Chapter 438

śrīnārāyaṇa uvāca |
śruṇu lakṣmi camatkāraṃ tava jātaṃ purābhavam |
mayā bhaktaparīkṣārthaṃ tvayā preṣitayā kṛtam || 1 ||
[Analyze grammar]

purā puṇyanidhirnāma somavaṃśodbhavo nṛpaḥ |
māthuramaṇḍalarājyaṃ śaśāsa bhaktimān harau || 2 ||
[Analyze grammar]

sa tvekadā setubandhaṃ tīrthārthaṃ prayayau nṛpaḥ |
sarvādhikaṃ setutīrthaṃ gandhamādanagarbhitam || 3 ||
[Analyze grammar]

śrutvā śāstrebhya ādāya parivāraṃ hariśritam |
dhanuṣkoṭyāditīrtheṣu sasnau rāmeśvaraṃ sadā || 4 ||
[Analyze grammar]

siṣeve sakuṭumbaḥ sa yajñaṃ tatrā'karonmudā |
viṣṇuyāgā'vasāne sa mudā'vabhṛthakautukī || 5 ||
[Analyze grammar]

sasnau tīrthe dhanuṣkoṭau sadāraḥ saparicchadaḥ |
tatra śrīhariṇā lakṣmīrnṛpabhaktiṃ parīkṣitum || 6 ||
[Analyze grammar]

vaikuṇṭhātpreṣitā cāṣṭavarṣavayaḥsvarūpiṇī |
dhanuṣkoṭau samāgatya tasthau sā kamalālayā || 7 ||
[Analyze grammar]

rājā snātvā ca dānāni kṛtvā dadarśa tāṃ satīm |
atīva rūpasampannāṃ kanyāṃ cāruvilocanām || 8 ||
[Analyze grammar]

saravaśobhāmayī candrakāntaparidhirājitām |
puṇyanidhistāṃ papraccha kā tvaṃ kasyā'si kanyakā || 9 ||
[Analyze grammar]

atrā''gamaḥ kathaṃ kanye vada sarvaṃ yathātatham |
kanyā śrutvā'bhavad dīnā prāha taṃ nṛpasattamam || 10 ||
[Analyze grammar]

na me mātā pitā rājan vidyete tīrthavāñcchayā |
bhramāmyanāthā nṛpate hyupārjayāmi bhojanam || 11 ||
[Analyze grammar]

rājā prāha tadā kanye samāgaccha mayā saha |
kanyā prāha pitā bhūtvā yadi rakṣasi cennṛpa || 12 ||
[Analyze grammar]

tadā tvayā samaṃ rājan sutā bhūtvā nirantaram |
tvadgṛhe'haṃ nivatsyāmi tātaṃ tvāṃ paśyatī sadā || 13 ||
[Analyze grammar]

vinā madicchāṃ kaścinme mā gṛhṇātu karaṃ nṛpa |
tadā te mandire rājan vatsyāmi pitṛsevikā || 14 ||
[Analyze grammar]

rājā prāha sute me vai nāsti putrī yato mama |
bhava putrī sadā kanye me'styeka eva putrakaḥ || 15 ||
[Analyze grammar]

tava yasmin rucirbhadre tvāṃ tasmai pradadāmyaham |
madbhāryāyāḥ sutā bhūtvā mama cāntaḥpure vasa || 16 ||
[Analyze grammar]

kanyā prāha yadi rājan haṭhāt kaścit kareṇa mām |
grahīṣyati hyanāthāṃ ca jñātvā tadā tvayā nṛpa || 17 ||
[Analyze grammar]

śāsanīyaḥ sa eva syātputro mitraṃ ca bāndhavāḥ |
yato hi rājagarveṇa kumārā udvivartanāḥ || 18 ||
[Analyze grammar]

dharṣayanti deśakālavaiṣamye tadbibhemyaham |
tadbhayaṃ me tava pārśve kadācittvapi mā bhavet || 19 ||
[Analyze grammar]

ityuktaḥ sa nṛpaḥ prāha tathā'stviti tataḥ sutām |
rājā svabhāryāhaste tāṃ pradadau cā'bravīcca tām || 20 ||
[Analyze grammar]

rakṣemāṃ sarvathā sādhvīṃ puruṣāntarataḥ priye |
ityādiśya saha nītvā rājā svagṛhamāgataḥ || 21 ||
[Analyze grammar]

pālitāṃ poṣitāṃ kanyāṃ nyavātsīt sukhapūrvakam |
atha viṣṇuḥ parīkṣārthaṃ naro bhūtvā samāyayau || 22 ||
[Analyze grammar]

sakhībhiḥ kanyakā yatra puṣpāṇyavacinoti hi |
puṣpodyāne tīrthavāsī vipro bhūtvā samāyayau || 23 ||
[Analyze grammar]

tīrthajalaṃ kanyakābhyaḥ pradadau tulasīdalam |
śanaiḥ paścātkaraṃ tasyā haṭhājjagrāha bhūsuraḥ || 24 ||
[Analyze grammar]

tadā cukrośa sā kanyā cukruśuścānyakanyakāḥ |
mālākārastu tadvṛttaṃ kathayāmāsa bhūbhṛte || 25 ||
[Analyze grammar]

rājā samāyayau yatra tūrṇaṃ sabhaṭavāhanaḥ |
kanyābhirdarśito vipro haṭhātkarapradharṣakaḥ || 26 ||
[Analyze grammar]

rājñā tu nigṛhītaḥ sa badhvā nigaḍapāśitaḥ |
kārāgāre preṣitaśca kanyāstā bhavanaṃ yayuḥ || 27 ||
[Analyze grammar]

rājā rātrau tu nidrāyāṃ svapne vipraṃ dadarśa tam |
śaṃkhacakragadāpadmavanamālāvibhūṣitam || 28 ||
[Analyze grammar]

sakaustubhaśrīvatsāṃkoraskaṃ pītāmbaraṃ harim |
navīnajaladaśyāmaṃ garuḍādipravanditam || 29 ||
[Analyze grammar]

susmitaṃ kundakalikādantaṃ suvarṇakuṇḍalam |
pārṣadairmunibhirlakṣmīramāprabhādipūjitam || 30 ||
[Analyze grammar]

tasya pārśve kamale śrīkṛṣṇanārāyaṇapriyām |
svaputrīṃ kamalārūpāṃ dadarśa divyarūpiṇīm || 31 ||
[Analyze grammar]

dhṛtapaṃkajahastāṃ ca nīlakuñcitamūrdhajām |
diggajairabhiṣiktāṃgīṃ divyābharaṇabhūṣitām || 32 ||
[Analyze grammar]

mahālakṣmīṃ dadarśā'sau viṣṇupatnīṃ svakāṃ sutām |
evaṃ dṛṣṭvā sahasā cotthito rājā vicārya ca || 33 ||
[Analyze grammar]

kanyāgṛhe jagāmā'sau niḥśabde maunamāśritaḥ |
kanyā kanyāgṛhe cāste na vā ceti parīkṣitum || 34 ||
[Analyze grammar]

yadvā dṛṣṭaṃ mayā svapnaṃ satyaṃ vā'nṛtameva vā |
satyaṃ sā kamalā viṣṇoḥ śayane vartate navā || 35 ||
[Analyze grammar]

yadvā viṣṇurniśāmadhye rājate kiṃ tayā saha |
yadvā vipraḥ svayaṃ viṣṇurnigaḍe vartate navā || 36 ||
[Analyze grammar]

yadvā viṣṇusvarūpo'yaṃ śete kiṃ kanyayā saha |
iti sarvaṃ viniścetuṃ rājā cā'vidito janaiḥ || 37 ||
[Analyze grammar]

śanaiḥ śanairmadhyarātrau kanyāgṛhamavāpa ca |
tathaiva dṛṣṭavān kanyāṃ yathā svapne dadarśa tām || 38 ||
[Analyze grammar]

atha rājā maunameva dūrād dṛṣṭvā hariṃ śriyam |
yayau śīghraṃ nijapatnīṃ jagāda divyadarśanam || 39 ||
[Analyze grammar]

tadaiva nigaḍasthānaṃ samāruhya tu vājinam |
yayau draṣṭuṃ tadā tatra brāhmaṇo na vilokitaḥ || 40 ||
[Analyze grammar]

avāpā''ścaryamadhikaṃ punaḥ rājñīgṛhaṃ yayau |
patnīyukto mahāścaryamavāpa mumude hyati || 41 ||
[Analyze grammar]

śriyā sākaṃ hareḥ rātrau vidhnaṃ mā śayane bhavet |
iti vicārya vai rājā putrīgṛhaṃ yayau na vai || 42 ||
[Analyze grammar]

athodite bhāskare sa yayau kanyāgṛhaṃ śuciḥ |
dadarśa viṣṇusevāyāṃ pūjāyāṃ svasutāṃ tadā || 43 ||
[Analyze grammar]

rājā samāgataśceti vijñāya tu sutā hareḥ |
ājñāṃ gṛhītvā drāgeva rumābahiḥ samāyayau || 44 ||
[Analyze grammar]

praṇamya pitaraṃ lakṣmīrnināya svagṛhāntare |
tāvadviṣṇurabhūd viprarūpadhṛg bhikṣuko yathā || 45 ||
[Analyze grammar]

rājā viṣṇustu viprarūpaṃ tuṣṭāva premavihvalaḥ |
namaste me sutānātha prasīda kamalāpate || 46 ||
[Analyze grammar]

viprarūpa namastubhyamaparādhaṃ kṣamasva me |
namaste puṇḍarīkākṣa cakrapāṇe śriyaḥpate || 47 ||
[Analyze grammar]

namaḥ śrīvatsacihnāya namaḥ kaustubhadhāriṇe |
pārvatīpataye tubhyaṃ lakṣmīśāya namonamaḥ || 48 ||
[Analyze grammar]

māṇikīpataye prabhānāthāya viṣṇave namaḥ |
śrīnivāsāya śrīkṛṣṇanārāyaṇāya te namaḥ || 49 ||
[Analyze grammar]

padmeśāya padmāvatīsvāmine haraye namaḥ |
padminīśāya kṛṣṇāya bhārgavīśāya te namaḥ || 50 ||
[Analyze grammar]

nārāyaṇāya rāmāya sītāyāḥ pataye namaḥ |
sarasvatīpataye te gaṃgāyāḥ svāmine namaḥ || 51 ||
[Analyze grammar]

virajāyāḥ pataye te śrīdurgāpataye namaḥ |
matsutāpataye haṃsāmañjulāpataye namaḥ || 52 ||
[Analyze grammar]

kṛṣṇaviprātmane tubhyaṃ hṛdantarātmane namaḥ |
dayāmūrte namastubhyaṃ kambharāpataye namaḥ || 53 ||
[Analyze grammar]

namodhvajadhanurmatsyaśūlahastāya te namaḥ |
svastivaradahastāya kāntarūpāya te namaḥ || 54 ||
[Analyze grammar]

mayā nigaḍapāśābhyāṃ baddhastvaṃ parameśvara |
ajānataste bhaktasya tvaparādhān kṣamasva me || 55 ||
[Analyze grammar]

evaṃ stutvā kṛṣṇanārāyaṇaṃ śrīpuruṣottamam |
pādayoḥ patitaḥ paścāllakṣmīṃ tuṣṭāva vaiṣṇavīm || 56 ||
[Analyze grammar]

namaḥ kṛpāsvarūpāyai svalabdhāyai namonamaḥ |
namaḥ sutāsvarūpāyai divyadevyai namonamaḥ || 57 ||
[Analyze grammar]

gūḍhatanvyai kṛṣṇanārāyaṇapatnyai ca te namaḥ |
viṣṇuvakṣonivāsāyai kamalāyai namo namaḥ || 58 ||
[Analyze grammar]

rādhāyai ca sarasvatyai padminyai te namonamaḥ |
durgāyai ca mahālakṣmyai śāradāyai ca te namaḥ || 59 ||
[Analyze grammar]

gaṃgāyai ca tulasyai ca vṛndāyai te namo namaḥ |
padmāvatyai ca bhārgavyai kambharāyai ca te namaḥ || 60 ||
[Analyze grammar]

siddhyai puṣṭyai svadhāyai ca svāhāyai satataṃ namaḥ |
dakṣiṇāyai maṃgalāyai pārvatyai ca śriyai namaḥ || 61 ||
[Analyze grammar]

māṇikyāyai prabhāyai ca lalitāyai ca te namaḥ |
jayāyai jānakīdevyai dropadyai te namo namaḥ || 62 ||
[Analyze grammar]

nārāyaṇyai ca sandhyāyai ṣaṣṭhyai devyai namo namaḥ |
mātṛkāyai ca kṛṣṇāyai mañjulāyai namo namaḥ || 63 ||
[Analyze grammar]

śraddhāmedhābhūtidhātrīhaṃsākhyāyai ca te namaḥ |
dharaṇyai sarvavidyāyai buddhyai gopyai namo namaḥ || 64 ||
[Analyze grammar]

prakṛtyai te jaganmātaḥ putryai bhūyo namo namaḥ |
putrībhāve mayā cādhikṣiptaṃ vā śāsanaṃ kṛtam || 65 ||
[Analyze grammar]

tvaṃkārakaraṇaṃ lakṣmi kṣamasva mama sarvathā |
lokā vāṃ śiśavaḥ sarve jagatāṃ pitarau yuvām || 66 ||
[Analyze grammar]

sutāparādhaḥ kṣantavyaḥ pitṛbhyāṃ ca prasīdatam |
iti samprārthitau devau viṣṇuḥ puṇyanidhiṃ nṛpam || 67 ||
[Analyze grammar]

prāha rājanna vai bhīśca tvayā kāryā kadācana |
tvayā yajñaḥ kṛtaḥ setubandhe tadā hyahaṃ hariḥ || 68 ||
[Analyze grammar]

lakṣmīnārāyaṇaḥ kṛṣṇanārāyaṇaḥ pumuttamaḥ |
abhavaṃ suprasannaśca preṣitā kamalā mayā || 69 ||
[Analyze grammar]

tava yajñe prapūrtyarthaṃ sā dṛṣṭā'vabhṛthe tvayā |
tvayā sākaṃ tadā sā tu vartate'tra madājñayā || 70 ||
[Analyze grammar]

bhaktyā'haṃ tava vaśyo'smi bhaktipāśena yantritaḥ |
bhaktāparādhaṃ satataṃ kṣamāmyeva na saṃśayaḥ || 71 ||
[Analyze grammar]

tava bhaktiṃ sadā jñātuṃ sā lakṣmīste gṛhe sthitā |
tvayā saṃrakṣitā nityaṃ poṣitā matpriyā ramā || 72 ||
[Analyze grammar]

tenā'haṃ cātituṣṭo'smi matsvarūpā tviyaṃ satī |
lakṣmyāṃ yo bhaktimān loke sa madbhakto'bhidhīyate || 73 ||
[Analyze grammar]

asyāṃ yo vimukho rājan sa me dveṣṭā na saṃśayaḥ |
tvaṃ ramāṃ bhaktisampannaḥ sadā pūjitavānasi || 74 ||
[Analyze grammar]

mama pūjā kṛtā jātā lakṣmyabhinno'smyahaṃ yataḥ |
atastvayā nā'parādhaḥ kṛto'sti nigaḍādijaḥ || 75 ||
[Analyze grammar]

lakṣmīrakṣā kṛtā yasmād lakṣmyā vacanapālanāt |
ramāparādhakartāraṃ nigaḍe dhṛtavān yataḥ || 76 ||
[Analyze grammar]

tenā'pyatiprasanno'smi matpatnī rakṣitā tvayā |
tadrakṣatāṃ kurvatā rājan saṃketo'kāri yatpurā || 77 ||
[Analyze grammar]

tatsaṃketaḥ pālitaḥ sā sevā mama kṛtā tvayā |
sā priyā mama rājendra sevā sā'pi mama priyā || 78 ||
[Analyze grammar]

iyaṃ lakṣmīstava sutā tvayā satye kṛtaṃ sadā |
ityuktaḥ sa puṇyanidhiḥ sāśrunetro babhūva ha || 79 ||
[Analyze grammar]

atha lakṣmīstamuvāca pitaḥ prītā'smi sevayā |
rakṣitā'smi sadā cāhaṃ svatantrā'pi sadā tvayā || 80 ||
[Analyze grammar]

tava bhakteḥ prapuṣṭyarthamahaṃ viṣṇurihā''gatau |
bhaktyā prasevayā cāvāṃ santuṣṭau svaḥ sukhī bhava || 81 ||
[Analyze grammar]

āvayoḥ kṛpayā rājan lakṣmīste bhavatāt tathā |
mahadbhūmaṇḍalaiśvaryaṃ sadā te bhavatu dhruvam || 82 ||
[Analyze grammar]

āvayoḥ pādayugale bhaktirbhavatu te dhruvā |
dehānte cāvayordhāmaprāptiste'stu ca śāśvatī || 83 ||
[Analyze grammar]

sadā kṛṣṇapātivratyaparā bhaktistavāstviti |
evamuktvā mahālakṣmīḥ kṛṣṇanārāyaṇe priye || 84 ||
[Analyze grammar]

tirobabhūva sahasā garuḍaścāpyadṛśyata |
pārṣadāśca vyadṛśyanta hyāśīrvādaparāyaṇāḥ || 85 ||
[Analyze grammar]

vindhyāvalī rājapatnī śrīkṛṣṇasya ca darśanāt |
pārṣadānāṃ darśanācca mumude premavihvalā || 86 ||
[Analyze grammar]

yadā jñātavatī divyā lakṣmīḥ putrāṃ mamā'bhavat |
mayā sā sevitā nityaṃ lālitā pālitā sadā || 87 ||
[Analyze grammar]

rāmitā hasitā sādhvī śāsitā bhojitā muhuḥ |
snāpitā ca samudyāne vihāritā mayā saha || 88 ||
[Analyze grammar]

pāyitā marditā śiraḥprasādhitā'tiharṣitā |
āvāhitā ratnasiṃhāsane niṣāditā mayā || 89 ||
[Analyze grammar]

ākāritā sute putri kanyake ca kumārike |
śobhane tātike mātarduḥkhe sāntvayitā muhuḥ || 90 ||
[Analyze grammar]

spṛṣṭā śṛṃgāritā nityaṃ sakhībhiḥ saha preṣitā |
ānanditā mahodyāne rañjaneṣu ca rañjitā || 91 ||
[Analyze grammar]

anukūleṣu cārthyeṣu pradatteṣu prasāditā |
evaṃ bhāgyāt samālabdhā svapne'pi na viyojitā || 92 ||
[Analyze grammar]

na ca dūrīkṛtā putrī mama pārśvāt kadācana |
aho bhāgyaṃ ca sāphalyaṃ mama nāryāḥ saduttamam || 93 ||
[Analyze grammar]

yasyāḥ sevākṛto lābho mayā nāryā samarjitaḥ |
mama gṛhaṃ ca bhavanaṃ śayyāstaraṇavastukam || 94 ||
[Analyze grammar]

pātrāṇi cāsanādīni yānāni vāhanāni ca |
prasādāni ca divyāni pūjāni mokṣadāni vai || 95 ||
[Analyze grammar]

mama gṛhaṃ tu vaikuṇṭhaṃ divyaṃ jātaṃ na saṃśayaḥ |
sarvaṃ yadyat sutayā me spṛṣṭaṃ lakṣmyā nibhālitam || 96 ||
[Analyze grammar]

tatsarvaṃ divyatāṃ prāptaṃ kiṃ bhāgyaṃ varṇayāmi me |
aho lakṣmi mama mātaḥ sute putri punaḥ sukṛt || 97 ||
[Analyze grammar]

yadi me bhaktirasti śrīmatyāṃ tvayi sanātanī |
yadi me pātivratyaṃ ca kṛṣṇe patyau narāyaṇe || 98 ||
[Analyze grammar]

tadā me darśanaṃ sādhvi prāṇeśi dehi me sute |
kathamadṛśyatāṃ prāptā kathaṃ me nahi dṛśyase || 99 ||
[Analyze grammar]

ityuktvā netrasalilaṃ saharṣā pramumoca sā |
tāvallakṣmīḥ smitahāsyā''nanā caṃdrasamujjvalā || 100 ||
[Analyze grammar]

nirgatya śrīharervakṣaḥsthalāt kroḍā''gatā sthitā |
mātustuvakṣasi luptā kṣaṇaṃ snehena putrikā || 101 ||
[Analyze grammar]

aṃkasthitāyāḥ śirasaṃ jighrāti sma nṛpapriyā |
uvāca putri yatrā'si śrīkṛṣṇamandire sute || 102 ||
[Analyze grammar]

dehānte māṃ patiyuktāṃ nayethāḥ kṛṣṇavallabhe |
omityuktvā miṣṭajalaṃ pītvā vilokya cānanam || 103 ||
[Analyze grammar]

śīghraṃ tirodadhe lakṣmīrnārāyaṇastiro'bhavat |
pārṣadāśca garuḍaśca tiro'bhavan kṣaṇāt priye || 104 ||
[Analyze grammar]

tvāṃ samādāya garuḍe vaikuṇṭhamahamāptavān |
rājā vairāgyamāpannaḥ putre dhuraṃ nidhāya ca || 105 ||
[Analyze grammar]

punaḥ puṇyaṃ setumādhavākhyaṃ tīrthaṃ jagāma ha |
patnīyukto hariṃ dhyāyan śeṣaṃ kālaṃ nināya saḥ || 106 ||
[Analyze grammar]

kṛṣṇanārāyaṇaṃ dhyātvā dehānte muktimāptavān |
vindhyāvalī ca tatpatnī tamevā'numamāra sā || 107 ||
[Analyze grammar]

pativratā patiprāṇā lakṣmīkṛṣṇaparāyaṇā |
samutpādya satī vahniṃ pādāṅguṣṭhāccitopari || 108 ||
[Analyze grammar]

yāvaddagdhuṃ samārebhe tāvallakṣmīnarāyaṇau |
āyayaturdampatīṃ tu netuṃ vaikuṇṭhamuttamam || 109 ||
[Analyze grammar]

vimāne tau samārohayitvā bhaktau harivratau |
pativratau divyadehau ninyaturdhāma vaiṣṇavam || 110 ||
[Analyze grammar]

iti te kathitaṃ lakṣmi tavaiva caritaṃ śubham |
etatpaṭhanvā śṛṇvanvā vaikuṇṭhe labhate gatim || 111 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne puṇyanidhinṛpateḥ setubandharāmeśvare yajñakaraṇena putrīrūpeṇa lakṣmīprāptiḥ lakṣmīkṛtaparīkṣaṇe paramabhāgavatasabhāryakanṛpaternārāyaṇā'nugraho brāhmaṇarūpeṇāgamanam divyadarśanam vaikuṇṭhanayanaṃ cetyādinirūpaṇanāmā'ṣṭātriṃśadadhikacatuśśatatamo'dhyāyaḥ || 438 ||
[Analyze grammar]