Chapter 420

śrīlakṣmīruvāca |
ke te dharmāḥ kathaṃ proktāḥ kālahrāsaḥ kathaṃ ca vai |
kadā kṛṣṇaḥ kadā putro divyo'dṛśyo'bhavatprabhuḥ || 1 ||
[Analyze grammar]

śrīnārāyaṇa uvāca |
śṛṇu lakṣmi pravakṣyāmi yānahaṃ coktavāṃstadā |
kālabhedān kāladharmān yathā rakṣā kṛtā mayā || 2 ||
[Analyze grammar]

lakṣmi kṛtayuge lokāḥ satyādidharmasaṃśrayāḥ |
pṛthvīrasodbhavaṃ nāma tvāhāraṃ cāharanti vai || 2 ||
[Analyze grammar]

tāḥ prajāḥ kāmacāriṇyo mānasīṃ siddhamāsthitāḥ |
dharmā'dharmau na tāvāstāṃ nirviśeṣāḥ prajāstu tāḥ || 4 ||
[Analyze grammar]

tulyamāyuḥ sukhaṃ rūpaṃ tāsāṃ tasmin kṛte yuge |
dharmā'dharmau na tāvāstāṃ kalpādau tu kṛte yuge || 5 ||
[Analyze grammar]

svenā svenā'dhikāreṇa jajñire te kṛte yuge |
catvāri tu sahasrāṇi varṣāṇāṃ divyasaṃkhyayā || 6 ||
[Analyze grammar]

ādyaṃ kṛtayugaṃ prāhuḥ sandhyānāṃ śatamaṣṭakam |
tataḥ sahasraśastāsu prajāsu prathitāsvapi || 7 ||
[Analyze grammar]

na tāsāṃ pratighāto'sti na dvandvaṃ nāpi ca klamaḥ |
parvatodadhisevinyo hyaniketāśrayāstu tāḥ || 8 ||
[Analyze grammar]

viśokāḥ sattvabahulā ekāntasukhitaprajāḥ |
tā vai niṣkāmacāriṇyo nityaṃ muditamānasāḥ || 9 ||
[Analyze grammar]

sarvakāmasukhaḥ kālo nātyarthaṃ hyuṣṇaśītatā |
mano'bhilaṣitāḥ kāmāstāsāṃ sarvatra sarvadā || 10 ||
[Analyze grammar]

uttiṣṭhanti pṛthivyāṃ vai tābhirdhyātā rasollatāḥ |
balavarṇakarī tāsāṃ siddhiḥ sā roganāśinī || 11 ||
[Analyze grammar]

asaṃskāryaiḥ śarīraiśca prajāstāḥ sthirayauvanāḥ |
tāsāṃ viśuddhātsaṃkalpājjāyante mithunāḥ prajāḥ || 12 ||
[Analyze grammar]

samaṃ janma ca rūpaṃ ca mriyante caiva tāḥ samam |
tadā satyamalobhaśca kṣamā tuṣṭiḥ sukhaṃ damaḥ || 13 ||
[Analyze grammar]

nirviśeṣāstu tāḥ sarvā rūpāyuḥśīlaceṣṭitaiḥ |
abuddhipūrvakaṃ vṛttaṃ prajānāṃ jāyate svayam || 14 ||
[Analyze grammar]

apravṛttiḥ kṛtayuge karmaṇoḥ śubhapāpayoḥ |
varṇāśramavyavasthāśca na tadā''sanna saṃkaraḥ || 1 || || 86 ||
[Analyze grammar]

anicchādveṣayuktāste vartayanti parasparam |
tulyarūpā''yuṣaḥ sarvā adhamottamavarjitāḥ || 16 ||
[Analyze grammar]

sukhaprāyā hyaśokāśca tūtpadyante kṛte yuge |
nityaprahṛṣṭamanaso mahāsattvā mahābalāḥ || 17 ||
[Analyze grammar]

lābhā'lābhau na tāsvāstāṃ mitrāmitre priyāpriye |
manasā viṣayastāsāṃ nirīhāṇāṃ pravartate || 18 ||
[Analyze grammar]

na tā lipsanti cānyonyaṃ nānugṛhṇanti caiva vai |
dhyānaṃ tvāsīt kṛtayuge tretāyāṃ jñānamūrjitam || 19 ||
[Analyze grammar]

pravṛttā dvāpare yajñā dānaṃ kaliyuge kṛtam |
sattvaṃ kṛtaṃ rajastretā dvāparaṃ tu rajastamaḥ || 20 ||
[Analyze grammar]

kalau tamastu vijñeyaṃ yugavṛttavaśena vai |
kṛtasya siddhayaḥ sarvāḥ pādenonāstadā'bhavan || 21 ||
[Analyze grammar]

kṛtasiddhau praṇaṣṭāyāmanyā siddhiravartata |
apāṃ saukṣmye pratigate tadā meghātmanā bhuvi || 22 ||
[Analyze grammar]

meghebhyaḥ stanayitnubhyaḥ pravṛttaṃ vṛṣṭisarjanam |
sakṛdeva tayā vṛṣṭyā saṃyukte pṛthivītale || 23 ||
[Analyze grammar]

prādurāsastadā tāsāṃ vṛkṣāstu gṛhasaṃsthitāḥ |
sarvapratyupabhogastu tāsāṃ tebhyaḥ prajāyate || 24 ||
[Analyze grammar]

vartayanti hi tebhyastāstretāyugamukhe prajāḥ |
tataḥ kālena mahatā tāsāmeva viparyayam || 25 ||
[Analyze grammar]

rāgalobhātmako bhāvastadā hyākasmiko'bhavat |
yattad bhavati nārīṇāṃ jīvitānte tadā''rttavam || 26 ||
[Analyze grammar]

tatastenaiva yogena vartatāṃ mithune tadā |
tāsāṃ tatkālabhāvitvānmāsi māsyupagacchatām || 27 ||
[Analyze grammar]

akāle hyārtavotpattirgarbhotpattirajāyata |
viparyayeṇa tāsāṃ tu tena kālena bhāvinā || 28 ||
[Analyze grammar]

praṇaśyanti tataḥ sarve vṛkṣāste gṛhasaṃsthitāḥ |
tatasteṣu praṇaṣṭeṣu vibhrāntā vyākulendriyāḥ || 29 ||
[Analyze grammar]

abhidhyāyanti tāṃ siddhiṃ satyābhidhyāyinastadā |
prādurbabhūvustāsāṃ ca vṛkṣāste gṛhasaṃsthitāḥ || 30 ||
[Analyze grammar]

vastrāṇi ca prasūyante phalānyābharaṇāni ca |
teṣveva jāyate tāsāṃ gandhavarṇarasānvitam || 31 ||
[Analyze grammar]

amākṣikaṃ mahāvīryaṃ puṭake puṭake madhu |
tena tā vartayanti sma sukhe tretāyuge tadā || 32 ||
[Analyze grammar]

hṛṣṭatuṣṭāstayā siddhyā prajā vai vigatajvarāḥ |
punaḥ kālāntareṇaiva punarlobhāvṛtāstu tāḥ || 33 ||
[Analyze grammar]

vṛkṣāṃstān paryagṛhṇanta madhu vā mākṣikaṃ balāt |
tāsāṃ tenā'pacāreṇa punarlokakṛtena vai || 34 ||
[Analyze grammar]

praṇaṣṭā madhunā sārdhaṃ kalpavṛkṣāḥ kvacit kvacit |
tasyāmevā'lpaśiṣṭāyāṃ sandhyākālavaśāttathā || 35 ||
[Analyze grammar]

prāvartanta tadā tāsāṃ dvandvānyabhyutthitāni tu |
śītavātātapaistīvraistatastā duḥkhitā bhṛśam || 36 ||
[Analyze grammar]

dvandvaistāḥ pīḍyamānāstu cakrurāvaraṇāni ca |
kṛtvā dvandvapratīkāraṃ niketāni hi bhejire || 317 ||
[Analyze grammar]

yathāyogyaṃ yathāprīti niketeṣvavasaṃśca te |
marudhanvasu nimneṣu parvateṣu nadīṣu ca || 38 ||
[Analyze grammar]

saṃśrayanti ca durgāṇi dhanvānaṃ śāśvatodakam |
yathāyogaṃ yathākāmaṃ sameṣu viṣameṣu ca || 39 ||
[Analyze grammar]

ārabdhāste niketā vai kartuṃ śītoṣṇavāraṇam |
tataḥ saṃsthāpayāmāsuḥ kheṭāni ca purāṇi ca || 40 ||
[Analyze grammar]

grāmāṃścaiva yathābhāgaṃ tathaivā'ntaḥ purāṇi ca |
tāsāmāyāmaviṣkaṃbhān sanniveśāntarāṇi ca || 41 ||
[Analyze grammar]

cakrustadā yathāprajñaṃ mitvā mitvā''tmano'ṅgulaiḥ |
mano'rthāni pramāṇāni tadvā prabhati cakrire || 42 ||
[Analyze grammar]

yathā te pūrvamāsan vai vṛkṣāstu gṛhasaṃsthitāḥ |
tathā kartuṃ samārabdhāścintayitvā punaḥ punaḥ || 43 ||
[Analyze grammar]

vṛkṣaśākhāsu tāḥ śālā hyakurvaṃścāpi śobhanāḥ |
kṛtvā dvandvopaghātāṃstān vārtopāyamacintayan || 44 ||
[Analyze grammar]

naṣṭeṣu madhunā sārdhaṃ kalpavṛkṣeṣu vai tadā |
viṣādavyākulāstā vai prajāstṛṣṇākṣudhātmikāḥ || 45 ||
[Analyze grammar]

tataḥ prādurbabhau tāsāṃ siddhistretāyuge'nnadā |
vārtā'rthasādhikā'pyanyā vṛttistāsāṃ hi kāmataḥ || 46 ||
[Analyze grammar]

vṛṣṭyudakāni nimnāni srotāṃsi sarito'bhavan |
nimnagāni sarastaḍāgarūpāṇi tadā'bhavan || 47 ||
[Analyze grammar]

sasyapuṣṭikarāṇyeva jātāni tāni sarvadā |
apāṃ bhūmestadā yogādoṣadhyastāsu cā'bhavan || 48 ||
[Analyze grammar]

puṣpamūlaphalinyastu oṣadhyastāḥ prajajñire |
aphālakṛṣṭāścā'nuptā ṛtupuṣpaphalāgamāḥ || 49 ||
[Analyze grammar]

tenauṣadhena vartante prajāstretāyuge tadā |
tataḥ punarabhūt tāsāṃ rāgo lobhaśca sarvaśaḥ || 50 ||
[Analyze grammar]

tatastāḥ paryagṛhṇanta nadīkṣetrāṇi parvatān |
vṛkṣān gulmauṣadhīṃścaiva prasahya tu yathābalam || 51 ||
[Analyze grammar]

gṛhṇantyanyasya tāṃstatra vartayanti ca duḥkhinaḥ |
kecicchāntāstathā kecid rūkṣāḥ krūrāstathā'pare || 52 ||
[Analyze grammar]

drohijanāḥ karmabhiśca tejasvinaśca nirbalāḥ |
tejasvināṃ karmacārā abalāśca tadā'bhavan || 53 ||
[Analyze grammar]

evaṃ vipratipanneṣu prapanneṣu parasparam |
praṇaṣṭā hriyamāṇāstā oṣadhayastadā'bhavan || 54 ||
[Analyze grammar]

tatastāsu praṇaṣṭāsu prajā jagmuḥ prajāpatim |
vṛttyarthamabhilipsantastretāhrāse hyupasthite || 55 ||
[Analyze grammar]

brahmaṇā ca tadā pṛthvyāṃ bījāni mānasāni vai |
prakṣiptāni vinirmāya tadauṣadhyaḥ prajajñire || 56 ||
[Analyze grammar]

kṛṣṭapacyā babhūvuśca sasyāni cāpi sarvathā |
atha ca brāhmaṇāstābhirvartayāmāsurīśvarāḥ || 57 ||
[Analyze grammar]

itareṣāṃ kṛtatrāṇān rarakṣuḥ kṣatriyānparān |
vṛttikarān vaiśyavarṇān sevakān yugasaṃkṣaye || 58 ||
[Analyze grammar]

kṛtavanto brāhmaṇāste brahmaṇā cānumoditāḥ |
teṣāṃ karmāṇi dharmāśca brahmā tu vyadadhātpunaḥ || 59 ||
[Analyze grammar]

prajā api tathādharmān pālayāmāsurādarāt |
varṇadharmairajīvantyo vyarudhyanta parasparam || 60 ||
[Analyze grammar]

brahmā tamarthaṃ buddhvā ca brāhmaṇānāṃ ca vaidikam |
yājanādhyāpane cakre tṛtīyaṃ ca parigraham || 61 ||
[Analyze grammar]

kṣatriyāṇāṃ balaṃ daṇḍaṃ yuddhamājīvamādiśat |
pāśupālyaṃ ca vāṇijyaṃ kṛṣiṃ caiva viśāṃ dadau || 62 ||
[Analyze grammar]

śilpājīvaṃ bhṛtiṃ caiva caturthasya vyadhātprabhuḥ |
karmājīvaṃ tato datvā tebhyaḥ sthānāni vai dadau || 63 ||
[Analyze grammar]

svasvakarmaratānāṃ vai lokāntareṣu tadyathā |
prājāpatyaṃ brāhmaṇānāṃ māhendraṃ kṣatriyasya ca || 64 ||
[Analyze grammar]

vaiśyānāṃ mārutaṃ sthāna gāndharvaṃ sevakasya vai |
athā''śramān svayaṃ brahmā sthāpayāmāsa dharmataḥ || 65 ||
[Analyze grammar]

cāturvarṇyātmakaḥ pūrvaṃ gṛhasthaścāśramaḥ smṛtaḥ |
trayāṇāmāśramāṇāṃ ca pratiṣṭhā yonireva ca || 66 ||
[Analyze grammar]

dārā'gnayo'thā''titheyaṃ ijyāśrāddhakriyāḥ prajāḥ |
ityeṣa vai gṛhasthasya samāsāddharmasaṃgrahaḥ || 67 ||
[Analyze grammar]

daṇḍī ca mekhalī caiva hyadhaḥśāyī tathā jaṭī |
guruśuśrūṣaṇaṃ bhaikṣyaṃ vidyārthe brahmacāriṇaḥ || 68 ||
[Analyze grammar]

cīrapatrājināni syurdhānyamūlaphalauṣadham |
ubhe sandhye'vagāhaśca homaścāraṇyavāsinām || 69 ||
[Analyze grammar]

madhyāhnottarabhaikṣaṃ ca hyasteyaṃ śaucamityapi |
apramādo'vyavāyaśca dayā bhūteṣu ca kṣamā || 70 ||
[Analyze grammar]

akrodho guruśuśruṣā satyaṃ vṛṣo daśātmakaḥ |
bahiḥ karmāṇi sarvāṇi na siddhyanti janasya vai || 71 ||
[Analyze grammar]

antarbhāvapraduṣṭasya kurvato'pi parākramān |
sarvasvamapi yo dadyāt kaluṣeṇā'ntarātmanā || 72 ||
[Analyze grammar]

na tena dharmabhāk sa syād bhāva evātra kāraṇam |
atha tretottare sarvaṃ sandhyākāle vṛṣādikam || 73 ||
[Analyze grammar]

punarnaṣṭaṃ prajākleśātparasparaṃ prasahya ca |
tato rājā ca manavaḥ samrājo niyamāstathā || 74 ||
[Analyze grammar]

sattā vastuṣu lokānāṃ manuṣyapaśupakṣiṣu |
kṣetreṣu vyavasāyeṣu sarvatra jīvikāsu ca || 75 ||
[Analyze grammar]

sarvatra cā'bhavan lakṣmi dharmāścāpi yathā''grahāḥ |
satyaṃ dānaॆ dayā yajño japaḥ sarvaṃ tṛtīyakam || 76 ||
[Analyze grammar]

vartate sma ca pādena dharmāstadā tathā'bhavan |
adhārmikā asurāśca viśeṣato'pi tāmasāḥ || 77 ||
[Analyze grammar]

dvāpare cā'bhavan lakṣmi prajā yajñapradhānikāḥ |
smṛtayo niyamāstatrarṣibhiḥ saṃgrathitāḥ sukhāḥ || 78 ||
[Analyze grammar]

devānāṃ jīvikā viprajīvikā bhṛtyajīvikāḥ |
kārvādiśilpivaryāṇāṃ jīvikāstatra nirmitāḥ || 79 ||
[Analyze grammar]

nārīṇāṃ ca vivāhādisattāstatra viniścitāḥ |
putrāṇāṃ caurasānāṃ vai dāyabhāktvaṃ sthirīkṛtam || 80 ||
[Analyze grammar]

śiṣyāṇāṃ kanyakānāṃ ca dāyabhāktvaṃ vibhājitam |
rājñāṃ bhuvaḥ prajānāṃ ca sāmānyato viśeṣataḥ || 81 ||
[Analyze grammar]

jīvikāsādhanānyatra vyāpārāśca viniścitāḥ |
pitṛputrādiśabdānāmarthā vyaktiṣu yojitāḥ || 82 ||
[Analyze grammar]

tadyathā śrūyatāṃ lakṣmi tvayā loke pravartitāḥ |
bījapradaḥ pitā prokto mātā garbhasya dhāriṇī || 83 ||
[Analyze grammar]

abījado mātṛpatiścopapitā prakīrtitaḥ |
agarbhadhrā pitṛpatnī copamātā prakīrtitā || 84 ||
[Analyze grammar]

pitāmahaḥ pitṛpitā tatpitā prapitāmahaḥ |
mātāmahaḥ mātṛpitā tatpitā pramātāmahaḥ || 85 ||
[Analyze grammar]

pitāmahī piturmātā tacchravaśrūḥ prapitāmahī |
tacchravaśraśca parijñeyā sā vṛddhaprapitāmahī || 86 ||
[Analyze grammar]

mātāmahā māturmātā mātṛtulyā ca pūjitā |
pramātāmahītijñeyā pramātāmahakāminī || 87 ||
[Analyze grammar]

vṛddhamātāmahī jñeyā tatpituḥ kāminī tathā |
pitṛbhrātā pitṛvyaśca mātṛbhrātā tu mātulaḥ || 88 ||
[Analyze grammar]

pitṛsvasā piturmātṛṣvasā mātussvasā smṛtā |
sūnuśca tanayaḥ putro dāyādaścātmajastathā || 89 ||
[Analyze grammar]

dhanabhāgvīryajaścaiva puṃsi janye ca vartate |
janyāyāṃ duhitā kanyā cātmajā parikīrtitā || 90 ||
[Analyze grammar]

putrapatnī vadhūrjñeyā jāmātā duhituḥ patiḥ |
patiḥ priyaśca bhartā ca svāmī kānte ca vartate || 91 ||
[Analyze grammar]

devaraḥ svāmino bhrātā nanāndā svāminaḥ svasā |
śvaśuraḥ svāminastātaḥ śvaśrūśca svāminaḥ prasūḥ || 92 ||
[Analyze grammar]

bhāryā jāyā priyā kāntā strī ca patnī prakīrtitā |
patnībhrātā śyālakaśca svasāpatnyāśca śālikā || 93 ||
[Analyze grammar]

patnī mātā tathā śvaśrūstatpitā śvaśuraḥ smṛtaḥ |
sagarbhaḥ sodaro bhrātā sagarbhā bhaginī smṛtā || 94 ||
[Analyze grammar]

bhaginījo bhāgineyo bhrātṛjo bhrātṛputrakaḥ |
āvutto bhaginīkānto bhaginīpatireva ca || 95 ||
[Analyze grammar]

śyālīpatistu bhrātā ca śvaśuraikatvahetunā |
śvaśurastu pitā jñeyo janmadātuḥ samo mune || 96 ||
[Analyze grammar]

annadātā bhayatrātā patnītātastathaiva ca |
vidyādātā janmadātā pañcaite pitaro nṛṇām || 97 ||
[Analyze grammar]

janmadātrī dugdhapoṣṭrī jñānadā mātaro nṛṇām |
annadātuśca yā patnī bhaginī gurukāminī || 98 ||
[Analyze grammar]

mātā ca tatsapatnī ca kanyā putrapriyā tathā |
māturmātā piturmātā śvaśrūpitroḥ svasā tathā || 99 ||
[Analyze grammar]

pitṛvyastrī mātulānī mātaraśceti ṣoḍaśa |
pautrastu putraputre ca prapautrastatsute'pi ca || 100 ||
[Analyze grammar]

tatputrādyāśca ye vaṃśyāḥ kulajāśca prakīrtitāḥ |
kanyāputrastu dauhitrastatputrādyāśca bāndhavāḥ || 101 ||
[Analyze grammar]

bhāgineyasutādyāśca puruṣā bāndhavāḥ smṛtāḥ |
bhrātṛputrasya putrādyāste punajñātayaḥ smṛtāḥ || 102 ||
[Analyze grammar]

guruputrastathā bhrātā poṣyaḥ paramabāndhavaḥ |
gurukanyā ca bhaginī poṣyā mātṛsamā tathā || 103 ||
[Analyze grammar]

putrasya ca gururbhrātā poṣyaḥ susnigdhabāndhavaḥ |
putrasya śvaśuro bhrātā bandhurvaivāhikaḥ smṛtaḥ || 104 ||
[Analyze grammar]

kanyāyāḥ śvaśure caiva tatsambandhaḥ prakīrtitaḥ |
guruśca kanyākāyāśca bhrātā susnigdhabāndhavaḥ || 105 ||
[Analyze grammar]

guruśvaśurabhrātṝṇāṃ gurutulyaḥ prakīrtitaḥ |
bandhutā yena sārdhaṃ ca tanmitraṃ parikīrtitam || 106 ||
[Analyze grammar]

mitraṃ sukhapradaṃ jñeyaṃ duḥkhado ripurucyate |
bāndhavo duḥkhado daivānnissambandho'sukhapradaḥ || 107 ||
[Analyze grammar]

sambandhāstrividhā loke sarveṣāṃ jagatītale |
vidyājo yonijaścāpi prītijaśca prakīrtitaḥ || 108 ||
[Analyze grammar]

mitraṃ tu prītijaṃ jñeya sa sambandhaḥ sudurlabhaḥ |
mitramātā mitrabhāryā mātṛtulyā na saṃśayaḥ || 109 ||
[Analyze grammar]

mitrabhrātā mitrapitā bhrātṛtātasamau nṛṇām |
caturtho nāmasambandhaḥ sarvatra jāyate nṛṇām || 110 ||
[Analyze grammar]

jāraścopapatirbandhuduṣṭaḥ saṃbhogakartari |
upapatnyāṃ navajñā ca preyasī cittahāriṇī || 111 ||
[Analyze grammar]

svāmitulyaśca jāraśca navajñā gṛhiṇī samā |
evaṃ śabdāḥ pravṛttāśca dvāpare vyavahārajāḥ || 112 ||
[Analyze grammar]

tejīyasāṃ na doṣāya vyavahārā yuge yuge |
tataḥ kṛṣṇo'bhavaṃ rakṣākaro dvāparavaigame || 113 ||
[Analyze grammar]

dharmarakṣādaityanāśatāpasīhākaro'bhavam |
kalau dharmā bahukleśāḥ samajāyanta vai yadi || 114 ||
[Analyze grammar]

gaṃgādyāḥ saritaścāpi tīrthāni devatāstathā |
gate catuḥ sahasre vai varṣāṇāṃ tu kalerbhuvi || 115 ||
[Analyze grammar]

yāsyanti divyalokaṃ te tadā vai kambharāsutaḥ |
kṛṣṇanārāyaṇo dharmaṃ sthāpayiṣyati bhūtale || 116 ||
[Analyze grammar]

gopālakṛṣṇaputro'sāvācāryo bhagavān svayam |
śrīrādhāpadminīkāntaḥ kamalāpārvatīpatiḥ || 117 ||
[Analyze grammar]

māṇikīśaḥ prabhālakṣmīramānāthaḥ pareśvaraḥ |
dharmaṃ bhāgavataṃ loke saṃsthāpyaiṣyati vai vanam || 118 ||
[Analyze grammar]

brahmadhāma tato dharmaḥ kāle yāte śate śate |
punarnāśaṃ sameṣyanti sthāpitā dharmasetavaḥ || 119 ||
[Analyze grammar]

śālagrāmo harermūrtirjagannāthaḥ kathānakam |
sahasrādvāntare sarve yāsyanti śrīhareḥ padam || 120 ||
[Analyze grammar]

vaiṣṇavāḥ saṃhitāgranthāḥ śaṃkhāśca śrāddhatarpaṇam |
vedoktāni ca karmāṇi yāsyanti layamityapi || 121 ||
[Analyze grammar]

hareḥ pūjā harernāma tatkīrtirguṇakīrtanam |
vedaśāstrāṇi dharmāśca yāsyanti vilayaṃ svataḥ || 122 ||
[Analyze grammar]

sattvaṃ satyaṃ sādhutā ca divyatā grāmyadevatāḥ |
vrataṃ tapasyā'naśanaṃ yāsyanti śrīhareḥ padam || 123 ||
[Analyze grammar]

vāmācāraratāḥ sarve mithyākāpaṭyasaṃyutāḥ |
tulasīvarjitāḥ sarve bhaviṣyanti tataḥ param || 124 ||
[Analyze grammar]

ekādaśīvihīnāśca sarvadharmavivarjitāḥ |
kṛṣṇaprasaṃgavimukhā bhaviṣyanti tataḥ param || 125 ||
[Analyze grammar]

śaṭhāḥ krūrā dāmbhikāśca mahā'haṃkārasaṃyutāḥ |
caurāśca hiṃsakāḥ sarve bhaviṣyanti tataḥ param || 126 ||
[Analyze grammar]

puṃsāṃ bhedastathā strīṇāṃ vivāho vādanirṇayaḥ |
svasvāmibhedī vastūnāṃ na bhaviṣyatyataḥ param || 127 ||
[Analyze grammar]

sarve janāḥ strīvaśāśca puṃścalyaśca gṛhe gṛhe |
tarjanairbhartsanaiḥ śaśvat svāminaṃ tāḍayanti ca || 128 ||
[Analyze grammar]

gṛheśvarī ca gṛhiṇī gṛhī bhṛtyādhiko'dhamaḥ |
ceṭī bhṛtyāsamā vadhvaḥ śvaśrūśca śvaśurastathā || 129 ||
[Analyze grammar]

puṃścalyo rājyakartryaśca yonisambandhino nṛpāḥ |
kartāro balino loke yonisambandhibāndhavāḥ || 130 ||
[Analyze grammar]

saṃbhāṣā naiva vidvadbhirmūrkhairāntaramitratā |
sarvakarmā'kṣayāḥ puṃso yoṣitāmājñayā vinā || 131 ||
[Analyze grammar]

yajñasūtraṃ bhāvaluptaṃ jāteḥ paricayo na ca |
mlecchācārā bhaviṣyanti sarve varṇāśramāstadā || 132 ||
[Analyze grammar]

mlecchaśāstraṃ paṭhiṣyanti mlecchabhojanayoginaḥ |
varṇāḥ sarve bhaviṣyanti mlecchānāṃ sevakāstadā || 133 ||
[Analyze grammar]

sūpakartryo bhaviṣyanti mlecchikāścarmakārikāḥ |
satyahīnā janāḥ sarve sasyahīnā ca medinī || 134 ||
[Analyze grammar]

phalahīnāśca taravo'patyahīnāśca yoṣitaḥ |
kṣīrahīnāstathā gāvaḥ kṣīraṃ sarpirvivarjitam || 135 ||
[Analyze grammar]

dāmpatyaṃ prītihīnaṃ ca gṛhiṇaḥ sukhavarjitāḥ |
pratāpahīnā bhūpāśca prajāśca karapīḍitāḥ || 136 ||
[Analyze grammar]

jalahīnā nadā nadyo dīrghikāḥ kandarātmikāḥ |
dharmahīnāḥ puṇyahīnā varṇā avarṇakāstadā || 137 ||
[Analyze grammar]

lakṣeṣu puṇyavān ko'pi na tiṣṭhati tataḥ param |
kutsitā vikṛtākārā narā nāryaśca bālakāḥ || 138 ||
[Analyze grammar]

kuvārttāḥ kutsitapathā bhaviṣyanti tataḥ param |
kecid grāmāśca nagarā nāśaprāyā vidurgakāḥ || 139 ||
[Analyze grammar]

naraśūnyāḥ prajāśūnyāḥ svalpakuṭīrakānvitāḥ |
araṇyāni bhaviṣyanti gomāyūvāsitāḥ kalau || 140 ||
[Analyze grammar]

araṇyavāsinaḥ sarve janāśca karapīḍitāḥ |
sasyāni tu bhaviṣyanti taḍāgeṣu nadīṣu ca || 141 ||
[Analyze grammar]

kṣetrāṇi sasyahīnāni dhanino dravyavarjitāḥ |
caurā dhaninaḥ prakṛṣṭā baladarpasamanvitāḥ || 142 ||
[Analyze grammar]

prakṛṣṭavaṃśajā hīnā bhaviṣyanti kalau yuge |
alīkavādino dhūrtāḥ śaṭhā vai satyavādinaḥ || 143 ||
[Analyze grammar]

pāpinaḥ puṇyavantaścā'pyaśiṣṭaḥ śiṣṭa eva tu |
jitendriyā lampaṭāśca puṃścalyaśca pativratāḥ || 144 ||
[Analyze grammar]

tapasvinaḥ pātakino viṣṇubhaktā avaiṣṇavāḥ |
hiṃsakāśca dayāyuktāścaurāśca naraghātinaḥ || 145 ||
[Analyze grammar]

bhikṣuveṣadharā dhūrtā nindantyupahasanti ca |
dehasevāsu nipuṇā janānāṃ mohakāstathā || 146 ||
[Analyze grammar]

pūjitāste bhaviṣyanti vañcakā jñānadurbalāḥ |
vāmanā vyādhitāḥ śuṣkā narā nāryaśca sarvataḥ || 147 ||
[Analyze grammar]

alpāyuṣo jarāyuktā yauvaneṣu kalau yuge |
dharmaḥ paśusamācāro yonisambandhamukhyatā || 148 ||
[Analyze grammar]

mātṛbhāvo'pi ca lupto bhaviṣyati tadā kalau |
pañcasahasravarṣāṇāṃ vigame tu punaḥ punaḥ || 149 ||
[Analyze grammar]

ahaṃ vipro bhaviṣyāmi camatkārapure tadā |
janmasiddho mahāyogī nāmnā bṛhadvrataḥ kalau || 150 ||
[Analyze grammar]

bhaktiṃ bhagavataścāhaṃ kṛṣṇanārāyaṇasya vai |
sthāpayiṣye lakṣmīnārāyaṇasaṃhitayā tadā || 151 ||
[Analyze grammar]

madupadiṣṭavākyaiśca narā yāsyanti mokṣaṇam |
manāṃsi sāttvikānyeva bhaviṣyanti mamāśrayāt || 152 ||
[Analyze grammar]

ataḥ paraṃ narā nāryaścāṇḍālāḥ sarva eva te |
palitāḥ ṣoḍaśe varṣe mahāvṛddhāstu viṃśatau || 153 ||
[Analyze grammar]

aṣṭavarṣā ca yuvatī rajoyuktā ca garbhiṇī |
vatsarānte prasūtā strī ṣoḍaśena jarānvitā || 154 ||
[Analyze grammar]

etāḥ kāścit sahasreṣu vandhyāścāpi gṛhe gṛhe |
kanyāvikrayiṇaścāpi svakanyāpatayastathā || 155 ||
[Analyze grammar]

mātṛjāyāvadhūnāṃ ca jāropārjanatatparāḥ |
kanyānāṃ bhaginīnāṃ ca jāropārjanajīvinaḥ || 156 ||
[Analyze grammar]

harernāmnāṃ vikrayiṇaḥ puṇyavikrayiṇastadā |
kīrtyai dānaṃ kṣaṇaṃ dattvā punaścāpahariṣyati || 157 ||
[Analyze grammar]

devagurubrahmavṛttiṃ prasahyā'pahariṣyati |
kanyāśvaśrūvadhūsvasṛsapatnīmātṛgāminaḥ || 158 ||
[Analyze grammar]

agamyābhrātṛpatnyādigāminaśca kalau yuge |
ajāgogardabhīmeḍhīhariṇīgāminaḥ kalau || 119 ||
[Analyze grammar]

gavayīgaruḍīśunīmayūrīgāminastathā |
sūkarīvānarīvājinyādisaṃgāminaḥ kalau || 160 ||
[Analyze grammar]

svasya nārīṃ parityajya vihariṣyanti sarvataḥ |
patnīnāṃ nirṇayo nāsti bhartṛṇāṃ ca kalau yuge || 161 ||
[Analyze grammar]

prajānāṃ caiva vastūnāṃ grāmāṇāṃ ca viśeṣataḥ |
alīkavādinaḥ sarve sarve cauryārthalampaṭāḥ || 162 ||
[Analyze grammar]

parasparaṃ hiṃsakāśca sarve ca naraghātinaḥ |
nāryaḥ sarvapaśujñātinarasaṃgamitāstadā || 163 ||
[Analyze grammar]

vṛṣalaiḥ pālitāvastraśūnyāścāpi kalau yuge |
yajñasūtravihīnāśca dhyānaśuddhivihīnakāḥ || 164 ||
[Analyze grammar]

puṃścalī vārdhuṣā'bīrā kuṭṭinī ca rajasvalā |
sarveṣāṃ randhanāgāre bhaviṣyanti tu pācikāḥ || 165 ||
[Analyze grammar]

annānāṃ nirṇayo nāsti yonīnāṃ nirṇayo na ca |
putrāṇāṃ nirṇayo naiva sarve mlecchāḥ kalau yuge || 166 ||
[Analyze grammar]

kalau ghore pravṛtte tu tadantasamaye bhuvi |
tatra pañcasamā kanyā garbhamātā bhaviṣyati || 167 ||
[Analyze grammar]

daśavarṣavayaskā sā vṛddhā mṛtyusamīpagā |
narā dvādaśavarṣāśca mṛtyupātrāṇi vai tadā || 168 ||
[Analyze grammar]

sampūrṇe tu kalau yāte hrasvaṃ sarvaṃ tadā bhavet |
hastapramāṇe vṛkṣe cā'ṅguṣṭhamāne ca mānave || 169 ||
[Analyze grammar]

varṣadvayāyuṣaḥ sarve varṣāyuṣaścatuṣpadāḥ |
māsāyuṣo nadā nadyo mārjārā iva hastinaḥ || 170 ||
[Analyze grammar]

mūṣikā'ñjalitṛptāśca bhaviṣyanti janāḥ kalau |
mūṣikāgarbhavadbālān janayiṣyanti yoṣitaḥ || 171 ||
[Analyze grammar]

pṛthvīvāsā vasatayo gṛhādi nāsti vai tadā |
vṛṣṭiścā'ṅguṣṭhaparvā ca varṣāsvekā bhaviṣyati || 172 ||
[Analyze grammar]

evaṃ kaleḥ sarvakāle vigate prāntabhāgake |
viprasya viṣṇuyaśasaḥ putraḥ kalkī bhaviṣyati || 173 ||
[Analyze grammar]

so'haṃ nārāyaṇo lakṣmi karavālaṃ kare dadhan |
kṛṣṇadattaṃ śvetavāhaṃ samāruhyā'mbare vrajan || 174 ||
[Analyze grammar]

pṛthvīṃ pradakṣiṇīkṛtya trirātreṇa bhuvastalam |
vāyupramaṇḍalaṃ sarvaṃ svāṃgasparśena vartulam || 175 ||
[Analyze grammar]

kariṣye pāvanaṃ paścānmlecchān kṛtvā sumānasān |
hatvā tvanyānatiduṣṭān kariṣyāmi ca saṃskṛtān || 176 ||
[Analyze grammar]

kṛtaṃ saṃsthāpayiṣyāmi satyayajñārhamānavān |
kalau gate ca durdharṣe saṃpravṛtte kṛte yuge || 177 ||
[Analyze grammar]

tapassatyasamāyukto dharmaḥ pūrṇo bhaviṣyati |
tapasvinastadā viprāḥ pūtāste vaiṣṇavāstataḥ || 178 ||
[Analyze grammar]

kalkiśiṣyāśca dharmiṣṭhā vedajñānaprakāśinaḥ |
pativratāstataḥ satyo nāryaḥ patnīvratā narāḥ || 179 ||
[Analyze grammar]

varṇadharmāḥ punaḥ sthāne prāpsyanti ca prakāśanam |
yajñā dānāni karmāṇi lajjā ca mānaveṣu vai || 180 ||
[Analyze grammar]

viṣṇubhaktiratāḥ sarve bhaviṣyanti ca vaiṣṇavāḥ |
leśo nāsti hyadharmāṇāṃ dharmapūrṇe kṛte yuge || 181 ||
[Analyze grammar]

vyomayānāni sarvatra dūraśravaṇaśaktayaḥ |
svargagamanayānāni bhaviṣyanti kṛte yuge || 182 ||
[Analyze grammar]

dūradarśanayogāśca vārdhitalābhigāmitā |
vidyudagnivāyurathā bhaviṣyanti kṛte yuge || 183 ||
[Analyze grammar]

bhautikeṣvaṇimādyāśca siddhayaḥ śaktirūpikāḥ |
layanāśodbhavakartryo bhaviṣyanti kṛte yuge || 184 ||
[Analyze grammar]

bhūloke svargaloke na bhedo bhaviṣyati kṛte |
nāryo devya ivā''bhāsā narā devāḥ kṛte yuge || 185 ||
[Analyze grammar]

mantrā tantrāśca yantrāśca saphalāśca kṛte yuge |
prabhākulyāḥ jalakulyāḥ śabdakulyāḥ gṛhe gṛhe || 186 ||
[Analyze grammar]

aṣṭaṣaṣṭikalāgrāhāḥ pratibimbagrahānalāḥ |
śārīrabhedavijñānaṃ prasṛtaṃ syāt kṛte yuge || 187 ||
[Analyze grammar]

garbhā'garbhecchuniyamāḥ puṃstrīvivartaśaktayaḥ |
mṛtajīvanadānādi bhaviṣyanti kṛte yuge || 188 ||
[Analyze grammar]

vānaspatyavidhirdivyo rāsāyanavivartanaḥ |
drāgecchāpūrakaḥ śakto bhaviṣyati kṛte yuge || 189 ||
[Analyze grammar]

sañjīvanī mahāvidyā tathā'dṛśyaprayojikā |
devāveśādisaṃcārāḥ bhaviṣyanti kṛte yuge || 190 ||
[Analyze grammar]

śaktitattvādibodhāni bhūtabhautikajāni ca |
divyamānakarāṇyeva yantrāṇi syuḥ kṛte yuge || 191 ||
[Analyze grammar]

evaṃ saṃsthāpya bhagavān dharmaṃ kṛtayugaṃ navam |
svargavad vasudhāṃ kṛtvā cāntardhānaṃ gamiṣyati || 192 ||
[Analyze grammar]

dharmastripācca tretāyāṃ dvipācca dvāpare smṛtaḥ |
kalau pravṛtte pādātmā sarvalopastataḥ param || 193 ||
[Analyze grammar]

lakṣmi sarvatra me bhaktāḥ pāvanā vicaranti vai |
teṣāṃ pādarajaḥsparśād bhūḥ sadā tīrtharūpiṇī || 194 ||
[Analyze grammar]

nadyo vṛkṣāḥ parvatāśca madbhaktaiḥ pāvitāśca te |
kṣālayanti janānāṃ vai pāpāni tīrtharūpiṇaḥ || 195 ||
[Analyze grammar]

sādhavaḥ puṇyadehāśca sādhvyaścāpi hariśritāḥ |
cetanāni hi tīrthāni pāvayanti dine dine || 196 ||
[Analyze grammar]

pṛthivyāṃ yāni tīrthāni pāpāśca mānavādayaḥ |
devā narāśca paśavo jīvāḥ sthāvarajaṅgamāḥ || 197 ||
[Analyze grammar]

bhaviṣyanti ca pūtāste madbhaktasparśadarśanāt |
iti te kathitāḥ sādhvi yugadharmā bahuprathāḥ || 198 ||
[Analyze grammar]

nāryaḥ pativratā yatra bhaviṣyanti yuge yuge |
tatra svargaṃ sadā saukhyaṃ bhaviṣyati dhanādikam || 199 ||
[Analyze grammar]

iti te kathitaṃ lakṣmi prasaṃgānmama janma ca |
paṭhanācchravaṇāccāsya bhaved vaikuṇṭhavāsabhāg || 200 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pātivratyamahimani caturyugadharmanirūpaṇanāmā viṃśatyadhikacatuśśatatamo'dhyāyaḥ || 420 ||
[Analyze grammar]