Chapter 393

śrīnārāyaṇa uvāca |
atha prātarnṛpaputraḥ ṛtadhvajaḥ sumaṃgalaiḥ |
vādyaiśca gītibhiścāpi pātālākhyānakaistathā || 1 ||
[Analyze grammar]

nāgakanyābhiratyarthaṃ miṣṭasvaraiḥ prabodhitaḥ |
snāpito'mbaritaḥ śṛṃgārito'rcito vibhūṣitaḥ || 2 ||
[Analyze grammar]

bhojitaḥ pāyitaścāpi susparśaiḥ raṃjito muhuḥ |
vijñāpitaśca bahudhā ratnādigrahaṇāya saḥ || 3 ||
[Analyze grammar]

rajataṃ vā suvarṇaṃ vā vastraṃ vāhanamāsanam |
yadvā'bhimatamatyarthaṃ grahaṇārthaṃ niveditaḥ || 4 ||
[Analyze grammar]

ṛtadhvajastadā prāhā'śvataraṃ nāgayoginam |
tava prasādād bhagavan ratnādyasti gṛhe mama || 5 ||
[Analyze grammar]

tāte varṣasahasrāṇi śāsatīmāṃ vasundharām |
na nyūnaṃ vidyate kiñcitsvargamanyad gṛhe'sti me || 6 ||
[Analyze grammar]

tatrāpi sāttvatānāṃ tu tṛṇavanmāyikaṃ khalu |
tatra lubdhā janā nūnaṃ dhātṛmāyāsuvaṃcitāḥ || 7 ||
[Analyze grammar]

tavā'nayā sumadhurayā vāṇyā satkṛtiśīlayā |
kṛtakṛtyo'smi bhāvena saphalaṃ jīvanaṃ tu me || 8 ||
[Analyze grammar]

pitrā vai jīvanaṃ sārthaṃ mātrā ca jīvanaṃ sukham |
ārogyeṇa ca rājyena vṛddhānāṃ sevayā tathā || 9 ||
[Analyze grammar]

tvādṛśānāṃ kṛpābhiśca jīvanaṃ sārthakaṃ mama |
aśvatarastadā prāha gārhasthyaṃ bhāryayā sukham || 10 ||
[Analyze grammar]

tat tavāsti na vā saumya vada kiṃ brahmavānasi |
iti pṛṣṭaḥ samuvāca bhāryā mama pativratā || 11 ||
[Analyze grammar]

sutā gandharvarājasya nāmnā khyātā madālasā |
kenāpi kṛtavaireṇa vipralabdhā'tyajat tanum || 12 ||
[Analyze grammar]

tata ārabhya loke me pratijñāṃ kṛtavānaham |
nānyā bhāryā bhavitrī me varjayitvā madālasām || 13 ||
[Analyze grammar]

ityārabhya sadā cāsmi brahmacaryavratānvitaḥ |
brahmacaryeṇa vai lokā vairājāḥ santi nirmitāḥ || 14 ||
[Analyze grammar]

muktiloko brahmacaryaparasyā'sti vinirmitaḥ |
mānuṣasya janerlābhaḥ saṃhitāyāṃ prapaṭhyate || 15 ||
[Analyze grammar]

sa lābho'sti madarthaṃ vā'pyekapatnīvratasya ca |
aśvatarastadā prāha śṛṇu rājakumāraka || 16 ||
[Analyze grammar]

bhāgyena vardhase nityaṃ caikapatnīvratena vai |
pātivratyena te patnī saubhāgyena pravardhate || 17 ||
[Analyze grammar]

yā sā madālasā rājñī śrutvā patyurvināśanam |
samādhinā layaṃ prāptā gatā svaryāmyakaṃ puram || 18 ||
[Analyze grammar]

patimanveṣituṃ naijaṃ dharmarājaśca tāṃ jagau |
patiste vartate sādhvi jīvito yamunātaṭe || 19 ||
[Analyze grammar]

yogāyā'śvatarastasya yatate tiṣṭha vai kṣaṇam |
ityuktā soṣitā tatra mayā taptvā harātkhalu || 20 ||
[Analyze grammar]

varadānaṃ paraṃ prāpya putrīrūpā tava priyā |
āsāditā divyarūpā jātamātrā sukāminī || 21 ||
[Analyze grammar]

tādṛśī tava yogyā ca pūrvaṃ yādṛśyabhūddhi sā |
tvadarthaṃ mānasī kanyā madgehe vartate satī || 22 ||
[Analyze grammar]

tubhyaṃ dānāya saumyā'tra mayā'sti niścitaṃ yataḥ |
tasmāt paśyeha vatsa tvaṃ satīṃ ced draṣṭumicchasi || 23 ||
[Analyze grammar]

anugrāhyo bhavān gehaṃ bālo'pyabhyāgato guruḥ |
ityuktvā tvānayāmāsa tasya putrīṃ madālasām || 24 ||
[Analyze grammar]

prāha seyaṃ na vā vatsa bhāryā te yā madālasā |
sa dṛṣṭvā tāṃ sammukhaṃ drāk hṛṣṭaromā babhūva ha || 25 ||
[Analyze grammar]

ruroda pūrvāṃ saṃsmṛtya premapūritamānasaḥ |
aśvatarastadā kāmaphalaṃ baddhvā kare'sya vai || 26 ||
[Analyze grammar]

agniṃ prajvālya vidhivat kanyāratnaṃ dadau punaḥ |
prāpya bhāryāṃ satīṃ so'pi yautakaṃ ca dhanaṃ bahu || 27 ||
[Analyze grammar]

nāgakanyāstathā'nyāśca dāsīrdāsāṃśca sevakān |
maṇīn hiraṇyabhūṣāṃśca madālasāṃ navīkṛtām || 28 ||
[Analyze grammar]

pratilabhya praṇamyātha nāgeśaṃ śvaśuraṃ muhuḥ |
śālakau dvau samāśliṣya śvaśrū natvā tathā'parān || 29 ||
[Analyze grammar]

nirgataḥ svāyayau naijaṃ puraṃ yānena vāyunā |
āgamya svapuraṃ pitrornatvā sarvamaśeṣataḥ || 30 ||
[Analyze grammar]

kathayāmāsa tanvaṃgī punaḥ prāptā yathā tathā |
nanāma sā ca caraṇau śvaśrūśvaśurayoḥ satī || 31 ||
[Analyze grammar]

anyāṃśca pūjayāmāsa yathānyāyaṃ yathāvayaḥ |
tato mahotsavo jātaḥ paurāṇāṃ sarvathā priyaḥ || 32 ||
[Analyze grammar]

ṛtadhvajaśca suciraṃ tayā reme sumadhyayā |
atha kālena mahatā śatrujinmaraṇaṃ gataḥ || 33 ||
[Analyze grammar]

ṛtadhvajo'bhavadrājā patnīvrataḥ sudhārmikaḥ |
madālasā'bhavad rājñī rājamātā pativratā || 34 ||
[Analyze grammar]

śatasāhasradāsīṣu satīṣvapi madālasā |
lakṣmīvat svapatiṃ nityaṃ siṣeve'ṅgakriyādiṣu || 35 ||
[Analyze grammar]

patiṃ matvā kṛṣṇanārāyaṇarūpaṃ hariṃ prabhum |
sampanmokṣakaraṃ nityasambaddhaṃ sevate sma sā || 36 ||
[Analyze grammar]

bhojayitvā sadā bhuṃkte vastu samarpya sevate |
yuṃkte sā ca svake kārye patiprāsādikaṃ sadā || 37 ||
[Analyze grammar]

prātardhyānaṃ hareḥ pūjāṃ dānaṃ cātmavimarśanam |
atitherbhojanaṃ datvā svātmārthaṃ yukta eva sā || 38 ||
[Analyze grammar]

brahmārpaṇaṃ brahmasevāṃ brahmadhyānaṃ tu sāttvatī |
mahābhāgavatī sādhvī niṣpādya vartate pare || 39 ||
[Analyze grammar]

divāniśaṃ harerlīlākīrtanaṃ sā karoti vai |
anyān śrāvayati hareścamatkārān muhurmuhuḥ || 40 ||
[Analyze grammar]

evaṃ vai vartamānāyāḥ saṃjajñe prathamaḥ sutaḥ |
tasya cakre pitā nāma vikrānta iti dhīmataḥ || 41 ||
[Analyze grammar]

tutuṣustena vai sarve jahāsa ca madālasā |
yasyā brahmasvarūpāyāṃ harṣaśokau samau yataḥ || 42 ||
[Analyze grammar]

putraṃ tu vikramaṃ sādhvī bālamuttānaśāyinam |
rudantamabhiśāntyarthamullāpanamiṣeṇa sā || 43 ||
[Analyze grammar]

smṛtvā hariṃ tathātmānaṃ nityaśuddhaṃ nirañjanam |
putraṃ muktaṃ dehadharmahīnaṃ prāha madālasā || 44 ||
[Analyze grammar]

śuddhaḥ svayaṃ brahmasurūpavānasi |
prakalpitaṃ nāma ca te'dya kṛtrimam |
apūrvadehādikamāptavānasi |
hyaśokano rodiṣi kasya śokavān || 45 ||
[Analyze grammar]

hānau sadā roditi dehadharmavān |
sā na tvayi brahmanirañjane'sti vai |
sadā'si pūrṇo nijatṛptisaṃbhṛtaḥ |
sadā prataptasya kathe nu rodanam || 46 ||
[Analyze grammar]

āgantukā ye tu guṇāḥ sukhādayo |
niyojayantyeva tadiṣṭavedane |
tataḥ pravṛttau ca phale śubhā'śubhe |
asāracakre hi muhuḥ kṣipanti te || 47 ||
[Analyze grammar]

śāntāśca ghorāśca tathā pramūḍhā |
dehā viśeṣāḥ parivarttayanti |
tadvegavegī guṇavegahīno |
mamatvabhāk tāpavibharjitaḥ syāt || 48 ||
[Analyze grammar]

nānena dehena tu kiṃcidasti |
prāptavyamarthaṃ na ca śāśvataṃ vā |
yenā'sti labhyaṃ sa tu nityapūrṇaḥ |
kathaṃ prapūrṇasya nu rodanaṃ te || 49 ||
[Analyze grammar]

labdhaṃ gataṃ sarvamanityametad |
dṛṣṭaṃ mayā janmani cātra tatra |
gatisvabhāvaṃ puru naśvaraṃ ca |
śokāspadaṃ tvaṃ nahi tādṛśo'si || 50 ||
[Analyze grammar]

āste jalaṃ jāyate vardhate ca |
santiṣṭhati kṣīyate nāśameti |
ete tu dharmā hi bhūteṣu santi |
na te kathaṃ kasya hānerhi śokaḥ || 51 ||
[Analyze grammar]

na te'sti vṛddhirna ca te'sti hāni |
stādṛksvabhāve'tra na kaṃcuke tvam |
śokaṃ vrajethāḥ kuru cātmavittiṃ |
naisargikānandamayīṃ praśastim || 52 ||
[Analyze grammar]

tāteti kiñcit tanayeti kañci |
dambeti kāṃcid dayiteti kāṃcit |
mameti kiṃcinna mameti kiṃcid |
bhūtātmakaṃ mā tvayi mānayethāḥ || 53 ||
[Analyze grammar]

bhogaḥ sadā miśrita eva vartate |
miṣṭastathā'miṣṭa iti pratītitaḥ |
vijñasya miṣṭe'pi na miṣṭatā'sti vai |
mūḍhasya duḥkhe'pi na duḥkhatā'sti ca || 54 ||
[Analyze grammar]

ahaṃmametyasti kṛtaṃ navaṃ navaṃ |
gataṃ gataṃ vakti na te'styahaṃmamaḥ |
vṛthā mataṃ duḥkhakaraṃ hi bālyataḥ |
śīrṇe vikāre'pi na tad viyāsyati || 55 ||
[Analyze grammar]

cakṣuśca karṇaśca sunāsikā ca |
mukhaṃ radāstvak śravaṇaṃ manaśca |
jihvā karau pat malamūtramārgau |
nābhiśca nāmāni na te hi santi || 56 ||
[Analyze grammar]

kṣetrāṇi yadvat khalu mṛttikāyāḥ |
sarāṃsi yadvat khalu sajalādyāḥ |
svargāṇi yadvat khalu tejaādyāḥ |
prāṇāśca vātā na hi te tvadīyāḥ || 57 ||
[Analyze grammar]

yathā'tra yāne bahumārgagāmini |
sacetanastvaṃ surathī pragacchasi |
tvadātmake divyacidambarā'nasi |
tathaiva yantā'sti tamacyutaṃ smara || 58 ||
[Analyze grammar]

idaṃ vapurgatvarameva te ca me |
pituśca tadvad gatameva tatpituḥ |
yathaivaṃ bhūtaṃ sadṛśaṃ tu bhāvina |
statolabhasvā'ṅga vapustu śāśvatam || 59 ||
[Analyze grammar]

śrīkṛṣṇanārāyaṇa rādhikāpate |
ramāpate mādhava pārvatīpate |
lakṣmīpate bhaktapate prabhāpate |
raṭāṃga yacchāśvatamāpyase tanum || 60 ||
[Analyze grammar]

na te'sti nidrā na ca te'sti tandrā |
na te'sti mātā na ca me'stiputraḥ |
na te'sti bālyaṃ na ca me'sti vṛddhiḥ |
kramā'kramau brahmaṇi te na me ca || 61 ||
[Analyze grammar]

ātmeti jānanparamātmasevako |
hṛdācitā vā manasā ca vijñayā |
ānandamagno'nubhave'parokṣake |
kārṣṇaṃ rasaṃ cūṣati tṛptimaśnute || 62 ||
[Analyze grammar]

pṛthvyāṃ yathā santi sudolanāṃghrayo |
doloparistaṃbhagatāḥ paṭāṃghrayaḥ |
paṭāntarāle caraṇau tava sthitau |
svadantare yaccaraṇau hi taṃ bhaja || 63 ||
[Analyze grammar]

amūrtake mūrta iva sthitaḥ prabhuḥ |
saṃrakṣako mokṣada īśvareśvaraḥ |
sa eva mātā ca pitā viśāladṛga |
vikrāntanāmā'pi sa eva taṃ bhaja || 64 ||
[Analyze grammar]

ātmā'si mukto'si sadīśvaro'si |
brahmā'si divyo'si sadāsukho'si |
naro'si nārāyaṇarakṣito'si |
nijasvarūpo'si bhajā'kṣareśam || 65 ||
[Analyze grammar]

vidvijñānamityuktaṃ krāntaṃkriyā matā tataḥ |
jñānakriyāyutaścātmā vikrāntaṃ tvaṃ nijaṃ vada || 66 ||
[Analyze grammar]

vipakṣī tasya vai pakṣau saṃkalpaḥ śaktirityamū |
saṃkalpaśaktipakṣābhyāṃ krāntastvaṃ svaṃ nijaṃ vada || 67 ||
[Analyze grammar]

viśca jñānendriyaṃ proktaṃ kraṃ ca karmendriyaṃ tathā |
tayorantargataścātmā vikrāntaṃ tvaṃ nijaṃ vada || 68 ||
[Analyze grammar]

ātmānaṃ tvaṃ vijānīhi dehagehavilakṣaṇam |
saccidānandameveśaṃ śokastvāṃ na spṛśet tataḥ || 69 ||
[Analyze grammar]

ityevaṃ prathamaṃ putraṃ bodhadānena sā satī |
muktaṃ kṛtavatī bālye yogirājaṃ kṛtārthakam || 70 ||
[Analyze grammar]

vardhamānaṃ sutaṃ nityaṃ navaṃ nūtnaṃ prabodhanam |
ātmajñānamayaṃ mātā dadātyullāpanādiṣu || 71 ||
[Analyze grammar]

nirahaṃkāratāṃ prāpto nirmamatvaṃ ca sarvathā |
ātmabalaṃ paraṃ lebhe jñānaṃ lebhe ca sanmayam || 72 ||
[Analyze grammar]

mātā sā jananī saiva yayā bālo'tibodhitaḥ |
muktimārgagataḥ syācca bandhādbhavācca mucyate || 73 ||
[Analyze grammar]

mātṛbhāṣāparibodhe tvātmabodhamavāptavān |
itthaṃ mātrā sa tanayo janmaprabhatibodhitaḥ || 74 ||
[Analyze grammar]

dehasaukhyātigo jāto virāgo viṣayā'hataḥ |
yauvane'pi na rāgātmā dveṣaścāsya na kutracit || 75 ||
[Analyze grammar]

strīpuṃbhāve kuṇape'trā'nitye duḥkhe vināśini |
bhogabuddhiranutpannā brāhmarūpeṇa vartinaḥ || 76 ||
[Analyze grammar]

rūpaṃ rasaṃ tathā gandhaṃ sparśaṃ ca śravaṇaṃ tathā |
anātmīyaṃ paraṃ matvā na babandhāpi tatra vai || 77 ||
[Analyze grammar]

kāye puṣṭe bale jāte balaṃ pāṣāṇavanmatam |
indriyāṇāṃ golakāni koṣṭhalānīva manyate || 78 ||
[Analyze grammar]

evaṃ rāgavihīnaḥ sa nirdvandvaḥ svasvarūpavān |
cakāra na matiṃ prājño gārhasthyaṃ prati nirmamaḥ || 79 ||
[Analyze grammar]

svaśarīre'nahaṃkāro rājye'haṃkāravarjitaḥ |
kṣetre hastini yāne ca vāhane rāṣṭrake tathā || 80 ||
[Analyze grammar]

snehabhāvavihīno'sau bandhanaṃ nā''ptavān kila |
dāseṣu bhṛtyavargeṣu dāsīṣu nagarīṣvapi || 81 ||
[Analyze grammar]

bhavaneṣu vastrabhūṣā'tibhogyavastukeṣvapi |
na vai cakre manaḥ kiñcinmuktavaryo yathā'bhavat || 82 ||
[Analyze grammar]

bhojane ramaṇe pāne khādye jaihvye'pi sarvathā |
rasāsvādavihīno'sau yatirāḍiva lakṣyate || 83 ||
[Analyze grammar]

ratnahārādibhūṣāsu gandhasugandhivastuṣu |
dravadravyeṣu tailādau kajjalādau virāgavān || 84 ||
[Analyze grammar]

pradarśaneṣu mallānāṃ krīḍāsu vārayoṣitām |
gītiṣu nartakīnāṃ ca nṛtyeṣu vimanā iva || 85 ||
[Analyze grammar]

rājñāṃ samāje cotsāhe prajotsaveṣu keliṣu |
araṇyādipravāse'pi mṛgayādau virāgavān || 86 ||
[Analyze grammar]

daṇḍadāneṣu hiṃsreṣu karmasu vyāhṛtau tathā |
vyavahāreṣu ca krūranirdayeṣu virāgavān || 87 ||
[Analyze grammar]

brahmacarye tathā śauce santoṣe tapasi dhruve |
svādhyāye devapūjāyāṃ sadā protsāhavānabhūt || 88 ||
[Analyze grammar]

satye sarvavidhe maune cā'steye mānase bahiḥ |
aparigrahaṇe cāpi dhairye kāmādivarjane || 89 ||
[Analyze grammar]

guroḥ prasevane pitroḥ sevane vṛddhamānane |
atithisvāgate bhaktadarśane mukta eva saḥ || 90 ||
[Analyze grammar]

śraddhāluḥ sarvadā cāste sarvathā cāstikaḥ kṛtiḥ |
vivekī ca vimokāḍhyo brahmābhyāsaparaḥ sadā || 91 ||
[Analyze grammar]

satāṃ sevāparaścāpi sadā harikriyāparaḥ |
kalyāṇakṛtprāṇināṃ ca harṣodvejanavarjitaḥ || 92 ||
[Analyze grammar]

evaṃ sanakatulyaḥ sa vyajāyata śiśutvataḥ |
dṛṣṭvā sutaṃ mahāmuktaṃ vaiṣṇavaṃ paramaṃ samam || 93 ||
[Analyze grammar]

mātā cātīva jahṛṣe pitā'pyānandavānabhūt |
prajā bhṛtyāstathā cānye menire devameva tam || 94 ||
[Analyze grammar]

aṇimā mahimā tvasya garimā laghimā tathā |
prāptiḥ kāmāvasānā ca vaśiteśitvarūpiṇī || 95 ||
[Analyze grammar]

śabdaūhaścādhyayanaṃ duḥkhanāśāstrayastathā |
suhṛtprāptirjñānadānaṃ tathā tārā sutārikā || 96 ||
[Analyze grammar]

sarvā āsan pādayośca siddhaḥ saḥ paramo hyabhūt |
apratihatakāmaḥ sa mukto babhau sujātavat || 97 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye pātāle kṛtadhvajasya madālasālagnitasya pitṛrājyaṃ pratyāgamanaṃ vikramākhyaputrajanma tasmai madālasākṛtavivekopadeśa ityādinirūpaṇanāmā trinavatyadhikatriśatatamo'dhyāyaḥ || 393 ||
[Analyze grammar]