Chapter 459

śrīnārāyaṇa uvāca |
indralokātpare tvarciṣmatīnāmnī śubhā purī |
vītihotrasya nagarī svargottame'sti padmaje || 1 ||
[Analyze grammar]

jātavedasi yā bhaktāstā vasantyatra suvratāḥ |
agnipraveśaṃ yāḥ kuryurdṛḍhasattvā jitendriyāḥ || 2 ||
[Analyze grammar]

vahnisnānā narā nāryaḥ sarvāstā vahnibhāsurāḥ |
agnihotraratā viprāstathā'gnibrahmacāriṇaḥ || 3 ||
[Analyze grammar]

pañcāgnivratino bhaktā brāhmaṇāścāgnipūjakāḥ |
samididhmāgniṣṭikānāṃ dātāro vahnirūpiṇaḥ || 4 ||
[Analyze grammar]

yajñasya kāriṇo vahnerarciṣmatyāṃ vasanti vai |
dhūpapradīpanaivedyapayodadhighṛtaikṣavam || 5 ||
[Analyze grammar]

vahnibhuktaṃ niṣevante sarvavidhā divaukasaḥ |
viśvānarasya viprasya narmadātaṭavāsinaḥ || 6 ||
[Analyze grammar]

narmapurādhidevasya brahmayajñaratasya ca |
brahmatejasaḥ śāṇḍilyagotrasyā'bhūt sucintanam || 7 ||
[Analyze grammar]

caturṇṇāmapyāśrayāṇāṃ ko'tīva śreyase satām |
iti vicārya gārhasthyaṃ viśvānaraḥ śaśaṃsa ha || 8 ||
[Analyze grammar]

sarvādhāro gṛhastho vai dehibhirupajīvyate |
paradāraparityāgāt svadāraparituṣṭitaḥ || 9 ||
[Analyze grammar]

ṛtukālābhigāmitvād brahmacārī gṛhī sadā |
evaṃ niścitya sa viśvānaro vipraḥ pativratām || 10 ||
[Analyze grammar]

uduvāhavidhānena svocitāṃ kulakanyakām |
agniśuśrūṣaṇarataḥ pañcayajñaparāyaṇaḥ || 11 ||
[Analyze grammar]

devapitratithyanāthagavādiparipūjakaḥ |
evaṃ vai vartamānasya kālo bahutitho gataḥ || 12 ||
[Analyze grammar]

bhāryā śuciṣmatī nāma suvratā svāmisevikā |
apaśyantyaṃkuramapi santateḥ svargasādhanam || 13 ||
[Analyze grammar]

patiṃ kṛṣṇaṃ patiṃ viṣṇuṃ matvovāca pativratā |
bhagavan durlabhaṃ nāsti kiñcittava dayālavāt || 14 ||
[Analyze grammar]

maheśasadṛśaṃ putraṃ dehi vaṃśavivardhanam |
śrutvā provāca tāṃ patnīmekapatnīvrate sthitaḥ || 15 ||
[Analyze grammar]

tathāstviti tato vipro jagāma tapase drutam |
prāpya vārāṇasīṃ snātvā gaṃgāyāṃ vīkṣya śaṃkaram || 16 ||
[Analyze grammar]

yatra niścalatāmeti tapastanayakāmyayā |
tatra vīreśvarabhūmau gatvā jagrāha sadvratam || 17 ||
[Analyze grammar]

ekāhāro'bhavanmāsaṃ māsaṃ naktāśano'bhavat |
ayācitā'śano māsaṃ māsaṃ tyaktāśanastathā || 18 ||
[Analyze grammar]

payovrato'bhavanmāsaṃ māsaṃ śākaphalāśanaḥ |
māsaṃ muṣṭitilāhāro māsaṃ pānīyabhojanaḥ || 19 ||
[Analyze grammar]

pañcagavyāśano māsaṃ māsaṃ cāndrāyaṇavratī |
māsaṃ kuśāgrajalabhuk māsaṃ śvasanabhakṣaṇaḥ || 20 ||
[Analyze grammar]

atha trayodaśe māse snātvā gaṃgājale dvijaḥ |
pratyūṣa eva vīreśaṃ yāvadāyāti bhūsuraḥ || 21 ||
[Analyze grammar]

tāvalliṃgāntare bālaṃ dadarśā'ṣṭasamaṃ śubham |
piṃgajaṭaṃ dīrghanetraṃ śvetaṃ vibhūtibhūṣitam || 22 ||
[Analyze grammar]

tamālokya stutiṃ cakre viśvānaro'timodavān |
ekamevā'dvitīyaṃ yat paraṃbrahma parātparam || 23 ||
[Analyze grammar]

kṛṣṇanārāyaṇasaṃjñaṃ śivadaṃ śiva te namaḥ |
kartṛ poṣṭṛ ca saṃhartṛ tejo vividhatāṃ gatam || 24 ||
[Analyze grammar]

yanmūrterekabhāgasthamaiśvaryaṃ jvalanādikam |
saurabhyādi yato bhūmau tasmai bālāya te namaḥ || 25 ||
[Analyze grammar]

yad gṛhītṛ gantṛ draṣṭṛ dhātṛ niyantṛ cāntaram |
sarvakāmapradātṛ tat tasmai bālāya te namaḥ || 26 ||
[Analyze grammar]

stutveti pādayostasya viśvānaraḥ papāta ha |
bālo varaṃ vṛṇīhīti provāca hasitānanaḥ || 27 ||
[Analyze grammar]

viśvānaraḥ pratyuvāca bhavān sarvaprado yataḥ |
putraṃ dehi tvādṛśaṃ te praṇato'smi punaḥ punaḥ || 28 ||
[Analyze grammar]

bālaḥ prāha tathāstvityacireṇa te manorathaḥ |
śuciṣmatyāmahaṃ putro bhaviṣyāmi phaliṣyati || 29 ||
[Analyze grammar]

khyāto gṛhapatirnāmnā śuciḥ sarvāmarapriyaḥ |
tava putro bhaviṣyāmītyuktvā cāntaradhīyata || 30 ||
[Analyze grammar]

viśvānarastatastūrṇamājagāma nijaṃ gṛham |
śuciṣmatyai jagādaitat svalpakālena bhāminī || 31 ||
[Analyze grammar]

garbhaṃ dadhāra suṣuve kālena putrameva sā |
garbhādhānādayaḥ sarve saṃskārā guruṇā kṛtāḥ || 32 ||
[Analyze grammar]

putrajanmani devādyā vavṛṣuḥ kusumādikān |
devadundubhayo neduḥ protsavo hyabhavanmahān || 33 ||
[Analyze grammar]

apsarasāṃ sunṛtyāni tvabhavan vipramandire |
vidyādharyaśca kinnaryastathā'maryaḥ sahasraśaḥ || 34 ||
[Analyze grammar]

gandharvoragavṛkṣāṇāṃ suvāsinyaśca kanyakāḥ |
maṇiratnopadā nītvā saśṛṃgārasuśobhanāḥ || 35 ||
[Analyze grammar]

savādyā maṃgalavastusahitāścandrasatprabhāḥ |
gāyanto lalitaṃ gītaṃ jagmurviśvānaragṛham || 36 ||
[Analyze grammar]

marīcādyāḥ ṛṣayaśca śataśo'pi tu tadgṛham |
lokapālā munayaśca samājagmuḥ sahasraśaḥ || 37 ||
[Analyze grammar]

viṣṇvādyāśca surāḥ sarve nāgāśca mānavādayaḥ |
tīrthakṣetrāṇi sarvāṇi cājagmuḥ pitarastathā || 38 ||
[Analyze grammar]

sthāvarā jaṃgamaṃ rūpaṃ dhṛtvā''yātāḥ sahasraśaḥ |
jātakarma svayaṃ cakre tasya devaḥ pitāmahaḥ || 39 ||
[Analyze grammar]

śrutiṃ vicārya tadrūpāṃ nāmnā gṛhapatistvayam |
iti nāma dadau tasmai deyamekādaśe'hani || 40 ||
[Analyze grammar]

gṛhapatirgārhapatyaḥ prajāyā vasuvittamaḥ |
agne gṛhapate āyacchasvā'nnaṃ me yaśo balam || 41 ||
[Analyze grammar]

ajo nāma itikṛtvā stutvā satyaṃ yayau tataḥ |
devādyāstu yayuḥ sarve śaṃsantaḥ putramujvalam || 42 ||
[Analyze grammar]

ataḥ putraṃ samīhante gṛhasthāśramavāsinaḥ |
putreṇa lokān jayati bhaktenāpi viśeṣataḥ || 43 ||
[Analyze grammar]

aputrasya gṛhaṃ śūnyamaputrasyā'rjanaṃ vṛthā |
aputrasyā'nvayaśchinno nā'pavitraṃ hyaputrataḥ || 44 ||
[Analyze grammar]

na putrātparamo lābho na putrātparamaṃ sukham |
na putrātparamaṃ mitraṃ paratreha ca kutracit || 45 ||
[Analyze grammar]

aurasaḥ kṣetrajaḥ krīto dattaḥ prāptaḥ sutāsutaḥ |
āpatsu rakṣitaḥ śiṣyaḥ putrāste tvaṣṭadhā matāḥ || 46 ||
[Analyze grammar]

viśvānaraḥ sutaṃ tvadhyāpayāmāsa yathocitam |
navame vatsare vaiśvānaraṃ jagāma nāradaḥ || 87 ||
[Analyze grammar]

papraccha kuśalaṃ sarvaṃ putrasya munirāḍ yathā |
viśvānara mahābhāga śuciṣmati śubhavrate || 48 ||
[Analyze grammar]

kurute yuvayorvākyaṃ kaccid gṛhapatiḥ śiśuḥ |
nānyattīrthaṃ na vā devo na gururna ca satkriyā || 49 ||
[Analyze grammar]

vihāya pitrorvacanaṃ nānyo dharmaḥ sutasya vai |
garbhadhāraṇapoṣābhyāṃ mātā piturgarīyasī || 50 ||
[Analyze grammar]

pitā vandyo yatirvandyaḥ sanyāsī vandya ityapi |
taiḥ sarvaistu gururvandyasteṣāṃ vandyāḥ prasūḥ sadā || 51 ||
[Analyze grammar]

idameva tapo'tyugramidameva paraṃ vratam |
ayameva paro dharmo yat pitroḥ paritoṣaṇam || 52 ||
[Analyze grammar]

pitṛvratamidaṃ proktaṃ kṛṣṇamiva prasevayet |
mātṛvratamidaṃ proktaṃ lakṣmīmiva prasevayet || 53 ||
[Analyze grammar]

vaiśvānara samabhyehi mamotsaṃge niṣīda bho |
lakṣaṇāni parīkṣe'haṃ pāṇiṃ darśaya dakṣiṇam || 54 ||
[Analyze grammar]

ityuktaḥ sa gṛhapatirnāradāṃ'ke hyupāviśat |
munirdṛṣṭvā bālakasya tālujihvādvijānatha || 55 ||
[Analyze grammar]

ānīya kuṃkumā''raktaṃ sūtraṃ ca triguṇīkṛtam |
mamau samastakād bālamāpādatalamucchrayam || 56 ||
[Analyze grammar]

tiryagūrdhvaṃ samo māne yo'ṣṭottaraśatāṃgulaḥ |
sa bhavet pṛthivīpālo yathā'yaṃ bālako'pi ca || 57 ||
[Analyze grammar]

pañcasūkṣmaḥ pañcadīrghaḥ saptaraktaḥ ṣaḍunnataḥ |
tripṛthu laghugambhīro dvātriṃśallakṣaṇo'styayam || 58 ||
[Analyze grammar]

tvakkeśāṃgulidaśanaparvāṇyaṇūni pañca ca |
santyasya khalu sūkṣmāṇi dikpālapadabhāg bhavet || 59 ||
[Analyze grammar]

bhujau netre hanurjānū nāsā dīrghāṇi cāsya vai |
tenāyaṃ tu bhaved dīrghāyuṣko brahmāṇḍasañcaraḥ || 60 ||
[Analyze grammar]

pāṇyo stale ca netrānte tālujihvā'dharauṣṭhakam |
saptā'ruṇaṃ ca sanakhamasya rājyasukhapradam || 61 ||
[Analyze grammar]

vakṣaḥkukṣyalakaṃ skandhaṃ karaṃ vaktraṃ ṣaḍunnatam |
dṛśyate'sya bhaveccāyaṃ mahadaiśvaryabhāk khalu || 62 ||
[Analyze grammar]

lalāṭakaṭivakṣobhiḥ pṛthurayaṃ bhavennṛpaḥ |
grīvājaṃghāmehanaiśca hrasvo'yaṃ bahubhogavān || 63 ||
[Analyze grammar]

svareṇa hṛdā nābhyā ca gambhīraḥ sukhabhāk sadā |
kamaṭhīpṛṣṭhakaṭhinau patravatkomalau karau || 64 ||
[Analyze grammar]

rājyahetūśiśorasya pādau padmasukomalau |
acchinnā tarjanīṃ vyāpya tathā rekhā'sya vartate || 65 ||
[Analyze grammar]

kaniṣṭhāpṛṣṭhaniryātā dīrghāyuṣyaṃ nivedayet |
pādau sumāṃsalau raktau samau sūkṣmau suśobhanau || 66 ||
[Analyze grammar]

samagulphau svedahīnau snigdhāvaiśvaryasūcakau |
svalpābhiḥ kararekhābhirāraktābhiḥ sadā sukhī || 67 ||
[Analyze grammar]

liṃgena kṛśahastena rājarājo bhaviṣyati |
utkaṭāsanagulphasphignābhirasyāpi vartulā || 68 ||
[Analyze grammar]

dakṣiṇāvarttamaruṇaṃ mahadaiśvaryasūcikā |
dhāraikā mūtrayatyasmin dakṣiṇāvartinīti sā || 69 ||
[Analyze grammar]

gandhaśca mīnamadhunorguptavīrye'sya vartate |
vistīrṇau māṃsalau snigdhau sphicāvasya sukhocitau || 70 ||
[Analyze grammar]

vāmāvartau supralambau doṣau digrakṣaṇocitau |
śrīvatsavajracakrā'bjamatsyakodaṇḍadaṇḍabhṛt || 71 ||
[Analyze grammar]

tathā'sya karagā rekhā yathā syāt tridivaspatiḥ |
dvātriṃśaddaśanaścāyaṃ karakambuśirodharaḥ || 71 ||
[Analyze grammar]

krauṃcadundubhihaṃsā'bhrasvaraḥ sarveśvarā'dhikaḥ |
madhupiṃgalanetro'sau nainaṃ śrīstyajati kvacit || 72 ||
[Analyze grammar]

pañcarekhalalāṭastu tathā siṃhodaraḥ śubhaḥ |
ūrdhvarekhāṃkitapado niḥśvasanpadmagandhavān || 74 ||
[Analyze grammar]

acchidrapāṇiḥ sunakho mahālakṣaṇavānayam |
tathāpi dvādaśe varṣe pratyūho vidyudagnitaḥ || 75 ||
[Analyze grammar]

asya viśaṃke bhagavan rakṣaṇīyaḥ prayatnataḥ |
ityuktvā'rcāṃ gṛhītvaiva nārado nirjagāma ha || 76 ||
[Analyze grammar]

dampatī kṣaṇamātraṃ tu śuśucaturmumudatuḥ |
atha bālaścirāyuṣko bhavitu pitarau tadā || 77 ||
[Analyze grammar]

prāha pratijñāṃ śṛṇutaṃ yadi vāṃ tanayo hyaham |
kariṣye'haṃ tapastādṛk vidyunmattastrasiṣyati || 78 ||
[Analyze grammar]

mṛtyuñjayaṃ kālakālaṃ samārādhayituṃ sutaḥ |
pitroranurajñāṃ samprāpya yayau sa kāśikāṃ purīm || 79 ||
[Analyze grammar]

sasnau gaṃgājale śaṃbhuṃ dadarśa cānnapūrṇikām |
matsyodaryāṃ kṣitau gatvā tasthau kṣaṇaṃ tataḥ param || 80 ||
[Analyze grammar]

nirvighne tu sthale sthāpya ligaṃ cakre tapaḥ sutaḥ |
saṃsnāpya pratyahaṃ śaṃbhuṃ datvā nīlotpalāni vai || 81 ||
[Analyze grammar]

japati sma namaḥ kṛṣṇanārāyaṇaśivāya te |
tapaścacāra ṣaṇmāsaṃ kandamūlaphalāśanaḥ || 82 ||
[Analyze grammar]

śīrṇaparṇāśanastadvat ṣaṇmāsāṃstapa ācarat |
ṣaṇmāsaṃ vāyubhakṣo'bhūt ṣaṇmāsaṃ jalabindubhuk || 83 ||
[Analyze grammar]

evaṃ varṣadvaye yāte janmato dvādaśe gate |
vighnaṃ satyaṃ kariṣyan vai cābhyagāt kuliśāyudhaḥ || 84 ||
[Analyze grammar]

varaṃ brūhīti taṃ prāha sutaḥ śrutvā''ha vāsavam |
nāhaṃ vṛṇe varaṃ tvattaḥ śaṃkaro varado'sti me || 85 ||
[Analyze grammar]

gacchā''halyāpate'sādho śratvā kruddhaḥ svavajrakam |
cikṣepa yāvacchaṃbhustajjagrāha līlayā kare || 86 ||
[Analyze grammar]

pratyakṣaḥ śaṃkaro jāto mahendraśca yayau divam |
śaṃbhustaṃ tu dadau ciraṃjīveti varamuttamam || 87 ||
[Analyze grammar]

sarveṣāmeva devānāṃ mukhaṃ bhavā'gnirūpakaḥ |
jāṭharo bhava bhūtānāṃ digīśo rājyamāpnuhi || 88 ||
[Analyze grammar]

malliṃgaṃ tvatsthāpitaṃ tad bhavatvagnīśvarābhidham |
ityuktvā prayayau śaṃbhurdatvā mantraṃ ca vaiṣṇavam || 89 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
vaiśvānaro yayau svasya gṛhaṃ mātā pativratā || 90 ||
[Analyze grammar]

arciṣmatī sutaṃ dṛṣṭvā mumude janako'pi ca |
utsavaṃ tu mudā cakre samāhūya surādikān || 91 ||
[Analyze grammar]

indraṃ tatra samāyātaṃ dṛṣṭvā cukrodha vahnirāṭ |
punarvajraṃ pracikṣepa vaiśvānaroparīndrakaḥ || 92 ||
[Analyze grammar]

mūrchāṃ jagāma bālastanmātā svāṃke nidhāya tam |
pātivratyaṃ bhavenme cedindraḥ patatu bhūtale || 93 ||
[Analyze grammar]

pativratā dṛḍhā syāṃ cedindravajraṃ nirarthakam |
sarvathā sarvathā cāstu putro me cetano bhavet || 94 ||
[Analyze grammar]

evamukte tayā vajraṃ kṛṣṇakardamatāṃ gatam |
indraḥ patito dharaṇau bubudhe tvaṃkajaḥ sutaḥ || 95 ||
[Analyze grammar]

hāhākāro mahān jātaḥ pātivratyabalena vai |
mahendraprārthitā devī kṣamārthaṃ karuṇāparā || 96 ||
[Analyze grammar]

uvāca taṃ mahendraṃ sā samuttiṣṭha sthiro bhava |
gṛhāṇa vajraṃ mā vahnau kadācit tvaṃ niyojaya || 97 ||
[Analyze grammar]

mātṛpitṛgurukṛṣṇadrohiṣu satīdrohiṣu |
vajraṃ te preritaṃ vidyudrūpaṃ bhavatu madvarāt || 98 ||
[Analyze grammar]

kṛṣṇabhakteṣu pitrośca gurorbhakteṣu tāpase |
satībhakteṣu te vajraṃ kardamatvamavāpnuhi || 99 ||
[Analyze grammar]

ityuktaḥ sa satīṃ natvā natvā vaiśvānaraṃ tathā |
viśvānaraṃ punarnatvā yayau svargaṃ surā yayuḥ || 100 ||
[Analyze grammar]

arciṣmatyāḥ prabhāveṇa pātivratyavṛṣasya ca |
āsannamaraṇaścāpi rakṣitaḥ śaṃbhvanugrahāt || 101 ||
[Analyze grammar]

yāvadbrahmā bhavettāvad vaiśvānaro bhaviṣyati |
iti te kathitaṃ lakṣmi vṛttaṃ bhuktisumuktidam || 102 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne viśvānaraviprasya putrasya gṛhapatyākhyasyatapasā cirajīvitvaṃ mātuḥ pātivratyabalenendrakṛtavajradvārakamṛtyuvighnavināśaścetyādinirūpaṇanāmaikonaṣaṣṭyadhikacatuśśatatamo'dhyāyaḥ || 459 ||
[Analyze grammar]