Lakshminarayana Samhita [sanskrit]

by Shwetayan Vyas | 1,169,834 words | ISBN-10: 8170801818 | ISBN-13: 9788170801818

The Lakshminarayana Samhita Chapter 402 (Sanskrit text), including grammatical analysis, glossary and relevant print editions. The Lakshmi-narayana-samhita is an encyclopaedic work devoted to Narayana although it deals with various deities. The work is written in Puranic style and divided into four books according to the four Yugas. In total, the work consists of roughly 120,000 metrical verses.

śrīnārāyaṇa uvāca |
atha lakṣmi śṛṇu rājā toṇḍī sutāya rājyakam |
datvā tapo'rthamagamat tatāpā''rādhanaṃ tapaḥ || 1 ||
[Analyze grammar]

tapyamāne hariḥ kṛṣṇaḥ pratyakṣo'bhavadacyutaḥ |
garuḍaṃ svaṃ samāruhya śrībhūmipadminīyutaḥ || 2 ||
[Analyze grammar]

toṇḍaṃ nṛpaṃ samāgamya prāhā''rādhanayā tava |
tuṣṭo'smi vada me bhakta kiṃ karomi tvadarthakam || 3 ||
[Analyze grammar]

śrutvā toṇḍanṛpastaṃ vai kṛtvā prāñjalimāha yat |
janmamṛtyujarāvyādhivarjite tvakṣare tava || 4 ||
[Analyze grammar]

loke vastuṃ samicchāmi varamenaṃ pradehi me |
tāvatkalevaraṃ tyaktvā kṛṣṇanārāyaṇekṣaṇaḥ || 5 ||
[Analyze grammar]

kṛṣṇanārāyaṇasāmyadeho bhūtvā sa bhaktarāṭ |
divyaṃ dhāmapradaṃ śubhraṃ vimānaṃ tvāruroha vai || 6 ||
[Analyze grammar]

muktaiḥ saṃstūyamāno'sau sārūpyaṃ prāpya śārṅgiṇaḥ |
punarāvṛttirahitaṃ mamā'kṣarapadaṃ yayau || 7 ||
[Analyze grammar]

svāmipuṣkariṇītīrthe nityaṃ vasāmi padmaje |
puṣkariṇyāṃ kṛtasnānādaśvamedhaphalaṃ labhet || 8 ||
[Analyze grammar]

ātmavidyā bhavet sākṣānmuktiścāpi caturvidhā |
tulāpuruṣadānasya phalaṃ svāminiṣevaṇāt || 9 ||
[Analyze grammar]

gosahasradānapuṇyaṃ svāmitīrthanimajjanāt |
dharmārthakāmamokṣāptiḥ svāmitīrthe pradānakāt || 10 ||
[Analyze grammar]

prajñā lakṣmīryaśaḥ sampaddharmo jñānaṃ viraktatā |
manaḥśuddhirbhaveyuśca svāmitīrthā'dhivāsataḥ || 11 ||
[Analyze grammar]

brahmahatyāsurāpānagurudāragamādikam |
suvarṇasteyamāṃsādi hiṃsādoṣādikaṃ tathā || 12 ||
[Analyze grammar]

naśyatyeva na sandehaḥ svāmitīrthe vratāditaḥ |
aho maurkhyamaho maurkhyaṃ janānāṃ tadbhavaḥ khalu || 13 ||
[Analyze grammar]

svāmitīrthe sthite'nyatra ramate yanmanaḥ khalam |
aho mohasya māhātmyaṃ gṛhatīrthavināśakṛt || 14 ||
[Analyze grammar]

snātasya svāmitīrthe tu nāntakādbhayamasti hi |
stuvanti ca praśaṃsanti spṛśanti ca namanti ca || 15 ||
[Analyze grammar]

pibanti snānti paśyanti ye teṣāṃ nāntakād bhayam |
bhuktimuktipradaṃ caitacchrīnivāsakṛtālayam || 16 ||
[Analyze grammar]

śrībhūsevitakṛṣṇādhivāsitaṃ dhāmasadṛśam |
tatsarvaṃ veṃkaṭaśailadṛṣṭipātabhuvastalam || 17 ||
[Analyze grammar]

puṇyaṃ pavitraṃ nirvāṇapadadṃ sarvato'dhikam |
śṛṇu lakṣmi kathāṃ cānyāṃ dharmaguptasya bhūbhṛtaḥ || 18 ||
[Analyze grammar]

somavaṃśe nandarājñaḥ putro dharmaparāyaṇaḥ |
dharmagupta iti khyāto'bhavannītiparāyaṇaḥ || 19 ||
[Analyze grammar]

īje bahuvidhairyajñairdadau dānānyanekaśaḥ |
prajā dharmaparāścāsan pātivratyaparāḥ striyaḥ || 20 ||
[Analyze grammar]

athaikadā'śvamāruhya dharmagupto vanaṃ yayau |
mṛgayāmanucarato niśā'bhūt sa tato drumam || 21 ||
[Analyze grammar]

adhiruhya viśaśrāma ṛkṣastatra samāgataḥ |
anudrutaḥ sa siṃhena ṛkṣo'rohattu pādapam || 22 ||
[Analyze grammar]

uvāca bhūpatiṃ dṛṣṭvā maraṇatrāsakampitaḥ |
mā bhītiṃ yāhi janarāḍ vatsyāvo rajanīmiha || 23 ||
[Analyze grammar]

siṃho bhayaṃkaraścātra vṛkṣamūlamupāgataḥ |
rātryardhaṃ bhaja nidrāṃ tvaṃ rakṣyamāṇo mayā sukhī || 24 ||
[Analyze grammar]

tataḥ prasuptaṃ māṃ rakṣa śarvaryardhaṃ surakṣaka |
ityākarṇya dharmagupte supte ṛkṣaṃ harirjagau || 25 ||
[Analyze grammar]

vayaṃ vanecarāḥ sarve catuṣpādā na mānavāḥ |
kimasmābhirmānavena nṛpo me tyajyatāmayam || 26 ||
[Analyze grammar]

te me khādyaṃ prapūrṇaṃ saṃbhaviṣyatyapavarjyatām |
ṛkṣaḥ prāha tadā siṃhaṃ dharmayuktaṃ sunītimat || 27 ||
[Analyze grammar]

viśvāsaghātināṃ loke mahatyadhogatirmatā |
mānavāḥ paśavaḥ kīṭāḥ pakṣiṇo bālakāḥ striyaḥ || 28 ||
[Analyze grammar]

vanyā grāmyāstathā''raṇyā viśvastā nivasanti vai |
jīvantyāśrayaviśvastāścatuṣpāttvaṃ na kāraṇam || 29 ||
[Analyze grammar]

dvipāttvaṃ vā sapakṣatvaṃ yāvadviśvāsajīvanam |
viśvāso hi paro dharmastaṃ kathaṃ nu tyajāmyaham || 30 ||
[Analyze grammar]

svārthī viśvāsadharmaṃ tu santyajya ghātakī bhavet |
na mayā tatprakartavyaṃ gaccha tyaja pratīkṣaṇam || 31 ||
[Analyze grammar]

nahi mitradruhāṃ pāpaṃ naśyed yajñāyutairapi |
brahmahatyādipāpānāṃ kadācinniṣkṛtirbhavet || 32 ||
[Analyze grammar]

viśvāsaghātināṃ pāpaṃ vinaśyenna kadācana |
na merurbhāravāṃstāvad yāvad bhāro'sti ghātini || 33 ||
[Analyze grammar]

hiṃsā paratarā'dharmasvarūpā nāśadāyinī |
viśvāsahiṃsanaṃ tatra pāpā'tipāpato'dhikam || 34 ||
[Analyze grammar]

tasmād gaccha vanādanyadvanaṃ te bhojanaṃ milet |
ityuktaḥ sa vanarājo maunaṃ kṛtvā vyavasthitaḥ || 35 ||
[Analyze grammar]

ardharātrigate kāle prabuddho nṛpanandanaḥ |
suṣvāpa sukhataḥ ṛkṣaḥ śākhāyāṃ pratyayānvitaḥ || 36 ||
[Analyze grammar]

siṃhaḥ prāha nṛpaṃ rājan kiṃ tavā'nena śākhinā |
mama bhakṣyaṃ rakṣasi tvaṃ nūnaṃ pāpī bhavasyapi || 37 ||
[Analyze grammar]

yathā rājā prajānāṃ tvaṃ tathā vanyanṛpo'smyaham |
prajāstu sarvathā nītyā bhakṣyā rājñāṃ vinirmitāḥ || 38 ||
[Analyze grammar]

ayaṃ vanyamṛgastvadya mama bhakṣya upasthitaḥ |
tavā''śrayaṃ samāsādyā'rohadvṛkṣaṃ hi ṛkṣakaḥ || 39 ||
[Analyze grammar]

bhojane me bhavān rājā rodhakṛd vartate'dya vai |
kiṃ tavā'nena ṛkṣeṇa tyajasva mama bhojanam || 40 ||
[Analyze grammar]

anyathā prātarevāpi divā vā bhakṣayāmi tam |
tvāṃ tathā vai bhakṣayiṣye samāhūyā'nyamadvidhān || 41 ||
[Analyze grammar]

evamukto'tha siṃhena rājā suptamaśaṃkitam |
svāṃkanyastaśiraskaṃ tamṛkṣaṃ tatyāja vṛkṣataḥ || 42 ||
[Analyze grammar]

tāvat sa bhrāmaṇīṃ kṛtvā śākhāyāmeva pādape |
puṇyavaśādūrdhvabhāge samāruhya ruroda ha |
rājā siṃhaśca taṃ papracchatuḥ kasmāddhi rodiṣi || 43 ||
[Analyze grammar]

bhayaṃ dūraṃ gataṃ te'dya vad vānara hṛdgatam |
ṛkṣaḥ prāhobhayaṃ nā'haṃ madarthaṃ rodimi prabho || 44 ||
[Analyze grammar]

vane vanyā hi viśvastā vasanti bahuvānarāḥ |
etādṛśaṃ nṛpaṃ prāpya viśvāsaghātinaṃ śaṭham || 45 ||
[Analyze grammar]

bhaviṣyanti hatāśceti kṛtvā rodimi kesarin |
sanmukhaṃ maraṇaṃ bhūyān mā'kasmān mṛtyurastu naḥ || 46 ||
[Analyze grammar]

ahaṃ na vānaro rājan kintvasmi bhṛguvaṃśajaḥ |
dhyānakāṣṭhā'bhidhaṣirvai kāmarūpadharo vane || 47 ||
[Analyze grammar]

kasmādanāgasaṃ suptamatyākṣīnmāṃ bhavānnṛpa |
macchāpādati conmatto bhava tvaṃ cara bhūtale || 48 ||
[Analyze grammar]

iti śaptvā tataḥ siṃhaṃ prāhārṣistvaṃ purā'nagha |
kuberasacivo hyāsīḥ sakhījanapuraḥsaraḥ || 49 ||
[Analyze grammar]

himādrau viharad daivād gatavān gautamāśramam |
vivastraṃ tvāṃ vilokyaiva gautamaḥ śāpamāsṛjat || 50 ||
[Analyze grammar]

vivastraḥ paśucaryastvaṃ mamāśramasya sannidhau |
kathaṃ vai duṣṭa carasi bhava duṣṭo'tihiṃsrakaḥ || 51 ||
[Analyze grammar]

nagnasiṃho bhava cātra romādivarjitaḥ khalu |
itiśāpena siṃhastvaṃ tuṣṭāvarṣiṃ punaḥ punaḥ || 52 ||
[Analyze grammar]

sa cāha te yadā rājño dharmaguptasya vṛkṣake |
dhyānakāṣṭhasya sadbhāgyād darśanaṃ vai bhaviṣyati || 53 ||
[Analyze grammar]

tadā śāpāttava mokṣo bhaviṣyatyeva mā śucaḥ |
bhadranāmā'si bhṛtyastvaṃ dhyānājjānāmyahaṃ hi tat || 54 ||
[Analyze grammar]

ityuktaḥ sa nanāmainamṛṣiśreṣṭhaṃ nṛpaṃ tathā |
siṃhatvaṃ ca parityajya drāgabhūd yakṣarūpadhṛk || 55 ||
[Analyze grammar]

jātismarastadā sarvaṃ vijñāyarṣikṛpāvaśāt |
āgatena vimānena divyena dyāṃ yayau hi saḥ || 56 ||
[Analyze grammar]

ṛṣirgato vanaṃ naijaṃ rājā matto'bhavad vane |
vicacāra paśucaryastamanveṣṭuṃ prajā yayuḥ || 57 ||
[Analyze grammar]

vane bhramantamunmattamāninyurnarmadātaṭam |
jaiminerantikaṃ prāpya jagaduścāparādhanam || 58 ||
[Analyze grammar]

śrutvā jaiminirāhaitān suvarṇamukharītaṭe |
veṃkaṭādrau svāmipuṣkariṇītīrthe'tipāvane || 59 ||
[Analyze grammar]

snāpayantu nṛpaṃ tena śāpamukto bhaviṣyati |
evaṃ gatvā kṛtavanto janāstadrājyavāsinaḥ || 60 ||
[Analyze grammar]

dharmagupto'bhavatsvastho dhanaratnādi saṃdadau |
dhānyakṣetrāṇi ratnāni veṃkaṭeśasya saṃdadau || 61 ||
[Analyze grammar]

evaṃ rājā'bhavacchāpānmukto rājyaṃ cakāra ha |
svāmipuṣkariṇītīrthaṃ vartate evamarthadam || 62 ||
[Analyze grammar]

dharmadaṃ kāmadaṃ mokṣapradaṃ duḥkhavināśakam |
bhūtapretapiśācādyunmādā naśyanti tajjalāt || 63 ||
[Analyze grammar]

snānātpānātsparśanācca darśanād vandanādapi |
naśyanti pātakānyeva smaraṇādapi padmaje || 64 ||
[Analyze grammar]

svāmitīrthaṃ svāmitīrthaṃ svāmitīrthamiti priye |
triḥpaṭhanto narāḥ snātāḥ svāmisnānaphalaṃ tathā || 65 ||
[Analyze grammar]

padaṃ vai brahmaṇaḥ śreṣṭhaṃ labhante nātra saṃśayaḥ |
śravaṇātpaṭhanāccāsya tatra snānaphalaṃ bhavet || 66 ||
[Analyze grammar]

śṛṇu lakṣmi kathāṃ tvanyāṃ sumaterbrāhmaṇasya vai |
mahārāṣṭre yajñadevasutaḥ sumatināmakaḥ || 67 ||
[Analyze grammar]

gṛhaṃ tyaktvotkalaṃ deśaṃ gato duṣṭasamāgamāt |
kāṃcit kirātīṃ sa dṛṣṭvā mumoha tadgṛhe sa ca || 68 ||
[Analyze grammar]

tasthau reme ca bubhuje cauryaṃ cakre papau surām |
kaṃcidvipraṃ sa niśithe khaḍgena hatavānatha || 69 ||
[Analyze grammar]

dravyamādāya viprasya kirātībhavanaṃ yayau |
kṛṣṇavarṇā vrahmahatyā vavalge taṃ bhayaṃkarī || 70 ||
[Analyze grammar]

tayonmattaḥ sa sumatiḥ prayayau svagṛhaṃ prati |
pitaraṃ rakṣa rakṣeti tvākrośan śaraṇaṃ yayau || 71 ||
[Analyze grammar]

brahmahatyā tajjanakaṃ samuvāca tadā ṛtam |
asau surāpī steyī ca brahmahā cātipātakī || 72 ||
[Analyze grammar]

mātṛdrohī pitṛdrohī nītityāgī vṛṣojjhitaḥ |
kirātīsaṃgaduṣṭaśca muñcainaṃ tu durātmakam || 73 ||
[Analyze grammar]

no cet tvāṃ tava bhāryā ca sutamenaṃ tathetarān |
bhakṣayiṣyāmi vaṃśaṃ ca mā kulaṃ hantumarhasi || 74 ||
[Analyze grammar]

ekaṃ tyaktvā kulaṃ rakṣetyuktvā'grahīdgale tu tam |
tāvat tatra samāyāto durvāsāstu yadṛcchayā || 75 ||
[Analyze grammar]

stutastairāha pitaraṃ svāmipuṣkariṇījale |
saṃsnāpaya pramucyeta hatyāyā nātra saṃśayaḥ || 76 ||
[Analyze grammar]

sākaṃ durvāsasā so'tha yayau puṣkariṇījale |
snāto hatyāvinaṣṭā ca pūto babhūva bhūsuraḥ || 77 ||
[Analyze grammar]

evaṃprabhāvaṃ tattīrthaṃ pāpavṛkṣakuṭhārakam |
śṛṇvatāṃ paṭhatāṃ cāpi vājapeyaphalapradam || 78 ||
[Analyze grammar]

veṃkaṭe kṛṣṇatīrthe'pi snātvātpāpātpramucyate |
pitṝnmātṝrguruṃścāvamanyamāno ye khalāśayāḥ || 79 ||
[Analyze grammar]

te'pi vai kṛṣṇatīrthe'smin śuddhyanti snānamātrataḥ |
kṛṣṇanāmā muniḥ kaścidakarodvai tapaḥ śubham || 80 ||
[Analyze grammar]

veṃkaṭādrau hariṃ dhyāyan kṛtavāṃstīrthamuttamam |
rāmakṛṣṇābhidhaścānyo munirmokṣaparāyaṇaḥ || 81 ||
[Analyze grammar]

tapaścakāra kaṭhinaṃ hyanekaśatavatsarān |
valmīkākrāntadeho'pi svasthānānna cacāla saḥ || 82 ||
[Analyze grammar]

vāsavo meghavṛṣṭiṃ ca cakāra saptavāsarān |
valmīkasyopariṣṭhādvai nipapāta mahāśaniḥ || 83 ||
[Analyze grammar]

valmīkaśikharaṃ dhvastaṃ munistvasthyavaśeṣitaḥ |
mahendreṇa tadā dṛṣṭo rakṣārthaṃ tasya mādhavaḥ || 84 ||
[Analyze grammar]

kāṃbhareyo mahāsvāmī gopālabālakaḥ svayam |
śaṃkhacakrādisaṃyuktaḥ āvirbabhūva cāha tam || 85 ||
[Analyze grammar]

uttiṣṭha bhadraṃ te bhakta tapasā'haṃ pratoṣitaḥ |
atra tīrthe makarasthādivākare tu yo janaḥ || 86 ||
[Analyze grammar]

snāti vā paurṇamāsyāṃ vā madāvirbhāvasaddine |
matpārṣadāḥ koṭisūryaprabhāste yanti matpadam || 87 ||
[Analyze grammar]

tvannāmnā ca parāṃ khyātiṃ gamiṣyati sutīrthakam |
ityuktvā śrīnivāsaśca tatraivāntaradhīyata || 88 ||
[Analyze grammar]

rāmakṛṣṇau yayau dhāma śrīkṛṣṇena samaṃ hareḥ |
paṭhanācchravaṇāccāpi tīrthaṃ mokṣapradaṃ nvidam || 89 ||
[Analyze grammar]

jaladānaṃ cānnadānaṃ vastradānaṃ dhanārpaṇam |
kartavyaṃ vaiṃkaṭe tīrthe śāśvataṃ vai bhaveddhi tat || 90 ||
[Analyze grammar]

hemāṃgo nāma rājarṣirabhūdikṣvākuvaṃśajaḥ |
gavāṃ dānaṃ bhūmidānaṃ svarṇadānādikaṃ dadau || 91 ||
[Analyze grammar]

tenā'dattaṃ jalaṃ tvekaṃ sukhalabhyadhiyā priye |
amūlyaṃ sarvato labhyaṃ taddātuḥ kiṃ phalaṃ bhavet || 92 ||
[Analyze grammar]

alabhyadāne puṇyaṃ syādityavādītsa yuktitaḥ |
dīnānānarca sa vyaṃgāndaridrānvṛttikarṣitān || 93 ||
[Analyze grammar]

nā''narca śrotriyānviprānsādhūṃśca brahmavādinaḥ |
prakhyātānpūjayantyeva sarve lokāḥ samutsukāḥ || 94 ||
[Analyze grammar]

daridrāṇāṃ gatiścāhaṃ tasmātte maddayāspadāḥ |
iti duṣṭeṣu pātreṣu dattavān tena tasya vai || 95 ||
[Analyze grammar]

cātakasya trijanmāni gṛdhrasyaikajanustathā |
śunaśca saptajanmāni hyabhavaṃśca tato gṛhe || 96 ||
[Analyze grammar]

makṣikākhādayitrī vai gṛhagodhā vyajāyata |
mithilādipatergehe śrutadevaḥ samāgamat || 97 ||
[Analyze grammar]

tena dṛṣṭā hi ṛṣiṇā hyaṣṭāśītisamāmayī |
śrutadevaṃ prasaṃpūjya rājā taccaraṇāmṛtam || 98 ||
[Analyze grammar]

mūrdhnā'vahat tadopkṣitairbindubhiḥ prokṣitā'pi sā |
sadyo jātismarā jātā trāhi trāhītyuvāca sā || 99 ||
[Analyze grammar]

ahamikṣvākukulajo hemāṃgaśca nṛpo'bhavam |
pakṣapātaḥ kṛto dāne jalaṃ datta na vai tathā || 100 ||
[Analyze grammar]

tathā pātraṃ samutsṛjya hyapātre pratipāditam |
jvalantamagnimutsṛjya bhasmanyeva hutaṃ mayā || 101 ||
[Analyze grammar]

tulasīṃ tu samutsṛjya viṣavallī prasiñcitā |
paṃgvādyā ye'pyanāthādyā dayāpātraṃ hi kevalam || 102 ||
[Analyze grammar]

tapovijñānasadvidyāśrayā viṣṇusvarūpiṇaḥ |
pūjanīyā jñāninaśca priyā viṣṇoḥ sadaiva te || 103 ||
[Analyze grammar]

tasmāj jñānī sadā pūjyastasmai deyaṃ phalāptaye |
pūjyātpūjyataraḥ sopi svargamokṣaprado bhavet || 104 ||
[Analyze grammar]

na jalaṃ vai mayā dattaṃ sādhavo vā na sevitāḥ |
tena me durgatiśceyaṃ jātā svarge gate'pi vai || 105 ||
[Analyze grammar]

etacchrutvā veṃkaṭādrestīrthasnānaphalaṃ muniḥ |
godhāyai dattavān sā cā'pyekadivasapuṇyataḥ || 106 ||
[Analyze grammar]

divyarūpadharo divyavimānavarasaṃsthitaḥ |
stutvā yayau svargalokaṃ jaladānaphalānvitaḥ || 107 ||
[Analyze grammar]

jalaṃ svarge tataḥ prāpa tasmājjalādidānakam |
kartavyameva sadbhaktyā mānavaiḥ satataṃ bhuvi || 108 ||
[Analyze grammar]

atha kālāntare so'bhūt kakutsthākhyo mahīpatiḥ |
saptadvīpapatirbhūtvā viṣṇoḥ sāyujyamāptavān || 109 ||
[Analyze grammar]

iti te kathitaṃ lakṣmi pātramāhātmyamuttamam |
jaladānādikaṃ cāpi śravaṇāccāpi tatphalam || 110 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye veṃkaṭādrau toṇḍamānnāmarājñaḥ dharmaguptarājñaḥ ṛkṣaviśvāsaghātinaḥ sumatināmakaviprasya rāmakṛṣṇarṣeḥ hemāṃgasya ca muktirityādinirūpaṇanāmā dvyadhikacatuśśatatamo'dhyāyaḥ || 402 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Lakshminarayana Samhita Chapter 402

Cover of edition (2011)

Shri Lakshmi Narayana Samhita
by Chowkhamba Sanskrit Series Office (2011)

शेतायनव्यास (Shwetayan Vyas)

Buy now!
Like what you read? Consider supporting this website: