Chapter 382

śrīnārāyaṇa uvāca |
śṛṇu lakṣmi pravakṣyāmi pātivratyaṃ paraṃ tava |
māṃ vihāya kadāpi tvaṃ tiṣṭhase na janāntare || 1 ||
[Analyze grammar]

yatra yatrāsti meṃ'śo vai tatra tatrāsi cāṃśataḥ |
pātivratyaṃ paraṃ mukhyaṃ dharmaṃ dhṛtvā hi vartase || 2 ||
[Analyze grammar]

ahaṃ cāpi hṛdi rakṣan patnīvrataparāyaṇaḥ |
vartāmi ca tvayi lakṣmi sarvātmanā''ntare bahiḥ || 3 ||
[Analyze grammar]

madicchātaḥ purā jātā lakṣmīstvaṃ hṛdayād bahiḥ |
vaikuṇṭhe tvaṃ tato jātā satī nārāyaṇapriyā || 4 ||
[Analyze grammar]

goloke rādhikārūpā kṛṣṇapriyā'si sarvadā |
śrīśca tvaṃ vartase cā'vyākṛte dhāmni mama priyā || 5 ||
[Analyze grammar]

śvetadvīpe'pi me patnī kṣīrābdhau tvaṃ ramāsi me |
prabhā ca pārvatī cāsi mama dhāmni cidambare || 6 ||
[Analyze grammar]

māṇikī ca varārohā sarvadā'si mamā''sanam |
kṣīrābdhau tvaṃ tato jātā jātā kedāraputrikā || 7 ||
[Analyze grammar]

bhṛgoḥ khyātyāṃ samutpannā jātā padmā tathā priyā |
anaraṇyagṛhe tvaṃ vai dharaṇyāṃ cāpi me priyā || 8 ||
[Analyze grammar]

tathā tvaṃ kambharālakṣmīrjātā saurāṣṭrake śubhe |
sā tvaṃ nityā jaganmātā viṣṇoḥ śrīranapāyinī || 9 ||
[Analyze grammar]

kṛṣṇanārāyaṇasakthni vāme gaurasvarūpiṇī |
vartase tvaṃ sadā lakṣmīradṛśyā sevikā satī || 10 ||
[Analyze grammar]

yathā sarvagataścā'haṃ tathā sarvagatā'si vai |
na tvāṃ vinā kvaciccāhaṃ māṃ vinā tvaṃ na ca kvacit || 11 ||
[Analyze grammar]

apṛthakasiddhatādātmyaṃ vartate lakṣmi nau sadā |
sadā sarvatra sarvā'si sarvaścāsmi tathāpyaham || 12 ||
[Analyze grammar]

patitvaṃ me sadā te ca patnītvaṃ sarvadā priye |
karmaṇā manasā vācā varṣmaṇā guṇacintanaiḥ || 13 ||
[Analyze grammar]

jāgrati svāpane ghore suṣuptāvapi turyake |
sthāne cātmani sarvatra viṣaye vilaye tathā || 14 ||
[Analyze grammar]

sṛṣṭau laye cidākāśe jaḍe cetanavargake |
kārye vā kāraṇe lakṣmi sadā tvaṃ me pativratā || 15 ||
[Analyze grammar]

patnīvratastathā'jasraṃ bhavāmyeva na saṃśayaḥ |
ahaṃ viṣṇuśca sarvatra vyāpako'smi satī sadā || 16 ||
[Analyze grammar]

tvaṃ tatra vyāpinī devī mama śaktisvarūpiṇī |
akṣareśo'pyahaṃ tvaṃ cākṣarī bhavasi matpriyā || 17 ||
[Analyze grammar]

mukteśo'haṃ yadā lakṣmi muktānī tvaṃ hi vartase |
jayā ca lalitā tvaṃ vai harikṛṣṇastadā'pyaham || 18 ||
[Analyze grammar]

aha cārthastvaṃ ca vāṇī nītistvaṃ ca nayo'smyaham |
bodhaścāhaṃ tvaṃ ca buddhirdharmo'haṃ tvaṃ ca satkriyā || 19 ||
[Analyze grammar]

sraṣṭā cāhaṃ tvaṃ ca sṛṣṭirbhūmistvaṃ bhūedharo'smyaham |
santoṣo'ha tvaṃ ca tuṣṭiḥ kāmo'haṃ tvaṃ ca kāmanā || 20 ||
[Analyze grammar]

yajño'haṃ dakṣiṇā vai tvaṃ vedo'haṃ tvaṃ ca vedikā |
ājyāhutistvamevāsi puroḍāśo'smi vai tadā || 21 ||
[Analyze grammar]

patnīśālā tvamevā'si prāgvaṃśo'haṃ bhavāmi ca |
yūpo'haṃ ca citistvaṃ ca tvamidhmā ca kuśo'smyaham || 22 ||
[Analyze grammar]

udgītistvaṃ ca sāmā'haṃ tvaṃ svāhā'haṃ hutāśanaḥ |
gaurī tvaṃ śaṃkaraścāhaṃ tvaṃ prabhā'haṃ divākaraḥ || 23 ||
[Analyze grammar]

ahaṃ pitṛṇastvaṃ ca svadhā śāśvatapuṣṭidā |
ākāśo'haṃ tathā tvaṃ dyauścandro'haṃ tvaṃ ca kaumudī || 24 ||
[Analyze grammar]

vāyuścā'haṃ dhṛtistvaṃ vai velā tvaṃ sāgaro'smyaham |
indrāṇī tvaṃ mahendro'haṃ dhūmorṇā tvaṃ yamo'smyaham || 25 ||
[Analyze grammar]

ṛddhistvaṃ ca kubero'haṃ gaurī tvaṃ varuṇo'smyaham |
devasenā tvamevā'si senānyahaṃ ca kārtikaḥ || 26 ||
[Analyze grammar]

avaṣṭaṃbho'smyahaṃ yatra tatra śaktistvameva me |
tvaṃ kāṣṭhā'si nimeṣo'smi muhūrto'haṃ kalāsi me || 27 ||
[Analyze grammar]

tvaṃ jyotsnā'haṃ pradīpo'smi drumo'haṃ tvaṃ latāsi vai |
divaso'haṃ niśā tvaṃ ca vadhūstvaṃ ca varo'smyaham || 28 ||
[Analyze grammar]

nado'haṃ tvaṃ nadīrūpā patākā tvaṃ dhvajo'smyaham |
lobho'haṃ tvamasi tṛṣṇā rāgo'haṃ tvaṃ ratirmatā || 29 ||
[Analyze grammar]

devatiryaṅmanuṣyādau māyā tvaṃ māyiko'smyaham |
durvāsaḥśāpatastvaṃ tu mahendrādriṃ vihāya vai || 30 ||
[Analyze grammar]

samude'tīva saṃmagnā punaścāvirbabhūvitha |
tvaṃ siddhistvaṃ padminī ca khyātyāṃ lakṣmīrbhṛgoḥ sutā || 31 ||
[Analyze grammar]

narmadāyāstaṭe tvaṃ tu bhārgavī divyavigrahā |
jātamātrā yuvatī tvaṃ tepiṣe duṣkaraṃ tapaḥ || 32 ||
[Analyze grammar]

nārāyaṇaḥ patirme'stu caturbāhuḥ svayaṃ hariḥ |
iti varṣā'yutaṃ sādhvi tvayā taptaṃ paraṃ tapaḥ || 33 ||
[Analyze grammar]

nityaṃ ṣoḍaśavarṣīyā vṛddhihāsavivarjitā |
tejomaṇḍalamadhyasthā bhṛgukṛcchocchrayasthitā || 34 ||
[Analyze grammar]

varṣasahasraṃ pañcāgnau tapaścakartha dāruṇam |
tato varṣasahasraṃ vai taṇḍulāhārakaṃ tapaḥ || 35 ||
[Analyze grammar]

tato varṣasahasraṃ vai phalāhāraparāyaṇā |
tato varṣasahasraṃ vai kandāhāraparāyaṇā || 36 ||
[Analyze grammar]

tato varṣasahasraṃ vai patrāhāraparāyaṇā |
tato varṣasahasraṃ tvaṃ śuṣkapatraparāyaṇā || 37 ||
[Analyze grammar]

tato varṣasahasraṃ tvaṃ jalaphenaparāyaṇā |
tato varṣasahasraṃ tvaṃ kvacijjalaparāyaṇā || 38 ||
[Analyze grammar]

tato varṣasahasraṃ tvaṃ dhūmrabāṣpaparāyaṇā |
tato varṣasahasraṃ vai vāyupānaparāyaṇā || 39 ||
[Analyze grammar]

ekādaśe sahasre tvaṃ sarvendriyanirodhinī |
brahmaraṃdhraṃ samāsādya samādhiṃ mayi cāgatā || 40 ||
[Analyze grammar]

tvayā stuto'pyahaṃ neti vivāhārthaṃ jagād ha |
tvayā prāṇān parityaktuṃ jñāpayitvā drutaṃ tu me || 41 ||
[Analyze grammar]

brahmarandhraṃ samuddhāṭya yāvadūrdhvaṃ gatiḥ kṛtā |
tāvanmayā samāgatya punā randhre niveśitā || 42 ||
[Analyze grammar]

tvayoktaṃ tu tadā lakṣmi yā tvaṃ me patirbhava |
tadā rodhaya me prāṇānanyathā tvaṃ viyojaya || 43 ||
[Analyze grammar]

vihasya sāśrunetro'haṃ premapulakitāṃ'gakaḥ |
hṛṣṭaromā svedagātro'bhavamāśliṣṭavānapi || 44 ||
[Analyze grammar]

proktavāṃstvaṃ nivartasva tapasaścātidāruṇāt |
yāvatsṛṣṭirbrahmalokastāvatpatnīṃ karomi vai || 45 ||
[Analyze grammar]

gaccha tvaṃ pitaraṃ lakṣmi mātaraṃ vada sarvathā |
āgacchati vivāhārthaṃ kṛṣṇanārāyaṇaḥ prabhuḥ || 46 ||
[Analyze grammar]

ityuktā tvaṃ samutthāya natvā spṛṣṭvā''nanaṃ mama |
sarvaṃ samarpitaṃ kṛtvā gatā svapitṛmandiram || 47 ||
[Analyze grammar]

ahaṃ yātaśca vaikuṇṭhaṃ tadā sasmāra nāradam |
saptarṣīn rādhikāṃ śrīṃ ca māṇikīṃ pārvatīṃ prabhām || 48 ||
[Analyze grammar]

te sarve tu samāgatya papracchuḥ kāraṇaṃ tu mām |
mayā gadito vṛttānto bhārgavīyogasaṃbhavaḥ || 49 ||
[Analyze grammar]

narmadāyāstaṭe ramye bhagurbrāhmaṇasattamaḥ |
divyaṃ varṣasahasraṃ tu samupāste haraṃ prabhum || 50 ||
[Analyze grammar]

valmīkāvasthitaścāsau dakṣiṇaṃ ca niketanam |
taṃ dhyāyati samādhistho varaṃ prārthayate tathā || 51 ||
[Analyze grammar]

āścaryaṃ tu mahajjātamumāyāḥ śaṃkarasya ca |
gaurī pṛcchati śaṃbhuṃ tu valmīkastho'yamasti kaḥ || 52 ||
[Analyze grammar]

śaṃbhuḥ prāha bhṛgurnāmā ṛṣīṇāṃ pravaro muniḥ |
varaṃ dhyāyati tapati prārthayatyeva śaṃkarāt || 53 ||
[Analyze grammar]

tadā prahasitā gaurī śaṃkaraṃ pratyabhāṣata |
dhūmavattu śikhā jātā tato'dyāpi na tuṣyasi || 54 ||
[Analyze grammar]

durārādhyo'si me nātha kathamevaṃ tu vartase |
śivaḥ prāha mahādevi bhṛguḥ krodhena ceṣṭitaḥ || 55 ||
[Analyze grammar]

darśayāmi tathā tathyaṃ priyaṃ te ca karomyaham |
smārito devadevena dharmarūpo vṛṣastadā || 56 ||
[Analyze grammar]

smaraṇād devadevasya vṛṣaḥ śīghramupasthitaḥ |
vadate mānuṣīṃ vācamādeśo dīyatāṃ prabho || 57 ||
[Analyze grammar]

valmīkaiśchādito vipraḥ eva bhūmau nipātaya |
yogasthastu tato dhyāyaṃstatastena nipātitaḥ || 58 ||
[Analyze grammar]

tatkṣaṇāt krodhasantapto hastamutkṣiptavān vṛṣam |
eṣa saṃbhāṣamāṇaśca kutra gacchasi bho vṛṣa || 59 ||
[Analyze grammar]

adya tvāmatra pāpmānaṃ pratyakṣaṃ hanmyahaṃ vṛṣa |
dharṣitastu tadā vipro hyantarikṣagataṃ vṛṣam || 60 ||
[Analyze grammar]

ākāśe prekṣate vipro hyetadadbhutamuttamam |
tataḥ prahasite rudre ṛṣiragre vyavasthitaḥ || 61 ||
[Analyze grammar]

tṛtīyaṃ locanaṃ dṛṣṭvā vailakṣyāt patito bhuvi |
praṇamya daṇḍavat bhūmau stauti śrīparameśvaram || 62 ||
[Analyze grammar]

alīkāhaṃkārayuktaṃ kṣaṇabhaṃguravaibhavam |
krūraṃ kupathapatitaṃ trāhi māṃ parameśvara || 63 ||
[Analyze grammar]

śīghraṃ harasva me tṛṣṇāṃ lakṣmīṃ dehi ca hṛcchrayām |
chindhi pāśān bhavajātān samuddhāraya śaṃkara || 64 ||
[Analyze grammar]

rudravedī bhavedeṣā nārāyaṇasvarūpiṇī |
yadi tuṣṭo'si viśveśa caitatsampādayasva me || 65 ||
[Analyze grammar]

tathāstviti tadā prāha śaṃbhurlokahitāya vai |
nārāyaṇī mahālakṣmīḥ putrī te'tra bhaviṣyati || 66 ||
[Analyze grammar]

krodhasthānaṃ rudravedī bhṛgukṣetraṃ bhaviṣyati |
na pitā putrayoścātra hyekavākyaṃ bhaviṣyati || 67 ||
[Analyze grammar]

ityuktvā ca harastasmāttirobhūcca bhṛgorgṛhe |
divyā saṃkalpajā putrī lakṣmīrjātā'tiśobhanā || 68 ||
[Analyze grammar]

khyātiḥ putrīmatī jātā puṣpavṛṣṭirdivaukasām |
babhūva cotsavaścāpi vaikuṇṭhamiva bhūrabhūt || 69 ||
[Analyze grammar]

tadā prabhṛti brahmādyāḥ sarve devāḥ sakinnarāḥ |
upāsate bhṛgostīrthaṃ tuṣṭo yatra maheśvaraḥ || 70 ||
[Analyze grammar]

nityaṃ yatrā'bhavallakṣmīrbhārgavī vai narāyaṇī |
nārāyaṇaṃ patiṃ labdhuṃ tapastepe'tidāruṇam || 71 ||
[Analyze grammar]

ahaṃ tuṣṭaśca tapasā'yutavarṣottaraṃ yayau |
tasyai paṇaṃ mayā dattaṃ vivāhāya tato mayā || 72 ||
[Analyze grammar]

gantavyaṃ vai bhṛgukṣetraṃ vararūpeṇa vai yataḥ |
vaikuṇṭhāttu gamiṣyāmaḥ kurvantu sajjatāṃ priyāḥ || 73 ||
[Analyze grammar]

bhṛgutuṃge munivaryo bhṛguḥ khyātyā virājate |
aṣṭāśītisahasraiśca brahmarṣibhistapodhanaḥ || 74 ||
[Analyze grammar]

tato dūraṃ narmadāyāstaṭe viṣṇurvirājite |
pañcāśadyojane bhāge viṣṇutīrthe vayaṃ khalu || 75 ||
[Analyze grammar]

vaikuṇṭhaṃ kārayitvaiva pārthivaṃ viśvakarmaṇā |
sthāsyāmaśca trayastriṃśatkoṭi devā api priyāḥ || 76 ||
[Analyze grammar]

devatīrthe taṭe tatra naḥ sthāsyanti pravāhitaḥ |
ṛṣitīrthe ca ṛṣayo mānavāścakratīrthake || 77 ||
[Analyze grammar]

śuklatīrthe ca kṛṣṇādyāḥ sarve vai parameśvarāḥ |
brahmatīrthe tathā muktāḥ sthāsyanti mahīmānakāḥ || 78 ||
[Analyze grammar]

evaṃ vai nārmade deśe vatsyāmo vayamādarāt |
kārtikyāṃ ca kariṣyāmo vaikuṇṭhaṃ tatra nūtanam || 79 ||
[Analyze grammar]

māghyāṃ vivāhavidhaye yāsyāmo bhṛgupattanam |
iti sarvān vinirdiśya kṛṣṇanārāyaṇaḥ prabhuḥ || 80 ||
[Analyze grammar]

āhūya pṛthivīṃ devīṃ samājñāpayadacyutaḥ |
kuru revātaṭaṃ riktaṃ śatayojanavistaram || 81 ||
[Analyze grammar]

samatalaṃ samudyānairvyavasthitaiḥ suśobhitam |
sarvakhādyakhaniyuktāḥ śālāstatra ca kāraya || 82 ||
[Analyze grammar]

vastūni cāpi sarvāṇi tatropasthāpaya priye |
sasyānnāni phalapatrakandamūlāni sarvathā || 83 ||
[Analyze grammar]

veṣavārāṇi divyāni gandhacūrṇāni yāni ca |
miṣṭānnāni ca mṛṣṭāni śarkarādīni cāpi vai || 84 ||
[Analyze grammar]

upasthāpaya te garbhe gahvareṣu bahūni ca |
bhava divyā mama yogād vaikuṇṭhābhā vasundharā || 85 ||
[Analyze grammar]

ityāśīrvādamādāya bhūmistatra samāgatā |
śatayojanavistāre bhūgarbhe sarvasampadaḥ || 86 ||
[Analyze grammar]

racayitvā nidhāyaiva svasthā cāste mudānvitā |
varuṇaṃ jaladevaṃ ca samāhūya narāyaṇaḥ || 87 ||
[Analyze grammar]

ādideśā'mṛtādīnāṃ peyānāṃ payasāmapām |
dadhnāṃ ca mādakānāṃ ca ghṛtānāṃ rasināṃ tathā || 88 ||
[Analyze grammar]

madhūnāṃ gūḍavārīṇāṃ drumāṇāṃ rasaśālinām |
somavallīkalpalatākalpadrumādisampadām || 89 ||
[Analyze grammar]

rasānāṃ ca pravāhāṇāṃ peyānāṃ vipulān hradān |
kartuṃ bhartuṃ dideśā'pi so'pi gatvā tathā'karot || 90 ||
[Analyze grammar]

sūryaṃ candraṃ vidyutaśca vāḍavāgniṃ mahānalam |
kṛṣṇanārāyaṇaścājñāpayāmāsa mahānasān || 91 ||
[Analyze grammar]

pākaśālā vividhāśca vahniśālāśca bāṣpadāḥ |
kartuṃ racayituṃ tatra śītoṣṇakuṇḍavaibhavān || 92 ||
[Analyze grammar]

dīpapradīpaśobhāśca candrikāśītalaprabhāḥ |
sphītālokānmahālokānandhakāraprakalpakān || 93 ||
[Analyze grammar]

kaṇḍanīḥ peṣaṇīścullīścodakuṃbhīśca mārjanīḥ |
divyā divyadravopetāḥ kartuṃ dideśa keśavaḥ || 94 ||
[Analyze grammar]

vāyuṃ tathā samāhūya prāṇāṃśca marutastathā |
vyajanānāṃ ca tālānāṃ mandasugandhaśālinaḥ || 95 ||
[Analyze grammar]

śītān vāyūn kvacittūṣṇān kartumajījñapaddhariḥ |
ākāśaṃ ca samāhūya cidākāśamathā'karot || 96 ||
[Analyze grammar]

vibhūtiṃ tatra saṃpreṣya vaikuṇṭhānyamathā'karot |
meghānprāha hariḥ kṛṣṇaśchatrāṇi racayantviti || 97 ||
[Analyze grammar]

indraṃ rājopakaraṇānyāhartuṃ prāha mādhavaḥ |
kuberaṃ sarvaratnāḍhyayantrānayanamādiśat || 98 ||
[Analyze grammar]

yamaṃ prāha mahāsainyaṃ śobhārthaṃ kuru cāgragam |
śaṃbhuṃ prāha haristatra sagaṇaṃ nartanāya vai || 99 ||
[Analyze grammar]

vādyānāṃ vādanārthaṃ tu sarasvatyai nyavedayat |
maṇḍapānāṃ racanārthaṃ dideśa viśvakarmaṇe || 100 ||
[Analyze grammar]

śobhā''dhikyakaraṇārthaṃ prairayad devaśilpinaḥ |
bhṛgvādiṣṭo gururlagnaṃ dṛṣṭvā vilikhya patrikām || 101 ||
[Analyze grammar]

dhāma yayau dadau bhūmne vādyānyavādayacca saḥ |
nāradaṃ preṣayāmāsā''hvanārthaṃ triṣu sṛṣṭiṣu || 102 ||
[Analyze grammar]

baliśeṣādayaḥ pātālasthā ākāritāstathā |
parvatādyāḥ saritaśca tīrthāni jaḍacetanāḥ || 103 ||
[Analyze grammar]

ṛṣayo munayo devāḥ pitaro brahmacāriṇaḥ |
sādhvyaśca sādhavaḥ sarve sātvatā āhutāstathā || 104 ||
[Analyze grammar]

īśāśceśeśvarāścāpi bhagavanto digīśvarāḥ |
lokapālāḥ prajāpālāstattveśāḥ parameśvarāḥ || 105 ||
[Analyze grammar]

brahmāṇo viṣṇavo rudrā ādityā vasavastathā |
vairājā vālakhilyāśca yāmyā grahāśca tārakāḥ || 106 ||
[Analyze grammar]

ketavaścāvaraṇasthā īśvarā amṛtā'kṣarāḥ |
vaikuṇṭhasthāśca golokavāsinaḥ śvetadhāmagāḥ || 107 ||
[Analyze grammar]

māyālokaparāścānye tejaḥparāstathā'pare |
muktāśca dhāmavāsāśca śaktayo muktayoṣitaḥ || 108 ||
[Analyze grammar]

brahmāṇyaḥ sāṃkhyayoginyo bhagavatyaśca devatāḥ |
īśvariṇyastathā''rṣyaśca vedā vedānya ityapi || 109 ||
[Analyze grammar]

avatārāstathā cāvatāriṇyo hariyoṣitaḥ |
mānavyo vallikāḥ sarvā kāśyapyaḥ pramadāstathā || 110 ||
[Analyze grammar]

kumārikāśca sadhavāstathā haridhavāḥ parāḥ |
jaḍāśca cetanāḥ sarvāḥ samahūtāśca yoṣitaḥ || 111 ||
[Analyze grammar]

kṛṣṇanārāyaṇasyātra bhārgavyā saha lagnake |
vivāhotsavavṛddhyarthaṃ mādhyāmāyāntu madgṛhe || 112 ||
[Analyze grammar]

akṣarādhipatiḥ sākṣātpuruṣottamasaṃjñakaḥ |
ākārayāmyatipremṇaikādaśyāṃ madgṛhe śubhe || 113 ||
[Analyze grammar]

maṇḍapārohaṇe yāne kanyāpitṛgṛhe tathā |
sahāyāḥ santu sarve vai svayaṃ tuṣyāmyahaṃ hariḥ || 114 ||
[Analyze grammar]

akṣare mama dhāmnyatra samāgacchantu sagṛhāḥ |
sarve vayaṃ gamiṣyāmo bhuvi bhārgavapattanam || 115 ||
[Analyze grammar]

narmadāyāstaṭe ramye śuklatīrthe kṛtāśrame |
bhārgavyāstu vivāhārthaṃ tato yāsyāma īśvarāḥ || 116 ||
[Analyze grammar]

kuṃkumapatrikāstvevaṃ brahmāṇḍeṣu pratistaram |
preṣitāḥ pārṣadaiścātha maṃgalānyabhavaṃstataḥ || 117 ||
[Analyze grammar]

devyastu gītikāścakrurmaṃgalāyatanāḥ śubhāḥ |
kṛṣṇanārāyaṇaṃ piṣṭacūrṇamardanamācaran || 118 ||
[Analyze grammar]

vādakāścāruvādyāni sarvataścāpyavādayan |
jagustu devagandharvā nartakyo nṛtyamācaran || 119 ||
[Analyze grammar]

mahīmānāḥ samājagmurakṣarākhyaṃ gṛhaṃ prati |
mānaṃ satkāramācakre bhagavān puruṣottamaḥ || 120 ||
[Analyze grammar]

bhojayāmāsa divyāni miṣṭānnānyamṛtāni ca |
pāyayāmāsa divyāni vārīṇyamṛtakāni ca || 121 ||
[Analyze grammar]

śṛṃgāraveṣaramyāṇi yānavāhanakāni ca |
koṭiśo hastinaḥ śvetā garuḍāḥ koṭiśastathā || 122 ||
[Analyze grammar]

haṃsāḥ siṃhā vṛṣā nīlakaṇṭhāścāpi ca koṭiśaḥ |
aśvāśca koṭiśo divyāḥ śarabhā gavayādayaḥ || 123 ||
[Analyze grammar]

arbudāḥ śeṣaśayyāśca śibikāḥ koṭikoṭiśaḥ |
paryyaḥ sapakṣāścānantā īśānyaḥ pakṣacārikāḥ || 124 ||
[Analyze grammar]

saṃyuñjanti sma vāhinyāṃ vivāhaprotsavotsukāḥ |
anantāścākṣaramuktā golokasthā anantakāḥ || 125 ||
[Analyze grammar]

śrīkṛṣṇena saha yātā vaikuṇṭhasthā asaṃkhyakāḥ |
amṛtasthā hiraṇyasthā āvṛtisthā virāṭsthitāḥ || 126 ||
[Analyze grammar]

satyasthāśca janādisthā devāḥ sṛpāśca mānavāḥ |
sthāvarā jaṃgamāḥ sarve vāhinyāmāyayurmudā || 127 ||
[Analyze grammar]

kṛṣṇanārāyaṇasyā'sti bhārgavyā saha lagnakam |
gacchāmastaddarśanārthaṃ samāyāntu kuṭumbinaḥ || 128 ||
[Analyze grammar]

iti sarve mudā yātāḥ pūjitā bhojitāstathā |
ābālavṛddhāḥ saṃbhūya vāhinyāṃ miśritāstadā || 129 ||
[Analyze grammar]

varaḥ śṛgāritaḥ samyag yathā rādheśvaro'paraḥ |
sā'kṣatakuṃkumapuṣpamālāmbaravibhūṣaṇaiḥ || 130 ||
[Analyze grammar]

ratnamauktikasauvarṇaśṛṃkhalormikakajjalaiḥ |
sugandharasacūrṇādyairāśīrbhirvardhitaḥ punaḥ || 131 ||
[Analyze grammar]

bhārgavyāśca vivāhārthaṃ yayau ṣoḍaśahāyanaḥ |
akṣarabrahmalokādvai vaikuṇṭhalokalambinī || 132 ||
[Analyze grammar]

vāhinī sā'bhavaddīrghā varapakṣānuyāyinī |
nṛtyamaṃgalavādyādikaṇṭhaghoṣādirañjitā || 133 ||
[Analyze grammar]

arbudā'rbudasaṃkhyāsthā śuklatīrthaṃ samāyayau |
brahmāṇḍeṣu ca sarveṣu maṃgalānyabhavaṃstadā || 134 ||
[Analyze grammar]

koṭibhūmikavaikuṇṭhe divye revātaṭe śubhe |
śatayojanavistāre lakṣayojanasūcchraye || 135 ||
[Analyze grammar]

nārāyaṇecchayā'gamyā''yatocchrāyamaye śubhe |
asaṃkhyavāhinīlokā yayustatra harīcchayā || 136 ||
[Analyze grammar]

aṇimā mahimā prāptiḥ prākāmyaṃ laghimā tathā |
garimā vaśitā kāmāvasāyitā ca siddhayaḥ || 137 ||
[Analyze grammar]

bhavanti tu hareryatra tatrāścaryaṃ nu vai kimu |
brahmāṇḍānyapyasaṃkhyāni yadromṇā vivareṣu vai || 138 ||
[Analyze grammar]

aṇumātre sthale santi tatrā''ścaryaṃ nu vai kimu |
evaṃ samāgatā śuklatīrthe sā varavāhinī || 139 ||
[Analyze grammar]

viśaśrāma sukhaṃ tatra naije vaikuṇṭhake mudā |
snātāśca bhojitāḥ suptā dhāmadhāmanivāsinaḥ || 140 ||
[Analyze grammar]

sarvatra maṃgalaṃ jātaṃ sotsukāḥ prāṇinastadā |
āyānti śuklatīrthaṃ te vivāhaḥ padmayoriti || 141 ||
[Analyze grammar]

sāvitryā sahito brahmā bhavānyā ca bhavaḥ svayam |
anantaścāpi bhoginyā dharmo mūrtyādibhiḥ saha || 142 ||
[Analyze grammar]

bhāskaraḥ prabhayā sākaṃ svāhayā tu hutāśanaḥ |
smṛddhyā sākaṃ kuberaśca varuṇo vāruṇīyutaḥ || 143 ||
[Analyze grammar]

pavanaścāpi cāṃjanyā yamo dhūmyā sahā''yayau |
rohiṇyādiyutaścandraḥ śacīyuktaḥ sureśvaraḥ || 144 ||
[Analyze grammar]

rudrāṇyādiyutā rudrā ādityāḥ saha saṃjñayā |
vasavaścāpi gandharvāḥ kinnarā devadānavāḥ || 145 ||
[Analyze grammar]

āyayuḥ śuklatīrthaṃ te vivāhaḥ padmayoriti |
dṛṣṭvā tu devatādyā vai vaikuṇṭhaṃ nūtanaṃ kṛtam || 146 ||
[Analyze grammar]

ākāśācca vimānaiśca samprāpya narmadātaṭam |
pattanaṃ nūtanaṃ caiva bhṛgukacchasamīpataḥ || 147 ||
[Analyze grammar]

muktāmāṇikyahīrādiratnarājivirājitam |
paritaścaturasraṃ ca śatayojanasammitam || 148 ||
[Analyze grammar]

saptabhiḥ parikhābhiśca gaṃbhīrābhistu veṣṭitam |
prākāraiḥ ṣoḍaśalakṣaistrayastriṃśatsarovaraiḥ || 149 ||
[Analyze grammar]

sapadmaiḥ sarvatobhadraiḥ puṣpodyānā'yutā'yutaiḥ |
praphullapuṣpaiḥ pavanaiḥ sarvatra surabhīkṛtam || 150 ||
[Analyze grammar]

āmoditaṃ ca śītena mandacandanavāyubhiḥ |
tarubhiḥ koṭilakṣaiśca bhūṣitaṃ cāmrabhūruhaiḥ || 151 ||
[Analyze grammar]

nārīkelaiśca panasairnavaraṃgaiśca dāḍimaiḥ |
drākṣābhirnāgavallībhirelālavaṃgakaiśca ha || 152 ||
[Analyze grammar]

badarībhiśca bilvaiśca jambūbhiścampakaistathā |
bakulaistintiḍībhiśca jambīrairikṣubhistathā || 153 ||
[Analyze grammar]

kharjūrairnāgaraṃgaiśca dhātrībhiḥ phalavaddrumaiḥ |
anyairudyānavaryaiśca yuktaṃ śādvalasaṃplutam || 154 ||
[Analyze grammar]

asaṃkhyairmandirai ramyairatyuccairapi saṃskṛtam |
tattaddhāmnāṃ sucitraiśca rājitaṃ kalaśānvitaiḥ || 155 ||
[Analyze grammar]

maṇisopānanikarairdivyastaṃbhojjvalaṃ tathā |
darpaṇaiḥ sūkṣmavastraiśca śobhitaṃ śvetacāmaraiḥ || 156 ||
[Analyze grammar]

prāṃgaṇaiḥ padmarāgādyairindranīlapariṣkṛtam |
sacatvaraiḥ rājamārgairdevadevībhirañcitam || 157 ||
[Analyze grammar]

dṛṣṭvā vaikuṇṭhanagaraṃ sarve te vismayaṃ yayuḥ |
viṣṇuḥ padmaḥ śrīśca padmā śvaśurastu bhṛguḥ svayam || 158 ||
[Analyze grammar]

jāmātā bhagavān yatra kiṃ nyūnaṃ yatra vai bhavet |
gāndharvāḥ kinnarā vidyādharyaḥ kinnarya īśikāḥ || 159 ||
[Analyze grammar]

nartakyo gāyikā vādyabhāṇḍakā gāyakāstathā |
bhikṣukā gaṇakā bhaṭṭā bhūpā vaidyāśca sevakāḥ || 160 ||
[Analyze grammar]

naṭā mallā bahurūpā veṣadhrā mānavāstathā |
sotsāhā āyayustatra vivāhaḥ padmayoriti || 161 ||
[Analyze grammar]

bhṛgukacche'pi sannyāsiyatinaiṣṭhikayoginaḥ |
bhṛgvāhūtā āyayurvai vivāhaḥ padmayoriti || 162 ||
[Analyze grammar]

sanakaśca sanandaśca sanat sanātanastathā |
āyayustrikoṭiśiṣyairvivāhaḥ padmayoriti || 163 ||
[Analyze grammar]

durvāsā lakṣaśiṣyaiśca lakṣyabhṛtyaiśca kaśyapaḥ |
patnīvato lakṣaśiṣyairvivāhaḥ padmayoriti || 164 ||
[Analyze grammar]

gautamo'yutaśiṣyaiśca vālmīko'yutaśiṣyakaiḥ |
śukraśca koṭiśiṣyo'gurvivāhaḥ padmayoriti || 165 ||
[Analyze grammar]

bhāradvājo'yutaśiṣyaiḥ koṭyā bṛhaspatiḥ svayam |
aṃgiro'yutaśiṣyaiśca vivāhaḥ padmayoriti || 166 ||
[Analyze grammar]

lakṣaśiṣyairvaśiṣṭhaśca pracetā lakṣaśiṣyavān |
pulastyo lakṣaśiṣyo'pi vivāhaḥ padmayoriti || 167 ||
[Analyze grammar]

agastyo lakṣaśiṣyaiśca pulaho lakṣaśiṣyayuk |
kraturlakṣeṇa cātristu koṭiśiṣyeṇa cāgataḥ || 168 ||
[Analyze grammar]

marīcirlakṣaśiṣyaiśca śatānandaḥ sahasrakaiḥ |
bhṛgorgṛhaṃ samājagmurvivāhaḥ padmayoriti || 169 ||
[Analyze grammar]

sārdhaṃ sahasraśiṣyaiśca ṛṣyaśṛṃgo vibhāṇḍakaḥ |
pāṇiniḥ koṭiśiṣyaiścā'yutaiḥ kātyāyanastathā || 170 ||
[Analyze grammar]

yājñavalkyaḥ sahasraiśca vyāsaḥ koṭipraśiṣyakaiḥ |
gargoyutena śiṣyāṇāṃ vivāhaḥ padmayoriti || 171 ||
[Analyze grammar]

gālavo'pi sahasreṇa sahasreṇa ca saubhariḥ |
koṭinā lomaśaścāpi vivāhaḥ padmayoriti || 172 ||
[Analyze grammar]

sāndīpanirdevalaśca mārkaṇḍeyaśca lakṣakaiḥ |
pañcaśikhaśca gopālo voḍhuśca lakṣaśiṣyakaiḥ || 173 ||
[Analyze grammar]

svayaṃprakāśastathā'haṃ naro nārāyaṇaḥ prabhuḥ |
viśvāmitraḥ koṭibhiśca vivāhaḥ padmayoriti || 174 ||
[Analyze grammar]

jaratkāruśca lakṣeṇā'stīkaścā'yutaśiṣyakaiḥ |
parśurāmaḥ sahasreṇa vivāhaḥ padmayoriti || 175 ||
[Analyze grammar]

vatsaḥ śatena dakṣastriśatena kapilo'yutaiḥ |
savarto'yutaśiṣyādyairvivāhaḥ padmayoriti || 176 ||
[Analyze grammar]

utathyaḥ śataśiṣyaiśca śataiścāpi ca bhāgu riḥ |
samāyayustvasaṃkhyātā vivāhaḥ padmayoriti || 177 ||
[Analyze grammar]

bhṛgoḥ khyātyāṃ samutpannāṃ lakṣmīṃ nārāyaṇapriyām |
kṛṣṇaṃ lagnayituṃ yāmo vivāhaḥ padmayoriti || 178 ||
[Analyze grammar]

devau dhātāvidhātārau merorjāmātarāvubhau |
lakṣmyāśca bhrātarau teṣāṃ sammānaṃ vai pracakratuḥ || 179 ||
[Analyze grammar]

āyatirniyatiścāpi meroḥ kanye pativrate |
tayordhātṛvidhātṛbhyāṃ prāṇo mṛkaṇḍuraurasau || 180 ||
[Analyze grammar]

mārkaṇḍeyo mṛkaṇḍośca prāṇod vedaśirā sutaḥ |
marīcerapi saṃbhūtau pūrṇamāsaḥ sutastathā || 181 ||
[Analyze grammar]

kanyācatuṣṭayaṃ tuṣṭirvṛṣṭiḥ kṛṣṭiścāpacitiḥ |
virajāḥ parvataścobhau pūrṇamāsasya vai sutau || 182 ||
[Analyze grammar]

pulahasya kṣamā patnī putrāḥ kardama ityatha |
varīyāṃśca sahiṣṇuśca kanīyāṃśceti vai yayuḥ || 183 ||
[Analyze grammar]

atreḥ patnī hyanasūyā putrāḥ somaśca dattakaḥ |
durvāsāścāthāṃgirasaḥ putrī nāmnā smṛtistathā || 184 ||
[Analyze grammar]

vāsiṣṭhāḥ śaktimukhyāśca vāhneyā kratuputrakāḥ |
agniṣvāttā bārhiṣadā ājyapāḥ somapāstathā || 185 ||
[Analyze grammar]

vālakhilyāśca ṛṣayo dharaṇī merubhāminī |
parvatāḥ saritaścāpi sarāṃsyupavanāni ca || 186 ||
[Analyze grammar]

evamṛṣīṇāṃ vistārā vaṃśāstatra mahotsave |
bhṛgorgṛhaṃ samāyātā vivāhaḥ padmayoriti || 187 ||
[Analyze grammar]

matsyaḥ kūrmo varāhaśca nṛsiṃhaḥ ṛṣabhastathā |
kapilo vāsudevāśca pṛthurdatto munīśvaraḥ || 188 ||
[Analyze grammar]

haṃso harirvāmanaśca parśurāmaḥ kumārakāḥ |
yajño rāmo hyagrīvo nārado rājarājakaḥ || 189 ||
[Analyze grammar]

vyāsaḥ kṛṣṇaśca buddhaśca kalkirnārāyaṇaḥ svayam |
palīvratastathā cānye śiṣyāḥ yogiprayogiṇaḥ || 190 ||
[Analyze grammar]

saurāṣṭrīyā raivatādreryogasiddhāḥ samāyayuḥ |
patnīyuktāḥ samāyātā vivāhaḥ padmayoriti || 191 ||
[Analyze grammar]

kanyāpakṣasya māṇḍapyā hyāsan koṭyabjakā'dhikāḥ |
varapakṣasya vāhinyā hyāsaṃstato'pyasaṃkhyakāḥ || 192 ||
[Analyze grammar]

dvādaśyāṃ bhojyapānādyaiḥ satkṛtā mahīmānakāḥ |
viśaśramuśca te rātrau gītanṛtyādirañjitāḥ || 193 ||
[Analyze grammar]

maṃgalāni vividhāni lokācārāḥ kṛtāḥ parāḥ |
hṛṣṭasaddhradayāḥ sarve hyāsan prasannatoṣitāḥ || 194 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye bhṛgoḥ putryā bhārgavyā lakṣmyā kṛtatapasā tuṣṭaḥ śrīkṛṣṇanārāyaṇo bhṛgukacchanikaṭe śuklatīrthe vaikuṇṭhaṃ kārayitvā vivāhārthaṃ samāgatastadvāhinībhṛgumahīmānādivarṇananāmā dvyaśītyadhikatriśatatamo'dhyāyaḥ || 382 ||
[Analyze grammar]