Chapter 446

śrīnārāyāga uvāca |
śṛṇu lakṣmi haravākyaṃ śrutvā bṛhaspatiḥ svayam |
mahābhāgavato bhakto vairāgyeṇa jagāda yat || 1 ||
[Analyze grammar]

jñānaṃ prāpya viṣaṇṇaḥ sa bhavābdhau haramāha vai |
ājñāṃ kuru kṛpāsindho yāmi taptuṃ harestapaḥ || 2 ||
[Analyze grammar]

tārā tiṣṭhatu tatraiva na tayā me prayojanam |
ajñānaṃ bādhate mūḍhaṃ līnaṃ me kṛpayā tava || 3 ||
[Analyze grammar]

naro bhūtvā hariṃ prāpsye nāryā kiṃ me prayojanam |
amṛtaṃ dṛśyate bāhyaṃ viṣaṃ sarvaṃ vinā harim || 4 ||
[Analyze grammar]

śaraṇaṃ śrīkṛṣṇanārāyaṇaṃ yāmi parātparam |
ityuktavantaṃ taṃ śaṃbhurvihasyā''ha bṛhaspatim || 5 ||
[Analyze grammar]

paragrastāṃ striyaṃ tyaktvā na praśasyaṃ tapo mune |
saṃbhāvitasya duścaryā maraṇādatiricyate || 6 ||
[Analyze grammar]

svastrīṃ śatrukaragrastāṃ samāsādya tataḥ param |
yatkartavyaṃ tvayā kāryaṃ gārhasthyaṃ vā tapo mune || 7 ||
[Analyze grammar]

vayaṃ yāmo yatra śukrastatra sarve dhurandharāḥ |
sūryo dharmo'nantaśeṣo naro nārāyaṇo hyajaḥ || 8 ||
[Analyze grammar]

kratuḥ sanatkumāraśca vasiṣṭho'pi marīcikaḥ |
sanātanaḥ sanandaśca voḍhā pañcaśikhastathā || 9 ||
[Analyze grammar]

patnīvrataśca kapilastathā'ṅgirasa ityapi |
ityuktvā prayayuḥ sarve śukrāśramaṃ śivānvitāḥ || 10 ||
[Analyze grammar]

śukraḥ praṇamya tānsarvān pūjayāmāsa sādaram |
bhītāḥ praṇemustāndevān tadānīṃ ditinandanāḥ || 11 ||
[Analyze grammar]

śukraḥ sapulakaḥ sāśrunetraḥ provāca vai tadā |
adya me saphalaṃ janma jīvitaṃ ca sujīvitam || 12 ||
[Analyze grammar]

svayaṃ vidhātā bhagavān sākṣād dṛṣṭaḥ svamandire |
sākṣād dṛṣṭāśca tatputrā bhagavantaḥ sanātanāḥ || 13 ||
[Analyze grammar]

tuṣṭaḥ śrīmatkṛṣṇanārāyaṇo'dya mayi sarvathā |
svayaṃ nārāyaṇo lakṣmīpatirmadgṛhamāgataḥ || 14 ||
[Analyze grammar]

brahmarūpaḥ svayaṃ śaṃbhurmokṣadāśca samāgatāḥ |
kṛtārthaṃ kartumīśā māṃ kṛpayā nvāgatā mayi || 15 ||
[Analyze grammar]

svātmārāmeṣu kuśalaṃ praśnarūpaṃ viḍambanam |
putraṃ pavitraṃ kartuṃ vai nūnamatra samāgatāḥ || 16 ||
[Analyze grammar]

aparaṃ brūtha kiṃ vā'pi śāsta naḥ karavāṇi tat |
śrutvaitad viśvasṛṭ prāha kuśalaṃ te sadā'stu vai || 17 ||
[Analyze grammar]

udvignaściravicchedāt tvāṃ pautraṃ draṣṭumāgataḥ |
kuśalaṃ sakuṭumbasya tava pautra nirāmayam || 18 ||
[Analyze grammar]

śrīkṛṣṇapūjanaṃ nityaṃ kuśalaṃ te tu vartate |
svaguroḥ sevanaṃ cāpi kuśalaṃ te nu jāyate || 19 ||
[Analyze grammar]

guroḥ kṛṣṇasya pitrośca vṛddhānāṃ cāpi pūjanam |
sarvaduḥkhaharaṃ puṇyaṃ bhāvisampatsurakṣakam || 20 ||
[Analyze grammar]

abhīṣṭadevaḥ santuṣṭo gurau tuṣṭe bhavediha |
iṣṭadeve tu santuṣṭe santuṣṭāḥ sarvadevatāḥ || 21 ||
[Analyze grammar]

gururvipraḥ suro ruṣṭo yeṣāṃ pātakināmiha |
teṣāṃ tu kuśalaṃ nāsti vighnastasya kṣaṇe kṣaṇe || 22 ||
[Analyze grammar]

tava tuṣṭo guruścā'haṃ tadā tuṣṭo hariḥ svayam |
harau tuṣṭe sarvadevāstuṣṭāḥ kṣemaṃ bhavettava || 23 ||
[Analyze grammar]

sāmprataṃ śṛṇu me dhīmannatrā''gamanakāraṇam |
kṛṣṇavarajaputrasya sādhvīṃ tārāṃ bṛhaspateḥ || 24 ||
[Analyze grammar]

apahṛtya niśānāthastavaiva śaraṇā''gataḥ |
dehi tārāṃ nyāyamārgāt sarvaṃ te kuśalaṃ bhavet || 25 ||
[Analyze grammar]

pūrvaṃ jñātaṃ tvayā candraḥ śuddhīkṛto'sti dharmataḥ |
tārā śuddhā satī cāsti nityaśuddhā yataḥ striyaḥ || 26 ||
[Analyze grammar]

candre daṇḍaṃ na yokṣyāmastadbhayaṃ tyaja sarvathā |
adāne yadi yuddhaṃ syānnāśastūbhayapakṣayoḥ || 27 ||
[Analyze grammar]

tārāṃ bhuṃkte śaśī yadvā gururyadvā vināśanam |
koṭisaṃkhyakamūrdhanyadevadaityādipakṣayoḥ || 28 ||
[Analyze grammar]

anyāyaṃ tu parāsūya nyāyaḥ kāryastvayā'dhunā |
vināśakāraṇaṃ yuddhamubhayordevadaityayoḥ || 29 ||
[Analyze grammar]

susāmnā''caraṇaṃ pautra sarvamaṃgalakāraṇam |
tārāṃ bhikṣāṃ dehi mahyaṃ bhikṣukāya tu vedhase || 30 ||
[Analyze grammar]

dehi tārāṃ mahābhāga candraṃ prāṇādhikaṃ tathā |
svakīrtiṃ rakṣa suciraṃ prārthayāmaḥ punaḥ punaḥ || 31 ||
[Analyze grammar]

śukraḥ saṃprāha tacchrutvā tridevān prapitāmahān |
tārā garbhavatī tvāste candrayogena sā satī || 32 ||
[Analyze grammar]

deyā vā nā'dya deyā vā pramāṇaṃ prapitāmahāḥ |
brahmā prāha pradeyaiva nā'tra kāryā vicāraṇā || 33 ||
[Analyze grammar]

garbhaprasavamaiśvaryāt kārayiṣyāma eva tu |
ānayā'tra niśānāthaṃ tārāṃ ca gurviṇīṃ suta || 34 ||
[Analyze grammar]

ityuktaḥ satvaraṃ śukrastārāṃ candramasaṃ tadā |
samāhūya dadau tebhyo mahadbhyaścātilajjayā || 35 ||
[Analyze grammar]

datvā tārāṃ vidhuṃ śukraḥ praṇanāma vidheḥ pade |
brahmā dadarśa tārāṃ tu praṇatāṃ svapade satīm || 36 ||
[Analyze grammar]

lajjayā namravaktrāṃ surudatīṃ gurviṇīṃ śubhām |
candraṃ saṃpraṇataṃ dhātā kroḍe kṛtvā'bhayaṃ dadau || 37 ||
[Analyze grammar]

uvāca gurviṇīṃ tārāṃ kātarāṃ prapitāmahaḥ |
saubhāgyayuktā svapatau bhaviṣyasi bhayaṃ tyaja || 38 ||
[Analyze grammar]

durbalā balinā grastā niṣkāmā na cyutā bhavet |
manaḥkhedena śuddhā sā rājasvalyena vā punaḥ || 39 ||
[Analyze grammar]

tataḥ svakāntayogena na strī jāreṇa duṣyati |
sakāmā kāmato jāraṃ bhajate svasukhāya yā || 40 ||
[Analyze grammar]

prāyaścittādapi śuddhā na sā svāmivivarjitā |
tvaṃ tu satī sadā śuddhā vahnirivā'tipāvanī || 41 ||
[Analyze grammar]

bṛhaspateḥ karmayogāt tadbhāryā''haraṇaṃ hyabhūt |
tavāpi karmayogācca tavātra haraṇaṃ hyabhūt || 42 ||
[Analyze grammar]

kintu tattvaṃ kimatrā'sti jānantyeva na devatāḥ |
vinā tridevān guptaṃ tad rahasyaṃ paśya madbalāt || 43 ||
[Analyze grammar]

yadā candro'harat tvāṃ vai tadā spraṣṭuṃ śaśāka na |
pativratā satīṃ devīṃ spraṣṭuṃ śaknoti ko'pi na || 44 ||
[Analyze grammar]

kintu sūryaprabhā mūrtimatī tvāgatya tatra vai |
dvitīyāṃ nirmame tārāchāyāṃ tārāpratikṛtim || 45 ||
[Analyze grammar]

satyāṃ tārāṃ tirodhāya ninye sūryasya maṇḍale |
sā'dyā'vadhi mahādivyā satī śuddhā virājate || 46 ||
[Analyze grammar]

sā tvaṃ paśya nijāṃ mūlāṃ prabhā''nītāṃ yathātathām |
imāṃ chāyāṃ tathā paśya sagarbhāṃ candrasevitām || 47 ||
[Analyze grammar]

ityuktvā viśvasṛk dvedhā darśayāmāsa tārakām |
mūlāṃ tārāṃ dadau devagurave'nyāṃ tatastu te || 48 ||
[Analyze grammar]

prāhustāre tyaja garbhaṃ pakvaṃ tvasmatprabhāvataḥ |
ityuktā sā drutaṃ tvantargṛhe gatvā suṣāva tam || 49 ||
[Analyze grammar]

jātamātro yuvā svarṇavarṇo'bhūt śaśinā samaḥ |
jātakarmādikaṃ tatra kṛtavāṃścandramāḥ svayam || 50 ||
[Analyze grammar]

brahmājñayā tadā tārāchāyā'dṛśyā babhūva ha |
adṛśyāṃ tāṃ sūryaprabhā jagrāha nijaputrikām || 51 ||
[Analyze grammar]

sā tu sūrye sadā kṛṣṇaṃ bhajamānā babhūva ha |
prabhādāsī sadā dāsyaṃ kṛṣṇasyaiva cakāra sā || 52 ||
[Analyze grammar]

puruṣottamamāse tu prabhayā saha sā satī |
yayau śrīmatkṛṣṇanārāyaṇasya dhāma cākṣaram || 53 ||
[Analyze grammar]

divyā nityamahāmuktā jātā kṛṣṇapriyā satī |
mūlā tārā patiṃ prāpya babhūva nirbhayā punaḥ || 54 ||
[Analyze grammar]

brahmā tasyai satīdharmānāpatkālakṛtān mudā |
pātivratyaparān prāha kṛte yuge pravartitān || 55 ||
[Analyze grammar]

śṛṇu lakṣmi pravakṣyāmi yaistu nāryo'pyadūṣitāḥ |
svāminastvājñayā nārī pātivratyaparāyaṇā || 56 ||
[Analyze grammar]

anyamuktā na sā dūṣyatyataḥ svāmivaco vṛṣaḥ |
patiryasmai kṣaṇikaṃ vā śāśvataṃ dānamārpayat || 17 ||
[Analyze grammar]

tena bhuktā'pi sā nārī naiva dūṣyati vai kvacit |
dāne grahītuḥ svatvaṃ yat tato nārī na duṣyati || 58 ||
[Analyze grammar]

nirjanādāvabalā yā bhuktā prasahya kenacit |
akāmā ca parādhīnā naiva duṣyati vai kvacit || 59 ||
[Analyze grammar]

yogādisiddhapuruṣairbhuktā praviśya svāmini |
bhuktā kṛtrimarūpeṇa sā'pi naiva praduṣyati || 60 ||
[Analyze grammar]

nidrāṃ mūrchāṃ gatā yā tu vicittā mādakādane |
anyabhuktā'pi sā tatra naiva duṣyati padmaje || 61 ||
[Analyze grammar]

patyuḥ pituḥ sutabhrātrorāyatkāle'tidāruṇe |
teṣāṃ prāṇā'vanārthaṃ cet parabhuktā na duṣyati || 62 ||
[Analyze grammar]

apatyārthe gavāmarthe kuṭumbārthe parā''dṛtā |
akṣatakanyakārthe ca kumāryarthe na duṣyati || 63 ||
[Analyze grammar]

āpatkāle prāṇahare deśagrāmādiviplave |
anyabhuktā parādhīnā tadā naiva praduṣyati || 64 ||
[Analyze grammar]

gāndharvavidhinā yoge parabhuktā na duṣyati |
rājasvalyasya vigame patyayoge ṛtorvṛṣe || 65 ||
[Analyze grammar]

anyayogagatā nārī duṣyatyeva na vai kvacit |
svāminaḥ kāryasiddhyarthaṃ parabhuktā na duṣyati || 66 ||
[Analyze grammar]

tapasvinastapasyāyā vighnārthaṃ tvapsarogaṇaḥ |
svāmīndrapreṣitaścānyabhuktā'psaro na duṣyati || 67 ||
[Analyze grammar]

dāsyaḥ kṛtvā bhūbhṛtastu sevāyāṃ cārpitāstu yāḥ |
parabhuktāśca tāḥ kvāpi naiva duṣyanti sevikāḥ || 68 ||
[Analyze grammar]

paṇyastrītvaṃ samāpannā vipannāśārthameva yā |
parabhuktā cā'gatitve tāvanmātraṃ na duṣyati || 69 ||
[Analyze grammar]

apatikā nṛtyagītikuśalā kvāpi mohitā |
gāndharveṇa parāyattā parabhuktā na duṣyati || 70 ||
[Analyze grammar]

prāṇarakṣaṇakāryārthaṃ parabhuktā na duṣyati |
tejasviyogamāsādya śāpādibhayakātarā || 71 ||
[Analyze grammar]

duḥkhasya parihārārthaṃ parabhuktā na duṣyati |
kṛṣṇanārāyaṇāṃśādyairbhuktā satī na duṣyati || 72 ||
[Analyze grammar]

tulasyā tu viṣṇuyogaḥ patiprāśastyabodhakaḥ |
anyayoge tathā nārī patihantrī bhavecca vā || 73 ||
[Analyze grammar]

svavaṃśatantusandhātṛputralābhārthameva tu |
parabhuktā satī nārī na kadāpi praduṣyati || 74 ||
[Analyze grammar]

divyadevādibhirbhuktā satī naiva praduṣyati |
ahalyāyāstvindrayoge śilātvaṃ svāmiruṭphalam || 75 ||
[Analyze grammar]

svapne tvanyena yā bhuktā sā satī naiva duṣyati |
bhūtapretādibhirbhuktā vāyvaṃśairnahi duṣyati || 76 ||
[Analyze grammar]

pitṛbhyāṃ saṃpradattā yā yasmai tena na duṣyati |
anāthā yuvatī prāptā patnīkṛtā na duṣyati || 77 ||
[Analyze grammar]

pātivratyaṃ paro dharmo dūṣaṇaṃ svecchayā pare |
patīcchayā parārthatvaṃ bhūṣaṇaṃ patidharmataḥ || 78 ||
[Analyze grammar]

prasahyatve baliṣṭhasya dūṣaṇaṃ na tu tat striyāḥ |
nodanālakṣaṇo dharmaścānartho na bhaved yadi || 79 ||
[Analyze grammar]

anarthe tu phalaṃ duḥkhaṃ soḍhavyaṃ bhavati dhruvam |
ityevaṃ sarvadā'smābhirdevairdharmo viniścitaḥ || 80 ||
[Analyze grammar]

tasmāt tārā sadā śuddhā punarbhūvat pativratā |
candraścāpi phalaṃ bhuṃjan devatā sthāsyati dhruvaḥ || 81 ||
[Analyze grammar]

rājasvalye māsike vai nāryaśuddhirvinaśyati |
pavitrā pāvanī snātvā sādhvī pṛthvīsamā satī || 82 ||
[Analyze grammar]

kṣetraṃ proktaṃ bījakośo bījādhānāya nirmitaḥ |
pākaṃ datvā śaityakāle grīṣme tāpāt pratāpyate || 83 ||
[Analyze grammar]

varṣāyāṃ jaladānena śuddhaḥ kaṇān dadāti saḥ |
kṣetraṃ nārī bījapātraṃ bījādhānāya nirmitam || 84 ||
[Analyze grammar]

pākottaraṃ sadā śītaṃ rājasvalye pratapyate |
niṣekavarṣādānena śuddhaṃ bālān dadāti tat || 85 ||
[Analyze grammar]

tasmāt kṣetraṃ prativarṣaṃ śuddhameva bhavedyathā |
tadvannāryātmakaṃ kṣetraṃ pratimāsaṃ praśuddhyati || 86 ||
[Analyze grammar]

iti tasyai pātivratyaṃ datvā sarve surādayaḥ |
sādhvīṃ tārāṃ tu gurave datvā'bhayaṃ ca sarvathā || 87 ||
[Analyze grammar]

devā yayuḥ svabhavanaṃ svagṛhaṃ ca bṛhaspatiḥ |
pātivratyaṃ paraṃ dharmaṃ pālayāmāsa sā satī || 88 ||
[Analyze grammar]

patnīvrataṃ vṛṣaṃ cāpi pālayāmāsa gīrpatiḥ |
atha tārāsuto budhaścandrajanmā graho'bhavat || 89 ||
[Analyze grammar]

sa eva nandanavane citrāṃ prāpya satīṃ priyām |
ghṛtācīgarbhasaṃbhūtāṃ kuberasya tu retasā || 90 ||
[Analyze grammar]

tāṃ gāndharvavivāhena jagrāha candramassutaḥ |
tatputrastvabhavaccaitraḥ saptadvīpakṣitīśvaraḥ || 91 ||
[Analyze grammar]

tasya putro'dhirathākhyastasya surathanāmakaḥ |
putrastapasyayā jāto manvantaraḥ sa cā'ṣṭamaḥ || 92 ||
[Analyze grammar]

sāvarṇiritināmnā vai vaiṣṇavaḥ paramo hi saḥ |
paṭhanācchravaṇāccāsya pātivratyaphalaṃ bhavet || 93 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantānetārāyā bṛhaspataye'rpaṇaṃ budhajanma āpatsamāḥ strīdharmāḥśuddhiśca pātivratye'dūṣaṇāni cetyādinirūpaṇanāmā ṣaṭcatvāriṃśadadhikacatuśśatatamo'dhyāyaḥ || 446 ||
[Analyze grammar]