Chapter 466

śrīnārāyaṇa uvāca |
śṛṇu lakṣmi dharmapatnyāḥ pātivratyaparāyaṇām |
kathāṃ kāśīpaṃcagaṃgātīrthakarīṃ supāvanīm || 1 ||
[Analyze grammar]

kāśyāṃ pañcanadaṃ tīrthamadhyāsa bhagavān svayam |
bhurbhuvaḥsvaḥpradeśeṣu tīrthaṃ pañcanadaṃ param || 2 ||
[Analyze grammar]

sthitaḥ kṛṣṇaḥ svayaṃ tatra tīrthe pañcanade pare |
purā vedaśirā nāma mahāsaṃyamatāpasaḥ || 3 ||
[Analyze grammar]

bhṛguvaṃśamunirāsīt tapasyānirataḥ sadā |
yuvānaṃ taṃ samālokya śucināmnyapsarovarā || 4 ||
[Analyze grammar]

cakame tena ṛṣiṇā skhalitaṃ sā papau śuciḥ |
śuciṃ vedaśirāḥ prāha dhārmikaṃ doṣavarjitam || 5 ||
[Analyze grammar]

śṛṇu sādhvi yauvanasya vikṛtiḥ sarvadehiṣu |
jāyate sā na doṣāya kāmavarjitadehinaḥ || 6 ||
[Analyze grammar]

svābhāvikaṃ nirmanastvaṃ dhātūnāṃ skhalanaṃ sati |
tapobhaṃgāya naivā'sti snānena śuddhiriṣyate || 7 ||
[Analyze grammar]

kintu te manasi tvasti bhāvanā bījalabdhaye |
tena dhātuḥ sravito me vinā maithunasaṃcarāt || 8 ||
[Analyze grammar]

tasmād dhāraya garbhe tva yaṃ tvaṃ pītavatī priye |
devapatnī yatheṣṭaṃ vai kartuṃ śaknoti sarvathā || 9 ||
[Analyze grammar]

amoghabījā munayo mama bījāttava priye |
kanyāratnaṃ vaiṣṇavāgryaṃ bhaviṣyati pativratam || 10 ||
[Analyze grammar]

ityuktā sā''śrame tasya tasthau prasavavāñchayā |
atha kālena divyastrīkanyāratnamajījanat || 11 ||
[Analyze grammar]

atīva bhāsuraṃ netrānandadaṃ rūpaśevadhim |
datvā putrīṃ yayau svargaṃ śucināmnyapsarovarā || 12 ||
[Analyze grammar]

tāṃ tu vedaśirā kanyāṃ snehena samavardhayat |
hariṇyāḥ svāśramasthāyāḥ stanyena payasā muniḥ || 13 ||
[Analyze grammar]

munirnāma dadau tasyā dhūtapāpeti sārthakam |
daśavarṣottarāṃ kanyāṃ dṛṣṭvā papraccha tāṃ muniḥ || 14 ||
[Analyze grammar]

kasmai dadyāṃ varāya tvāṃ tvamevāsyāhi ye śubhe |
śrutvā pituḥ śubhaṃ vākyaṃ provāca bhaktimānasā || 15 ||
[Analyze grammar]

sarvebhyo'tipavitro yo yaḥ sarveṣāṃ namaskṛtaḥ |
sarve yamabhilaṣyanti yasmāt sarvasukhodayaḥ || 16 ||
[Analyze grammar]

kadācidyo na naśyedvai yaḥ sadaivānuvartate |
ihāmutrāpi yo rakṣenmahāpadbhyaḥ svarūpavān || 17 ||
[Analyze grammar]

sarve manorathā yasmāt prapūrṇāḥ saṃbhavanti me |
dine dine'tisaubhāgyaṃ vardhate yasya sevayā || 18 ||
[Analyze grammar]

nairantaryeṇa yatpārśve bhaya kasyāpi naiva me |
yannāmagrahaṇāccāpi bādhā līyanta utkaṭāḥ || 19 ||
[Analyze grammar]

yadādhāreṇa tiṣṭhanti brahmāṇḍānyapi sṛṣṭiṣu |
evamādyā guṇā yatra tasmai māṃ dehi śarmaṇe || 20 ||
[Analyze grammar]

etacchrutvā muniścātiprasanno mudamāpa ha |
dhanyo'smi yadgṛhe putrī dhārmikī kulatāriṇī || 21 ||
[Analyze grammar]

dhūtapāpā sārthanāmnī dhanyeyaṃ jñānaśevadhiḥ |
anayā varṇitaḥ ko'tra bhavedvai sadguṇodayaḥ || 22 ||
[Analyze grammar]

varaṃ taṃ dharmadevākhyaṃ manye tasmai dadāmi tām |
paraṃ sa sukhalabhyo na sarvasadguṇamaṇḍanaḥ || 23 ||
[Analyze grammar]

tapaḥpaṇena sa krayyo bahupuṇyena vā kvacit |
vicāryetthaṃ sutāṃ prāha kanye varo'sti tādṛśaḥ || 24 ||
[Analyze grammar]

nārthabhāraiḥ sa sulabho na kaulīnyena kanyake |
na caiśvaryabalenāpi na buddhyā na parākramaiḥ || 25 ||
[Analyze grammar]

manaḥśuddhyendriyaśuddhyā tapasā damanena ca |
labhyate sa mahāprājño nānyathā sadṛśaḥ patiḥ || 26 ||
[Analyze grammar]

itipitṛvacaḥ śrutvā pitaraṃ praṇipatya ca |
anujñāṃ tu piturlabdhvā tepe tapaḥ sudāruṇam || 27 ||
[Analyze grammar]

kaṭhoraṃ varṣma saṃsādhya varṣādhārāsu sā sthitā |
śilāsu himavāteṣu na cakampe manāgapi || 28 ||
[Analyze grammar]

pañcāgnīn paridhāyā'pi tapasyati tapovane |
jalābhilāṣiṇī bālā jalaṃ naivā'pibat tadā || 29 ||
[Analyze grammar]

apāstabhogasaṃparkā vāyvāhārā'bhavat satī |
kṛśā'titapasā kṣāmā didīpe tattanustarām || 30 ||
[Analyze grammar]

brahmā tvāgatya tāmāha prasanno'smi varaṃ vṛṇu |
dhūtapāpā namaskṛtyovāca śrīparameṣṭhinam || 31 ||
[Analyze grammar]

pitāmaha pavitrebhyaḥ kuru māmatipāvanīm |
tuṣṭo brahmā ca tāmāha saṃpavitrāṇi yāni vai || 32 ||
[Analyze grammar]

tebhyo'dhikaṃ supāvitryamedhimadvaradānataḥ |
tisraḥ koṭyo'rdhakoṭi ca santi tīrthāni kanyake || 33 ||
[Analyze grammar]

aṣṭaṣaṣṭipradhānāni śreṣṭhāni teṣu santi ca |
tāni sarvāṇi tīrthāni tvattanau pratiloma vai || 34 ||
[Analyze grammar]

vasantu mama vākyena bhava sarvātipāvanī |
kalpāntare tu mūrtistvaṃ bhaviṣyasi na saṃśayaḥ || 356 ||
[Analyze grammar]

dharmadevapriyā patnī harermātā tu dakṣajā |
ityuktvā'ntardadhe brahmā yayau sāpi piturgṛham || 36 ||
[Analyze grammar]

jñātvā vedaśirā sarvaṃ tutoṣa tapasā muhuḥ |
sāpi nityaṃ dharmamūrtiṃ saṃvidhāya caturbhujām || 37 ||
[Analyze grammar]

ṣoḍaśavastubhirdivyāṃ prātarnityamapūjayat |
pātivratyena dharmeṇa sarvaṃ vṛṣāya cārpayat || 38 ||
[Analyze grammar]

svapne dharmaṃ dhūtapāpā dadarśa nityameva sā |
kadācid dharmadevaḥ saḥ sākṣādāgatya taṃ munim || 39 ||
[Analyze grammar]

yayāce kanyakāṃ yogyāṃ munistasmai dadau tataḥ |
kanyā candrasamā kāntimatī dharmaṃ prasevate || 40 ||
[Analyze grammar]

atha tatra mahākṣetre dhūtapāpā mahāsatī |
adṛśyena svarūpeṇa dharmagṛhe virājate || 41 ||
[Analyze grammar]

dvitīyena svarūpeṇa candrakāntamaṇiḥ svayam |
bhūtvā jale tu gaṃgāyā rājate sā tapasvinī || 42 ||
[Analyze grammar]

dharmadevo'pi tu dharmanado bhūtvā jalāntare |
candrakāntaśilāyukto rājate vai divāniśam || 43 ||
[Analyze grammar]

dharmasya mandire divyasvarūpeṇāpi rājate |
evaṃ kāśyāṃ tu gaṃgāyāṃ dharmo dharmanado'bhavat || 44 ||
[Analyze grammar]

dhūtapāpā'bhavat svalpā nadī cāpi nadānvitā |
atha sūryaḥ samāgatya tapa ugraṃ cacāra ha || 45 ||
[Analyze grammar]

kiraṇebhyaḥ pravavṛte mahāsvedajasantatiḥ |
tataḥ sā kiraṇā nāma nadī jātā'tipāvanī || 46 ||
[Analyze grammar]

atha tatra samāyātā sarasvatī mahāsatī |
yamunā gaṃgayā yuktā tatra tiṣṭhati pāvanī || 47 ||
[Analyze grammar]

kiraṇā dhūtapāpā ca yamī gaṃgā sarasvatī |
pañcanadyo mahāsatyo nado dharmanadāhvayaḥ || 48 ||
[Analyze grammar]

militāḥ sarva evaitāstīrthaṃ pañcanadātmakam |
pañcagaṃgetināmnā vai prasiddhaṃ sarvathā'bhavat || 49 ||
[Analyze grammar]

tatra snātvā jalaṃ pītvā mucyate sarvabandhanāt |
datvā pañcanade dānaṃ kṛtvā vai pitṛtarpaṇam || 50 ||
[Analyze grammar]

bindumādhavamabhyarcya na bhūyo janmabhāg bhavet |
pañcakūrcena pītena yā tu śuddhirudāhṛtā || 51 ||
[Analyze grammar]

sā śuddhiḥ śraddhayā prāśya binduṃ pāñcanadāmbhasaḥ |
purā dharmanadaṃ nāma tataśca dhūtapāpakam || 52 ||
[Analyze grammar]

tato vai bindutīrthaṃ tat tataḥ pañcanadāhvayam |
gobhūtilahiraṇyā'śvavāso'nnasragvibhūṣaṇam || 53 ||
[Analyze grammar]

yatkiṃcid bindutīrthe'tra dattvā'kṣayamavāpnuyāt |
tatrā''gatya vahnibindustapastepe'tidāruṇam || 54 ||
[Analyze grammar]

kṛṣṇanārāyaṇaḥ sākṣādāgatyāha varaṃ vṛṇu |
agnibindurhariṃ prāha vasā'tra mama sannidhau || 55 ||
[Analyze grammar]

tathā'stviti hariḥ prāha nivāsaṃ cā'karonmudā |
bindumādhavasaṃjño'haṃ vasāmi tatra padmaje || 56 ||
[Analyze grammar]

dharmadevagṛhe putro bindumādhavasaṃjñakaḥ |
nityaṃ vasāmi divyo'haṃ dhūtapāpāsuputrakaḥ || 57 ||
[Analyze grammar]

dhūtapāpā jananī me pitā dharmo mama priye |
ahaṃ mādhavarūpaśca vasāmo bindutīrthake || 58 ||
[Analyze grammar]

vasusvarūpiṇī lakṣmīlakṣmīrnirvāṇasaṃjñikā |
dharmapārśve sthitā sā me hṛdi pañcanade'pyaham || 59 ||
[Analyze grammar]

vrataiḥ saṃśodhite dehe dharmo vasati nityaśaḥ |
kṛṣṇaścāpi dhūtapāpā śrīśca vasanti sarvathā || 60 ||
[Analyze grammar]

arthakāmau sanirvāṇau tatra vasataḥ sarvadā |
ādimādhavanāmā'haṃ tataścānantamādhavaḥ || 61 ||
[Analyze grammar]

śrīdamādhavasaṃjño'pi tato vai bindumādhavaḥ |
evaṃ nāmabhiḥ sarveśaḥ sthāsyāmyānandakānane || 62 ||
[Analyze grammar]

mama mātā dharmapatnī dhūtapāpā pativratā |
śrīdharmaṃ sevate nityaṃ pātivratyaparāyaṇā || 63 ||
[Analyze grammar]

pañcanade mahāpuṇye divye śrīdharmamandire |
narā nāryaśca tatkṣetre snātvā kṛtvā vṛṣārcanam || 64 ||
[Analyze grammar]

dhūtapāpārcanaṃ kṛtvā mādhavasya mamārcanam |
dharmapratijñāṃ kṛtvā ca cāturmāsyavratādikam || 65 ||
[Analyze grammar]

kṛtvā kārtikadānādi vratī mokṣamavāpnuyāt |
dharmapatnyastathā tatra vasanti dharmasevane || 66 ||
[Analyze grammar]

dvitīyena svarūpeṇa sarvā viśvasya mātaraḥ |
śraddhālakṣmīrdhṛtistuṣṭiḥ puṣṭirmedhā kriyā tathā || 67 ||
[Analyze grammar]

buddhirlajjā vapuḥ śāntiḥ siddhiḥ kīrtistrayodaśa |
tāśca sarvā dharmasevāṃ kurvantyeva saha sthitā || 68 ||
[Analyze grammar]

pātivratyaparāḥ sarvā yatra dharmastu tatra tāḥ |
dhūtapāpā viśeṣeṇa sevate śrīvṛṣaṃ patim || 69 ||
[Analyze grammar]

prātaḥ snātvā tu sā devī prātaḥ snāpayati vṛṣam |
vastrālaṃkārakastūrīcandanākṣatakuṃkumaiḥ || 70 ||
[Analyze grammar]

pūjayitvā tato devī nīrājayati taṃ patim |
pradakṣiṇāṃ stutiṃ kṛtvā natvā tatpādayoḥ satī || 71 ||
[Analyze grammar]

gaṃgājalena dharmasya prakṣālya caraṇāvubhau |
ācamanāmṛtaṃ śuddhaṃ pītvā datvā sumāñjalim || 72 ||
[Analyze grammar]

tato dharmāya ṣaṭpañcāṣanmiṣṭānnāni bhojane |
savyañjanāni rasyā''dyapeyayuktāni sā priyā || 73 ||
[Analyze grammar]

samarpayati tāmbūlaṃ karoti dehamardanam |
nṛtyaṃ karoti dharmāgre kīrtiṃ karoti śārṅgiṇaḥ || 74 ||
[Analyze grammar]

naranārāyaṇagāthāṃ karoti dharmadeśataḥ |
sapatnīnāṃ tataḥ sevāṃ śraddhādīnāṃ karoti sā || 75 ||
[Analyze grammar]

kṛṣṇanārāyaṇabhaktiṃ dharmājñayā karotyapi |
ekadā śrīdharmadevaścāturmāsyavrate sthitaḥ || 76 ||
[Analyze grammar]

lakṣmīnārāyaṇasaṃhitāyāḥ pārāyaṇaṃ śubham |
vācayāmāsa satataṃ tīrthe pañcanade gṛhe || 77 ||
[Analyze grammar]

ṛṣayo munayo devāḥ pitaro mānavāḥ striyaḥ |
caturdaśabhuvāṃ saṃsthāścāyātāstatra tūtsave || 78 ||
[Analyze grammar]

nadyo nadāśca tīrthāni kṣetrāṇi vividhānyapi |
sarveṣāṃ sunivāsādi dhūtapāpā cakāra ha || 79 ||
[Analyze grammar]

dhūtapāpā satī prāha yadyahaṃ dharmacāriṇī |
dharmapatnī dharmadhartrī dharmapativratārthinī || 80 ||
[Analyze grammar]

tadā divyaṃ sunagaraṃ paṃcāśatkrośavistṛtam |
brahmendraśaṃbhumukhyānāṃ sampado yāstu santi vai || 81 ||
[Analyze grammar]

tato'dhikāni me saudhe khādyapeyāni santi vai |
yānavāhanabhogyāni śayyāśṛṃgārakāṇi ca || 82 ||
[Analyze grammar]

pātrāṇi rasabhojyāni dṛśyāni vividhāni ca |
vahniśuddhāṃśukādīni santu matpatisadgṛhe || 83 ||
[Analyze grammar]

dadhikulyā ghṛtakulyā madhukulyāḥ sitādrayaḥ |
payaḥkulyāstathā dāsā dāsyaḥ santu ca lakṣaśaḥ || 84 ||
[Analyze grammar]

itisaṃkalpitaṃ smṛtvā dharmasya caraṇāmbujam |
tāvad divyā bahuvidhāḥ smṛddhayaḥ kṣaṇato'bhavan || 85 ||
[Analyze grammar]

svarṇaratnavibhūṣāśca hīrakādyā maṇivrajāḥ |
samudbhūtā dhūtapāpāsaṃkalpāt tannadāntike || 86 ||
[Analyze grammar]

sudharmāsadṛśī divyā sabhā jātā kṣaṇāt priye |
durgā sarasvatī lakṣmīḥ sāvitrī rādhikā dayā || 87 ||
[Analyze grammar]

jayā lalitā māṇikyā ramā padmā ca pārvatī |
prabhā haṃsā ca manasā maṃjulā śrīśca padminī || 88 ||
[Analyze grammar]

śāntiḥ śāntā hemalatā devī muktā ca mauktikā |
āsan vai sevikā dharmagṛhe tatra kathotsave || 89 ||
[Analyze grammar]

lakṣmīnārāyaṇasaṃhitākathāśravaṇakāriṇām |
svāgatādimahatkārye bhojyapeyasamarpikāḥ || 90 ||
[Analyze grammar]

kārtike ca prabodhanyāṃ kathānte pūjanaṃ param |
dharmadevasya taiḥ sarvaiḥ sarvābhiśca kṛtaṃ mahat || 91 ||
[Analyze grammar]

anantapuṇyadaṃ ratnasvarṇahīrakavastubhiḥ |
dharmo'pi dakṣiṇāḥ sarvā dadau tābhyo mudānvitaḥ || 92 ||
[Analyze grammar]

devebhyaḥ śrotṛvargebhyo viprebhyo'tidhanaṃ dadau |
tatra yajñe samāyātaḥ kṛṣṇanārāyaṇo hariḥ || 93 ||
[Analyze grammar]

kaṃbharā ca mahālakṣmīrgopālakṛṣṇa āgatau |
vimānena tadā sarvaiḥ pratyakṣe puruṣottame || 94 ||
[Analyze grammar]

puṣpavṛṣṭiḥ kṛtā divyā jayakāro'bhavanmuhuḥ |
pitṛbhyāṃ sahitaḥ kṛṣṇanārāyaṇo mahāmakhe || 95 ||
[Analyze grammar]

daśāṃśahavanaṃ cakre dharmājñayā'tibhāvataḥ |
yajñaṃ samāpya vidhivat kṛtvā'vabhṛthamantimam || 96 ||
[Analyze grammar]

dharmadevo dadau divyāṃ dakṣiṇāṃ ca dvijātaye |
kāśīrājo maithileśaḥ sāketeśaḥ kaliṃgarāṭ || 97 ||
[Analyze grammar]

saurāṣṭreśo marusvāmī sindhubhūpo nipālarāṭ |
kurukṣmeśaḥ śvetabhūpaḥ prāgjyotirbhūpa ārcayan || 98 ||
[Analyze grammar]

dharmadevaṃ bhūsurāṃśca sādhūn sādhvīḥ sahasraśaḥ |
svarṇahīrakarūpyāṇi dadurvastrāṇi dakṣiṇāḥ || 99 ||
[Analyze grammar]

vyasarjayat tataḥ sarvān bhojayitvā samarcya ca |
dharmadevaḥ parīhāraṃ ca svatejasā satī || 100 ||
[Analyze grammar]

dhūtapāpā jalaṃ haste gṛhyā'saṃkalpayan mudā |
vidyahaṃ dharmadevasya svāmino me pratuṣṭaye || 101 ||
[Analyze grammar]

sarvaṃ klṛptavatī tarhi patyurbhakterbalena me |
adṛśyaṃ bhavatu saudhādikaṃ smṛddhaṃ nade mayi || 102 ||
[Analyze grammar]

iti saṃkalpite tūrṇaṃ kṣaṇāt sarvaṃ tiro'bhavat |
jagmurāścaryamati vai devādyāḥ koṭiśo janāḥ || 103 ||
[Analyze grammar]

pātivratyapratāpaṃ taṃ jñātvā śaśaṃsurādarāt |
tāṃ satīṃ dhūtapāpāṃ vai devyaḥ śaśaṃsurīśvarīm || 104 ||
[Analyze grammar]

evaṃ pañcanadaṃ tīrthaṃ dharmadevāśramātmakam |
pāvanaṃ sarvadevānāṃ dhūtapāpāprabhāvataḥ || 105 ||
[Analyze grammar]

dhūtapāpāpativratabalaṃ te kathitaṃ priye |
paṭhanācchravaṇāccāsya muktirbhuktirbhavettathā || 106 ||
[Analyze grammar]

pātivratyātmako dharmo bhavedvai mokṣado dṛḍhaḥ |
sarvasampatpradaścāpi dharmabhaktipradastathā || 107 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vedaśirasaḥ ṛṣeḥ śucināmnyapsarasi jātāyā dhūtapāpākhyakanyāyā dharmadevapatiprāptyā mūrtidevītvaṃ pañcanade saṃhitākathāprasaṃge pātivratyabalena paṃcāśatkrośeṣu nagararacanā devādibhūpādimānavādīnāmāgamaḥ yajño'vabhṛthaṃ cetyādi nūtnanagarasmṛddhitirobhāvacamatkāraścetinirūpaṇanāmā ṣaṭṣaṣṭyadhikacatuśśatatamo'dhyāyaḥ || 466 ||
[Analyze grammar]