Chapter 397

śrīnārāyaṇa uvāca |
evaṃ śubhāśiṣaḥ prāpyā'larko brahmasvarūpatām |
svātmanyanubhavanprāha bhagavantaṃ guruṃ harim || 1 ||
[Analyze grammar]

bhagavan yoginaścaryāṃ śrotumicchāmi sarvathā |
brahmavartmanyanugacchan lakṣyate kairvilakṣaṇaiḥ || 2 ||
[Analyze grammar]

guruḥ prāha śṛṇu kṣmeśa lokacaryāvilakṣaṇāḥ |
caryāstasya bhavantyeva nirmaryādā nirāhatāḥ || 3 ||
[Analyze grammar]

mānāpamānau yāvetau prītyudvegakarau nṛṇām |
tāveva viparītārthau yoginastu viṣāmṛte || 4 ||
[Analyze grammar]

maunamālambate prāyo harernāma gṛṇan muhuḥ |
ātithyayajñayātrādau na gacchennirjanecchukaḥ || 5 ||
[Analyze grammar]

vyaste vidhūme aṃgāre sarvasmin bhuktavajjane |
aṭeta devayātrārthaṃ yadṛcchālābhatoṣavān || 6 ||
[Analyze grammar]

yadvā cājagarīṃ vṛttiṃ samāśritya hi vartate |
phalaṃ mūlaṃ dalaṃ kandaṃ kaṇā bhājā ca yallabhet || 7 ||
[Analyze grammar]

tatprayuñjyātsureṣvārpya satāṃ vartma na dūṣayan |
sārabhūtaṃ yathāpekṣaṃ gṛhṇīyānnādhikaṃ kvacit || 8 ||
[Analyze grammar]

vāgdaṇḍaḥ karmadaṇa़्ḍaśca manodaṇḍaśca te trayaḥ |
yasya vai niyatāḥ sa syāt tridaṇḍī yogirāṭ paraḥ || 9 ||
[Analyze grammar]

kṛṣṇamūrtau sadā yuñjan yogaṃ kṛṣṇeti saṃjapan |
vartate nityamagno'sau sthitiṃ śreṣṭhāṃ samudvahan || 10 ||
[Analyze grammar]

tārasvareṇa bhagavannāmaraṭanamācaret |
tatra yuktastu yogīśo bhagavallayamāpnuyāt || 11 ||
[Analyze grammar]

śaśāṃkaraśmisaṃyogāccandrakāntamaṇiḥ payaḥ |
samutsṛjati nā'yuktaḥ sopamā yoginaḥ smṛtā || 12 ||
[Analyze grammar]

sūryaraśmisaṃprayogātsūryakānto hutāśanam |
āviṣkaroti naikākī sopamā yoginaḥ smṛtā || 13 ||
[Analyze grammar]

pipīlikā''khunakulagṛhagodhākapiñjalāḥ |
vasanti svāmivadgehe dhvaste yānti tato'nyataḥ || 14 ||
[Analyze grammar]

duḥkha tu svāmino gehadhvaṃse teṣāṃ yathā na vai |
tathā tu yoginā bhāvyaṃ duḥkhānāvṛtakena vai || 15 ||
[Analyze grammar]

valmīkakīṭikā mukhāgreṇa cāpi tvaṇīyasā |
karoti valmīkacayaṃ tathā yogaṃ samarjayet || 16 ||
[Analyze grammar]

paśupakṣimanuṣyādyaiḥ patrapuṣpaphalādikam |
savṛkṣaṃ lupyate tadvallopyaṃ sarvaṃ tu yoginā || 17 ||
[Analyze grammar]

ruruśāvaviṣāṇāgraṃ vardhamānaṃ vilokya ca |
yogī yoge vardhate ca tadā siddhimavāpnuyāt || 18 ||
[Analyze grammar]

tadgṛhaṃ yatra vasati tadbhojyaṃ yena jīvati |
yena sampadyate cārthastatsukhaṃ mamatā'tra kā || 19 ||
[Analyze grammar]

bhojye miṣṭaṃ ca vā'miṣṭaṃ tīkṣṇaṃ kṣāraṃ ca vā kaṭu |
na yad vedayate yogī jñātvā'pi na bhaṇatyapi || 20 ||
[Analyze grammar]

sa vai jihvāṃ rasaṃ svādṃ jītavānasti sarvathā |
komalaṃ kaṭhinaṃ rūkṣaṃ mṛduḥ snigdhaṃ kharaṃ pṛthu || 21 ||
[Analyze grammar]

tīkṣṇaṃ prajvālakaṃ jñātvā cāpi duḥkhaṃ na yojane |
so'yaṃ tvacaṃ sukhaṃ sparśaṃ jītavānasti sarvathā || 22 ||
[Analyze grammar]

miṣṭaṃ bhadra svarayuktaṃ gītaṃ cāhlādakaṃ mṛdu |
narma hāsyapradaṃ roṣakaraṃ vā mānadaṃ tathā || 23 ||
[Analyze grammar]

jñātvā śabdaṃ na vai tatra sukhaṃ duḥkhaṃ hi manyate |
sa ca vācaṃ tadarthaṃ ca jītavānasti sarvathā || 24 ||
[Analyze grammar]

sundaraṃ sughaṭaṃ svarṇasamaṃ tejomayaṃ śubham |
dhavalaṃ karburaṃ cānyat cikkaṇaṃ tīkṣṇameva vā || 25 ||
[Analyze grammar]

rūpaṃ dṛṣṭvā sukhaṃ duḥkhaṃ yo na manyeta mānase |
jītavān sarvathā rūpaṃ netraṃ dṛśyaṃ sa yogirāṭ || 26 ||
[Analyze grammar]

sugandhaṃ samanuprāpya nāsā naiti vikāsatām |
durgandhaṃ samanuprāpya naspuṭaṃ na ca ruddhyate || 27 ||
[Analyze grammar]

sa yogī jītavān gandha nāsikāṃ ca svabhāvataḥ |
satyapi kharjane prāpte cāṃcalye vā tvaci kvacit || 28 ||
[Analyze grammar]

naiva spṛśati karṇaṃ ca karotyeva na tvagjayī |
padbhyāṃ yāti harerdhāma pradakṣiṇāṃ karoti ca || 29 ||
[Analyze grammar]

tīrthayātrāṃ sādhuyātrāṃ karoti caraṇojjayī |
devagurusatāṃ sevāṃ karābhyāṃ prasamācaret || 30 ||
[Analyze grammar]

vāṇyā saṃkīrtanaṃ kṛṣṇanārāyaṇasya cācaret |
nṛtyaṃ karoti devāgre kathāṃ karoti sādhuṣu || 31 ||
[Analyze grammar]

gītaṃ karoti bhakteṣu dhyānaṃ karoti mūrtiṣu |
cintanaṃ vandanaṃ stotraṃ karotyeva parātmani || 32 ||
[Analyze grammar]

namanaṃ hasanaṃ cāhvānakaṃ dikṣu karoti ca |
dṛṣṭvā kṛṣṇaṃ tatra tatra harṣe cāviṣkaroti ca || 33 ||
[Analyze grammar]

kvacid vā'dṛśyatāṃ yāti kvacid vṛkṣeṣu vartate |
kvacijjalapradeśe vā kvacidraṇe'pi vartate || 34 ||
[Analyze grammar]

kvacittu gahvare garte kaṇrakādau kvacitkvacit |
kheṭe nagare grāmādau vane'raṇye ca nirjane || 35 ||
[Analyze grammar]

manasā kalpite deśe bhūtale'bbhratale'pi vā |
vasatyeva yathāceṣṭaṃ yathāsaṃkalpameva ca || 36 ||
[Analyze grammar]

mukhe kvacicchilākhaṇḍaṃ dhṛtvā khādati ravādyavat |
kajjalaṃ kardamaṃ vāpi dhūlīṃ kṣipati gātrake || 37 ||
[Analyze grammar]

candanaṃ śītalaṃ matvā jihīrṣati muhurmuhuḥ |
agamyaṃ dūradeśasthaṃ vastu hastena dhāryate || 38 ||
[Analyze grammar]

anyadeśe jāyamānaṃ vṛttāntaṃ janasaṃsadi |
varṇayatyeva ca yathāyathaṃ kvacit satīśavat || 39 ||
[Analyze grammar]

kvacit svapiti mārgeṣu kvacijjaneṣu kūrdati |
paśuṣvapi vinā cintāṃ bhayaṃ nidrāti mattavat || 40 ||
[Analyze grammar]

dhūlīdhūsaritāṃgaśca modate manasā kvacit |
digambaraḥ kvacid yāti kvacitparṇāmbaro'pi vā || 41 ||
[Analyze grammar]

kvacid vṛkṣatvagambaraḥ kvacid bhasmāmbaro'pi vai |
kvacidvṛṣṭipradhārāsu kvacidātapavahniṣu || 42 ||
[Analyze grammar]

kvacicchaityādisalile kardame tiṣṭhati kvacit |
kvacinmalādiliptāṃgaḥ kvacitsvacchaśarīrakaḥ || 43 ||
[Analyze grammar]

kvacinmūtrādidurgandhaḥ ṣṭhīvanādiṣu nirghṛṇaḥ |
nāsikālālasaṃlagno dehakṣālanavarjitaḥ || 44 ||
[Analyze grammar]

ātmārāmo yathā brahmasvarūpo divyavigrahaḥ |
nirāvaraṇasañcāro naranārīvibhānakaḥ || 45 ||
[Analyze grammar]

paśupakṣitṛṇavallīkaṇṭakādiṣu nirbhayaḥ |
harerbhānena yukto'pi dehabhānādivarjitaḥ || 46 ||
[Analyze grammar]

avismartavyamevā'trā'tyaktavyaṃ cāpi yadbhavet |
na tyajati nāpi vismaratyavadhānavānapi || 47 ||
[Analyze grammar]

vartate bālavadvāpi vṛddhavacca kadācana |
kadāpi vartate kākabakamārjāraghūkavat || 48 ||
[Analyze grammar]

kvacit sa vartate premṇi mayūraśukahaṃsavat |
kvacinmādhukarīṃ vṛttiṃ kvacid vṛttiṃ tu vānarīm || 49 ||
[Analyze grammar]

kvacit saiṃhīṃ kvacid dīnāṃ kvacicchyenasamāṃ tathā |
kvacinmatsyasamāṃ vṛttiṃ samādāya hi vartate || 50 ||
[Analyze grammar]

śrīharau cittayuktatvaṃ cā'nyatra cittavarjitam |
ahnāṃ nirgamanaṃ tasya bhavati brahmayoginaḥ || 51 ||
[Analyze grammar]

kvacinmānasapūjāyāṃ hariṃ bhojayati dhruvaḥ |
jalaṃ datvā namaḥ kṛtvā visarjayati ceṣṭayā || 52 ||
[Analyze grammar]

kvacid dhūlyāṃ tu paryaṃkaṃ kṛtvā sthāpayati prabhum |
patraṃ puṣpaṃ dalaṃ parṇaṃ phalaṃ vā kaṃkaraṃ tṛṇam || 53 ||
[Analyze grammar]

tulasīṃ kamalaṃ datvā hariṃ raṃjayati kvacit |
evaṃ yogijanasyaiva ceṣṭā niyantraṇāṃ vinā || 54 ||
[Analyze grammar]

divyā divyasvarūpā ca divyagatipravartikā |
divyatattvamayī sarvā paraśreyaḥpradāyinī || 55 ||
[Analyze grammar]

bhavatyeva sadā'larka yogī jānāti yoginam |
sanakādyāḥ ṛṣabhādyāḥ śukādyāśca tathā'bhavan || 56 ||
[Analyze grammar]

siddhā nāthāstīrthakarā haṃsā aghoravartanāḥ |
sādhavo yoginaścānye jaḍāśca bhairavādayaḥ || 57 ||
[Analyze grammar]

śaṃkaro yoginīcakraṃ cā'vadhūtāstathā'pare |
satyaḥ sādhvyastathā dāsyo vaiṣṇavyaśca samādhigāḥ || 58 ||
[Analyze grammar]

prāpurvai brahmaparamaṃ lokavilakṣaṇakriyāḥ |
kimbahunā'tra vācā vai yogī yogena darpitaḥ || 59 ||
[Analyze grammar]

nānyat kiṃcidvijānāti brahmabhinnaṃ hṛdantare |
yasya sarvatra cā''tmā'sti yasmin sarvātmano gṛham || 60 ||
[Analyze grammar]

sūtre maṇirmaṇau sūtraṃ tathā yaḥ sthitimāptavān |
paripūrṇatamānandaṃ prāptavān tanmadānvitaḥ || 61 ||
[Analyze grammar]

tasya yoginaḥ sāmyaṃ ko vimarśayitumarhati |
ceṣṭayā vartate vyagro buddhyā viśārado yathā || 62 ||
[Analyze grammar]

vācā tu vartate sādhurvṛttyā śānto hi vartate |
hṛdā tu vartate tṛpto dehena vartate'bhayaḥ || 63 ||
[Analyze grammar]

guṇaistu vartate mūḍhaḥ snigdho mukhena vartate |
brahmaṇi vartate rāgī māyike vartate saruṭ || 64 ||
[Analyze grammar]

nirjane vartate lubdhaḥ saghṛṇo vartate jane |
daive paitrye hareryoge saśraddho vartate ca saḥ || 65 ||
[Analyze grammar]

dehakārye vicitto vai nijakārye tu cittavān |
pare niḥśreyasi sarvabalayuktaḥ pravartate || 66 ||
[Analyze grammar]

vyavahāre vicitto'yaṃ parameśe sacittakaḥ |
evaṃ lakṣaṇasampanno yogī varteta sarvadā || 67 ||
[Analyze grammar]

kvacid darśayati svasmiṃścamatkārān bahūn bahūn |
kvacid vanyavadevā'yaṃ pradarśayati mūrkhatām || 68 ||
[Analyze grammar]

evaṃvidhaṃ janaṃ jñātvā vicitraceṣṭikaṃ muhuḥ |
vijānīyānmahāyogeśvaraṃ brahmasvarūpiṇam || 69 ||
[Analyze grammar]

atha yogī svayaṃ cihnaṃ jñātvā tyajati vigraham |
śṛṇu vacmi tvariṣṭāni yenotkrāntau na saditi || 70 ||
[Analyze grammar]

devamārgaṃ dhruvaṃ śukraṃ somacchāyāmarundhatīm |
yo na paśyati netreṇa mṛtyustasya samāntare || 71 ||
[Analyze grammar]

sūryasya maṇḍalaṃ raśmihīnaṃ vahniṃ saraśmikam |
yastu paśyati netreṇa mṛtyustasya samāntare || 72 ||
[Analyze grammar]

vānte mūtrapurīṣe ca svarṇatulye prapaśyati |
svapne'pi yadi paśyati jīvet sa daśamāsikam || 73 ||
[Analyze grammar]

dṛṣṭvā pretapiśācādīn gandharvanagarāṇi ca |
vṛkṣān kanakaraṃgāṃśca navamāsān sa jīvati || 74 ||
[Analyze grammar]

pīnaḥ śuṣkaḥ śuṣkaḥ pīno hyakasmājjāyate muhuḥ |
śirovāyubhramo yasya tasyā''yuścāṣṭamāsikam || 75 ||
[Analyze grammar]

pādanyāse bhuvi pārṣṇeryadvā phaṇe prakhaṇḍitā |
rajaḥkardamadhūlyādau saptamāsān sa jīvati || 76 ||
[Analyze grammar]

gṛdhraḥ kapotaḥ kākolo vāyaso vāpi mūrdhani |
kravyādo vā khago nīlaḥ ṣaṇmāsāyuḥpradarśakaḥ || 77 ||
[Analyze grammar]

hanyate kākapaṃktyā ca pāṃśuvarṣeṇa svapnake |
svacchāyāmanyathā draṣṭā catuḥpañca sa jīvati || 78 ||
[Analyze grammar]

anabhre vidyuto draṣṭā dakṣiṇasyāṃ pravāsakṛt |
rātrāvindradhanurdraṣṭā dvātramāsikajīvanaḥ || 79 ||
[Analyze grammar]

ghṛte taile tathā''darśe toye vā nā''tmanastanum |
yaḥ paśyedaśiraskāṃ vā māsādūrdhvaṃ na jīvati || 80 ||
[Analyze grammar]

yasya bastasamo gandho gātre śavasamo'pi vā |
tasya vai jīvanaṃ cārdhamāsikaṃ bodhyameva hi || 81 ||
[Analyze grammar]

yasya tu snātamātrasya hṛdayaṃ karapādakau |
pibataśca gale śoṣo daśāhe sa tu jīvati || 82 ||
[Analyze grammar]

yasya vegena vāyośca daṇḍabhedaḥ prajāyate |
tasyā'ntakaḥ samāyāto muhūrte vai mariṣyati || 83 ||
[Analyze grammar]

ṛkṣavānarabastoṣṭragardabhajambukādibhiḥ |
dakṣiṇāṃ yo diśaṃ vāhe tiṣṭhan yāti mariṣyati || 84 ||
[Analyze grammar]

raktakṛṣṇāmbaradharā gāyantī hasatī ca yam |
dakṣiṇāśāṃ nayennārī svapne so'pi na jīvati || 85 ||
[Analyze grammar]

nagnaṃ kṣapaṇakaṃ yadvā rākṣasaṃ kālameva vā |
hasamānaṃ pravalgantaṃ dṛṣṭvā mṛtyuṃ vicārayet || 86 ||
[Analyze grammar]

ātmānaṃ sarvathā magnaṃ paṃke paśyenmariṣyati |
keśe vahniṃ bhujagaṃ ca bhasma śuṣkāṃ nadīṃ tathā || 87 ||
[Analyze grammar]

svapne dṛṣṭvā daśāhena mariṣyati na saṃśayaḥ |
karālaiḥ puruṣairāyudhādibhiścopalādibhiḥ || 88 ||
[Analyze grammar]

māritastāḍitaḥ so'pi mariṣyati na saṃśayaḥ |
dantajāḍyavato mṛtyurbhaviṣyati na saṃśayaḥ || 89 ||
[Analyze grammar]

sūryodaye śivā yasya krośantī yāti sammukham |
viparītaṃ parītaṃ vā sa sadyo mṛtyumṛcchati || 90 ||
[Analyze grammar]

bhuktamātrasya yasyaiva punaḥ saṃbādhate kṣudhā |
dīpagandhaṃ na yo vetti sa gatāyurna saṃśayaḥ || 91 ||
[Analyze grammar]

nātmapratikṛtiṃ tvanyacakṣuṣorvai prapaśyati |
rātrau śakrāyudhadraṣṭā divā grahavilokanaḥ || 92 ||
[Analyze grammar]

nāsikā vakritā yasya karṇau ca nimnakonnatau |
netraṃ vāmaṃ sravatyeva tasyāyurnāsti sarvathā || 93 ||
[Analyze grammar]

mukhaṃ raktaṃ bhavejjihvā śyāmā dantāśca kṛṣṇakāḥ |
nirghoṣā'śravaṇaṃ karṇe cakṣurjyotiḥkṣayaṃ tathā || 94 ||
[Analyze grammar]

garte gatasyopalābhirdvāraṃ yasya pidhīyate |
tasya mṛtyuḥ kṣaṇādūrdhvaṃ svapne'gniveśitasya ca || 95 ||
[Analyze grammar]

jalapraveśane bhūtaistāḍane mṛtyurāgataḥ |
svabhāvavaiparītyaṃ ca prakṛteśca viparyayaḥ || 96 ||
[Analyze grammar]

pūjyanindā'vamānādi mṛtyorākāriṇo matāḥ |
tasmād yogaṃ tadā yuñjyānmṛtyunāśāya taddine || 97 ||
[Analyze grammar]

yadvā brahmaṇi yuñjītātmānaṃ nānyatsmaretkhalu |
tena kṛṣṇena yukto'sau prayāti tatparaṃ padam || 98 ||
[Analyze grammar]

so'yamātyantiko mokṣo mṛtyurātyantiko hi saḥ |
yogābhyāsaphalaṃ taccā'kṣare pādārcanaṃ hareḥ || 99 ||
[Analyze grammar]

jananaṃ sārthakaṃ tasya maraṇaṃ sārthakaṃ tathā |
sārthakaṃ rājyakaraṇaṃ prāptiḥ kṛṣṇasya pādayoḥ || 100 ||
[Analyze grammar]

alarka itisaṃśrutvā nanāma gurupādayoḥ |
niśāmadhye muhūrte vai jñānayogau lalābha ca || 101 ||
[Analyze grammar]

pūjito vandito dattātreyaśca bhagavān muhuḥ |
uvāca bahusantuṣṭaḥ pulakāṃcitavigrahaḥ || 102 ||
[Analyze grammar]

diṣṭyā kāśīpaterbhūribalasainyena tarjitaḥ |
yannimittamihā''yātaḥ sa bhavatsaṃgado mama || 103 ||
[Analyze grammar]

dhanyo bhrātā subāhuśca yena jñāne suyojitaḥ |
diṣṭyā mātṛkṛtaṃ patra vācitaṃ ca mayā tathā || 104 ||
[Analyze grammar]

diṣṭyā tvatpādayugalaṃ sevitaṃ ca mayā tathā |
diṣṭyā tvaduktayaḥ sarvā mama cetasi susthirāḥ || 105 ||
[Analyze grammar]

diṣṭyā jñānaṃ mamotpannaṃ tava sādhoḥ samāgamāt |
diṣṭyā bhavatā karuṇā kṛtā bhagavatā mayi || 106 ||
[Analyze grammar]

so'haṃ tava prasādāgnirnirdagdhāhaṃmamādikaḥ |
brahmadhāma pragantuṃ vai yatiṣye rājyavartanāt || 107 ||
[Analyze grammar]

dattātreyastataḥ śiṣyaṃ prāha gaccha sukhī bhava |
nirmamo nirahaṃkārastathā cara vimuktaye || 108 ||
[Analyze grammar]

evamuktaḥ praṇamyainaṃ jagāma niśithe gṛham |
yatra kāśīpatiḥ rājā tathā subāhuragrajaḥ || 109 ||
[Analyze grammar]

tatra gatvā samuvāca bhujyatāṃ rājyamūrjitam |
yathā vā rocate tadvat subāhoḥ saṃprayaccha vā || 110 ||
[Analyze grammar]

kāśīrājastadā prāha kiṃ tyaktaṃ yuddhamantarā |
alarkaḥ prāha guruṇā granthayo nāśitā mama || 111 ||
[Analyze grammar]

dattātreyaprasādena bhedabhāvo nirākṛtaḥ |
mano brahmaṇi sandhāya tajjaye paramo jayaḥ || 112 ||
[Analyze grammar]

subāhuḥ prāha yasyārthaṃ tvāmahaṃ yoddhumāgataḥ |
tanmayā sakalaṃ prāptaṃ na me rājye prayojanam || 113 ||
[Analyze grammar]

kāśīrājastathā prāha jñānavairāgyayoḥ kṛte |
alarka tava mokṣārthaṃ mayā yuddhaṃ praghoṣitam || 114 ||
[Analyze grammar]

tatte jñānaṃ ca vairāgyaṃ samutpannaṃ vrajāmyaham |
upekṣyate sīdamānaḥ svajano bāndhavaḥ suhṛt || 115 ||
[Analyze grammar]

sa na proktaḥ svajanādirvācyaḥ sa tu janairbhavet |
phaladāyī satāṃ saṃgo mātrā te kathitaḥ khalu || 116 ||
[Analyze grammar]

tajanyabodhalābhena yatethāḥ śreyase nṛpa |
evamuktvotsavaṃ kṛtvā kāśīrājo yayau tataḥ || 117 ||
[Analyze grammar]

subāhurapi siddhārtho yayau svīyavanaṃ punaḥ |
alarkastu samuttīrṇo gāthāmetāmagāyata || 118 ||
[Analyze grammar]

aho kaṣṭaṃ mayā kīdṛg rājyaṃ garveṇa vartitam |
guroḥ kṛpayā vijñānaṃ yogānnāsti paraṃ sukham || 119 ||
[Analyze grammar]

ityuktvā ca nijaṃ putramabhiṣicya narādhipam |
vanaṃ jagāma santyaktasarvasaṃgaḥ pramuktaye || 120 ||
[Analyze grammar]

tataḥ kālena mahatā brahmanirvāṇamāptavān |
śravaṇātpaṭhanāccāsya brahmasāyujyamāpnuyāt || 121 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye'larkasya dattātreyopadeśe muktacaryā yogināṃ mṛtyucihnāni alarkasya vanavāsaḥ evamādinirūpaṇanāmā saptanavatyadhikatriśatatamo'dhyāyaḥ || 397 ||
[Analyze grammar]