Chapter 413

śrīnārāyaṇa uvāca |
śṛṇu lakṣmi purāvṛttaṃ brahmasadasi saṃvṛtam |
brahmaṇā nirmite cātra loke devarṣirakṣite || 1 ||
[Analyze grammar]

munayaḥ ṛṣayo devāḥ pitaro mānavāḥ khagāḥ |
pātālastaravāsāśca gandharvāḥ kinnarāḥ nṛpāḥ || 2 ||
[Analyze grammar]

sādhyā viśve marutaśca vasavo devanāyakāḥ |
brahmacaryaparāścāpi yatayo dhyānayoginaḥ || 3 ||
[Analyze grammar]

vidyādharāḥ kiṃpuruṣā aneke devayonayaḥ |
apsaraso brahmasarasaḥ sādhvyaḥ satyaśca kanyakāḥ || 4 ||
[Analyze grammar]

dāsyaḥ kiṃkaryaḥ sevārthasādhikāḥ api yoṣitaḥ |
kāmacārāḥ kāmarūpā yatheṣṭasukhadāyikāḥ || 5 ||
[Analyze grammar]

samamānāḥ samadehāḥ sundaryaḥ ṣoḍaśābdikāḥ |
tatra patnyarthamevāyaṃ brahmā lokapitāmahaḥ || 6 ||
[Analyze grammar]

dadau diviṣadādibhyaḥ śacyādyā mānasīstriyaḥ |
tāsāṃ pativratādharmāḥ patigṛhītayoṣitām || 7 ||
[Analyze grammar]

pātivratyena saṃrabdhā bhuktimuktipradāḥ khalu |
brahmaṇā devapatnībhyaḥ snuṣābhyaścopavarṇitāḥ || 8 ||
[Analyze grammar]

upadiṣṭāḥ pātivratyaparā mokṣasya sādhakāḥ |
dharmārthakāmamokṣākhyāstābhiḥ śrutāḥ samādarāt || 9 ||
[Analyze grammar]

gṛhītāḥ sarvathā śreyaskarāstuṣṭāśca tāḥ striyaḥ |
kintu dāsīsvarūpiṇyaḥ śrutvā dharmāṃśca sarvaśaḥ || 10 ||
[Analyze grammar]

asmākaṃ sevikānāṃ vai ko dharmaścetyatarkayan |
vayaṃ dāsyaḥ paravaśyāḥ pitāmahena nirmitāḥ || 11 ||
[Analyze grammar]

devānāṃ ca tathā devīyoṣitāṃ karmacārikāḥ |
upapatnyo bhavāmaśca pātivratyavivarjitāḥ || 12 ||
[Analyze grammar]

dāsye naikapatimattvaṃ surakṣyeta kadācana |
kaiṃkaryaṃ ca parādhīnaṃ svāmisantoṣalambanam || 13 ||
[Analyze grammar]

svāmino bahavaḥ syuśca naikadharmo'sti sudṛḍhaḥ |
bahūnāṃ sevayā dāsījīvanaṃ hi vivartate || 14 ||
[Analyze grammar]

tatrā'nekaprasaṃgena durītaṃ jāyate tataḥ |
asukṛtena doṣeṇa niraye vai gatirbhavet || 15 ||
[Analyze grammar]

tasmād dāsyaṃ tu nārīṇāṃ na vai śreyaḥpradaṃ bhavet |
na kāryaṃ tādṛśaṃ dāsyaṃ yatra nāstyuttamā gatiḥ || 16 ||
[Analyze grammar]

rājñāṃ dhanināṃ sarveṣāṃ kāmabhāvena sevanam |
nartanaṃ paṇyabhāvena paṇyapatnītvavartanam || 17 ||
[Analyze grammar]

yadi doṣāvahaṃ tarhi tanna grāhyaṃ hi sarvathā |
tasmād yathā kṛtāḥ sarvā vivāhitāḥ surastriyaḥ || 18 ||
[Analyze grammar]

brahmasarasaḥ kanyāśca vayaṃ tadvad vivāhitāḥ |
apsarasaḥ surādyaiśca gṛhītā eva sevikāḥ || 19 ||
[Analyze grammar]

sthāsyāmo vai pātivratyadharmaparāḥ sadā śubhāḥ |
muniṣu brahmarūpeṣu sureṣu mānaveṣvapi || 20 ||
[Analyze grammar]

nāgeṣu siddhagandharvacāraṇeṣu vaniṣvapi |
vivāhenaiva patibhiḥ sākaṃ patiparāyaṇāḥ || 21 ||
[Analyze grammar]

patidharmān samagṛhya vartiṣyāmaha eva yat |
patidharmaḥ paro dharmo dharmārthakāmamokṣadaḥ || 22 ||
[Analyze grammar]

patinyāsaḥ paro nyāsaḥ putravittasukhapradaḥ |
patirakṣā parārakṣā patirdevaḥ paro guruḥ || 23 ||
[Analyze grammar]

vinā vivāhavidhinā dāsītvaṃ kācavanmatam |
adhruvaṃ naśvaraṃ nā''sthāpradaṃ chalādisaṃbhṛtam || 24 ||
[Analyze grammar]

atṛptidaṃ samudvegakaraṃ duḥkhapradaṃ sadā |
tasmādvai brahmaṇe sarvā militā vayameva ca || 286 ||
[Analyze grammar]

prārthayāmo'psaraso vai vivāhena pradānakam |
iti vicārya tāḥ sarvā apsaraso'jasaṃsadi || 26 ||
[Analyze grammar]

brahmāṇaṃ prārthayāmāsurvivāhārthaṃ punaḥ punaḥ |
brahmaṇā ca tadā svasya putrībhyo dharmahetave || 27 ||
[Analyze grammar]

snuṣābhūtābhya evaitā dharmā mokṣakarāstathā |
sukhadāḥ svargadāścāpi durītakṣayakārakāḥ || 28 ||
[Analyze grammar]

upadiṣṭāḥ sukhāyaiva tathā niḥśreyasāya ca |
śṛṇu lakṣmi kathayāmi paṇyadharmān sukhāśrayān || 29 ||
[Analyze grammar]

yā dāsī ca parādhīnā kumārī sadhavā'thavā |
apatikā ca dāsītve sthitā vā nṛpadharmiṇī || 30 ||
[Analyze grammar]

bahusvāmimatī yā vā cā'paricitasvāminī |
kāmadharmeṇa lubdhā vā yasyā nāstyaparā gatiḥ || 31 ||
[Analyze grammar]

tayā nṛpāḥ svāmitulyāḥ sūtā vāpi ca tatsamāḥ |
sevanīyā bhaveyurvai tāsāṃ saubhāgyameva te || 32 ||
[Analyze grammar]

ye kecid vṛttidātāraḥ śulkadātāra eva vā |
ājīvanaṃ rakṣakāste tārakāḥ patayaḥ smṛtāḥ || 33 ||
[Analyze grammar]

teṣāṃ vai sevayā dāsyastaranti bhāvabhaktitaḥ |
jāre śulkaprade nārāyaṇaṃ smṛtvā tu māṃ harim || 34 ||
[Analyze grammar]

nārāyaṇasamāṃ sevāṃ kariṣyanti tu yāḥ striyaḥ |
tādṛṅniśchadmavṛttyā tāstariṣyanti harerbalāt || 35 ||
[Analyze grammar]

upacāryo haribuddhyā samāyāto'tithiryathā |
na tu vai tṛṣṇayā lubdhavṛttyā vā kapaṭena vā || 36 ||
[Analyze grammar]

kṣaṇikaṃ ca patiṃ matvā sevanīyo hariryathā |
pitṝṇāṃ devatānāṃ ca puṇyāhe samupasthite || 37 ||
[Analyze grammar]

gobhūhiraṇyadānāni pradeyāni svaśaktitaḥ |
gurūṇāṃ ca satāṃ daivījanānāmāśiṣastathā || 38 ||
[Analyze grammar]

prāptavyāḥ śreyase tābhiḥ pālyāni vacanāni ca |
yadā sūryadine hastaḥ puṣyo vā'tha punarvasuḥ || 39 ||
[Analyze grammar]

bhavet sarvauṣadhisnānaṃ paṇyanārī samācaret |
dhātrīphalatilapiṣṭā'pāmārgatulasīdalaiḥ || 40 ||
[Analyze grammar]

taṇḍulairviṣṇupādābjavārimiśrajalaiḥ śubhaiḥ |
snāyāttathā'rcayet kāmarūpaṃ kṛṣṇanarāyaṇam || 41 ||
[Analyze grammar]

ratiṃ kāmaṃ pratiṣṭhāpya rādhāṃ kṛṣṇaṃ tu kānakam |
lakṣmīṃ nārāyaṇaṃ svarṇaṃ saṃsthāpya pūjayettu sā || 42 ||
[Analyze grammar]

kāmāya pādau sampūjya jaṃghe vai mohakāriṇe |
meḍhraṃ kandarpanidhaye kaṭiṃ prītimate namaḥ || 43 ||
[Analyze grammar]

nābhiṃ saukhyasamudrāya rāmāya ca tathodaram |
hṛdayaṃ hṛdayeśāya stanāvāhlādakāriṇe || 44 ||
[Analyze grammar]

utkaṇṭhāyeti vaikuṇṭhamāsyamānandakāriṇe |
vāmāṃgaṃ puṣpacāpāya puṣpabāṇāya dakṣiṇam || 45 ||
[Analyze grammar]

mānasāyeti vai mauliṃ vilolāyeti mūrdhajam |
sarvātmane kṛṣṇanārāyaṇātmane prasevine || 46 ||
[Analyze grammar]

kāntarūpāya cakrādidhāriṇe paramātmane |
namo nārāyaṇāyeti kāmadevātmane namaḥ || 47 ||
[Analyze grammar]

kāmapitre kāmadevanivāsāya ca te namaḥ |
kāmamokṣakarāyā'rtiharāya haraye namaḥ || 48 ||
[Analyze grammar]

kāmabandhanakārāya kāmabandhanahāriṇe |
kṛṣṇa kṛṣṇa kāma kṛṣṇa mokṣadāya ca te namaḥ || 49 ||
[Analyze grammar]

asmākaṃ tvaṃ patiḥ kṛṣṇa nānyo'sti tvādṛśaḥ patiḥ |
anye svārthāḥ patayaste vayaṃ svārthāśca yoṣitaḥ || 50 ||
[Analyze grammar]

tvaṃ parārthaḥ parabrahma gṛhāṇā'smānnije kare |
pātivratyaṃ tvayi cāstu nānyatra kṣaṇadeṣu vai || 51 ||
[Analyze grammar]

kṣaṇadeṣu bhavānāste bhavāneva patiḥ prabho |
tārayā'smān bhavavāhāt kṛṣṇavāhe naya prabho || 52 ||
[Analyze grammar]

nāryaḥ kāmakṛte sṛṣṭāḥ bhavān kāmarūpo hi naḥ |
bījarūpo hariḥ kṛṣṇo bālarūpo bhavān mataḥ || 53 ||
[Analyze grammar]

premarūpo liṅgarūpo bhavāneva mato hi naḥ |
mā bhaktānāṃ yoṣitāṃ te kiṃkarīṇāṃ durītakam || 54 ||
[Analyze grammar]

paṇyatve ca kadācidvai spṛśatvasmāṃstava priyāḥ |
yatkurmo vāmabhāgasthāḥ śarma karma sukhāvaham || 55 ||
[Analyze grammar]

arpayāmo bhavatyeva nirguṇaṃ tannivartatām |
evaṃ kṛṣṇārpaṇaṃ lakṣmi kāryaṃ vārasya yoṣitā || 56 ||
[Analyze grammar]

paṇyastrībhistathā dāsyā kāryaṃ kṛṣṇārpaṇaṃ hi tat |
atha lakṣmīṃ rādhikāṃ ca ratiṃ matvā samarcayet || 57 ||
[Analyze grammar]

namaḥ puṣṭyai namastuṣṭyai namaḥ sarvārthasampade |
anaṃgajananīṃ vande kāmapatnyai namo namaḥ || 58 ||
[Analyze grammar]

kāmātmikāyai sundaryai kṛṣṇakāntyai ca te namaḥ |
ānandātmakarūpiṇyai tāriṇyai te namo namaḥ || 59 ||
[Analyze grammar]

evaṃ prātaḥ sadā paṇyapramadā śrīhariṃ patim |
śrīpatiṃ pūjayet svāmibhāvena mokṣaṇaṃ vrajet || 60 ||
[Analyze grammar]

gandhairmālyaistathā dhūpairnaivaidyairjaladīpanaiḥ |
kāminī cāpsarasaśca pūjayecchrījanārdanam || 61 ||
[Analyze grammar]

annadānaṃ vastradānaṃ dravyadānaṃ dvijātaye |
sādhave brahmaśīlāya dadyācca brahmacāriṇe || 62 ||
[Analyze grammar]

tasmai kṛṣṇāyā'rpayāmi śrīkṛṣṇaḥ prīyatāṃ mama |
iti pūjāṃ kārayedvā kuryāt puṇyapradāṃ satī || 63 ||
[Analyze grammar]

etādṛśīṃ priyāṃ bhaktimatīṃ kṛṣṇo hi tārayet |
puruṣaṃ kāmadevo vai kṛṣṇo'yamiti dhārayet || 64 ||
[Analyze grammar]

sarvabhāvena cātmānamarpayet kṛṣṇatanmayī |
tato doṣairna lipyeta paṇyastrī kiṃkarī ca vā || 65 ||
[Analyze grammar]

taṇḍulaprasthadānaṃ ca ravivāre prakārayet |
kārtike mādhave māghe cāturmāsye vratāhake || 66 ||
[Analyze grammar]

bhaktiṃ navavidhāṃ kuryāt paṇyastrī pāvanī bhavet |
viprasyopaskarairyuktāṃ śayyāṃ dadyāt suśobhanām || 67 ||
[Analyze grammar]

sopadhānakaviśrāmāṃ sāstarāvaraṇāṃ śubhām |
pradīpopānahacchatrapādukāsanasaṃyutām || 68 ||
[Analyze grammar]

kṛṣṇasya mandire dadyāt śayyādānaṃ hi pāvanam |
hemasūtraṃ vibhūṣāśca hārān ramyāmbarāṇi ca || 69 ||
[Analyze grammar]

aṅgulīyakaraśanākaṭakadravyakāṇi ca |
lakṣmīnārāyaṇamūrtiṃ kāmasya pratimāṃ tathā || 70 ||
[Analyze grammar]

ratimūrtiṃ pradadyācca dāne viprāya vedine |
tāmrapātraṃ hemasūtraṃ mauktikaṃ cakṣurityapi || 71 ||
[Analyze grammar]

ikṣudaṇḍaṃ guḍakuṃbhaṃ dhūpamālyānulepanam |
tailaṃ sugandhi dadyācca bhojanaṃ ca dvijātaye || 72 ||
[Analyze grammar]

dogdhrīṃ dhenuṃ tathā dadyād vadecca dhenusannidhau |
yathā'ntaraṃ na paśyāmi kāmakeśavayoḥ sadā || 73 ||
[Analyze grammar]

tathaiva sarvakāmāptirastu kṛṣṇa sadā mama |
yathā na kamalā dehāt prayāti tava keśava || 74 ||
[Analyze grammar]

tathā māmapi deveśa śarīre sve kuru prabho |
tataḥ pradakṣiṇīkṛtya vipraṃ visarjayet satī || 75 ||
[Analyze grammar]

evaṃ vai śrīkṛṣṇanārāyaṇarūpaṃ prapūjayet |
vipraṃ vānyaṃ naraṃ cābhyāgata kṛṣṇaṃ sutoṣayet || 76 ||
[Analyze grammar]

tarpayeta yathākāmaṃ proṣite'nyaṃ pratoṣayet |
yadṛcchayā'bhyāgataṃ vai rañjayet tatpatipriyā || 77 ||
[Analyze grammar]

evaṃ kṛte'pi garbho vai yadīcched rakṣayecchubham |
anicchā cedṛtudharmāt ṣoḍaśāhottaraṃ naram || 78 ||
[Analyze grammar]

saṃspṛśedratikāmārthaṃ hyanapatyā vasettathā |
akāmayā hyakāmena pāravaśyatayā yadi || 79 ||
[Analyze grammar]

sagarbhātvaṃ prasajyeta hyupacārān samācaret |
etaddhi kathitaṃ cā'psarobhyaḥ pūrvaṃ hi vedhasā || 80 ||
[Analyze grammar]

adharmo'yaṃ tato na syāt paṇyastrīṇāṃ hi sarvathā |
puruhūtena ca purā dānavīṣu tathoditam || 81 ||
[Analyze grammar]

paśupakṣipramadāsu purā yuge tathoditam |
tadidaṃ sāmprataṃ sarvaṃ bhavatīṣu ca yujyate || 82 ||
[Analyze grammar]

sarvapāpapraśamanaṃ kṛṣṇaprāptipradāyakam |
kṛṣṇārpaṇātmakaṃ kāryaṃ nirguṇaṃ syānmadājñayā || 83 ||
[Analyze grammar]

kalyāṇīnāṃ kathitaṃ tat kurudhvaṃ pravarāṃganāḥ |
ityuktā brahmaṇā sarvā apsaraso yathāvacaḥ || 84 ||
[Analyze grammar]

avartanta diviṣatsu muniṣu mānaveṣu ca |
tāsāṃ pāpapraṇāśāya devāstadā'vadan muhuḥ || 85 ||
[Analyze grammar]

yāśca dāsyaḥ paravaśāḥ kiṃkaryaśca nirāśrayāḥ |
karmacāriṇya ājñāsthāḥ preṣyā bhujiṣyayoṣitaḥ || 86 ||
[Analyze grammar]

śuklanāryaścā'lagnikāḥ śuddhā devyo bhavantu tāḥ |
vārastriyaśca nartakyaḥ śikṣikā dāyikāstathā || 87 ||
[Analyze grammar]

upapatnyaśca tāḥ sarvāḥ śuddhā bhavantu sarvadā |
kṛṣṇakṛṣṇeti kṛṣṇeti matvā narāśritāḥ sadā || 88 ||
[Analyze grammar]

pūjitā vartamānāḥ syudevairvandyā hareḥ puram |
prayāsyanti sukṛtajñā brahmā sākṣyasmi yoṣitām || 89 ||
[Analyze grammar]

māse māse ca yāsāṃ vai pradattamārttavaṃ vratam |
śuddhyanti ṛtunā sarvā nāryaśceti hyajo'bravīt || 90 ||
[Analyze grammar]

vrataṃ yadṛṣipañcamyāḥ sopavāsaṃ paraṃ matam |
tena śuddhyanti bhāminyaḥ sarvadoṣalayo bhavet || 91 ||
[Analyze grammar]

kṛṣṇabhāvanayā nṝn sevante sarvāḥ pativratāḥ |
kṛṣṇaḥ patiḥ parabrahma tadvratāstāḥ pativratāḥ || 92 ||
[Analyze grammar]

kṛṣṇaḥ santoṣamāyāti narātmani samasthitaḥ |
nārī santoṣamāyāti nāryātmani hariḥ sthitaḥ || 93 ||
[Analyze grammar]

itibhāvātmako bhakto bhaktā nārhati dūṣaṇam |
evaṃ pativratādharmaṃ paṇyastrīṇāmudāhṛtam || 94 ||
[Analyze grammar]

ādau kṛtayuge proktaṃ suranāryaḥ samācaran |
yugakṣaye manaḥkalye kṛṣṇabhāvavivarjite || 95 ||
[Analyze grammar]

jāte tu samaye doṣaḥ kāmamātrātimarṣaṇe |
sukṛtaṃ naiva jāyeta kṛtaṃ naśyecca vai tapaḥ || 96 ||
[Analyze grammar]

tato nāryā paṇyabhāve vartitavyaṃ na śobhanam |
nareṇāpi jārabhāve vartitavyaṃ na śobhanam || 97 ||
[Analyze grammar]

svacche svācchyaṃ bhaveddharmo mālinye'gho malaṃ matam |
tataḥ paṇyamayāddharmāllagnadharmaḥ paro mataḥ || 98 ||
[Analyze grammar]

vastutaḥ śṛṇu vai sarvaṃ malamūtramaśuddhakam |
asahyagandhaṃ nikṛṣṭaṃ hyaśubhaṃ malinaṃ sadā || 99 ||
[Analyze grammar]

malaṃ pāpaṃ hi mantavyaṃ nirmalaṃ pāpavarjitam |
malaṃ navasu dvāreṣu kṣarate bhinnarūpakam || 100 ||
[Analyze grammar]

garbhavāsamalaṃ proktaṃ mūtraṃ dravanmalātmakam |
tadvai pāpasthalaṃ bodhyaṃ tadyogaḥ pāpamucyate || 101 ||
[Analyze grammar]

yogastu sarvathā pāpaṃ malasādhanayoḥ khalu |
tad vivāhitayoryadvā cā'vivāhitayorapi || 102 ||
[Analyze grammar]

vivāho niyamaḥ prokto niyamaḥ sahyate sadā |
avivāho na niyamaḥ sahyate na janairhi saḥ || 103 ||
[Analyze grammar]

malaṃ pāpaṃ karma tulyaṃ sahyate na ca sahyate |
sahyate ca yatastatra pāpatvaṃ neti naiva hi || 104 ||
[Analyze grammar]

maithunaṃ sarvathā pāpaṃ puṇyakarma na vidyate |
kāmaśca sarvathā doṣo hyadharmavaṃśa eva saḥ || 105 ||
[Analyze grammar]

kṛṣṇanārāyaṇayogād yadi divyo'rpitastadā |
sarvārpaṇātmakaṃ taddhi hareḥ prasannatāpradam || 106 ||
[Analyze grammar]

patnyā tadanyayā cāpi kāryā hareḥ prasannatā |
kāmaḥ pāpmā niyamito vṛddhairvivāhakarmaṇā || 107 ||
[Analyze grammar]

apsarasāṃ tu gāndharvo vivāho brahmaṇā kṛtaḥ |
dāsīnāṃ śulkanārīṇāṃ kṣaṇagāndharva eva saḥ || 108 ||
[Analyze grammar]

veṣṭuṃ yogyo yaśca ko'pi śulkena yatra yoṣiti |
sa veśyasaṃśakastāvat sā veśyā tāvataiva hi || 109 ||
[Analyze grammar]

tayostāvatprasaṃgaśca sahyate yadi mānavaiḥ |
yathā vivāhitayoḥ sa naitāvatā vṛṣo mataḥ || 110 ||
[Analyze grammar]

kintu sahyaṃ mataṃ karma dharmatvenopacāritam |
tacchrīkṛṣṇārparṇaṃ kṛtvā yathārthaṃ dharmamācaret || 111 ||
[Analyze grammar]

iti tattvaṃ kathitaṃ te paṇyastrīṇāṃ tathā priye |
patistrīṇāṃ same karma dharmo niyamato mataḥ || 112 ||
[Analyze grammar]

kāmabhogastu narako nirayaprada eva saḥ |
patnīnāṃ gaṇikānāṃ vā veśyānāṃ vā'nyayoṣitām || 113 ||
[Analyze grammar]

dālbhyanāmā maharṣiśca tattvaṃ strībhyaḥ purā'vadat |
aindriyakaṃ tu yat karma kṛṣṇasmaraṇavarjitam || 114 ||
[Analyze grammar]

sarvaṃ pāpātmakaṃ taddhi kāmaḥ krodho japo vratam |
svargādyā bhūmayaḥ sarvā nirayāḥ kṛṣṇamantarā || 115 ||
[Analyze grammar]

kāmādyā bhoganivahā nirayāḥ kṛṣṇamantarā |
tasmāt kṛṣṇaṃ paraṃ kāntaṃ kṛtvā prasādya taṃ prabhum || 116 ||
[Analyze grammar]

sevitvā satpatiṃ nārāyaṇaṃ nārāyaṇī bhavet |
navā dehasya kāmāya kāmabhogo bhavatyapi || 117 ||
[Analyze grammar]

ātmanastu sukhāyaiva kāmabhogaṃ karotyajaḥ |
na cendriyāṇāṃ kāmāya kāmabhogā bhavantyapi || 118 ||
[Analyze grammar]

antaḥsthātmasukhāyaiva kāmabhogā bhavantyapi |
na cātmā kevalaḥ kāme pravartate'ntarā harim || 119 ||
[Analyze grammar]

tasmāddharyarthamevaite ātmakāmā bhavanti vai |
yadi kṛṣṇo bhavennaivātmani cātmā nirarthakaḥ || 120 ||
[Analyze grammar]

tasmāt kāmāḥ kṛṣṇayogādānandadā bhavanti hi |
evaṃ kṛṣṇaṃ samārādhya prāptavyaṃ kāmanāphalam || 121 ||
[Analyze grammar]

pātivratyaṃ tadevoktaṃ paṇyastrīṇāṃ tu padmaje |
iti śrutvā paraṃ dharmaṃ naijaṃ matvā'psarogaṇāḥ || 122 ||
[Analyze grammar]

brahmā''jñāyāmavartanta śulkadharmaparāyaṇāḥ |
saśulkaḥ satkṛtaḥ svāmī yāvad rañjanatāmiyāt || 123 ||
[Analyze grammar]

tasya sevāṃ prakṛtvaiva prāpsyante tāḥ padaṃ param |
paṭhanācchravaṇāccāsya dharmatattvaṃ prabudhyate || 124 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye dāsīpaṇyastrīṇāmapatikānāṃ bhagavatpātivratyanirūpaṇanāmā trayodaśādhika |
catuśśatatamo'dhyāyaḥ || 413 ||
[Analyze grammar]