Chapter 452

śrīnārāyaṇa uvāca |
śṛṇu lakṣmi camatkāraṃ pātivratyasya vai punaḥ |
patirdevo gururdevaḥ śivo devastrayo yayā || 1 ||
[Analyze grammar]

pūjitāḥ sevitā nityaṃ vanditāḥ kṛṣṇakāntayā |
tasyā mṛṣāpi satyaṃ syād viparītaṃ ca satphalam || 2 ||
[Analyze grammar]

duḥkhaṃ cāpi bhavet saukhyaṃ vandhyātvaṃ ca sāpatyakam |
vaidhavyaṃ sadhavātvaṃ durbhāgyaṃ śreṣṭhabhāgyakam || 3 ||
[Analyze grammar]

adaivaṃ cāpi saubhāgyaṃ viruddhaṃ sānukūlakam |
vipat samyatsvarūpā syāt tuṣṭe patyau gurau śive || 4 ||
[Analyze grammar]

ānartaviṣaye kaścinnāmnā vedaratho dvijaḥ |
camatkārapure tvāsīt sutadārakuṭumbavān || 5 ||
[Analyze grammar]

tasya kanyā śāradākhyā kamaleva satī sadā |
janmataḥ śrīkṛṣṇanārāyaṇāya svāmine namaḥ || 6 ||
[Analyze grammar]

iti prāgbhavasaṃskārāt sadā vadati vai sphuṭam |
śrutvā janā mahāścaryaṃ prāptā vavandire satīm || 7 ||
[Analyze grammar]

kṛṣṇaṃ śivaṃ hāṭakeśaṃ guruṃ ca pitarau satī |
nitya prātarnamaskṛtya tato'nyat prākarot sadā || 8 ||
[Analyze grammar]

evaṃ sā bhajanānandā'bhavad dvādaśahāyanā |
tāṃ yayāce padmanābho brāhmaṇo nṛpamānitaḥ || 9 ||
[Analyze grammar]

mahādhanasya śāntasya tāṃ kanyāṃ pradadau pitā |
kṛtodvāho dvijaḥ sāyaṃ sandhyāṃ kartuṃ yayau nadīm || 10 ||
[Analyze grammar]

mārge daṣṭo bhujaṃgena sa mamāra dvijastataḥ |
cukruśurbāndhavā kṛtvā śvaśurāvasya kāminī || 11 ||
[Analyze grammar]

kṛtaṃ tu bāndhavairaurdhvadaihikaṃ śāradā tataḥ |
brāhmaṇī prāptavaidhavyā piturevā''laye sthitā || 12 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
vadatyeva sadā bālā namaḥ kṛṣṇāya cā'japat || 13 ||
[Analyze grammar]

kṛṣṇa eva patirnānyo jñātvā'rcayāte mādhavam |
pitarau sevate nityaṃ śivāśivasvarūpiṇau || 14 ||
[Analyze grammar]

lakṣmīṃ nārāyaṇaṃ nāryāṃ nare paśyati yoginī |
śivaḥ svāmī patiḥ kṛṣṇo gururdevaḥ pitā hariḥ || 15 ||
[Analyze grammar]

mātā lakṣmīḥ sakhī devī kuṭumbaṃ sādhumaṇḍalam |
bhaktiḥ śayyā ratiḥ kṛṣṇe dhyānaṃ mūrtau śivā sukham || 16 ||
[Analyze grammar]

bhāgyaṃ dharmaḥ kṛtiḥ sevā viśrāntirbhagavatsmṛtau |
yasyā bhāgavatī sarvā kriyā divyā satīmayī || 17 ||
[Analyze grammar]

vaidhavye'pyabhavatpūrvārjitapuṇyabalācchubhā |
kṛṣṇaḥ kānto dhavo yasyāḥ sevā satāṃ ca mātṛkā || 18 ||
[Analyze grammar]

tatra saubhāgyamevā'sti vaidhavyaṃ parivartate |
evaṃ vai vartamānāyāstasyāḥ pituśca mandire || 19 ||
[Analyze grammar]

ekadā naidhruvo nāma sādhurvṛddhaḥ samāgataḥ |
andhaḥ śiṣyakaragrāhī bhikṣāṃ dehīti cā'vadat || 20 ||
[Analyze grammar]

sādhuṃ dṛṣṭvā yathā viṣṇuṃ dadau sā''sanamuttamam |
svāgataṃ te mahāpūjya pīṭhe'sminnu hyupāviśa || 21 ||
[Analyze grammar]

ityuktvā bhaktimāsthāya kṛtvā pādāvanejanam |
vījayitvā jalaṃ datvā'pūjayat puṣpacandanaiḥ || 22 ||
[Analyze grammar]

śreṣṭhamiṣṭavarānnaiśca bhojayāmāsa sādaram |
tṛptastvandhamunistasyai suprītaḥ paramāśiṣam || 23 ||
[Analyze grammar]

vihṛtya bhartrā sukhinī labdhvā sutaṃ guṇādhikam |
kīrtiṃ ca mahatīṃ prāpya bhava devakṛpāvatī || 2 ||
[Analyze grammar]

sādhūktaṃ sā samākarṇya vismitā pratyuvāca tam |
sādho tvadvacanaṃ satyaṃ mandāyā me katham ṛtam || 25 ||
[Analyze grammar]

śilāgryāmiva sadvṛṣṭiḥ śunakyāmiva satkriyā |
viphalā vidhavāyāṃ vai śubhāśīḥ sādhudā'pi tu || 26 ||
[Analyze grammar]

ahaṃ vidhavā jātā'smi tvadāśīḥpātratā katham |
sādhuḥ prāha ca tāṃ devīṃ mayoktaṃ saphalaṃ bhavet || 27 ||
[Analyze grammar]

sādhūnāṃ vacane kṛṣṇaḥ svayameva virājate |
śaṃbhurdevāḥ sahāyāśca bhavanti vacane satām || 28 ||
[Analyze grammar]

balāllakṣmyā ca śivayā prerito'haṃ samāgataḥ |
tava bhaktyā sati putri saubhāgyaṃ te bhaviṣyati || 29 ||
[Analyze grammar]

nahi bhaktimatī bālā duḥkhinī syāditi prabhuḥ |
viṣṇuścāhaṃ sādhurūpastvadarthaṃ vai samāgataḥ || 30 ||
[Analyze grammar]

bhaja kṛṣṇaṃ śivaṃ lakṣmīṃ śivāṃ ca pitarau sadā |
kuru tvekavrataṃ putri hyumāmāheśvarābhidham || 31 ||
[Analyze grammar]

yathoktaṃ tu mayā sarvaṃ saubhāgyaṃ te bhaviṣyati |
vaidhavyaṃ mama bhaktāyāḥ kathaṃ sahe suputrike || 12 ||
[Analyze grammar]

āgaccha tava pitarau kathayāmi yathātatham |
ityuktvā sādhuviṣṇustāmānayat pitṛsannidhau || 33 ||
[Analyze grammar]

dattāśīrvādavṛttāntaṃ saubhāgyaṃ ca vrataṃ hariḥ |
jagāda bhāvi yatsarvaṃ tataścāntaradhīyata || 34 ||
[Analyze grammar]

śṛṇu lakṣmi vrataṃ comāmāheśvaraṃ subhāgyadam |
mayā tadā śāradāyai kathitaṃ cākarot tu sā || 35 ||
[Analyze grammar]

caitre vā mārgaśīrṣe vā śuklapakṣe śubhe dine |
aṣṭamyāṃ vā caturdaśyāmubhayoḥ parvaṇorapi || 36 ||
[Analyze grammar]

gurvājñayā vratāraṃbhaṃ prakurvīta satī śubhā |
saṃkalpaṃ vidhivat kṛtvā prātaḥ snānaṃ samācaret || 37 ||
[Analyze grammar]

santarpya pitṛdevādīn maṇḍapaṃ racayecchubham |
tanmadhye paṃcaraṃgānāṃ cūrṇaiḥ padmaṃ samullikhet || 38 ||
[Analyze grammar]

caturdaśadalairbāhyairdvāviṃśadbhistadantare |
tadantare ṣoḍaśabhiraṣṭabhiśca tadantare || 39 ||
[Analyze grammar]

caturasraṃ tataḥ kuryādantarvartulamityapi |
madhye kūrcaṃ tatparito vrīhitaṇḍularāśikama || 40 ||
[Analyze grammar]

kṛtvā kūrce vāripūrṇaṃ kalaśaṃ sthāpayettataḥ |
vastraṃ citraṃ kalaśe ca tatra vinyasya vai śivam || 41 ||
[Analyze grammar]

śivāṃ ca sthāpayed dravyaiḥ ṣoḍaśabhiḥ prapūjayet |
paṃcāmṛtaiḥ snāpayecca jalena snāpayettataḥ || 42 ||
[Analyze grammar]

rudraṃ tvekādaśavāraṃ samuccārya śatāṣṭakam |
śivāya nama ityuktvā pīṭhe mūrtiṃ samarcayet || 43 ||
[Analyze grammar]

prāṇāyāmān yathāśakti kṛtvā saṃkalpayet tataḥ |
pūrvajanmīyapāpānāṃ nāśārthaṃ tvāṃ samarthaye || 44 ||
[Analyze grammar]

saubhāgyavijayā''rogyadharmaiśvaryābhivṛddhaye |
putrasampatsvargamokṣasiddhyarthaṃ vāṃ prapūjaye || 45 ||
[Analyze grammar]

aṃganyāsāṃstataḥ kṛtvā dhyāyedīśaṃ ca pārvatīm |
yoginaṃ śaṃkaraṃ dhyāye satīṃ dhyāye pativratām || 46 ||
[Analyze grammar]

sajaṭaṃ ca sakeśāṃ ca tryambakaṃ tryambikāṃ tathā |
sasarpabhūṣaṇaṃ kāntaṃ svarṇabhūṣānvitāṃ satīm || 47 ||
[Analyze grammar]

nīlakaṇṭhaṃ miṣṭakaṇṭhāṃ dvibhujaṃ dordaśā'ṣṭakām |
dhyānamagnaṃ tvaṃkamagnāṃ śvetaṃ raktāṃ vicintaye || 48 ||
[Analyze grammar]

iti dhyātvā pratimāyāmāvāhanādi cārabhet |
āvāhanaṃ tathā'rghyaṃ ca gandhaṃ puṣpāṇi cākṣatān || 49 ||
[Analyze grammar]

dhūpaṃ dīpaṃ ca naivedyaṃ jalaṃ tāmbūlakaṃ dadet |
śivāya namo mantreṇa juhuyādaṣṭakaṃ śatam || 50 ||
[Analyze grammar]

tato nīrājanaṃ kuryānnamaskāraṃ kṣamāpanam |
athā'bhyarcyopacāreṇa bhojayed bhaktadampatīm || 51 ||
[Analyze grammar]

evaṃ sāyaṃ prakuryācca pūjāṃ bhuñjīta pāyasam |
evaṃ saṃvatsaraṃ kuryāt tata udyāpanaṃ caret || 52 ||
[Analyze grammar]

śatarudrādhyāyapāṭhaṃ kārayitvā prapūjayet |
vastraṃ suvarṇaṃ kalaśaṃ pratimāṃ gurave'rpayet || 53 ||
[Analyze grammar]

sādhūn viprān bhojayecca dadyācca svarṇadakṣiṇām |
tataḥ prasādaṃ gṛhṇīyād godānādikamācaret || 94 ||
[Analyze grammar]

evaṃ vratasya kartā vā kartrī sveṣṭasukhaṃ labhet |
vaṃśaṃ saubhāgyamarthaṃ ca sampadaṃ muktimāpnuyāt || 55 ||
[Analyze grammar]

ante mokṣaṃ śivapadaṃ kṛṣṇapadaṃ prapadyate |
mahāvratamidaṃ tena sādhunoktaṃ kṛtaṃ tayā || 56 ||
[Analyze grammar]

sādhvyā saṃvatsarasyānte tadudyāpanamarjitam |
upoṣitā tu sā bālā jajāpa mantramanvaham || 57 ||
[Analyze grammar]

śivā śivaḥ samāyātau divyarūpadharau śubhau |
viṣṇunā kathitaṃ yadvat sarvaṃ saubhāgyameva tat || 58 ||
[Analyze grammar]

bhavatvatraiva dehe te patisaukhyaṃ labhasva ca |
ityāśīrvacanairbālāṃ samarañjayatāṃ hyubhau || 59 ||
[Analyze grammar]

śaṃbhuḥ prāha priye bāle pitarau bāndhavādikān |
samāhvayā'tra tān vaktumicchāmi te purābhavam || 60 ||
[Analyze grammar]

ityuktā śāradā sarvānāhvayat śivasannidhau |
sarveṣāṃ śṛṇvatāṃ śaṃbhuḥ śāradāmāha putrike || 61 ||
[Analyze grammar]

drāviḍe prāgbhave viprapatnyau tvaṃ cāparā hyubhe |
āstāṃ tatra tvayā nityaṃ patistvayi pramohitaḥ || 62 ||
[Analyze grammar]

jyeṣṭhāyai te sapatnyai ca tvayā kāntakṛtaṃ sukham |
kadācinnārpitaṃ tena jyeṣṭhā duḥkhena vai mṛtā || 63 ||
[Analyze grammar]

tena pāpena vidhavā tvaṃ tvidānīṃ pravidyase |
yāḥ kurvanti striyo loke jāyāpatyostu vipriyam || 64 ||
[Analyze grammar]

tāsāṃ kaumāravaidhavyaṃ bhavatyeva na saṃśayaḥ |
tvayā tvārādhitaḥ kṛṣṇo vrataṃ cāpi kṛtaṃ śubham || 65 ||
[Analyze grammar]

tena puṇyaṃ mahajjātaṃ tena puṇyena te patiḥ |
pūrvabhavīyavipro'sau svapne ratiṃ pradāsyati || 66 ||
[Analyze grammar]

tena putro viṣṇutulyaścātraiva saṃbhaviṣyati |
eṣaḥ sa vipravaryo'sti śaṃbhuryāvajjagāda tām || 67 ||
[Analyze grammar]

tāvat tatra prākpatiḥ saḥ samadṛśyata vai yuvā |
sarvairdṛṣṭaḥ śivavākyāt tayā mālā samarpitā || 68 ||
[Analyze grammar]

kāntena cārpito bhāle keśe sindūracūrṇakaḥ |
prakoṣṭhayoḥ pradatte ca kaṃkaṇe netrakajjalam || 69 ||
[Analyze grammar]

sarvasaubhāgyadravyāṇi datvā prāgbrāhmaṇaḥ patiḥ |
pāṇinā tacchirastatra pasparśa yāvadeva tu || 70 ||
[Analyze grammar]

tāvat keśāḥ kṛṣṇarūpāḥ prarohitāḥ prasādhitāḥ |
dhammilaśca kṛtastena śāṭikā svarṇatārikā || 71 ||
[Analyze grammar]

kṛtā tatraiva hastasya sparśenā''śīḥ prayuñjitā |
evaṃ hasan kṣaṇaṃ tasthau śaṃbhurdatvā śubhāśiṣaḥ || 72 ||
[Analyze grammar]

adṛśyaścābhavatso'pi patiścā'dṛśyatāṃ gataḥ |
utsavaḥ samabhūttasyāḥ kanyāyā vratapuṇyataḥ || 73 ||
[Analyze grammar]

śṛṇu lakṣmi vratadātā sādhurviṣṇurabhūt svayam |
sa eva śaṃbhunā cātrā''hūto viṣṇurvaro'bhavat || 74 ||
[Analyze grammar]

kanyāyāḥ pratyayārthaṃ ca tadvat kuṭumbināṃ tathā |
prāgbhavīyasya kāntasya rūpaṃ dadhāra mādhavaḥ || 75 ||
[Analyze grammar]

sa eva bhagavān kṛṣṇaḥ patirbhūtvā sadā niśi |
bhaktāyā mānase nityaṃ kāmatṛptiṃ dadāti saḥ || 76 ||
[Analyze grammar]

kvacit kṛṣṇasvarūpaṃ ca kvacid viprasvarūpakam |
kvacicchivasvarūpaṃ ca kvacitsādhusvarūpakam || 77 ||
[Analyze grammar]

gṛhṇāti bhagavānasyā bhavane ramate sadā |
sā'pi śrīriva saubhāgyatejobhirdīvyatāṃ yayau || 78 ||
[Analyze grammar]

ātmānaṃ muktigaṃ mene prakāśaṃ nā'karot satī |
evaṃ dineṣu gacchatsu sā bālā tu pratikṣaṇam || 79 ||
[Analyze grammar]

bhartuḥ samāgamaṃ lebhe rātrau sukhavivardhanam |
śivayorvaradānena śāradā viśadavratā || 80 ||
[Analyze grammar]

dadhāra garbhaṃ svapne'pi kṛṣṇasaṃgānubhāvataḥ |
ajñātāstu janāḥ kanyāṃ garbhiṇīṃ jāriṇīṃ jaguḥ || 81 ||
[Analyze grammar]

tairajñātaiḥ kṛtastatra samājo grāmavāsinām |
daṇḍadānāya vidvāṃsaḥ pṛṣṭāstatra samāgatāḥ || 82 ||
[Analyze grammar]

teṣu madhye svayaṃ kṛṣṇo vipro bhūtvā'pi cāyayau |
śivastatra supaṇḍito bhūtvā kāśyāṃ samāgataḥ || 83 ||
[Analyze grammar]

śṛṇu lakṣmi śāradāyāḥ kṛte kiṃ kimabhūttadā |
antarvatnīṃ samāhūya śāradāṃ vṛddhamānavāḥ || 84 ||
[Analyze grammar]

papracchuśca kuto garbhaḥ śāradāpitarau tadā |
pratyūcatuḥ prāgbhavīyakāntayogād vratārjitāt || 85 ||
[Analyze grammar]

svapne bījasya lābhena garbho'yaṃ nahi doṣavān |
jahasuśca tadā sarve tiraskṛtya kuṭumbakam || 86 ||
[Analyze grammar]

atarjayan susaṃkruddhāḥ kecidāsan parāṅmukhāḥ |
sarve sammantrayāmāsuḥ kiṃ kurma itibhāṣiṇaḥ || 87 ||
[Analyze grammar]

kecidāhuḥ pāpinīyaṃ kuladvayavināśinī |
kṛtvā'syāḥ keśavapanaṃ chitvā karṇau ca nāsikām || 88 ||
[Analyze grammar]

nirvāsayantu ca bahirgrāmāt svagotrato bahiḥ |
atha viṣṇuḥ paṇḍitastu tatrā''ha sarvamānavān || 89 ||
[Analyze grammar]

mayā pūrvaṃ śrutaṃ comāmāheśvaraṃ vrataṃ kṛtam |
anayā tena puṇyena prāptaḥ svāpnaḥ patiḥ sadā || 90 ||
[Analyze grammar]

svapne garbho na bhavati saṃśayo garbhiṇīkṛte |
nā'syai daṇḍaḥ pradātavyaḥ sucaritreyamaṃganā || 91 ||
[Analyze grammar]

kucāritryaṃ tu vadatāṃ jihvā dvedhā bhaviṣyati |
śrutvā prajahṛṣustasyā jananījanakādayaḥ || 92 ||
[Analyze grammar]

tataḥ kṣaṇaṃ grāmavṛddhā maunaṃ bhayāt prajagṛhuḥ |
tatra kecidaviśvastā mithyā svapnamavādiṣuḥ || 93 ||
[Analyze grammar]

teṣāṃ jihvā dvidhā bhinnā vavamuste tu raktakam |
bhītāḥ sarve na cocurvai viparītaṃ tataśca te || 94 ||
[Analyze grammar]

atha śaṃbhuḥ paṇḍitaśca tadāha viṣṇupaṇḍitam |
svapne garbho'pi bhavati daivānāmīdṛśī gatiḥ || 95 ||
[Analyze grammar]

māyāmayamidaṃ viśvaṃ dṛśyate śrūyate ca yat |
kiṃ bhāvyaṃ kimabhāvyaṃ vā saṃsāre kṛṣṇanirmite || 96 ||
[Analyze grammar]

anirūpyamabhūtārthaṃ kadācijjāyate ṛtam |
śrīkṛṣṇasya vaśe sarvaṃ tasya ko veda ceṣṭitam || 97 ||
[Analyze grammar]

yūpaketostu rājarṣeḥ śukraṃ nipatitaṃ jale |
saśukraṃ tajjalaṃ pītvā dāsī garbhaṃ dadhau kila || 98 ||
[Analyze grammar]

munervibhāṇḍakasyāpi śukraṃ pītvā sahāmbhasā |
hariṇī garbhiṇī bhūtvā ṛṣyaśṛṃgamasūyata || 99 ||
[Analyze grammar]

saurāṣṭrasya tathā rājñaḥ karaṃ spṛṣṭvā mṛgāganā |
tatkṣaṇād garbhiṇī bhūtvā muniṃ prāsūta tāpasam || 100 ||
[Analyze grammar]

tathā satyavatīnārī śapharīgarbhasaṃbhavā |
tathaiva mahiṣīgarbho jāto vai mahiṣāsuraḥ || 101 ||
[Analyze grammar]

phalasya bhojanenāpi garbhavatyaḥ striyaḥ purā |
manasā kalpitā nāryo babhūvuḥ putramātaraḥ || 102 ||
[Analyze grammar]

sāmbasya jaṭharājjātaṃ musalaṃ muniśāpataḥ |
yuvanāśvasya garbho'bhūnmunīnāṃ mantragauravāt || 103 ||
[Analyze grammar]

bījaṃ nāryāṃ nare vāpi vidyate sarvathā janāḥ |
pariṇāmo yogināṃ tu vacanena vijāyate || 104 ||
[Analyze grammar]

ahalyā copalā jātā gautamasyaiva vākyataḥ |
rāmasparśena sā jātā yuvatī ceti dṛśyate || 105 ||
[Analyze grammar]

indrahetikṛtā jātā maruto bahavastathā |
rādhāyā vacanād gaṃgā jalarūpā vyajāyata || 106 ||
[Analyze grammar]

samudramathanāllakṣmīḥ kṣiteḥ sītā hyajāyata |
evaṃ vai bahudhā sṛṣṭiryogināṃ vai prajāyate || 107 ||
[Analyze grammar]

vasudevasya kṛpayā rohiṇyāṃ garbha āsthitaḥ |
śaṃkarasya jaṭātaśca vīrabhadro'pyajāyata || 108 ||
[Analyze grammar]

nūnameṣāpi kalyāṇī vratasya balatastathā |
sādhoḥ sevāpratāpena kṛṣṇasya śaraṇāgateḥ || 109 ||
[Analyze grammar]

āśīrvādātmakaṃ bījaṃ dhatte garbhamaninditā |
ityuktastu sabhāśreṣṭhāḥ śaśaṃsurjñātibāndhavāḥ || 110 ||
[Analyze grammar]

sādhusādhviti jagadurmumucurnetrato jalam |
kulastriyaḥ pramuditāstāmuddiśya samāśvasan || 111 ||
[Analyze grammar]

tathāpi mānavānāṃ vai sandehasya nivṛttaye |
viprau tau tatra sañjāto kṣaṇamātraṃ śivo hariḥ || 112 ||
[Analyze grammar]

viṣṇurviprasvarūpo'bhūt kroḍe kṛtvā tu śāradām |
tān sarvān darśayāmāsa kāntaṃ svaṃ śāradāṃ priyām || 113 ||
[Analyze grammar]

dampatīrūpiṇau dṛṣṭvā''vāpurvismayamuttamam |
tato vyalīyata kṛṣṇaḥ śivo'pyantaradhīyata || 114 ||
[Analyze grammar]

satī tāṃ pūjayāmāsuḥ śrīrūpiṇīṃ tadā janāḥ |
camatkārapurāvāsā yayuḥ svaṃ svaṃ niketanam || 115 ||
[Analyze grammar]

atha kāle śubhe putramasūta śāradā satī |
śāradeyā'bhidhaḥ so'pi vidvān kṛṣṇasamo'bhavat || 116 ||
[Analyze grammar]

śāradā bahuvarṣāṇi kṛṣṇasevāṃ vidhāya ca |
vaṃśaṃ loke sthāpayitvā śrīkṛṣṇena samaṃ satī || 117 ||
[Analyze grammar]

divyayānena golokaṃ yayau padaṃ hi śāśvatam |
ityetat puṇyamākhyānaṃ śāradāyāḥ pravarṇitam || 118 ||
[Analyze grammar]

paṭhatāṃ śṛṇvatāṃ samyag bhuktimuktiphalapradam |
strīṇāṃ maṃgalasaubhāgyasantānarddhyāyuṣā pradam || 119 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne ānartadeśe camatkārapurīyaśāradāyā vaidhavye sādhorāśīrvādena punaḥ kṛṣṇātmakaviprarūpapatitaḥ saubhāgyaṃ putralābho janānāṃ viśvāsārthaṃ viprarūpakṛṣṇadarśanaṃ golokaprāptiścetyādipātivratyacamatkāranirūpaṇanāmā dvipañcāśadadhikacatuśśatatamo'dhyāyaḥ || 452 ||
[Analyze grammar]