Chapter 469

śrīnārāyaṇa uvāca |
śṛṇu kṛṣṇakathāṃ lakṣmi dvijapatnīsamanvitām |
yāṃ śrutvā pātivratyena mokṣaṇaṃ mānasaṃ bhavet || 1 ||
[Analyze grammar]

ekadā tu purā kṛṣṇo balarāmaśca bālakāḥ |
vṛndāvanād yayuryamītaṭe madhuvane śubhe || 2 ||
[Analyze grammar]

vicerurgosahasraiste cikrīḍurvai parasparam |
śrāntāḥ kṣudhitāstṛṣitāḥ śiśavastūcuracyutam || 3 ||
[Analyze grammar]

kṣudasmān bādhate kṛṣṇa kiṃ kurmo'tra vane'danam |
śrīkṛṣṇastāṃstadā prāha bālā gacchata sannidhau || 4 ||
[Analyze grammar]

yajñasthānaṃ brāhmaṇānāṃ yācatā'nnaṃ tu bhūsurān |
āṃgirasān vaiṣṇavāṃśca mumukṣūn yajatastu mām || 5 ||
[Analyze grammar]

ajānantaśca māṃ viṣṇuṃ māyāpracchannavigraham |
na ced dadati yuṣmabhyamannaṃ yajñasthitā dvijāḥ || 6 ||
[Analyze grammar]

tatkāntā yācata bālā dayāyuktāḥ śiśūn prati |
śrīkṛṣṇavacanaṃ śrutvā yayurbālakapuṃgavāḥ || 7 ||
[Analyze grammar]

brāhmaṇānāṃ purastasthurbhikṣārthaṃ namrakandharāḥ |
tānūcurbālakā namrā annaṃ datta dvijottamāḥ || 8 ||
[Analyze grammar]

dvijā na śuśruvustāṃstu śṛṇvanto na mano daduḥ |
atastasmāt sthalād dūre gatā randhanaśālikām || 9 ||
[Analyze grammar]

brāhmaṇyo yatra sūpādi pācayanti mahānase |
gatvā namrā viprapatnīryayācire'nnamāsthayā || 10 ||
[Analyze grammar]

yūyaṃ vai mātaraḥ sarvā viprapatnyaḥ pativratāḥ |
dattā'nnaṃ mātarastvasmān kṣudhitān gopabālakān || 11 ||
[Analyze grammar]

śiśūnāṃ mṛduvākyāni śrutvā dṛṣṭvā hi tān striyaḥ |
papraccha sādaraṃ sādhvyaḥ ke yūyaṃ kena darśitam || 12 ||
[Analyze grammar]

yadatrā'nnaṃ hi labdhaṃ syād brūtātra gopabālakāḥ |
dāsyāmo'nnaṃ mṛṣṭamuṣṇaṃ vyañjanādisamanvitam || 13 ||
[Analyze grammar]

śrutvā prasannāḥ śiśavo yaṣṭihastā jagustu tāḥ |
preṣitā rāmakṛṣṇābhyāṃ darśitaṃ tvanmahānasam || 14 ||
[Analyze grammar]

dattā'nnaṃ mātaro'smabhyaṃ tūrṇaṃ yāmastadantikam |
ito vidūre bhāṇḍīre'tiśobhe'tra madhauvane || 15 ||
[Analyze grammar]

vaṭā'dhaḥsthitabhrātṛbhyāṃ yācitānnaṃ pradatta naḥ |
śrutveti komalaṃ kṛṣṇasambandhaṃ vākyamuttamam || 16 ||
[Analyze grammar]

pulakāṃkitasarvāṃgā hṛṣṭānandāśrulocanāḥ |
kṛṣṇanārāyaṇaṃ smṛtvā śālyannaṃ pāyasaṃ dadhi || 17 ||
[Analyze grammar]

miṣṭānnaṃ svastikādyaṃ ca laḍḍukānnaṃ supolikāḥ |
nānāvyañjanasūpādi kṛtvā pātreṣu yoṣitaḥ || 18 ||
[Analyze grammar]

pātrāṇi rājatādīni santyato vayameva tu |
āgacchāmaḥ sahabālā ityuktvā prayayurmudā || 19 ||
[Analyze grammar]

viprāṇyo manasā hṛṣṭāḥ kṛtvā nānāmanorathān |
pativratāstā dhanyāśca śrīkṛṣṇadarśanotsukāḥ || 20 ||
[Analyze grammar]

śrīkṛṣṇaṃ dadṛśurgatvā baladevaṃ ca bālakān |
vaṭacchāyāsthitān dṛṣṭvā dadṛśustāḥ punarharim || 21 ||
[Analyze grammar]

śyāmaṃ kiśoravayasaṃ pītakauśeyavāsasam |
sundaraṃ sasmitaṃ śāntaṃ rādhākāntaṃ manoharam || 22 ||
[Analyze grammar]

śaratpārvaṇacandrāsyaṃ ratnālaṃkṛtirājitam |
ratnakuṇḍalayugmābhyāṃ gaṇḍasthalavirājitam || 23 ||
[Analyze grammar]

ratnakeyūravalayaratnanūpurabhūṣitam |
ājānulambitāṃ śubhrāṃ bibhrataṃ ratnamālikām || 24 ||
[Analyze grammar]

mālatīmālayā kaṇṭhavakṣaḥsthalavirājitām |
candanāgurukastūrīkuṃkumāñcitavigraham || 25 ||
[Analyze grammar]

sunakhaṃ sukapolaṃ ca pakvabimbādharaṃ harim |
pakvadāḍīmabījābhadantapaṃktivirājitam || 26 ||
[Analyze grammar]

mayūraparṇasaṃśobhadbaddhacūḍāmaṇiṃ prabhum |
karṇayordhṛtakādambapuṣpagucchasuśobhitam || 27 ||
[Analyze grammar]

dhyānā'sādhyaṃ yogināṃ ca bhaktānugrahakātaram |
brahmeśadharmaśeṣendraiḥ stūyamānaṃ pareśvaram || 28 ||
[Analyze grammar]

koṭikandarpalāvaṇyavātsalyapremapūritam |
dṛṣṭvaivamujjvalaṃ kṛṣṇaṃ bhaktyā nemurdvijastriyaḥ || 29 ||
[Analyze grammar]

svānāṃ jñānānurūpaṃ ca tuṣṭuvuḥ parameśvaram |
tvaṃ brahma paramaṃ kṛṣṇaḥ sākṣācchrīpatiracyutaḥ || 30 ||
[Analyze grammar]

nirguṇastvaṃ nirākāraḥ sākāraḥ saguṇaḥ svayam |
sākṣirūpaśca nirlepaḥ paramātmā nirākṛtiḥ || 31 ||
[Analyze grammar]

akṣarātparataḥ śreṣṭhastvakṣarātīta eva ca |
muktasevyaḥ śriyā sevyo rādhāramādipūjitaḥ || 32 ||
[Analyze grammar]

pārvatīmāṇikīlakṣmīprabhādyābhiḥ patiḥ kṛtaḥ |
prakṛteḥ puruṣasyāpi mahāviṣṇośca vedhasaḥ || 33 ||
[Analyze grammar]

śivādīnāṃ manūnāṃ ca kāraṇaṃ paramaṃ bhavān |
jaḍaṃ tattvātmakaṃ yadyaccetanaṃ ca tadanvitam || 34 ||
[Analyze grammar]

tvayā vyāptaṃ tava tejobalāttejasvitāśrayam |
sarvaiśvaryāṇi śaktyādyāstavamūrteḥ samudbhavāḥ || 35 ||
[Analyze grammar]

sarvānandaḥ pareśo'si patiḥ prāṇādhikaḥ priyaḥ |
adivyacakṣuṣā naiva grāhyo'si dehavānapi || 36 ||
[Analyze grammar]

maheśaḥ kārtikeyaśca śeṣo dharmo vidhirguruḥ |
sarasvatī jaḍāḥ sarve stavane tatra kā vayam || 37 ||
[Analyze grammar]

pārvatī kamalā rādhā sāvitrī śāradā prabhā |
māṇikī śrīrlakṣmavatī pravartante na kā vayam || 38 ||
[Analyze grammar]

prasanno bhava no deva dīnabandho kṛpāṃ kuru |
iti petustu tā viprapatnyaḥ kṛṣṇapadāmbuje || 39 ||
[Analyze grammar]

abhayaṃ pradadau tābhyaḥ kṛṣṇanārāyaṇo hariḥ |
varaṃ vṛṇuta kalyāṇaṃ bhavitā cetyuvāca saḥ || 40 ||
[Analyze grammar]

tataḥ sādhvyastu tā ūcurgṛhṇīmaḥ pravaraṃ prabho |
dehi svadāsyamasmabhyaṃ dṛḍhāṃ bhaktiṃ padāmbuje || 41 ||
[Analyze grammar]

paśyāmo'nukṣaṇaṃ vaktraṃ sevayāmaḥ padāmbuje |
anugrahaṃ kuru śreṣṭhaṃ yāsyāmo na gṛhaṃ punaḥ || 42 ||
[Analyze grammar]

pativratānāṃ vākyāni śrutvā kṛṣṇaḥ kṛpānidhiḥ |
omityuktvā viprapatnīdattamannaṃ sudhāsamam || 43 ||
[Analyze grammar]

bālakān bhojayitvā'nububhuje bhagavān svayam |
etasminnantare tatra śātakuṃbhaṃ rathaṃ param || 44 ||
[Analyze grammar]

golokādāgataṃ tāstu dadṛśurdivyapārṣadam |
ratnadarpaṇatejaskaṃ vastrasāraparicchadam || 45 ||
[Analyze grammar]

suvarṇakalaśopetaṃ ratnastaṃbhadharādikam |
sarvataścāmarairyuktaṃ pārijātasumālikam || 46 ||
[Analyze grammar]

śatacakropariklṛptaṃ vanamālādiśobhitam |
divyapārṣadavaryaiśca kṛṣṇatulyaiḥ suvāhitam || 47 ||
[Analyze grammar]

pītavastraparīdhānaiḥ ratnālaṃkārabhūṣitaiḥ |
navayauvanasampanneḥ śyāmalaiśca manoharaiḥ || 48 ||
[Analyze grammar]

dvibhujairmuralīhastairgopiveśadharairvaraiḥ |
śikhipicchaguñjamālābaddhavakrimacūḍakaiḥ || 49 ||
[Analyze grammar]

pārṣadaiḥ sannataḥ kṛṣṇo viprapatnyastu bodhitāḥ |
gamanārthaṃ tu golokaṃ tāścā''san muditānanā || 50 ||
[Analyze grammar]

kṛṣṇanārāyaṇaṃ natvā tyaktvā mānuṣavigrahān |
babhūvurgopikāḥ sadyo jagmurgolokamīpsitam || 51 ||
[Analyze grammar]

kṛṣṇaśchāyāṃ vinirmāya tāsāṃ rūpāntarāṇi vai |
gṛhān prasthāpayāmāsa viprāṇāṃ viprakāminīḥ || 52 ||
[Analyze grammar]

viprā gaveṣaṇaṃ cakruḥ kva gatāstā itibruvāḥ |
dadṛśuḥ pathi cāyāntīḥ patnīḥ śāntiṃ yayustataḥ || 53 ||
[Analyze grammar]

pulakāṅkitasarvāṃgāḥ prasannavadanekṣaṇāḥ |
ūcuraho'tidhanyāḥ smo yūyaṃ cāpi pativratāḥ || 54 ||
[Analyze grammar]

yāsāṃ patnyaḥ kṛṣṇabhaktā lakṣmīrādhāsamā harau |
tapo japo vrataṃ jñānaṃ vedādhyayanamarcanam || 55 ||
[Analyze grammar]

tīrthasnānamanaśanaṃ saphalaṃ kṛṣṇasevayā |
śrīkṛṣṇaḥ sevito yābhiḥ kiṃ tāsāṃ puṇyaparvataiḥ || 56 ||
[Analyze grammar]

prāptaḥ kalpataruryābhiḥ kiṃ tāsāṃ tarukoṭibhiḥ |
śrīkṛṣṇo hṛdaye yāsāṃ kiṃ tāsāṃ karmakoṭibhiḥ || 57 ||
[Analyze grammar]

iti kṛṣṇasya māhātmyaṃ patnīnāṃ cāpi sarvathā |
jānantaste yayuryajñaṃ tato yayurgṛhāṇi vai || 58 ||
[Analyze grammar]

tāsāṃ tato'dhikaṃ prema krīḍāsu sarvakarmasu |
dākṣiṇyaṃ sevanaṃ sarvaṃ tvāsīd viprairatarkitam || 59 ||
[Analyze grammar]

prāgbhavīyottamapuṇyaiḥ prāpyate bhagavān yataḥ |
āsaṃstāstu purā saptarṣīṇāṃ patnyaḥ pativratāḥ || 60 ||
[Analyze grammar]

guṇavatyo ramaṇyastā rūpeṇā'pratimā parāḥ |
navīnayauvanāḥ sarvāḥ pīnaśroṇipayodharāḥ || 61 ||
[Analyze grammar]

divyavastraparīdhānā ratnālaṃkārabhūṣitāḥ |
taptakāñcanavarṇābhāḥ smerānanasaroruhāḥ || 62 ||
[Analyze grammar]

yajñasthānasthitāḥ svāmisahitāścakrurarpaṇam |
vahnau dravyādivastūnāṃ cakame'gnirvilokya tāḥ || 63 ||
[Analyze grammar]

tato vahniḥ svīyajvālākaraiḥ pasparśa tā muhuḥ |
agniraṃgāni tāsāṃ ca darśaṃ darśaṃ mumoha ca || 64 ||
[Analyze grammar]

haviṣyaṃ bhakṣayaṃścāpi sparśaṃ kṛtvā'tikāmukaḥ |
samāśliṣat karaistāstvadṛśyairbhāvaiḥ punaḥ punaḥ || 65 ||
[Analyze grammar]

cakāra surataṃ sūkṣmaṃ śikhābhiḥ pariṣvajya tāḥ |
pativratāśca tā naiva jānanti vahnivartanam || 66 ||
[Analyze grammar]

divyadraṣṭā'ṅgirā vahnerjñātvā guptaṃ tu vartanam |
kāmabhāvānvitaṃ vahniṃ śaśāpa śeṣamāvahan || 67 ||
[Analyze grammar]

adyaprabhṛti vahne te śikhāyāṃ ca kareṣu ca |
jvālāyāṃ ca tathā'ṅgārādiṣu kāmau bhavenna vai || 68 ||
[Analyze grammar]

napuṃsakaḥ sadā syāstvaṃ jvālātmakaḥ supuṇyadaḥ |
mūrtimāṃstvaṃ sakāmaḥ syāḥ svāhāpi tādṛśī tathā || 69 ||
[Analyze grammar]

evaṃ śaptastato vahnirniṣkāmo jvālayā'bhavat |
yajñayāgādikāryāṇi yataḥ puṇyāni tadbalāt || 70 ||
[Analyze grammar]

athā'ṅgirā aśuddhāstā vahnispṛṣṭā hi kāmataḥ |
śaśāpa śuddhilābhāya yāta yoniṃ tu mānuṣīm || 71 ||
[Analyze grammar]

kulajairbrāhmaṇaiḥ pāṇirgṛhīto vo bhaviṣyati |
ityuktāstāḥ kṣaṇaṃ śokaṃ jagmuścakruśca taṃ natim || 72 ||
[Analyze grammar]

hitaṃ tathyaṃ prārthayāmāsuśca sarvāḥ pativratāḥ |
na tyajā'smān muniśreṣṭha niṣpāpā vai pativratāḥ || 73 ||
[Analyze grammar]

ajānantyaḥ paraspṛṣṭā na vai nastyaktumarhasi |
bhaktānāṃ kiṃkarīṇāṃ ca na daṇḍaṃ kartumarhasi || 74 ||
[Analyze grammar]

yuṣmākaṃ caraṇāmbhojaṃ kadā drakṣyāmahe vayam |
khaḍgacchedād vajrapātāt sarvapraharaṇāttathā || 75 ||
[Analyze grammar]

dāruṇaḥ kāntavicchedaḥ sādhvīnāṃ duḥsahaḥ sadā |
brahmiṣṭhānāṃ guṇavatāṃ parān kāntān mahāmunīn || 76 ||
[Analyze grammar]

patnīvratān kathaṃ tyaktvā yāsyāmaḥ pṛthivītalam |
yāsyāmo yadi vipreśa kadā'trā''gamanaṃ vada || 77 ||
[Analyze grammar]

anyeṣāṃ tu bhayāt kāntā vrajanti śaraṇaṃ patim |
svakāntabhayasaṃvignāḥ śaraṇaṃ kaṃ vrajanti tāḥ || 78 ||
[Analyze grammar]

abhayaṃ dehi dharmiṣṭha bhayayuktābhya eva yat |
putre śiṣye kalatre ca ko daṇḍaṃ kartumakṣamaḥ || 79 ||
[Analyze grammar]

daṇḍaṃ datvā vāraṇaṃ ca kartuṃ tvapi na kaḥ kṣamaḥ |
kāminīnāṃ vacaḥ śrutvā'ṅgirāḥ premṇā ruroda vai || 80 ||
[Analyze grammar]

saṃjñāmavāpya ca bhrātṝn pṛṣṭvā provāca tāstataḥ |
hitaṃ satyaṃ priyaṃ yogyamanyeṣāṃ bodhadaṃ param || 81 ||
[Analyze grammar]

parabhuktāṃ svasya kāntāṃ vinā tacchodhanaṃ patiḥ |
naiva bhuñjīta vai kvāpi pāpaṃ saṃkramate priye || 82 ||
[Analyze grammar]

na sā daive na sā paitrye pākārhā pāpasaṃyutā |
tasyā āliṃgane bhartā bhraṣṭaśrīstejasā hataḥ || 83 ||
[Analyze grammar]

devatāḥ pitarastasya havyadāne ca tarpaṇe |
sukhino na bhavantyeva kavoṣṇamupabhuṃjate || 84 ||
[Analyze grammar]

tasmād yatnena bhāryāyā rakṣaṇaṃ kāryamanvaham |
pade pade sāvadhānaiḥ kāntā rakṣyāḥ supaṇḍitaiḥ || 85 ||
[Analyze grammar]

nā'nyā'dhīnā bhaved yoṣā doṣāṇāṃ hi karaṇḍikā |
kalatraṃ pākapātraṃ ca sadā rakṣitumarhati || 86 ||
[Analyze grammar]

parasparśādaśuddhe te śuddhe svasyaiva hastage |
aśuddhānāṃ praśuddhiścartunā vratena janmanā || 87 ||
[Analyze grammar]

tasmānnārī parairyatnādadṛṣṭā pūrvajaiḥ kṛtā |
asūryaṃpaśyā yā dārā śuddhāstāstu pativratāḥ || 88 ||
[Analyze grammar]

svāmisādhyā tu yā nārī kuladharmabhiyā sthitā |
kāntena sārdhaṃ sā kāntā vaikuṇṭhaṃ yāti niścitam || 89 ||
[Analyze grammar]

ṛṣilokanimeṣeṇa pṛthvyāṃ viṃśativarṣakaḥ |
kālo yāsyati śīghraṃ vai janmanā śuddhirarthyate || 90 ||
[Analyze grammar]

yāta yūyaṃ ca pṛthivīṃ mānuṣīṃ yonimīpsitām |
kṛṣṇabhojanadānena vaḥ śāpasya hi mocanam || 91 ||
[Analyze grammar]

śrīkṛṣṇasya pratāpena rūpatrayaṃ dhariṣyatha |
divyakanyāsvarūpeṇa golokaṃ yāsyatha dhruvama || 92 ||
[Analyze grammar]

devīkanyāsvarūpeṇa ṛṣilokaṃ prayāsyatha |
chāyākanyāsvarūpeṇa vipragṛhaṃ prayāsyatha || 93 ||
[Analyze grammar]

yuṣmadaṃśā viprapatnyo mṛtau prāpsyatha no dhruvam |
yuṣmākaṃ mamaśāpo'yaṃ vartate'dya varādhikaḥ || 94 ||
[Analyze grammar]

bhuktirmuktirgṛhaprāptistrayametadavāpyate |
ityuktāstā yajñabhūmeryayuḥ pṛthvīṃ yamītaṭe || 95 ||
[Analyze grammar]

yogyagṛhe samudbhūya babhuvurviprayoṣitaḥ |
datvānnaṃ haraye bhaktyā jagmurgolokameva tāḥ || 96 ||
[Analyze grammar]

tathā'nyarūpaiḥ kāntasya lokaṃ jagmuśca tāstadā |
chāyārūpairyayurvipragṛhāṇyeva tu tāḥ striyaḥ || 97 ||
[Analyze grammar]

babhūva niścitaṃ tāsāṃ śāpo vai sampado'dhikaḥ |
aho sadyaḥ satāṃ kopastūpakārāya kalpate || 98 ||
[Analyze grammar]

vinā vipattermahimā kutaḥ kasya bhavet khalu |
bhūtāḥ kāntaparityāgānmuktā brāhmaṇayoṣitaḥ || 99 ||
[Analyze grammar]

ityevaṃ kathitaṃ lakṣmi pativratāharivratam |
paṭhanācchravaṇāttvasya bhuktirmuktistathonnatiḥ || 100 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne saptarṣipatnīnāṃ vahnibhogena śāpād viprapatnītve śrīkṛṣṇanārāyaṇapātivratyena yajñe yamītaṭe śrīkṛṣṇādibālānāṃ vatsacārāṇāṃ bhojanadānena mokṣaṇaṃ cetyādinirūpaṇanāmaikonasaptatyadhikacatuśśatatamo'dhyāyaḥ || 469 ||
[Analyze grammar]