Chapter 436

śrīnārāyaṇa uvāca |
sarvamaṃgalamāṃgalyaṃ tvayi lakṣmi suvartate |
tvaṃ yathā'si mama svāmivratā nānyāsti tādṛśī || 1 ||
[Analyze grammar]

yā madvakṣaḥsthale nityaṃ vartase tvaṃ mama priyā |
tvāṃ vinā tu mama mūrtirniḥśrīkā śuṣkakāṣṭhavat || 2 ||
[Analyze grammar]

bhavatyeva na sandehastvayā ramyā prakāśate |
pare'kṣare mama dhāmni pumuttamasya tatra me || 3 ||
[Analyze grammar]

jayākhyā lalitākhyā tvaṃ vartase mama kāminī |
goloke me kṛṣṇanāmno rādhā durgā sarasvatī || 4 ||
[Analyze grammar]

gaṃgā padmā pañcarūpā tataḥ koṭisvarūpiṇī |
vartase tvaṃ mama patnī pātivratyaparāyaṇā || 5 ||
[Analyze grammar]

vaikuṇṭhe me vartase tvaṃ nārāyaṇasya kāminī |
lakṣmīrūpā mama sādhvī koṭisvarūpadhāriṇī || 6 ||
[Analyze grammar]

amṛtākhye pade bhūmno nārāyaṇasya me priyā |
caturvidhe ca vaikuṇṭhe mahālakṣmīstvamīśvarī || 7 ||
[Analyze grammar]

sītā prabhā māṇikī tvaṃ pārvatī maṃgalā satī |
vartase me pātivratyaparāyaṇā mahāsatī || 8 ||
[Analyze grammar]

vahneḥ patnī mama svāhā vahnyātmake mayi sthitā |
tvāṃ vinā bhojanaṃ naiva hutaṃ gṛhṇāmi vai kvacit || 9 ||
[Analyze grammar]

devānāmapi tvaddhastātprāpyate hutamanvaham |
pitaṇāṃ mama rūpāṇāṃ svadhā tvaṃ vartase satī || 10 ||
[Analyze grammar]

havye kavye tarpaṇe ca tvāṃ vinā nā''pyate'rpitam |
yajñasya me sadā pātivratyadharmā'si dakṣiṇā || 11 ||
[Analyze grammar]

vinā tu dakṣiṇāṃ nā'haṃ pūrṇo bhavāmi vai kratuḥ |
yajñe vinā dakṣiṇāṃ tu phalaṃ putro na janyate || 12 ||
[Analyze grammar]

phalaṃ vinā kṛtaṃ sarve śramamātraṃ vyayātmakam |
mama kārtikarūpasya devasenā'bhidhānikā || 13 ||
[Analyze grammar]

tvamevā'si mahālakṣmi tvāṃ vinā vijayo na vai |
tvaṃ sā mātṛsvarūpā'si ṣaṣṭhīdevī dayāvatī || 14 ||
[Analyze grammar]

dhātrī tvaṃ bālakānāṃ tu rakṣiṇī ṣaṣṭhikā sadā |
sā tvaṃ cāpatyadātrī cāpatyarakṣāvidhāyinī || 15 ||
[Analyze grammar]

apatyapuṣṭidātrī ca ratā vighnanivāraṇe |
sā tvaṃ vai mānasī devī jaratkārvīsvarūpiṇī || 16 ||
[Analyze grammar]

nāgamātā''stīkamātā viṣād rakṣākarī sadā |
jaratkārusvarūpasya mama patnī pativratā || 17 ||
[Analyze grammar]

manasā nāginī sarpajātīnāṃ parameśvarī |
kanyā bhagavatī sā tvaṃ kaśyapasya hi mānasī || 18 ||
[Analyze grammar]

triyugaṃ tu tapastaptvā kṛṣṇasya paramātmanaḥ |
jaratkāruśarīraṃ ca dṛṣṭvā śrīpuṣkare hariḥ || 19 ||
[Analyze grammar]

gopīpatirahaṃ nāma jaratkārurdadhe tava |
jaradgaurī viṣṇubhaktā pātivratyaparāyaṇā || 20 ||
[Analyze grammar]

jaratkārurjaradgaurī manasā siddhayoginī |
vaiṣṇavī nāgabhaginī śaivī nāgeśvarī tathā || 21 ||
[Analyze grammar]

jaratkārupriyā''stīkamātā viṣaharīti ca |
mahājñānayutā cāpi tvaṃ devī sarvapūjitā || 22 ||
[Analyze grammar]

tava nāmnāṃ pāṭhakasya nāgabhītirna vidyate |
jaratkārumunīndrāya kaśyapastvāṃ dadau purā || 23 ||
[Analyze grammar]

ayācito muniśreṣṭho jagrāha brāhmaṇājñayā |
kṛtvodvāhaṃ mahāyogī viśrāntastapasā ciram || 24 ||
[Analyze grammar]

suṣvāpa devyā jaghane vaṭamūle tu puṣkare |
jagāmā'staṃ dinakaraḥ sandhyākālaśca gacchati || 25 ||
[Analyze grammar]

vinā sandhyāṃ mama patyurbrahmahatyāvalepanam |
bhavedataḥ sudharmiṣṭhā bodhayāmāsa taṃ patim || 26 ||
[Analyze grammar]

kintu buddhvā'bhavad ruṣṭo jagāda kopagarbhitam |
nidrābhaṃgo mama sādhvi kathaṃ vada kṛtastvayā || 27 ||
[Analyze grammar]

vyarthaṃ vratādikaṃ tasyā yā bhartustvapakāriṇī |
tapastvanaśanaṃ cāpi vyarthaṃ dānādikaṃ vratam || 28 ||
[Analyze grammar]

yayā patiḥ pūjitaśca śrīkṛṣṇaḥ pūjitastathā |
pativratāvratārthaṃ ca patirūpī hariḥ svayam || 29 ||
[Analyze grammar]

sarvadānāni yajñāśca yāvattīrthāni dakṣiṇāḥ |
tapāṃsi copavāsāśca vratāni devapūjanam || 30 ||
[Analyze grammar]

svāmisevākalāṃśasya na yānti samatāmapi |
patisevāparā patnī vaikuṇṭhe svāminā saha || 31 ||
[Analyze grammar]

modate śrīkṛṣṇanārāyaṇabhaktiparāyaṇā |
vipriyaṃ kurute bharturvipriyaṃ vadati priyam || 32 ||
[Analyze grammar]

kumbhīpākaṃ vrajetsā tu cāṇḍālī jāyate tataḥ |
iti śrutvā satī patyuḥ pādayoḥ patitā''ha ca || 33 ||
[Analyze grammar]

sandhyālopabhayenaiva nidrālopaḥ kṛtastava |
kuru kṣamāṃ priyā'jñāyāṃ duṣṭāyāṃ mayi suvrata || 34 ||
[Analyze grammar]

śṛṃgārā''hāranidrāṇāṃ yā tu bhaṃgaṃ karoti sā |
pravrajet kālasūtrākhyaṃ nirayaṃ sevikā hyapi || 39 ||
[Analyze grammar]

ityuktvā pādayoḥ patyuḥ papāta tāvadeva tu |
sūryaḥ svaṃ śaptumudyantaṃ jaratkāruṃ vilokya vai || 36 ||
[Analyze grammar]

sandhyayā saha bhagavān bhāskarastvājagāma ha |
sūryaṃ dṛṣṭvā jaratkāruradhyakṣipat kathaṃ rave || 37 ||
[Analyze grammar]

mama sandhyāṃ vinā deva cā'staṃ gantuṃ samicchasi |
vinā sandhyāṃ mama nidrābhaṃgo jātaḥ prapaśyasi || 38 ||
[Analyze grammar]

sūryaḥ prāha śṛṇu vipra nā'hamastaṃgatastadā |
tava sandhyāṃ vinā cāhaṃ kathaṃ gacchāmi cāstatām || 39 ||
[Analyze grammar]

kṣamasva bhagavan brahman māṃ śaptuṃ nocitaṃ mune |
viprakrodhe jagannāśo vipre tuṣṭe jagat sthiram || 40 ||
[Analyze grammar]

brāhmaṇaḥ saḥ kṛṣṇabhakto bhāvayellokamaṃgalam |
evaṃ śrutvā dvijaḥ śānto dadāvāśiṣameva ca || 41 ||
[Analyze grammar]

sūryo yayau nijasthāne jaratkārustataḥ param |
patnīṃ tu bandhanaṃ matvā vṛddhasya taruṇī viṣam || 42 ||
[Analyze grammar]

vicārya manasāṃ bhāryāṃ tatyāja śokaduḥkhitām |
sā sasmāra guruṃ śaṃbhumiṣṭadevaṃ hariṃ vidhim || 43 ||
[Analyze grammar]

kaśyapaṃ janmadātāraṃ samājagmustu te drutam |
pātivratyena dharmeṇa bhaktyā te tu samāyayuḥ || 44 ||
[Analyze grammar]

jaratkārustadā''ścaryaparo bhūtvā nanāma tān |
kathamāgamanaṃ tvatretyevaṃ praśnaṃ cakāra saḥ || 45 ||
[Analyze grammar]

brahmā prāha mahāsarpa neyaṃ sādhāraṇī priyā |
pātivratyena dharmeṇa śaktā sṛṣṭiṃ surakṣitum || 46 ||
[Analyze grammar]

iyaṃ cāsti mahālakṣmīkalā dharmaparāyaṇā |
vṛthā sā kathayet tadvat tvayā kāryaṃ na cā'nyathā || 47 ||
[Analyze grammar]

na tyaktavyā dharmapatnī dharmiṣṭhā patidharmiṇī |
asyāstyāge tava dharmalopaḥ śaśvadbhaviṣyati || 48 ||
[Analyze grammar]

tena tvaṃ narakaṃ gantā paralokaṃ vicāraya |
kuruṣvā'syāṃ sutotpattiṃ dharmarakṣaṇahetave || 49 ||
[Analyze grammar]

yatirvā brahmacārī vā bhikṣurvanacaro'pi vā |
jāyāyāṃ susutotpattiṃ kṛtvā paścād bhavenmuniḥ || 50 ||
[Analyze grammar]

akṛtvā tu sutotpattiṃ virāgī yastyajet priyām |
sravet tapastatpuṇyaṃ ca cālinyāṃ tu yathā jalam || 51 ||
[Analyze grammar]

vṛkṣo'pi vallikāṃ stambe lagnāṃ dūrīkaroti na |
nā''tmā buddhiṃ svīyapatnīṃ dūrīkaroti vai kvacit || 52 ||
[Analyze grammar]

divā rātriṃ na tyajati śabdaḥ śakti kṣiṇoti na |
bhāskaro dyāṃ na tyajati jaratkāruḥ kathaṃ priyām || 53 ||
[Analyze grammar]

ityuktaḥ sa jaratkārurjagrāha brahmaṇo vacaḥ |
na tatyāja priyāṃ paścād devāste prayayurdivam || 54 ||
[Analyze grammar]

atha prāha jaratkārvī svapatiṃ jñānaśālinam |
varaṃ tyāgo viṣayāṇāṃ dampatyorapi sarvathā || 55 ||
[Analyze grammar]

patyuḥ patnyā na vai ślāghyastyāgastayoḥ parasparam |
yadi necched viṣayāṃśca saha sthitvā sukhaṃ vaset || 56 ||
[Analyze grammar]

svāminā yastiraskāraḥ patnyāḥ syānmaraṇāya saḥ |
svāminā yā parityaktā mānahīnā tu sā bhuvi || 57 ||
[Analyze grammar]

sarvatirakṛtipātrabhūtā sarvasaubhāgyavarjitā |
bindukajjalakabarīyogyā'pi na bhavettataḥ || 58 ||
[Analyze grammar]

tiraskṛtāyā nāryāstu jīvanaṃ vyarthameva yat |
tasmānnātha jaratkāro yadicchasi tapaḥ param || 59 ||
[Analyze grammar]

tadā saṃkalpamātreṇa dehi me mānasaṃ sutam |
tavā''jñayā sadā'haṃ ca tapaḥ karomi sannidhau || 60 ||
[Analyze grammar]

sevāṃ kariṣye kāntasya viṣayān parihāya ca |
yadvā kāntā''jñayā yatra vāso me yogya iṣyate || 61 ||
[Analyze grammar]

tatra vasāmi kāntasyā''jñayā'raṇye'ntike'thavā |
yatra vartāmi tatraiva tavaiva sattayā prabho || 62 ||
[Analyze grammar]

kāntasattāvihīnā na vastumicchāmi prāṇada |
tvadīyā'haṃ na cānyasya tvāṃ vinā kva vasāmyaham || 63 ||
[Analyze grammar]

dūre tvāṃ hṛdaye kṛtvā vasiṣye parvate vane |
nikaṭe tvāṃ hṛdi kroḍe kṛtvā sthāsye kṛpāṃ kuru || 64 ||
[Analyze grammar]

ityuktaḥ sa jaratkāruḥ śuddhāṃ patnīṃ vicārya ca |
cakre tannābhisaṃsparśaṃ yogādvai putralabdhaye || 65 ||
[Analyze grammar]

muneḥ karasparśamātrāt sadyo garbho babhūva ha |
patiḥ prāha manase te śreṣṭhaḥ putro bhaviṣyati || 66 ||
[Analyze grammar]

jitendriyāṇāṃ pravaro dharmiṣṭho vaiṣṇavāgraṇīḥ |
tejasvī ca tapasvī ca yaśasvī ca guṇānvitaḥ || 67 ||
[Analyze grammar]

varo vedavidāṃ cāpi yogināṃ jñānināṃ varaḥ |
viṣṇubhakto dhārmikaśca kuloddhārakaraḥ paraḥ || 68 ||
[Analyze grammar]

pativratā suśīlā tvaṃ supriyā priyavādinī |
dharmiṣṭhā putramātā tvaṃ kulajā kulapālikā || 69 ||
[Analyze grammar]

bhava tādṛśaputrasya jananī lokapūjitā |
kā mātā kṛṣṇasambandhabodhinī nā'parā sati || 70 ||
[Analyze grammar]

kaḥ putro yo hariprāptisahāyo nā'paraḥ priye |
ko bandhuryo haribhaktiprado na ca paraḥ śubhe || 71 ||
[Analyze grammar]

yo bandhachit sa syāt pitā harervartmapradarśakaḥ |
sā garbhadhāriṇī yā vai garbhavāsavimocinī || 72 ||
[Analyze grammar]

kṛṣṇadhāmapradātā yaḥ sa gururviṣṇubhaktidaḥ |
patiḥ sa yo muktipālaḥ kṛṣṇo vā vaiṣṇavo'thavā || 73 ||
[Analyze grammar]

sa eva tu guruḥ sādhvi jñānadaḥ kṛṣṇa eva saḥ |
jñānado mokṣadaḥ kṛṣṇamantradaśca patirguruḥ || 74 ||
[Analyze grammar]

dattaṃ jñānaṃ mayā tubhyaṃ tvayā datto vṛṣo mayi |
jñānaṃ dharmaḥ śrīkṛṣṇasya sevāto na viśiṣyate || 75 ||
[Analyze grammar]

jñānadaḥ satyadaḥ svāmī jñānādbandho viśīryate |
bandhanāśāya kṛṣṇasya bhaktido jñānado guruḥ || 76 ||
[Analyze grammar]

sa patiḥ saḥ ṛtaḥ svāmī nāthaḥ kānto narāyaṇaḥ |
sa ripuḥ śiṣyaghātī ca yo na bandhād vimocayet || 77 ||
[Analyze grammar]

jananīgarbhajāt kleśād yamatāḍanaduḥkhataḥ |
na mocayed yaḥ sa kathaṃ guruḥ patiśca bāndhavaḥ || 78 ||
[Analyze grammar]

madājñayā bhaja sādhvi śrīkṛṣṇaṃ vrataśālinī |
parabrahmā'cyutaṃ kṛṣṇanārāyaṇaṃ sumokṣadam || 79 ||
[Analyze grammar]

mayā chalena tvaṃ tyaktā doṣo me kṣamyatāṃ priye |
matto'pyadhikā dharme ca sauśīlye bhajane jape || 80 ||
[Analyze grammar]

jñāne bhaktau virāge ca vartase tvaṃ pativrate |
tvayā me janmasāphalyaṃ mokṣo me karagastathā || 81 ||
[Analyze grammar]

triloke vijayaścāpi tvayā satyā mamā'sti yat |
kariṣye puṣkare cāhaṃ tapaḥ paramadāruṇam || 82 ||
[Analyze grammar]

śrīkṛṣṇacaraṇāmbhoje dhṛtvā buddhīndriyādikam |
dhananārīgṛheṣvāsthā pravṛttipathagāminām || 83 ||
[Analyze grammar]

śrīkṛṣṇacaraṇe tvāsthā nivṛttinispṛhārthinām |
vada devi sahavāse kvacinme mānasaṃ calam || 84 ||
[Analyze grammar]

saṃkṣobhaṃ prāpsyate tasmād dampatyorekabhūtale |
sadā''vāso bandhanaṃ syād viyogau guṇatāṃ vrajet || 85 ||
[Analyze grammar]

tasmād viyogo yogyo vai yadvai śreṣṭhaṃ tadācara |
sahavāse dūravāse prasanno'smi sadā tvayi || 86 ||
[Analyze grammar]

ārye kuru yathā''tmanorbandhacchedaśca mokṣaṇam |
jaratkāruvacaḥ śrutvā mānasī kamalākalā || 87 ||
[Analyze grammar]

yogyaṃ mene viyogaṃ vau saṃyogaṃ viṣabandhanam |
api patnī sadā pārśve ṛtudharmaṃ samāśritā || 88 ||
[Analyze grammar]

patiṃ saṃyojayet kāme patirvā vegataḥ kvacit |
tasmātjñānavatoścātra dampatyormokṣakāṃkṣiṇoḥ || 89 ||
[Analyze grammar]

jñātvā viyojanaṃ yuktaṃ bhayaṃ yatra na vidyate |
pātivratyaṃ patyurājñā dūre vā nikaṭe'pi vā || 90 ||
[Analyze grammar]

patnīvrataṃ tu patyarthaṃ śreyaskāmaḥ sadā patiḥ |
kāmo doṣo na vai śreyaḥprado bhavati nārakaḥ || 91 ||
[Analyze grammar]

tasmānmokṣecchukayordampatyorviyojanaṃ varam |
mayā gantavyamevā'dya satīpārvatīsannidhau || 92 ||
[Analyze grammar]

kailāse kāntavacasā prāptavyo mokṣa eva hi |
iti vicārya tu satī mānasī nāganandinī || 93 ||
[Analyze grammar]

śokā'śrunetrā vinayāduvāca prāṇavallabham |
śreyo'rthaṃ vai tvayā nātha viyogo manyate sukhaḥ || 94 ||
[Analyze grammar]

yathā prasanno bhagavān taccikīrṣāmi nānyathā |
gacchāmyahaṃ tu kailāsaṃ pārvatīcaraṇe'niśam || 95 ||
[Analyze grammar]

kariṣye bhajanaṃ tatra kṛṣṇanārāyaṇasya vai |
yadā smarāmi bandho tvāṃ tadā māmāgamiṣyasi || 96 ||
[Analyze grammar]

bandhubhedaḥ kleśataśca putrabhedastataḥ paraḥ |
prāṇeśabhedaḥ prāṇānāṃ vicchedakastato'dhikaḥ || 97 ||
[Analyze grammar]

patiḥ pativratānāṃ tu śataputrādhikaḥ priyaḥ |
sarvasmāttu priyaḥ strīṇāṃ priyastenocyate suraiḥ || 98 ||
[Analyze grammar]

putre yathaikaputrāṇāṃ vaiṣṇavānāṃ yathā harau |
netre yathaikanetrāṇāṃ tṛṣitānāṃ yathā jale || 99 ||
[Analyze grammar]

yathā parasve caurāṇāṃ kāmukānāṃ yathā striyām |
viduṣāṃ ca yathāśāstre vāṇijye vaṇijāṃ yathā || 100 ||
[Analyze grammar]

tathā śaśvanmanaḥ kānte sādhvīnāṃ yoṣitāṃ prabho |
kiṃ karomi yathā kāntaḥ prasanno vṛṣa eva me || 101 ||
[Analyze grammar]

ityuktvā sājaratkārvī papāta svāminaḥ pade |
uvāca māṃ tu kailāsaṃ samprāpaya kṛpānidhe || 102 ||
[Analyze grammar]

śaṃkarāya ca pārvatyai nivedaya tapaḥ param |
kāraṇaṃ yena niḥśaṃkā mānyā syāṃ tatra sādarā || 103 ||
[Analyze grammar]

ityuktastu jaratkārustathāstvityabhidhāya tām |
kṣaṇaṃ cakāra kroḍe tāṃ premṇā dadarśa tanmukham || 104 ||
[Analyze grammar]

pasparśa pāṇinā kāntāṃ viyogāya kṛpānidhiḥ |
netrodakena manasāṃ snapayāmāsa tāṃ satīm || 105 ||
[Analyze grammar]

sā'śrubhiśca muneḥ kroḍaṃ siṣedha bhedakātarā |
tato jñānena tau dvau ca viśokau saṃbabhūvatuḥ || 106 ||
[Analyze grammar]

jagmatustau tu kailāsaṃ nematuḥ pārvatīṃ śivam |
jaratkāruḥ svavṛttāntaṃ kathayāmāsa śaṃbhave || 107 ||
[Analyze grammar]

śaṃbhuścāpi prasanno'bhūt pārvatī ca tato'dhikā |
viyogaduḥkhaṃ naivā'sti yogināmīdṛśī gatiḥ || 108 ||
[Analyze grammar]

śaṃbhuṃ ca pārvatīṃ datvā jaratkārvīṃ svayoṣitam |
jagāma tapase vipraḥ puṣkaraṃ tvarbudācale || 109 ||
[Analyze grammar]

mānasī tu guruṃ śaṃbhuṃ gurvīṃ prāpya ca pārvatīm |
mumude tapasā nityaṃ vavṛdhe mandire guroḥ || 110 ||
[Analyze grammar]

atha kāle gate sādhvī suṣuve bālakaṃ śubham |
nārāyaṇāṃśaṃ ca mahājñānināṃ yogināṃ gurum || 111 ||
[Analyze grammar]

saṃskārān kārayāmāsa śaṃkaro'sya tataḥ param |
vedādīn pāṭhayāmāsa jñāna brahmaparaṃ tathā || 112 ||
[Analyze grammar]

bhaktirāste svakānte cā'bhīṣṭe deve harau gurau |
yasyāstena ca tatputraḥ śrīhareṇā''stikaḥ kṛtaḥ || 113 ||
[Analyze grammar]

tadā smṛto jaratkāruḥ putradarśanahetave |
samāgatya sutaṃ dṛṣṭvā cāśīrbhiḥ saṃprayujya ca || 114 ||
[Analyze grammar]

śaṃbhuṃ natvā priyāṃ datvā mānasaṃ puṣkaraṃ yayau |
āstiko'pi yayau pitrā samaṃ śrīpuṣkaraṃ tadā || 115 ||
[Analyze grammar]

divyaṃ varṣatrilakṣaṃ tu tapastaptvā śivaṃ prabhum |
jananīṃ svāṃ namaskartuṃ kailāsaṃ tvāyayau tataḥ || 116 ||
[Analyze grammar]

āstīkaḥ svajananyā'nugato hi kaśyapaṃ yayau |
tāṃ saputrāṃ sutāṃ dṛṣṭvā kaśyapo mudamāptavān || 117 ||
[Analyze grammar]

sā saputrā ca suciraṃ tasthau tātālaye satī |
kṛṣṇabhaktiparā sādhvī mokṣamārgaparāyaṇā || 118 ||
[Analyze grammar]

putrayuktā mānasā sā sarpasatre hyupasthitā |
pātivratyena dharmeṇa tathā''stīkabalena ca || 119 ||
[Analyze grammar]

kṛṣṇanārāyaṇabhaktyā rarakṣa bhogino'khilān |
seyaṃ lakṣmi mānasī tvaṃ nāginī manasā hyabhūḥ || 120 ||
[Analyze grammar]

tvameva tripuradīnāṃ nāśe maṃgalacaṇḍikā |
surāṇāṃ maṃgaladā ca daityānāṃ caṇḍanāśikā || 121 ||
[Analyze grammar]

hyabhūstvaṃ surabhirjātā dugdhadātrī ca dehinām |
nārāyaṇī jaganmātā kambharā tvamabhūrbhuvi || 122 ||
[Analyze grammar]

padminī tulasī vṛndā prabhā pārvatī bhārgavī |
mādhavī tvamabhūrnaikā matpativratapālikā || 123 ||
[Analyze grammar]

tvaṃ haṃsā maṃjulā campā dayā muktā ca devikā |
śāntiḥ śāntā ca savitā rukmiṇī śrīrjayā'nilā || 124 ||
[Analyze grammar]

hemnī ca mauktikā svarṇā sītā padmāvatī prathā |
rādhā gaurī kasturikā nalinī vijayā mudā || 125 ||
[Analyze grammar]

hariṇī lalitā candrā kumudā ca sarojinī |
bahudhā vartamānā tvaṃ yuge yuge prasevase || 126 ||
[Analyze grammar]

iti te kathitaṃ lakṣmi pāpatāpapraṇāśanam |
kṛṣṇapativrataṃ śrāvātpāṭhānmuktirbhavetsukham || 127 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne lakṣmyā anekāvatāreṣu jaratkārvīpativratāyāṃ svapatijaratkārostapaḥprasthāne kailāse vāsa āstīkākhyaputraprāptiścetyādinirūpaṇanāmā ṣaḍtriṃśadadhikacatuśśatatamo'dhyāyaḥ || 436 ||
[Analyze grammar]