Chapter 449

śrīnārāyaṇa uvāca |
atha sīmantinīsatyāścamatkāraṃ vadāmi te |
śṛṇu lakṣmi kṛṣṇabhaktiparāyāḥ patiyoṣitaḥ || 1 ||
[Analyze grammar]

pātivratyena dharmeṇa sadā kṛṣṇaḥ pratuṣyati |
patnī lakṣmīsvarūpā'sti patirnārāyaṇātmakaḥ || 2 ||
[Analyze grammar]

iti buddhyā praseveta parasparaṃ pramucyate |
dampatyoḥ kṛtasakalpāḥ siddhyanti nahi niṣphalāḥ || 3 ||
[Analyze grammar]

vidarbhaviṣaye vipro vedamitro'bhavat sudhīḥ |
tasya putraḥ sumedho'bhūddharmācāraparāyaṇaḥ || 4 ||
[Analyze grammar]

anyaḥ sārasvatākhyaśca vipro'bhūttasya pattane |
tasya putraḥ somavāṃścā'bhavaddharmaparāyaṇaḥ || 5 ||
[Analyze grammar]

sumedhaḥ somavāṃścobhau mitravaryau samākṛtī |
sarvavidyākuśalinau samavidyau babhūvatuḥ || 6 ||
[Analyze grammar]

tāvekadā svatanayau dvijāvavocatāṃ hitam |
he putrakau yuvāṃ bālye kṛtavidyau suvarcasau || 7 ||
[Analyze grammar]

vaivāhiko'yaṃ samayo vartate yuvayoḥ samam |
imaṃ vidarbharājānaṃ prasādya prāpya vai dhanam || 8 ||
[Analyze grammar]

śreṣṭhakulajakanyābhyāṃ kṛtodvāhau bhaviṣyathaḥ |
evamuktau sutau gatvā samatoṣayatāṃ nṛpam || 9 ||
[Analyze grammar]

dhanārthamarthito rājā prāha tau daivanoditaḥ |
mama putrī niṣadheśapatnī sīmantinī satī || 10 ||
[Analyze grammar]

somavāre pūjayitvā śrīpatiṃ pārvatīpatim |
patnīyuktān dvijān vedavido dhanaṃ dadātyalam || 11 ||
[Analyze grammar]

ato'tra yuvayoreko nārīvibhramaveṣadhṛk |
ekastasyāḥ patiśceti jāyethāṃ vipradampatī || 12 ||
[Analyze grammar]

gatvā tatra dhanaṃ labdhvā punaryātaṃ mamāntikam |
yadi nyūnaṃ bhaveccet tad dāsye'haṃ tvadhikaṃ dhanam || 13 ||
[Analyze grammar]

ityuktau prāhatuḥ rājan kartuṃ tajjāyate bhayam |
devatāsu gurau pitroḥ siddhe yogini bhūbhṛti || 14 ||
[Analyze grammar]

kauṭilyamācaran sadyo daṇḍapātraṃ vinaśyati |
gopyamānaṃ tu nau chadma kadācit khyātimeṣyati || 15 ||
[Analyze grammar]

tadārjitā guṇāḥ sarve naśiśyanti kṣaṇānnṛpa |
pāpaṃ nindā bhayaṃ vairaṃ tiṣṭhanti chadmani dhruvam || 16 ||
[Analyze grammar]

ato dhūrtajanācāraṃ nāśrayāvaḥ kadācana |
śrutvaitannṛpatiḥ prāha devatāpitṛyoginām || 17 ||
[Analyze grammar]

nollaṃghyaṃ śāsanaṃ pālyaṃ sadgurusiddhabhūbhṛtām |
śubhāśubhaṃ tadādiṣṭaṃ kartavyaṃ śreyase bhavet || 18 ||
[Analyze grammar]

ityuktau tau tathetyuktvā sāmavān rūpavāṃstadā |
strīveṣaṃ śāṭikāṃ bhūṣā añjanaṃ keśasādhanam || 19 ||
[Analyze grammar]

aṃgarāgaṃ spṛhaṇīyaṃ dadhāra yuvatī yathā |
evaṃ tau dampatī bhūtvā jagmatustāṃ sīmantinīm || 20 ||
[Analyze grammar]

sā rājñī tvarcayāṃcakre patnīyuktān yathāvratam |
tau tu viprasutau dṛṣṭvā prāptau kṛtakadampatī || 21 ||
[Analyze grammar]

pātivratyena dharmeṇa tathā kṛṣṇasya sevayā |
harabhaktyā vivedainaṃ kumāraṃ kanyakākṛtam || 22 ||
[Analyze grammar]

jñātvā kiṃcid vihasyā'tha pitrā saṃpreṣitāviti |
mene gaurīmaheśau ca lakṣmīnārāyaṇāviti || 23 ||
[Analyze grammar]

śivakṛṣṇātmakān viprān gaurīśrīrūpayoṣitaḥ |
āvāhya gandhamālyādyairdhūpadīpairapūjayat || 24 ||
[Analyze grammar]

pāyasaṃ modakān miṣṭapolikāḥ śaṣkulīstathā |
śākāni bhakṣyabhojyāni viprānabhojayat satī || 25 ||
[Analyze grammar]

tāmbūlaṃ dakṣiṇā dhenūrhiraṇyaṃ ratnalakṣakam |
pratyekaṃ vastrabāhulyaṃ datvā natvā vyasarjayat || 26 ||
[Analyze grammar]

sīmantinyā śivāṃ lakṣmīṃ tvāvāhya sāmavān dvijaḥ |
pūjitaḥ kalpitā kanyā satyaṃ kanyā vyajāyata || 27 ||
[Analyze grammar]

nārīcihnāni sarvāṇi paryavartanta varṣmaṇi |
tau tu dhanaṃ yatheṣṭaṃ vai prāpya yayatuḥ svaṃ gṛham || 28 ||
[Analyze grammar]

sā tu vismṛtapuṃbhāvā mitre jātaspṛhā'bhavat |
karābhyāṃ vipramābaddhya kandarpavivaśā'bravīt || 29 ||
[Analyze grammar]

ayi kānta kṣaṇaṃ tiṣṭha vane ramye supuṣpite |
tvayā vihartumicchāmi priyā te'smi gṛhāṇa mām || 30 ||
[Analyze grammar]

pariṣvajasva māṃ kāntāṃ pāyayasva navā'dharam |
nā'haṃ gantuṃ samarthā'smi smarā''vegaprapīḍitā || 31 ||
[Analyze grammar]

itthamaśrutapūrvāṃ tāṃ dṛṣṭvā niśamya śaṃkitaḥ |
papraccha stanayuktāṃ tāṃ kimevaṃ bhāṣase sakhe || 32 ||
[Analyze grammar]

narmavākyaṃ vṛthā naivaṃ vaktavyaṃ kṛtrimā'bale |
kanyāveṣaṃ parityajya kumāraveṣamāvaha || 33 ||
[Analyze grammar]

ityājñaptā prasannā sā vastrāṇi dūrato'karot |
tāvat sā satyadhammilā jaghanastanaśobhinī || 34 ||
[Analyze grammar]

yoniyuktā liṃgahīnā dṛṣṭā sumedhasā priyā |
sā tu jagrāha vipraṃ taṃ suratāya navapriyā || 35 ||
[Analyze grammar]

sumedhāḥ prāha tāṃ kanyāṃ śāṭikādīni dhāraya |
na praśastaṃ viduṣorvaiṃ jāradharmaniṣevaṇam || 36 ||
[Analyze grammar]

vañcayitvā''tmapitarau dhūrtarājā'nuśāsanāt |
ayaṃ svayaṃkṛto'nartha āvābhyāṃ yadviceṣṭitam || 37 ||
[Analyze grammar]

yastvaṃ viprātmajo bālaḥ prāptaḥ strītvaṃ vigarhitam |
kāmabhogo hyanarthāya kumārayorviṣaṃ phalam || 38 ||
[Analyze grammar]

evaṃ vivekamāśritya tūṣṇīmehi svayaṃ gṛham |
devadvijaprasādena strītvaṃ nāśaṃ sameṣyati || 39 ||
[Analyze grammar]

athavā daivayogena strītvameva bhavettava |
pitrā dattā mayā sākaṃ raṃsyase varavarṇini || 40 ||
[Analyze grammar]

ityuktāpi kāmadāvānalavyāptā vadhūstadā |
balena taṃ samāliṃgya cucumbā'dharapallavam || 41 ||
[Analyze grammar]

dharṣito'pi tayā dhīraḥ sumedhāḥ sparśamātrataḥ |
śāntiṃ tasyāścakāraiva bahiḥ sparśaḥ pradāya ca || 42 ||
[Analyze grammar]

akṣatā kanyakā tṛptā kāmadāho nivavṛte |
śuddhiṃ kṛtvā jalādyaiśca yayaturnṛpamandiram || 43 ||
[Analyze grammar]

rājā jñātvā'tha tadvṛttamavāpa vismayaṃ tataḥ |
āhūya pitarau viprau jagāda svaviceṣṭitam || 44 ||
[Analyze grammar]

śrutvā sārasvataḥ prāha rājānaṃ dhūrtaceṣṭitam |
are rājan mama putrastavā''jñayā tu kānyakam || 45 ||
[Analyze grammar]

veṣaṃ dhṛtvā'bhavat kanyā strītvaṃ bhuṃkte jugupsitam |
adya mamaikaputrasya vaṃśo naṣṭastathā mama || 46 ||
[Analyze grammar]

nirāśāḥ pitaraḥ sarve luptapiṇḍodakakriyāḥ |
vadā'tra kiṃ mayā kāryaṃ daṇḍyo'styadya bhavān khalu || 47 ||
[Analyze grammar]

rājā sarvān samāhūya maharṣīnāha dīnavat |
asyāḥ puṃstvaṃ yathā syāt kurvantu mayi prasādanam || 48 ||
[Analyze grammar]

te'bruvan śrīpateḥ satīpaterlabhyaṃ prasādanam |
tadbhaktānāṃ prasādaśca labhyasteneṣṭamāpnuyāt || 49 ||
[Analyze grammar]

atha rājā bharadvājaṃ samāhūya mahāmunim |
pūjanaṃ kārayāmāsa śrīpateḥ pārvatīpateḥ || 50 ||
[Analyze grammar]

viprā rājā tathā kanyāścaite sarve hyupoṣitāḥ |
trirātraṃ pūjanaṃ cakruḥ ṣoḍaśādisuvastubhiḥ || 51 ||
[Analyze grammar]

akhaṇḍaṃ bhajanaṃ cakrurmahotsavamakārayan |
jaya lakṣmi jaya cāmbe śrīpate pārvatīpate || 52 ||
[Analyze grammar]

iti tadbhajanaṃ cākhaṇḍitaṃ bādyasamanvitam |
cakrustena susantuṣṭau śrīpatiḥ pārvatīpatiḥ || 53 ||
[Analyze grammar]

āyayaturvāhanasthau patnī yuktau kṛpālayau |
tau cāhatuśca rājānaṃ kiṃ te brūhi samīhitam || 54 ||
[Analyze grammar]

so'pyāha puṃstvametasya dīyetāṃ kṛpayā mayi |
tāvāhatustadā rājannasmadbhaktaistu yat kṛtam || 55 ||
[Analyze grammar]

śakyate nā'nyathākartuṃ varṣāyutaśatairapi |
sīmantinī mahābhaktā satī kṛṣṇapativratā || 56 ||
[Analyze grammar]

naikasiddhiyutā devī yamunājalapāyinī |
svabharturjīvarakṣāyāḥ kartrī yogasamādhinā || 57 ||
[Analyze grammar]

yathā saṃkalpayet sādhvī satī kṛṣṇāpativratā |
tathā tatkalpanārūpaṃ vastu pariṇataṃ bhavet || 58 ||
[Analyze grammar]

kanyāveṣo'bhavad bālastayā'rcitā tu kanyakā |
kanyeyaṃ pārvatī lakṣmīriti saṃkalpya pūjitā || 59 ||
[Analyze grammar]

sumedhasaḥ supatnīyamiti saṃkalpya sādaram |
sumedhāśca patirasyāḥ somavatyāśca kalpitaḥ || 60 ||
[Analyze grammar]

tat tathaiva hi sañjātaṃ yogināṃ sabalā gatiḥ |
nānyathā kriyate kaiściditi rājan nibodha vai || 61 ||
[Analyze grammar]

vayaṃ bhaktavaśāḥ sarve bhaktakṛtaṃ mataṃ hi naḥ |
gacchantu ca bhavanto vai sīmantinyāḥ prapannatām || 62 ||
[Analyze grammar]

yadi kṛpāyutā rājñī yuṣmadiṣṭaṃ vidhāsyati |
kanyeyaṃ kṛpayā tasyāḥ punaḥ puṃstvamavāpsyati || 63 ||
[Analyze grammar]

ityuktā vimanasaste yayuḥ sīmantinīgṛham |
puṃstvārthaṃ prārthayāmāsuḥ prāha sīmantinī tu tān || 64 ||
[Analyze grammar]

kṛtaṃ karmaphalaṃ bhuṃkte mānavo bhuvi sarvathā |
asyā mātrā vrataṃ puṇyakākhyaṃ kṛtaṃ purā yadā || 65 ||
[Analyze grammar]

putrecchayā kṛtaṃ cāpi varṣānte dakṣiṇāvidhau |
putrī syānme tadā śreṣṭhamiti vai kalpitaṃ phale || 66 ||
[Analyze grammar]

evaṃ dvedhā vratapūrṇāhūtau saṃkalpitaṃ yataḥ |
tataḥ putraḥ samutpannaḥ sa eva yauvanaṃ gate || 67 ||
[Analyze grammar]

kanyārūpā prajātā'sti vratena karmaṇāpi ca |
tasmānneyaṃ punaḥ puṃstvaṃ gamiṣyati kadācana || 68 ||
[Analyze grammar]

kintu punastatsvarūpastatpitroḥ susutaḥ śubhaḥ |
sarvalakṣaṇasampanno dīrghajīvī ca vaiṣṇavaḥ || 69 ||
[Analyze grammar]

mameṣṭadevasaṃkalpād bhaviṣyati hi niścitaḥ |
eṣā sāmavatī nāma sutā tasya dvijanmanaḥ || 70 ||
[Analyze grammar]

bhūtvā sumedhasaḥ patnī kāmabhogena yujyatām |
yatsaṃkalpena yajjātaṃ prāgbhave cātra vā bhave || 71 ||
[Analyze grammar]

phalaṃ saṃskārajanyaṃ tat samāpatati kālataḥ |
asminneva bhave tveṣā nārīveṣadharā satī || 72 ||
[Analyze grammar]

patiṃ matvā sumedhaṃ taṃ vāmapārśve sthitā'bhavat |
pativratāyā hastena pūjanaṃ sarvasākṣikam || 73 ||
[Analyze grammar]

sañjātaṃ devatulyena rājñā samanumoditam |
satsarvaṃ tīvrasaṃvegaṃ karma tvasyāḥ phalātmakam || 74 ||
[Analyze grammar]

pākaṃ prāptaṃ śakyate nā'nyathākartuṃ tu kenacit |
kaṇvasya vacanāt kṛṣṇakuṭumbasya vināśakam || 75 ||
[Analyze grammar]

sāmbagarbhasamābaddhaṃ mūśalaṃ suvyajāyata |
tasmācchoko na kartavyaḥ prāpte phale tu karmaṇaḥ || 76 ||
[Analyze grammar]

kanyātve'pi parau lābhaḥ putraste syād dvitīyakaḥ |
evaṃ matvā sukhaṃ yāntu sarve santu nirāmayāḥ || 77 ||
[Analyze grammar]

ityuktvā sā satī putrīṃ sīmantinī śubhāśiṣā |
yojayāmāsa bahudhā yayuḥ svaṃ svaṃ gṛhaṃ tu te || 78 ||
[Analyze grammar]

sārasvato dvijaḥ putrīṃ dadau tasmai sumedhase |
alabhad dvitīyaṃ putraṃ sutābhūtasutottamam || 79 ||
[Analyze grammar]

evaṃ satīpratāpena tvatarkyamapi jāyate |
tatrāpi kṛṣṇabhaktāyā iṣṭaṃ drutaṃ vivartate || 80 ||
[Analyze grammar]

etatte kathitaṃ lakṣmi sarvaṃ tapaḥprabhāvanam |
paṭhanācchravaṇāttvasya yatheṣṭaṃ labhate janaḥ || 81 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne sārasvataviprasya sāmavānnāmakasutasya vivāhavyayārthaṃ vidarbharājato dhanecchayā gatasya kanyāveṣeṇa bhikṣukasya sāmavataḥ pativratayā sīmantinyā kanyāṃ matvā pūjitasya sāmavatīkanyātvaṃ tatpituḥ putrāntaraprāptiścetyādinirūpaṇanāmaikonapañcāśadadhikacatuśśatatamo'dhyāyaḥ || 449 ||
[Analyze grammar]