Chapter 390

śrīnārāyaṇa uvāca |
śrūyatāṃ ca tvayā lakṣmi kathā vaikuṇṭhalokagā |
mama janmajayantyā utsave nṛtye susaṃbhavā || 1 ||
[Analyze grammar]

kārtikasyā'dhavalasya pakṣasya tvaṣṭamītithau |
kṣmāyāṃ prāvirabhuvaṃ kambharāgopālayo'rgṛhe || 2 ||
[Analyze grammar]

tannimittaṃ mahaṃ cakrurvaikuṇṭhe mama pārṣadāḥ |
pārṣadāṇyaśca bhaktāśca vaikuṇṭhaṃ sotsavaṃ hyabhūt || 3 ||
[Analyze grammar]

maṇḍapāḥ kāritā ramyāḥ svarṇakalaśaśobhitāḥ |
kadalyādistambhayuktā'śokapatrāditoraṇāḥ || 4 ||
[Analyze grammar]

vidyutpradīpaśobhāḍhyāḥ śrutiyantrādirājitāḥ |
raṃgānuraṃgasaccitrahārālidivyatānvitāḥ || 5 ||
[Analyze grammar]

siṃhāsanādiśobhāḍhyā bhojyapeyādiśobhanāḥ |
nṛtyamaṇḍapabhāgāḍhyā nartakīgaṇasaṃśritāḥ || 6 ||
[Analyze grammar]

gandharvāśritasadvādyā devarṣigaṇamaṇḍalāḥ |
gṛhāṇyapi vicitrāṇi bhavanāni kṛtāni ca || 7 ||
[Analyze grammar]

śṛṃgāritāni divyāni rathyāmārgāḥ svalaṃkṛtāḥ |
āvāsāḥ saṃskṛtāḥ sarve narā nāryaḥ svalaṃkṛtāḥ || 8 ||
[Analyze grammar]

khānabhojanapeyādisamutsavapraphullitāḥ |
gāvaḥ śṛṃgāritāḥ kanyā vastrabhūṣādiśobhitāḥ || 9 ||
[Analyze grammar]

ajīrāṇi dadhiraṃgaiścūrṇairmaṇḍalitāni ca |
vādyānyapi pratigṛhaṃ samavādyanta tanmahe || 10 ||
[Analyze grammar]

gītayaścāpi śrūyante sarvavaikuṇṭhavāsiṣu |
prātaḥ savitṛsauvarṇe cāmbare'thābhikāśite || 11 ||
[Analyze grammar]

divyāramāprabhālakṣmīmāṇikīpārvatīśriyaḥ |
kṛṣṇanārāyaṇaṃ naijaṃ svāminaṃ parameśvaram || 12 ||
[Analyze grammar]

saṃsnāpyāmṛtavārbhiśca sugandhasāracandanaiḥ |
tailasārādibhirvāsayitvā vastravibhūṣaṇaiḥ || 13 ||
[Analyze grammar]

ratnahīrakamaṇyādihāraiḥ kusumavastubhiḥ |
makuṭakuṇḍalahārakaṭakaśṛṃkhalādibhiḥ || 14 ||
[Analyze grammar]

ūrmikānūpurairyaṣṭikuṇḍalaistilakādibhiḥ |
śobhito bhagavānnātho dāsībhiśca camatkṛtaḥ || 15 ||
[Analyze grammar]

patnībhiḥ sahitaḥ svasya pārṣadaiścāpi koṭibhiḥ |
kanyābhirdāsadāsībhirmuktaiḥ sabhāṃ samāyayau || 16 ||
[Analyze grammar]

jayaśabdā hyabhavaṃścā'vākiran kusumā'kṣataiḥ |
lājābhiḥ kusumairdravyaiḥ svarṇamudrādibhiḥ priyā || 17 ||
[Analyze grammar]

cakrurguṇadhvaniṃ vetrahārāḥ karṇamanoharam |
namanti sma sabhāsaṃsthā vīkṣante vaikuṇṭhaprajāḥ || 18 ||
[Analyze grammar]

pūjayanti kramāt sarve bhāgavatāstu pārṣadāḥ |
sarvā muktāśca muktānyaḥ kṛṣṇapatnyaśca dāsikāḥ || 19 ||
[Analyze grammar]

kanyakāśca prajāḥ sarvā vaikuṇṭhavāsino janāḥ |
tilakena lalāṭe ca darbhadānena karṇayoḥ || 20 ||
[Analyze grammar]

puṣpāñjalyā mastake ca gucchena karayostathā |
hārālibhiḥ kaṇṭhadeśe jalena kṛṣṇapādayoḥ || 21 ||
[Analyze grammar]

namanena tasya hṛdi premṇā nārāyaṇātmani |
upadābhiścaraṇāgre pūjayitvā ca saṃsadi || 22 ||
[Analyze grammar]

yathāsthānaṃ sthitāḥ sarve nṛtyaṃ prāvartatā'dbhutam |
gāndharvā gāyanaṃ cakrurvādayāmāsurīśvarāḥ || 23 ||
[Analyze grammar]

gāyikāścābhyanujagustāladāstālamācaran |
nāradādyāśca tatrāsan vipracītyādikāḥ striyaḥ || 24 ||
[Analyze grammar]

ṛṣayo munayo devāḥ samājagmurmahotsave |
athātra samaye kanyā sāttvatapārṣadasya vai || 25 ||
[Analyze grammar]

kanyāśatayutā śṛṃgāritā nārāyaṇasya tu |
pūjāṃ kartuṃ samāyātā dvyaṣṭavarṣātisundarī || 26 ||
[Analyze grammar]

pārṣadastatra śrīkṛṣṇanārāyaṇasya pārśvagaḥ |
gāndharvajātīyavaryo gāndharvaḥ saliladyumān || 27 ||
[Analyze grammar]

cakame tāṃ varārohāṃ dṛṣṭvā cañcalanetrakaḥ |
kanyā kṛṣṇaṃ pūjayitvā jalaṃ kṛṣṇasya pādayoḥ || 28 ||
[Analyze grammar]

dhṛtvā mukhe kṣitau śeṣaṃ smṛtvā gāndharvameva sā |
śaśāpa tvaṃ kṣīṇadhano mānavo bhava cañcalaḥ || 29 ||
[Analyze grammar]

gāndharvo'pi sukanyāyāścikīrṣitaṃ dadarśa tat |
śaśāpa tāṃ tvamapi prakṣīṇadravyaṃ tu mānavī || 30 ||
[Analyze grammar]

cañcalā'nuprayāhyasmāt sthānād yāvat samānavaḥ |
ityabhidhāya natvā taṃ yayau nārāyaṇaṃ gṛham || 31 ||
[Analyze grammar]

tāvat pṛthvyāṃ patito'sau cyavano'bhūdayonijaḥ |
araṇye vyacarannityaṃ salile'pi sthito'bhavat || 32 ||
[Analyze grammar]

jātismaro jaraddeho vyacaraccyavano muniḥ |
vaṃśastambāśritaḥ pṛthvyāṃ tapastepe sa dāruṇam || 33 ||
[Analyze grammar]

valmīkastasya śirasi vaṃśastambo'pyajāyata |
sukanyā sāttvataputrī mahānte bhavanaṃ yayau || 34 ||
[Analyze grammar]

pitaraṃ prāha tatsarvaṃ sāttvato haripārṣadaḥ |
sāntvayāmāsa putrīṃ svāṃ prāha kanyāṃ sulocanām || 35 ||
[Analyze grammar]

śokaṃ mā kuru putri tvaṃ tvadarthaṃ cāpyahaṃ bhuvi |
dvitīyena svarūpeṇa cakravartī bhavāmi vai || 36 ||
[Analyze grammar]

paścāttvaṃ tu samāyāhi tvadduḥkhaṃ nāśayāmyaham |
ityuktvā sāttvataḥ pṛthvyāṃ śaryātirabhavannṛpaḥ || 37 ||
[Analyze grammar]

paramo bhaktarāḍ rājā brahmiṣṭho brāhmaṇapriyaḥ |
jātismaro vaiṣṇavaśca sūryodayāstabhūprabhuk || 38 ||
[Analyze grammar]

vaikuṇṭhasya kṣaṇe yāte sukanyā bhuvamāgatā |
śaryātirlakṣavarṣo'bhūccyavanastu dvilakṣakaḥ || 39 ||
[Analyze grammar]

śaryātestu gṛhe kanyā mānasī putrikā'bhavat |
divyā divyaramātulyā yathā vaikuṇṭhavāsinī || 40 ||
[Analyze grammar]

nārāyaṇaparā nityaṃ śubhā pitrostu sevikā |
pātivratyaparāsarvacamatkārātiśālinī || 41 ||
[Analyze grammar]

jātismarāvane'raṇye tīrthe bhūmau ca parvate |
samudre cāmbare svarge pātāle sainyakṛdraṇe || 42 ||
[Analyze grammar]

sarvatra vyomagā divyā yayau rājño'nuyāyinī |
smarati sma saliladyuṃ tapantaṃ vaṃśavistare || 43 ||
[Analyze grammar]

tayā sārdhaṃ vanaṃ yāto rājā sainyena saṃyutaḥ |
sakhībhiḥ sahitā sā ca vicinvānā sumāni vai || 44 ||
[Analyze grammar]

yayau yatra tapasvyāste bhāvisevāśrayo muniḥ |
yāmyāṃ dṛṣṭā caṃcalābhyāṃ netrābhyāṃ te dadarśa sā || 45 ||
[Analyze grammar]

valmīkarandhrake ramye śubhe cañcatsutārake |
daivapreraṇayā bālā'vidhyatkaṇṭakayojite || 46 ||
[Analyze grammar]

susrāvā'sṛk tato sainyasyā'bhūnmūtrādirodhanam |
śaryātistadvilokyā''ha sainikān duḥkhitān muhuḥ || 47 ||
[Analyze grammar]

daivībhūmiriyaṃ kācid devā vā munayo'thavā |
tāpasā vā rākṣasā vā'vaśyaṃ syuratra sadvane || 48 ||
[Analyze grammar]

kasyā'pyatrā'parādho vai mayā sainyena kāritaḥ |
anyathā na bhaved yāvatsainyamūtrādirodhanam || 49 ||
[Analyze grammar]

yatkiṃcidvā yathā yadvā tadvā kvāpi ca kiṃcana |
yadi jātaṃ kenaciccā'vaśyaṃ prakāśyameva tat || 50 ||
[Analyze grammar]

yadvayaṃ tatpratīkāraiḥ rakṣitāḥ syāma aiśvarāt |
tadā jātismarā kanyā sukanyā pitaraṃ jagau || 51 ||
[Analyze grammar]

vaṃśastambe'tra yugalaṃ jyotirmayaṃ nibhālitam |
mayā valmīkavivare nirbhinnaṃ kaṇṭakena ca || 52 ||
[Analyze grammar]

tato'sṛṅnirgataṃ rājan manye tadaparādhanam |
etadvijñāya rājā'pi sasmāra sāttvataḥ svayam || 53 ||
[Analyze grammar]

saliladyuṃ ca sukanyāṃ ca vaikuṇṭhe śāpaśāradām |
duhiturvacanaṃ śrutvā rājā valmīkasannidhau || 54 ||
[Analyze grammar]

yayau prasādayāmāsa valmīkāntarhitaṃ munim |
prāha dehī sukanyāṃ me mūtrarodhādi naśyati || 55 ||
[Analyze grammar]

tathāstviti nṛpaḥ prāha cyavanaścotthito mṛdaḥ |
vaṃśastambena śirasi śṛṃgavatsa vyarājata || 56 ||
[Analyze grammar]

tatraiva duhitā tasmai pradattā sūryasākṣiṇā |
svasthaṃ cābhūcca tatsainya yayau rājā gṛhaṃ svakam || 57 ||
[Analyze grammar]

cyavanastapasā vyāptaḥ śuṣkanāḍīśarīrakaḥ |
tatrāśrame parṇakuṭyāṃ rukṣo vṛddho'vasattathā || 58 ||
[Analyze grammar]

sukanyā cyavanaṃ prāpya patiṃ paramakopanam |
prīṇayāmāsa cittajñā samayajñā'nusevayā || 59 ||
[Analyze grammar]

śarīraṃ mardayāmāsa vṛddhasya svāminaḥ satī |
tailena puṣpasāreṇa sugandhacandanādibhiḥ || 60 ||
[Analyze grammar]

uṣṇodakena snapanaṃ kārayāmāsa bhāvataḥ |
vastrāṇi cārpayāmāsa dhārayāmāsa cānvaham || 61 ||
[Analyze grammar]

vanyaṃ phalaṃ kaṇaṃ kandaṃ bhojayāmāsa saddalam |
pāyayāmāsa madhuraṃ jalaṃ prasravaṇā''hṛtam || 62 ||
[Analyze grammar]

śāyayāmāsa kadalīdalakṛcchayane satī |
agniṃ prajvālyāgnihotraṃ kārayāmāsa sadrasaiḥ || 63 ||
[Analyze grammar]

atithīn sevayāmāsa darśanārthaṃ samāgatān |
devasevāṃ tulasyāśca patraiśca kamalaiḥ satī || 64 ||
[Analyze grammar]

kārayāmāsa vidhinā phalairjalaiśca śraddhayā |
samidhaścānayāmāsa pārśvapavitravṛkṣajān || 65 ||
[Analyze grammar]

gītikāṃ kīrtanaṃ jñānaṃ śrāvayāmāsa kaṇṭhataḥ |
evamṛṣeranuvṛttyā prīṇayāmāsa sā satī || 66 ||
[Analyze grammar]

pātivratyaṃ paraṃ prāptā vinā kāmasukhaṃ satī |
ekadā cintayāmāsa vṛddhasya śuṣkavarṣmaṇaḥ || 67 ||
[Analyze grammar]

ṛṣerdehasya kalpārthaṃ sasmārāśvikumārakau |
sukanyayā smṛtau sūryaputrau kṣaṇādupasthitau || 68 ||
[Analyze grammar]

vaidyau tāṃ prāhaturnamrau vada mātarnamo'stu te |
sukanyā''ha ṛṣervarṣma mama yogyaṃ yathā bhavet || 69 ||
[Analyze grammar]

sundaraṃ yauvanopetaṃ sabalaṃ vīryavattamam |
tathā dattaṃ vayo matsvāmine bhogasamarthakam || 70 ||
[Analyze grammar]

tathāstviti samuccāyī'śviputrau cyavanāya vai |
natvā tasmācca vavrāte somabhāgaṃ kratau sadā || 71 ||
[Analyze grammar]

ṛṣirbāḍhaṃ tu tau prāha tataścaitau rasāyanaiḥ |
tatraiva nirmite kuṇḍe pūrṇe cā'snāpayadṛṣim || 72 ||
[Analyze grammar]

ṛṣirviṃśativarṣo vai yuvā devīpramohakaḥ |
māṃsalaḥ sundaro ramyaḥ pūrṇasaṃbhṛtavīryakaḥ || 73 ||
[Analyze grammar]

rasāyanaistu sañjāto na dṛṣṭo na śrutaḥ purā |
purā sukanyayāpi tadrūpaṃ na dṛṣṭaṃ na śrutaṃ purā || 74 ||
[Analyze grammar]

kanyāyāḥ pātivratyasya parīkṣārthaṃ ca tāvapi |
vaidyau rūpāntare dhṛtvā rasāyanena miśritau || 75 ||
[Analyze grammar]

yūnā muninā saṃyuktau samarūpau babhūvatuḥ |
paśyantyā kanyayā kuṇḍād dṛṣṭāḥ samuttthitāstrayaḥ || 76 ||
[Analyze grammar]

puruṣāḥ sadṛśākārāḥ kuṇḍalinaḥ suvāsasaḥ |
sugandhavyāptaśarīrā lāvaṇyarasavārdhayaḥ || 77 ||
[Analyze grammar]

divyasragdhāriṇastejobhiśca sūryā ivā'pare |
ajānatī patiṃ sādhvī dadhyau dhyānena taṃ patim || 78 ||
[Analyze grammar]

katamotra ṛṣirbodhyo yasyā'smyahaṃ pativratā |
varaṇīyaḥ sa evā'dya tyājyau dvau ca tadanyakau || 79 ||
[Analyze grammar]

vicāryeti satī svasmāccharīrācca mahānalam |
samutpādyā'nalavyāptā yayau tāṃstrīṃ parīkṣitum || 80 ||
[Analyze grammar]

uvācāgniṃ vinā kāntaṃ prajvālaya tadanyakau |
tāvadvahnirvavalge tāvanyau jvālābhireva vai || 81 ||
[Analyze grammar]

bhasmīkartuṃ muniṃ tyaktvā tāvaccukruśatuśca tau |
jājvalyamānā'vayavau vavandāte bhiṣaktamau || 82 ||
[Analyze grammar]

rakṣārthaṃ cakraturyāñcāṃ satyā vahnirnivāritaḥ |
pātivratyena satyena cyavane mālikā'rpitā || 83 ||
[Analyze grammar]

pātivratyaṃ paraṃ jñātvā santuṣṭau tvaśviputrakau |
ṛṣimāmantrya yayatuḥ satīṃ natvā triviṣṭapam || 84 ||
[Analyze grammar]

atharṣiścyavanaḥ svasya śvaśuraṃ bhūbhṛtaṃ prati |
vaninaṃ preṣayāmāsā''kārayāmāsa tadvane || 85 ||
[Analyze grammar]

śaryātiḥ suprasannātmā''yayau ṛṣivarāśramam |
dṛṣṭvā yuvānaṃ dihutuḥ pārśve rūpāntarānvitam || 86 ||
[Analyze grammar]

rājā''ścaryasamāpanno babhūvodvignamānasaḥ |
putrī svapitaraṃ dṛṣṭvā samutthāya natiṃ vyadhāt || 87 ||
[Analyze grammar]

rājā prāha tadā putrīṃ muniṃ vṛddhaṃ vihāya kim |
jāraṃ saṃsevase bhartuḥ piturnipātyase kulam || 88 ||
[Analyze grammar]

adhikṣiptā janakena putrī prasannamānasā |
uvāca tāta jāmātā tavaiṣaścyavano muniḥ || 89 ||
[Analyze grammar]

śaśaṃsa sarvavṛttāntaṃ muniḥ prāha nṛpaṃ tataḥ |
svāgataṃ te'stu sāmrājyaṃ nirvidhnaṃ cāstu sarvathā || 90 ||
[Analyze grammar]

yajñaṃ kuru mahārāja somā'bhidhaṃ mamā''jñayā |
aśvinorasomapayordehi somagrahaṃ kratau || 91 ||
[Analyze grammar]

cakāra yajñaṃ rājā'sau cyavanaḥ svena tejasā |
akārayat somapānaṃ tvaśvinorvaidyayostadā || 92 ||
[Analyze grammar]

indro vajraṃ samudyamya hantuṃ muniṃ samāgataḥ |
savajraṃ staṃbhayāmāsa cyavanaḥ sa harerbhujam || 93 ||
[Analyze grammar]

anvajānaṃstataḥ sarve sadā somagrahāviti |
vaidyau kaniṣṭhāviti yat pūrvaṃ matvā bahiṣkṛtau || 94 ||
[Analyze grammar]

tatastau svargatau rājā dadau bhūyasī dakṣiṇāḥ |
devaviprā'tithibhyaśca cyavanaḥ svāśramaṃ yayau || 95 ||
[Analyze grammar]

śaryāterabhavatputrastvānarttaḥ kṛṣṇabhaktimān |
golokāt sa maṇeḥ khaṇḍaṃ kṛṣṇadattaṃ samānayat || 96 ||
[Analyze grammar]

so'yamānartadeśo'sti saurāṣṭraḥ paścimābdhibhāg |
ānartād revato jāto nirmame sa kuśasthalīm || 97 ||
[Analyze grammar]

tasya jātaḥ kakudmī ca yasya kanyā tu revatī |
yātā pitrā saha satye loke praṣṭuṃ pitāmaham || 98 ||
[Analyze grammar]

yogyaṃ patiṃ tu kaṃ lapsye tatra prāha pitāmahaḥ |
kṣaṇe kāle'tra saṃyāte pṛthivyāṃ saptaviṃśatiḥ || 99 ||
[Analyze grammar]

caturyugānāṃ cātītā mūlā ādyā nṛpādayaḥ |
tadvaṃśavaṃśavaṃśyānāmapi cihnaṃ na vidyate || 100 ||
[Analyze grammar]

tasmād dehi kṛṣṇabhrātre baladevāya me matam |
ityuktaḥ sa samāgatya baladevāya tāṃ dadau || 101 ||
[Analyze grammar]

kakudmī tu tapaḥ kartuṃ naranārāyaṇāśramam |
badaryākhyaṃ yayau bheje kṛṣṇanārāyaṇaṃ sadā || 102 ||
[Analyze grammar]

iti te kathitaṃ lakṣmi pātivratyaparāyaṇam |
camatkāraṃ sukanyāyā paṭhanācchravaṇādapi || 103 ||
[Analyze grammar]

pāpanāśastathā muktirbhuktiśca vardhate'dhikā |
kānte kṛṣṇe'tigā lakṣmi phalaṃ sevākṛtaṃ labhet || 104 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vaikuṇṭhe śrīkṛṣṇanārāyāṇasyorjā'dhavalā'ṣṭamyāṃ jayantyutsave nṛtyādiyoge saliladyugāndharvasya sāttvatakanyāyāḥ sukanyāyāḥ cañcalanetradarśanakṛtaśāpena parasparaṃ pṛthivyāmāgatya cyavanatvaṃ śaryātikanyātvaṃ ca tato vane cyavananetrayoḥ kaṇṭakāgreṇa sphoṭane sainyamalamūtrādinirodhaḥ kanyāyāñcā ca cyavanagārhasthyam aśvinīkumāradvārā navayauvanam pātivratyaparīkṣaṇam |
vaidyayoḥ somayāge somabhāgagrāhitvam śaryātiputra ānartastasya kakudmī tasya revatyā baladevena vivāhanaṃ cetyādinirūpaṇanāmā navatyadhikatriśata |
tamo'dhyāyaḥ || 390 ||
[Analyze grammar]