Chapter 372

śrīnārāyaṇa uvāca |
śṛṇu lakṣmi ca padmāyāścaritraṃ pāpanāśakam |
anaraṇyasya putryāstaddharmaśāpātmakaṃ śubham || 1 ||
[Analyze grammar]

pātivratyaṃ pālayantyā pitrājñāvartamānayā |
padmayā yugabhedena dharmahrāsaḥ kṛtaḥ purā || 2 ||
[Analyze grammar]

jātamātraṃ yauvanaṃ ca tayaiva viphalīkṛtam |
bālyaṃ kumāratā paścād yauvanaṃ vṛddhatā tataḥ || 3 ||
[Analyze grammar]

ityādikaṃ tayā loke kṛtaṃ lakṣmi kramāgatam |
manuvaṃśodbhavo rājā so'naraṇyo mahāyaśāḥ || 4 ||
[Analyze grammar]

ciraṃjīvī dharmaśīlo vaiṣṇavo vijitendriyaḥ |
maṃgalā'raṇyaputraḥ sa indrasāvarṇivaṃśajaḥ || 5 ||
[Analyze grammar]

dharāraṇyasya putro'bhūnmaṃgalāraṇya eva ha |
aputrako dharāraṇyastapase puṣkaraṃ gataḥ || 6 ||
[Analyze grammar]

suciraṃ ca tapastaptvā varaṃ labdhvā pareśvarāt |
samprāpto vaiṣṇavaṃ putramanaraṇyaṃ jitendriyam || 7 ||
[Analyze grammar]

datvā tasmai sa rājyaṃ svaṃ jagāma tapase vanam |
anaraṇyastataścakre bhṛguṇā tu purodhasā || 8 ||
[Analyze grammar]

yajñānāṃ śatakaṃ śreṣṭhaṃ tasthau vairāgyavṛttikaḥ |
tucchaṃ matvā ca śakratvaṃ na lebhe naśvaraṃ padam || 9 ||
[Analyze grammar]

babhūvuḥ śataputrāśca sarve pitṛsamā guṇe |
kanyaikā sundarī ramyā padmā padmālayāsamā || 10 ||
[Analyze grammar]

tasyā yogyavarā'nveṣaṇārthaṃ yatnaṃ cakāra saḥ |
tāvat tapovane pippalādarṣistatra nirjane || 11 ||
[Analyze grammar]

strībhiḥ ramantaṃ gandharvaṃ dṛṣṭvā vai kāmuko'bhavat |
athā'yaṃ puṣpabhadrāyāṃ snātuṃ gacchanmunīśvaraḥ || 12 ||
[Analyze grammar]

dadarśa padmāṃ yuvatīṃ padmāvatārarūpiṇīm |
manoramāṃ vilokyaiva dārasaṃgrahabhāvanaḥ || 13 ||
[Analyze grammar]

keyaṃ kasyeti papraccha samīpasthāṃstapasvinaḥ |
te ca nivedanaṃ cakruḥ padmā'naraṇyajā tviti || 14 ||
[Analyze grammar]

muniḥ snātvā'bhīṣṭadevaṃ sampūjya puruṣottamam |
jagāma kāmī bhikṣārthamanaraṇyasabhā'jire || 15 ||
[Analyze grammar]

rājā dṛṣṭvā muniṃ śīghraṃ praṇanāmā'tibhaktitaḥ |
madhuparkādikaṃ datvā pūjayāmāsa sādaram || 16 ||
[Analyze grammar]

munirvijñāpito rājñā yatheṣṭaṃ varaṇāya vai |
pippalādastadā padmāṃ yayāce kanyakāṃ śubhām || 17 ||
[Analyze grammar]

śrutvā maunī nṛpo jātaḥ kiñcinnirvaktumakṣamaḥ |
muniḥ prāha tadā taṃ vai dehi kanyāṃ nṛpottama || 18 ||
[Analyze grammar]

athavā bhasmasāt sarvaṃ kariṣyāmi kṣaṇena vai |
sarve babhūvurācchannā bhṛtyāśca munitejasā || 19 ||
[Analyze grammar]

śuśoca rājā rājñī ca dṛṣṭvā vṛddhaṃ jvarānvitam |
mahiṣyaḥ śuśucuḥ sarvā itikartavyatā'kṣamāḥ || 20 ||
[Analyze grammar]

kanyāmātā vilalāpa kanyāduḥkhaṃ vicintya vai |
tadvilokya pippalādo bodhayāmāsa bhūmipam || 21 ||
[Analyze grammar]

mahiṣīṃ nṛpaputrāṃśca bhṛtyāṃśca kanyakāṃ tathā |
adya vā'nyadivase vā dātavyā kanyakā bhavet || 22 ||
[Analyze grammar]

yasmai kasmai pradātavyā dehi viprāya me nṛpa |
satpātraṃ brāhmaṇādanyanna paśyāmi jagattraye || 23 ||
[Analyze grammar]

parāya viprādanyasmai naiva tvaṃ dātumarhasi |
sutāṃ datvā ca me rājan rakṣasva sarvasampadaḥ || 24 ||
[Analyze grammar]

kanyānimittaṃ sarvasvaṃ mā te bhasmagataṃ bhavet |
ityetadvākyamatyugraṃ śrutvā kanyāpi śobhanā || 25 ||
[Analyze grammar]

piturhitaṃ cintayānā gauravaṃ tapasāmṛṣeḥ |
sarvasampadavighnatvaṃ prāha rājñe pradehi mām || 26 ||
[Analyze grammar]

tataḥ sālaṃkṛtāṃ padmāṃ rājā rājñī dadau mudā |
kāntāṃ prāpya pippalādo muditastapasā jvalan || 27 ||
[Analyze grammar]

darśayāmāsa rūpaṃ svaṃ yauvanaṃ yogakṛdbalāt |
aṣṭādaśasamāyogyaṃ kanyāyogyaṃ hi kāmadam || 28 ||
[Analyze grammar]

rājādayo'tisaṃhṛṣṭāḥ kanyā tutoṣa cāntare |
yautakaṃ ca tathā kāntāṃ gṛhītvā munirāḍ yayau || 29 ||
[Analyze grammar]

anaraṇyaḥ pūrṇamanā jagāma tapase tataḥ |
mano mokṣe dadhau tatra cintayan rādhikeśvaram || 30 ||
[Analyze grammar]

kṛṣṇanārāyaṇaṃ prāpya golokaṃ saṃjagāma ha |
kīrtyaraṇyo jyeṣṭhaputro rājyaṃ tasya cakāra vai || 31 ||
[Analyze grammar]

athā'naraṇyasya kanyā siṣeve bhaktitaḥ ṛṣim |
karmaṇā manasā vācā lakṣmīnārāyaṇaṃ yathā || 32 ||
[Analyze grammar]

pātivratyaparā nityaṃ sevate śrīhariṃ yathā |
aṃgasaṃmardanaṃ muneḥ pādasaṃvāhanaṃ muhuḥ || 33 ||
[Analyze grammar]

kāmecchāpūraṇaṃ śaśvaccakre'nuvṛttimāśritā |
snātvā snāpayati bhuṃkte bhojayitvā dvijaṃ patim || 34 ||
[Analyze grammar]

svāpayitvā svapityeva cānutiṣṭhati karmasu |
yathā vai tāpaso vṛddho rājaso'tha yuvā muniḥ || 35 ||
[Analyze grammar]

prasannaḥ syāttathā sevāṃ karotyaharniśaṃ satī |
manyamānā svakaṃ bhāgyaṃ śreṣṭhācchreṣṭhatamaṃ sadā || 36 ||
[Analyze grammar]

yadahaṃ brāhmaṇaṃ prāptāstatrāpi munitāpasam |
pavitraṃ puṇyarūpaṃ ca nārāyaṇasvarūpiṇam || 37 ||
[Analyze grammar]

yoginaṃ cātmavettāraṃ kā'nyā dhanyā mayā samā |
pavitrā'haṃ sadā jātā hyarthitā ṛṣiṇā svayam || 38 ||
[Analyze grammar]

mama bhāgyasya pāraṃ na puṇyapāraṃ na vidyate |
anekajanmapuṇyaiśca prāpyate bhagavānpatiḥ || 39 ||
[Analyze grammar]

so'yaṃ sākṣāt kṛṣṇanārāyaṇo labdhaḥ patirmayā |
tasyaiva sevayā muktistasya toṣe'kṣaraṃ padam || 40 ||
[Analyze grammar]

tasyaiva hṛdaye brahma brahma labdhaṃ mayā tataḥ |
nā'tra me mokṣaṇe tvanyatsādhanaṃ pariśiṣyate || 41 ||
[Analyze grammar]

mama pitrā śubhaṃ dattā svastyastu janakasya me |
svastyastu mama mānuśca yā'haṃ jātā sukhā'nvitā || 42 ||
[Analyze grammar]

sarvaṃ labdhaṃ mayā tvatra pippalāde ṛṣīśvare |
jñānatṛptī ratitṛptirbhogatṛptiśca labhyate || 43 ||
[Analyze grammar]

yaśastṛptiḥ khyātitṛptiḥ pūjātṛptiśca labhyate |
rājyabhāro duḥkhado'ti mahiṣītvaṃ tato'dhikam || 44 ||
[Analyze grammar]

mahiṣīṇāṃ na vai śāntiḥ pañjarapakṣiṇāṃ yathā |
dharmo'rthaḥ kāmanā'traiva bhujyate sukhato mayā || 45 ||
[Analyze grammar]

na tathā taptacittābhirmahiṣībhiḥ prabhujyate |
śubhaṃ jātaṃ tu yajjātaṃ sarvaṃ daivaṃ mayā'rjitam || 46 ||
[Analyze grammar]

madyamāṃsādanṛpatikare na patitā'smyaham |
tadeva puṇyaṃ me cātra prahṛṣṭaṃ rakṣakaṃ mama || 47 ||
[Analyze grammar]

kumārikā na jānanti rājasyo rājapīḍanam |
paścāt patitvā śocanti vayaṃ kva niraye gatāḥ || 48 ||
[Analyze grammar]

sādhuśīlo devaguṇaḥ patiḥ sarvatra durlabhaḥ |
bhogako mārakaḥ śveva patiḥ sarvatra cāpyate || 49 ||
[Analyze grammar]

bhogairdehaṃ kṣapayati puṇyaṃ nāśayati tvaghaiḥ |
yamalokaṃ prāpayati sulabhastādṛśaḥ patiḥ || 50 ||
[Analyze grammar]

svārthamātraparo yaśca paralokā'sahāyakṛt |
na patiḥ sa yathārtho'sti yadyogānnarakaṃ dhruvam || 51 ||
[Analyze grammar]

tasmādatra paratraiva cā'rdhāṃgamiva rakṣati |
sṛṣṭau mokṣe sukhe duḥkhe sahagāmī patiḥ patiḥ || 52 ||
[Analyze grammar]

etādṛśaṃ patiṃ prāpya yā na prasevate tu tam |
karmaṇā manasā vācā sā bhaved vañcitā sadā || 53 ||
[Analyze grammar]

kulasya guṇajālasya rūpasya buddhidharmayoḥ |
mānaṃ na sarvathā rakṣyaṃ patyagre kulayoṣitā || 54 ||
[Analyze grammar]

dehaṃ patirmanaḥ svāmī tvabhimānaṃ patirmama |
kāryakāraṇasaṃghātaṃ sukhaṃ duḥkhaṃ patirmama || 55 ||
[Analyze grammar]

bhojyaṃ bhogobhoktṛvṛttirbhogyaṃ sarvaṃ patirmama |
viśvāso varadānaṃ ca nyāsaścāpi patirmama || 56 ||
[Analyze grammar]

dīnatā śreṣṭhitā sthairyaṃ cānukūlyaṃ patirmama |
vrataṃ dharmastathā puṇyaṃ tīrthaṃ dānaṃ patirmama || 57 ||
[Analyze grammar]

svādhyāyapāṭhapūjāśca sandhyādharmaḥ patirmama |
utsavaśca samājaśca pradarśanaṃ patirmama || 58 ||
[Analyze grammar]

yānaṃ ca nāṭakaṃ ramyaṃ nṛtyaṃ gānaṃ patirmama |
bhavanaṃ rājyasamṛddhirgajavājaṃ patirmama || 59 ||
[Analyze grammar]

gururbrahmā haro viṣṇuḥ sarve devāḥ patirmama |
vaiśvadevo'titheḥ pūjā prāghūrṇikaḥ patirmama || 60 ||
[Analyze grammar]

garbhaḥ putro ratiḥ prītirnaiḥśreyasaṃ patirmama |
dhāma kṣetraṃ dharā rājyaṃ yatsarvasvaṃ patirmama || 61 ||
[Analyze grammar]

niṣedhaśca vidhiścāpi svairiṇītvaṃ patirmama |
iti tṛptiṃ parāṃ matvā sevāṃ karomi vai ṛṣeḥ || 62 ||
[Analyze grammar]

evaṃ nityānandatṛptā lakṣmi sā rājakanyakā |
siṣeve tamṛṣiśreṣṭhaṃ sākṣānnārāyaṇaṃ yathā || 63 ||
[Analyze grammar]

tasyā dharmaparīkṣārthaṃ dharmadevo hyacintayat |
kīdṛśīyaṃ pātivratyaparā vartata eva nu || 64 ||
[Analyze grammar]

ekadā svarṇadīṃ snātuṃ prayātāṃ sasmitāṃ satīm |
dadarśa pathi dharmastu māyayā nṛpaliṃgakaḥ || 65 ||
[Analyze grammar]

svarṇaratnarathārūḍhaḥ svarṇaratnādibhūṣitaḥ |
navayauvanarūpāḍhyaḥ kāmadeva ivā'paraḥ || 66 ||
[Analyze grammar]

surūpāṃ sundarīṃ dṛṣṭvā padmāmuvāca māyayā |
aho surūpā kānteyaṃ kva ca kva jarjaro muniḥ || 67 ||
[Analyze grammar]

ayi sundari lakṣmīva rājayogye'ti sūjjvale |
prakṛṣṭayauvanasthe ca kāmagarvahare śubhe || 68 ||
[Analyze grammar]

jarādagdhasya vṛddhasya samīpe kiṃ virājase |
kāṣṭhapāṣāṇatulyasyā'sthimātraśeṣitasya ca || 69 ||
[Analyze grammar]

rājayogyā'si rājendri rājase rājavakṣasi |
candanāguruliptāṃgā svarṇaratnādibhūṣitā || 70 ||
[Analyze grammar]

dāsadāsīśatairyuktā sukhinī bhava sundari |
vipraṃ tapaḥkṛśaṃ śuṣkaṃ brahmonmukhaṃ kṣiṇāyuṣam || 71 ||
[Analyze grammar]

vihāya paśya rājendraṃ ratau śūraṃ bhuvāṃ patim |
svargasukhasmṛddhaṃ samāvasthaṃ ca mādṛśam || 72 ||
[Analyze grammar]

kiṃ parṇakuṭyāṃ sukhamasti kiṃcit |
kiṃ kaṃdhare pakṣijaṭe'sti saukhyam |
kiṃ cā'sthibhastrāmavalambase tvam |
āyāhi cintāmaṇiracyute'tra || 73 ||
[Analyze grammar]

prāpnuhi cinmaṇimacyute mayi |
tvaṃ kalpavallī bhavasīti saṃvṛṇe |
ratnaṃ pinaddhaṃ kanake praśobhate |
na śaṃkhayogye khalu pāśave gale || 74 ||
[Analyze grammar]

prāpnoti sundaraṃ puṇyāt saundaryaṃ pūrvajanmataḥ |
saphalaṃ tadbhavet sarvaṃ rasikā''liṃganena tu || 75 ||
[Analyze grammar]

yathā kāntā tathā kāntaṃ kāmakāryaviśāradam |
kiṃkaraṃ kuru māṃ kānte sarvaṃ dāsyāmi te'naghe || 76 ||
[Analyze grammar]

sajalo nirjane ramye vane'raṇye ca parvate |
nadyāṃ nade samudyāne puṣpite gandhaśālini || 77 ||
[Analyze grammar]

yāne vimāne sāmrājye malaye raivate girau |
anye candanavṛkṣāḍhye vihariṣyāmi vai tvayā || 78 ||
[Analyze grammar]

kāmajvarapradagdhāyāḥ śāntiṃ kartumahaṃ kṣamaḥ |
viharasva mayā sārdhaṃ janmedaṃ saphalaṃ kuru || 79 ||
[Analyze grammar]

ityuktavantaṃ rājānaṃ kare gṛhītumutsukam |
nikaṭaṃ tu samāyāntaṃ dharmaṃ prāha pativratā || 80 ||
[Analyze grammar]

dūraṃ gaccha gaccha dūraṃ pāpacintāparo hyasi |
māṃ cet spṛśasi kāmena sadyo bhasma bhaviṣyasi || 81 ||
[Analyze grammar]

ahaṃ vivāhitā nārī pippalādarṣibhāminī |
pativratā na paśyāmi hṛdā'pi vai narāntaram || 82 ||
[Analyze grammar]

kathaṃ spṛśāmi pāpāṃśaṃ strījitaṃ lampaṭaṃ nṛpam |
adharmisparśamātreṇa sarvaṃ puṇyaṃ vinaśyati || 83 ||
[Analyze grammar]

paranārīṃ prasahyātra dharṣituṃ tvaṃ samudyataḥ |
na bhūmau pātakī tvādṛganyo bhavati bhūpatiḥ || 84 ||
[Analyze grammar]

ahaṃ brāhmaṇapatnyasmi tatra vṛddhatapasvinaḥ |
tāṃ mātaraṃ strībhāvaṃ kṛtvā yena bravīṣi mām || 85 ||
[Analyze grammar]

bhaviṣyati kṣayaste'tra dharṣiturmama śāpataḥ |
kṣayaṃ yāhi dhruvaṃ rājan hṛdā pāpena karmaṇā || 86 ||
[Analyze grammar]

śrutvā dharmaḥ satīśāpaṃ nṛparūpaṃ vihāya tu |
dharmadevaḥ svayaṃ bhūtvā'dṛśyata prāha tāṃ ca saḥ || 87 ||
[Analyze grammar]

mātarjānīhi māṃ dharmaṃ dharmajñānāṃ gurorgurum |
parastrīmātṛbuddhiṃ ca kurvantaṃ lokarakṣakam || 88 ||
[Analyze grammar]

ahaṃ tavā'ntarvijñātuṃ samāgato'smi padmike |
parīkṣituṃ rājarūpaṃ dhṛtavānasmi dhārmike || 89 ||
[Analyze grammar]

tathāpi svakṛtaṃ kiñcidakarmaṃ bhuṃjate janāḥ |
mayā kṛtaṃ cā'vamānaṃ tava vākyaistu niṣṭhuraiḥ || 90 ||
[Analyze grammar]

tatphalaṃ saṃprabhoktavyaṃ mayā nāstyatra saṃśayaḥ |
kṛtaṃ me damanaṃ tvatra na viruddhaṃ yathocitam || 91 ||
[Analyze grammar]

sarvathā me mṛtirmāstu sati tatprārthaye sadā |
śāstiḥ samutpathasyānāmīśvareṇa vinirmitā || 92 ||
[Analyze grammar]

śāsanaṃ tvatkṛtaṃ cāstu yathāsahyaṃ tu me sati |
padmovāca tadā dharma sākṣī tvameva dehinām || 93 ||
[Analyze grammar]

kathaṃ parīkṣituṃ tvetadrājarūpa dhṛtaṃ tvayā |
yannimittaṃ mayā śaptaścāparādho'bhavannu me || 94 ||
[Analyze grammar]

sādhvīśāpo na vai mithyā jāyate tu kadācana |
tava nāśe sṛṣṭināśo bhavedeva na saṃśayaḥ || 95 ||
[Analyze grammar]

tasmād yathā jīvanaṃ te śāpaśca sārthako bhavet |
tathā vadāmi dharmendra śṛṇu mānavabhedataḥ || 96 ||
[Analyze grammar]

satye jane catuṣpādo bhava tvaṃ dharma sarvathā |
tretāvyāptajane tvaṃ tripād bhava vṛṣa sarvathā || 97 ||
[Analyze grammar]

dvāparavyāptamanuje dvipādo dharma saṃbhava |
kalivyāptajane tvekapādaḥ śeṣe'stu te layaḥ || 98 ||
[Analyze grammar]

paśuprāye jaḍe dharma tvamācchanno bhaviṣyasi |
sāttvike pūrṇatā te'stu rājasādāvapūrṇatā || 99 ||
[Analyze grammar]

yadyat sthalaṃ tavādhāraṃ śrūyatāṃ vṛṣa vacmi tat |
haribhakteṣu sarveṣu vaiṣṇaveṣu viśeṣataḥ || 100 ||
[Analyze grammar]

sādhvīṣu sādhuṣu yatimuniṣu brahmacāriṣu |
pativratāsu prājñeṣu vānaprastheṣu bhikṣuṣu || 101 ||
[Analyze grammar]

dharmaśīleṣu sarveṣu vaiśyakṣatriyajātiṣu |
dvijaseviṣu śūdreṣu satāṃ saṃge sthiteṣu ca || 102 ||
[Analyze grammar]

aśvaḥvaṭabilveṣu tulasīcandaneṣu ca |
dīkṣāparīkṣāśapathagoṣṭhagopadabhūmiṣu || 103 ||
[Analyze grammar]

vivāheṣu ca sarvatra puṣpeṣu vṛkṣajātiṣu |
devālayeṣu tīrtheṣu satāṃ geheṣu sarvadā || 104 ||
[Analyze grammar]

vedā''mnāyavicāreṣu kṛṣṇakīrtanakāriṣu |
vratapūjātathonyāyayajñasākṣisthaleṣu ca || 105 ||
[Analyze grammar]

goprāṇiṣvatha haṃseṣu garuḍeṣu satīṣu ca |
kṛśatā tena bhavitā satyasthaleṣu sarvathā || 106 ||
[Analyze grammar]

kṛśatā tu tadanyeṣu sthaleṣu bhavitā śṛṇu |
puṃścalīṣu tu sarvāsu naraghātigṛheṣu ca || 107 ||
[Analyze grammar]

nīcamūrkhakhalanindāpareṣu ca śaṭheṣu ca |
devatāguruvipreṣṭapālyānāṃ dhanahāriṣu || 108 ||
[Analyze grammar]

dhūrteṣvasatsu duṣṭeṣu caureṣu vyavāyiṣu |
durodarasurāmāṃsakalahā'tikrameṣu ca || 109 ||
[Analyze grammar]

śālagrāmasādhutīrthakṣetrasevāpraghātiṣu |
dasyukarmaṇi garviṣṭe maṣījīvyasijīviṣu || 110 ||
[Analyze grammar]

bhartṛninditanārīṣu jīvahiṃsopajīviṣu |
dīkṣāsandhyādharmabhaktihīneṣu ca kalaṃkiṣu || 111 ||
[Analyze grammar]

kanyāyoṣitsuragranthavidyāvikrayiṣu nṛṣu |
mitradrohikṛtaghneṣu satyaviśvāsaghātiṣu || 112 ||
[Analyze grammar]

śaraṇāgatadīnā'ndhāśritaghneṣu mṛṣoktiṣu |
śaśvanmithyoktiśīleṣu tathā sīmāpahāriṣu || 113 ||
[Analyze grammar]

mithyāsākṣiṣu ca mithyānyāyadeṣu ca rājasu |
puṇyarodhiṣu sarveṣu na sthātuṃ śakyate tvayā || 114 ||
[Analyze grammar]

śuddhasāttvikaśānteṣu catuṣpāt tvaṃ sadā vasa |
sattvamiśrarajovṛddhau tripāt tvaṃ tritako vasa || 115 ||
[Analyze grammar]

rajomiśratamovṛddhau dvipāt tvaṃ dvāparo vasa |
tamomātrahṛdayeṣu tvekapāt tvaṃ kalirvasa || 116 ||
[Analyze grammar]

satyaṃṃ makhastapo dānaṃ catuṣpādāḥ purā tava |
ahiṃsādamanā''stikyadānānyadya padāni te || 117 ||
[Analyze grammar]

bhāvikāle bhaviṣyanti śīlaṃ śaucaṃ ca sevanam |
kīrtanaṃ ceti pādāste kramāt hrāse tathā vasa || 118 ||
[Analyze grammar]

ityuktvā virarāmaināṃ dharma āśiṣa ādadau |
dhanyāsi patibhaktāsi svasti te'stu hi santatam || 119 ||
[Analyze grammar]

yuvā bhavatu bhartā te rūpavān sthirayauvanaḥ |
cirajīvī bhavatveva mārkaṇḍeyādato'dhikam || 120 ||
[Analyze grammar]

dhanaiśvaryavatī tvaṃ ca saṃbhava sthirayauvanā |
mātā tvaṃ daśaputrāṇāṃ bhava saṃcirajīvinām || 121 ||
[Analyze grammar]

śrutvā padmā vṛṣaṃ pradakṣiṇaṃ kṛtvā praṇamya ca |
yayau svaṃ mandiraṃ sādhvī dharmo'pi svasthalaṃ yayau || 122 ||
[Analyze grammar]

prativratāṃ praśaśaṃsa pratisaṃsadi saṃsadi |
pativratāpi sā padmā pātivratyabalāt khalu || 123 ||
[Analyze grammar]

śataputravatī jātā sarvasaubhāgyasaṃbhṛtā |
evaṃ pativratā nārī dharmaṃ hantuṃ ca rakṣitum || 124 ||
[Analyze grammar]

svayameva samarthā'sti ko'nyastāṃ dharṣayejjanaḥ |
iti te kathitaṃ lakṣmi padmāyā vai kathānakam || 125 ||
[Analyze grammar]

dharmapuṣṭikaraṃ śaśvatpātivratyabalapradam |
svargamokṣapradaṃ cāpi sarvadharmapradaṃ tathā || 126 ||
[Analyze grammar]

patisevāpradaṃ caitatsaṃsāraśamanaṃ param |
bhaktyā śṛṇuyānnārī pātivratye dṛḍhā bhavet || 127 ||
[Analyze grammar]

śroturvaktustathā rakṣāṃ dhruvaṃ dharmo vidhāsyati |
pātivratyaṃ prapattiśca samāno dvau vṛṣau sadā || 128 ||
[Analyze grammar]

ekenaivā''pnuyātsarvaṃ dvitīyā'pekṣaṇaṃ nahi |
yatrobhau tatra vai lakṣmi kimu vaktavyamātmanā || 129 ||
[Analyze grammar]

pātivratyaṃ dāsadharmaḥ prapattiḥ snehadharmiṇī |
dāsyaṃ snaihyaṃ paraṃ labdhvā bhuktiṃ muktimavāpnuyāt || 130 ||
[Analyze grammar]

iti śrīlakṣmīnārāyaṇīyasahitāyāṃ prathame kṛtayugasantāne pativratāmāhātmye'naraṇyaputryāḥ pativratāyāḥ padmāyāḥ pippalādena lagnaṃ dharmakṛtaparīkṣāyāṃ dharmasya śāpaścatuṣpādānāṃ kālakrameṇa hrāsa ityādinirūpaṇanāmā dvāsaptatyadhikatriśatatamo'dhyāyaḥ || 372 ||
[Analyze grammar]