Chapter 487

śrīnārāyaṇa uvāca |
atha dhanvantarerdarpabhaṃgaḥ pūrvaṃ yathā kṛtaḥ |
tadākhyānaṃ kathayāmi śṛṇu lakṣmi sureśvari || 1 ||
[Analyze grammar]

nārāyaṇāṃśo bhagavān svayaṃ dhanvantarirmahān |
purā samudramathane samuttasthau mahodadheḥ || 2 ||
[Analyze grammar]

sarvavedeṣu niṣṇāto mantratantraviśāradaḥ |
garuḍasya suśiṣyo vai śaṃkarasyopaśiṣyakaḥ || 3 ||
[Analyze grammar]

śiṣyāṇāṃ sa sahasreṇa yāti vaikuṇṭhamekadā |
dadarśa takṣakaṃ mārge lelihānaṃ bhayānakam || 4 ||
[Analyze grammar]

lakṣanāgaiḥ parivṛtaṃ pātālāttu samāgatam |
tīrthecchayā mahīloke vicarantaṃ śubhāśayam || 5 ||
[Analyze grammar]

dhanvantarirgarvayukto viṣamantrān mumoca ha |
takṣakaḥ krodhasaṃyukto bhoktuṃ dudrāva vaidyakam || 6 ||
[Analyze grammar]

tāvad dhanvantareḥ śiṣyo dambhināmā jajāpa ha |
viṣamantraṃ mahāghoraṃ saṃcakre takṣakaṃ vaśe || 7 ||
[Analyze grammar]

mantreṇa jṛmbhitaṃ kṛtvā nirviṣaṃ taṃ cakāra ha |
amūlyaṃ maṇiratnaṃ jahāra tanmastakasthitam || 8 ||
[Analyze grammar]

kareṇa bhrāmayitvā tu kṣepayāmāsa dūrataḥ |
patito mṛtavattasthau takṣakastadgaṇāstadā || 9 ||
[Analyze grammar]

cakrurnivedanaṃ vāsukaye vāsukirāyayau |
sarpān viṣolbaṇānnītvā pañcamukhān sahasraśaḥ || 10 ||
[Analyze grammar]

droṇakālīyakarkoṭapuṇḍarīkadhanañjayān |
dhanvantareḥ śiṣyagaṇā bhayamāpurvilokya tān || 11 ||
[Analyze grammar]

nāgaviṣairdaṃśitāste śerate pṛthivītale |
dhanvantarirmantrāmṛtairjīvayāmāsa sevakān || 12 ||
[Analyze grammar]

cakāra jṛmbhitaṃ mantraiḥ sarpasaṃghaṃ ruṣā jvalan |
vāsukistu tadā gaurīṃ sasmāra manasā'bhidhām || 13 ||
[Analyze grammar]

manase tvaṃ samāgaccha nāgān rakṣā'tisaṃkaṭāt |
jagattraye mahābhāge pūjā tava bhaviṣyati || 14 ||
[Analyze grammar]

manasā drāk samāgatyovāca yāmi raṇāṃgaṇe |
taṃ śatruṃ saṃhariṣyāmi prajeṣyāmi na saṃśayaḥ || 15 ||
[Analyze grammar]

gururme bhagavān śeṣo dattavān kavacaṃ mama |
saṃsāraṃ bhasmasāt kṛtvā punaḥ sraṣṭumahaṃ kṣamā || 16 ||
[Analyze grammar]

śiṣyā'haṃ mantraśāstreṣu śaṃbhorbhagavastathā |
śaṃbhoḥ śiṣyaṃ garuḍaṃ na gaṇayāmi manāgapi || 17 ||
[Analyze grammar]

dhanvantaristacchiṣyāṇāmekaḥ kiṃ gaṇayāmi tam |
ityuktvā śrīhariṃ śeṣaṃ śaṃbhuṃ smṛtvā praṇamya ca || 18 ||
[Analyze grammar]

yatra dhanvantaristvāste tatrājagāma tatkṣaṇam |
mantraiśca jṛmbhitān sarpān jīvayāmāsa līlayā || 19 ||
[Analyze grammar]

viṣamantraiḥ śatruśiṣyānniśceṣṭāṃśca cakāra sā |
yatnato'pi dhanvantarirnotthāpayitumīśvaraḥ || 20 ||
[Analyze grammar]

prahasya manasā prāha tyaja siddhābhimānitām |
vada jānāsi kiṃ siddha śiṣyo'si garuḍasya vai || 21 ||
[Analyze grammar]

ahaṃ ca garuḍaścāpi śiṣyau śaṃbhorhi viśrutau |
adhītaṃ kalpaparyantaṃ tatra kā gaṇanā tava || 22 ||
[Analyze grammar]

mantritaṃ kamalaṃ cedaṃ prerayāmi sthiro bhava |
ityuktvā prākṣipat padmaṃ mantritaṃ sūryasadṛśam || 23 ||
[Analyze grammar]

dhanvantaraistu phutkārairbhasmasāt tat tadā'bhavat |
devī jagrāha mantrāḍhyāṃ śaktiṃ paramadāruṇīm || 24 ||
[Analyze grammar]

dhanvantaristriśūlena babhaṃja kaṇaśastu tām |
manasā nāgapāśaṃ pracikṣepa mantritaṃ tadā || 25 ||
[Analyze grammar]

nāgalakṣānvitaṃ ghoraṃ dhanvantariśca tatkṣaṇāt |
gāruḍaṃ prerayāmāsa tena nāgāstrabhakṣaṇam || 26 ||
[Analyze grammar]

kṛtaṃ vai līlayā tāvanmanasā śūlamādade |
śivadattaṃ ca saphalaṃ pralayāgnisamaprabham || 27 ||
[Analyze grammar]

tāvad brahmā tathā śaṃbhuḥ rakṣārthamāgatau drutam |
devau nanāma manasā garuḍo vaidyakastathā || 28 ||
[Analyze grammar]

brahmā prāha manasāyāḥ pūjāṃ kurviti vaidyakam |
dhanvantare nahi sāmyaṃ raṇaṃ te durgayā saha || 29 ||
[Analyze grammar]

trailokyaṃ bhasmasāt kartuṃ śūleneyaṃ prabhāvatī |
kuru stotraṃ manasāyāstuṣṭā varaṃ pradāsyati || 30 ||
[Analyze grammar]

dhanvantariḥ śucirbhūtvā śuklapuṣpairapūjayat |
cārucampakavarṇābhāṃ sarvāṃgaśumanoharām || 31 ||
[Analyze grammar]

nāgendravāhinīṃ devīṃ sarvavidyāviśāradām |
dhyātvā datvā ṣoḍaśavastūni stotraṃ cakāra ha || 32 ||
[Analyze grammar]

namaḥ siddhisvarūpāyai varadāyai namo namaḥ |
namaḥ kaśyapakanyāyai śaṃkarāyai namo namaḥ || 33 ||
[Analyze grammar]

bālānāṃ rakṣaṇakartryai nāgadevyai namo namaḥ |
nama āstīkamātre te jaratkārvyai namo namaḥ || 34 ||
[Analyze grammar]

tapasvinyai ca yoginyai nāgasvasre namo namaḥ |
sādhvyai tapasyārūpāyai śaṃbhuśiṣye ca te namaḥ || 35 ||
[Analyze grammar]

iti stutā ca manasā bhūtvā śāntā sukhapradā |
svastītyuktvā yayau natvā gṛhaṃ brahmamaheśvarau || 36 ||
[Analyze grammar]

devā vaidyo garuḍaśca sarpā yayurnijālayān |
iti te kathitaṃ lakṣmi manasāyā balaṃ mahat || 37 ||
[Analyze grammar]

dhanvantarerdarpabhaṃgaḥ śravaṇāt sarpabhīrna vai |
vaṃśajānāṃ nāgabhayaṃ nāsti śravaṇamātrataḥ || 38 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne nāgeṣu dhanvantarermantraprayogāḥ manasādevyā mantraprayogairdhanvantarergarvonāśitaścetinirūpaṇanāmā saptāśītyadhikacatuśśatatamo'dhyāyaḥ || 487 ||
[Analyze grammar]