Chapter 392

śrīnārāyaṇa uvāca |
ākarṇaya mahāpadme lakṣmi pāpavināśinīm |
kathāṃ śāntikarīṃ ramyāṃ śṛṇvatāṃ mokṣakāriṇīm || 1 ||
[Analyze grammar]

pūrve yuge mahāvīryaḥ śatrujinnāmabhūpatiḥ |
babhūva yajñakṛt yatra tuṣṭā devāḥ savāsavāḥ || 2 ||
[Analyze grammar]

tasya putro mahāvīryo babhūva devavīryavān |
ṛtadhvaja itikhyāto vyomacārī sa yogirāṭ || 3 ||
[Analyze grammar]

siddhibhiḥ sevitaḥ śaśvadvijñānaguṇasāgaraḥ |
yasya nā'viditaṃ kiñcit pāṇḍityaṃ sarvato'dhikam || 4 ||
[Analyze grammar]

tasya kīrtiṃ parāṃ śrutvā caturdaśastarā'dhipāḥ |
ṛṣayo munayo nāgā āyānti darśanāya vai || 5 ||
[Analyze grammar]

kasyacittvatha kālasya nāgalokānmahītalam |
kumārāvāgatau nāgau putrāvaśvatarasya tu || 6 ||
[Analyze grammar]

brahmarūpapraticchannau taruṇau priyadarśanau |
darśanaṃ satkṛtiṃ kṛtvā yayatuścāgatau punaḥ || 7 ||
[Analyze grammar]

evaṃ nityaṃ bahuprītyā''yayaturyayatuḥ sadā |
sa ca tābhyāṃ nṛpasutaḥ paramānandamāptavān || 8 ||
[Analyze grammar]

vinā tābhyāṃ na bubhuje na sasnau na papau madhu |
na rarāma na jagrāha kiñcittābhyāṃ vinā sutaḥ || 9 ||
[Analyze grammar]

api tau bahulaṃ kālaṃ kumārāgre hi ninyatuḥ |
ekadā tatra pātāle pitā tau nāgabālakau || 10 ||
[Analyze grammar]

papraccha martyaloke nau mitratā kena vartate |
yatra yuvāṃ bahukālaṃ yāpayathaḥ suputrakau || 11 ||
[Analyze grammar]

tāvūcatuḥ śatrujitaḥ putro nāmnā ṛtadhvajaḥ |
rūpavānārjavopeto vidvānmaitro guṇākaraḥ || 12 ||
[Analyze grammar]

prabhorbhaktaścātitheyastena copahṛtaṃ manaḥ |
tadviyogena naustāta na sukhaṃ jāyate'tra vai || 13 ||
[Analyze grammar]

pitā prāha sa dhanyo'sti yasyaivaṃ guṇakīrtanam |
parokṣasyāpi guṇibhiḥ kriyate dhanyajīvanam || 14 ||
[Analyze grammar]

yasya mitraguṇān mitrāṇyamitrāṇi parākramam |
kathayanti sabhādau vai putravāṃstena vai pitā || 15 ||
[Analyze grammar]

tasya niṣpāditaṃ putrau kiñcittoṣāya cetasaḥ |
madgṛhe yatsuvarṇādi ratnaṃ vāhanamāsanam || 16 ||
[Analyze grammar]

yattvanyat prītaye tasya taddeyamaviśaṃkayā |
upakārakṛto devāstasyecchanti sadonnatim || 17 ||
[Analyze grammar]

āhatuśca sutau tāta yāni ratnāni tadgṛhe |
vāhanāsanayānāni bhūṣaṇānyambarāṇi ca || 18 ||
[Analyze grammar]

tāni santi na trailokye jñānaṃ nānyatra tatsamam |
ekaṃ tasyāsti kartavyaṃ tattvasādhyaṃ prabhuṃ vinā || 19 ||
[Analyze grammar]

pitā prāha kimasādhyaṃ durlabhaṃ vyavasāyinaḥ |
udyatānāṃ na tvagamyaṃ nā'prāpyaṃ divi ceha vā || 20 ||
[Analyze grammar]

tasmāt kathayata putrāvavagacchāmyasādhyakam |
prāhatuḥ pitaraṃ putrau kadācid gālavo dvijaḥ || 21 ||
[Analyze grammar]

samāyayau śatrujitaṃ gṛhītvā turagottamam |
prāhāśrame mama kaścid daityaḥ khādati prāṇinaḥ || 22 ||
[Analyze grammar]

tathā karoti vighnāni dhyāne maune ca me'pi saḥ |
bhasmīkaromi kopena yadi tarhi tapaḥkṣayaḥ || 23 ||
[Analyze grammar]

rājñā tasmāddhi daityānāṃ nāśaḥ kāryo hi dharmataḥ |
ekadā sa mayā rājan daityaṃ nirīkṣya duḥkhataḥ || 24 ||
[Analyze grammar]

niḥśvāsaḥ prahitastāvadvyomnaścāyaṃ turaṃgamaḥ |
sūryeṇa preṣitaścāyāt trailokyā'hatasañcaraḥ || 25 ||
[Analyze grammar]

parvateṣu samudreṣu pātāleṣvanaleṣu ca |
nityaṃ bhūvalayaṃ sarvamaśrānto'yaṃ cariṣyati || 26 ||
[Analyze grammar]

ataḥ kuvalayo nāmnā khyātiṃ loke gamiṣyati |
daityaṃ cainaṃ samāruhya ṛtadhvajo haniṣyati || 27 ||
[Analyze grammar]

putramājñāpaya rājan yathā dharmo na lupyate |
sa tasya vacanād rājā taṃ vai putramṛtadhvajam || 28 ||
[Analyze grammar]

tamaśvaratnamāropya kṛtakautukamaṃgalam |
apreṣayat muninā saha munyāśramaṃ yayau || 29 ||
[Analyze grammar]

ṛtadhvajaśca vighnāni nāśayāmāsa cāśrame |
daityaḥ sa śaukaraṃ rūpaṃ dhṛtvā dharṣayitumṛṣim || 30 ||
[Analyze grammar]

āgatasta samālakṣya śīghramāruhya taṃ hayam |
anvadhāvad varāhaṃ taṃ ṛtadhvajaḥ śarāsanī || 31 ||
[Analyze grammar]

bāṇāhato mṛgo dhāvan praviveśa mahāṭavīm |
trastaḥ papāta vivare timiraughasamākule || 32 ||
[Analyze grammar]

tamanu rājaputro'pi hantuṃ papāta vājiyuk |
varāho'dṛśyatāṃ prāpto rājaputrastu śobhitam || 33 ||
[Analyze grammar]

pātāle samapaśyadvai sauvarṇasaudhasaṃkulam |
saprākāraṃ puraṃ riktamapaśyattad viveśa saḥ || 34 ||
[Analyze grammar]

tatra yoṣidvarā dṛṣṭā sā taṃ ninye gṛhāntaram |
tasmai bhavanabhūmau vai paryaṃke sarvakāṃcane || 35 ||
[Analyze grammar]

darśayāmāsa yuvatīṃ kanyāṃ pīnapayodharām |
bimbādharauṣṭhīṃ tanvaṃgīṃ nīlotpalavilocanām || 36 ||
[Analyze grammar]

raktatuṃganakhīṃ mṛdvīṃ svarṇavarṇāṃ śubhālakām |
sā bālāpi rājasutaṃ dṛṣṭvā śobhānvitaṃ tadā || 37 ||
[Analyze grammar]

mumoha kṣobhamāptā sā samaicchannṛpatiṃ patim |
ṛtadhvajena saṃpṛṣṭā vṛttāntaṃ naijamāha sā || 38 ||
[Analyze grammar]

viśvāvasuriti khyāto divi gandharvarājakaḥ |
tasyā'hamātmajā rājan nāmnā khyātā madālasā || 39 ||
[Analyze grammar]

pativratā patiprāṇā patyarthaṃ sarvadā sthitā |
pratīkṣe matpatiṃ prāṇasamaṃ yogyaṃ hi mānavam || 40 ||
[Analyze grammar]

ahamudyānagā cā'saṃ puṣpārthaṃ tāvadeva mām |
pātālaketurdanujo'pahṛtya nītavāniha || 41 ||
[Analyze grammar]

āgāminyāṃ trayodaśyāṃ matpāṇigrahaṇāya saḥ |
samudyato'sti taṃ rājan vārāharūpamāśritam || 42 ||
[Analyze grammar]

kenāpi viddhaṃ bāṇaiśca munīnāṃ trāṇakāraṇāt |
pracchannaṃ vartamānaṃ taṃ hatvā māṃ naya bhūpate || 43 ||
[Analyze grammar]

kastvaṃ ko'si vada śīghraṃ jñāto'pi tu viśeṣataḥ |
svīyavṛttaprakāśena premapātraṃ bhaviṣyasi || 44 ||
[Analyze grammar]

devo daityo nu gandharvaḥ pannagaḥ kinnaro'pi vā |
tat tvamākhyāhi yāvadvai yathā me'vitathaṃ manaḥ || 45 ||
[Analyze grammar]

tataḥ prasannaḥ kuvalayāśvaḥ ṛtadhvajo jagau |
rājñaḥ śatrujitaḥ putro gālavāśramamāgataḥ || 46 ||
[Analyze grammar]

śaukararūpadaityasya mannārācahatasya ca |
pṛṣṭhaṃ pradhāvya garte'tra pātāle patito'smyaham || 47 ||
[Analyze grammar]

ṛtadhvajo'smi nāmnāhaṃ kuvalayāśva ityapi |
ityetat kathitaṃ vṛttaṃ na devo'haṃ na dānavaḥ || 48 ||
[Analyze grammar]

na pannago na gandharvaḥ kinnaro na śucismite |
manuṣyo'smi tava rakṣāṃ kariṣye daityataḥ priye || 49 ||
[Analyze grammar]

ityāśrutya tu kanyā sā prahṛṣṭā pulakāñcitā |
yadarthaṃ nirmitā cā'haṃ so'yaṃ prāpto mumoda sā || 50 ||
[Analyze grammar]

prāha cainaṃ hṛdayaṃ me tvayi sthairyaṃ prapaśyati |
jātismarāpya'haṃ rājaṃstavaivā'smi smarāmi ca || 51 ||
[Analyze grammar]

candramevopaiti kāntiḥ samupaiti raviṃ prabhā |
bhūtirdhanyaṃ dhṛtirdhīraṃ kṣāntirabhyeti sajjanam || 52 ||
[Analyze grammar]

gṛhāṇa māṃ priyāṃ kānta śīghraṃ nāśaya rākṣasam |
ṛtadhvajastadā prāha paravānahamasmi vai || 53 ||
[Analyze grammar]

kiṃ karomi vinā''jñāṃ tu pitrornā'smi tathākriyaḥ |
satī madālasā prāha sādhayāmi piturvacaḥ || 54 ||
[Analyze grammar]

ityuktvā sā jalaṃ nītvā kare sasmāra tumburum |
tumbururdrāk samāyāto natvā prāha satīṃ kutaḥ || 55 ||
[Analyze grammar]

smṛto'haṃ vad deveśi sādhayāmi kṣaṇena tat |
madālasā kulaguruṃ tumburumavadad guro || 56 ||
[Analyze grammar]

tūrṇaṃ yāhi śatrujitaṃ nivedaya madālasām |
ṛtadhvajaṃ patiṃ kartuṃ samicchatyanumodaya || 57 ||
[Analyze grammar]

tumbarurvyomamārgeṇa tvantardhānākhyavidyayā |
śatrujitaṃ prati gatvā vinivedya hyudantakam || 58 ||
[Analyze grammar]

ājñāṃ tasya samāgṛhya pragṛhītasamitkuśaḥ |
madālasāyāḥ samprītyā prāptastatra punaḥ kṣaṇāt || 59 ||
[Analyze grammar]

prajvālya pāvakaṃ hutvā mantravit kṛtamaṃgalām |
kanyāṃ vivāhavidhinā dadau ṛtudhvajāya saḥ || 60 ||
[Analyze grammar]

jagāma tapase tumbururmuniḥ svāśramaṃ punaḥ |
kanyā''ha tāṃ striyaṃ śāntāṃ kṛtārthā'smi varānane || 61 ||
[Analyze grammar]

ājñāpaya ca māṃ mātargantuṃ patyurgṛhaṃ prati |
kuṇḍalā sā tadovāca kṛtārthā syāḥ pativrate || 62 ||
[Analyze grammar]

tīrthā'mbudhūtapāpā'pi bhavitrī nedṛśī yathā |
saṃyuktā'nena saṃpūtā jātā saṃsāratāriṇī || 63 ||
[Analyze grammar]

kathayāmyatha nau kiñcat snehabhārapraṇoditā |
bhartavyā rakṣitavyā ca bhāryā hi patinā sadā || 64 ||
[Analyze grammar]

dharmārthakāmasaṃsiddhyai bhāryā bhartṛsahāyinī |
yatra bhāryā ca bhartā ca mithomitho'nuvartinau || 65 ||
[Analyze grammar]

tatra dharmārthakāmānāṃ mokṣasyā'pyasti saṃgatiḥ |
bhāryā tathaiva bhartāramṛte dharmādisādhane || 66 ||
[Analyze grammar]

mokṣārthe vā divi satye vairāje vā bhuvastale |
na samarthā yato dharmacatuṣṭayamubhāśritam || 67 ||
[Analyze grammar]

devatāpitṛbhṛtyānāmatithīnāṃ ca pūjanam |
naikena śakyate kartuṃ dāmpatyaṃ tatra kāraṇam || 68 ||
[Analyze grammar]

prāpto'pi cārtho manujairānīto'pi nijaṃ gṛham |
kṣayameti vinā bhāryā kubhāryāsaṃśraye'pi vā || 69 ||
[Analyze grammar]

etanmayoktaṃ yuvayordāmpatyaṃ śāśvataṃ tathā |
vardhatāmanayā sārdhaṃ dhanaputrasukhāyuṣā || 70 ||
[Analyze grammar]

tvaṃ tu kanye madālase tyaktvā patyurmadālasā |
bhavā'nena ca kāntena sārdhaṃ svargād garīyasī || 71 ||
[Analyze grammar]

ityuktvā virarāmaiva ṛtadhvajo madālasā |
kuṇḍalāṃ tāṃ pariṣvajya samāruhya turaṃgamam || 72 ||
[Analyze grammar]

utpapātā'mbaramārge daityā dṛṣṭvā vicukruśuḥ |
kanyāratnaṃ yadānītaṃ hriyate hriyate divam || 73 ||
[Analyze grammar]

tiṣṭha tiṣṭheti jalpanto vavṛṣuḥ śarajālakam |
ṛtadhvajo'pi ciccheda śarajālaṃ tu līlayā || 74 ||
[Analyze grammar]

tato'straṃ tvāṣṭramādāya cikṣepa prati dānavān |
tena te dānavāḥ sarve sphuṭadasthicayāḥ kṛtāḥ || 75 ||
[Analyze grammar]

strīratnena saha tūrṇaṃ samāgacchat svakaṃ puram |
praṇipatya ca tatsarvaṃ sa svapitre nyavedayat || 76 ||
[Analyze grammar]

pitā śrutvā''ha taṃ premṇā pariṣvajya suputrakam |
satputreṇa tvayā putra tārito'haṃ mahātmanā || 77 ||
[Analyze grammar]

bhayebhyo munayastrātāḥ kanyā'pi rakṣitā''hṛtā |
yadupāttaṃ yaśaḥ pitrā dhanaṃ vīryamathā'param || 78 ||
[Analyze grammar]

tadvīryādadhikaṃ kuryād vardhayed yastu śaktimān |
navaṃ niṣpādayatyenaṃ pravadanti narottamam || 79 ||
[Analyze grammar]

taddhanyo'smīdṛśaṃ putraṃ prāpyāha puṇyaśālinām |
suślāghyo'smyadya saṃjātastvayā saddharmaśālinā || 80 ||
[Analyze grammar]

yaḥ svaparākramairhīnaḥ prajñādānavṛṣādibhiḥ |
dhigjanma tasya yaḥ pitrā loke vijñāyate janaḥ || 81 ||
[Analyze grammar]

ātmanā khyātimān śreṣṭho madhyaḥ pitṛpitāmahaiḥ |
mātṛpakṣeṇa mātrā ca khyātimeti narādhamaḥ || 82 ||
[Analyze grammar]

tatputra dhanavīryaistvaṃ vivardhasva sukhena tu |
gandharvatanayā ceyaṃ mā tvayā vai viyujyatām || 83 ||
[Analyze grammar]

iti pitrā ca mātrā ca priyamuktaṃ punaḥ punaḥ |
gālavenarṣiṇā cāpi hyāśīrvādāḥ samarpitāḥ || 84 ||
[Analyze grammar]

putraśca bhāryayā sārdhaṃ rājyadharmān gṛhāśramam |
pālayan vardhayan snehaṃ reme sādhvyā samaṃ sukhī || 85 ||
[Analyze grammar]

śvaśrūśvaśurayoḥ pādau praṇipatya madālasā |
pativratā satī reme jātismarā svarakṣiṇā || 86 ||
[Analyze grammar]

evaṃ kāle bahutithe gate rājā punaḥ sutam |
prāha gacchāśu viprāṇāṃ trāṇāya cara medinīm || 87 ||
[Analyze grammar]

aśvamenaṃ samāruhya bhramaṇaṃ kuru maṇḍale |
durvṛttebhyo dānavebhyo munīnāṃ ca satāmapi || 88 ||
[Analyze grammar]

na syād bādhā yathā putra rakṣaṇaṃ tvaṃ tathā kuru |
sa tu pitruktarītyaiva cacāra medinīṃ muhuḥ || 89 ||
[Analyze grammar]

yamunāyāstaṭe daityaṃ tālaketuṃ dadarśa saḥ |
vārāharūpadaityasyā'nujaṃ munisvarūpiṇam || 90 ||
[Analyze grammar]

sa daityaḥ prāha taṃ tatra pūrvavairamanusmaran |
rājaputra muniścāsmi yakṣye yajñena tatra ca || 91 ||
[Analyze grammar]

hiraṇyaṃ dehi me kaṇṭhabhūṣaṇaṃ tava yadvaram |
rakṣa mamā''śramaṃ cemaṃ yāvadantarjale'pyaham || 92 ||
[Analyze grammar]

varuṇaṃ vaidikairmantrairabhiṣṭūyaimi cāśramam |
ityuktavate munaye saḥ prādāt kaṇṭhabhūṣaṇam || 93 ||
[Analyze grammar]

prāha sthāsyāmyatra tāvad yāvadāgamanaṃ tava |
ityuktaḥ saḥ kapaṭarṣirdaityo mamajja vāriṇi || 94 ||
[Analyze grammar]

madālasāyāḥ pratyakṣamudgataścoktavān rudan |
vīraḥ kuvalayāśvaḥ sa mamāśramasamīpataḥ || 95 ||
[Analyze grammar]

kenāpi duṣṭadaityena bhinnaḥ śūlena vakṣasi |
mṛto dadau tu me kaṇṭhabhūṣaṇaṃ bhasmitaḥ sa ca || 96 ||
[Analyze grammar]

aśvaṃ jahāra daityaḥ saḥ sarvaṃ mayā'valokitam |
gṛhāṇa devi te bhūṣāṃ kriyatāṃ cottarakriyām || 97 ||
[Analyze grammar]

ityuktvotsṛjya tadbhūmau sa jagāma yathāgatam |
madālasā tathānye ca śrutvā cakrurvilāpanam || 98 ||
[Analyze grammar]

nirgamya ca bahiḥsnātā daduḥ putrāya vāryapi |
pativratā tu sañcintya vinā patimamaṃgalām || 99 ||
[Analyze grammar]

kṛtvā samādhiṃ hṛdye vahnimutpādya cāntaram |
śarīraṃ vilayīkṛtya svargaṃ yātā hi sundarī || 100 ||
[Analyze grammar]

vicinvānā patiṃ naijaṃ nā'vāpa tatra sā tataḥ |
yamarājaṃ prati gatvā papraccha kvā'sti me patiḥ || 101 ||
[Analyze grammar]

dharmarājastadā prāha jīvito'sti yamītaṭe |
tava saṃjīvanārthaṃ ca pātāle tvatpatipriyaḥ || 102 ||
[Analyze grammar]

suhṛnnāgastapaścaryāṃ karoti śaṃkaropari |
tāvadadṛśyarūpā tvaṃ mama dharmālaye vasa || 103 ||
[Analyze grammar]

iti sā coṣitā dharmabhavane cātra bhūtale |
tālaketuḥ sa daityastu nirgatya yamunājalāt || 104 ||
[Analyze grammar]

rājaputraṃ samuvāca kṛtārtho'haṃ tvayā kṛtaḥ |
gaccha gṛhamidānīṃ tvamiti śrutvā sa taṃ ṛṣim || 105 ||
[Analyze grammar]

praṇipatya samāruhya tvaśvaṃ prāyāt puraṃ svakam |
janān dadarśodvignān prāk prahṛṣṭāsyāṃstataḥ punaḥ || 106 ||
[Analyze grammar]

aho vighnaṃ gataṃ tvasya vidyate jīvavānayam |
mṛtyuvārtā mṛṣā jātā ciraṃ jīva kumāraka || 107 ||
[Analyze grammar]

iti śrutvā pauravācaḥ praviveśa piturgṛham |
mumudire pitā mātā bāndhavāḥ suhṛdo janāḥ || 108 ||
[Analyze grammar]

madālasāmanādṛṣṭvā papraccha pitaraṃ sutaḥ |
jñātvā vṛttāntamaghaṭaṃ śuśoca kṣaṇameva saḥ || 109 ||
[Analyze grammar]

punaḥ sa cintayāmāsa parisaṃstabhya mānasam |
mṛteti sā mannimittaṃ tyajāmi yadi jīvitam || 110 ||
[Analyze grammar]

kiṃ mayopakṛtaṃ patnyā patinā pāralaukikam |
ato'tra manye kartavyastyāgo bhogasya yoṣitaḥ || 111 ||
[Analyze grammar]

tasyā muktiryathā syādvai tatkartavyaṃ japādikam |
anyā bhāryā na kartavyā brahmacaryadhṛtā mayā || 112 ||
[Analyze grammar]

yadi madālasā nātra bhāryā me'sti tato dhruvam |
anyāyāśca patirnāsti patnīvrataḥ ṛtadhvaja || 113 ||
[Analyze grammar]

tāmṛte mṛgaśāvākṣīṃ gandharvatanayāmaham |
na bhokṣye yoṣitaṃ kāciditi satyaṃ vadāmyaham || 114 ||
[Analyze grammar]

saddharmacāriṇīṃ patnīṃ tāṃ muktvā''haṃ pativratām |
kāṃcinnāṃgīkariṣyāmītyetat satyaṃ vadāmyaham || 115 ||
[Analyze grammar]

iti śrutvā putrayośca vacanaṃ nāgarāṭ svayam |
tapaścaryāṃ parāṃ kṛtvā varaṃ prāpya ca śaṃkarāt || 116 ||
[Analyze grammar]

ṛtadhvajāya dātavyā punā rājñī madālasā |
yatra sṛṣṭau tu sā tvāste tasmādādāya sarvathā || 117 ||
[Analyze grammar]

iti pratijñāṃ kṛtavān putrāvāpṛcchya vai tataḥ |
tīrthaṃ himavato gatvā tapastepe sudāruṇam || 118 ||
[Analyze grammar]

aśvataraḥ sa nāgendrastuṣṭāva tapasā haram |
prātarniśāyāṃ madhyāhne sandhyayoścāpi tatparaḥ || 119 ||
[Analyze grammar]

tasya kālena mahatā prāheśo gṛhyatāṃ varaḥ |
praṇamyā'śvataraḥ prāha varamenaṃ prayaccha me || 120 ||
[Analyze grammar]

mṛtā kuvalayā'śvasya patnī sādhvī madālasā |
tenaiva vayasā sadyo duhitṛtvaṃ prayātu me || 121 ||
[Analyze grammar]

jātismarā yathāpūrvaṃ tadvatkāntisamanvitā |
yoginī yogamātā ca madgehe jāyatāṃ satī || 122 ||
[Analyze grammar]

haraḥ prāha tathā'stvetat sarvaṃ te vai bhaviṣyati |
matprasādādasandigdhaṃ śrāddhaṃ kuru tadicchayā || 123 ||
[Analyze grammar]

bhakṣayethāḥ prasādaṃ ca tataste madhyamāt phaṇāt |
samutpatsyati kalyāṇī patidharmā madālasā || 124 ||
[Analyze grammar]

sā tu sādhvī dharmarājabhavane'dya virājate |
pratīkṣate punarjanma jātismaraṃ patiṃ punaḥ || 125 ||
[Analyze grammar]

sā ca te bhāvinī putrī ṛtadhvajasya kāminī |
ityuktvā śaṃkarastatra tirodadhe'tha sarparāṭ || 126 ||
[Analyze grammar]

rasātale gṛhaṃ gatvā cakāra śrāddhamarpitam |
piṇḍaṃ ca madhyamaṃ tadvad yathāvadupabhuktavān || 127 ||
[Analyze grammar]

tāvattāṃ dharmarājo'pi prāha gaccha rasātalam |
tatrā'śvataranāgeśaḥ smaratyeva suputrikām || 128 ||
[Analyze grammar]

bhava divyā manojanyā jātamātrā suyauvanā |
varārohā sukanyā cā''pnuhi sveṣṭamṛtadhvajam || 129 ||
[Analyze grammar]

ityuktā śrāddhataḥ paścāt sā''gatā ca janiṃ gatā |
śuśubhe dvyaṣṭavarṣāvadyathāpūrvā hi sundarī || 130 ||
[Analyze grammar]

pratīkṣate tu sā kāntaṃ tryavasthāsu madālasā |
tadā sa nāgarāḍaśvataraḥ prāha svaputrakau || 131 ||
[Analyze grammar]

sa rājaputro yuvayorupakārī mamāntikam |
kasmānnānīyate vatsau dṛṣṭavyo'sti mamā'pi saḥ || 132 ||
[Analyze grammar]

evamuktau sutau gatvā kṛtvā kiñcitkathāntaram |
abrūtāṃ praṇayopetaṃ svagehagamanaṃ prati || 133 ||
[Analyze grammar]

ṛtadhvajaḥ svakaṃ matvā samutthāya varāsanāt |
pitaraṃ pādayornatvā yayau nāgapuraṃ saha || 134 ||
[Analyze grammar]

tābhyāṃ nāgakumārābhyāṃ nagarī darśitā śubhā |
kumāraistaruṇairvṛddhairuragairdivyavarṣmabhiḥ || 135 ||
[Analyze grammar]

mohakṛnnāgakanyābhiḥ krīḍantībhiḥ suśobhitā |
tataḥ ṛtadhvajastābhyāṃ praviveśa niveśanam || 136 ||
[Analyze grammar]

dadarśa mitrapitaraṃ maṇikuṇḍaladhāriṇam |
divyamālāmbarabhūṣaṃ surūpaṃ divyadevavat || 137 ||
[Analyze grammar]

svacchamuktāphalalatāhārihāropaśobhitam |
keyūriṇaṃ mahāśreṣṭhāsane sarvasukāñcane || 138 ||
[Analyze grammar]

maṇividrumavaiḍūryajālāntaritarūpake |
samāsīnaṃ suputrābhyāṃ ṛtadhvajāya darśitam || 139 ||
[Analyze grammar]

rājaputro nanāmainaṃ mitrayoḥ pitaraṃ muhuḥ |
rājaputraṃ balādgāḍha nāgendraḥ pariṣasvaje || 140 ||
[Analyze grammar]

mūrdhni cainamupāghrāya ciraṃ jīvetyuvāca saḥ |
nihatā'mitravargaśca pitroḥ śuśrūṣaṇaṃ kuru || 141 ||
[Analyze grammar]

vatsa dhanyasya kathyante matputrābhyāṃ tu te guṇāḥ |
jīvitaṃ guṇinaḥ ślāghyaṃ jīvanneva mṛto'guṇaḥ || 142 ||
[Analyze grammar]

devatāḥ pitaro viprā mitrārthibāndhavā'hitāḥ |
svepare'nye tathecchanti jīvitaṃ guṇinaściram || 143 ||
[Analyze grammar]

parivādanivṛttānāṃ durgateṣu dayāvatām |
guṇināṃ saphalaṃ janma tvādṛśānāṃ nṛpātmaja || 144 ||
[Analyze grammar]

evamuktvā snāpayitvā śṛṃgārayitvā bhāvataḥ |
madhupānādisaṃbhogān dāpayitvā'danaṃ tathā || 145 ||
[Analyze grammar]

tarpayitvā'nnapeyādyairviśrāntiśayanaṃ dadau |
sevārthaṃ nāgakanyāśca preṣayāmāsa nāgarāṭ || 146 ||
[Analyze grammar]

pariśrānto'tha nṛpajaḥ suṣvāpa sukhanidrayā |
sevayāmāsuratyarthaṃ kanyāḥ saṃvāhanādibhiḥ || 147 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye śatrujitputrasya ṛtadhvajasya aśvataranāgaputrābhyāṃ mitratā daivivājiprāptiḥ gālavāśrame vighnakartāraṃ daityaṃ hantuṃ pātāle praveśaḥ sa tatra nagare madālasāmapaśyat pātālaketuṃ daityaṃ jaghāna madālasāmudvahat tumburuṃ kuṇḍalāṃ |
cāpṛcchya svagṛhāgamanam yamunātaṭe tālaketuṃ kapaṭinaṃ jaghāna madālasāmaraṇam kumāratapaścaryā madālasāyā aśvataragṛhe'vataraṇam ṛtadhvajamāhūya punarmadālasādānamityādinirūpaṇanāmā dvānavatyadhikatriśatatamo'dhyāyaḥ || 392 ||
[Analyze grammar]