Chapter 477

śrīnārāyaṇa uvāca |
śṛṇu lakṣmi pravakṣyāmi kathāṃ pātakanāśinīm |
viśvakarmā gurorbhaktiṃ cakāra tatphalaṃ śubham || 1 ||
[Analyze grammar]

pātivratyaṃ pitṛvrataṃ mātṛvrata guruvratam |
svargadaṃ mokṣadaṃ cānyadīpsitasya pradaṃ dhruvam || 2 ||
[Analyze grammar]

viśvakarmā'bhavat pūrvaṃ brahmaṇastvaparā tanuḥ |
tvaṣṭuḥ prajāpateḥ putro nipuṇo buddhimān svataḥ || 3 ||
[Analyze grammar]

kṛtopanayano bālo gurukule vasan vratī |
cakāra guruśuśrūṣāṃ bhikṣānnakṛtabhojanaḥ || 4 ||
[Analyze grammar]

ekadā taṃ guruḥ prāha madarthamūṭajāṃ kuru |
yathā śaityaṃ jaladhārā tāpo na bādhate mama || 5 ||
[Analyze grammar]

yathā na jīrṇatā tasyā vināśo na yathā bhavet |
parivartanamapyasyāḥ kadācinna bhavet tathā || 6 ||
[Analyze grammar]

sarvartusukhadāṃ śālāṃ kuru putra madarthikām |
tathāstviti guruṃ prāha kariṣye tvatprasādataḥ || 7 ||
[Analyze grammar]

athā'yaṃ gurupatnyā'pi samājñaptaḥ kuru prabham |
kaṃcukaṃ mama yogyaṃ vai sūryavahnisamaṃ mṛdu || 8 ||
[Analyze grammar]

na gāḍhaṃ na ślathaṃ cāpi vālkalaṃ sumanoharam |
yasya dhṛtau na cānyāmbaradhṛtiḥ samapekṣate || 9 ||
[Analyze grammar]

omityapi ca tāmāha tataḥ sa sevakaḥ śubhaḥ |
guruputreṇa cājñapto mamārthaṃ pāduke kuru || 10 ||
[Analyze grammar]

carmādibandhanirmukte nityaśliṣṭe sukhaprade |
yadārūḍhasya me caryā paṃke vārṣu sthale'nile || 11 ||
[Analyze grammar]

omityapi ca taṃ prāha tato gurusutā''ha tam |
bhūṣaṇe me karṇayogye karayogye tu kaṃkaṇe || 12 ||
[Analyze grammar]

kumārīkrīḍanīyāni dantidantamayānyapi |
gṛhopakaraṇānyatra mūsalolūkhalādi ca || 13 ||
[Analyze grammar]

pīṭhāni cāpi pātrāṇi sthālikā ujjvalāstathā |
yathā'ṅgulyo na dahyante pāko yatra śubho bhavet || 14 ||
[Analyze grammar]

ekastambhamayaṃ saudhaṃ vāyvādhāraṃ ca vastukam |
omityāhāpi tāṃ tadvad vayasyā api taṃ jaguḥ || 15 ||
[Analyze grammar]

svasveṣṭavastunirmāṇaṃ kartuṃ tāṃścauṃ jagāda saḥ |
tatheti saṃpratijñāya sarveṣāṃ purataḥ priye || 16 ||
[Analyze grammar]

kiñcit kartuṃ na jānāti tena cintāparo'bhavat |
aṃgīkṛtya gurorvākyaṃ na kuryānnirayī bhavet || 17 ||
[Analyze grammar]

guruśuśrūṣaṇaṃ dharmaḥ sadā'sti brahmacāriṇām |
gurūṇāṃ vākyakaraṇāt siddhyanti hi manorathāḥ || 18 ||
[Analyze grammar]

evaṃ vicintya sa yayau vanaṃ dadarśa tatra vai |
tapasvinaṃ sa papraccha ko bhavāniti te namaḥ || 19 ||
[Analyze grammar]

tāpasaḥ prāha taṃ tvāṣṭraṃ yo'smi kiṃ te vadātra me |
tvāṣṭraḥ prāha kalāśailpyaṃ vettuṃ jānāmi te mukhāt || 20 ||
[Analyze grammar]

tāpasaḥ prāha viśveśaṃ śaṃkaraṃ tapasā bhavān |
tuṣṭaṃ karotu te śaṃbhurdāsyati mānasepsitam || 21 ||
[Analyze grammar]

ityuktvā'dṛśyatāṃ yātastāpasaśca tataḥ param |
tbāṣṭrastrihāyanaṃ cograṃ tapaścacāra bhāvataḥ || 22 ||
[Analyze grammar]

tāvat prasanno bhagavān śaṃkaraḥ pārvatīpatiḥ |
āvirbabhūva sahasā varaṃ dadau kalāmayam || 23 ||
[Analyze grammar]

sarvakalāstava buddhau prayāsyanti vikāsanam |
gṛhāṇa mantraṃ śuddhyarthaṃ pātratārthaṃ ca manmukhāt || 24 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
itimantraṃ sadā tvāṣṭra japa sampatpradaṃ śubham || 25 ||
[Analyze grammar]

kaṇṭhe kare ca tulasīmālāṃ gṛhāṇa puṇyadām |
bhāle binduṃ gṛhāṇainaṃ kalātmakaṃ śubhāspadam || 26 ||
[Analyze grammar]

iti datvā haraḥ prāha vijñānaṃ ca tavepsitam |
śrīkṛṣṇakṛpayā tvastu navakauśalyabṛṃhitam || 27 ||
[Analyze grammar]

tvaṃ suvarṇādidhātūnāṃ dārūṇāṃ dṛṣadāmapi |
maṇīnāmapi ratnānāṃ puṣpāṇāṃ vāsasāmapi || 28 ||
[Analyze grammar]

karpūrādisugandhīnāṃ dravyāṇāmapyapāmapi |
kandamūlaphalānāṃ ca tvaksārāṇāṃ tvacāmapi || 29 ||
[Analyze grammar]

sarveṣāṃ vastujātānāṃ śailpyaṃ śreṣṭhaṃ pravetsyasi |
svāmināṃ rucyanusāraṃ ceṣṭaṃ kartuṃ pravetsyasi || 30 ||
[Analyze grammar]

nepathyaracanāḥ sarvāḥ sarvāḥ sūpādisaṃskṛtīḥ |
tauryatrikādikaṃ cāpi sarvaṃ jñāsyasi tattvataḥ || 31 ||
[Analyze grammar]

yantrāyudhajalāvāsadurgatantukalādikam |
aindrajālaṃ manojñānaṃ lokāntarakalādikam || 32 ||
[Analyze grammar]

atilokottaraṃ cāpi sarvaṃ vetsyasi mūlataḥ |
bhaja kṛṣṇaṃ sadā tvāśu sa te jñānaṃ pradāsyasi || 33 ||
[Analyze grammar]

viśvakarmeti te nāma bhagavāṃstvāṃ vadiṣyati |
yadā tu rājā bhavitā divodāso vidhervarāt || 34 ||
[Analyze grammar]

tadā''nandavane tvaṃ me prāsādaṃ saṃkariṣyasi |
rājā dravyavyayaṃ kṛtvā kārayiṣyati mandiram || 35 ||
[Analyze grammar]

viśvakarman vraja gurorājñāyāṃ tiṣṭha tat kuru |
ityuktvā'ntarhitaḥ śaṃbhustvāṣṭro yayau gurorgṛham || 36 ||
[Analyze grammar]

omityuktāśca ye yatra śailpye te tena toṣitāḥ |
pradāya tānyabhīṣṭāni gṛhītvā ca tadāśiṣaḥ || 37 ||
[Analyze grammar]

rañjayāmāsa tānsarvān kalākauśalyakarmabhiḥ |
atha sāhāyyadāḥ kāntāḥ sasmāra kṛṣṇasannidhau || 38 ||
[Analyze grammar]

śrīkṛṣṇastvāvirāsīcca svamūrterdivyaśaktayaḥ |
kṛṣṇecchayā vāmabhāgādutpannāḥ kanyakāstadā || 39 ||
[Analyze grammar]

catuṣṣaṣṭikalā divyāḥ surūpā navayauvanāḥ |
pātivratyaparāḥ kṛṣṇājñayā tvāṣṭraṃ pravavrire || 40 ||
[Analyze grammar]

patiṃ kṛṣṇasvarūpaṃ taṃ tvāṣṭraṃ tāḥ samprasevire |
japaṃ cakruḥ kṛṣṇanārāyaṇāya pataye namaḥ || 41 ||
[Analyze grammar]

dhyānaṃ prapūjanaṃ sevāṃ tvāṣṭre kṛṣṇasya cakrire |
kṛṣṇaḥ prādurabhūttāsāṃ sannidhau ca samāntare || 42 ||
[Analyze grammar]

kāntabhaktyā pratuṣṭaḥ sa tā dadurvaradānakam |
atra sarvaṃ sukhaṃ bhuktvā sṛṣṭyante māṃ prayāsyatha || 43 ||
[Analyze grammar]

bhavatīnāṃ na cānyo'sti dharmaḥ kāntasya sevanāt |
kānte cā'haṃ kāntastvasmi mayā kāntaḥ prakīrtyate || 44 ||
[Analyze grammar]

yatra nā'haṃ na sa kānto na sā kāntā mayā vinā |
tasyānmatpātivratyena kānte mokṣamavāpsyatha || 45 ||
[Analyze grammar]

indrādayo lokapālā viśvedevā marudgaṇāḥ |
ādityā vasavo rudrāḥ sādhyā vidyādharoragāḥ || 46 ||
[Analyze grammar]

ṛṣayo'psaraso yakṣā gandharvāḥ siddhacāraṇāḥ |
sarve madātmakāḥ santi viśvakarmā'hameva ca || 47 ||
[Analyze grammar]

tatpatnyo mā svāmirūpaṃ samārādhya ca māṃ sadā |
kalpe kalpāntake muktiṃ yānti maccharaṇaṃ śubhāḥ || 48 ||
[Analyze grammar]

ityuktvā bhagavān kṛṣṇaścāntardhānaṃ yayau tataḥ |
tāstu kalātmikā divyāḥ patiṃ tvāṣṭraṃ siṣevire || 49 ||
[Analyze grammar]

paṭhanācchravaṇāttvasya kalākauśalamāpnuyāt |
kathitaṃ te guroḥ patyurbhakte lakṣmi phalaṃ śubham || 50 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne tvaṣṭuḥ putrasya gurubhaktyā śaṃbhuvareṇa kalākauśalyaṃ śrīkṛṣṇanārāyaṇabhaktyā catuḥṣaṣṭikalātmakapatnīlābhaḥ tāsāṃ pātivratyaṃ cetyādinirūpaṇanāmā saptasaptatyadhikacatuśśatatamo'dhyāyaḥ || 477 ||
[Analyze grammar]