Chapter 468

śrīnārāyaṇa uvāca |
śṛṇu lakṣmi śaṃkarasya bhaktāyāstu kathāṃ śubhām |
asacchūdrāyā nartakyā naṭyāḥ pativratātmikām || 1 ||
[Analyze grammar]

purā tu nartakī śaṃbhorbhaktā nāmnā kalāvatī |
brahmacaryaparā tvāsīnnṛtyanāṭyārthakovidā || 2 ||
[Analyze grammar]

saikadā phālgune kṛṣṇe śivarātryāṃ śivālaye |
nanarta jāgaraṃ kṛtvā jagau gītaṃ svareṇa su || 3 ||
[Analyze grammar]

svayaṃ pravādayāmāsa vādyānyapi nanarta ca |
patiḥ kṛṣṇaḥ patiḥ śaṃbhuḥ patirnnārāyaṇo mama || 4 ||
[Analyze grammar]

divyaḥ patirmayā jñāto labdho devaḥ patirmayā |
dhartā pātā rakṣitā cā''nandayitā harirmama || 51 ||
[Analyze grammar]

nānyenā svāminā tvatra prayojanaṃ mama prabho |
ityevaṃ gāyati vakti nṛtyatyapi prahṛṣyati || 6 ||
[Analyze grammar]

nityaṃ snāpayati śaṃbhuṃ śṛṃgārayati bhāvataḥ |
bhojayati sumiṣṭānnaṃ pāyayati payaḥ śubham || 7 ||
[Analyze grammar]

nīrājayati sandhyāyāṃ rātrau dhyāyati śaṃkaram |
patiṃ matvā sadā śaṃbhuṃ samarcayati sarvathā || 8 ||
[Analyze grammar]

evaṃ śaṃbhoḥ pātivratyaparā puṇyayutā naṭī |
kāladharmavaśaṃ yātā yadā sā bhaktanartakī || 9 ||
[Analyze grammar]

sutā gandharvarājasya vasubhūterbabhūva sā |
ramyā ratnāvalīnāmnīrūpalāvaṇyaśālinī || 10 ||
[Analyze grammar]

kalākalāpakuśalā madhurālāpavādinī |
piturānandadā nityaṃ vasubhūteḥ suputrikā || 11 ||
[Analyze grammar]

sarvagāndharvakuśalā guṇaratnamahākhaniḥ |
tasyāḥ sakhītrayaṃ tvāsīccārucāturyabhājanam || 12 ||
[Analyze grammar]

tadapyāsīddhare pātivratyadharmānvitaṃ priye |
śaśilekhā'naṅgalekhā citralekheti nāmataḥ || 13 ||
[Analyze grammar]

tisṛbhistābhirekatra vāgdevī pariśīlitā |
tābhyaḥ sarvāḥ kalāḥ prādāt pariprītā sarasvatī || 14 ||
[Analyze grammar]

prāpya ratnāvalī svasyā gatajanmasmṛtiṃ muhuḥ |
śaṃkarasya prajagrāha niyamaṃ paramaṃ tu sā || 15 ||
[Analyze grammar]

nityaṃ sandarśanaṃ kṛtvā kāśyāṃ kṛṣṇeśvarasya vai |
anyat kāryaṃ kariṣyāmi vakṣyāmyapi vaco mukhe || 16 ||
[Analyze grammar]

itthaṃ niyamavatyāsīt sā gandharvasutā satī |
tābhiḥ sakhībhiḥ sahitā nityaṃ śaṃbhuṃ prapaśyati || 17 ||
[Analyze grammar]

ekadā sā samānarca kṛṣṇeśvaraṃ tu śaṃkaram |
rañjayāmāsa taṃ bālā ramyayā gītamālayā || 18 ||
[Analyze grammar]

sakhyaḥ pradakṣiṇīkartuṃ kṛṣṇeśvaraṃ yayuryadā |
tadā ratnāvalī gītaiḥ prasannaḥ śaṃkaraḥ svayam || 19 ||
[Analyze grammar]

vaiṣṇavaiḥ sarvacihnaiśca kṛṣṇanārāyaṇaṃ gṛṇan |
uvāca darśanaṃ datvā varaṃ vṛṇu sukanyaka || 20 ||
[Analyze grammar]

kanyā prāha prabho śaṃbho bhavān brahma pravarṇyate |
tvāṃ jānāmi mahādevaṃ parātparapumuttamam || 21 ||
[Analyze grammar]

tvayā tvārādhanā kasya mālayā kriyate prabho |
kasyedaṃ tilakaṃ bhāle candrakaḥ kasya śaṃkaraḥ || 22 ||
[Analyze grammar]

tulasīmālikā kasyāt kaṇṭhe sandhāryate tvayā |
śaṃbhuḥ prāha hitaṃ miṣṭaṃ śrutvā kṛṣṇasmṛtipradam || 23 ||
[Analyze grammar]

dhanyā'si tvaṃ bhāgavatī bāle yaṃ māṃ supṛcchasi |
iṣṭadevaḥ svayaṃ kṛṣṇanārāyaṇo harirmama || 24 ||
[Analyze grammar]

tasya caraṇarekhāyāstilakaṃ dhāryate mayā |
candrakaḥ kuṃkumakṛto bhāle lakṣmyāḥ pradhāryate || 29 ||
[Analyze grammar]

tulasī bhagavatpatnī hareḥ prāsādikaṃ dalam |
tasyāḥ sandhāryate bāle mālā kṛṣṇajapārthikā || 26 ||
[Analyze grammar]

kare kaṇṭhe sadā vṛndāmālā yasya tu vidyate |
sa vai bhāgavataśreṣṭhaḥ paramo vaiṣṇavaḥ sadā || 27 ||
[Analyze grammar]

etacchratvā''ha sā kanyā yanmālā japyate tvayā |
sa me bhartā bhavennāthaḥ kāntaḥ patirvaro mama || 28 ||
[Analyze grammar]

varāṇāṃ śreṣṭhamenaṃ vai varaṃ dehi maheśvara |
tathā'stviti haraḥ prāha prāha cātihitaṃ tataḥ || 29 ||
[Analyze grammar]

adya rātrau svayaṃ kṛṣṇaḥ raṃsyate tu tvayā saha |
tava bhāvaprasannaḥ saḥ tava bhartā bhaviṣyati || 30 ||
[Analyze grammar]

imāḥ sakhyaḥ kṛṣṇadāsyo bhaviṣyanti tvayā saha |
varaṃ labdhvā tu tāḥ sarvā yayurgṛhaṃ tataḥ param || 31 ||
[Analyze grammar]

prāhuḥ sakhyastu tāṃ ratnāvalīṃ vihasya vai śṛṇu |
yadyāyāti sa te rātrāvadya kṛṣṇanarāyaṇaḥ || 32 ||
[Analyze grammar]

cauro bāhulatāpāśaiḥ pāśitavyo'tiyatnataḥ |
gocarīkriyate'smābhiryathā sa rādhikāpatiḥ || 33 ||
[Analyze grammar]

aho bhāgyodayaste'dya mahānpuṇyodayastava |
ekasyāste'bhavat siddhistvayā sākaṃ ca naḥ khalu || 34 ||
[Analyze grammar]

iti saṃvyāharantyastā ninyū rātriṃ yathātatham |
atha prātaḥ samutthāya punarekatra saṃgatāḥ || 35 ||
[Analyze grammar]

prātaḥ kalāvatī snātvā pūjayitvā haraṃ tataḥ |
nirbandhena vayasyābhiḥ paripṛṣṭā jagāda ha || 36 ||
[Analyze grammar]

guroḥ kṛpāstathā tvāśīrvādāḥ phalanti vai dhruvam |
guroḥ sevā tapaḥ śīghraṃ dadātyeva paraṃ sukham || 37 ||
[Analyze grammar]

adya kṛṣṇaṃ hṛdi kṛtvā''viśaṃ śayyāṃ hi satvaram |
nidrādhiṣṭhitanayanā tadvilokanalālasā || 38 ||
[Analyze grammar]

kṣaṇāt svapnadaśāṃ prāptā bhāvino'rthasya gauravāt |
ātmavismaraṇe hetū tato me dvau babhūvatuḥ || 39 ||
[Analyze grammar]

tandro kṛṣṇāṃgasaṃsparśau mama bodhāpahārakau |
tandryāṃ paravaśā tvāsaṃ tatastatsparśanena ca || 40 ||
[Analyze grammar]

ānandaśevadhau magnā na jāne māṃ ca taṃ prabhum |
sukhayitvā jigamiṣuṃ yāvaddhartuṃ samutsahe || 41 ||
[Analyze grammar]

tāvaddhastaṃ vañcayitvā vihasya satvaraṃ gataḥ |
doṣṇoḥ kaṃkaṇaśabdaiśca drāgahaṃ tvavabodhitā || 42 ||
[Analyze grammar]

sukhasantānapīyūṣahṛde parinimajjya vai |
kṣaṇaṃ tu tadviyogāgnau patitā'haṃ samutkaṭe || 43 ||
[Analyze grammar]

dunoti nitarāṃ sakhyastadviśleṣā'nalo mahān |
prāṇānāṃ me yiyāsūnāṃ punarāśā mahauṣadham || 44 ||
[Analyze grammar]

aho tasya punaḥ śaktiraho tasya balaṃ kriyā |
aho tasya prasaundaryaṃ ramaṇaṃ tasya cādbhutam || 45 ||
[Analyze grammar]

aho cūḍāmaṇistasya picchaṃ māyūrakaṃ śubham |
lalāṭaphalakaṃ ramyaṃ padmapatrāyatekṣaṇe || 46 ||
[Analyze grammar]

sasmitaṃ tvānanaṃ miṣṭaṃ miṣṭaścāsaprapūritam |
candrakoṭyujjvalaṃ vaktraṃ tejaḥparidhimaṇḍitam || 47 ||
[Analyze grammar]

kāmagarvaharā bhrūśca vakṣaḥ śītalapaṃkavat |
karau sukomalau puṣṭau bāhupārśvau manoharau || 48 ||
[Analyze grammar]

udaraṃ jaghanaṃ yatra hṛdayaṃ me jaḍaṃ hyabhūt |
ūrū netrā''nandakarau yathā maṇī prakāśakau || 49 ||
[Analyze grammar]

caraṇau komalau sparśaḥ svākarṣaṇakaraḥ paraḥ |
aho tasya pumaṃkasya sukhadatvaṃ cirāyitam || 50 ||
[Analyze grammar]

sarvasvena mayā tatra hutaṃ varṣma pramodane |
aho yogo balaṃ tasya tvaho vīryaṃ dṛḍhāṃgatā || 51 ||
[Analyze grammar]

punaḥ punaḥ prayogeṇa jitā śaktiśca me hṛtā |
kā'līkamālayo vakti snigdhe mugdhe sakhījane || 52 ||
[Analyze grammar]

daśamyavasthā sannahyed bādhituṃ māṃ hi taṃ vinā |
iti tasyā giraḥ śrutvā mūrchā prāpustadā''layaḥ || 53 ||
[Analyze grammar]

tāvat kṛṣṇaḥ samāyātastāsāṃ saubhāgyahetave |
svapne surūpo bhagavān yuvā tāḥ pariṣasvaje || 54 ||
[Analyze grammar]

tāstu datvā sukhaṃ tatra tiro'bhūd vai kṣaṇāntare |
śaśilekhā'naṅgalekhācitralekhā jajāgaruḥ || 55 ||
[Analyze grammar]

dṛṣṭvā kṛṣṇakṛtā''śleṣacihnāni svakalevare |
parasparaṃ vilokyaitā hrīyuktāḥ saṃvirejire || 56 ||
[Analyze grammar]

nanṛtuḥ sukhasaṃhṛṣṭāḥ sakhyo mumudire bhṛśam |
śravaṇaṃ cāpi kṛṣṇasya sākṣātkārapradaṃ tvabhūt || 57 ||
[Analyze grammar]

catasrastāḥ svapitaraṃ pitṛtulyaṃ suvaiṣṇavam |
vasubhūtiṃ tu gandharvaṃ prātaḥ procurhidarśanam || 58 ||
[Analyze grammar]

svapne kṛṣṇo yathā dṛṣṭo yathā kṛṣṇaḥ pratoṣitaḥ |
yathā varo mahādevāt pūrvaṃ labdho'pyabhūt tathā || 59 ||
[Analyze grammar]

śrutvā sarvaṃ pitā prāha tāstu catuḥkumārikāḥ |
kṛṣṇasyaiva kṛte putryo mayā jalena cārpitāḥ || 60 ||
[Analyze grammar]

adya kṛṣṇo yadi tvāyād vaktavyā mannatiḥ stutiḥ |
vāgdānaṃ ca mahādevyo bhavatād bhagavānpatiḥ || 61 ||
[Analyze grammar]

jāmātā śrīkṛṣṇanārāyaṇaḥ kutra hi labhyate |
śaṃkarasya varadānāllabdho yuṣmābhireva saḥ || 62 ||
[Analyze grammar]

dhanyo'haṃ kṛtakṛtyo'haṃ dhanyaṃ me'pi kulaṃ sadā |
jāmātā yasya bhagavān śrīkṛṣṇaḥ puruṣottamaḥ || 63 ||
[Analyze grammar]

dhanyā yūyaṃ sadā sādhvyo dhanyā yūyaṃ pativratāḥ |
dhanyā yūyaṃ kṛṣṇapatnyo dhanyāḥ kṛṣṇavratāḥ striyaḥ || 64 ||
[Analyze grammar]

ityuktvā kārayāmāsa maṇḍapaṃ kanyakā''jñayā |
śrīkṛṣṇāya pradātavyāḥ kanyakā itivāñcchayā || 65 ||
[Analyze grammar]

dvitīyāyāṃ niśāyāṃ sa samājagāma mādhavaḥ |
bubhuje tāḥ kanyakā vai tābhistūktaḥ pareśvaraḥ || 66 ||
[Analyze grammar]

vivāhārthaṃ tathā'stviti kṛṣṇaḥ prāha kṛpāvaśaḥ |
prātareva mahābrāhme muhūrte vahnisannidhau || 67 ||
[Analyze grammar]

gavāṃ madhye dadau kanyāḥ kṛṣṇāya paramātmane |
vasubhūtiḥ kṛṣṇanārāyaṇaṃ cānarca bhāvataḥ || 68 ||
[Analyze grammar]

śyāmaṃ suyauvanaṃ puṣṭaṃ pītakauśeyavāsasam |
sundaraṃ sasmitaṃ śāntaṃ rādhākāntaṃ manoharam || 69 ||
[Analyze grammar]

śaratpārvaṇacandrāsyaṃ ratnālaṃkārabhūṣitam |
ratnakuṇḍalayugmābhyāṃ gaṇḍasthalavirājitam || 70 ||
[Analyze grammar]

ratnakeyūravalayaratnanūpurabhūṣitam |
ājānulambitāṃ śubhrāṃ bibhrataṃ ratnamālikām || 71 ||
[Analyze grammar]

mālatīmālayā kaṇṭhavakṣaḥsthalavirājitam |
candanāgurukastūrīkuṃkumāñcitavigraham || 72 ||
[Analyze grammar]

sunakhaṃ sukapolaṃ ca pakvabimbādharaṃ varam |
pakvadāḍīmabījābhaṃ bibhrataṃ dantamaṇḍalam || 73 ||
[Analyze grammar]

śikhipicchasamāyuktaṃ baddhacūḍaṃ parātparam |
kadambapuṣpayugmābhyāṃ karṇamūle virājitam || 74 ||
[Analyze grammar]

samarcya sarvabhūṣāḍhyaṃ nanāma kanyakāpitā |
kṛṣṇastāḥ kanyakā divyā jagrāha vidhinā prabhuḥ || 75 ||
[Analyze grammar]

śaratpārvaṇacandrābhā muṣṭavaktramanoharāḥ |
śaranmadhyāhnapadmānāṃ śobhāmocanalocanāḥ || 76 ||
[Analyze grammar]

paritastārakāpakṣmavicitrakajjalojjvalāḥ |
khagendracañcucāruśrīśaṃsānāśukanāsikāḥ || 77 ||
[Analyze grammar]

tanmadhyasthalaśobhārhasthūlamuktāphalojjvalāḥ |
kabarīveṣasaṃyuktā mālatīmālyaveṣṭitāḥ || 78 ||
[Analyze grammar]

grīṣmamadhyāhnamārtaṇḍaprabhāmuṣṭakakuṇḍalāḥ |
pakvabimbaphalānāṃ ca śrīmuṣṭā'dharayugmakāḥ || 79 ||
[Analyze grammar]

muktāpaṃktiprabhātaikadantapaṃktisamujjvalāḥ |
īṣatpraphullakundānāṃ suprabhāsaṃśubhasmitāḥ || 80 ||
[Analyze grammar]

kastūrībindusaṃyuktasindūrabindubhūṣitāḥ |
kapālāni ca mallikāyuktāni śrīyutāni ca || 81 ||
[Analyze grammar]

saṃdadhānāḥ kṛṣṇakāntāḥ kṛṣṇatulyasuśobhitāḥ |
sucāruvartulākārakapolapulakānvitāḥ || 82 ||
[Analyze grammar]

maṇiratnendrasārāṇāṃ hāroraḥsthalabhūṣitāḥ |
sucāruśrīphaladvayakaṭhinastanasaṃbhavāḥ || 83 ||
[Analyze grammar]

patrāvalīśriyā yuktā dīptāḥ sadratnakāntibhiḥ |
yāsāṃ suvartulākāramudaraṃ sumanoharam || 84 ||
[Analyze grammar]

vicitratrivalīyuktaṃ nimnanābhiśca vartulā |
sadratnasāraracitamekhalājālabhūṣitāḥ || 85 ||
[Analyze grammar]

kāmāstrasārabhrūbhaṃgayogīndracittamohikāḥ |
sthalapadmaprabhāśobhā'ñcitatalapadāmbujāḥ || 86 ||
[Analyze grammar]

ratnabhūṣaṇasaṃyuktā yāvakadravaśobhitāḥ |
maṇīndraśobhāsaṃmuṣṭasālaktakakaradvayāḥ || 87 ||
[Analyze grammar]

sadratnasāraracitakvaṇanmañjīrarañjitāḥ |
ratnakaṃkaṇakeyūracāruśaṃkhavibhūṣitāḥ || 88 ||
[Analyze grammar]

ratnāṃgulīyanikaravahniśuddhāṃśukojjvalāḥ |
cārucampakapuṣpāṇāṃ prabhāmuṣṭakalevarāḥ || 89 ||
[Analyze grammar]

sahasradalasaṃyuktakrīḍākamalaśobhitāḥ |
ratnadarpaṇasaṃyuktā navavadhūḥ svayaṃ hariḥ || 90 ||
[Analyze grammar]

rañjayan bahudhā nītvā yautakaṃ cātimūlyakam |
yayau prasthāpito yānairvaihāyasaiḥ paraṃ padam || 91 ||
[Analyze grammar]

tenaiva varṣmaṇā tāstu divyāḥ kṛṣṇaprasaṃgataḥ |
golokayogyāḥ sañjātā rādhālakṣmīsamāḥ priyāḥ || 92 ||
[Analyze grammar]

iti te kathitaṃ lakṣmi pātivratyaparāyaṇam |
kṛṣṇaprāptyātmakaṃ puṇyaṃ śravaṇādapi mokṣakṛt || 93 ||
[Analyze grammar]

paṭhanādasya tatpuṇyaṃ kṛṣṇasaubhāgyadaṃ bhavet |
anūḍho labhate kanyāratnaṃ śreṣṭhakulocitam || 94 ||
[Analyze grammar]

kanyā'pīmaṃ samākarṇya kṛṣṇabhaktisamanvitā |
śraddhayā satpatiṃ prāpya bhaviṣyati pativratā || 95 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne kalāvatīnartakyāḥ śaṃkaradvārā kṛṣṇapativratādharmeṇa tisṛbhiḥ sakhībhiḥ saha janmāntare gāndharvītvaṃ kṛṣṇena vivāhya ca golokaprāptimattvaṃ cetinirūpaṇanāmā'ṣṭaṣaṣṭyadhikacatuśśatatamo'dhyāyaḥ || 468 ||
[Analyze grammar]