Chapter 435

śrīnārāyaṇa uvāca |
śṛṇu tvaṃ manasā sārdhaṃ bravīmyatyadbhutāṃ kathām |
ajñā api pramodante yāṃ śrutvā padmaje priye || 1 ||
[Analyze grammar]

marubhūmau girau deśe purā vai gālavo muniḥ |
parabrahma harikṛṣṇanārāyaṇaṃ smaran sadā || 2 ||
[Analyze grammar]

tapastepe girau svasyāśrame vṛkṣajalānvite |
putrī tasyā'tisaubhāgyā nāmnā kāntimatī satī || 3 ||
[Analyze grammar]

kṛṣṇapativratā bhaktā sādhvī pūtā'tivaiṣṇavī |
tulasīmālikāṃ kṛṣṇāṃ kaṇṭhe dhārayati dhruvām || 4 ||
[Analyze grammar]

kare ca mālikāṃ dhṛtvā kṛṣṇakṛṣṇeti sarvadā |
japaṃ karoti sā sādhvī rūpayauvanaśālinī || 5 ||
[Analyze grammar]

kṛṣṇanārāyaṇaṃ hitvā patiṃ nānyaṃ hi vāñchati |
patiṃ satyaṃ paraṃ kṛṣṇaṃ jñātvā kṛṣṇapativratā || 6 ||
[Analyze grammar]

śayane bhojane yāne bhramaṇe cāśrame drume |
pāne dehādikārye'pi na vismarati taṃ patim || 7 ||
[Analyze grammar]

śrīkṛṣṇastāṃ rahasye vai pratyakṣo hyabhavat kvacit |
athaikadā parīkṣāṃ vai kṛtavān bhagavān svayam || 8 ||
[Analyze grammar]

yathā nityaṃ ca sā bālā vedisammārjanādikam |
balyarthaṃ ca muneḥ puṣpāharaṇaṃ samidhāṃ tathā || 9 ||
[Analyze grammar]

ānayanaṃ karotyeva tathā sā divase satī |
pūjāyāṃ kṛṣṇabalyarthaṃ puṣpāṇyāhartumudyatā || 10 ||
[Analyze grammar]

āśramasya samīpe sā puṣpastambake kanyakā |
gatvā puṣpāṇi ramyāṇi samāhṛtya ca peṭake || 11 ||
[Analyze grammar]

kṛtvā nivavṛte yāvat tāvattā puṣṭayauvanām |
vyomayānena nirgacchan vidyādharakumārakaḥ || 12 ||
[Analyze grammar]

sudarśanābhidho dṛṣṭvā kāmamohavaśaṃgataḥ |
tayā riraṃsukāmaḥ sa vimānāgrādavātarat || 13 ||
[Analyze grammar]

kanyāṃ prāha nijasnehaṃ darśayan snigdhayā girā |
yadi kanye parakīyā nāsi cet tvāṃ prakāmaye || 14 ||
[Analyze grammar]

gāndharveṇa vidhinā'tra yadi yogyaṃ hi manyase |
sukaṇṭhanāmadheyasya vidyādharasuto'smyaham || 15 ||
[Analyze grammar]

sudarśanābhidhastvaṃ ca vada svasyā manogatam |
parigṛhṇīṣva māṃ bhadre bhajamānamupasthitam || 16 ||
[Analyze grammar]

tadā kāntimatī prāha kanyā'haṃ gālavasya vai |
anūḍhā vaiṣṇavī śuddhā pitṛsevāparāyaṇā || 17 ||
[Analyze grammar]

kṛṣṇanārāyaṇakāntaśuśrūṣaṇaparāyaṇā |
nānyaṃ patiṃ samicche'haṃ pitā kopaṃ vidhāsyati || 18 ||
[Analyze grammar]

kusumānāṃ vilambena vidyādhra gaccha mā ciram |
kanyā tu pituradhīnā na svatantrā kadācana || 19 ||
[Analyze grammar]

nā'haṃ kāṃkṣe patiṃ cāpi viṣṇubhaktā tapasvinī |
ityuktaḥ sa tu vidyādhro gatvā pārśve prakāmataḥ || 20 ||
[Analyze grammar]

jagrāha tāṃ tu keśeṣu tāvad bālā samuccakaiḥ |
cakranda sahasā vidyādharājjanaka trāhi mām || 21 ||
[Analyze grammar]

tāvadeva kṣaṇāttatra pārśvasthā gālavādayaḥ |
śrutvā tūrṇaṃ samājagmurdadṛśustaṃ sudarśanam || 22 ||
[Analyze grammar]

sutāṃ tyaktvā bhayācchīghraṃ palāyamānaṃ cāmbare |
gālavastāṃ śaśāpaivaṃ duṣṭastvaṃ mānuṣo bhava || 23 ||
[Analyze grammar]

vyomamārgātpatatvatra dharṣaṇasya phalaṃ vraja |
ciraṃ kālaṃ yāhi nindāṃ tato vetālatāṃ vraja || 24 ||
[Analyze grammar]

māṃsaśoṇitabhoktā tvaṃ bhava duḥkhī mahāvane |
ityuktasya tadā tadvai vimānaṃ patitaṃ kṣitau || 25 ||
[Analyze grammar]

vidyādhraḥ patitastasmād vimānaṃ tu divaṃ gatam |
karmavaśād yamunāyāstaṭe ciranivāsinaḥ || 26 ||
[Analyze grammar]

govindasvāminaḥ patnyāṃ vidyādhro bālako'bhavat |
vijayadattasaṃjñāṃ ca tasya cakre pitā dvijaḥ || 27 ||
[Analyze grammar]

jātismaro hyabhūt so'pi pūrvakarma smaratyapi |
yuvā putro'bhavad yāvad yātrārthaṃ kāśikāṃ purīm || 28 ||
[Analyze grammar]

saputrabhāryo govindasvāmī yayau śanaiḥ śanaiḥ |
mārgā''gate prayāge ca kṛtvā tīrthaṃ tataśca saḥ || 29 ||
[Analyze grammar]

tatratyaṃ yoginaṃ kaṃcit kapālamālinaṃ śrutam |
dṛṣṭvā śrutvā taduktaṃ yat putradhvaṃso'cirāttava || 30 ||
[Analyze grammar]

evamākarṇya govindasvāmī kāśīṃ prati drutam |
yayau mārge hyakasmācca himavāyuḥ samutkaṭaḥ || 31 ||
[Analyze grammar]

vavau putraśca śaityenā''vṛto vahnirna cāpyate |
grāmīṇāstu janāstatrā'ntike gaṃgātaṭe śavam || 32 ||
[Analyze grammar]

dagdhuṃ samāgatāstvanyamṛtasya grāmavāsinaḥ |
tasya citāgninā śaityaṃ dūrīkartuṃ suto yayau || 33 ||
[Analyze grammar]

pārśve vijayadattaḥ sa sthitvā gṛhṇāti tāpakam |
asminnavasare vaṃśaṃ gṛhītvā dāhakaḥ śavam || 34 ||
[Analyze grammar]

śirobhāgaṃ ca dāhārthaṃ vaṃśenā'gnau samākṣipat |
tāvadvaṃśena tu dvedhā śirastat samabhūttataḥ || 35 ||
[Analyze grammar]

vahniyogena ca vegād raktaṃ vijayadāttike |
mukhe cāgatya saṃlagnaṃ tāvadevātibhraṣṭatām || 36 ||
[Analyze grammar]

prāpto vijayadattaḥ sa vetālaḥ samajāyata |
tīkṣṇadaṃṣṭro mahākāyo babhūvā'tibhayaṃkaraḥ || 37 ||
[Analyze grammar]

śavavasāṃ lelihānaścāpibattatra tāṃ muhuḥ |
tasyā'ṭṭahāsaghoṣeṇa vetālanartanena ca || 38 ||
[Analyze grammar]

diśaḥ pradiśo vidiśaḥ sphuṭitā hyabhavanniva |
atha svapitaraṃ cānyān hantuṃ dadhāva cāmbarāt || 39 ||
[Analyze grammar]

bhītāḥ sarve śmaśānādvai palāyitāḥ samantataḥ |
vetālaḥ sa śavaṃ jagdhvā babhūva balavāṃstataḥ || 40 ||
[Analyze grammar]

śmāśānikaistu vetālairmilitvā vāsamācarat |
vetālānāṃ kadācidvai gandharvaiḥ saha yodhanam || 41 ||
[Analyze grammar]

vindhyācale hyabhūd ghoraṃ tatrā'yaṃ jayamāptavān |
vetālarājā sampanno rājyavān vindhyaparvate || 42 ||
[Analyze grammar]

atha vetālarūpaṃ taṃ tyaktvā putraṃ dvijastataḥ |
pravavṛte sabhāryaśca jagāma kāśikāpurīm || 43 ||
[Analyze grammar]

tatrā'bhavatsutastasya dvitīyo vajravadvapuḥ |
kāśyāṃ vāsaṃ saputraḥ saḥ cakre kṛṣṇaparāyaṇaḥ || 44 ||
[Analyze grammar]

atrāntare narapatiṃ pratāpamukuṭābhidham |
kāśideśābhidhaṃ mallaḥ kaścidabhyāyayau balī || 45 ||
[Analyze grammar]

kāśīrājopadeśena vajradeho dvijastu tam |
mallayuddhe mahāmallamahanat prāṇatastadā || 46 ||
[Analyze grammar]

kāśīrājena viprāya grāmāḥ pañca samarpitāḥ |
kadācit kāśikārājo dvijaputreṇa saṃyutaḥ || 47 ||
[Analyze grammar]

sandhyāyāṃ vijane deśe cacāra tāvadeva tu |
saṃśuśrāva kaṣṭamayīṃ dīnāṃ vāṇīṃ tu dūrataḥ || 48 ||
[Analyze grammar]

aho kaṣṭamaho kaṣṭaṃ kāśīrājasya śāsane |
svalpāparādhe śūle vai samāroṣo'tidāruṇaḥ || 49 ||
[Analyze grammar]

aho prāṇā na viyanti tṛṣā māṃ bādhate tvati |
iti śrutvā kāśikeśastūrṇaṃ yayau sabhūsuraḥ || 50 ||
[Analyze grammar]

jalamādāya taṃ pātuṃ vajrāṃgo yāti yāvatā |
tatra tasya gṛhapatnī sthitā dṛṣṭā dvijena vai || 51 ||
[Analyze grammar]

sāpi pativratā mṛtaṃ cānuyātuṃ tadā sthitā |
prāhainaṃ ca jalaṃ dātuṃ hrasvā'haṃ pārayāmi na || 52 ||
[Analyze grammar]

vajrāṃgaśca dayāyuktastāṃ vadhūmabravīttadā |
mātarmatskandhamāruhya dehyasmai śītalaṃ jalam || 53 ||
[Analyze grammar]

ityuktā sā tu vetālī vajrāṃgaskandhamāsthitā |
jalaṃ gṛhītvā vetālaṃ śūlasthaṃ māyikākṛtim || 54 ||
[Analyze grammar]

mṛṣāśūlasthitaṃ patnī jalaṃ taṃ samapāyayat |
athā'pṛcchad dvijaputraḥ kāsi ko'yaṃ ca te'sti vai || 55 ||
[Analyze grammar]

kathaṃ daṇḍaṃ samāpannaḥ satyaṃ brūhi śubhānane |
vaitālī prāha me svāmī bhavatyayaṃ purā dvijaḥ || 56 ||
[Analyze grammar]

govindasvāminaḥ putro vijayadattasaṃjñakaḥ |
tataḥ pūrvaṃ hyabhūccāyaṃ vidyādharaḥ sudarśanaḥ || 57 ||
[Analyze grammar]

gālavasya satīṃ putrīṃ tvadharṣayat kṣaṇaṃ vane |
tāvad gālavamuninā śapto'yamīdṛśīṃ gatim || 58 ||
[Analyze grammar]

gato'sti tasya bhāryā'haṃ vaitālī nau samuddhara |
uddhārārthaṃ kṛtaṃ tvetacchūlyādikaṃ mṛṣātmakam || 59 ||
[Analyze grammar]

jalaṃ prāptaṃ tava hastācchūlīmiṣeṇa pāvanam |
tenā'yaṃ pāvito bhūtaḥ bhūtā'haṃ pāvitā tathā || 60 ||
[Analyze grammar]

kuru nau mokṣaṇaṃ vipra sarvadānaphalaṃ bhavet |
rājasūye vājapeye gomedhe naramedhake || 61 ||
[Analyze grammar]

aśvamedhe lāṃgale ca viṣṇuyajñe yaśaḥkratau |
dhanade bhūmide phalgau putreṣṭau gajamedhake || 62 ||
[Analyze grammar]

lohayajñe svarṇayajñe paṭalavyādhikhaṇḍane |
śanuyajñe rudrayajñe śakrayajñe ca bandhake || 63 ||
[Analyze grammar]

iṣṭau varuṇayajñe ca kanduke vairimardane |
śuciyāge dharmayāge recane pāpamocane || 64 ||
[Analyze grammar]

bandhane karmayoge ca maṇiyāge subhadrake |
śyenayāge vājapeye sāvitre kamalakratau || 69 ||
[Analyze grammar]

japayajñe jñānayajñe kathāyajñe ca yatphalam |
tatphalaṃ te dhruvaṃ bhāvi vaitālānāṃ vimokṣaṇāt || 66 ||
[Analyze grammar]

śrutvā dvijaḥ svarājānaṃ prāhaite pretarūpiṇaḥ |
tava rājye kāśirājye vartante nṛpa dukhinaḥ || 67 ||
[Analyze grammar]

gaṃgātoyapradānena kartavyaṃ tadvimokṣaṇam |
rājā prāha tava bhrātā vetālo'yamabhūt purā || 68 ||
[Analyze grammar]

tvayā jalaṃ pāyitaṃ ca pāpanāśo'sya vidyate |
tasya mokṣakaraṃ tvanyatkartavyaṃ yadbhaveddhi tat || 69 ||
[Analyze grammar]

ityuktvā bhūpatistasmai pṛṣṭhavān śūlavartine |
vad pramokṣaṇaṃ kena karmaṇā te bhavediha || 70 ||
[Analyze grammar]

pretaḥ prāha ṛṣeḥ śāpānmokṣaṇaṃ nānyato bhavet |
ṛṣereva prasādena mokṣaṇaṃ me bhaviṣyati || 71 ||
[Analyze grammar]

kāśirājastathā govindasvāmī me pitā'nujaḥ |
mātā ceti bhavanto vai gacchantu gālavaṃ munim || 72 ||
[Analyze grammar]

mama duḥkhasya nistārastaduktavidhinā bhavet |
atha śrutvā tu te sarve gatā yatra sa gālavaḥ || 73 ||
[Analyze grammar]

kanyāyutaṃ muniṃ natvā vavandire punaḥ punaḥ |
satkṛtā gāvalenātha procurvṛttāntameva tam || 74 ||
[Analyze grammar]

ṛṣiḥ prāha satī sādhvī kanyā me pārameśvarī |
sarvasiddhimayī mahābhāgavatī ca vaiṣṇavī satī || 75 ||
[Analyze grammar]

śaraṇāgatajīvānāṃ rakṣayitrī dayāvatī |
kṛṣṇanārāyaṇabhaktimatī tvaiśvaryaśālinī || 76 ||
[Analyze grammar]

divyā nārāyaṇalagnā nārāyaṇaparāyaṇā |
brahmacaryavratayuktā kṛṣṇātmakapativratā || 77 ||
[Analyze grammar]

kṣaṇena dagdhuṃ śaktā sā pāpānāṃ meruśālinām |
koṭivetālabhūtānāṃ muktiṃ dātuṃ tatheśvarī || 78 ||
[Analyze grammar]

anantabrahmaṇāṃ sṛṣṭiṃ kartuṃ prakṛtirīśvarī |
vaiṣṇavī kamalāṃ'śā'sti prasādayantu tāṃ satīm || 79 ||
[Analyze grammar]

sā vai tuṣṭā mahālakṣmīḥ kṛṣṇakāntā sukāntinī |
tārayiṣyati vetālān kṛṣṇamantrapradānataḥ || 80 ||
[Analyze grammar]

ityuktāste kāśirājādayaḥ sarve kumārikām |
mātaraṃ jagatāṃ lakṣmīṃ kāntimatīṃ haripriyām || 81 ||
[Analyze grammar]

nemustuṣṭuvuḥ śaraṇaṃ nipetuśca vavandire |
tebhyo vṛttāntamājñāya vetālamokṣaṇakṛte || 82 ||
[Analyze grammar]

kanyā kṛṣṇavratadharmān prāha sarvasukhapradān |
sukha duḥkhaṃ bhayaṃ śokaṃ harṣaṃ maṃgalamityapi || 83 ||
[Analyze grammar]

sampattiśca vipattiśca sarvaṃ bhavati karmabhiḥ |
karmaṇā brahmaputrī ca vaṃśahīnaśca karmaṇā || 84 ||
[Analyze grammar]

karmaṇā rūpavāṃścaiva rogī śaśvatsvakarmaṇā |
karmaṇā sūtaputraśca karmaṇā cirajīvinaḥ || 85 ||
[Analyze grammar]

karmaṇā guṇavantaśca karmaṇā tvaṃgahīnatā |
karmaṇā bhūtavetālā devatāḥ karmaṇā narāḥ || 86 ||
[Analyze grammar]

kṛte śubhe śubhā lokā aśubhe nyakkṛtā janāḥ |
śubhena tena saṃprāptaṃ vidyādharatvamityapi || 87 ||
[Analyze grammar]

aśubhatvaṃ ca tenaiva duṣṭabhāvakṛtena vai |
satyāṃ pativratāyāṃ ca kanyāyāṃ śuddhayoṣiti || 88 ||
[Analyze grammar]

duṣṭacakṣuḥprayoktāro jātyandhāḥ saṃbhavanti vai |
kuṣṭhāḥ kāṇāstathā khañjā vṛkṇāḥ kuṇṭhā bhavanti ca || 89 ||
[Analyze grammar]

duṣṭabhāvanayā duṣṭāḥ karmaphalaiśca duḥkhinaḥ |
satībhāvanayā sattvaguṇinaḥ sukhabhāginaḥ || 90 ||
[Analyze grammar]

niyamānāṃ tu yo bhaṅgo dharmabhaṃgo hi niścitaḥ |
aniyamena yātāro daṇḍyā rājño bhavanti vai || 91 ||
[Analyze grammar]

ta eva yamadaṇḍyāśca kṛṣṇadaṇḍyā bhavanti ca |
sarvadaṇḍyāśca te loke nānyaḥ panthāstadanyakaḥ || 92 ||
[Analyze grammar]

patnīvrataṃ paro dharmaḥ sukhadaḥ śāntidaḥ sadā |
śrīkṛṣṇena purā patnīvrataścotpādito dvijaḥ || 93 ||
[Analyze grammar]

tadvaṃśīyāḥ sarvaviprāḥ ṛṣayo munayastathā |
patnīvrataparāḥ sarve gṛhabrahmavratānvitāḥ || 94 ||
[Analyze grammar]

taranti tārayantyanyān niyamārpitavartanāḥ |
dhātavo bhojanotpannā dehināṃ dehasaṃsthitāḥ || 95 ||
[Analyze grammar]

niyamitā brahmacaryaṃ dharmarūpāḥ sukhāvahāḥ |
aniyame dharmalopo garbhavāsādiduḥkhadaḥ || 96 ||
[Analyze grammar]

ātmānandaṃ parityajya kharjanānandamāśritaḥ |
bhuṃkte sa kharjanaṃ duḥkhaṃ brahmānandena vañcitaḥ || 97 ||
[Analyze grammar]

dadrucandre kharjanaṃ vai paścāttu jvalanaṃ sadā |
anyāyakāmabhoge ca yāmye prajvalanaṃ dhruvam || 98 ||
[Analyze grammar]

tasmānniyamitaḥ kāmo vivāhena vimarśitaḥ |
sparśo niyamitaścāpi dṛśyaṃ vācyaṃ niyāmitam || 99 ||
[Analyze grammar]

kasyāḥ kasya tu kiṃ bhogyaṃ sarvaṃ pūrvairniyāmitam |
niyamo dharma evā'sti patnīvrataḥ sa yauvane || 100 ||
[Analyze grammar]

pativrataśca tadvat saḥ sarvadā sukhadaḥ khalu |
anena lopitaḥ so yat kanyāyā dharṣaṇaṃ kṛtam || 101 ||
[Analyze grammar]

anicchantyā api sparśo vivartate'nalātmakaḥ |
sa tu śānto bhavettasya kṛṣṇarpaṇena kalpita || 102 ||
[Analyze grammar]

yūyaṃ cet tasya bhūtasya muktimicchatha satvaram |
oṃ namaḥ śrīkṛṣṇanārāyaṇāya pataye namaḥ || 103 ||
[Analyze grammar]

iti mantraṃ gṛhītvā ca dhṛtvā tulasīmālikām |
kṛṣṇapūjāprasādaṃ ca jalaṃ svannaṃ dalādikam || 104 ||
[Analyze grammar]

matto nītvā tatra yāntu yatra vetālapuṃgavaḥ |
taṃ ca vetālasāhasrayutaṃ nayata vāridhim || 105 ||
[Analyze grammar]

dakṣiṇasyodadhestīre cakratīrthasya sannidhau |
vetālamuktikṛttīrthe vetāloddhārakaṃ param || 106 ||
[Analyze grammar]

snāpayadhvaṃ jale tatra vetālān vai sahasraśaḥ |
tatastān vai mayoktaṃ ca mantraṃ saṃtriḥ punaḥ punaḥ || 107 ||
[Analyze grammar]

prasādajaṃ jalaṃ cānnaṃ patraṃ samarpya bhojane |
kurutaiṣāṃ mokṣaṇaṃ ca nānyaḥ panthāḥ sukhapradaḥ || 108 ||
[Analyze grammar]

iti śrutvā tu te sarve kāntimatyāstadaiva hi |
oṃ namaḥ śrīkṛṣṇanārāyaṇāya pataye namaḥ || 109 ||
[Analyze grammar]

iti mantraṃ gṛhītvā ca gṛhītvā'nnaṃ jalādikam |
tayā dattaṃ dalaṃ cāpi nītvā stutvā yayuśca tam || 110 ||
[Analyze grammar]

vetālaṃ prati gatvaite vetālāṃśca sahasraśaḥ |
nītvā yayuścakratīrthād dakṣiṇe tūdadhestaṭe || 111 ||
[Analyze grammar]

vetāloddhārake tīrthe snapayitvā ca tāstadā |
jalamannaṃ kṛṣṇaprāsādikaṃ ca tulasīṃ daduḥ || 112 ||
[Analyze grammar]

ghorāṃ vetālatāṃ tyaktvā divyarūpāṇyavāpya ca |
prasādapuṇyato labdhvā caturbhujasvarūpatām || 113 ||
[Analyze grammar]

vimāneṣu samārūḍhā vaiṣṇavāste sahasraśaḥ |
viṣṇorvai pārṣadā bhūtvā vaikuṇṭhaṃ prayayustu te || 114 ||
[Analyze grammar]

evaṃ vetālajātīnāṃ kṛtvā mokṣaṃ nṛpādayaḥ |
yayuḥ kāśīṃ yamīṃ cāpi yathāsthānaṃ tu te punaḥ || 115 ||
[Analyze grammar]

ityetatkathitaṃ lakṣmi sutāyā gālavasya vai |
kṛṣṇanārāyaṇapātivratyaiśvaryaṃ paraṃ mahat || 116 ||
[Analyze grammar]

śrutvā smṛtvā paṭhitvā'pi pātivratyaphalaṃ labhet |
patnīvrataphalaṃ labdhvā naro muktimavāpnuyāt || 117 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne gālavarṣikanyāyāḥ kṛtāvahelanena sudarśanavidyādharasya mānuṣajanmottaraṃ vetālatvaṃ kāśīrājadvārā gālava |
kanyāyāḥ kṛṣṇapātivratyabalena mokṣaṇaṃ cetyādinirūpaṇanāmā pañcatriṃśadadhikacatuśśatatamo'dhyāyaḥ || 435 ||
[Analyze grammar]