Chapter 426

śrīnārāyaṇa uvāca |
ākarṇaya mahālakṣmi gokule gopakanyakāḥ |
cakrurvrataṃ pātivratyātmakaṃ kṛṣṇasya labdhaye || 1 ||
[Analyze grammar]

kumārikā mahādivyā devyo dhāmādhivigrahāḥ |
dṛśyante bhūtale bhūvadvigrahā vāstavaṃ na tat || 2 ||
[Analyze grammar]

sarvā rādhāsamā divyāḥ śrīsamā brahmamūrtikāḥ |
nā'ṇvapi kṛṣṇasārūpyād bhedastāsu hi vidyate || 3 ||
[Analyze grammar]

garbho janma ca bālātvaṃ gaurītvaṃ ca tataḥ punaḥ |
rohiṇītvaṃ kanyakātvaṃ kārṣṇīnāṃ divyameva tat || 4 ||
[Analyze grammar]

carmanetrāḥ svavat sarve lokayanti na tattathā |
tāsāṃ kṛṣṇapatiprāptikṛdviceṣṭanameva yat || 5 ||
[Analyze grammar]

kṛṣṇapativratāḥ sarvāḥ kṛṣṇanārāyaṇapriyāḥ |
kṛṣṇārthakṛtasarvasvāḥ kinnu vai tāsu varṇyate || 6 ||
[Analyze grammar]

tābhirjātismarābhiścārthitaḥ kṛṣṇo hi sarvadā |
kṛṣṇanārāyaṇastāsāṃ svapne prātaradṛśyata || 7 ||
[Analyze grammar]

vihasan bhāvamājñāya pātivratyakratuṃ dadau |
tāstu kṛṣṇanideśena cakruḥ pativratākratum || 8 ||
[Analyze grammar]

mārgaśīrṣe vṛṣamāse kurvantu matpriyaṃ vratam |
ahaṃ prāpto bhaviṣyāmi pūrayiṣye manorathān || 9 ||
[Analyze grammar]

svātmārthaṃ ca yathā sarvaṃ madarthaṃ sarvameva tat |
priyaṃ sarvaṃ prakurvantu tūrṇaṃ bhavāmi vaḥ patiḥ || 10 ||
[Analyze grammar]

ityuktānāṃ tu kanyānāṃ pātivratyasya sarvathā |
kṛṣṇasya kṛpayā prādurbhūtaṃ jñānaṃ tu tādṛśam || 11 ||
[Analyze grammar]

cakrurvrataṃ tu tāḥ sarvāḥ sahasraśastu gopikāḥ |
tāsāṃ manāṃsi ca mayi hyāsan kṛṣṇanārāyaṇe || 12 ||
[Analyze grammar]

tāsāṃ buddhirmayā dattā mārgaśīrṣā'vagāhane |
prātaḥkāle brāhmayoge militvā saṃghaśastu tāḥ || 13 ||
[Analyze grammar]

yamunāyāṃ kṛtasnānā gāyanti kṛṣṇakīrtanam |
kurvanti jaladānaṃ me'kṣatadānaṃ jale tathā || 14 ||
[Analyze grammar]

dravyadānaṃ jale cāpi gṛhṇāmyantaḥsthito'pyaham |
bhojyadānaṃ jale tābhiḥ kṛṣṇaṃ smṛtvā kṛtaṃ prage || 15 ||
[Analyze grammar]

kvacit kṛṣṇaḥ kvacinmatsyo bhūtvā gṛhṇāmi tajjale |
patraṃ puṣpaṃ phalaṃ yadyajjale dattaṃ madātmani || 16 ||
[Analyze grammar]

mayā sarvaṃ svīkṛtaṃ tat tāsāṃ bhāvena vāriṇi |
pūjā kṛtā madarthaṃ ca tābhirgatvā gṛhe gṛhe || 17 ||
[Analyze grammar]

haviṣyānnaṃ madarthaṃ ca bhuktaṃ tābhirmadarpitam |
sarvaṃ mama prasādārthaṃ kṛtaṃ samyag vrataṃ tataḥ || 18 ||
[Analyze grammar]

mayā datto varaścātmā tāsāṃ tuṣṭena satpatiḥ |
śṛṇu lakṣmi kathayāmi kṛṣṇapativratāvidhim || 19 ||
[Analyze grammar]

prātarbrāhme samutthāya tābhiḥ śrīguravo natāḥ |
smṛtaścāhaṃ kṣaṇaṃ dhyātaḥ kṛṣṇeti kīrtito muhuḥ || 20 ||
[Analyze grammar]

tato yamyāstaṭaṃ gatvā kṛtvā śaucādikaṃ tataḥ |
snātāśca mukhaśuddhyādi kṛtvā yamījale ca tāḥ || 21 ||
[Analyze grammar]

tulasīmṛttikāṃ liptvā tulasīpatravāriṇā |
saṃprokṣya svaśarīrāṇi sasnurnadyāṃ ca māṃ hṛdi || 22 ||
[Analyze grammar]

smarantyaḥ śrīkṛṣṇanārāyaṇeti vyāharantyapi |
oṃnamaḥ śrīkṛṣṇanārāyaṇāya pataye namaḥ || 23 ||
[Analyze grammar]

athā'kṣatān kusumāni patrāṇi kuṃkumādikam |
dīpaṃ phalādikaṃ mahyaṃ dadustāścārdravastrakāḥ || 24 ||
[Analyze grammar]

oṃ namaḥ śrīkṛṣṇanārāyaṇāya pataye'rpyate |
iti samarpya tāstīraṃ vinirgatyā'mbarāṇi ca || 25 ||
[Analyze grammar]

paridhāya tathā''camyā'tarpayan pūrvajāṃstataḥ |
ṛṣīndevānnamaskṛtyā'kurvan kuṃkumacandrakam || 26 ||
[Analyze grammar]

bhāle ca kaṇṭhamadhye ca hṛdaye candanādinā |
bindvīṃ rekhāṃ yathāyogyaṃ cakruḥ kṛṣṇaratāśca tāḥ || 27 ||
[Analyze grammar]

lalāṭe keśavo dhyāto nārāyaṇastathodare |
vakṣasi mādhavo dhyāto govindaḥ kaṇṭhakūbare || 28 ||
[Analyze grammar]

dhyāto viṣṇurdakṣakukṣau vāmakukṣau tu vāmanaḥ |
dakṣabāhau ca madhuhā vāmabāhau śriyodharaḥ || 29 ||
[Analyze grammar]

trivikramaḥ karṇamūle hṛṣīkeśastu karṇayoḥ |
pṛṣṭhe dhyātaḥ padmanābho dāmodaro hyadhaḥsthale || 30 ||
[Analyze grammar]

sarvāṃge śrīkṛṣṇanārāyaṇaḥ patiḥ sucintitaḥ |
śaṃkhaṃ cakraṃ gadāṃ padmaṃ cakrire bhujayośca tāḥ || 31 ||
[Analyze grammar]

oṃ namaḥ śrīkṛṣṇanārāyaṇāya pataye namaḥ |
iti ṣoḍaśakṛṣṇānāṃ mudrā dadhyuśca mānase || 32 ||
[Analyze grammar]

tulasīmālikāḥ sūkṣmāḥ kaṇṭhe dadhyuḥ kare tathā |
dhātrīphalakṛtāṃ mālāṃ dadhyuḥ kāścid gale kare || 33 ||
[Analyze grammar]

evaṃkṛtvā vidhiṃ tāśca natvā gurūn gṛhaṃ gatāḥ |
tata ācamya tāḥ sarvāḥ praviviśuśca maṇḍapam || 34 ||
[Analyze grammar]

kuśāsanasthitāḥ padmāsanāḥ pūrvamukhāśca tāḥ |
cakruḥ prāṇasya niyamaṃ madhye tu maṇḍapasya tāḥ || 35 ||
[Analyze grammar]

karṇikāyāṃ bhāskaraṃ ca śaśinaṃ vahnimeva ca |
saṃsthāpyoddeśamātreṇa taṇḍuleṣu dadhuśca tān || 36 ||
[Analyze grammar]

tato'ṣṭapatrakaṃ pa taṇḍulaiścakrurādarāt |
tatra dadhyuśca māṃ divyaṃ svasvayogyaṃ varaṃ patim || 37 ||
[Analyze grammar]

samāsīnaṃ hasantaṃ ca koṭiśītāṃśusannibham |
caturbhujaṃ sāyudhaṃ ca kāścid dvibhujamacyutam || 38 ||
[Analyze grammar]

padmapatraviśālākṣaṃ mahāvīryabalānvitam |
śrīvatsakaustubhoraskaṃ pītavastrānvitaṃ ca mām || 39 ||
[Analyze grammar]

divyābharaṇasaṃśobhaṃ divyamaṇḍanamaṇḍitam |
divyacandanaliptāṃgaṃ divyakusumamālikam || 40 ||
[Analyze grammar]

tulasīmālikāyuktavanamālādirājitam |
koṭibālārkasadṛśaṃ kāntaṃ kāntamanoharam || 41 ||
[Analyze grammar]

yuvatyā tu śriyā''śliṣṭatanuṃ cubantameva mām |
dhyātvā tāḥ prajapurmugdhāḥ kṛṣṇanārāyaṇeti mām || 42 ||
[Analyze grammar]

tatastāḥ sthāpayāmāsuḥ śaṃkhaṃ gandhodapūritam |
tathā sugandhapuṣpādipātraṃ nyadhuśca dakṣiṇe || 43 ||
[Analyze grammar]

vāme nyadhurvārikuṃbhaṃ vastrapūtaṃ suvāsitam |
ghaṇṭāṃ nyadhuḥ pradīpāṃśca cakrurdhūpaṃ samantataḥ || 44 ||
[Analyze grammar]

atha pātrāṇi catvāri sannyadhustatra kanyakāḥ |
arghyapādyā''camanīyamadhuparkārthakāni ca || 45 ||
[Analyze grammar]

sarṣapā'kṣatapuṣpāṇi kuśāgraṃ tilacandanam |
phalaṃ yavānarghyapātre rarakṣustatra kanyakāḥ || 46 ||
[Analyze grammar]

dūrvāṃ gaṃgāṃ yamīṃ padmaṃ pādyapātre nyadhuśca tāḥ |
kaṃkolaṃ ca lavaṃgaṃ ca phalaṃ mālatisaṃbhavam || 47 ||
[Analyze grammar]

ācamanīyapātre tā nyadhustīrthajalaṃ tathā |
gavyaṃ payo dadhi madhu ghṛtaṃ ca śarkarānvitam || 48 ||
[Analyze grammar]

madhuparkasya pātre tā nyadhustato hareḥ pura |
karanyāsān pracakruśca svāṃgeṣu kṛṣṇakāmyayā || 49 ||
[Analyze grammar]

mastake mastakaṃ cāstu kṛṣṇasya mama sarvathā |
lalāṭe śrīkṛṣṇadevalalāṭaṃ cāstu me śubham || 50 ||
[Analyze grammar]

netrayoḥ śrīkṛṣṇanārāyaṇanetre'dhitiṣṭhatām |
karṇayorme kṛṣṇakarṇau nāsāyāṃ kṛṣṇanāsikā || 51 ||
[Analyze grammar]

kapolayoḥ kapolaṃ me gaṇḍayoḥ kṛṣṇagaṇḍakau |
kaṭākṣayoḥ kaṭākṣau me kṛṣṇasya cādhitiṣṭhatām || 52 ||
[Analyze grammar]

oṣṭhayorme kṛṣṇakāntoṣṭhadvayaṃ vasatu priyam |
cibuke kṛṣṇacibukaṃ kaṇṭhe kaṇṭho'stu me hareḥ || 53 ||
[Analyze grammar]

skandhayoḥ śrīkṛṣṇanārāyaṇaskandhau pratiṣṭhatām |
bhujayoḥ śrīhareḥ stāṃ subhujau karau karadvaye || 54 ||
[Analyze grammar]

hṛdaye kṛṣṇahṛdayaṃ nābhau nābhirharermama |
jaghane kṛṣṇajaghanaṃ kaṭyāṃ cāstu hareḥ kaṭiḥ || 55 ||
[Analyze grammar]

gopye kṛṣṇasya gopyaṃ ca sakthnorme sakthinī hareḥ |
jānvorme kṛṣṇajānūstāṃ jaṃghe me jaṃghayorhareḥ || 56 ||
[Analyze grammar]

pādayorme kṛṣṇapādau mayi kṛṣṇo'stu sarvathā |
madindriyeṣu kṛṣṇasyendriyāṇi santu sarvaśaḥ || 57 ||
[Analyze grammar]

santu me'ntaḥkaraṇeṣvantaḥkaraṇāni vai hareḥ |
evaṃ mamā'nusmaraṇaṃ cakrustā hṛdayaṃgamam || 58 ||
[Analyze grammar]

sasmarustāstadātmānaṃ matsamaṃ matpativratāḥ |
maṃgalaṃ śrīkṛṣṇanārāyaṇaḥ kāntaḥ priyaḥ kuru || 59 ||
[Analyze grammar]

prapeṭhuḥ gopakanyānāṃ patistvaṃ maṃgalaṃ kuru |
atha śaṃkhaṃ pupūjuśca puṣpacandanavāribhiḥ || 60 ||
[Analyze grammar]

suvāsitena tailena cakrurudvartanaṃ tu tāḥ |
kastūryā candanenāpi cakrurudvartanaṃ tathā || 61 ||
[Analyze grammar]

sugandhavāsitaistoyaistataḥ saṃsnāpito'pyaham |
śaṃkhatoyaṃ prajagrāha snānārthaṃ tu punaḥ punaḥ || 62 ||
[Analyze grammar]

pañcāmṛtāni pradaduḥ snāpayāmāsurādarāt |
tīrthajalaiḥ sukhasparśairabhiṣekaṃ daduśca tāḥ || 63 ||
[Analyze grammar]

candanaṃ gandhasārādi mardayāmāsurādarāt |
vastreṇa mārjayāmāsuḥ śarīraṃ me punaḥ punaḥ || 64 ||
[Analyze grammar]

dadurarghyaṃ saphalaṃ ca pādyamācamanīyakam |
madhuparkaṃ daduścātha dadurdivyāmbarāṇi ca || 65 ||
[Analyze grammar]

divyabhūṣāralaṃkārān gandhādīn saṃdadurmama |
kajjalaṃ keśatailādi puṇḍrārthaṃ candanādikam || 66 ||
[Analyze grammar]

kuṃkumādi dadustāśca dravasārān dadustataḥ |
alaktaraṃgarāgādi pradadustāśca kanyakāḥ || 67 ||
[Analyze grammar]

siṃhāsanaṃ tathā chatraṃ cāmare vyajanaṃ daduḥ |
darpaṇaṃ keśadantaṃ ca śuklacūrṇaṃ daduśca tāḥ || 68 ||
[Analyze grammar]

tulasīmālikāṃ puṣpahārāṃśca śekharān daduḥ |
gucchān svarṇavibhūṣāśca pattrāṇe saṃdadustadā || 69 ||
[Analyze grammar]

vaṃśī daduśca tā miṣṭasvarāṃ cāhamavādayam |
dolāyāṃ māṃ samasthāpya dolayāmāsurādarāt || 70 ||
[Analyze grammar]

naivedyaṃ cārpayāmāsuḥ pāyasā'pūpamiśritam |
jalaṃ phalaṃ ca tāmbūlaṃ śākaṃ pūgīphalādikam || 71 ||
[Analyze grammar]

pradadustā vyajanaiśca sevayāmāsureva ca |
dhūpaṃ dīpaṃ punaścakrurdaduḥ puṣpāṇi bhaktitaḥ || 72 ||
[Analyze grammar]

bhojayāmāsuratyarthaṃ prītyā tāḥ kavalairmuhuḥ |
tṛpto'haṃ cā'pibaṃ vāri tāmbūlakaṃ samādade || 73 ||
[Analyze grammar]

tāśca praṇamya saṃcakrurnīrājanaṃ punaḥ punaḥ |
stutiṃ cakrurnamaścakruḥ pradakṣiṇaṃ punastathā || 74 ||
[Analyze grammar]

aparādhakṣamāyāñcāṃ puṣpāñjaliṃ samādadhuḥ |
varaṃ ca yācayāmāsuḥ patirno bhava sarvadā || 75 ||
[Analyze grammar]

śāyayitvā ca paryaṃke paritastasthurādarāt |
pādasaṃvāhanaṃ cakruryatheṣṭaṃ tāḥ siṣevire || 76 ||
[Analyze grammar]

mayā tāsāṃ mānasāni pūritāni tadā priye |
sparśanenā''śleṣaṇena bhāvenā'varṇyakena ca || 77 ||
[Analyze grammar]

tatastāḥ sukhamāpannā abhūtapūrvameva vai |
ānandeṣu nimagnastā maṃgalārghyaṃ dadustataḥ || 78 ||
[Analyze grammar]

visṛjya māṃ ca tāścakrurgṛhakāryāṇi vai tataḥ |
prasādaṃ bhakṣayāmāsurmamapūjāniveditam || 79 ||
[Analyze grammar]

mayā dattaṃ mahānandaṃ smṛtvā smṛtvā'tiharṣitāḥ |
cakruḥ svagṛhakāryāṇi śramaṃ na vividuśca tāḥ || 80 ||
[Analyze grammar]

jalāharaṇakārye tā dadṛśurmāṃ ghaṭe jale |
kaṇḍanīdhānyaghāte tā dadṛśurmāṃ kaṇeṣu vai || 81 ||
[Analyze grammar]

piṣṭārthaṃ peṣaṇīkārye peṣaṇyāṃ dadṛśurhi mām |
mārjanīkāryakāle tā bhūtale dadṛśuśca mām || 82 ||
[Analyze grammar]

pākakāle pākapātre sthālyāṃ bhojanapātrake |
dṛśye śravye tathā spṛśye māmeva dadṛśuśca tāḥ || 83 ||
[Analyze grammar]

ādarśe svamukhe netre taile vastre vibhūṣaṇe |
hṛdaye sarvakāryeṣu māmeva dadṛśuśca tāḥ || 84 ||
[Analyze grammar]

divyadehā babhūvuśca bhittyāvaraṇavarjitāḥ |
dehabhānaprahīṇāśca kṛṣṇarūpaṃ dadhustu tāḥ || 85 ||
[Analyze grammar]

ekā kṛṣṇo dvitīyā tu kṛṣṇā bhūtvā ca rematuḥ |
ekā patnī dvitīyā tu patirbhūtvā nanandatuḥ || 86 ||
[Analyze grammar]

ekā sakhī dvitīyā tu sakhā bhūtvā cucūmbatuḥ |
ekā vadhūdvitīyā tu varo bhūtvā virejatuḥ || 87 ||
[Analyze grammar]

evaṃ kṛṣṇamayaṃ tāsāmāntaraṃ ca mayā kṛtam |
kṛṣṇapātivratyaraṃgaiḥ raktānāṃ bhinnatā na me || 88 ||
[Analyze grammar]

evaṃbhāvaṃ prapannāstāḥ snātuṃ yātā yamījale |
kadambadrumanikaṭe tāsvahaṃ cāpyalakṣitaḥ || 89 ||
[Analyze grammar]

yayau kumārikārūpaṃ dhṛtvā snānāya vai saha |
avateruśca tāstīrthe nyasya vastrāṇi tattaṭe || 90 ||
[Analyze grammar]

sasmaruśca saha snātuṃ rantuṃ māṃ kanyakā hṛdi |
yathā cānyā na jānāti tathā pratyekayā saha || 91 ||
[Analyze grammar]

reme tatra jale bāhyakanyaścāntarapūruṣaḥ |
pratyekaṃ sā vijānāti ramaṇaṃ nā'parā tadā || 92 ||
[Analyze grammar]

evaṃ manāṃsi sampūrya tṛptāstāśca tataḥ param |
jale kanyāsvarūpo'pi vanāt kṛṣṇo'hamāgataḥ || 93 ||
[Analyze grammar]

tāsāṃ vastrāṇi cādāya prāruroha kadambakam |
tābhiḥ saṃkalpitaṃ tadvanmayā manaḥ prapūritam || 94 ||
[Analyze grammar]

kṛṣṇaścāsmattanū paśyediti tadvanmayā kṛtam |
vratasthānāṃ varuṇasyā'vadhīraṇā kṛtā yataḥ || 95 ||
[Analyze grammar]

bahirnirgatya sūryāya kuruta prāṃjaliṃ priyāḥ |
iti bhāvānusāreṇa tāśca mayā vilokitāḥ || 96 ||
[Analyze grammar]

tāstu tuṣṭāstadā jātā menire kṛtakṛtyatām |
dadau vastrāṇi tābhyaśca varāṃścāpi dadau muhuḥ || 97 ||
[Analyze grammar]

rāmayiṣye ramayiṣye yatheṣṭaṃ mama vai priyāḥ |
vratasya tu phalaṃ sarvaṃ cārpayiṣye navaṃ navam || 98 ||
[Analyze grammar]

nityaṃ tāḥ kāntabhāvena mayā satyaḥ pratarpitāḥ |
tā eva tu divārātrau madātmikāḥ sadā'bhavan || 99 ||
[Analyze grammar]

kāmo divyo ratirdivyā bhāvo divyaḥ kṛto mayā |
madīyadivyabhāvena tāsāṃ divyamabhūddhi tat || 100 ||
[Analyze grammar]

niṣkāma karma tatproktaṃ yanmayi tvarpyate sadā |
bandhaghnaṃ śāntidaṃ mokṣakaraṃ sākṣānmadarpaṇam || 101 ||
[Analyze grammar]

yathā tābhiḥ kṛtaṃ tadvannānyā kācit kariṣyati |
ityahaṃ tvabhavaṃ tāsāṃ prasannaḥ kānta ekalaḥ || 102 ||
[Analyze grammar]

kāntāstāścā'bhajan māṃ ca prāpurmāṃ ca pare pade |
tāśca sarvāḥ kṛṣṇakāntāḥ kṛṣṇavratā hareḥ priyāḥ || 103 ||
[Analyze grammar]

kṛṣṇanārāyaṇapatnyaḥ kṛṣṇapativratāḥ striyaḥ |
nityaṃ māṃ pūjayāmāsuḥ ramayāmāsurantike || 104 ||
[Analyze grammar]

miṣṭānnāni ca tā nityaṃ bhojayāmāsuracyutam |
dadhyurmāṃ hṛdaye nityaṃ śāśvatānandadāyakam || 105 ||
[Analyze grammar]

evaṃ yā pātivratyena patisevāṃ kariṣyati |
patiṃ māṃ śrīkṛṣṇanārāyaṇaṃ prāpya pramokṣyate || 106 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne gokulakanyānāṃ śrīkṛṣṇanārāyaṇapātivratyaparāṇāmaṣṭottaraśatopacārairvratapūjādibhiḥ śrīkṛṣṇapatiprāptirityādinirūpaṇanāmā ṣaḍviṃśatyadhikacatuśśatatamo'dhyāyaḥ || 426 ||
[Analyze grammar]