Chapter 404

śrīnārāyaṇa uvāca |
śṛṇu lakṣmi dānapātraṃ sattīrthaṃ kathayāmi te |
nārāyaṇaḥ paraṃ tīrthaṃ deyamasmai tu śārṅgiṇe || 1 ||
[Analyze grammar]

sādhave dharmaśīlāya vidyājuṣe mahātmane |
tyāgine brahmavetre ca dattaṃ bhavati cākṣayam || 2 ||
[Analyze grammar]

sādhvyai bhogaprasaktāyai harikṛṣṇasya yoṣite |
nārāyaṇyai mahālakṣmyai dattaṃ bhavati śāśvatam || 3 ||
[Analyze grammar]

satkarmaniratāyai ca sevikāyai harestathā |
kṛṣṇanārāyaṇapatnyai satyai dattaṃ tu śāśvatam || 4 ||
[Analyze grammar]

anāthāyai ca bhaktāyai yoginyai dattamakṣayam |
bhaktāya brahmarūpāya brahmaṇe vedavedine || 5 ||
[Analyze grammar]

kṛṣṇanārāyaṇamūrtirūpāya deśikāya ca |
viprāya devaśiṣyāya tathā satkarmakāriṇe || 6 ||
[Analyze grammar]

anapekṣitaśāntāya dattaṃ bhavati cā'kṣayam |
gave bālāya kanyāyai pitṛbhyāṃ dattamakṣayam || 7 ||
[Analyze grammar]

patnyai svasre duhitre ca dauhitrāya sukarmiṃṇe |
svasṛputrāya śiṣyāya dattaṃ bhavati cākṣayam || 8 ||
[Analyze grammar]

gurave gurupatnyai ca guruputrāya vedine |
dharmapracārakartre ca datta bhavati cākṣayam || 9 ||
[Analyze grammar]

vyākhyātre jñānadātre ca śāstriṇe viduṣe tathā |
vidyādhikāriṇe vidyāpātre dattaṃ hi cākṣayam || 10 ||
[Analyze grammar]

vṛttiśūnyāya vai deyaṃ daridrāya kuṭumbine |
devasya pūjakāyā'pi paropakārakāriṇe || 11 ||
[Analyze grammar]

adhyāpakāya dātavyaṃ dātavyaṃ deśa hetave |
abhyudayārthamevāpi dātavyaṃ rakṣakāya ca || 12 ||
[Analyze grammar]

nārāyaṇasya sāmīpye dattaṃ bhavati cākṣayam |
vaiṣṇavāya pradātavyaṃ yena tuṣṭo bhavāmi vai || 13 ||
[Analyze grammar]

daṃbhācārāya caurāya vidviṣe nindakāya ca |
paradravyaparadārapare dattaṃ tu niṣphalam || 14 ||
[Analyze grammar]

kṛtaghnasya ca mūrkhasyā'sūyāviṣṭahṛdastathā |
hiṃsakasya vikrayiṇo dattaṃ bhavati niṣphalam || 15 ||
[Analyze grammar]

paropatāpakartuśca nāstikasya jaḍasya ca |
khalasya chaladharmasya maryādābhedakasya ca || 16 ||
[Analyze grammar]

pākhaṇḍinaḥ kitavasya śaṭhasyā'dharmavartinaḥ |
vivāḍhaśālinaścaṇḍarūpasyāpi tu niṣphalam || 17 ||
[Analyze grammar]

tīrthe cakrapuṣkariṇītīre deyaṃ viśeṣataḥ |
dāne puṇyatamaṃ tīrthaṃ cakratīrthamanuttamam || 18 ||
[Analyze grammar]

purā śrīvatsagotrīyaḥ padmanābho dvijarṣabhaḥ |
cakrapuṣkariṇītīre tapo'tapyata dāruṇam || 19 ||
[Analyze grammar]

varṣāṇi katicitso'yaṃ jīrṇaparṇāśano'bhavat |
kaṃcitkālaṃ jalāhāro vāyvāhāraḥ kiyatsamāḥ || 20 ||
[Analyze grammar]

evaṃ vai dvādaśe varṣe tuṣṭaḥ kṛṣṇanarāyaṇaḥ |
pratyakṣatāmagāttasya śrīrādhākamalāpatiḥ || 21 ||
[Analyze grammar]

dṛṣṭvā kṛṣṇaṃ śrīnivāsaṃ stotuṃ samupacakrame |
gopālakṛṣṇarūpāya kāṃbhareyāya viṣṇave || 22 ||
[Analyze grammar]

namaḥ śeṣādrivāsāya veṃkaṭeśāya te namaḥ |
nārāyaṇādrivāsāya śrīnivāsāya te namaḥ || 23 ||
[Analyze grammar]

bhaktipriyāya lakṣmīśapadminīśāya te namaḥ |
iti stuto ghanaśyāmaḥ śrīnivāsastutoṣa ha || 24 ||
[Analyze grammar]

padmanābhaṃ dvijaṃ cāha cakratīrthe'tra sarvadā |
ākalpaṃ pūjayaṃstvaṃ māṃ vasa bhaktottama priya || 25 ||
[Analyze grammar]

ityuktvā bhagavān kṛṣṇastatraivā'ntaradhīyata |
padmanābho'vasat tatra kadācittaṃ tu bhakṣitum || 26 ||
[Analyze grammar]

rākṣasaścāgatastatra jagrāha brāhmaṇaṃ tadā |
pracukrośa cakrapāṇe rakṣa rakṣeti vai muhuḥ || 27 ||
[Analyze grammar]

veṃkaṭeśa hare kṛṣṇa kṛṣṇanārāyaṇa prabho |
kāṃbhareya kṛpānātha rakṣa māṃ rakṣasā dhṛtam || 28 ||
[Analyze grammar]

iti stuvatastasyaiva rakṣārthaṃ cakradhārakaḥ |
svacakraṃ preṣayāmāsa cakrapuṣkariṇītaṭam || 29 ||
[Analyze grammar]

sudarśanaṃ mahājvālaṃ dṛṣṭvā rakṣaḥ pradudruve |
tasya śiraścakartedama viprastuṣṭāva cakrakam || 30 ||
[Analyze grammar]

viṣṇoścakra namaste'stu bhaktarakṣaṇadīkṣita |
kṛṣṇanārāyaṇahastapadmabhūṣaṇa te namaḥ || 31 ||
[Analyze grammar]

sarvadā'tra pratiṣṭha tvaṃ rakṣakaṃ bhava matkṛte |
nārāyaṇasvarūpāya mokṣadāya namo namaḥ || 32 ||
[Analyze grammar]

ityarthitaṃ padmanābhabhaktaṃ prāha sudarśanam |
cakratīrthaṃ mama nāmnā bodhyaṃ bhakta tvayā kṛtam || 33 ||
[Analyze grammar]

cakratīrthe satataṃ saṃvasāmi tava vāñcchayā |
itaḥ paraṃ janānāṃ na pīḍā syād rākṣasādijā || 34 ||
[Analyze grammar]

snātāro'tra dhūtapāpā yāsyanti śrīhareḥ padam |
ityuktvā tāṃ cakrapuṣkariṇīṃ prāviśadujjvalam || 35 ||
[Analyze grammar]

ityevaṃ muktidaṃ bhaktapātivratyaprabhāvataḥ |
tīrthaṃ cakrāśritaṃ jātaṃ lakṣmi pāpavināśanam || 36 ||
[Analyze grammar]

śṛṇu yathā'bhavat so'pi rākṣaso yo mṛto'dhunā |
purā śrīraṃgapuryāṃ vai vaśiṣṭhādyāstu vaiṣṇavāḥ || 37 ||
[Analyze grammar]

upāsāñcakrire śrīraṃganāthaṃ muktikāṃkṣayā |
kadācit tatra gandharvaḥ sundarākhyaḥ samāyayau || 38 ||
[Analyze grammar]

salile yuvatībhirvivastrābhiḥ snānamācarat |
krīḍāṃ cakāra vividhāṃ vaśiṣṭhastāvadeva hi || 39 ||
[Analyze grammar]

snātuṃ gato dadarśainaṃ nagnaṃ śaśāpa nistrapam |
māṃ dṛṣṭvāpi na vai vāso dhatse tasmāddhi sundara || 40 ||
[Analyze grammar]

yāhi rākṣasatāṃ sadyastato'sau rākṣaso'bhavat |
yuvatyaḥ śrīvaśiṣṭhaṃ sanatvā kṣamāṃ yayācire || 41 ||
[Analyze grammar]

dayāsindho vilokyā'smān kopaṃ mā kartumarhasi |
patireva hi nārīṇāṃ bhūṣaṇaṃ paramaṃ matam || 42 ||
[Analyze grammar]

patihīnā tu yā nārī śataputrāpi no śubhā |
vidhavetyamaṃgalā sā tato janma nirarthakam || 43 ||
[Analyze grammar]

eko'parādhaḥ kṣantavyaḥ prasīdā'smatpriye prabho |
evaṃ stuto vaśiṣṭhastāḥ prāha śāpo na me'phalaḥ || 44 ||
[Analyze grammar]

ṣoḍaśābdāvadhau rakṣaḥ paścād gandharvatāṃ vrajet |
cakratīrthe padmanābhaviprayoge vimokṣyati || 45 ||
[Analyze grammar]

sudarśanena cakreṇa muktirasya bhaviṣyati |
patirvastridivaṃ bhūyo ramayiṣyati sundaraḥ || 46 ||
[Analyze grammar]

ityuktvā sa vaśiṣṭho vai yayau śrīraṃgamandiram |
sundaro rākṣaso jāto mahādaṃṣṭro bhayānakaḥ || 47 ||
[Analyze grammar]

taṃ dṛṣṭvā bhayasaṃvignā jagmū rāmāstriviṣṭapam |
bhramato rakṣasaścādrau ṣoḍaśābdāni niryayuḥ || 48 ||
[Analyze grammar]

tato brāhmaṇayogena sudarśanena mocitaḥ |
sundaraḥ sundaro jāto vimānena divaṃ yayau || 49 ||
[Analyze grammar]

cakraṃ tatroṣitaṃ śaśvaccakratīrthamato'bhavat |
yacchrutvā pāpajālānāṃ nāśo bhavati vai dhruvam || 50 ||
[Analyze grammar]

jābālitīrthamāhātmyaṃ śṛṇu lakṣmi vadāmi te |
durācārābhidho vipraḥ kaverītīravāsakṛt || 51 ||
[Analyze grammar]

sadā'bhūta pāpisaṃsargī naṣṭabrāhmaṇyasatkriyaḥ |
grasto'bhavadbhīṣaṇena vetālena balīyasā || 52 ||
[Analyze grammar]

bahukālottaraṃ so'yaṃ bhraman veṃkaṭaparvatam |
nyamajjat tu jale tāvad vetālena vimocitaḥ || 53 ||
[Analyze grammar]

yatra jale'bhavanmuktastatra jābāliko muniḥ |
avasat tanmahattīrthaṃ jābālitīrthamucyate || 54 ||
[Analyze grammar]

vetālo'pyabhavat pūrvaṃ brāhmaṇo nāstiko mahān |
nindako devasādhūnāṃ tena vetālatāṃ gataḥ || 55 ||
[Analyze grammar]

so'pi tīrthaprabhāveṇa punarmānuṣyameṣyati |
iti te kathitaṃ lakṣmi jābālitīrthamuttamam || 56 ||
[Analyze grammar]

tumburutīrthamatrāpi kathayāmi śṛṇu priye |
pāpino manujāḥ sarve hyamāsu snānti vai muhuḥ || 57 ||
[Analyze grammar]

visṛjya pāpajālāni pūtā bhavanti te janāḥ |
asmākaṃ pāpajālāni kathaṃ naśyanti sarvataḥ || 58 ||
[Analyze grammar]

evamālocya tīrthāni gatāni veṃkaṭācalam |
tatra svāmipuṣkariṇījale sasnuśca tumburau || 59 ||
[Analyze grammar]

tīrthe sasnuruttarāphālgunyāṃ śukle tu parvaṇi |
teṣāṃ pāpāni naṣṭāni yayustāni yathālayam || 60 ||
[Analyze grammar]

mahāpāparataṃ krūraṃ dānahīnaṃ kulāntakam |
paśughnaṃ drohakartāraṃ piśunaṃ cānṛtaṃ janam || 61 ||
[Analyze grammar]

mitradruhaṃ kṛtaghnaṃ ca bhrūṇahaṃ paradāragam |
parārthasūcakaṃ svāmidrohaṃ devaparāṅmukham || 62 ||
[Analyze grammar]

śaṭhaṃ ca vañcakaṃ dharmavighnaṃ kulavibhedakam |
supallavaphalopetavṛkṣodyānavināśakam || 63 ||
[Analyze grammar]

agnidaṃ garadaṃ cāpi pāpaṃ viśvāsaghātakam |
gurudveṣakaraṃ duṣṭaṃ dampatyorvirasāvaham || 64 ||
[Analyze grammar]

etānsarvāṃśca vai lakṣmi tumburutīrthamuttamam |
punāti snānapānādyaiḥ svargaṃ mokṣaṃ dadāti ca || 65 ||
[Analyze grammar]

tumbururnāmagandharvo bhāryāmuvāca vai purā |
māghatraye mayā sākaṃ snānaṃ kuru malāpaham || 66 ||
[Analyze grammar]

māghamāsyudite sūrye gomayālepanaṃ kuru |
raṃgavallyādibhiḥ śubhrapadmadhātukasvastikaiḥ || 67 ||
[Analyze grammar]

kṛṣṇanārāyaṇapūjāsthalaṃ śuddhaṃ kuru priye |
dīpaṃ kuru ghṛtavarttiprakāśitaṃ sugandhakam || 68 ||
[Analyze grammar]

dehi pākaṃ śucirbhūtvā kṛṣṇanārāyaṇāya ca |
pradakṣiṇānamaskārairmayā saha prasevaya || 69 ||
[Analyze grammar]

devasevāṃ kuru nityaṃ kathāśravaṇamācara |
nityaṃ kṛṣṇaprasādānnajalaṃ gṛhāṇa vaiṣṇavi || 70 ||
[Analyze grammar]

kṛṣṇanārāyaṇa viṣṇo kāmbhareya janārdana |
gopālakṛṣṇagovinda ramārādhāpate prabho || 71 ||
[Analyze grammar]

śrīlakṣmīpārvatīnātha māṇikośa prabhāpate |
antaryāmin muktidātṛ ceti kīrtaya sarvadā || 72 ||
[Analyze grammar]

krodhamātsaryalobhādīṃstyaktvā vrata samācara |
tenaiva jāyate muktirviṣṇuloko hyavāpyate || 73 ||
[Analyze grammar]

iti bharturvacaḥ śrutvā krodhaṃ kṛtvā tu bhāminī |
pratyuvāca tadā kāntaṃ śītapīḍāmaye khalu || 74 ||
[Analyze grammar]

prāṇahāriṇi māghe vai kiṃ snānaṃ te'tisammatam |
na karomi pate snānaṃ mriye ced rakṣako'tra me || 75 ||
[Analyze grammar]

dharmastāvajjanaiḥ kāryo yāvacchakyo bhavenmṛduḥ |
duḥkhado nāśakṛddharmo na kāryo na karomi tam || 76 ||
[Analyze grammar]

na ca karmāṇi viṣṇvarthaṃ śakyāni ca prage mayā |
tumbururityuktavatīṃ śaśāpā'priyavādinīm || 77 ||
[Analyze grammar]

veṃkaṭādrau ghoṇatīrthe pippaladrumakoṭare |
tatrāmburahite mūḍhe maṇḍūkī bhava kevalā || 78 ||
[Analyze grammar]

śrutvā sā'prārthayat kāntaṃ viśāpamavadat patiḥ |
kadācinmunibhiḥ sārdhamagastyaste samīpataḥ || 79 ||
[Analyze grammar]

sthitvā ghoṇasya māhātmyaṃ kathayiṣyati vai tadā |
śrutvā tvaṃ dūrato maṇḍūkīdehādvai vimokṣyase || 80 ||
[Analyze grammar]

punarāgatya me sthānaṃ mayā sākaṃ ramiṣyasi |
ityuktvā virarāmā'tha dharmapatnī pativratā || 81 ||
[Analyze grammar]

bhartṛśāpānmahāghorāṃ maṇḍūkatanumāśritā |
bahuvarṣe gate kāle'gastyastatra samāyayau || 82 ||
[Analyze grammar]

svāmipuṣkariṇīṃ snātvā natvā varāhamīśvaram |
veṃkaṭeśaṃ śrīnivāsaṃ dṛṣṭvā pippalasannidhau || 83 ||
[Analyze grammar]

āgatya ghoṇatīrthasya māhātmyamavadajjanān |
maṇḍūkī sā tadā muktā pūrvarūpavatī babhau || 84 ||
[Analyze grammar]

uvāca māṃ dayayā rakṣa pativākyavirodhinīm |
patiśāpena maṇḍūkī jātā'haṃ mocitā tvayā || 85 ||
[Analyze grammar]

agastyastāṃ tadā prāha pātivratyavṛṣān śṛṇu |
tava bhartā sudharmajñastvāṃ śaśāpa ṛtaṃ hi tat || 86 ||
[Analyze grammar]

pativākyavirodhinyāṃ śāpo yukto hi sarvathā |
pativākyamanādṛtya yatheṣṭaṃ vartate tu yā || 87 ||
[Analyze grammar]

sā patnī narake kaṣṭe patatyākalpameva yat |
nāryā vākyaṃ svapatyurvai nollaṃghyaṃ hi kadācana || 88 ||
[Analyze grammar]

pātivratyena puṇyena patiśuśrūṣaṇena ca |
striyo viṣṇupadaṃ yānti na cānyairapi suvrataiḥ || 89 ||
[Analyze grammar]

patirmātā patirviṣṇuḥ patirbrahmā patiḥ śivaḥ |
patirguruḥ patistīrthaṃ patirmokṣaḥ paro mataḥ || 90 ||
[Analyze grammar]

pativākyamapākṛtya yā tu sukṛtakāriṇī |
na sā phalamavāpnoti naiva śuddhā bhavettathā || 91 ||
[Analyze grammar]

gurvājñāvartamānā'pi patyājñāṃ na karoti cet |
naiva pūtā navā puṇyā bhavata sā kadācana || 92 ||
[Analyze grammar]

patyājñayā vidadhyāt sā vrataṃ dharmādikaṃ tathā |
patibuddhyā prakuryācca hareḥ sevādikaṃ sadā || 93 ||
[Analyze grammar]

patipādābjatīrthena yā snātā sā haripriyā |
sā snātā sarvatīrtheṣu gaṃgādiṣu na saṃśayaḥ || 94 ||
[Analyze grammar]

tvayā bhuktaṃ phalaṃ duḥkhaṃ punarjātā'si pūrvavat |
gaccha tvaṃ tumburorvāsaṃ sukhinī bhava sarvathā || 95 ||
[Analyze grammar]

tumburutīrthamevaitat tena yātaṃ prasiddhatām |
atra snānti paurṇamāsyāṃ te yajñaphalabhāginaḥ || 96 ||
[Analyze grammar]

dine dine kapilāgosahasradānajaṃ phalam |
dine dine ratnakoṭisahasradānajaṃ phalam || 97 ||
[Analyze grammar]

dine hastisahasradānasyā'śvā'yutadānajam |
phalaṃ vai prāpyate subhru ghoṇatīrthā'vagāhanāt || 98 ||
[Analyze grammar]

kanyākoṭipradānasya phalaṃ ghoṇā'vagāhanāt |
kurukṣetre suvarṇānāṃ sahasrasya pradānajam || 99 ||
[Analyze grammar]

yatphalaṃ tadāvāpnoti tumburutīrthagāhanāt |
gurvarthe ca satāmarthe svāmyarthe yastyajettanum || 100 ||
[Analyze grammar]

pativratārthaṃ sādhvyarthaṃ haryarthaṃ yastyajet tanum |
tatphalaṃ samavāpnoti ghoṇatīrthā'vagāhanāt || 101 ||
[Analyze grammar]

āpannārtiharāṇāṃ ca tīrthasevāparātmanām |
satyavratānāṃ yatpuṇyaṃ ghoṇatīrthāddhi yadbhavet || 102 ||
[Analyze grammar]

gaṃgāyāṃ narmadāyāṃ ca sarayūcandrabhāgayoḥ |
svarṇavatyāṃ yamunāyāṃ yatphalaṃ tadbhavediha || 103 ||
[Analyze grammar]

iti śrutvā jalaṃ pītvā yayau sā tumburugṛham |
iti te kathitaṃ lakṣmi tumburutīrthamuttamam || 104 ||
[Analyze grammar]

yacchrutvā'pi jano yāyād vājapeyaphalaṃ mahat |
viṣṇulokaṃ paraṃ svargaṃ tathā vai śāśvataṃ padam || 105 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye dānapātraṃ cakratīrthe jābālitīrthe ca pativratāmāhātmyaṃ tīrthabalaṃ cetyādinirūpaṇanāmā |
caturadhikacatuḥśatatamo'dhyāyaḥ || 404 ||
[Analyze grammar]