satyadharmavatī prāṇān gaṇayasyeva naiva yat |
kiṃ vakṣyāmo vṛṣe satye sthitāṃ tvāṃ devavanditām || 63 ||
[Analyze grammar]

tasmād gaccha mahāpuṇye na śocyaḥ putrakastvayā |
śubhaste vijayaścāstu dharmo rakṣatu nandinīm || 64 ||
[Analyze grammar]

ityuktvā nandinī sakhījanān natvā śanaiḥ śanaiḥ |
vanādhidevatāḥ sarvā rakṣantu mama putrakam || 65 ||
[Analyze grammar]

evaṃ pralapamānā sā yayau vyāghrasthalaṃ tu gauḥ |
vyāghro vyāttānanaścāste tasyā mārgāvalokakaḥ || 66 ||
[Analyze grammar]

nandinī prāha taṃ natvā tvāgatā'haṃ vanecara |
satyamālambya dharma vai kuru tṛptiṃ prabhakṣaya || 67 ||
[Analyze grammar]

vyāghraḥ prāha sati satye sthitā vighnavivarjitā |
tvāṃ dṛṣṭvā'haṃ mahāpuṇyo bhavāmyadyā'tipāvanaḥ || 68 ||
[Analyze grammar]

nahi satyavatāṃ kiñcidaśubhaṃ vidyate kvacit |
ahaṃ bhadre durācāro hiṃsakaḥ pāpaśevadhiḥ || 69 ||
[Analyze grammar]

tvāṃ dharmiṣṭhāṃ ghātayitvā prāpsyāmi khalu kāṃ gatim |
tasmāt tvaṃ me jñānadānaprasādaṃ kartumarhasi || 70 ||
[Analyze grammar]

satsaṃgaṃ saphalaṃ labdhvā gatirme śubhadā bhavet |
dhenuḥ prāha tapaḥ satye tretāyāṃ dhyānameva tu || 71 ||
[Analyze grammar]

dvāpare yajñadānaṃ ca dānamekaṃ kalau śubham |
kalyante tu harernāma tārakaṃ kevalaṃ bhavet || 72 ||
[Analyze grammar]

sarvadānottamadānaṃ hyabhayasya pradānakam |
hiṃsrāṇāṃ tu bhavet tanna tasmācchrīharikīrtanam || 73 ||
[Analyze grammar]

sevanaṃ śrīharervāpi śaṃbhorvā rādhikāpateḥ |
karma mokṣakaraṃ syācca tvaṃ sadā tatsamācara || 74 ||
[Analyze grammar]

gahane'tra vane vyāghra vartate'tra harasthalam |
tṛṇacchannaṃ śivaliṃgaṃ nityaṃ prātaḥ prapūjaya || 75 ||
[Analyze grammar]

pradakṣiṇāṃ praṇāmādi kuru muktirbhaviṣyati |
ityuktvā darśayāmāsa liṃgaṃ vyāghrasya nandinī || 76 ||
[Analyze grammar]

vyāghro dṛṣṭvā satvaraṃ vai yathā rājā'bhavat purā |
durvāsaḥśāpamukto'bhūt smṛtvā prāha ca nandinīm || 77 ||
[Analyze grammar]

nṛpaḥ kalaśanāmā'haṃ haihayā'nvayasaṃbhavaḥ |
durvāsaso muneḥ śāpād vyāghratve samupāgataḥ || 78 ||
[Analyze grammar]

nandinīdhenuyogena śāpamuktirbhaviṣyati |
śaṃkarasya darśanena punā rājā bhaviṣyasi || 79 ||
[Analyze grammar]

ityahaṃ pūrvavṛttāntaṃ smarāmyadya śucitvade |
ityuktvā sa praṇamyaiva gāṃ śivaṃ taṃ nanāma ca || 80 ||
[Analyze grammar]

pupūja parayā bhaktyā snapayāmāsa gauḥ śivam |
dugdhena tu tadā śaṃbhurāvirbhūya jagāda ha || 81 ||
[Analyze grammar]

mama bhaktau sadā śuddhau muktyarthaṃ kṛṣṇameva vai |
bhajatāṃ śrīkṛṣṇanārāyaṇaṃ patiṃ hariṃ mudā || 82 ||
[Analyze grammar]

ityuktau śrīkṛṣṇanārāyaṇāya svāmine namaḥ |
mantraṃ gṛhītvā yayaturnijaṃ nijaṃ gṛhaṃ tataḥ || 83 ||
[Analyze grammar]

kuṭumbādikamubhayorānandaṃ cāptavat tadā |
kālena muktimāpanno kṛṣṇanārāyaṇāśritau || 84 ||
[Analyze grammar]

vimānena sudivyena yayatuḥ kṛṣṇadhāma tau |
paṭhanācchravaṇāccāsya bhuktiṃ muktiṃ vṛṣaṃ labhet || 85 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne camatkārapurīyakalaśākhyanṛpasya durvāsasaḥ śāpād vyāghratvaṃ nandinīdhenuyogācchivadarśanānmuktiḥ satyavratasya prabhāvaścetinirūpaṇanāmaikonanavatyadhikacatuśśatatamo'dhyāyaḥ || 489 ||
[Analyze grammar]