Chapter 418

śrīnārāyaṇa uvāca |
śṛṇu lakṣmi hṛdayena kathayāmi tavā'grataḥ |
gopyaṃ naiva mayā kiñcid bhavatyāṃ sarvathā priye || 1 ||
[Analyze grammar]

kṛṣṇanārāyaṇaścā'haṃ bhavāmyamoghavīryavān |
patnīnāṃ me na pāro'sti sarvāstā me pativratāḥ || 2 ||
[Analyze grammar]

parakalyāṇakāriṇyo mayi pradattabhāvanāḥ |
madarthaṃ kṛtanirmāṇā mayā pūrvaṃ prakāśitāḥ || 3 ||
[Analyze grammar]

akṣarabrahmadhāmasthāścā'saṃkhyāḥ santi me priyāḥ |
paraṃdhāmagatā dvādaśasāhasraṃ priyottamāḥ || 4 ||
[Analyze grammar]

kāścid golokavāsinyaḥ kāścidvai dvārapālikāḥ |
śṛṃgāraprakarāḥ kāścit kāścicchayyopakārikāḥ || 5 ||
[Analyze grammar]

pārṣadāṇyaḥ priyāḥ kāścicchrīvṛndāvanapālikāḥ |
govardhananivāsinyaḥ kāścit kuñjavidhāyakāḥ || 6 ||
[Analyze grammar]

mannikuñjanivāsinyo'rbudā'rbudā'rbudā'rbudāḥ |
yamunāyūthagāḥ kāścijjāhnavīyūthagāḥ parāḥ || 7 ||
[Analyze grammar]

ramāyūthagatāścānyā madhumādhavīyūthagāḥ |
virajāyūthagāścāpi lalitāyūthagāstathā || 8 ||
[Analyze grammar]

viśākhāyūthagāścāpi māyāyā yūthagāstathā |
śrutayaśca tathā ārṣyo maithilāḥ kauśalāstathā || 9 ||
[Analyze grammar]

sāketinyastathā sītāpulindinyo mama priyāḥ |
madyogena sadā divyāḥ pātivratyaparāyaṇāḥ || 10 ||
[Analyze grammar]

tāsāṃ pūrvajanūnāṃ me patnīnāṃ na prasaṃkhyakā |
smṛtvā tubhyaṃ kathayāmi śrutvā svasṝḥ pramodase || 11 ||
[Analyze grammar]

śvetadvīpe ca māṃ nāthaṃ śrutayastuṣṭuvuḥ purā |
uśatībhirgirābhiśca prasanno'haṃ tadā'bhavam || 12 ||
[Analyze grammar]

vṛṇīta yūyaṃ varaṇaṃ manmanovācchitaṃ hi vaḥ |
śrutayaḥ prāhurānandamātraṃ te yat svarūpakam || 13 ||
[Analyze grammar]

taddivyaṃ darśayā'smākaṃ yadi deyo varo hi naḥ |
śrutvaitad darśayāmāsa svaṃ lokaṃ brahma cā'kṣaram || 14 ||
[Analyze grammar]

brāhmīpatnīstatra sarvā darśayāmāsa satpatiḥ |
tanmadhye'kṣaradhāmādhipatiḥ kṛṣṇanarāyaṇaḥ || 15 ||
[Analyze grammar]

darśayitvā ca tāḥ prāha brūta kiṃ karavāṇi vaḥ |
śrutayaśca tadā prāhustvayi dṛṣṭe manāṃsi naḥ || 16 ||
[Analyze grammar]

kandarpakoṭilāvaṇye smarakṣiptānyasaṃśayam |
kāminībhāvanopetā jātāḥ sma svīkuru prabho || 17 ||
[Analyze grammar]

ramaṇaṃ tvāṃ samāsādya bhajāmaḥ saphalīkuru |
kṛṣṇanārāyaṇaḥ prāha durghaṭo'yaṃ manorathaḥ || 18 ||
[Analyze grammar]

tathāpi trivikramasya brahmāṇḍe yamunātaṭe |
pṛthvyāṃ vraje mama kṣetre yūyaṃ gopyo bhaviṣyatha || 19 ||
[Analyze grammar]

vṛndāvane bhaviṣyāmi rāse preyān patirhi vaḥ |
sevitvā kāmadharmairmāṃ kṛtakṛtyā bhaviṣyatha || 20 ||
[Analyze grammar]

iti tāḥ śrutayaḥ sarvā mama patnyaḥ pativratāḥ |
athā'parāḥ śṛṇu lakṣmi rāmādityayuge purā || 21 ||
[Analyze grammar]

rāmo'haṃ ca yadā sītāmuvāha balavān yuvā |
dhanurbhaṃge tathā svayaṃvare tatra tu maithilāḥ || 22 ||
[Analyze grammar]

koṭiśaścāyayurnāryo dṛṣṭvā māṃ mumuhuśca tāḥ |
antaryāmitayā jñātvā tābhyaḥ koṭisvarūpadhṛk || 23 ||
[Analyze grammar]

tadaiva darśanaṃ pratipurandhrīṃ saṃdadau bhavan |
tāśca prāhuḥ purandhryo māṃ bhartā no bhava kāmada || 24 ||
[Analyze grammar]

mayā rāmeṇa tāścoktāḥ samācarata matkṛte |
tīrthaṃ dānaṃ tapaḥ kṛcchraṃ japaṃ saṃsmaraṇaṃ muhuḥ || 25 ||
[Analyze grammar]

śraddhayā parayā bhaktyā tato'haṃ dvāparottare |
kṛṣṇanārāyaṇaḥ kānto bhavatīnāṃ manorathān || 26 ||
[Analyze grammar]

patirbhūtvā pūrayiṣye vraje gopyo bhaviṣyatha |
sevitvā kāmadharmairmāṃ kṛtakṛtyā bhaviṣyatha || 27 ||
[Analyze grammar]

athā'haṃ tāṃ satīṃ sītāṃ nītvā jitvā ca bhārgavam |
kosalān prayayau mārge kosalā yoṣitaśca mām || 28 ||
[Analyze grammar]

yuvānaṃ sundaraṃ dṛṣṭvā manobhirvavrire patim |
tābhyo me divyasaṃsparśaṃ dattvā koṭisvarūpadhṛk || 29 ||
[Analyze grammar]

varaṃ ca dattavān vo'haṃ pūrayiṣye manorathān |
japaṃ kṛtvā mama bhaktyā vraje gopyo bhaviṣyatha || 30 ||
[Analyze grammar]

sevitvā kāmadharmairmāṃ kṛtakṛtyā bhaviṣyatha |
atha sāketapuryāṃ taṃ dṛṣṭvā sāketayoṣitaḥ || 31 ||
[Analyze grammar]

tatkṣaṇaṃ mohamāpannāstapaścerurdhṛtavratāḥ |
rāmaprāptirbhavet kāntasvarūpeṇeti niścitāḥ || 32 ||
[Analyze grammar]

tāśca rāmo vyomavāṇyā prāha yuṣmanmanorathāḥ |
satyaḥ pūrṇā bhaviṣyanti dvāparānte yamītaṭe || 33 ||
[Analyze grammar]

saṃsevya kāmadharmairmāṃ kṛtakṛtyā bhaviṣyatha |
athā'ha rāmarūpeṇa vanaṃ yāto yadā priye || 34 ||
[Analyze grammar]

daṇḍakāraṇyagopyaśca mumuhurmayi kāmataḥ |
kirātyo vananāryo māṃ mumuhurvavrire patim || 35 ||
[Analyze grammar]

mayā tābhyo varo datto dvāparānte bhaviṣyatha |
gopyo manorathān kāmaṃ pūrayiṣye patirhi vaḥ || 36 ||
[Analyze grammar]

athā'ha rāmarūpo vai yayau pañcavaṭīṃ tataḥ |
maddarśanasmararujaḥ pulindyaḥ premavihvalāḥ || 37 ||
[Analyze grammar]

rāmapādarajo dhṛtvā''śliṣṭaṃ rāmaṃ samāyayuḥ |
rāmaḥ patnīvrataṃ svasya prāha tā bhagnamānasāḥ || 38 ||
[Analyze grammar]

babhūvuśca punaḥ prāha vṛndāvane manorathāḥ |
dvāparānte bhavitāro vaḥ prapūrṇāḥ priye mayi || 39 ||
[Analyze grammar]

saṃsevya kāmadharmairmāṃ kṛtakṛtyā bhaviṣyatha |
atha rāmaṃ rāvaṇasya dvīpe dṛṣṭvā dvijāṃganāḥ || 40 ||
[Analyze grammar]

mumuhurbhaktimatyaśca vavrire manasā ca tāḥ |
tābhyo dadau tadā svapne darśanaṃ samuvāca tāḥ || 41 ||
[Analyze grammar]

kariṣye yamunātīre kāntarūpeṇa sarvathā |
manoratho bhavatīnāṃ kāmānandapradastadā || 42 ||
[Analyze grammar]

sevitvā kāmadharmairmāṃ kṛtakṛtyā bhaviṣyatha |
atha sāketapuryāṃ saḥ samāgatya makhān bahūn || 43 ||
[Analyze grammar]

cakāra tatra cāyātā nāryo deśavideśataḥ |
tāśca rāmaṃ samālokya vavrire mānasaṃ patim || 44 ||
[Analyze grammar]

tābhyastadā varaṃ rāmo dadau ca gokule priyāḥ |
bhaviṣyatha mama sarvāḥ pūrayiṣye manorathān || 45 ||
[Analyze grammar]

saṃsevya kāmadharmairmā kṛtakṛtyā bhaviṣyatha |
atha sītāparityāgottaraṃ yajñeṣu kānakī || 46 ||
[Analyze grammar]

pratiyajñaṃ kṛtā tāsāṃ samūho'bhūd harigṛhe |
tāścaitanyaghanā bhūtvā rantuṃ rāmaṃ samāgatāḥ || 47 ||
[Analyze grammar]

rāma āha na gṛhṇāmi hyekapatnīvrato'smyaham |
tadocustāḥ kathaṃ nātha na gṛhṇāsi tavā'ṅganāḥ || 48 ||
[Analyze grammar]

ardhāgīryajñakāleṣu satataṃ kāryasādhikāḥ |
karaṃ gṛhītvā tyajasi tataḥ pāpamavāpsyasi || 49 ||
[Analyze grammar]

rāmaḥ prāha tadā satyasvarūpā mama kāminī |
sītā caikā na cānyā vai tacchāyā yūyameva ha || 50 ||
[Analyze grammar]

tato yuṣmanmanobhāvaṃ pūrayiṣye'nyajanmani |
dvāparānte yamunāyā vṛndāvane bhaviṣyatha || 51 ||
[Analyze grammar]

iti tā gopikā jātā yajñasīśca me priyā |
atha lakṣmi śṛṇu cānyā matpatnīḥ pāralaukikīḥ || 52 ||
[Analyze grammar]

ramā vaikuṇṭhavāsinyaḥ śvetadvīpasakhījanāḥ |
ūrdhvavaikuṇṭhavāsinyastathā'jitapadāśritāḥ || 53 ||
[Analyze grammar]

śrīlokācalavāsinyaḥ śrīsakhyo'pi samudrajāḥ |
tāśca gopyo bhaviṣyanti vraje mama priyāḥ khalu || 54 ||
[Analyze grammar]

athā'nyā devatāḥ sarvā vṛndāvane samāgatāḥ |
mama patnyaśca tā jātāḥ koṭyarbudaprasaṃkhyakāḥ || 55 ||
[Analyze grammar]

oṣadhyo vallikā sarvāstapastepuryamītaṭe |
tāśca mohaṃ gatā nāryo bhūtvā rāse samāyayuḥ || 56 ||
[Analyze grammar]

kāmadharmeṇa tāḥ sarvāḥ kṛtakṛtyāstadā'bhavan |
jālandharyaśca pramadā vṛndāpatiṃ ca māṃ tadā || 57 ||
[Analyze grammar]

vilokya vavrire kāntaṃ viṣṇuḥ prāha tadā ca tāḥ |
vṛndāraṇye striyo bhūtvā māṃ bhajiṣyatha matpriyāḥ || 58 ||
[Analyze grammar]

samudrakanyāḥ śrīmatsyaṃ hariṃ dṛṣṭvā vimohitāḥ |
śrīmatsyavaradānāttā gopyo jātā mama priyāḥ || 59 ||
[Analyze grammar]

pṛthoḥ rājye pṛthuṃ māṃ ca dṛṣṭvā yā mumuhuḥ striyaḥ |
tā duduhuḥ patiṃ kṛṣṇaṃ bhuvo gopyo'bhavan priyāḥ || 60 ||
[Analyze grammar]

kāmasenāmohanārtha nārāyaṇājñayā ca yāḥ |
nareṇoroḥ prakaṭitā divyā yā apsarogaṇāḥ || 61 ||
[Analyze grammar]

nārāyaṇaṃ varaṃ dṛṣṭvā tāśca mumuhire tadā |
hariḥ prāha yamunāyāstaṭe gopyo bhaviṣyatha || 62 ||
[Analyze grammar]

sevitvā kāma dharmairmāṃ kṛtakṛtyā bhaviṣyatha |
striyaḥ sutalalokasthā vāmanaṃ vīkṣya mohitāḥ || 63 ||
[Analyze grammar]

tāśca tasmād varaṃ prāpya gopyo yamītaṭe'bhavan |
nāgendrakanyakāḥ kṛṣṇaṃ dṛṣṭvā bhaktyā varecchayā || 64 ||
[Analyze grammar]

prārthayāmāsuratyarthaṃ tāśca gopyo yamītaṭe |
kāmadharmeṇa saṃsevya kṛtakṛtyā mama striyaḥ || 65 ||
[Analyze grammar]

anyadattakapilādau brahmacāriṇameva mām |
dṛṣṭvā yā mumuhustāśca dharmapatnyaśca me'bhavan || 66 ||
[Analyze grammar]

kṛṣṇanārāyaṇapatnyaḥ sādhvyaḥ sarvāḥ pativratāḥ |
kṛṣṇanārāyaṇayogād divyā rādhā ramā iva || 67 ||
[Analyze grammar]

pātivratyaparā nityaṃ mama dharmaṃ samāśritāḥ |
arbudā'rbudakoṭyabjā'rbudā'rbudā'bjakoṭayaḥ || 68 ||
[Analyze grammar]

pativratānāṃ patnīnāṃ mama santi priye sadā |
aṇḍāni cā'saṃkhyakāni vairājaromakūpake || 69 ||
[Analyze grammar]

bhavanti tatra pratyaṇḍaṃ brahmaviṣṇumaheśvarāḥ |
matsvarūpā niyuktā vai tathā brahmāṇḍakoṭiṣu || 70 ||
[Analyze grammar]

tatra pratyekalakṣmyaśca koṭiśaḥ santi me priyāḥ |
paśya divyāṃ parāṃ dṛṣṭiṃ dadāmi te'tra padmaje || 71 ||
[Analyze grammar]

iti tasyai mahādivyā'rpitā dṛṣṭiśca viṣṇunā |
tāvad vilokayāmāsa kṛṣṇanārāyaṇaṃ patim || 72 ||
[Analyze grammar]

pratyaṇḍaṃ śrīpatiṃ lakṣmīpatiṃ ramāpatiṃ priyam |
pārvatīsvāminaṃ prabhāpatiṃ śrīmāṇikīpatim || 73 ||
[Analyze grammar]

rādhāpatiṃ hariṃ padmāsvāminaṃ kambharāpatim |
padmāvatīpatiṃ sarvasatīśaṃ rukmiṇīpatim || 74 ||
[Analyze grammar]

māyāpatiṃ prabhuṃ nārāyaṇīśaṃ vaiṣṇavīpatim |
yatinīśaṃ sāṃkhyayoginīpatiṃ kanyakāpatim || 75 ||
[Analyze grammar]

śrutipatiṃ mahārājaṃ kṛṣṇaṃ dṛṣṭvā mumoda sā |
śīghraṃ dṛṣṭiṃ parāvṛtya patitā kṛṣṇapādayoḥ || 76 ||
[Analyze grammar]

koṭisatīvilokyaiva māhātmyaṃ svāmino hyavait |
śravaṇātpaṭhanāccāsya kṛṣṇadāsyamavāpnuyāt || 77 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye śrīkṛṣṇanārāyaṇasyā'saṃkhyapativratāpatnīnāṃ |
nirdeśanāmā'ṣṭādaśādhikacatuśśatatamo'dhyāyaḥ || 418 ||
[Analyze grammar]